Post: #1
Title: أساسي راح لي..!!؟
Author: اساسي
Date: 02-20-2007, 06:44 PM
المنتدي وما ادراك ما المنتدي ... شغلنا سودانيز اون لاين زمانا ليس باليسير شغلنا عن حياتنا وحاجياتنا واجتماياتنا كان حقيقة سلوي لنا في غربتنا ملتقي عركنا فيه تجربة جديدة كنت من المحظوظين الذين تقاطعوا مع بداياتها شكل لنا المنتدي فيها بوصلة لاتجاهات فكرية كنا ضالين قبلها ولا ابالغ ان قلت انه صقل لي تجربة شخصية وكان اضافة حقيقة لشخصي اكتسبت منه الكثير الذي اظنه افادني كثيرا في تكوين رؤية شخصية ومحاولات لتكوين بعض الافكار التي لولاه لكان من الصعوبة ان اجدها ... وفي خط متوازي شكل لي اضافة معرفية اعتبرها بكل المقايس ثرة بتقيمي الشخصي ..وفي الجانب الاخر اضاف لي معارف اجتماعية وانسانية ما زلت افتخر بتكوينها ورغم الانقطاع عن المنبر فترات طويلة الا انها لم تنقطع ولم تفتر في غالبها .
اخترت لنفسي منذ البدايات شخصية اظن انها كانت تمثل فكرتي وتطورها عن (الحاجات) التي يتم طرحها ونقاشها في كافة المجالات الاجتماعية والسياسية والانسانية وحتي الحاجات ذات الابعاد (الفكاهية)
ما ان (اترسم) خلف كيبورد واضغط دخولي الي هذا الفضاء السوداني الفسيح الا وتتلبسني (الحالة اساسي) والتي ظلت تلازمني طيلة الفترة السابقة كلما دخلت الي المنبر وشاركت في البوستات او اضفت بوستات جديد بالرغم من اني اجزم بان تلك الحالة هي جزء اصيل من تكويني الفكري والمعرفي والاجتماعي الا انه وفي انقطاعي الاخير عن هذا المنبر والذي قارب السنة لم اجدني اساسي الذي اعرف ولا اجد المفاتيح التي توصلني اليه رغم ارتباطي به وارتباطه بي .
فكرت اني احتاج لبعض تمارين الاحماء للوصول الي الفورمة (الاساسية) الا ان ذلك الامر مرتبط بحسابات اخري ..لا اقول ان المكان قد تغير كثيرا ولكن ما لفت نظري ان روي وقناعات الشخوص قد تغيرت وتبدلت المواقف مما اعتقده قد اثر سلبا باساسى الذي اعرف ..(طلع خفيف) فالرصة قد اختلفت كثيرا هنا قد يقول قائل انه النقاش هنا ينبني علي الافكار والرؤي ولكن من خلال تجربتي اقول ان هذا الامر غير صحيح ... فشخصنة شخوص سودانيز اون لاين ظاهرة للعيان وبائنة جدا الامر الذي اذا اردنا التعامل معه يجعلنا نقع في حيرة من امرنا حين تبدل الرؤى ..
غايتو الواحد لسع بفتش
بالله البلقي ليهو اساسي واقع بي جاي يقول لي عوك
|
Post: #2
Title: Re: أساسي راح لي..!!؟
Author: اساسي
Date: 02-20-2007, 06:48 PM
Parent: #1
يكون العِرس كتل قلبي؟؟
|
Post: #3
Title: Re: أساسي راح لي..!!؟
Author: فيصل نوبي
Date: 02-20-2007, 06:52 PM
Parent: #2
ليس ذاك تحديدا يا صديقي
و لكنكـ الان تحمل مسئولية ثلاث " أساسي و أم أساسي و أبو أساسي " باذن الله.
وقع ليكــ !!
ما حاسي انه السرعة اللي كنت بتسوق بيها العربية خفت و بقت بحذر أكتر !!
