هل تصدقو أن مدة صلاحية جواز السفر السوداني 5 سنين ؟؟

تحياتي،

هل تصدقو أن وزارة الداخلية السودانية أصدرت في سنة 1991 على ما اذكر جواز سفر جديد وكانت مدة صلاحيته خمس سنين بالتمام والكمال قابلة للتجديد لمثلها وقامت بتوزيعه على سفاراتها عبر العالم وأذكر جيدا أن اخي كان من سعيدي الحظ بامتلاك ذلك الجواز ذو الخمس سنين ثم..... وبقدرة قادر وفي لمح البصر تم سحب ذلك الجواز من جميع السفارات واستبدل مرة اخرى بالجواز ذو السنتين . هل تصدقو ذلك ؟؟ وهذه القصة ساعود لذكرها لاحقا بمزيد من التفصيل.

حسب علمي أن السودان الدولة الوحيدة في العالم التي يعتبر صلاحية جواز سفر رعاياها سنتين فقط، كل دول العالم جوازات سفر مواطنيها اما خمسه سنين او عشرة سنين الا جواز السفر السوداني سنتين. لماذا دائما قراراتنا ونظامنا الاداري ولوائحنا الادارية مشاترة ومخالفة لكل النظم والاعراف الدولية لماذا؟؟

وكأن من شدة حب ووله وتعلق السفارات السودانية برعاياه وعدم تحمل بعادهم عنها لأكثر من عامين من دون ان ترى وجوههم ويروا وجهها فردا فردا لا فرق عندها بين رب الاسرة او الطالب الصغير والكبير كلهم عندها سواء كأسنان المشط، ليأتو اليها ويقوموا بإفراغ مافي جيوبهم في خزائنها التي لا تشبع أبدا . وإذا سألوها شبعتي ؟ فترد وتقول هل من مزيد.


لذلك هذه عريضة نرفعها للمطالبة بتغيير مدة صلاحية جواز السفر السوداني ليصبح ان لم يكن 10 سنين فليكن 5 سنين أسوة بدول العالم.


راجع ......

على فكرة ..
احترت في تسمية هذا البوست ففكرت في هذا الاسم

عريضة المليون توقيع للمطالبة بتغيير مدة صلاحية جواز السفر السوداني.

ولكن من خلال خبرتي في التعامل مع هذا البورد اتضح لي ان العناوين ذات النمط الكلاسيكي لا تلفت الانتباه ولايكترث لها القراء فكان لابد من عنوان طنان رنان


هشام حامد العبيد

الاستاذ هشام
تحية طيبة
اندثرت الاعراف الادارية ان صح التعبير في كل الادارات ،و بدلاُ من ان تظل الاعراف الادارية قائمة بحسب نجاحها نجد ان العرف الاداري القبيح هو السائد، مثلاُ التعليم نختلف عن كل تواقيت العالم ، التوقيت الصيفي والشتوي، الانضباط الاداري كل هذا القيم اندثرت بالمكابرة على التميز، والقيم الجديدة المكتسبة هي اسوأ ما خلق من قيم واسوأ قيمة ادارية عندي هي ربط الادارية بالعقوبات المباشرة ، مثلاُ ربط تاشيرة الخروج بدفع الرسوم، أما اخيبنا الجواز فهو لا يشيه الجوازات في كل عرف اداري ، مثلاُ تاريخ الميلاد تكتب السنة فقط ةهذه من المعلومات المهمة التي تتكرر قليلاُ ، ثانياُ كتابة المهنةعلى الجواز واعتقد ان هذه قضية اضرت بالجواز السوداني كثيراُ ، ثالثاُ عدم فصل الاسماء حسب المعروف للعالم الاسم واسم الوالد واسم الاسرة او الجد وعدم متعابعتها في باقي الاسرة يعني باخصتار نحن نكتب الاسم بالانجليزي بدون الرجوع حتي الى الفورم الذى نملاه واذا كنت محظوظ ووجدت ما يطابق اسمك تجد ان تهجيةالاسم يتخلف عندك مع اخيك ابن امك وابوك فمحمد وهو اكثر اسم عندنا Mohd, Mohammad, Mohammed ,Mohmad , Mahmad , مما يجعل اسم اسرتك مختلف من اسم اسرة شقيقك ،ُثالثاُ الطول فهو متساوي مع كل الاطوال او كما قال صديقي عندما تزوج بامرة طلوها خمسةقدم وستة بوصات ، رابعاُ عدم كتابة اسم الام أو العائلة او اية معلومة تجعلك مميز عن الاخرين في الجواز فهذا ممنوع لاننا كلنا أطوالنا خمسة اقدام وستة بوصات ولون عيوننا عسلية والشعر اسود ، رابعاُ وهو مهم جداُ ان المعلوما عن الشخص موجودة في اكثر من صفحة واحدة مما يخلق اشكاليات كثيرة . رابعاُ الاضافات في الجواز فالاحسن ان يكون لاية شخص جوازه الخاص ، سادساُ اضافة الجديد من العرف الاداري عند الدول لديناحتي ناخذ اجمل ما يكمن ان يكون الجواز السوداني من الناحيةالامنية والجمالية، واذا اصحبت صلاحية الجواز خمسة او عشرة سنوات اكون صحيت من هذا الحلم الكابوس الجواز
اخوك ابومحمد ومهيرة

