نسينا الموسيقى عديل كده – الطرب حدوث السقيا

الطرب حدوث السقيا


أو كأنه تحقق الرؤية

مدخل للخروج من غياهب الجب/الحزن

أو محاولة للهروب

طولت والله من الإستمتاع بالمزيكا، كلها بى "زِر أبوها" زى مت بتقول أمى وهى تعبر عن توتاليتى الأشياء
معناها شنو تحديدا، والله ما عارفه

طولنا منها حد الوحشة والله، لأنها والله أولا وبالتبادى، هى موية الروح زى ما قلت ليكم، يعنى ممكن تقول وجعلنا منها كل روح جميلة وتريانة

ذكرتنى "التراى" ، ذلك الذى يقوم بتطبيق فعل "الترا" وحاسى كده إنها كلمة نوبية لأنه تختص بصميم أعمال السعف، من القفاف للفوجة والبرش ووصولا إلى السباتة
كنت طوالى بقعد مع "أمى آمنة" والدة أمى، وأراقب كيف إنها ح "تضفر" ليها جزء من برش أو ما شابه، من بداية مرحلة الولادة الأولى الى حين إكتمال المعزوفة السغفية، المهم فى الموضوع هو إنه "التراى" عبارة عن "خيشتين مبلولات بالموية تب ويرقد بينهما مطمئنا مرتويا ذلك السغف السعيد

سرحت بينا "ترينة" الموسيقى ومرقتنا من الموضوع

الموسيقى كائن عجيب وغريب فعلا، شى من أجمل أشياء الدنيا، وبعد ده كله الزول ما يشوفه

مرات لما تحصل للزول حالة جذب ويكون بسمع، خلى الغنا هسه، ونركز على المزيكا بس، يكون بسمع فى "موزارت/موتسارت" ولا "تشايكوفسكى" أو قريبه "رحمانوف" الإتنين "سلافاب" طبعا، جيران أهل الإمبراطورية الهنغارية المجرية، الآريين، وتلقى ليك فالس من اشتراوس أ هبشه من فاجنر، ياخى هتلر، هتلر العديل ده، كان بموت فى فاجنر وقال ده أحسن كومبوسر فى الدنيا، مع إنه النمساويين هم الكانو عاملين الزخم كله، وهم طبعا"الصوفت كوبى" بتاعة الألمان، يعنى زى ما تحس كده إنه ناس ألمانيا ألمان مكابراب، وناس النمسا ألمان كتياب،هتلر كان بتذوق فاجنر، فما بالك لما الزول ما يكون هتلر، أو الزول يكون بسمع فى "يانى" معزوفة لى "برعى"أو "السمندل"، العجب لو كانو بعملو فى "ملهمة" التاج مصطفى، مرات لما يحصل ده كله، دائما بتكون عندى رغبة غريبة، أو هى أمنية تحديدا يعنى، إنه يا ريت لو هذا الكائن المدعو "الموسيقى" يا ريت لو يتجسد ويبقى شى ممكن الزول "يهبشه" بى إيده بدل روحه، كنت طوالى حأقالده مقالده شديدة جدا، وسوف لن أنفصل عنه ابدا حتى يظهر الخيط الأبيض من الخيط الأزرق فى أفق اللقيا، وفى النقطة دى بكون خلاص، تم إكمال عملية الرى والسقيا الجوانية، أو ما يسمى بالطرب

الزول يتلصق عليهو ولو "مر سيف بيننا ما عرفنا أدمى سال منى أم دمك"
أغنية فريد الأطرش

طولنا من سماع المزيكا، وأقول هو الحزن كل الحزن ولا شئ غير الحزن

زمان هنا فى البورد قبل كمين سنة ضوئية ، كانت فى ثلة من الحلوين متلملمين سوا وبجملو المحل بالمزيكا السمحة والأغنيات الجد جد، مروايد، رجاء العباسى، تمبس، راوية، معتصم دفع الله وخالد الحاج وعمك تنقو وخدر وعصام جبر الله ومين ومين ومين، كنا نعمل لمات عجيبة والزول يسمع ويضوق كل نكهات المزيكا
وكنا عاملين فريقين متنافسين، وكل فريق كان بفوز على نفسه من شدة السماحة والطعم الشهى، تتذكر بالله يا تمبس
أطلب "أغنية لبن الطير" للمطرب، أى إسم، وفى لحظات تلقاهو قدامك، شرق القلب، غرب الروح