و سلام يا صاحبي.
|
Post: #36
Title: Re: أساسي راح لي..!!؟
Author: اساسي
Date: 02-21-2007, 09:01 AM
Parent: #3
الحبيب فيصل نوبي تحية وشكر علي الترحيب
Quote: ليس ذاك تحديدا يا صديقي
و لكنكـ الان تحمل مسئولية ثلاث " أساسي و أم أساسي و أبو أساسي " باذن الله. |
يا نوبي انا بكتب في قوانتنامو ولا في بورد عشان قلبي يتقطع كدا ؟
|
Post: #4
Title: Re: أساسي راح لي..!!؟
Author: عاصم ابوبكر حامد
Date: 02-20-2007, 06:54 PM
Parent: #1
الاخ اساشئ
والله افتقداناك هنا وهناك عند ديار ودالشيخ
وين انت يا زول ؟؟
من بوست بعد العرس باسبوع اختفيت ...
الف مرحب بعودتك
|
Post: #35
Title: Re: أساسي راح لي..!!؟
Author: اساسي
Date: 02-21-2007, 09:01 AM
Parent: #4
العزيز عاصم
والشوق بحر يا صاح
وحاتك انا زاتي ماعارف من بعد العرس باسبوع ولا اسع ما لاقيني؟
|
Post: #5
Title: Re: أساسي راح لي..!!؟
Author: ناصر البطل
Date: 02-20-2007, 06:55 PM
Parent: #1
والحنين إليك يمشي تائها
يمشي تائها بين الدروب فلا رنين ولا خبر
.
.
.
مرحب بالعوده يا صديق 
|
Post: #7
Title: Re: أساسي راح لي..!!؟
Author: تاج السر حسن
Date: 02-20-2007, 07:04 PM
Parent: #5
الضلامى النضيف / اساسى
التحايا الطيبه
وهذا لقبك الجديد عندى حتى تصبح شيوعى أو تلد خليفه شيوعى.
الحمد لله بعد صراع شديد قدرنا نعمل منك روح بورد .. يعنى عملنا المصيبه بى يدنا ونصبنا (ضلامى نضيف) روح البورد .. وانا فى البعيد راضى أكون (مساعد ياى) بورد.
كلامك عن (الشخصيه المنبريه) حقيقى لدرجة انى ما قادر اصدق أو اتخيل سودانيه 2000 هى زول تانى غير الصورة الكانت نازله من زمن وأخيرا قالت ما حقتها، وبت الأحفاد لمن ظهرت صورة الزواج اختلفت خالص عن الصوره الراسمها ليها، فاكرها زوله (ملفلفه) لحدى العيون ما تشوفها.
دون شك كل عضو بيرسم صورة لعضو تختلف عن الصوره الحقيقيه.
نوبى مثلا (طلع) (حنكوش) ظلامى!!
|
Post: #41
Title: Re: أساسي راح لي..!!؟
Author: اساسي
Date: 02-21-2007, 09:22 AM
Parent: #7
تاج السر
طبعا علي طريقة الخواجات و mbc2 حقت عمر الفاروق انت مديناً لي .. هاهاها
يا صديقي بصراحة ما نصبتوا مني اي روح .. الحكاية وما فيها انه نفس اساسي سولت اساسي
وطلعت منه روح وانفاسي .. علي اوزان شعر يازول النغمة دي
تسلم يا صديقي واراك قد عدت بقوة وشغال بخطة هجومية واحد قصاد واحد
|
Post: #37
Title: Re: أساسي راح لي..!!؟
Author: اساسي
Date: 02-21-2007, 09:03 AM
Parent: #5
ناصر البطل
جميل يا صديقي العودة الي الديار وان نلتقي احبة تحملونا علي علاتنا
|
Post: #6
Title: Re: أساسي راح لي..!!؟
Author: فيصل نوبي
Date: 02-20-2007, 06:56 PM
Parent: #1
هاك كسير التلج ده
مرحبا بروح البورد اساسي
يمكن تلاقي أساسي 
يا معلم إنت داير ليكـ زنقةكاااااربة
|
Post: #8
Title: Re: أساسي راح لي..!!؟
Author: عمران حسن صالح
Date: 02-20-2007, 07:25 PM
Parent: #6
من بصماتهم هنا بكل هذا الضوء
عودتهم حتماً هي بمثابة العودة للديار
وإلا سنكون كمن (طردوا) دجاجة البيت ...
