صديقي (أنصار سنة على السكين) يطلب الحصول على عضوية المنبر

الواثق ...
- طالب بجامعة الخرطوم...
- السنه الثالثة كلية الهندسة.
- المتحدث الرئيسي لجماعته (كادر خطابي).
- سنة الدخول للجامعة 1996 م (حتى الآن ).
- يعني بالواضح كدة (دفعتي)
- طلب مني ذلك...
- هل من مثني ؟

لا أري مانعا من التثنية

علي أمل أن يشكّل دخوله أضافة إيجابية للمنبر

ولإثراء ا لنقاش في المواضيع المطروحة ... عبر مده بوجهات نظر تختلف

عن كثير مما أعتاد أن نسمعه /نقرأه من أغلب المشاركين هنا ..






.

السيد محمد عوض ...
- أوافقك في التبرير الموضوعي ...
- لعل المنبر يحتاج لأطراف متباينة في الرؤى والمواقف...
- لكن اجدنى أخشى من إنحراف الخطاب مثلما يحدث الآن بالجامعات...
- وبالأحص لدى جماعات الإسلام السياسي...
- لا أستثني من ذلك - صديقي - الواثق ...
- الأمر مطروح للجميع

Quote: الواثق ... - طالب بجامعة الخرطوم... - السنه الثالثة كلية الهندسة. - المتحدث الرئيسي لجماعته (كادر خطابي). - سنة الدخول للجامعة 1996 م (حتى الآن ). - يعني بالواضح كدة (دفعتي) - طلب مني ذلك... - هل من مثني ؟

ألف مرحب بيهو الأخ الواثق... ونثني ونص وعشرة كمان...

بس حكاية دفعتك دي... ودخل الجامعة 1996م دي فيها نظر!!! ناس تحب تصغر نفسها بَثْ!!!

كميات مودتي...


أبو الحســــــين...

أنصار سنة على السكين ؟؟

Quote: - سنة الدخول للجامعة 1996 م (حتى الآن ).

وائل
أثني قبول الزول ده عشان حاجه واحده بس
دايره يجي هنا ويورينا هو من 96 لحدي حسع قاعد في الجامعه بسوي شنو ؟؟؟؟؟؟!!!!!!!!!
ودي بلاده منو وللا عدم مسئوليه ولا خوف من الخروج للعالم الكبير

ابو الحسين ....
أشكرك لكن مالك مستغرب من قصة 96 دي ؟

sunrisess123
صحبي ده مش على السكين وبس قلت ليك كادر (ركاني)....
ياما نبذنا وهاجم الديمقراطيين... ياما !!!
برضو على السكين ... تتخيل ؟
لسان حاله يقول (على الوعد القديم... على السكين سلفيين ... وحاة إسم الله أصوليين ..)
لك ودي ....

الشقيق وائل طه ويتك ما باين
الواثق الهترنجي الضحاك
دي كبيره يا ابو اللول

محمد فرح ...
الزول دخل الجامعة 96 وما قدر يطلع ...
أظنه عاوز ( يطلب العلم من المهد لحدي اللحد)!!!
مافي داعي للإحراجات................

عبد العظيم تحياتي ...
طبعاً ياهو الواثق ...
شوية مشغوليات أبعدتنا عن المواصلة...

اوافق علي دخوله

وله اخوة اكثر هوس بالمنبر وكمان اخوات

ما بطال اكون اضافة لحجب التيار المعرفي

وفي حتات كتيرة محتاجه لهوسه الديني وهو وهابي وليس انصار سنة

كذبا التصقوا بالسنة وهو ابعد منها, صديقك يتبع فكر محمد بن عبد الوهاب وليس فكر نبينا الكريم


الذي يتمتع باجمل الخصال ولو تشبه هو وانا بهذه الخصال لما ضعنا وتهنا مع قادتهان وهابيون اواخوان مجرمون


مرحب بصديقك يا وائل وخليه يبلغ التحايا لمرشده عبد الحي يوسف خالق الفتن والاحن بالجامعة

وما بطال لنا اسئلة حول صراع الوهابيون قدامي وجدد هل هو حول النص او صراع ثروة وسلطة

الاخ وائل تحياتي
لا اظن ان هناك مشكلة في طلب عضوية له والمجتمع خارج المنبر متنوع ومتباين قليكن هذا التباين والتنوع في المنبر ايضا.... فربما يفضي الي اتفاق او اختلاف با حترام وبالتالي رسم طريق ينير للاخرين دروب المعرفة

نثني

دقسة:-شن بلم القمري مع السنبر

وائل .. كيفك ..
واخبارك ... والانتخابات متين ..؟؟




صديقك ده الواثق الصادق ولا واحد تانى ...؟؟

وائل
دبايوا
اعتقد انك اخطاءت بدون قصد فى كشف سلفية صديقك وكما ترى البعض انبرى يهاجمه قبل ان يعرفه وهكذا دائما البعض .
وبالتاكيد اثنى دخوله لانه سيكون اضافة جديدة لينضم الى لواء الحق .