الأخ هشام تحياتي

تناولت موضوع هام جدا خاصة مع زيادة أعداد السودانيين المهاجرين ، و حتى المقيمين بالسودان هناك زيادة في سفرهم للخارج لأغراض مختلفة.

و بالمناسبة فترة سريان الجواز سنة و نصف لأن ادارة الجوازات بالمغتربين تطلب أن يكون الجواز ساري لمدة لا تقل عن ستة شهور لمنح تأشيرة الخروج و ذلك يتطلب منك أن تجدد الجواز بعد سنة و ستة شهور!!

بما أن أغلبية المغتربين يسافرون للوطن في اجازاتهم كل سنتين فان ذلك يعني الحوجة لتجديد الجواز مع كل اجازة.

الأخ مهدي أشار لنقاط فنية و قانونية هامة في الجواز ، هناك مشروع لجواز جديد و سمعنا ان التركيز منصب على الناحية التأمينية ضد التزوير و أرجو أن تتم دراسة لتجاوز كل النواحي السلبية.

الحاج حمد الحاج

سيق ان ناديت هنا لامن بح كي بوردي...لتعديل صلاحية الجواز السوداني

وجعلها علي اقل تقدير خمسة سنوات وخاطبت سفيرنا السابق رسميا في هذا

الخصوص ...وحسب قوله...رفع هذه المشكلة بتوصية الي الخارجية...ولاهسي
لم يتبدل شيْ..ما عارف الحكمة شنو؟ لو قلنا مربوطة بالضرائب لجعلوا
صلاحيته سنة...

في كل اجازة نعاني معاناة شديدة...في الحصول علي تأشيرة اي بلد..
ونضطر نجدد جوازاتنا قبل انتهائها بستة او خمسة شهور علي اقل تقدير..

وبالتالي تكون الحكومة اكلتنا مرتين...

جوازات الاسر المقيمة بالخارج دائما ما لا تتفق صلاحياتها مع تاريخ واحد
وبالتالي عليك ان تذهب مرات عديدة لتجديد جواز الزوجة والبنت والولد
ليتوافق مع الاقامة والتي غالبا ما يكون صلاحيتها سنتين...وفي حالتي...
لم يسبق ان تم ختم جوازي باقامة سارية لسنتين لأنو جوازي دائما مجلي
من السنتين...بل من المستحيل علي اي سوداني يقيم بدولة تسمح بالاقامة
سنتين ان يكون حاملا لاقامة بذات المدة ...ففي حالتنا دائما تمنح حسب
صلاحية الجواز ويحتفظ ليك بباقي المدة كفكة عند الجهة المانحة للاقامة
تحصل عليها عندما تجدد جوازك...ويسمونها باقي المدة...