....
كل التحية والاحترام
وحبابك مليون تحية.. وابتسامة
خلينا نقرأ ليك من جديد
ولو حسينا(بضياع) أساسي حنفتش معاك 
|
Post: #9
Title: Re: أساسي راح لي..!!؟
Author: jini
Date: 02-20-2007, 07:58 PM
Parent: #8
لكين ما كتاب جنس كتابة يا الدباب!
ليك وحشة!الظاهر ختعرس الكيبورد!
زمان قلنا ليك الجديد شديد!
هسة بجيك دينق
جنى
|
Post: #44
Title: Re: أساسي راح لي..!!؟
Author: اساسي
Date: 02-21-2007, 09:29 AM
Parent: #9
جني المفلكب تحياتي واشواقي يا فتي بني مالك المدلل
طبعا يا جني يوم جيت مخصوص مع علي عثمان (قاصي اترك في بني مالك ) لكن لقيت انه ما عندك حظ وما قابلتني ... هاهاا.. يا صديقي لست كصديقك شرير والبرتقالة (الذي ذبحت له القطة بساطور شايقي سنين ) وسلم امره واصبر حاله فرطا ... وتزوج قلوب مارين
|
Post: #43
Title: Re: أساسي راح لي..!!؟
Author: اساسي
Date: 02-21-2007, 09:26 AM
Parent: #8
عمران الوجيه
يا صديقي انتم اهل الدار وقد عمرت بوجودكم واضيف لها كما لم يضاف من قبل
باقلامكم وافكاركم ..
وان شاء الله نصل الفورمة سريعا
|
Post: #42
Title: Re: أساسي راح لي..!!؟
Author: اساسي
Date: 02-21-2007, 09:24 AM
Parent: #6
Quote: هاك كسير التلج ده
مرحبا بروح البورد اساسي
يمكن تلاقي أساسي
|
تعرف يا نوبي تكون دي المشكلة المخلي اساسي رايح مني يكون عشان قصة روح وما روح دي
طبعا الروح ما سئل منها نبي او رسول الا وكانت الاجابة ان الروح من امر ربي ...
يعني مافي حاجة تتقال اكتر من كدا ...
اكون من امر بوردكم دا انا ولا شنو وما لاقي روحي؟
|
Post: #12
Title: Re: أساسي راح لي..!!؟
Author: Ali Alhalawi
Date: 02-20-2007, 09:43 PM
Parent: #10
أساسى الأساسى أو العريس القديم
شوق أساسى و سعيدين بعودتك .. عودة قلم مميّز و صريح و سلس
و أخيرا أطلق صراحك يظهر عملتا لى بت الناس وجع وش
تعرف يا اساسى أتمنى يروح ليك أساسى القديم .. و تعود لينا أساسى الأساسى الجواك .. زول يكتب الأدب و يبدع .. أخلع ثوب السياسى الذى تدرتديه أحيانا لأنّو ما "ماتشنق" مع فكرك الأساسى و البذرة المزروعة جوّاك "أنا شايف كدا .. و ربّما أكون مخطئ" .. صحيح فى حاجات تمغّص تخليك تتداخل و تناكف .. لكن بقليل من الصبر و التدريب حاتشوفها هبالة و مش من المفروض أن نكون نحن السودانيين كلنا بنعرف فى السياسة .. بس إنتا جرّب و ما بتخسر .. أجرى قلمك مجرى الأدب فأن تأدّب سيجرّك معه و أن لم تستسغ ذلك فأتبع هوى عقلك لأنه دليلك و لا يجرّنك هوى الآخرين ففى مضمار هذا الصرح لعيبة جلّ شغلهم تشتيت الأنظار عن عثراتهم
