Post: #1
Title: ينجوووز السياسة السودانية !!!!
Author: SAMIR IBRAHIM
Date: 01-22-2007, 07:40 PM
هضربة رجل شارع سوداني ... ولد في عهد جعفر نميري ... وشد .. وجذب .... حروب .. ومعارضه .. وانتفاضه ... ثم انقلاب مرة اخري .. وكلو بدعم الاحزاب !!!!
لعبة السلطة ... وانتفاضات .... ثم انقلابات عسكريه... ومعافره ومدافره مره ثانيه للانتفاضات ؟؟؟؟ ...
وهل التكوين الهش للاحزاب السودانية وعدم فعاليتها ... والبعض انتهت مدة صلاحيتها ... فشلت في احداث وتغيير جذري في الوعي السياسي .. وعجزت حتي عن شرح معني كلمة ديمقراطية سودانيه ؟؟
هل هي ازمة وعي ام ازمة ارادة ؟؟؟؟ ام سئمنا ومملنا ؟؟؟ ام لاننا ولدنا في عهد العسكر نخاف من الديمقراطية ؟؟؟؟؟؟
قصة سوف نحكيها ... ونبتدي باكبر داينصور سياسي سوداني ... وننتهي ببنجوز السياسة السودانية !!
|
Post: #2
Title: Re: ينجوووز السياسة السودانية !!!!
Author: waleed500
Date: 01-22-2007, 07:50 PM
Parent: #1
مرحب سمير ابراهيم
|
Post: #4
Title: Re: ينجوووز السياسة السودانية !!!!
Author: SAMIR IBRAHIM
Date: 01-23-2007, 03:05 AM
Parent: #2
Quote: Author: waleed500
مرحب سمير ابراهيم |
تسلم اخي وليد ... ولينا عظيم الشرف ....
|
Post: #3
Title: Re: ينجوووز السياسة السودانية !!!!
Author: SAMIR IBRAHIM
Date: 01-22-2007, 08:00 PM
Parent: #1
نحن الذين اتولدنا في عهد مايو كانت تربيتنا الوطنية علي يد عمالقه سودانيين ... ندعوهم بالشعراء السودانيين والفنانيين السودانين .
نعم .. كانت تربيتنا الوطنية تعتمد اعتمادا كاملا علي الشاعر السوداني ... والفنان السوداني .. ... عندما كنا نسمع رمية للفنان يقول فيها .((( ابوك تعبان يجلد في العناقريب وانت اتاريك في بلد الترك وليدا مطيليق ... ويا خسارة عيشنا ما اكلو الجراد ) .. كانت هذه الرميه تدخلنا في نقاش طويل عن الشاعر ومنطقته وعاداتهم وتقاليدهم .. وعن النجاح والفشل ..
كانت تربية وطنية ترسم بعناية فائقه في منظومه شعريه جميله ... ولوحة غنائيه رائعه .. ترسلها الي جميع انحاء سوداننا الحبيب اذاعة هنا امدرمان ....
وما زلت ... اسأل ما هي الديمقراطية ؟؟؟ ومن هم الاحزاب ؟؟؟؟ ولماذا انقسموا قبل ان يتحدوا ؟؟؟ ولماذا دعمت الاحزاب الانتفاضات ؟؟؟ ولماذا دعمت الاحزاب الحكومات العسكريه لتنقلب علي الحكومات الحزبيه ؟؟؟؟
وكل ما نسأل ... يرد عليك واحد ويقول ليك .. يا كوز ... ويا انقاذي الخ ...
ولماذا اطلقنا علي رجال السياسة الذين سمعنا عنهم منذ نعومة اظافرنا ... ديانصورات السياسه السودانية ..؟؟؟ وما هو دور بنجوووز السياسة السودانية في خدمة اهله ومنطقته ؟؟؟؟؟؟؟؟؟؟؟؟؟؟؟
|
Post: #5
Title: Re: ينجوووز السياسة السودانية !!!!
Author: SAMIR IBRAHIM
Date: 01-23-2007, 03:07 AM
Parent: #3
بعد ان انتفضنا مع المنتفضين ... واعتقدنا مثل الكثير من الشباب الذين اعتقدوا انه واخيرا .., يا لفرحتنا .. الديمقراطية في السودان!!
