تحية لشاعر الشعب المناضل محجوب شريف

التحية للشاعر المناضل محجوب شريف

ذلك الشاعر الثوري الذي تخرج منه القصيدة كوابل من الرصاص:
ما ني الوليد العاق
لا خنت لا سراق
والعسكري الفراق
بين قلبك الساساق
وبيني هو البندم
يا والدة يامريم


أحياناً وبستان من الورود أحيانا:
وأخت اسمك
على باب الزمان إكليل
وردة صبية تلمع فوق سدير النيل
واحبك لا قدر مكتوب
ولا دمعاً سقى المنديل

فالمفردة الشعرية عنده تجمع بين العذوبة والقوة.
أسأل القريبين منه أن يبلغوه تحياتي من هنا،
وقولوا له إنك أعطيتنا أكثر مما نستحق.
أوفيت للوطن وللشعب ولا زلت وفياً، صامداً عاتياً كالنخلة، شاعراً عملاقا ومناضلاً جسوراً.
بسأل عن الصحة، يا أستاذنا.

التحية لشاعرنا الجميل محجوب شريف

امنياتنا له بالصحة والعافية ،،،

عود يا حبيب الشعب عود ،،،

في انتظارك ،،،

شكرا عبداللطيف على لطفك ،،،


مودتي ،،،

تحيه مربع وتعظيم سلام للشاعر النبيل ، دعاءنا الصادق له بالشفاء والعوده لوطنه سالما معافى

27-01-2006, 03:37 ص

عمر ادريس محمد

الشاعر الكبير....محجوب شريف ....يشكر أعضاء وقراء سودانيز اون لاين.

أنا زول قروى.. الأنترنت ...حتى الأن مالاقى لى معاه صرفه.. لكن عارف تماما قيمة إهتمام الناس ...وده يساوى عندى الدنيا بى حالها ... وأضع.. الإهتمام فى مكانه الأيجابى ...انا تمام جدا .. مشيت قبل كم يوم للأخصائى ....وطمنى ...بس قال لى.. كميه من ألمحازير ..جيت مارق منو أضحك.. قلت الأبيات دى... عليك الله تهديها عنى على سبيل ألتحيه وألشكر لكل أعضاء.. وقراء سودانيز اون لاين ...ولهم جميعا ألتحيه والتقدير.


أمى الأن لاتشكو من الأسنان
ولا أبتى من الأحزان
ولا أختى من القولون
ولاجدى من ألسلطان
عليهم رحمة الله
كل من عليها فان
إذن بالله ما تجننى بالممنوع
إذا اتكلمت بتكلم بصوت مسوع
إذا أتالمت بتألم بدون إزعان
إذا إظلمت بتظلم براس مرفوع
أموت بالجوع
ولا تزله فى جواى لحظه كرامة الإنسان
لسانى حصانى
ضد ألظلم كم لاواى
هادى ألطبع حيث مناطق الكتمان
بالله ماتجننى بالممنوع

محجوب شريف

الأعزاء
خالدة البدوي
ود الزين
بكري الصايغ

لكم التحية جميعاً ولشاعرنا الأستاذ محجوب شريف
والله بسأل عليه الشعب يوماتي وبحبو (حب قدر الحروف الحايمة في بطن الكتب) زي ما يقول الفنان مصطفى سيد أحمد.

01-03-2006, 10:30 ص

بكري الصايغ


قصيدة الشاعر محجوب شريف (يا اللي بتسمع والما بتسمع)، التي خرجت من الخرطوم سرا عام 1992

في عام 1992، وابان تواجد الشاعر محجوب شريف في الخرطوم، وفي ظل الرقابة الصارمة والدقيقة عليه، ما كان ويستطيع ان ينشر قصائده في صحف ذلك الزمن، وايضا ولا ان يجاهر بها في الندوات الثقافية، فلجأ الى اسلوب (تهريب) القصائد الى خارج الوطن. ويشرفني اليوم، ان اعيد نشر احدى هذه القصائد، والتي استطاع ان يسربها الى اليونان، حيث قام الاخ منصور شاشاتي، صاحب جريدة (اخبار السودان)، والتي كانت تصدر في اثينا بنشرها.ونشرت هذه القصيدة بدون ذكر اسم الشاعر، خشية الملاحقة فيما بعد.