تعرف يا أساسى نفس الكلام دا أود ان أوجهه للواد حميدة .. هو الآخر جواهو زول تانى عكس ما هو باين فى كلامو
و الله سعيد بعودتك و أتمنى ألا تهرشك المدام .. كما هرشت أنا .. من الأبتعداد عن المابيتسماش سودانيرزأونلاين
طبعا الدخول للمنبر بعد غياب بقى زى الداخل ليك بيت مناسبة ما بتعرف زول فيها .. رهبة شديدة .. لكن بتزول بعد تعرفك للناس الجداد و كتار الأنضموا فى الفترة الأخيرة
يلّا فى إنتظار إبداعاتك يا فردة
|
Post: #45
Title: Re: أساسي راح لي..!!؟
Author: اساسي
Date: 02-21-2007, 09:32 AM
Parent: #10
الحبيب لؤي
اين انت يا صديقي .. يومها سمعت من معتصم حين زواج انك بالجوار ... احزنني اني لا اعرف هذا ولكن زال عتبي حين علمت ان بك من المشغوليات ما تنو الكيبوردات عن حمله فخففنا عنا حدة عتبنا
ولكن اتمني ان التقيك ان كنت بالجوار فما يزال جوالي داخل التغطية
الصورة التي تغضب صديقي ود الفاروق دي بتديني ليك احساس انه الواحد طحنية الان بعد الزواج اختلف الامر كثيرا فقد صرت طحنية عديل كدا هاهاهاهاها
|
Post: #11
Title: Re: أساسي راح لي..!!؟
Author: مجاهد عبدالله
Date: 02-20-2007, 09:08 PM
Parent: #1
مرحب بيك ونورت الدار مرة آخري
خالص الود
|
Post: #13
Title: Re: أساسي راح لي..!!؟
Author: abas
Date: 02-20-2007, 09:44 PM
Parent: #1
الحبيب اساسي الاساسي
الف مرحب بيك
ومشتاقين لي طلتك
ارقد عافية
|
Post: #14
Title: Re: أساسي راح لي..!!؟
Author: SAMIR IBRAHIM
Date: 02-20-2007, 09:54 PM
Parent: #13
| Quote: بالله البلقي ليهو اساسي واقع بي جاي يقول لي عوك |
عووووووووووووووووووووووووووك
|
Post: #15
Title: Re: أساسي راح لي..!!؟
Author: وليد محمد المبارك
Date: 02-20-2007, 09:57 PM
Parent: #13
يا سلام ....
بكري اليومين دي فكيهُ لاحق
حبابك اساسي القبلي الكراسي
|
Post: #16
Title: Re: أساسي راح لي..!!؟
Author: DKEEN
Date: 02-21-2007, 00:19 AM
Parent: #1
جينا الغربة ونحن بنحن لي ِفردنا في السودان
جونا بعد داك واحدا إثر واحد..
زول عزيز من اولاد الرياض شارع اوماك
وعشرة جامعة جانا هنا وكتلناها عصريات وخمايس وبر..
الخميس من شدة ثباتو معانا لامن عملنا ليهو سكرتير.. سميناهو سكرتير الخميس ..
هوالبرتب القعدة ويشوف النواقص ويحدد اللوكيشن.
اها زولنا ده بعد عشرتنا ليهو دي قام عرس ..
ومن عرس تاني ما شفناه تب ..
نضرب ليهو في التلفونات يخرخر يقول مافاضي ليكم وماعارف الاولاد وامهم والنسابة..
وهكذا باعنا ليك وباع خميساتنا..
قتا ليهو بجي الخريف يا بو سعن ..
اها بعد خمسة شهور المرة توحمت وشمت ليك دينو ذاتو..
ريحتو ..وشكلو واكلو واي شي..
والوحم بعيد عنكم شي مقرف مرات..