الأخ وائل
نرحب بالواثق
جماعة أنصار السنة الموجودة الآن إستطاعت بشكل كبير أن تطور مواقفها وأدواتها, فهى ليست أنصار السنة بتاعين زمان, وهذا التنظيم له تاريخ مشرف فى نبذ العنف , فهو لم يشارك الجماعات الإسلامية الأخرى فى كثير من العنف الموجه ضد الخصوم. كما إن موقف الجماعة المبدئى فى الإنتخابات من عدم التحالف مع الكيزان فى ما يسمى بالقائمة الموحدة التى إنضمت لها جماعات أكثر تشددا من انصار السنة- يستحق التقدير.
انصار السنة الموجودون فى الجامعة ( فاهمين ) جدا , ولهم كوادر مستنيرة , ويديرون إختلافهم مع الباقين بالتى هى أسهل , وأعتقد أن أنصار السنة سيكونون التنظيم الإسلامى الأول فى الجامعة بعد هلاك الكيزان الفكرى والتنظيمى والأخلاقى ( إذا لم يسقطوا فى فخ الإقتتال الداخلى ).إذا , هم قوة لا يستهان بها , ورقم لا يمكن تجاوزه بالمعطيات الآنية. .
كما إنهم يعترفون بالآخر وبحقه فى الوجود الشئ الذى لم يتوافر سابقا ! فى زمنا كان أنصار السنة يحرصون على إيصال نسخة من أى بيان يصدروه للشيوعيين ,أذكر إن أحمد الكادر الشيوعى أقام مرة ركن نقاش ليناقش ويشيد ببيان لأنصار السنة , وأعتقد إن هذا الموقف الديمقراطى جدير بالثناء بين تنظيمين لم يكن يجمعهما إلا ما صنع الحداد , وما يشترى من مغالق السجانة !
يا وائل لو لقيت لينا( لؤى) بتاع النيلين داك كمان يكون كويس . . الزول داك بسوى فى الكيزان ديل جنس شى !

الاخ العزيز وائل طه
لك التحية

اولا ارحب بالعزيز الواثق ..
ابن التور وكافتريا المهندس وقاعة الترابى وبليل ...
اذكره جيدا قبل عامين تقريبا كفرنى
عندما احضرنا ندى القلعة الى كليه العلوم الرياضية (school of math) فى الاسبوع الخاص
وقال بانه سوف يهدر دمى
ومن وقته لم اقابله الى الان ؟؟؟
اتمنى ان نراه بيننا ...

واول من يرشحه للمنبر ...

تسلم

اذكره جيدا قبل عامين تقريبا كفرنى
عندما احضرنا ندى القلعة الى كليه العلوم الرياضية (school of math) فى الاسبوع الخاص
وقال بانه سوف يهدر دمى


أنا غايتو ما متذكر..
ما حصل كفرت لي زول بعينه يا أخي..
ما كان تجيبوا ندى القلعة دي ياخ لأنو دي جامعة الخرطوم..
أقول ليك حاجه هي ندى القلعة ذاتها مسلمة خي البجيبها..
علاقة ندى القلعة دي علاقتها شنو بالنضال؟

Sabri Elshareef
تحيات الصباح ....
طبعاً ما مختلفين كونهم أتباع إبن عبد الوهاب فقط إطلاق الإسم لمجرد ما عرفوا بهم أنفسهم (ما أطلقوه عن مجموعتهم)...
- بذلك أظن أنك تعتقد أن (أنصار سنه) إسم وليس صفة...
أوافقك أو لا أوافقك...
طيب (حزب الله كيف)؟؟؟؟؟؟؟؟؟؟؟؟؟؟؟؟؟؟؟؟
مودتي

السيد نيازي...
بالتأكيد من الأهمية بمكان أن يمثل المنبر التباين الثقافي والديني بالإضافة الى الفلسفي و...
لذلك جاءت أهمية وجودأفراد متبايني الرؤى والأفكار
فقط الموضوعية شرط رئيس يجب أن نلتزم به جميعاٍ ولو أن البعض كثيراً ما لا يفعل ذلك..

العم العزيز صبري ...
القمري منو والسنبر منو ؟
حيرتنا ...
قالوا عبد الرحيم محمد حسين إتبرع للنوبه بـ (2 مليار جنيه) للزواج الجماعي الذي أقيم مساء الخميس الماضي بالنادي النوبي !!!
(شن بيلم شهر العسل وسنين العسل ؟)
طبعاً الكيزان نايمين على العسل من (1989)...
العرسان ديل مساكين شهر كده وشوية(2 مليون) فرحوا بيها !!!
ماعندك قريبك أو قريبتك إتزوجت عشان (نكفر ليك)...
ماتزعل يا (أنقي)...
آفيالوق...

الأستاذ الطاهر ساتي ...
- حمداً للسلامة مجدداً ...
- الإنتخابات في يد الإدارة يا أستاذ ..
- ما تنسى مسئوليتك الى ساهمت بيها في تعطيل العملية الإنتخابية !!!
- على العموم مافي مشكلة يوم ليك ويوم عليك ...
- الواثق ده (أخو فاطمة )!!!
- تقديري...

الرد الأسبق كنت أقصد توجيهه للعم (فيصل ) وأخطأت حين كتبت (صبري)
- عذراً السيد صبري ...

السيد نوريت ...
أبداً كنت ولا زلت أقصد أن أكشف سلفيته ...
- الأمر ليس بسر خطير...
- فقد كتبت أنه(المتحدث الرسمي لأنصار السنه بالجامعة)...
- أوافقك على مبدأ عدم الهجوم على الشخص قبل التعرف عليه ..
- لكن يبدو أن البعض كتب إعتماداً على معرفته العامة وهذا ليس بخطأ...
- كثير من ال (بورداب) يسندهم الإطلاع وربما التجربه...
- قد تكون التجربة في محيط حركة الطلبة أو في الشارع أو ...
- هذا ما لا يتوافق مع ماذكرته بأن البعض (سريع الهجوم)..
- على العموم لنرى ما سيحدث لاحقاً...
- الود سيدي هشام نوريت...