وفي نفس الليله التي استلم فيها المشير سوار .. الحكومه واعلنها انها حكومة انتقالية .. وفي مسجد بانت العتيق كنا نجلس خلف العم المرحوم ابراهيم عبد المولي بعد صلاة العشاء ....... وبلكنته الدنقلاويه .. قال.. خوفي باكر يسلموها للعساكر مره تانيه زي المره الاولي
وكان هذا هو السؤال الاول الذي ابحث عن اجابة له .... من هم الذين سلموا الحكم للعساكر .. وحا يسلموه مره تانيه ؟؟؟؟؟
كانت الاجابة من عم من اعمامنا في المسجد قائلا ..... مايو بدأت شيوعية حمراء وانتهت اسلامية ....
وكان لينا عم من الحله ... ما قصر .. وقال ... السودان مهيأ للديمقراطية ... والفرصه متاحه لحكومة ديمقراطية .. يشاركوا فيها الجنوبيين والشماليين والبجة والفور .. .... ولو ما كان عيب نتدخل في كلام الناس الكبااار .. كنت عايز اقول لعمنا .. انتو العنصريه عليكم شنو .... وليه ما عملتو حساب النوبه والحلبة ؟؟؟؟؟؟؟
وكان في واحد من الحضور .. ما قصر وقال شهادة جميله في حق البلد .... وبالحرف قال ليهم..
وفي الفترة من عام 1875م حتى 1969 السودان ما اتقدم ولا خطوه واحده ... لا تنمية ... ولا بناء ... ولا تعمير .... واصبروا لي النعدد ليكم ... النميري قطع اللبخ وبني مكانو مكاتب الجمعية ... وقطع اللبخ وبني مكانو قصر للشباب والاطفال وعمل ... وبني ليكم قصر الصداقة .. وبني ليكم ويني ليكم ...
وفي الحقيقة الراجل كان حا يواصل للصباح .... لولا من اخر الصف في المسجد نط ليهو واحد وقال ليهو ... يا زول علي الطلاق انت من السدنة ...
وقامت الشمطه ...واين ..؟؟؟؟ داخل المسجد ؟؟؟؟؟؟
انا شخصيا .. خرجت اضحك علي اعمامنا .... نسوا الدرس بعد الصلاة .. ونسوا التلاوة بعد الصلاه ... ووقعوا شمطه في بعض !!!!!!
وتسألت ... يا ربي اي انسان حا يتكلم كلام جميل علي البلد .. او يعدد انجازات انجزها المواطن السوداني ... حا يقولوا عليهو سادن وتابع لمايو ؟؟؟ وطبعا .. نحن اتعودنا علي امن الدولة .... فقلت لنفسي .. الموضوع ده مافي حتي اناقشوا لانو اكيد الاحزاب حا يكون ليهم جهاز امن الاحزاب زي جهاز امن الدولة !!!! ويا ربي كل يوم الامام بعد الصلاة حا ينسي الدروس ويتكلم لينا في السياسة .. وبعد الصلاة تقوم شمطه تانيه .... واعمامنا الشمطوا في بعض ديل ... باكر حا ينشبكوا تاني في صلاة الفجر ....؟؟؟؟؟
وانصرف الجميع ليكملوا منقسمين الي مجموعات ..ومن خارج المسجد ... وكل مجموعه حا تمشي تعسكر ليها امام منزل من منازل الاعمام ...
وكل مجموعه .. تخرج عيوب بعض .. وتسخر من المجموعة الثانية .... ووصل الامر الي ان يتهم احد اعمامنا مجموعه اخري .. ان الكافتيرا الكل يوم بيختوها في الشارع مليانه .. عرقي وواهمين الناس انها شاي ....
بالنسبة لي .. كان هذا اول يوم اعيش في عهد الديمقراطية ... وبصراحه ... حزنت علي الدرس .. ولم اتمالك نفسي وانا اغني .. يا حارسنا ويا فارسنا ويا بيتنا ومدارسنا .......
.....
بداية قرار عشان المصلي العنصري القرر الجميع يحكم السودان ولم يذكر النوبة او الحلبة ... ان انضم الي حزب نباوي او حلبي .......
تخريمة ... بعد عدة سنيين اكتشفت ان للاحزاب جهاز امن .... اعضاءه وجنوده مجموعه من المناتلين ... والبيظنطيين ....يمارسوا حربا نفسيه واعلامية ومحاولة قتل الشخصيه ... وكل من يختلف معهم ... يطلعوه اما سادن .. او كوز .... او انقاذي ... او عميل ... ده لو لم يتعرضوا لاسرته ... وسبوه وسبوه كل من يعرفه .. ويصل الحد حتي لسب معتقادته الدينيه
|
|