اها ابوسعن تاني قام جانا في الخريف..
وهاك ياتلفونات
وين ياشباب انتو؟؟
الليلة كيف ؟؟..
مااجيكم ونمرق وكده؟؟..
لميناهو تاني علينا
لانو الوحم بروح بس الخوة مابتروح..
اساسي
مرحب بيك وحبابك..
|
Post: #17
Title: Re: أساسي راح لي..!!؟
Author: Tumadir
Date: 02-21-2007, 00:21 AM
Parent: #16
صديقنا اللدود ...ولا حالا بلاك ...
بركة الجيتو ...
أها الحتة فاضية ....كلها ليك ...انا مرقت
(ما بقيتو تلاتة؟).....
|
Post: #18
Title: Re: أساسي راح لي..!!؟
Author: 3bdo
Date: 02-21-2007, 00:28 AM
Parent: #17
اساسينا الاساسي
لكن ما فقدناك بشدة ... يا سيدي نورت البورد لامن طشش ... وكتاباتك دي الواحد بيحس بيها عدييييل كده.ما عارف ليه .. لكن باحس اني بافهمك كتير شديد
|
Post: #19
Title: Re: أساسي راح لي..!!؟
Author: حيدر حسن ميرغني
Date: 02-21-2007, 03:37 AM
Parent: #18
أساسي
دردق كلام دكين ده | Quote: لانو الوحم بروح بس الخوة مابتروح.. |
وحاتلقى الرايح ليك
ومرحبا بالطلَة
|
Post: #20
Title: Re: أساسي راح لي..!!؟
Author: رقم صفر
Date: 02-21-2007, 06:02 AM
Parent: #19
الف مرحب
الامر شبيه بالادمان ، تتخلص منه ولكن فجأة تخضع له فقط ان الكتابه في سودانييز ممتعه
الف مرحب بيك ياحبيب ، نتمناك بصحة وعافية
|
Post: #21
Title: Re: أساسي راح لي..!!؟
Author: mutwakil toum
Date: 02-21-2007, 06:14 AM
Parent: #20
اساسي : أهلاً بيك باك ..
الوصل رتبة سكرتير الخميس أربعة ستات ما بتفرملوا ..
سؤال . من خبرتك الطويلة الفاتت في الغياب . بتمسك إيدك كيف من الكي بورد لم تقراء الكلام الخمج معاك؟
عايز اعتزل الشغلة دي قبل اصل رتبة سكرتير .
|
Post: #22
Title: Re: أساسي راح لي..!!؟
Author: mohmmed said ahmed
Date: 02-21-2007, 06:44 AM
Parent: #21
مرحبا بك اساسى
بعد العودة
|
Post: #23
Title: Re: أساسي راح لي..!!؟
Author: ebrahim_ali
Date: 02-21-2007, 07:03 AM
Parent: #22
الحبيب أساسي الاساسي تحياتي وسلامي والشوق بحر يافردة
أولاً حمداً لله على سلامة العودة الظافرة الميمونة بعد طول الفراق
ثانياً المنبر من بعدك وحشة وغربة وشوق وشلاليت من عند بشاشا لعند دينق ومرور كده بيناتهم بتلقى ناس كتار بقوا ما يكتبوا ليهم سطر سطرين إلا تلقى بوستك شالو ودوه الخور أها الجماعة ديل راجينك
ثالثاً جت مكة ومشيت جدة وسألت عنك واحد من الأصحاب وبعرفك اسمه محمد عثمان حق المعرفة ولكن لضيق الوقت وايضا لوجود وزارة الداخلية معانا لم نتمكن كثيراً من اللف والحوامة في حواري جدة وازقة مكة ولكن للقاء قريب بإذنه تعالى وبرضو عبور
رابعا مسعول من الخير قرشو وابوحراز خبروهن شنو ليهم فترة ما بانو
|
Post: #24
Title: Re: أساسي راح لي..!!؟
Author: Tragie Mustafa
Date: 02-21-2007, 07:09 AM
Parent: #23
مرحب بك اساسي
ان شاء الله المدام بخير.