مرة أتذكر كنا عاملين إحتفالية للزول الزين "جورج بنيوتى" فى بوست "جورج دى كفك ولا غيمة" ولما وصلنا الصفحة الرابعة، "خالد الحاج" قام أهدى لينا "الفصول الأربعة" بتاعة "فيفالدى" ذلك الإيطالى الما عادى، ده مثل واحد بس

والله الموسيقى هى موية الروح ، حتى الناس الما بتذوقوها أصلا، ليهم فيها نصيب وفير، لكنهم لا يشعرون، تتسلل جواهم وتروى الروح وتمرق من غير ما يحس بيها الزول، وفى ناس نص الكم، و ناس الثمالة الطينية والوصف أتى طبعا من "الوصول لمرحلة التطين حين ممارسة علاقة تذوقية بين الخمرجى والخمر،

المهم فى الموضوع

إنه يرجى إعتبار هذا الكلام بمثابة دعوة لكل الناس الحلوين هنا ومن لف لفهم، الناس الذواقين و السميعة بحق كما يقول أهل مصر، دعوة لرى المحلات كلها هنا وزراعة النغم فى كل حتة فى البورد، أنا طبعا أعانى من أمية تقنية مستفحلة، ولا حيلة لى فى ذلك، الكلام النضمى متوفر بكثرة، راقد رقاد، ودعوة لتلك الشرذمة الزاهية للعودة واللمة من جديد ورى المكان وتعهد سقيا هذه الأرواح الظامئة، وهى كثر

أو بمثابة "شحدة" حبيبة ضوء مموسق

ومعليش يا جماعة، كل الحكاية إنه "فى ضجر" زى ما بقول "غوار" وضجر شديد كمان

المطر الحبيب..

سلامات ومزيكا..

كأنك بتقرأ أفكاري.. لي كم يوم بتذكر في بوست المنافسة داك.. حتى إتحديت تمبس يومداك وقلت ليهو بقيت خطيرة وحأهزمهم (روعة) المرة دي..

من فترة أدمنت الاستماع لـ Andrea Bocelli.. خرافة..

وبالرغم من اللغة. إلا إنها آخر شئ الواحد ينتبه ليه في البيسمعو..

أهديك حاجة لغاية ما "عتاولة" السحر يجوا

عوافى يا رجاء

ونورك سال ودفق

كل سنة ولحظة وإنتى وكل "نسوان" الدنيا

طيبين وسعيدين ومبدعين، الليلة طبعا 8 آذار
يوم عيد المرأة

فى مارس الواقف بين حوش الشتاء وساحة الربيع، قبل جحيم الصيف الكعب

كل سنة إحتفال وتهانئ ومؤتمرات، ولا شى جديد
الوضع ما يزال كعب، ومافى إنجازات ريماركبل كده فيما يخص المرأة فى الدنيا

نرجع للمزيكا

الزول ده سمعته، فعلا كامل الدسم
فيهو حاجة من خوليو ايغليسياس، الله يطراهو بالفرح والخير، وشوية من دومينغو

الإسبانية والإيطالية والأمهرية والنوبية والبجاوية

ديل أحلى لغات الزول يسمع بيها غناء

يعنى تحسى زى كأنه فى إلفة بينها وبين الغنا والطرب

قلتى لى إتحديتى تمبس، لكين صراحة كده

ما شايف ليك فوز، يعنى هسه لو قالو لى رشح البطل

طوالى بقول تمبس، لأنه هو "البرنجى"

ما أظن تقدرى عليهو

المهم فى القصة

دفق النغم وهطول الألحان العجيبة

أقول قولى هذا

وأتمنى ليك تانى

أى حاجة سمحة تتمنيها

ونستنى عودة الإبداع

المطر الحبيب..

كل 8 مارس وإنت بألف خير..

شفتا كلامك الفوق ده تحدي عديييل.. بقبلو.. خلينا ننتظر تمبس.