الأستاذ عزان سعيد ...
هناك أراء متباينه حول تقييم عموم الديمقراطيين لنشاط أنصار السنه لا سيما في الجامعات...
أجدنى لا أوافقك الرأي في مسألة تطوير جماعتهم لأدوات عملها ، فاجماعة تحولت بشكل أو بآخر الى تنظيم سياسى منذ نهاية تسعينيات القرن الماضي ، وصارت تخوض إنتخابات بحملات دعائية وتنظيمية جادة بالإضافة إى خط سياسي واضح المعالم...
بعد كل ذلك لا يعترف البعض منهم - بأنهم تنظيم- وتجهم يناقضون الواقع إذ يتعمدون الإصرار كونهم (مجرد جماعه دينية)!!!
هذا الصراع شبيه بمرحلة من مراحل تطور الفكر (الإخواني في حقب سابقة ) وهنا لا أقصد الربط المباشر بل الإشاره الى التشابه الذي يعتري حركات الإسلام الحركي ، أو السياسي إن شئت التسمية.
بالنسبه لمواقفهم الأخيره لاحظت أنك قد دخلت مباشره في مسألة التقييم ومن الخطأ أن نتطرق ل(ظاهرة ما) بإشارات سطحيه عابره - لا أقصد الرد عليك - ، فإذا أخذت بمثال - أحمد - أعطك عشرات وعشرات الامثله الأخرى المغايره...
التنظيم السلفي الآن يطمح لآن يرث قاعدة (الكيزان) من الطلاب ذوى الميول الإسلامية (غير الممنهجه) وقد نجحوا في ذلك ، وبالمقابل أدى ذلك لصراع تنظيمي قاد لشق الجماعة الى نصفين.
الأول بقيادة الهدية والثاني بقيادة أبوزيد ربما يخرج ثالث من بينهما وهذا ما أتوقعه...
(لؤي) خريج النيلين الذي تحدثت عنه حالف (الكيزان) وصار هو وجماعته من (مؤيدي النظام صراحة وعلناً)...............
نواصل....

الأخ وائل . .
بعد التحية ..
تحول جماعة إنصار السنة إلى تنظيم وتبنى هذا التنظيم لخط سياسى خطوة تستحق الإحتفال من جماعة كانت لحد قريب تحرم التصوير الفوتغرافى وتقول بأن التنظيم بدعة !
الخط الذى إنتهجه أنصار السنة أدى لخروج جماعت كثيرة حسب التطور الذى أصاب التنظيم الرئيسى الذى يسمى بالمركز العام.
تحول الجماعة إلى تنظيم ودخولها فى السياسة أخرج مجموعة السلفيين , ومن ثم خرجت مجموعة الكتاب والسنة , وأخيرا جاء تمايز ابوزيد فى إطار الموقف من النظام ,اقول تمايز وليس خروج ذلك لأن الموضوع مازال فى إطار غير رسمى , ومازالت الجماعة تنكر وجود إنشقاق.
عدم مشاركة أنصار السنة فى تحطيم جريدة المستقلين 1996, وحرق معرض الكتاب المقدس وجنوحهم للإعتراف بالآخر الموجود فى الطرف النقيض أمثلة جيدة لما ذكرته من إتجاه الجماعة للإعتدال ونبذها لخطها الإقصائى الأول . .
لا يمكن بطبيعة الحال الإرتكاز إلى حادثة واحدة لتقييم جماعة , ولم أسق هذا المثال فى إطار تقييمى , وإنما فى إطار إبداء ملاحظات تكونت من خلال مواقف متراكمة.
نحن متفقان على إن الجماعة تبنت خط سياسى , ولم تعتمد العنف , وأعترفت بالآخر , وهذه فى حد ذاتها مؤشرات جيدة . ومتفقان أيضا على إنها قد تكون وريثة للقاعدة الكيزانية . .
قبول الجماعة فى المنابر الأثيرية والجامعية تمرين ديمقراطى جيد ومفيد . .
مؤسف جدا ما ذكرته عن لؤى , الغريبة أنه كان يجيد النيل من الكيزان . .سبحان مغير الأحوال. .

عاصم أبوبكر...
سعيد بوجودك ومشاركتك ...
بالتأكيد هو الذي كفَّرك بلأمس وجئت مثنياً لطلبه اليوم...
لا أجد غير أن أشيد بوقفك الديمقراطي تجاه الآخرين...

عاصم أبوبكر...
سعيد بوجودك ومشاركتك ...
بالتأكيد هو الذي كفَّرك بلأمس وجئت مثنياً لطلبه اليوم...
لا أجد غير أن أشيد بوقفك الديمقراطي تجاه الآخرين...

عزيزي عزان ....
نتفق في كثير مما ذكرنا حول تحليل طبيعة الجماعة وأجد أن إضافتك ثرة...
لكن تطور الجماعة - حسب تحليلك - يقودها لجهة جماعات الإسلام السياسي نحو طبيعة أكثر حركة وتجديداً ، الجماعة لم تأت - حتى الآن - بخطاب جديد ولم تكشف عن طبيعة ممايزة عن مثيلاتها بعد ، أجد أنها تشكل الخطر القادم على الحركة الديمقراطية المدنية.
إضافة إلى أنها لم تحسم مسألة أساسية وهي كيفية الوصول للسلطة ، فهل تأت إليها عبر السلم الإنتخابي أم الإنقلابي أم يتطور المجتمع - حسب رأي البعض منهم - عن طريق الدعوه السلمية ...
إذا كانت حادثة المجمع الطبي في 1996 تدل على إنتهاجها خطاً سلمياً فما بالك في العنف الذي قادته مع - مؤتمر الطلاب المستقلين - في 1999 م ؟
بالمناسبة المدعو (لؤي) حالياً يدافع عن النظام أكثر من دفاع النظام عن نفسه ....
فترة الإنتخابات تشهد (العجب العجاب)...
نواصل........................................................................