افتقدناك؟؟
بالله جيبوا قرشو ضروري.
تراجي.
|
Post: #25
Title: Re: أساسي راح لي..!!؟
Author: bob
Date: 02-21-2007, 07:15 AM
Parent: #22
حمد الله على السلامه ...يا اساسى
البورد ضلم!!
|
Post: #26
Title: Re: أساسي راح لي..!!؟
Author: Omer Abdalla
Date: 02-21-2007, 07:19 AM
Parent: #1
مرحبتين حبابك يا أساسي
وانشاء الله تكون فترة الغياب مفيدة من كل النواحي (يعني يكون في تطور في الحالة الأساسية) :-)
عمر
|
Post: #27
Title: Re: أساسي راح لي..!!؟
Author: hajhamad
Date: 02-21-2007, 07:49 AM
Parent: #26
مرحبا بيك و نورت البورد و اشتقنا لكتاباتك و مناكفاتك ، و بلا شك أساسي نجم من نجوم البورد الذين وضعوا بصمات واضحة لا تخفى على متابع.
منتظرين مناكفة قوية و في مناكفين منتظرنك و أكيد ما بيقصروا بيضيفوك تلاتة يوم و بعدين نحن نقرأ و بس!
الحاج حمد
|
Post: #29
Title: Re: أساسي راح لي..!!؟
Author: إسماعيل وراق
Date: 02-21-2007, 07:55 AM
Parent: #27
مرحبا اساسي الأساسي
|
Post: #28
Title: Re: أساسي راح لي..!!؟
Author: abuguta
Date: 02-21-2007, 07:53 AM
Parent: #26
جيت بعد ما حسنا
انقرش..
اتفرق فراشنا
الانفرش..
دكين
باع العفش..
وخدر
بقى زولا هش..
من صرخات ( لقاء)
منهرش
( شنا) غائب
من زمن
غنمايتو دايرة
القش..
ناس جدة مسجلين غياب
قرشو بقى منقرش..
يازول كلامو يحنن
ودموعو ماليه
الطش...
(الخواض) ترك
الشعر
من زمن
ما هش هش..
مستنيرينك
مباديهم ماتت
سكنو العمارات
وباعو ناس العشش..
بقو متخاصمين
فى بعض
حركات تحرر
كلها غش..
دار فور الموت
بالجملة
ما ناسين
اهلنا الغبش..
سوف ننصركم
من المنافى
وشايفنكم
على قنوات الدش..
اسرائيل صارت
صديقة
رشت
الفلسطينين
رش..
حقوق الانسان
صارت حكر
ناس بطيخ
والتانين تبش..
مليت نضالات
المنافى
لا فيها
كسر.. لا دم
لا خدش...
اشتاق الى اســاسى ...وكمال عباســى
|
Post: #30
Title: Re: أساسي راح لي..!!؟
Author: Bakhaf
Date: 02-21-2007, 08:04 AM
Parent: #26
حبيبي البي
حمدا لله علي السلامة
الايام دي شايف العصابه القديمة كلها رجعت
قلب البورد
وروح البورد
رقم صفر
شرير والبرتقاله
عقبال البقية انشاء الله
مسئول من الخير وين شــــــيري ؟
|
Post: #31
Title: Re: أساسي راح لي..!!؟
Author: A.Razek Althalib
Date: 02-21-2007, 08:06 AM
Parent: #26
ما قلنا ليكـ..
يا صاحب البورد..
العود أحمد..
|
Post: #38
Title: Re: أساسي راح لي..!!؟
Author: sunrisess123
Date: 02-21-2007, 09:07 AM
Parent: #31
لك التحية أخي السماني مبارك إبراهيم ، ياأساسي أو رومانسي سابقاً... وكل ما إتذكر حادثنا بالسيارة أضحك والله ،،،،
بقيتو تلاتة ولى لسع ،،،،
|
Post: #32
Title: Re: أساسي راح لي..!!؟
Author: ناذر محمد الخليفة
Date: 02-21-2007, 08:20 AM
Parent: #1
|
Post: #33
Title: Re: أساسي راح لي..!!؟
Author: Muna Khugali
Date: 02-21-2007, 08:35 AM
Parent: #32
مرحب برجوعك..