ونفسي اعرف من اي جهة مختصة ماذا يضيرهم لو منحونا مدة صلاحية للجواز خمس سنوات
ويضربو حقهم كم؟ اذا السنتين رسوم التجديد بي جنيهين...يعملو الخمسة بي
خمسة جنيه ويشيلو حق فورمتين ونص...ودمغتين ونص...ويريحونا من جري السفارات
ومخالفات الاقامة البتودي السجن...بلاي تصور يسجنوك عشان بلدك ما تعاونت معك
وهي تطلب من الآخرين وفي الصفحة الاولي من الجواز ان يسهلوا لك امورك...

سيأتيني الرد بان هذا النظام اصلا معمول به ولكنك لم تسأل عنه؟
لكن والله سألت عنه...ولم احصل علي اجابة؟

انا الموضوع ما بخليه يا صاحب البوست...عدييييل كدي يا يعملوه لينا
خمسة سنوات والله...

الناس دي قاعدة تتمرد ساكت هي؟

بلاهي هسي امنطق من الكلام دا في؟


جواز مدة صلاحيته خمس سنوات....عشرة مش عايزين؟؟؟ يبقوا البنغال والهنود
والسريلانكيين والماليزيين والمصرييين والفلبينيين والجامايكييين...والتوانسة
والمغاربة والجزائرييين...والليبييين...والمالييين والعاجييين...والمدقشقريين
والاثيوبييين والاريتريين....وحتي الصومالييين بي حالهم دا ارجل مننا؟


لا مش حا اخلي الموضوع دا

والله دى بالجد مهزله وكمان حسه فرضو رسوم فى الاستقبال عشان يدوك اورنيك تجديد وبعد الرسوم والله لو رميتو مافى حد يسأل منو

طبعا معروفه السفاره السودانيه من اجوع السفارات وفارضه صلاحية الجواز سنتين عشان يسلخوك فى الرسوم والضرائب طبعأ لو عملوها سنه الحكايه تكون ظاهره عشان كده داروها بسنتين


احسن حاجه نعملها نجدع ليهم جوازاتهم دى فى وشهم ونلعن ابو ام القنصل ونتخارج نشوف لينا جنسيه تانيه ابو ام الجوازات زاتو

حاجه تغيظ وكمان حسه دفاتر عشان يعملو ليك جواز جديد مافى


ديل شوية سعاليك قاعدين يلهفو مال المغتربين ال ميتينهم طالع



قال قنصليه سودانيه والله احسن يسموها جزاره سودانيه عشان الشغالين فيها احسن منهم الجزارين ديل جزارين بشر الله يجزر ميتين امهم





بكاش

الأخ هشام

مع التحية

يا أخي بوستك وقع قلبي جيت جاري جري شديد

Quote: من خلال خبرتي في التعامل مع هذا البورد اتضح لي ان العناوين ذات النمط الكلاسيكي لا تلفت الانتباه ولايكترث لها القراء فكان لابد من عنوان طنان رنان

وما خيب ظني لأنو لقيت ناس كتار زي ( إمكن ألقى الزي فيكم ) أنا أكثر الناس غيظا من ذلك . وأضم صوتي وتوقيعي ومع خالص شكري وتقديري .

كل الود

..
.

Quote: حسب علمي أن السودان الدولة الوحيدة في العالم التي يعتبر صلاحية جواز سفر رعاياها سنتين فقط،

عاملنو مأكله يا هشام
عشان الداخلية -الجوازات والهجرة - تستفيد من الرسوم العالية
خمس سنوات الميزانية بتفرق ..

لنا الله

__________________

العجب رسوم التأشيرة وبطاقة الإلزامية!!

يا شباب عليكم الله بدون ...ان نسب احد...

