Post: #1
Title: القطــيم .. والعكلـيـــت .. وعويــر امــو (2) !!
Author: تاج السر حسن
Date: 02-15-2007, 05:18 AM
اول حاجه (2) دى اشارة لأخونا (اوسلى) 2 ، عشان هواول من نقل عننا شئ من فنون (العكلته) و أختها (القطامه) .. فى زمن كانت فيهو سيرتنا بخوفو بيها الناس فى المنبر (زى ود أم بعلو) .. واها شوفتو نموذج (عكلتة) زى ده قبل كده ؟ الواحد كان زول نقل منه حاجه ونزلها نرجعها ليهو تانى ونعتبرها حقتو !! فى الحقيقه ده اثر السودان القديم فينا القالو عليهو كعب ؟؟
كنت عايز أبدأ (بعوير امو) لكن (العكلته) فن .. و(القطامه) علم .. وكان مغالطنا أسال (العنبه الراميه فوق بيتنا) !!
المهم قالوا (جعلى) امام زاويه (عكليته) كان بصلى بالجماعه فى شندى (العمم فوق) و(الطواقى مشنقه)، جات (مره) جعليه ماشه بى قريب منهم .. قالت (هى كدى فوق الجعليين الفى صلاتهم زينين)!!
قام الأمام :-
وقف صلاتو واتلفت عليها ورفع يدو وبشر وظهرت سكينتو فوق ضراعو وقال ليها:-
(ايشرى) !!
و قبل ما نبدأ بالتعريف أو ندخل فى الغريق و(بدون زعل) من هنا ولا هنا ولا من أهل الجنيه الجديد أو من اهل (اوسلى) وده طبعا شئ بفرح ناس (السودان الجديد) .. نقول شئ عن (عوير امو).
(عوير امو) زول بكون دلاهه كده فى الغالب ولد ناس مرتاحين .. التصريج يتابعو مهما قطع من مراحل تعليميه لازم تظهر عليهو (شتاره) .. و(عوير امو) انا بعرفو كويس من سيمائه والتصريج، عندو تصريح ما بعملو محمد صالح كوبر !! حكينا قصتو (لاعب الهلال) السابق.
اها (عوير امو) دخل المرحله الثانويه يعنى ممكن يعرس براحه .. وعرف شئ من اللغه الأنجليزيه.
قالو امو ماشه (الحج) قالت ليهو:-
أجيب ليك معاى شنو يا ولد من الحج؟؟
قال ليها:-
جيبى لى معاك (بلو جينز أخضر) !!
|
Post: #2
Title: Re: القطــيم .. والعكلـيـــت .. وعويــر امــو (2) !!
Author: تاج السر حسن
Date: 02-15-2007, 05:43 AM
Parent: #1
طبعا امام الزاويه القبيل بشر فوق (المره) .. لو ما خاف من ناس (الزرقاوى) والذى منه كان وقف واخد ليهو تكيه فوق عصاتو وغنى مع (المره) غنية وردى:-
(هى أقدلى وسكتى الخشامة) ثم يعود !!
وأن شاء الله (الصلاة) تنقطع ولا ما تنقطع ما بهمو .. هو فى صلاة أكلها (كديس) ؟؟؟
و(الصلاة) الأكلها (الكديس) دى عندها قصة مع واحد لا قادر اعرفو (قطيم) ولا (عكليته).
بحكى ليكم .. شيلو الصبر.
|
Post: #3
Title: Re: القطــيم .. والعكلـيـــت .. وعويــر امــو (2) !!
Author: تاج السر حسن
Date: 02-15-2007, 07:22 AM
Parent: #2
برضو لسه شويه ما ح نعرف لا (القطيم) ولا (العكليته) ح نكى عنهم، ولمن يكمل الكلام، بندور لى (عوير امو) ثم نعرف الثلاثه على أبسط صورة.
المهم موضوع الصلاة ( الأكلها) الكديس!!
قالوا واحد (عكليته) مخلوط بى (قطيم) كان معزوم فطور رمضان مع جماعة من النوع (العوير امو) اول ما الأذان يأذن يشيلو ليهم بلحه ومعاها تمرة وجرى على الصلاة ، يعنى فاكرين القصه فلاحه ، مع انه الواحدج تلقى بصلى وبالوا كلو فى الشيه والفول والذى منه.
صاحبنا (جعان) شديد وقطع الجوع فى بطنو ، ومشى مع الجماعه الصلاة.
اها لمن رجعو لقو (الكديس) قام ليك بالفطور كلو وما خلى شئ!!
صاحبنا الغصه كتلتو .. وقام قال ليهم:-
هسه من الله خلقكم شوفتو ليكم صلاه أكلها (كديس) ؟؟
|
|