نرحب بصديقك واكيد سوف يكون اضافة للمنبر
ونرجو ان يستجيب صاحب البيت الكبير

ولك مودتي وتقديري

خالد محجوب

وائل ....

Quote: الإنتخابات في يد الإدارة

لمتين ياخى .. ادارة شنو .. الادارة مالها ومال مناشط الطلاب ونقاباتم ..
الفهم لازم يتغير ياحبينا .. الطلاب ادرى بامور اتحادم اكتر من الادارة ..
و الادارة لو بارادتا ماكنت سمحت بوجود اتحاد ..
شدو حيلكم واعيدو الامور الي نصابها ..
كل الامور .. الاتحاد .. الداخليات .. وغيرها .. اى شي طلابى رجعوا للطلاب .. وما مهم بالنسبة الاتحاد يكون شنو .. بس المهم ان الاتحاد يكون قادر على تمثيل الطلاب واعادة حقوقم والدفاع عنها .

Quote: - ما تنسى مسئوليتك الى ساهمت بيها في تعطيل العملية الإنتخابية !!!

ياهو دا الكلام العوج ذاتو ..!!
اى حاجة بس رب ترموها فينى .. شعبى النيلين برضو السنة الفاتت قالو لى انت سقطنا .. ووطنى الخرطوم قالو فساد الجامعة الكتبتو أثر في كسبنا .. ياخى مامعقول تحسسونا بالذنب وتحملونا اخطاكم
كيف يعنى ساهمت في تعطيل انتخابات ..؟؟
ياخى انا لقيت ياسر عرمان داير يدخل قضية خاصة في البرلمان وقلت ليه يا ياير القضية دى جنائية ، مفبركة ما مفبركة ، المهم انها قضية شخصية - زى قضيتى - بين الشرطة ورئيس الاتحاد ، ومابتستحق انها تناقش في البرلمان .. ولو دخلنا قضايا زى دى في البرلمان المسلسل ده ماحينتهى .. والبرلمان اصلا جنازة بحر وبقضايا زى دى باقي روحو بتمرق ..
هسة الكلام ده بيعطل انتخابات ..؟؟
الانتخابات البتتعطل بالمقالات دى ذاتا أخير عدما ..!!
كدى شدو حيلكم وحركوا الشباب واعملوا الانتخابات .. عيب جامعة الخرطوم تكون بدون اتحاد ..!!
و بالمناسبة لواعدتو النظر في تحالفكم ده بيكون احسن وحتلقو دعم اكتر ..
شريكم الاستراتيجى في التحالف المعارض شريك استراتيجى في السلطة .. ده تحالف شنو .. وبيتهضم كيف ..؟؟
في تقديرى وقد اكون مخطئ التمثيل النسبي أفضل للطلاب واتحادم ..
والا تحالف احزاب معارضة ضد تحالف احزاب سلطة ..
و الحشاش يملا شبكتو بالبرنامج والخدمات ..!!

Quote: - على العموم مافي مشكلة يوم ليك ويوم عليك ...

-
\
أكيد ... سنة الحياة كدة

Quote: الواثق ده (أخو فاطمة )!!!

-

ده الانا كنت خايف منو .. زول عزيز بالنسبة لينا .. لكن متطرف جدا في أفكارو تطرفا مابعده تطرف
على كل حال .. على مسؤوليتك نثنيهو .. ونكبر بيهو ( كوم الكفار ) ........
نثنيهو وقلبى على الشباب البيتحفنا بالمدائح والاغاني ..
أما ناس مرتضى وبشاشاو عادل امين و هبانى من هسة يحجزو اماكنم في قريش .....
انا بستغرب كيف المخلوق يدى نفسو السلطة الربانية ويحكم على المسلم بالكفر ..؟؟
ياخى خالد بن الوليد لمن كان داير يقتل مشرك المشرك في لحظة ضعف قال انا مسلم وقال الشهادة مات بسيف خالد .. الرسول ( ص) زعل من خالد وقال ليهو انت شقيت صدرو واتاكدت انو هو منافق ؟؟
القصة معروفة
اها داك مشرك مرق لقتال المسلمين واسلم في المعركة تحت سيف خالد ..ومع ده رسولنا الكريم ( ص ) غضب ليهو ..
يجى واحد ماعارف سجم رمادو يقول ليك انت كافر لمن يفقد المنطق ..؟؟
وانا حزين على تصنيف الناس الى كافر ومسلم في ثنايا قضايا فكرية تقبل الخطأ والثواب ..
على كل .. اتمنى قبول طلب الواثق واتمنى للواثق طرح مفيد للناس في بلدى ..
وتحياتى ليك يا وائل
وابقى واصل