يا تبلدينا...الحكاية ما حكاية اكل؟

نحن الاكل طايرين منو وين؟ ان قلت ما بتدفع بخلوك؟

ما بخلونا....هسي نحن طالبن منهم يعدلو السنتين الي
خمسة لأننا متضررين جدا...ويشيلو حق سنتينم دي ويضربوها
في اتنين ونص...عشان تجيهم الضربة كبيرة...

والله هسي اقعد احسبها ليهم الا القاهم هم زاتهم خسرانين من موضوع
السنتين دي...


بلاهي عليك احسن زول يدفع ليك مقدم تاني تلاتة سنوات والله
كل مرة يجي يديك قصد بعد سنتين..
وثانيا...شوف بوفروا كم ورقة ...وكم ختم وكم توقيع وكم زمن
وكم دمغة وكم زمن لي الناس ...


واديك مثال:

جوازي وجوازات اسرتي....تحتاج الي خمسة فورمات كل سنتين او اقل

وخمسة دمغات كل سنتين او اقل...

اذا افترضنا وما عايز اشير الي الارقام الحقيقية التي اعرفها جيدا

ان الورقة الواحدة للفورمة والدمغة تكلفهم
مية جنيه بالقديم طبعا...دي براها خمسمية جنيه...

هم اذا باعو الفورمة بي 1000 جنيه...حا تكون 5000- التكلفة

يعني 4500 كل سنتين او اقل: يعني هنا في حالة جوازنا الحالي
وفي الخمس سنوات

بتحتاج تجدد جوازك تلات مرات...

بمعني هم حا يخسرو 3 في خمسمية =1500 طبعا دا في ملايين الجوازات


اما في حالة استجابتهم لهذا النداء

فحايكون الوضع كالآتي


1000 في 2ونص القلت انا رضيت بيها مقابل الثلاث سنوات الاضافية

بدل ما امشي ليهم للتجديد ...وفي كل مرة يخسرو

2500 في خمسة جوازات دي براها 12500 - 500= 12000 تكلفة الفورمات لمرة واحدة

بينما في الوضع الحالي

هي 4500 في اتنين يعني 9000

دي طبعا لي اربعة سنين والسنة الخامسة اذا قلنا حا تساوي نصف
تكلفة السنتين اي 2250 يكون الاجمالي البتحصلو عليه مننا بالتقسيط
علي مدار الخمسة السنوات هي 11250 جنيه ...

يعني رسوم تجديد الجواز الواحد في حالة السنتين هي 2250
بينما في حالةالخمسة سنوات حا تكون 2400


ولاحظوا في حالة الخمس سنوات حا يكون الدفع مقدم عن الثلاث سنوات
الاخري.
يعني حا يكونوا ربحانين في كل جواز 150 جنيه اضافية
وربحانين زمن...باكبر من هذه القيمة...وتقدير مننا

بجملة قيم الي الآن لم يدركوها...؟
بينما فورمتي المقترحة في حالة الخمسة سنين

الاخ هشام
لم يختلف جميع الاخوان على زيادة مدة الجواز لخمسة سنوات او عشر سنوات ولكن الملاحظ كما ذكر الاخ الحاج احمد ان المشاكل القانونية والفنية فى الجواز السوداني كبيرة ، ومنها علي سيبل المثال العلاقة باسرتك الكبيرة واسرتك الصغيرة وغيره واذا صدق ان هنالك تفكير بان يكون هنالك جواز سوداني جديدة فنرجو من جميع الاخوة ابداء رايهم في الناحية الفنية في الجواز من ناحية المدة ، الاسماء ، المعلومات المهة وكيف كتابتهم ، شطب المعلومات في الجواز القديم والتي تعيق السفر والاقامة في الدول الاخري كالمهنة والصفات الشخصية ، استبدال المعلومات الموجودة في الجواز القديم بمعلومات مكتملة كتاريخ الميلادباليوم والشهر ، توحيد كتابة جميع الاسماء وكذلك اسماء المدن والتي رفضت بها بعض الاقامات لان الشخص يكتب فى اى فورم نفس المدينة او القرية في محل الميلاد وتجد انه لا يتطابق مع مدينة زوجتك فى الجواز فتتهم بالتزوير كما حدث لى، والجواز القديم يمكن ان تغير فيه بموافقة الداخلية او القنصلية ولكن اذا تم اصدار جواز جديد مقرو الكترونياُ فسيكون هذا وبال كبير على كل السودانين خارج مطار الخوطوم
كما نرجو من الاخوة القانونيين اطلاعنا علي العيوب القانونية في الجواز القديم والتي نتهم دائما باننا نقوم بالتزوير في معلوماتناالشخصية والمعلومات التي في الجواز
ابومحمد ومهيرة