نشرت هذه القصيدة بتاريخ 25 ابريل 1992-العدد رقم 30، الصفحة السادسة من جريدة (اخبار السودان) اليونانية. واعيد كتابتها تماما كما وردت في جريدة (اخبار السودان)، بدون اي حذف اوتعديل اوالغاء اوشطب.
-----------------------------------------------------------------
يا اللي بتسمع .. والما بتسمع ..
تلقت <<اخبار اسمودان << القصيدة التالية وتنشرها من
دون اسم الشاعر الذي ما زال موجودا في السودان
------------------------------
يا اللي بتسمع .. والما بتسمع ..
لازم تفتح اضانك .. وتسمع
صوت الشارع لمن يدوي..
كل قلاع الخونة بتهوي..
وكل جباه الكهنة بتركع
وشمس الحق السرقو شعاعها
بكرة بامر الشعب .. بتطلع
ياللي بتسمع ..
والما بتسمع ..
نحن اسودا ما بتدجن
ونحن سدودا ما بتهدن
ونحن جبلا ما بتصدع ..
لملم ناسك .. ولحمة راسك ..
وارفع ايدك عننا.. ارفع
يا اللي بتسمع
والما بتسمع
لو بي بنادقك ما بترهبنا
ولو بى خنادقك ما بترعبنا
...............
..............
والتاريخ يا جاهل .. بيشهد
والايام لسع بيناتنا
وكل الحق الضايع بيرجع
يا اللي بتسمع
والما بتسمع
.اسأل كل العسكر قبلك
وكل الحاول فكر متلك
الاستأسد .. والاتنمر..
مهما استعلا.. ومهما استكبر
برضو في يوم الغضبة بيهلك
وبيلقى مصيرو.. نفس المصرع
واننا أمة عظية اصيلة
لينا خصايص ما في مثيلها
وفينا طباع بالفطرة نبيلة
والاسلام ما جانا الليلة
ولا اخلاقو علينا دخيلة
الايمان من بدري سبيلنا
والقرآن في الصدر دليلنا
انقى.. وارقى .. واسمى.. وارفع
يا اللي بتسمع
والما بتسمع
نحكي ليك لو كان ما بتعرف
حاجة بسيطة بس عن ماضينا
انحنا رضعنا الثورة رضاعة
وبالوطنية انحنا ربينا
التدجيل ما بنفع فينا
والتضليل ما بيمشي علينا
انحنا عبرنا السكة مشينا
وشفنا عدونا.. وشفنا صفينا..
وما بنهاب لا سيخ .. لا مدفع
يا اللي بتسمع
والما بتسمع
الانقاذ ما بالدبابة
ولا احلام شايلاها سحابة
ولا اوهام عالم كضابة
ولا ارقام خاوية .. وخلابة
والاصلاح ما جربندية
الاصلاح ما بالزندية
الاصلاح عدل .. وحرية
الاصلاح موضوع .. وقضية
الاصلاح عزقة .. وطورية
نحن بنفكر بتاريخنا
يا اللي بتسمع
والما بتسمع
نحن اولاد الوطن الواحد..
متسامحين من يوم ما قمنا
عشنا حبايب ولسه حبايب
ما اتخاصمنا ولا اتصادقنا
فينا مساجد بتهليلها
وفينا كنايس بي انجيلها
وفينا معابد يسرج ليلها
ربنا واحد.. وشعبنا واحد
وحبنا واحد.. ودربنا واحد
يا اللي بتسمع
والما بتسمع
دايرين نختم نحن كلامنا
ودايرين نحسن نحن ختامنا
للاحرار نديها تحية
وللثوار تعظيم وسلام
نحن الفوق الشمس مقامنا
ونحن جبين الثمسر مرامنا
ونحن وقود الحارة .. ونارها
ونحن منية الباغي.. سهامها
الا ارادة المولى ارادت
حكمت فينا.. وفي حكامنا
بعد ما ازهري كان هو زعيمنا
بعد المهدي الصلى امامنا
بعده الغرد الضوو جبينا
بعد الدرر الزانو زمانا
جات البقرة عشان تحكمنا
وام رخم الله مشت قدامنا
جل جلالة الملك الواحد
يأتي وينزع
ويعطي ويمنع
ويخفض .. ويوفع
يا اللي بتسمع
والما بتسمع
يومك قرب يا ظالمنا
وبكرة حناخد منك تارنا وما بنرجاهو حساب الآخرة
داكا حصابا من غفارنا
يمكن يصفح .. ويمكن يسمح
ويمكن يعدك من اشرارنا
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص ... قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا
وعالية ترفرف راية العزة
وغالية عزيزة حترجع دارنا
ونور الفجر القادم يسطع
يا اللي بتسمع
والما بتسمع

كلامك سمح يا بكري الصايغ
مشكور كثيراً على هذه الأريحة