خيوت..إتخاتفا ..المِترار..

منو البعرف إشيل شوقاً ..معاك إتقاسمو المشوار ..
ومنو البقدر إشيل درباً مشيتو وكان نهايتو....سراب
نضمتا سنيني بي شوقك ..خيوت ..إتخاتفا ..المِترار..
ولبستا اللهفة في عمري ..وكانت أيامي ليها ..رقاب
سميتك.. فيني ..إنتا سحاب..وإشتهيتك ..يوم تكون أمطار
وشلتك.. برضي في حتة ...كانت في الوريد..محراب
مرَّات تدوبيلي..الفراق...ومرّات ..أغنيلك ..مزار
بتونسك بين المسام..وبين الدواخل ..زي ..صحاب
وبتحسسك.. نجمة هواي ..ومرَّات أحس إنك نهار
وزي تقول إنك غُناي ..وحرفي ليك هوَّ اللي جاب
بشتهيك ..تفضل براك ..وغيرك...تشتهي الأعذار ..
إرتضيت مني العمار ..وإرتضيت فيني الخراب
إتلبَّسك مني الحنين ..زاهي بي لون السمار ..
وكِت صادف جفاك ..الفيهو ..روَّح ..وفجأة داب .

Quote: نضمتا سنيني بي شوقك ..خيوت ..إتخاتفا ..المِترار..

يا للروعة...............




لكن ليس بغريب

فمن يعرف المترار

تمتد جذورة في قلب أرضنا الطيبة

مرحبا الأمين...
أسعدتني طلتك المفرحة..

الأستاذة/تماضر الخنساء
تحية طيبة

Quote: خيوت ..إتخاتفا ..المِترار

والله عنوان موفق واكثر من رائع
مفردات تذكرنا الزمن الجميل

نسال الله لك التوفيق

سلامات عبده ..
سعيدة أن لمست كلماتي فيك إحساساً وذكرى ..

مودتي ..

اللعوتة

انا المترار مابعرفو

بس وحاتك كلام تماضر السمح ده بنعرفو تب..


ناس بهذه اللطفات والاحساس الجميل الواحد يخجل يقعد معاهم في مكان واحد..

والله البوست دة من ما نزل
وانا بحاول اعرف معني الكلمة دي
( المترار)
المترار دة عندوا علاقة بي مكنة(سنجر)!؟
لكن باقي الكلام لذيذ ودافي
بس كان مفروض ترفق الترجمة الفورية
عشان الجهال الزينا ديل يعرفوا حاجة

النســوان ديل !! ربنا ينتقم منهن!!

سلامات حبيب نورة ..
شكراً على الطلة الحلوة ..
وبالنسبة لمعنى المترار مامشيت بعيد ..راجع مداخلة حيدر ..
أما النسوان ..ديل ..فيكفي إنك مابتقدر بدونن ..بشهادة نورة ..

قلنا ليكم إنتو لسه صغار ماصدقتونا ...

دكين ..
يسعدني أن تجمعني بك ذات المساحة ..أي مكان تمشيهو مكاني..

Quote: انا المترار مابعرفو بس وحاتك كلام تماضر السمح ده بنعرفو تب.. ناس بهذه اللطفات والاحساس الجميل الواحد يخجل يقعد معاهم في مكان واحد..

دكين

سلامات

تعرف (الزول) لما يطرب بنسي روحو

اهها نسيان الروح ده بكشف الأوراق


و زمن المترار زمن جميل حد الجمال و حنين حد الحنان و ....و..... (شفت الفرش ده كيف)

بس اخونا حيدر ما قصر شرح ليك الموضوع بالتفصيل

و اقعد و كمان اتحكر (كمان قول لي اتحكر ما بتعرفها) في البوست ... بعد الأذن من صاحبة البوست

و تعرف يا دكين بأسمك ده كنت مفتكرك من دورنا...... و كدة يعني

بس آآآآآآآآآآآ



و صدقني انا متابع لكتاباتك من زمن.......

لعوتة..
الزول ده إنتحلوهو ..وحللوهو..أحسن ماتتابعو..

Quote: مرَّات تدوبيلي..الفراق...ومرّات ..أغنيلك ..مزار

خابف نسحرك ...
الله يحرسك...

الله إخليك أبوبكر ..
شكراً تاني لأنك ..قريب..

Quote: إرتضيت مني العمار ..وإرتضيت فيني الخراب

حيدر ..وإرتضيت منك..مزار..

Quote: بتونسك بين المسام..وبين الدواخل ..زي ..صحاب وبتحسسك.. نجمة هواي ..ومرَّات أحس إنك نهار

والله يا تماضر جننتى الحروف ذاتها ربنا يحفظك
ويجعل كل امانيك حقيقة

ضياء ...صباحات شوقنا بي خيرين..