الأخ هشام

مع التحية

بعد ما طلعت من موضوعك ده مشيت أصور الجواز لأمر هام وجدت إنو الجواز السوداني الجواز الوحيد في الدنيا إنو المعلومات والبيانات مشتته في عدد أربع صفحات وما بالك لو كنت تحمل إقامة وخلافة يا أخي الجواز الهندي صفحة واحدة بها كل البيانات يعني تصميم مختصر نحن جوازنا صفحة إسم - صفحة للعمر - صفحة للصورة - صفحة للتجديدات - صفحة ؟؟؟؟؟؟؟؟؟؟
يا أخي حكاية متعبة.

مع الشكر والتقدير

تحياتي

يااااه وأنا كنت فاكر انو انا الوحيد المرتفع عندي الضغط كل ماتجى ذكرة الجواز السوداني واتارى كل الناس مأزمة من هذا الجواز شكلا ومضمونا

الاخوة المتداخلين شكرا لاثراء الموضوع بهذه المداخلات القيمة جدا والتى ارجو من كل من يطلع على هذا الرابط ويعمل في ادارة الجوازات ان يطبع هذا الموضوع وجرى على مدير الجوازات ليريه بأم عينه عن مدى وجع الناس من هذا الجواز وأكون له من الشاكرين

المحترمmahdy alamin

اشكرك على مداخلتك القيمة جدا ملاحظاتك قيمة جدا واتفق معك تماما كل البيانات في الجواز السوداني تحتاج لاعادة صياغة وياريت يطلع على ملاحظاتك تلك مسئول هنا او هناك ويعدلو حال الجواز المائل. وعلى ذكر اللخبطة في الاسماء يحضرني هنا موقف طريف: فانا وكما تعلمون اسمى هشام وعندما انطق اسمى انطقه بكسر حرف الهاء بينما هناك سودانيين ينطقون اسمي بضم حرف الهاء والذي حدث ان الذي قام بكتابة اسمى في الجواز كان من الذين ينطقون هشام بضم الهاء وبناء على ذلك قام بكتابة اسمى بالانجليزي هكذا
husham
بينما لو طلب منى احد ما كتابة اسمى ساكتبه هكذا
Hisham

والذي حدث ان كل من في الشركة من الاجانب يعرفني باسم هشام بكسر الهاء وفي يوم من الايام استدعاني مدير العلاقات في الشركة وهو كوري الجنسية وكان جواز سفرى في يده وباستغراب شديد وسألني انت ماهو اسمك احسست من لهجته كأنى مزور في الجواز وانه ليس لي واني منتحله او معدل فيه وتعجب كيف ان اسمى
ينطق بكسر حرف الهاء بينما في الجواز يكتب بطريقة مختلفة تماما عن تلك التي يسمع بها اسمى فشرحت له القصة حتى اقتنع ولسان حاله يقول ماهولاء القوم لا ...يكاد

الاخوة المتداخلين

hajhamad
nazar hussien
BAKASH
KalamSakit
Tabaldina
nazar hussien
شكرا على المداخلة مع وعد بالرد على مداخلتكم فردا فردا ..اقتطعت من وقتي جزاء للرد على اول متداخل وارجو من الجميع الدخول الى هذا الرابط غدا للرد عليكم ولمتابعة هم الجواز السوداني هذا الجواز الذي ارهق كاهل كل من يحمله

