المؤتمر الوطني يدرس دخول الانتخابات كجبهة

الشرق الأوسط
الاحـد 30 محـرم 1428 هـ 18 فبراير 2007 العدد 10309
لندن: حسن ساتي
قال د. مصطفى عثمان اسماعيل، مستشار الرئيس السوداني عمر البشير ووزير خارجية السودان الأسبق في حوار مع «الشرق الأوسط»، إنهم في حزب المؤتمر الوطني الحاكم يتدارسون إمكانية الانتقال بالتجارب الديمقراطية السودانية من ديمقراطية وستمنستر، الصوت الواحد للناخب الواحد، والتي جربها السودان في الديمقراطيات الثلاث منذ استقلاله في 1956 و1964 و1986، إلى ديمقراطية التمثيل النسبي في الانتخابات القادمة المستحقة بعد نحو عام ونصف العام.
وبرر مصطفى ذلك بحساب يقول، إن نموذج التمثيل النسبي لا يمكن أن يحرم أحزابا كثيرة من الوجود في البرلمانات الولائية والبرلمان القومي، في حين لا تتيح ديمقراطية الصوت الواحد للناخب الواحد ذلك.
المؤتمر الوطني يدرس دخول الانتخابات كجبهة

Quote: المؤتمر الوطني يدرس دخول الانتخابات كجبهة

تاني جبهة يا ربي المرة دي تكون جبهة شنو؟

الأخ عبدو عبد الحميد تحياتي

زي الجبهة الحالية دي .ناس ماسكة القرون وناس بتحلب

وبعد ما ينتهي الأمر نديكم من اللبن شوية البسكت الشفع

والباقي لي عشانا وعشي جماعتنا


بحيراوي

العزيز البحيراوي
تحية طيبة

Quote: زي الجبهة الحالية دي .ناس ماسكة القرون وناس بتحلب

الى متى ناس تمسك القرون
والى متى ناس تحلب
والى متى ناس يجيها الحليب في مكانها من دون مسك قرون ومن دون ما تحليب
ولا رفس كرعين ولا طعين قرون يا حظهم.
كسرة:
البحيراوي طبعاً وقتن البقر جن مدانيات على الفريق والناس شالوا"المحويت"
و"الكبروس" وماشين يحلبوا انت تب ما فيك لكن انتظر الجاي وعلى قول المثل
"الحاري ولا المتعشي" امسك في دي بأربعاتك.

العزيز عبدو تحياتي

والله يا زول بقر الجماعة ديل بقن بحلبوهن بلا محويت
لا بطقعن ولا برفسن .. وحتى البو ذاتو بقي برضع


بحيراوي

Quote: إنهم في حزب المؤتمر الوطني الحاكم يتدارسون إمكانية الانتقال بالتجارب الديمقراطية السودانية من ديمقراطية وستمنستر، الصوت الواحد للناخب الواحد، والتي جربها السودان في الديمقراطيات الثلاث منذ استقلاله في 1956 و1964 و1986، إلى ديمقراطية التمثيل النسبي في الانتخابات القادمة المستحقة بعد نحو عام ونصف العام.

يا جماعة الخير لو اتفضلوا وشرحتوا لينا الجزئية دي يكون ما قصرتوا تب عشان الواحد لو ربن طول في عمره وحضر الإنتخابات يكون عارف بيعمل في شنو انا باقي عندي فقدان ثقة في الحكومة يخيل لي البجي منها دا كلو كضب في كضب وبعدين كمان الواحد مما فتح عيونو علي دكتاتورية نميري ما كان بحق ليه يصوت وجات الديمقراطية الثالثة صوتنا فيها ودي بتاعت وستمنستر عارفنها بالحيل ،لكن التمثيل النسبي ذي الإنتخابات الأمريكية ولاشنو؟
ولا ذي قوائم إتحاد الطلاب ؟يعني ما فيها رئيس وزراء ولا كيف ؟ارجو افادتنا الواحد مخو جايط شوية في المسائل القانونية والدستورية واشباه ذلك .

Quote: وحتى البو ذاتو بقي برضع

يعني يا البحيراوي الواحد يتوقع النعامكمان يقوم يطير

Quote: ديمقراطية وستمنستر، الصوت الواحد للناخب الواحد، والتي جربها السودان في الديمقراطيات الثلاث منذ استقلاله في 1956 و1964 و1986، إلى ديمقراطية التمثيل النسبي

يا ناس الله يرضى عليكم نورونا اكثر عن ديمقراطية التمثيل النسبي دي بالذات وهل تناسب الواقع السياسية السوداني ؟انا شخصياً عندي قناعة اي شيئ انجليزي هو الأصل وغيره تقليد ولذلك اري ديمقراطية وستمنستر ذات الدوائر الجغرافية دي مناسبة معانا وجربناها كمان الإ لو المؤتمر الوطني دا عايز يجوطنا زيادة لأنو مفتون بالتغيير من دون دراسة ذي السلم التعليمي ،والغاء مجانية التعليم والصحة ،و.....و يا عايرة وادوكي صوت.