Quote: حبوبه الناعمه امراءة متقدمة فى السن لم يكن بيتها بعيدا من بيتنا بحكم عفويه اهل الحى والجيره كنا كل يوم نذهب الى بيتها والذى هو اشبهه بصومعه الراهب لم يكن فيه شى من متاع الدنيا غير هذا العنقريب الصغير والقريب جدا من الارض وعليه برش ولكن كانت هذه الغرفه هى عباره عن مصنع متكامل لصناعه الغزل الناعمه هذه احبتى هى جدة اولاد الطاهر ودمختار وهى والده امهم بت الحبيب عليهم الرحمه جميعهم حتى لاتقولو اننى اكتب من خيالى الملجم بكثير من القيود الشكليه كنا ناتى للناعمه هذه واحياننا وننظر لها من خلال الطاقه الصغيره لنرى كيف تتفنن هذه العجوز فى نفش القطن ثم بعد ذلك كيف تحرك اياديها بطريق اكروباتيه ابدع من الصينيون انفسهم كيف تحرك الخيط بيدها اليسرى ويطير المترار فى الهواء من يدها اليمنى كى يخلق حركه محوريه يكون مركزها عند وركها العارى ومع تره المترار وفركه من راحه اليد واحتكاكه بالورك تكون الحركه الدائريه قد اكتملت وتمت عمليه صقل الخيط واصبحجاهزا للف ويكون بكره مستديره شكلها اقرب مايكون بالقبه وكان اسمه نصل خيط هاك ياجنا اجرى لى الناعمه جيب لى منها نصل خيط اما ان يفتل من خيط لى قيطان اللمبه او يعمل منه جباده للسمك وقتها لم يأتى خيط العصب والشى المحير ان حاجه الناعمه هذه كانت صناعتها هذه هى صناعه تحويليه بمعنى انه وعى بعد خطوات من بيتها كان يقع بيت عبدالباقى ود حمد ابو محمود عبدالباقى (النقادى) ولا ادرى سبب تسمية النقادى هذه هل لان النقادا هم اصحاب حرفه النسيج

حيدر ..لم تترك مايُقال ..
شكراً للمترار ..وحبوبة..

منو البعرف؟؟؟؟
منوالبـقدر؟؟؟؟
أريت نقدر
وأريت نعرف
وماظنيت ..
نسج غزلك خيوتو حرير من بلاد السند
ومطرز بي ندى الأشواق
معطن في دموع الآهةوالنتحيب
يطلع من بطينك نم
معلق في انكسار الضي
بين القمرا وسواد عينك
وبين بينك
ينكسر تاني
ويخش حرفك
نضمتا سنيني بي شوقك ..خيوت ..إتخاتفا ..المِترار..
خيطك وتر مشدود
في السحاب الشرد راحل
وفضح نضميك حيا المترار
كيف نقدر
وكيف نعرف
لابنعرف ولابنقدر
وماظنيت

نورالهادي

وحرفك ..فتَّر فينا أفكارنا ..
وجهجه المعنى إقتدار ..


نور الهادي ..كل الود..

النوارة تماضر الخنساء

كل مرة اقرا ليك بمتعة صافية ...
كلامك زي شهد مقطر في خشم سكنه المرار ...
حروفك سنينة ومجنونة ...

كل مرة ادخل اقرا واطلع بدون تعليق ..
من باب الصمت في حرم الجمال ..
باقول صمتي احسن من كلام قاصر .. ما بيوصل احساسي بحروفك الندية النقية ...
شكرا للمتعة يا تماضر ... ولقدام ...

خلاس..وكت ده كلامك مابكلم زول تاني ...
تسلمي سناء ..أتمنى أكون قدر الكتبتيو..

ووقفت جنبك
مالي بيك عيني سحاب
وبرضي لسة ملان حنين
ولسة ما نزل التساب
شفت فيك
ضل الخريف
طول الرصيف
ألم النزيف
وسكة أطول من رهاب
أيش الحلل
لو قلنا إنو اللهفة
علقت في الرقاب ؟؟

ساكت سمعت طشيش حروف
جيتا ولقيتا
منظومة بي زهر الجروف
ريحة مطر
ساعة سهر
لهفة مسالم للألوف
والغنية ما زالت تطوف


مرفق :
كل الأماني التشتهيك
بـــــادي

وكنتا ..جوَّاك...
كمَّلتا فيك حد البراح..
مجنونة بينات النصاح..
معتوقة من قولة مُحال..
متكية في ضي الصباح..



مهنّد ..مودتي..

تماضر

حمد الله ع السلامة




بوســــــط رائع


منعم

الله إسلمك منعم..

بوسطاتك ..أروع..

Quote: بشتهيك ..تفضل براك ..وغيرك...تشتهي الأعذار .. إرتضيت مني العمار ..وإرتضيت فيني الخراب إتلبَّسك مني الحنين ..زاهي بي لون السمار .. وكِت صادف جفاك ..الفيهو ..روَّح ..وفجأة داب .

كلمات غاية في الروعة والبهاء لم أقرأ لك قبل ذلك بكل صدق ولكني منذ اللحظة سأتابع إبداعك الجميل ،،

مع خالص الأمنيات ..

مرحبا عادل ..
أفرحتني الطلة ..
وتسعدني متابعتك...