ولاحكي لكم عن شي مرتبط بالجواز واعني تحديدا الجنسية السودانية تلك الجنسية التي نسجت خيوط غلافها من خيوط الكتان المهتري وطليت بصبغة خضراء من اردأ انواع الصبغات في العالم حتى الورق الذي طبعت عليه الجنسية السودانية ورق كأنه منزوع من كراتين .لله درك ياسودان ..لاادرى لماذا المصصمون سواء للجنسية السودانية او الجواز القديم ليس لهم اي ذوق وحس فني مرهف ..عجبي وحسرتي ودهشتي فلو قدروسقطت في غلاف تلك الجنسية قطرة ماء فستصبح كأنها خريطة تضاريس الوطن العربي والشرق الاوسط..تلك الجنسية التي لا جيب قميص ممكت تضعها فيه ولا جيب بنطلون يعني حجم عائلي..بالله عليكم انظرو لبطاقات هوية الاجانب وهي بمثابة الجنسيةعندنا نحن معشر السودانيين فشكل تلك البطاقات التي يحملها الاجانب رشيق وانيق بينما نحن نأبي الا ان تكون حجم الجنسية بحجم كفة الفيل والله العظيم انى لاستحي ان يرى احد الاجانب معي في الشركة شهادة جنسيتي السودانية لقباحة شكلها ومنظرها لذلك لا اريها للناس الا في الشديد القوى ..دعوة مني لكل من يقرأ هذه الاسطر باحضار شهادة جنسيته السودانية ويتأمل شكلها الذي لم ينزل الله به من سلطان

وللحديث بقية.. تابعونا
غايتو انا حالف لازم موضوعي ده يصل لوزارة الداخلية)قسم الجوازات

هشام حامد العبيد

ضروري يصل...يا هشام...انا غايتو الشكل ما طمعان فيه
كتير...بس الخمسة سنوات دي مطلب اكيد...


وبعدين يعني باقي ناس المنبر ديل كلهم متجنسين
والله شنو؟

كدي ورونا يا ناس...من منكم لا يشتكي من هذه السنتين؟

مالكم ساكين الاصعب...دا طلب سهل ومشروع...

تحياتي،،

الشكر لكل من تفاعل وساهم في هذا الموضوع او اطلع عليه واتمنى ان يكون قد قرأه مسئول في ادارة الجوازات ليعرف رأي المواطن الغلبان عن سلبيات هذا الجواز وان كنت اظن ان سلبيات الجواز السوداني اكثر من ايجابياته وساذكر ذلك بالدليل فيما بعد .

ارجع لمداخلة الزميل mahdy alamin

تعرف ياسيد مهدي بمداخلتك تلك قد كفيت ووفيت ولو عملت بها ادارة الجوازات لكان خير لها ولنا، فقط ازيد في حكاية تغيير المهنة في الجواز السوداني اذكر عندما استخرجت جواز سفري كنت وقتها طالبا وتم منحي جواز سفر ذو الغلاف الازرق (القديم) ،ذلك الجواز الذي يقترب في حجمه وشكله من حجم مذكرة أو دفتر (يذكرني دائما حجم ذلك الجواز بدفاتر اصحاب الدكاكين الذين يسجلون عليها أسماء زبائنهم المطلوب منهم ديون ) ألا تتفقون معي؟ ، ليس هذا وحسب حتى لو عاوز تضع ذلك الجواز في جيبك لا تستطيع من حجمه المشاتر والمخالف حتى لمقاسات الجيوب لا اعني جيب القميص فقط حتى لو اردت وضع جواز سفرك في جيب بنطلونك الخلفي لا يمكن ذلك (حاجة تمخول العقل)

اذكر بعد ان انهيت دراستي ساقني قدرى المحتوم الى السفارة السودانية لتغير المهنة من طالب الى مترجم طبعا دفعت المعلوم وفي نهاية اليوم استلمت الجواز وعينك ماتشوف الا النور فاذا بي اجد كلمة (طالب) قامو بوضع عليها كمية ضخمة جدا من الـ Correction ابيض اللون يعني تقول (عجين) ومكتوب من فوقها المهنة الجديدة وفي الصفحة الموالية ختم السفارة وبه كلمة (غيرت المهنة بمعرفة السفارة).. بالله ده اسمو كلام ياناس السفارة .