رجوع طيب بإذن الله
|
Post: #34
Title: Re: أساسي راح لي..!!؟
Author: JAD
Date: 02-21-2007, 08:48 AM
Parent: #1
الوريف أساسي ..
تحية طيبة،،
عوداً حميداً ..
ألف مرحب بيك ..
نورت الساحة ..
جاد
|
Post: #40
Title: Re: أساسي راح لي..!!؟
Author: خضر حسين خليل
Date: 02-21-2007, 09:11 AM
Parent: #34
أساسي
اذيك ياظلامي
هههه ليك وحشة وحياتك أما بعد مشتاقون لحدي حد الحد
طبعاً يااساي زي ما إنت شايف المنبر ده غايتو بعد ده الا تجي مركب ليك مكنة جديدة
مكنة الظلاميين دي مابتسندك تاني (ههههه) ومابتشيل في زول . ده غير أنو ماشاء الله
بسم الله المنبر إتملأ بي ظلاميين (جد جد) غالباً استوردهم بكري ابو بكر من ( جادو ماركت)
.............
مبروووك العرس ياخينا
وليك وحشة وحياتك
خضر
|
Post: #39
Title: Re: أساسي راح لي..!!؟
Author: هشام المجمر
Date: 02-21-2007, 09:08 AM
Parent: #1
أســـــــــــــــاسى
حمدا بسلامة العودة
| Quote: يكون العِرس كتل قلبي؟؟ |
أنت قايل دخول الحمام زى خروجو.
أها بعد سنة عرس أساسى الراح ليك ده كوس كان تلقاهو
نظرية الجماعة بيكونو هدو فيك ما تتجاهلها
حاول تتعايش مع الواقع
هنا بنقبل بيك : أساسى بعد التعديل
|
Post: #46
Title: Re: أساسي راح لي..!!؟
Author: BAKASH
Date: 02-21-2007, 09:39 AM
Parent: #39
اسااااااااااااااااااااااااااااااااااااااسى
دبايوا
والله اشتقنا لى مشاكساتك وردودك الساخره
والله لسه اتزكر ردك لى ابراهيم بقال وهو لابس البدله لمن استقبلوه الجماعه فى المطار وبضحك براى زى المجنون
حمدالله على السلامه
وقلنا ليك زماااااااان ما تقدر تفارق البورد عشان ادمانو ما سمعت الكلام عملت فيها عنتر
تحياتى
بكاش
|
Post: #47
Title: Re: أساسي راح لي..!!؟
Author: يازولyazoalيازول
Date: 02-21-2007, 09:40 AM
Parent: #39
جاى بعد ما نضب معينا يا سقيل
أها لقيتنى كيف؟؟؟
|
Post: #48
Title: Re: أساسي راح لي..!!؟
Author: nazar hussien
Date: 02-21-2007, 10:06 AM
Parent: #47
| Quote: (ما بقيتو تلاتة؟)..... |
صاحبي كان قبل شهر وهو راجع السودان بيعمل في بروفة
الرد علي سؤالك يا تماضر؟
يقيفوا هو وزوجتو قدام المراية....وصاحبي يسأل مرتو
بعد السلام الكتييير ازاي الحال الله يبارك فيكم طيبين
الله يسلمكم الله يبارك فيكم اريتكم طيبين وبركة الشفناكم طيبين
ويقولو لي بعد ما يخلص سلامنا انت قول لينا....اها ما بقيتو تلاتة؟
اها كل مرة عندهم اجابة...،نوع انت شايفنا كم هسي؟ ومرات تجاوب
زوجتو...لسة والله ربنا ما كتب...