أبداً كنت ولا زلت أقصد أن أكشف سلفيته ...
- الأمر ليس بسر خطير...
- فقد كتبت أنه(المتحدث الرسمي لأنصار السنه بالجامعة)...
- أوافقك على مبدأ عدم الهجوم على الشخص قبل التعرف عليه ..
- لكن يبدو أن البعض كتب إعتماداً على معرفته العامة وهذا ليس بخطأ...
- كثير من ال (بورداب) يسندهم الإطلاع وربما التجربه...
- قد تكون التجربة في محيط حركة الطلبة أو في الشارع أو ...
- هذا ما لا يتوافق مع ماذكرته بأن البعض (سريع الهجوم)..
- على العموم لنرى ما سيحدث لاحقاً...
- الود سيدي هشام نوريت...
الاستاذ وائل
دبايوا
ياخى صدقنى لا انتقدك واثق انك كنت ومازلت حسن النية ولكن الذى اعلمه حسب وجودى هنا بانك (كتلت الدش فى يدك).
البعض يحسد وصول انصار سنة الى الكليات العلمية فيكف يقبلون به عضوا فى منبر استنارى؟ وسيد الحوش استنارى كبير.
ياخى انت ستنال اجر الاجتهاد ان شاء الله الا اللهم تحدث معجزة الاهية واخشى عندها يقع بعض الصوفية تقبيل فى اخونا المهندس.
المهم اكرر تثنيتى ولك الشكر والتقدير.

Quote: عاصم أبوبكر... سعيد بوجودك ومشاركتك ... بالتأكيد هو الذي كفَّرك بلأمس وجئت مثنياً لطلبه اليوم... لا أجد غير أن أشيد بوقفك الديمقراطي تجاه الآخرين...

\
لا يااخوى كان ياهو خليهو يمارس التكفير محليا ولبس اسفيريا
كفانا فرانكلى وهاشم نوريت من جماعة( انصار الملوك)

خالد علي محجوب المنسي
تحياتي وشكري ....

مرحبتين بيهو

عزيزي هشام نوريت ...
المسألة وما فيها إنه صاحبنا طلب مني أساهم في الحصول على عضوية ليه ...
خستك معاي قال لي بعدين حأساهم ليك بـ (فيزة راعي)...
يا أخوي لا عاوز أجر إجتهاد ولا صحن جداد...
القصه لو بتُحسب بالأجر (لغيناها)!!!

MAHJOOP ALI
الود والتقدير ...
يعني بكلامك كده المنبر حيتحول لظلامي شدييييييييييييييييد ؟
مقدر جداً رأيك والأمر عند بكري ...
بالمناسبة كنت فتحت بوست قبل كده لطلب عضوية لزول (جنر يتر) إسمه الصادق الحاج ولقيت عدد مقدر من التثنيات لكن الطلب لم يستجب...
فما كل ماهو مثنى مُجاب....

أستاذنا الطاهر ساتي ...
أما بعد ...

Quote: لمتين ياخى .. ادارة شنو .. الادارة مالها ومال مناشط الطلاب ونقاباتم ..

لا أظنك تجهل علاقة الإدارة بشئون الطلاب ولا أظن أن أحداً من القراء لا يدرك مدى ماتمارسه في حقنا وهذا نقاش آخر...
- الإدارة هي التي تنفذ أجندة السلطة...
- وهي تتغول على حقوق الطلاب ...
- وهي التي تحاربنا وتعمل على تشويه سمعتنا ...
- و...............
كله كلام محفوظ ومعروف ويبدو أن حديثك به شئ من التناقض

خليك من النقطه دي ..

Quote: ياخى انا لقيت ياسر عرمان داير يدخل قضية خاصة في البرلمان وقلت ليه يا ياير القضية دى جنائية ، مفبركة ما مفبركة ، المهم انها قضية شخصية - زى قضيتى - بين الشرطة ورئيس الاتحاد ، ومابتستحق انها تناقش في البرلمان .. ولو دخلنا قضايا زى دى في البرلمان المسلسل ده ماحينتهى .. والبرلمان اصلا جنازة بحر وبقضايا زى دى باقي روحو بتمرق ..

ما همانا
(لا عرمان ولا البرلمان) فقط مقالك كان خاطئ ومعلوماتك التي إستندت عليها غير صحيحة وهنا المحك...

سلامات يا وائل
يا اخي الإنسان اذا جاهو ضيف بقول ليهو اتفضل أولاً
ثم بعد كده يشوفوا عاوز إيه..
وحتة (أنصار سنة على السكين) دي أنا فهمت منها إنك
بتقصد إذا رشحتوهوا تتحملوا المسؤولية براكم (بضحك معاك)..
المنبر ده منبر حوار والحوار هو أنبل شي يمارسه الإنسان
مع أخيه الإنسان ويا ليت كل انسان عندو قضية ينبذ العنف
ويتجه إلى الحوار.
أنا شخصياً لو أيمن الظواهري رسل لي رسالة قال لي زكيني
في منبركم ده بدون تردد حأزكيهو طالما هو عاوز يتحاور
يبقى مافي مشكلة..
المنبر ده فيهو كل ألوان الطيف السياسي بدون فرز وفيهو
عملاء وأمنجية واستخبارات وناس ما عندها توجهات سياسية
زيي كده وأفتكر مافي أي مشكلة في إنو أزكيهو..
سيدنا أبو ذر الغفاري ضمن انسان ما بعرفو وكان ممكن
لو الراجل ما جاء راجع كان حاينفذ فيهو الإعدام..
بعيداً عن الدين.. عليك الله في رجالة أكتر من كده؟
والناس البعترضو على صاحبك ده هم أحرار لكن حجتهم
واهية وهي امتداد للإقصاء الذي لا يولد إلا العنف..
تانياً: أنصار السنة ديل مش سودانيين زينا؟
طيب نحن كلنا بدون فرز قدما شنو للسودان عشان نتفاصح
ونفضل بعضنا على بعض..
عليك الله عمك أبزيد وعمك الهدية في أظرف منهم؟
يا اخي أنا شخصياً بزكي الواثق أنصار السنة حتى لو جاء
شايل ساطور أو كلاشنكوف دعماً ليهو هو وليك إنت كمان
ونكاية (أرجو أن أكون كتبتها صاح) في الناس العاوزين
يتلامضوا ويصنفوا الناس على هواهم.. كلكم قدمتوا شنو
للسودان.. حريقة في أحزابكم كلها.. المحنطة والمنقرضة
والنصابة والتي على فراش الموت..
أزكي معاك الواثق يا لؤي..