اصبحت كلمة المهنة وبها ذلك اللون الابيض (العجين) شي يدعو للرثاء يعني لو شافك أي واحد من هؤلاء الخواجات يقول انك مزور المهنة فبالله عليكم لو قامت السفارة باحضار ورقة من ذلك النوع الذي يحتوى على لصقة من الخلف وقامو بلصقها مكان المهنة القديمة ووضعوا عليها ختم السفارة اما كان اجمل وابهى صورة بدلا من ذلك (العجين الابيض) متين نحنا بنبقا زي الناس والعالم متين؟؟؟

وشي تاني لا ادرى لماذا لم تنتبه له ادارة الجوازات وهو كلمة الاقطار التي يصلح لها هذا الجواز أذكر عندما استخرجت جواز سفري القديم مكتوب به صالح لجميع الاقطار . وما ان غيرت جواز سفري في بداية التسعينيات اذا بي أفاجأ مكتوب الاتي: صالح لجمع الاقطار عدا جنوب افريقيا واسرائل (ماعاوز ييجيني واحد ناطي ويقول لي يعني عاوز تمشي اسرائل ولا شنو؟؟

لكن ليكن في علم ادارة الجوازات ان هذا الجملة ربما تسبب مشاكل لصاحب الجواز عندما يذهب لاحد الدول الاوربية وبعدين تعالو هنا ياناس الجوازات شنو الفلسفة الزائدة دي اها جنوب افريقيا والغت الميز العنصري مما ادى بادارة الجوازات الى شطب كلمة جنوب افريقيا وبقيت (عدا اسرائل) طيب تعالو معاي بحسبه بسيطة شوفي عدد سفارات السودان في العالم وشوفو عندما تم حذف كلمة جنوب افريقيا اكيد تم الغاء جميع تلك الاختام واستبدالها باخرى بالله عليكم كم من الاموال صرفت نظير تغير تلك الاختام ..بس بيني وبينكم انتو خسرانين حاجة ماهي قرشونا نحنا وتبعزقو فيها شمال يمين .. والله انا ممغوص عليكم جنس مغصة.

وبعدين حاجة تانية بالنسبة لكلمة اسرائيل ياخ هم الفلسطيننين واعترفو باسرائل يعني عاوزين نبقا نحن السودانيين فلسطييين اكثر من الفلسطييين انفسم ..مالكم كيف تحكمون
وبعدين هو من يذهب الى اسرائل هل معني ذلك ماشي تل ابيب يااخي ماشي اصلي ركعتين في المسجد الاقصي مش برضو لا تشد الرحال الا لثلاث مساجد..

لذلك اطالب بحذف هذه الجملة (عدا اسرائل وتركها كما كانت في السابق ( صالح لجميع دول العالم)مثل ماكان في السابق

المحترم hajhamad

Quote: بالمناسبة فترة سريان الجواز سنة و نصف لأن ادارة الجوازات بالمغتربين تطلب أن يكون الجواز ساري لمدة لا تقل عن ستة شهور لمنح تأشيرة الخروج و ذلك يتطلب منك أن تجدد الجواز بعد سنة و ستة شهور

اولا شكرا على المشاركة والله كلامك صح لذلك نطالب وبشدة بتغيير المدة الى عشرة سنين ياخى بلاش عشرة اضعف الايمان فلتكن خمسة