آخر شي اتفقوا يقولو للناس كلهم يتلت .....
قالوا بي كدة تاني مافي زول حا يسألنا...
اهلا باساسي...صديقنا الحميم القديم...انا شايفك لسه اساسي
|
Post: #49
Title: Re: أساسي راح لي..!!؟
Author: adil amin
Date: 02-21-2007, 10:59 AM
Parent: #1
اساسي القاسي
العامل ناسي
الكوز البعدل لي راسي *
...........
والله بعدك البورد
بقى
كان جينا للبوبار نلقى ناسو كتار
....
|
Post: #50
Title: Re: أساسي راح لي..!!؟
Author: Ibrahim Algrefwi
Date: 02-22-2007, 03:32 PM
Parent: #1
معقول ياخي أساسي يروح ليك يا أساسي ؟
ياخي إنت كنت زول مثقف وديمقراطي ولغتك مُهذبة وبتحترم
الناس وكنت بتكتب عن الموسيقي والتلوين والغُني والشعر
والرواية والقصة القصيرة والعمل الثقافي والمعرفة
وقضايا التمنية والعمل الإنساني المدني وعندك مشاركات فكرية
ممتازة عن السودان والحرب والسلام وكنت بترفض الإستغلال والعنصرية
والتهميش والإستعلاء بمختلف اشكالو ....
كده إتذكرته ولا لسه ؟
حباب الحباب ...
|
Post: #51
Title: Re: أساسي راح لي..!!؟
Author: خدر
Date: 02-23-2007, 02:16 AM
Parent: #50
| Quote: بالله جيبوا قرشو ضروري. |
قوية يا تراجي
سماني
حمدالله علي السلامة
|
Post: #52
Title: Re: أساسي راح لي..!!؟
Author: اساسي
Date: 02-25-2007, 06:03 PM
Parent: #51
احبة الملتقي
Ali Alhalawi
مجاهد عبدالله
abas
SAMIR IBRAHIM
وليد محمد المبارك
DKEEN
Tumadir
3bdo
حيدر حسن ميرغني
رقم صفر
mutwakil toum
mohmmed said ahmed
ebrahim_ali
Tragie Mustafa
bob
Omer Abdalla
hajhamad
إسماعيل وراق
abuguta
Bakhaf
A.Razek Althalib
sunrisess123
ناذر محمد الخليفة
Muna Khugali
JAD
خضر حسين خليل
هشام المجمر
BAKASH
يازولyazoalيازول
nazar hussien
adil amin
Ibrahim Algrefwi
خدر
ــــــــــــــــــ
لماذا كلما حضرت
تكثفت أشواقي
وبارزتني
لك الله أيها
القلب الحزين
ولك العدم أيتها القروح؟؟
لماذا تترتب
الفوضى في وجودك
ولا أتوقف عند حواف الكتابة
وأظل أنا وقلمي بك أيها الجبار
نغدو ونروح؟؟
الكلام اعلاه لعضوة المنتدي ريل
سلام من القلب وتحيه بلون العافيه وشكل الحب الى كل من سأل عني ومن لم يسأل عني . .. وتبقى شخوصكم واصواتكم ومداعباتكم حاضرة على مساحة الوقت .
|
Post: #53
Title: Re: أساسي راح لي..!!؟
Author: PLAYER
Date: 02-25-2007, 10:00 PM
Parent: #52
| Quote: فكرت اني احتاج لبعض تمارين الاحماء للوصول الي الفورمة (الاساسية) |
يا فردة
اسرع طريقة للاحماء في البورد انو تدور شكلة خفيفة وانا متبرع لك بنفسي
يلا ابدا ونحن معكم
اقترع موضوع الشكلة يكون العزوبية والزواج ايهما افضل...وما دام انت انفصلت مننا فأكيد حتتمرن بنفس...........
بالمناسبة.....وينك اختفيت
حكمة اليوم
لتفادي اصابات البورد يجب الأحماء
|
|
