سؤال محير

قعده في ضل حيطه وفناجين جبنه وطربيزه قديمه يحوم حولها الضبان وبلاعه خلاص إتملت وبدت تسيل في الشارع وكلب ممد في الضل يغط في نوم عميق ، شخوص المسرح ناس في الزون زي ما بقولو يعني خلاص بلغ بهم الكبر مبلغه وراجيين الموت ، ولأن الموت لا يأتي بمزاج زول قد يطول إنتظارهم قبل أن يدركهم الموت أو أن يجيهم وهم ما ناقشين إنو ده الموت الأحمر ، المهم في الليله ديك أو اللحظه ديك كلنا بنعرف إنو الله كريم لأننا في أشد الحاجة إليه أو ما عارفين نعمل شنو وبرضو بنعرف في حالات الشدة الشديدة إنو الموت حق. وعشان الناس تطلع من السيرة دي لازم تغير الموضوع ، وتغيير الموضوع في السودان أسهل بكثير من تغيير ثوابت كثيرة ما كان يمكن أن نتخيلها تتغير والمسافة بين خيالنا وواقعنا فرق مقدار يقاس بمقاييس جديدة لم تصل بعد لمدارك علم الحساب والهندسة ونظرياتها.
اصعب مراحل الإنسان لمن يصل مرحلة التقاعد ويصل لسن المعاش ويقعد بلا شغل ولا مشغله فيعيش فراغا أكبر من الفراغ الذي كان يعيشه وهو يعمل ، لأن الذي يعمل في أغلب الأحيان وفي هذه الأيام على وجه التحديد بيكون أساس تعيينه غلط يعني محاباه واسطه سمها ما شئت والشئ الأهم من ده أنه لا يقدم و لا يؤخر شئ في العمل بإعتبار أن فاقد الشئ لا يعطيه ، يعني الإنضباط صفر والأداء صفر ومعرفة الوظيفة صفر وبالضرورة الإنتاجيه صفر كبير.
أمس أحمد ولدي فكاها في وقال لي يا أبوي إنت لمن تعجز وتخلي الشغل حا تعمل شنو وبرنامجك حا يكون شنو؟ وإذا كان الخيار بيدك فأحسن ليك تصل لغاية السن البتكون فيها ما قادر تعتمد على نفسك ولا أحسن ليك تموت وأنت في قمة العطاء ، وضروري تعرف إنو الموت بعده حياه أبدية وبين قبض الروح ونفخ الصور في أهوال كثيرة أها قلت شنو يا حاج؟ فقلت ليهو والله خليني أفكر وأشاور ناس يمكن يكون عندهم إجابه أو بعض من إجابه لتساؤلاتك المشروعة وغير مبررة بالرغم من واقعيتها ، أها قلت أسالكم قبل ما يسألني نكير؟
====
طبعاً أنا بحسابات بسيطة كده داير لي زي كم وعشرين سنه عشان أدخل الزون ، والزون للذين يعلمون ولا يعلمون هو العمر الواقع بين عمر الزهور وعمر الغرام وقبيل عمر المني مباشرة تقدروا تقولوا في المنطقة الأكثر دفئاً ومع ذلك نسل الله حسن الخاتمة.

أعمل الحاجـة القدامك بس.. حتى لو نفض تراب من قميصك.
ما تقســم العمـر لزونـات.. العمـر واحـد وطولو من المهـد للحـد.. ما يتقسـم
فى زول عمر الزهـور يطلع من هنا ممكن تضربو عربيـة ويمشى بى غادى.

أبو الريش متعك الله بالصحة والعافية
قد أختلف معاك في حكاية إنو العمر ما بتقسم لزونات ، العمر بتقسم وفق المراحل المعروفة طفوله شباب نضوج وأخيراً شيخوخه.
والإحساس بالشغل غير المقدرة على أداء العمل وفقاً للتغيرات التي تفرضها كل مرحلة عمرية.وده كلو هين يعني هسع أجاوب بلا ولا أطنش.

أولا أقتراحى تقول لإبنك أنك حتبدأ حياة جديـدة.. شغل جـديــد، حتى لو كتابة كتب أو تأليف موسيقى.. أو الإلتحاق بكليـة حتى!
وبالنسبـة لما نحن مختلفين فيـه، فأعتقـد أن كل ما يتصل بالطبيعـة، ومنه حياة الإنسـان وتطوره، فإن بيانه خطى وليس رقمى.. فحتى لو اعتمدت نظام الزونات، فلا تجـد تأريخ فاصل (باليوم والشهـر) بين الطفولـة والشباب، أو بين الشباب والشيخوخـة.. كلهـا تقديرات.. وتجـد أحدهـم قـد صار كهلا، وفجأة يعود اليه الشباب.. إذا هـذه التقسيمـات هى فى عقولنـا فقـط وليست حقائق موضوعيـة خارجيـة.. والدليل على أنهـا عقليـة هو ما يحدث عندمـا يتسلم أحدهـم خطاب النزول للمعاش، فتراه فى اليوم التالى وكأن عمره 100 عام.. ذلك لأن عقله فى اللاوعى أعطى الأوامـر للجسـد بأن يتصـرف كرجل عجوز، والجسـد عبد المأمـور، لا يعصى العقل ما أمـره.. ومعظـم الناس عقولهـم فى مكان اللاوعى مبرمجـة على أنهم لا يمكن أن يكونوا مفيدين بعـد سن المعاش.. وكل ما يحدث بعـد ذلك هو تشغيل البرنامج المعـد سـابقـا.