Quote: اى حاجة بس رب ترموها فينى .. شعبى النيلين برضو السنة الفاتت قالو لى انت سقطنا .. ووطنى الخرطوم قالو فساد الجامعة الكتبتو أثر في كسبنا .. ياخى مامعقول تحسسونا بالذنب وتحملونا اخطاكم كيف يعنى ساهمت في تعطيل انتخابات ..؟؟

أوريك كيف ساهمت ...
هل توافقني الرأي بأن الإدارة كانت تخطط للآتي :-
-1- وصول الكيزان لكراسي الإتحاد...
-2- تزوير العملية الإنتخابية...
-3- إفشال العملية في حالة عدم تحقق 1 أو2
لتغطية ذلك المخطط حاولت الإدارة إثارة قضايا عديدة بدءاً ب :-
- محاولات العنف المتكرره في داخليات البركس - طالبات -
- الحصار المالي الذي ضُرب علينا
- رفضت الإداره تسليمنا حقوقنا المالية ...
- الرسوم الدراسية ومحاولة حرمان الطلاب المعسرين من الإستمرار في الدراسة ...
وغيرها ، المهم كانت حادثة السيد الرئيس ذات البعد الأكبر ...
ما أثاره (المرحوم) محمد طه حول السيد الرئيس وغيره من الكتاب (السدنه) يتوافق مع مقالك الذي كتبت بعنوان (كان مخموراً ياعرمان)...
حسناً أنك ذكرت في ردك

Quote: الانتخابات البتتعطل بالمقالات دى ذاتا أخير عدما ..!!

مش الصحافه بتلعب دور ريادي في إسقاط حكومات ؟
ماذا يمنع كونها تُعطل إنتخابات ؟
ماكُتب في حق إتحادنالا يمكننا أن نغفره للأحياء منكم والأموات ...
نواصل ...

Quote: واخشى عندها يقع بعض الصوفية تقبيل فى اخونا المهندس

عندها سياتيهم بالـ( الصارم المسلول في الرد على ....)



وتاني مرحب بالزول

اثني

الأستاذ حيدر حسن ميرغني ...
تحياتي وودي ...
أشكرك على المداخله...
- قد يصل لقناعة كون (تقبيل اليد) حاجه تمام ؟
- مين ضامن إنه مايحصل للمهندس (تطور) كما - يفسره البعض -؟؟؟
- قد يأتي بكتب جديدة لنج يطلق عليها:-
- الواثق الوضاب في الرد على فسوق البورداب !!!!!
- الفعل الآني في الرد على الكافر هشام هباني !!!!!!!
- الأحاجي في دحض أقاويل الـ(صهيونية) تراجي !!!!
- وغيرها من المؤلفات الفكرية الخالدة .....
- أشكرك ....

Nasruddin Al Basheer

Quote: يا اخي الإنسان اذا جاهو ضيف بقول ليهو اتفضل أولاً ثم بعد كده يشوفوا عاوز إيه..

- أشاركك الرأي بأن المنبر مفتووووووووووووح للجميع ...
- هذا مايميزنا عنهم...
- لكن بعض الظلاميين يشارك بمفهوم (الإفساد) وليس (الحوار)
- في هذه الحالة يخسر دعاة الرأي والرأي الآخر هذا المنبر...
- إذ يعتبره البعض (أحد منابر الإستنارة)
- طبعاً آخرين يعتبرون المشاركة (أجر) !!!
- صحيح أن الترحيب من (الباب) من شيم (السودانيين)...
- وهؤلاء غريبين عنا (زمانياً ) و (ومكانياً)...
- إذن لا مانع من الترحيب بهم ...
- مداخلتك (لطيفة)

يحى الشريف ...
شكراً للمداخلة...

عزيزي / وائل
لك التحية
أثني على وجود الراي والراي الاخر بالمنبر ...مع انني افهم جيدا الفكر (البرجماتي)لمثل هذه الجماعات...فهي لا تعترف بالديمقراطيةوتترشح في الانتخابات...وتكفر منتوج الفكر الغربي ككل...بينما تعتبر كسب اصوات الناخبين بمساس الجانب العاطفي الديني هو تأصيل (لسلفية ويست منستر west minister)...آمل ان تكون مشاركة صديقك مثرية وفعالة لا ان تعيدنا الى مربعات تجاوزتها الانسانية ...

كسرة : انا خايف صحبك دا يكتب (نص بوست)ويقول هذا كان حال السلف(في تقصير الازارات والبوستات)..

Quote: الازار= البنطلون عند العلمانيين

لك ودي
مازن عادل

مازن عادل ....

Quote: آمل ان تكون مشاركة صديقك مثرية وفعالة لا ان تعيدنا الى مربعات تجاوزتها الانسانية ...

