يا السني دفع الله يا سمين

- أهلاً بكم وسهلاً في برنامجكم المحبوب (مع المشاهدين)، وما زالت رسائلكم تصل الينا عبر البريد بكثافة، فهذه رسالة
(يخرجها ويعرضها على الكاميرا)، ثم يدسها تحت الملف، ثم يخرجها (هي ذاتها) ويعرضها للكاميرا مرة أخرى
- وهذه رسالة أخرى، دعونا نفتح الظرف ونقرأ الرسالة
- تقول المرسلة حنان عبدو من شندي بأنها معجبة بالبرنامج ومن المتابعين له، جميل والله يا حنان، شكرا ليك والله نحن يهمنا رضاكم،
ويكمل السني رسالتها: ولكن يا السني انت مالك سمين كده؟ وكمان كرشك كبيره..
- آآ، شنو؟ سمين وكرشي كبيره؟ انتي مالك ومالي؟ ماكل في بيتكم؟ بالله شوف دي؟ باكل بقروشك؟ استني، والله أوريك.. عنوانك اهو ده في الجواب، 11 مربع 57 شندي.. خلاص عرفتو.. استنيني حأوريك..
طبعا السني قلع عيونو وقام على حيلو ومادي اصبعو يتوعد ويهدد.. والإرسال على الهواء..

نكت هذا الحوار من الذاكرة التي قبع فيها لحوالي ربع قرن- تزيد أو تقل- لحلقة من البرنامج الكوميدي الرائع "محطة التلفزيون الأهلية" الذي ظهر لأول مرة في العام 1978 ليشد كل مشاهدي السودان على اختلاف اعمارهم ومشاربهم وثقافاتهم،
وأردت بهذه الذكريات ارسال تحية للفنان المبدع محمد السني دفع الله، بن مدني البار وجارنا في حي الدرجة- نحن كنا في حي 114- والذي التقيته بمباني التلفزيون قبل حوالي ثلاثةأعوام حيث كنت أزور بنت خالتي المذيعة أمل مبارك..
وبما ان الشئ بالشئ يذكر؛ فقد اقتبس نجوم برنامج "طاش ما طاش" في أحد حلقاته عبارة السني دفع الله التي كان يرددها في فيلم "الإرهاب والكباب": (في أوروبا والدول ا لمتقدمة...) وصار يرددها ناصر القصبي الذي يمثل دور السوداني الدكتور بدر الدين..
لك التحية يا السني وأنت تمثل مدني، والسودان عالمياً..
وانتهز الفرصة لأعزي أهل مدني خاصة وأهل السودان كافة وأهل مصر وكل عشاق الأفلام المصرية في وفاة طيب الذكر المغفور له بإذن ربه ابراهيم خان، المولود بحي ود أزرق بمدينة ود مدني والذي وافته المنية قبل ايام، له الرحمة والمغفرة، ولأسرته حسن العزاء..

عمر حسن غلام الله

اخبار زميلي اسامة دفع الله شنو يا السني؟

يا اخوانا الحاضر يكلم الغايب، البوست ده للسني دفع الله، البيلاقيهو يغريهوالسلام، ويقول ليهو الترعة البين 114 والدرجة دفنوها، وعم علي اليماني رجع اليمن، قبل أيام، يعني زي شهر ستة الفات (1975م) وفيه اخبار جديدة طازه لو عايز (مثلاً بنوا مدرسة وسطى جديدة سموها المؤتمر) وجاء نميري زيارة لمسقط رأسه مدني وزار حنتوب المدرسة القرا فيها ونام في الداخلية بتاعته).. الخ