المحترم nazar hussien

Quote: سيق ان ناديت هنا لامن بح كي بوردي...لتعديل صلاحية الجواز السوداني

ياريتك لو تدرج رابط موضوعك ذلك هنا حتى تعم الفائدة اكثر

وياريت لو ادارة الجوازات انتبهت لكلامك التالي وعرفت لماذا نطالب بتتغير المدة

Quote: بل من المستحيل علي اي سوداني يقيم بدولة تسمح بالاقامة سنتين ان يكون حاملا لاقامة بذات المدة ...ففي حالتنا دائما تمنح حسب صلاحية الجواز ويحتفظ ليك بباقي المدة كفكة عند الجهة المانحة للاقامة تحصل عليها عندما تجدد جوازك...ويسمونها باقي المدة... انا الموضوع ما بخليه يا صاحب البوست...عدييييل كدي يا يعملوه لينا خمسة سنوات والله... الناس دي قاعدة تتمرد ساكت هي؟ بلاهي هسي امنطق من الكلام دا في؟

والله كلامك عين العقل لكن منو يسمع ياعزيزي


المحترم BAKASHشكرا على المداخلة

Quote: قال قنصليه سودانيه والله احسن يسموها جزاره سودانيه عشان الشغالين فيها احسن منهم الجزارين ديل جزارين بشر الله يجزر ميتين امهم

اشعر بألمك ياعزيزي ..وقلبي على وطني وقلب وطني حجر والغريب اكتر شعب في العالم قاعد يأكل في حكومتو بدل ما يكون العكس انو الحكومة هي التي تأكل في ناسا هو شعب السودان متمنى يوم واحد حكومة السودان تقول لي تعال ياهشام هاك القروش دى..

المحترم:KalamSakit شكرا على المرور

Quote: يا أخي بوستك وقع قلبي جيت جاري جري شديد

لكل العتبى حتى ترضى بس ياعزيزي الفاضل سياسة البورد عاوزة كده اذكر في بداية انضمامي لهذه الروضة الغناء كنت بكتب في عناوين غير جاذبة في الوقت اللى فيو انو جوهر الموضوع مهم جدا فلقيت الناس تمر عليه مرور الكرام ومن ديك قررت انو اي موضوع اقوم بكتابتو لازم اشوف ليهو عنوان من النوع البخلع داك. بس على فكرة عنوان هذا الموضوع حقيقة وليس مجاز بدليل انو الجواز السوداني فعلا ولفترة شهر او شهرين كان لمدة خمس سنين سعيدي الحظ هم من ظفروا بتلك المدة وخمسة سنين ماشافو وش السفارة ..


المحترم Tabaldina

Quote: عاملنو مأكله يا هشام عشان الداخلية -الجوازات والهجرة - تستفيد من الرسوم العالية

كلامك صاح وبيني وبينك والله ناس السفارات السودانية ديل كان بيدهم يجردو السوداني حتى من هدوموا مابلك بما في الجيوب ..


خلاصة الكلام ياسادة ياكرام وياادارة الجوازات مطلوب منكم الاتي تنفيذ كل المقترحات التي اوردها الزملاء اعلاه مع طلب خاص وعاجل جدا هو ياريت يتم اصدار جواز سوداني جديد شكلا ومضمونا تمنيت ان يكون معي اسكنر (ماسحة ضوئية) عشان اوريكم جواز السفر الكوري بحكم عملى مع الكوررين جميع البيانات في صفحة واحدة وشكلو انيق وظريف جدا بعكس حال الجواز السوداني وكماذكر احد الاخوة انو الاسم في صفحة لوحدها وتاريخ الميلاد في صفحة والعنوان في صفحة .. ياخي مماكن وفرو كل هذه الصفحات للاستفادة منها في وضع التأشيرات واهم من ذلك ياريت عند تصميمكم لجواز سفر جديد ان تكون هناك منافسة لافضل تصميم جواز سفر حتى يشترك المبدعين بخبراتهم ومنح صاحب افضل تصميم جائزة كلامي ده صاح ولا انا غلطان


هشام حامد العبيد