لا أعتقد ....
- ربماله فقه يدفعه للمشاركة ...
- واحد محتجي قال نحنا خلينا ليهم مواقعهم الظلامية مطاردننا ليه ؟
بالمناسبة المنبر ده مختلط ...

وائل طه
تحياتي.

الحرية لينا ولسونا" ثابت"
لكن الناس ديل عندهم اعلام ممول كتب " بالبنفسج والاخضر ومكرفونات الخ...
كلو تخصص في " المراة" على العموم كان جاء بنقول ليه ما في تعدد ومافي اماء وراسنا براسهم.
والجماعة ديل كان " لقو فينا فرقة انقلاب زي الكيزان بعملو فيناالعملو طالبان في افغنستان والاصولية كان مشت وكان جات مدرسة واحدة كلهم بن لادن"

تحياتي مجددا

ما عندي مانع ..

يس يجي بعد الفلنتاين داي !!

السلام عليكم و رحمة الله و بركاته..
أشكر زميلي وائل طه على البوست مهما قال أو كتب فله معروف تقديمي للناس ..
هأنذا بينكم مستعد للإجابة...
لا أعرف هذا الرجل الذي اتهمني بتكفيره...
لم أكفر أحداً بعينه طوال وقوفي بمنابر النقاش منذ الصف الأول الثانوي و حتى الآن ..
ربما تكون قد رأيت في المنام أني أكفرك..
على كل حال أشكركم على الترحيب و أرجو أن أستفيد و أفيد..
و لا أنسى شكري لسيد الحوش الرجل الواعي المهندس بكري
تحياتي

الاخ/ الواثق

يا مرحبا والله

إن شاء الله نسعد بمساهماتكم

الاخ الواثق
لك التحية
واولا الف مرحب بك فى المنبر الرائع
واتمنى ان نستفيد منك

Quote: هأنذا بينكم مستعد للإجابة... لا أعرف هذا الرجل الذي اتهمني بتكفيره... لم أكفر أحداً بعينه طوال وقوفي بمنابر النقاش منذ الصف الأول الثانوي و حتى الآن .. ربما تكون قد رأيت في المنام أني أكفرك.. على كل حال أشكركم على الترحيب و أرجو أن أستفيد و أفيد.. و لا أنسى شكري لسيد الحوش الرجل الواعي المهندس بكري تحياتي

اولا هل تعرف محمد عكاشة انصار سنة
فى كلية العلوم الرياضية ..

حضرت معه قبل عامين بالتحديد الى الكلية
وانت كنت من ضمن القائميين على امر الانتخابات
وقتها ...

واقامة كلية العلوم الرياضية حفلة بالفنانة ندى القعلة
وانت اتيت مزعورا ؟؟؟

وقلت لك انا من جلبتها ...
فكفرتنى وقلت امثال هؤلاء يجب ان يهدر دمهم ...

وقلت لى بالتحديد انك لا تختلف عن محمد طه شئ
ووقتها كنتم تقودون حمله 20الف توقيع لهدر دم محمد طه ...

انا لا انسئ سيدى
اذا كنت انت تنسئ ؟؟؟


تسلم

تصدق إني ما بعرف محمد عكاشة ذاتو؟
أحسن تراجع ذاكرتك شويه..
لأني فعلا ما بعرفك و ما متذكر إنو ندى القلعة غنت في إسكول ذاتو..
و الحاجه المتأكد منها زي اسمي إني ما حصلت كفرت زول بعينه..
راجع و اتراجع

Quote: تصدق إني ما بعرف محمد عكاشة ذاتو؟ أحسن تراجع ذاكرتك شويه.. لأني فعلا ما بعرفك و ما متذكر إنو ندى القلعة غنت في إسكول ذاتو.. و الحاجه المتأكد منها زي اسمي إني ما حصلت كفرت زول بعينه.. راجع و اتراجع

ممكن
ولكن مازالت مصرا على انك من كفرتنى ؟؟؟

اما تذكيرك لندى القعلة فى اسكول (فهذا شئ اخر )

اتمنى ان يكون حديثك صحيحا ..
ولكن كما اننى متاكد تماما بانك انت الواثق الصادق
الذى لا يوجد طالب فى جامعة الخرطوم لا يعرفه
انصار سنه على السكين
اعرفك تماما بانك انت من كفرتنى ...
على كل حصل خير والحمدلله مازالت اعيش على دينى ...

وعيش حياتك فى المنبر بسلام ...


تسلم

تعرف يا عاصم حتخليني أخت صورتي هنا عشان تتذكر..
ندى القلعة ذاتها مسلمة زي ما قلت ليك.. فكيف يكفر من يحضر ندى القلعة للغناء؟
لكن يا اخوي ما لقيت زول غيرها؟ دي جامعة الخرطوم..
بعدين هي ما عندها رصيد نضالي..
ممكن أقول لي 5 سنوات ما خشيت إسكول..
و ما حصل عملت مخاطبة في أسكول أصلاً..
احتمال تشابه عليك السلف..
في حملة جمع التوقيعات أنا اتكلمت في شارع المين بس..
على كل حال إنت مسلم و ربنا يثبتك..
فرصة سعيدة..

الاخ الواثق
لك التحية

Quote: تعرف يا عاصم حتخليني أخت صورتي هنا عشان تتذكر.. ندى القلعة ذاتها مسلمة زي ما قلت ليك.. فكيف يكفر من يحضر ندى القلعة للغناء؟ لكن يا اخوي ما لقيت زول غيرها؟ دي جامعة الخرطوم.. بعدين هي ما عندها رصيد نضالي.. ممكن أقول لي 5 سنوات ما خشيت إسكول.. و ما حصل عملت مخاطبة في أسكول أصلاً.. احتمال تشابه عليك السلف.. في حملة جمع التوقيعات أنا اتكلمت في شارع المين بس.. على كل حال إنت مسلم و ربنا يثبتك.. فرصة سعيدة..

