مرثية الى روح المغفور له معتز على الامين

هذه مرثية نظمتها على روح ابن عمى معتز على الامين فقط ارجو من اصحاب الفقيد توصيلها الى اهله بالخرطواللهمم الهم الهم ذويه ومعارفه الصبر الجميل
***
مات الرجا
الى روح المغفور له معتز على الأمين
اللهم الهم ذويه ومعارفه الصبر الجميل
كلمات نجاة محمد الياس
معتز وا خبر السجم وشحت عيني بالودار
اتبكمت لغة الصياح تبيت تقول قايدانى نار
اتهده حيلى من الوجع ومعاى بكت لغة الحوار
معتز يا زمن الأسى بالحزن دربك اكتسى وبالاحتضار
زمن الوصول صعبان قسى غاب الربيع من الديار
جاياك من بعد الفراق شادينى ليك شوق البعاد
جاياك اقلص شوق سنينى العزه فيها معاك وداد
فى شان بدور ارويه شوق قبال يفوت فينى الفوات
قالولى ما سمعتى الخبر الفارس الشيمتو الثبات
لملم ربيع عمرو البهى فارقنا مات
معتز على ... آه يا على .. معتز ما ...مات
ما تقولى مات .. قول لى كِضب جاييكىفى نفس الميعاد
جاييكى يوصل ما انقطع من المسافات البُعاد
انا كم سنه تهت فى دروب الغربة تابعت العناد
انا قايله يوم ارجع بجى بلقاك يا خى البنات
ولفحت اوجاع العمر ... ضهبانه ليك لبسته اثواب الجمر
جرعتنى كاساتى مُر ... العبره فى حلقى بتمر ... وطعم الأسى حنظل يقطع وينهمر
عقدى الفريد وسطو انقطع اتفرزعت حباتو اه يا للوجع
يا مريم الفقد الجلل حرق حشاك .. يا مريم الصبر الجميل فى مرتجاك
يا مريم الدرب النبيل ... السكة صبحت فيهو ليل
وهن الجسد اصبح عليل ... من النواح من العويل ..
يا وجعه ترحلى مستحيل .. ما كان فتاك يا اسراء شامخ زى نخيل
ما كان لإيثار المقيل .. وكان الدليل ... ود الشيوخ للشيخ سليل ..
كان للعقاب .. بركة ويباب .. للقائم او عابر السبيل ..
عجلت معتز بالرحيل .. يا ود متين .. يا اللسه فى عيونى بتتاتى بى ضحكتك ز القبيل
انا لسه نفاج الحزن فى عمرى ما اتسده اتقفل ... انا لسه ما جف الدمع رجع انهمل
وقَدّ مجامرو في حشاى ونفخ علي كير الوجع ..عاود رجع ..
فلخ الكبد .... و فتح علي ضلفة جحيم ما بتنهمد
معتز بدرى عليك تفوت ... وتخلف آهات فى البيوت .. ما بدرى يا وجعى الطويل
ما بدرى يا عشماً فتر من الرجا ولملم رحل قبل المقيل
يا ود متين ينسوك كيف ؟؟؟ ويبكوكَ كيف ؟
طعنة سنين من غمد ترمذى واشعرى جددتها وكب النزيف
يا زينب الحلم الجميل ....اشراقه هداها العويل ..تب ما بقيف
اتزفه ليك معتز عريس ...يا السره لاقيه بالدفوف
يا ثريا معتز دثريه فى جنة دانيات القطوف ..
خلاها هند بحسرتها تعانى فى مُر الظروف
ما اصلو شده رحالو ليك قبال ايناس ترجع تشوف
وجهو السميح متلالى نور وقلبو الكبير حانى وعطوف
وقبال تعجن الحنه نور ... وتخت ليو نائلة الكفوف
لى بت بخيت صحيى والوجع طراها زوله الكان ولوف ..
الليله فارس الحوبه سار ..ما شفتو لبس السُرتى .. ولفحوا من فوق الكتوف
وسوميتو قبال تتنضم .. وقبال تطاوعنا الظروف ..ونصيغها سيرتو فى حروف ؟ ؟
شان نحضر الفرح الحدث الليهو بتوق الإلوف ...
شده الحنين لى عمتو لى تومة الحزن النبيل .. ولى جدتو .. نفيسه يا الفقد القبيل
يا ود متين .. بدرى ارتحالك والرحيل
يا ود متين ابكيك كيف ؟؟؟ أبكيك كيف ؟؟
وواثق يقالد منتصر يسأل عن الزول الظريف.. الكان تقول برق الخريف
وديوانك الما بختى ضيف .. وصحابة الدرب اللطيف ..
الكنت بينهم زول وليف.. ليه فتهم قبل الأوان يا غصن دنيانا الوريف
يا أم عصام الصبر كيف ؟
صحيت فى جوايا سيف ... تورته جرحاً إنكفأ وعاود رجع زى الحفيف
ومثانى لسه في رجاك ... جاها الخبر قبال لقاك .. قمحان قليبها الإحتواك
صمة خشم أمك وأبوك .. طيفك .. خيالك .. طلتك .. صوتك ... صداك .... هنا وهناك ..
وحوش ابشر .. وجبل عرشكول انتظر.. وشبشه ولاد ست النفر ...
موته فى قلوبهم رجا .. الحزن فى عيونهم سجا .. زى الكأنك مبتدع نمط البكا
الله يصبر قلب ابوك ... ويطمن الواثق أخوك ... وكل من كان احتووك

الأخت نجاة

معتز زين الشباب فقد عظيم و مصاب جلل
نسأل الله أن يتقبله قبولا حسنا
و تعازينا موصولة لوالدته مريم الوسيلة
و أستاذنا علي الأمين....
والبركة في إخوته
و أحسن الله عزاءك

الف رحمة تنزل على قبرك أخي المعتز بالله

وصادق المواساة الأخت نجاة

رحم الله الغالى العزيز فقيد الشباب المعتز بالله على الامين

اللهم ارحمه و اغفر له و ابدله دارا خيرا من داره
اللهم تقبله قبولا طيبا فقد كان بيننا و لم نشهد له الا طيبا


و اخر دعوانا ان الحمد لله رب العالمين

العزيرة بالله نجاة محمد الياس

الفى القلب فى القلب
فالفقد عظيم ولكن رحمة الله
وسعت كل شئ فالدمع رحمة والدعاء
رحمة ولا حول ولا قوة الا بالله

رحم الله معتز الامين تعازينا الى الوالد على الامين والولده مريم الوسيله
وجميع ال الوسيله وال الامين
لم التقى الفقيد فى حياتى لكن سيرته العطره دايما كانت حولى
فهو صديق اسرتى واخوانى د/عزيز عوض محمد احمد
وزميل اخى عمر بشير شكور
البركة فيكم .. واحسن الله عزاكم
عثمان عبدالرحيم موس ..