Quote: الإسبانية والإيطالية والأمهرية والنوبية والبجاوية ديل أحلى لغات الزول يسمع بيها غناء

كلامك صاح.. اللغة رقيييقة وريدتهم أرق..

ودي

تحايا وترحاب وفرح

يا رجاء

يا إبنة شيخى الجميل

كيف الأحوال

وتمبس إذا رغب

مش فى حكاية يا رجاء فى حاجات العربى بتقول كده

امروء القيس إذا شرب والنابغة إذا غضب أو إذا ركب، وما متذكر التالت لكين يبدو لى إنه طرفه، وياهو هو ال إذا رغب

يعنى كان بعمل شغل بديع وهو فى حالة الرغبة

هسه تمبس كان الله هداخو وإستهداهو

أنا متأكد إنه مدكن مننا ما لا أذن سمعت ولا خطر ببالنا تب

زول غتيت جدا ما تشوفيهو كده

المهم

حياك الخالق وابقاك وأسعدك

والله انتو حلوين بشكل..انا لى زمن من مزيكة زى دى..خلونى اسمع وبعدين برجع ليكم..انا من ناس لف لفهم..خلونى انسطل هنا
شكرا يامطر
شكراً يا رجاء

بشرى الحبيب

البشارة فى زهو إخضراراها

Quote: انا من ناس لف لفهم..خلونى انسطل هنا

خليناك يا بشرى

بس مد لينا معاك برضو

وخلينا نحلق سوا لى أقصى مجرات الطرب

عصام قال لى يمكن، يمكن يجى

تمبس يمارس فعل الغتاتة

"الله حيوديهو النار"

معتصم كان مشغول

رجاء خائفة من تحدى تمبس

عمك تنقو يمارس فعل الفسالة

"برضو الله حيوديهو النار"

وأنا قاعد مشلهت

يا عالم

المزيكا دى بتطول العمر

ولا قنعتو خلاص منه

تعرف يا مطر ..
دائماً قاعد تهبش في الحتات الحلوة وبتوجع ..
عارف حياتنا كلها موسيقى بكل ضجيجة ورتابته تختلف باختلاف التوقيت والمكان ..
قبل كم يوم أنا وتمبس قابلنا صديقنا الفنان الطاهر غندور وهو زول مبدع تحدثنا عن حفلة ياني بتاعت الأكروبول وتاج محل اها قام هجمنا ليك بواحدة مرتدة قال عنده تسجيل لآخر حفلة عمله ياني قمنا مسكنا ليك فيهو أنا وتمبس بس أدينا كم يوم كده ونقوم نجيبه ليك ..
تاني حاجة ياخي أنت ذكرت الأحباب الحلوين الكانوا هنا ولا زالوا في دواخلنا ليتهم يعودون وبعودة رجاء العباسي عاد للمنبر رونقه ويا ريت تعود راوية وإيمان أحمد وأم واصل وندى أمين والقائمة طويلة ..
أها في وسط الكلام دا كلو شايف بشرى صاحبي جاء يغرد هنا يا سلااااااااااام يا مطر أن إستدعيت كل الحلوين في هذا البوست الموسيقي الرائع ..

لكم كل الأماني ..
جاييكم تاني ..

أبوذر
رجاء
بشرى
معتصم

تحياتى و شكرا



عمر

تحايا معطرة

وشكر غزير

ليك يا عمر

اصالة عن نفسى ونيابة عن الباقين

مش بقولو كده برضو

وليك الود الجزيل

طيب

بمناسبة إنه الطرب هو حدوث وتحقق الشقيا

بالله أى زول يقرأ الكلام ده

لو فعلا عايز يتحقق من صدق الإفتراض ده
وعايز "يضوق" الطرب الجد جد

يمشى يفتش ويسمع زول إسمه

"إلهام المدفعى"

زول ما زولة

وهو فعلا إلهام

من العراق

إن شاء الله ولو على سبيل حب الإستطلاع

عزيزي المطر:
الشعر يحاول ان يحاكي الموسيقى ،
و ينتصر عليها لكنه لن يستطيع ذلك.
لكن تتبقى مناطق اخرى لا يملأها غير الشعر ،
وليس باستطاعة الموسيقى فعل ّّّذلك.
ارقد عافية
المشاء