والله اتمنى ان تضع صورتك
نعم ندى مسلمة وهذا لا يختلف فيه شخص ..
ولكن ماهو رايكم فى سماع الاغانى ؟؟؟
اما عن جامعة الخرطوم فاعرفها جيدا ولا احد يحدثنى عنها ...
اما عن الرصيد النضالى يكفى ما حصتموه انتم
اما هى عن النضال بالتاكيد نضالها فى (صلبها) و(صوتها)فقط
ولكن حديثنا عن اغانيها ...
اما دخولك اسكول منذ 5 سنوات فهذا امر غريب ..
على كل الذى اعرفه ان الواثق هو الذى كفرنى انا ذاك
تسلم

hanadi yousif
أسعد بمشاركتك ...
- فعلاً لديهم العديد من المنابر والوسائط المختلفة ...
- لكن أرى أن مايميز هذا المنبر موضوعية الطرح ...
- هذه أشياء نفقدها في الجامعات والمنابر السياسية في الخارج غير متاحة ...
- أعيب على جماعة الإسلام السياسي عدم الموضوعية والموقف المعياري..
- أمثال الواثق يستحيل أن تتمكني من نقاشهم في المنابر الطلابية وأنتي أدرى بذلك ...
- فلنستفد من ضيق مساحة الهتر وإتساع طرح الآراء لمزيد من النقاش والتطوير ...
- وخليك معاهم (رأس برأس)...
تحياتي .................

أشكرك يا وائل مرة تانيه..
نشوف آخركم شنو؟
لأنو في الجامعة لقينا (كيسكم) فاضي..

Quote: لأنو في الجامعة لقينا (كيسكم) فاضي..

- مرحباً ببدايتكم الموفقة (أسلوب الأركان)
- يعني شنو (كيس فاضي) ؟...
- إنت إستفدت من جو الجامعة (الملبد بالمشاكل والتوترات)...
- أدخلتوا أسلوب الهتر والخطاب الحاد ...
- كما قال أحد البورداب (التكفيري ) ...
- وطبعاً عارف إنه التكفير درجات متسلسلة ..
- وبتوصلو الشخص للدرجة النهائية (وماتكفروه)...
- مافي مشكلة ياصديق إنتو (ماتكفيريين)...
- لكن ما موضوعيين (بعض الأحيان)...

عارف يا وائل يوماً ما ربما أحدثك عن تأريخ المهاترات في الجامعات و هو كالعنف تماماً..
كيسكم فاضي = لا حظ لكم في الموضوعية و الفكر
لكن دي كانت تخريمه ساي و مجرد مشاغبة..
شهادتك إننا ما تكفيريين دي إن شاء الله تقنع عاصم..
ما موضوعيين دي خليها في البورد هنا للأيام

وائل ..

Quote: - لكن ما موضوعيين (بعض الأحيان)...

بعض الاحيان شنو ..؟؟
في كل الاحيان .. على طول الخط ، الموضوعية في واد وهم في واد الانصرافية .. !!



الواثق الصادق ..
الف مرحب بيك واتمنى تكون اضافة نوعية للمنبر

الاخ وائل
مالو يمكن التواصل معاهم يفيد ويطور والمنبر يتيح ويبيح التعدد وهم بيحبوا التعدد ولا شنو ....... نثني..... بعدين انا كنت قايلك داسي سنة الدخول للجامعة ... سلام وطولنا ما شفناك ... يابا مقا آق اورو اوري !!؟؟؟

- شهادتك إننا ما تكفيريين دي إن شاء الله تقنع عاصم..
- عاصم يبدو واثقاً من حديثه ...
( العنف =عدم الموضوعيية = تكفير).......... وله شنو يا ...؟
- لسه بيناتنا المسافة...

الصـــديق وائل

سلامات

الف مرحب بى صحبك الظــلامــى...

والنشوف رايه فى التعامل مع التكنلوجيا والنت...

وطريقه العنف ح تكون بالفايروس ولا كيف؟؟؟

الف مرحب الواثق....

نتمنى أن نظفر بمشاركات قيمه ونقاشات عقلانيه هادفه خاليه من الهتــر...


تحياتى
أيمن

أستاذ الطاهر...

Quote: في كل الاحيان .. على طول الخط ، الموضوعية في واد وهم في واد الانصرافية .. !!

- كلامك واقعي لحد كبير ...
- في بعض الأحايين توجد (تفلتات)...
- يعني (التفلتات) ما الأصل بل الأصل زي ما قلت

Quote: الموضوعية في واد وهم في واد الانصرافية .. !!

- يعني أدب اليسار ممكن نسمية (إنفلات كادر)...
- ؤبأدبكم يُسمى( الغنماية القاصية) ...
وله شنو ؟

الأستاذ وجدي المحامي...
- سباه الهير آووو وجدي...

Quote: وهم بيحبوا التعدد ولا شنو .......

- أظنك قاصد تعدد الزوجات ؟ (طيب ما تقولها عدييييييل)!!!
- تحياتي وودي ...
- بعدين أنا ماداسي سنة دخولي الجامعة ...
- إنت ورينا سنة دخولك وتخرجك ...
- وكمان آخر ركن إشتغلته !!!...
أشكرك على التثنيه والمداخله ...