الجنيه السوداني الجديد : هل هو شايقي ؟؟ (( جنيه مشلخ ))

Post: #1
Title: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-14-2007, 02:34 PM
Parent: #0

الجنيه السوداني الجديد : هل هو شايقي ؟/خالد موسى
Jan 14, 2007, 04:16

سودانيزاونلاين.كوم Sudaneseonline.com

الجنيه السوداني الجديد : هل هو شايقي ؟

[email protected] خالد موسى

لا أحمل أي حقد أو غل على قبيلة الشايقية العريقة التي هي قبيلة سودانية لها تأريخها المعروف ، ولكن الذي آلمني هو أن بنك السودان كان قد أعلن أن عملته الجديدة لا تحتوي على أي إشارات عرقية أو جهوية أو ما شابه ذلك ، وعلى هذا الأساس فإنني أسأل بنك السودان وأسأل الشخص الذي صمم هذا الشعار : ما هي تلك الخطوط النايرة الجميلة الثلاثة على خدي الجنيه السوداني الجميل الوليد المتجدد ؟ وإلى ماذا تشير في تأريخ السودان وتراثه التليد المتمدد ؟ هل هي السيف أم الحربة أم الدرقة أم اللوح أم الشرافة أم الككر ؟ هل هي النيل أم توتيل أم جبل مرة ؟ هل هي مهيرة أم بنونة أم تاجوج أم بت مسيمس ؟ هل هي الإماتونج أم الجيكانج أم الإهرامات أم قصرالسلطان علي دينار ؟ هل هي الجودية أم النفير أم العشميق ؟

لا ثم لا ثم لا ..

إنها هي وحدها المنتنة التي هي (دعوها) ..

لأن تلك الخطوط الثلاثة على خدي الجنيه الجديد هي هي .. التي على خدود البعض وليست الكل من أهل البلد .. فهل هذا فقط لأنهم حازوا على السلطة في بلاد المساكين هذه أم ماذا ؟ المساكين أم العمايا ؟ العمايا أم الفقراء المعدمين ؟ الفقراء أم اليائسين ؟ اليائسين أم البائسين .. ؟

وإلا فإنني أريد تفسيراً الآن وليس غداً لهذه الخطوط ..

وإلا فإنني أطالب بتغيير هذه العملة وتغيير مدير بنك السودان المركزي وكل المسئولين عن إصدار تلك العملة ومحاسبتهم ..

وأطالب بإحتجاج سلمي عام على تلك العملة عبر الإنترنت وعبر كل المنابر والصحف والعواصم ..

أو : إدارج كل الشلوخ السودانية في خد واحد .. وذلك أرضى للجميع وأوفق ..

لاحظو الشكل داخل الدوائر على جانبي عملتكم الجديدة يا معشرالسودانيين!

Post: #2
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: SAMIR IBRAHIM
Date: 01-14-2007, 02:40 PM
Parent: #1

الجسور المناضل ابراهيم بقال ...

احوالك يا غالي .. بعد الرحلات الماكوكيه بين هولندا ... والمانيا ... وناس بولندا زعلانيين منك لانك ما مريت عليهم واخترت تزور تركيا ....

طلب خاص يا حبيب ... انو تكلم لينا ناس السياسه والمناضلين من اجل نعيمة المهمشه .. والمهمله ... ورسالتها ليكم صوت وصوره وفيديو كليب .... اضرب علي اللينك ..
فيديو ... نعيمة فضحتكم بالصوت والصوره

Post: #3
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-14-2007, 02:48 PM
Parent: #1

Quote: لأن تلك الخطوط الثلاثة على خدي الجنيه الجديد هي هي .. التي على خدود البعض وليست الكل من أهل البلد .. فهل هذا فقط لأنهم حازوا على السلطة في بلاد المساكين هذه أم ماذا ؟ المساكين أم العمايا ؟ العمايا أم الفقراء المعدمين ؟ الفقراء أم اليائسين ؟ اليائسين أم البائسين .. ؟

الله يجازي محنك يا بقال يا اخوي...

ويا كاتب المقال خالد موسى!!!

الحكايي دي ما لاحظناليها... كدي الأقلبلي واحد وأجيك راجع...

المقال دا غايتو أنا خلاني أفتفِت من الضحك في المكتب زي الماني طيبي!!!

قال دعوها مُنتنة قال!!!

Post: #5
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-14-2007, 03:23 PM
Parent: #3

Quote: الله يجازي محنك يا بقال يا اخوي...

ويا كاتب المقال خالد موسى!!!

الحكايي دي ما لاحظناليها... كدي الأقلبلي واحد وأجيك راجع

شكراً ابو الحسن

في انتظار عودتك

Post: #4
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-14-2007, 02:52 PM
Parent: #1

أمانةً جاتك يا (بقال) ناقل المقال و(خالد موسى) كاتبو...

هسع القطيعات ديل شلوخ شايقية؟؟؟

شلوخ الشايقية عرااااااااااااض ومراقدات مالات الخَد (الجُضُم) لي حَدُّو... تجي تقول المقاطع دي شلوخ شايقية!!!

والله كلام!!!

مودتي...

أبو الحســــــــــين...

Post: #6
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-14-2007, 03:37 PM
Parent: #4

للتوضيح

المقال منشور بموقع سودانيز اونلاين قسم الاراء الحرة والمقالات بقلم

الكاتب خالد موسى

Post: #7
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: wadalzain
Date: 01-14-2007, 03:41 PM
Parent: #4

غايتو الما دايرك فى الضلام يحدر ليك

يعنى دى آخر التقليعات ، فكرتم ثم قدرتم ، ثم فكرتم قلتوا النطلع من الجنيه الجديد ده حكايه ولا روايه ضد الشايقيه ، حقوا الواحد اذا كان عنده نقد للحكومه يكون موضوعى ، كلنا الحكومه دى مكجننها لكن ما بنقول جنس الكلام ده ، لانو ده ما بقنع ليهو شافع ناهيك عن حكومه ، وبعدين الشايقيه ذنبهم شنو مشيلنهن ذنوب الحكومه كان على عثمان عمل حاجه ديل الشايقيه وكان الجاز عمل حاجه ديل الشايقيه ، الغريبه الحكومه لامه من كل جنس وكل لون ولكن الحيطه القصيره الشايقيه ، يا جماعة الله انا اشهد انو الشايقيه اغلبهم ضد هذه الحكومه لكن من يسمع ؟؟

Post: #9
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-14-2007, 03:50 PM
Parent: #7

Quote: الغريبه الحكومه لامه من كل جنس وكل لون

دي حكومة ياتوا دولة الفيها كل الاجناس وكل الالوان ؟؟؟؟
غايتوا في السودان مافي حاجة زي دي ,, حكومة بتاع قبائل ومناطق
محددة في السودان ومعروفة

Post: #8
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-14-2007, 03:42 PM
Parent: #4

هسع عليكم الله دي عملة سودانية ولا شايقية ؟؟؟؟؟؟

بشلوخه الثلاثة مكان !!!!!!!!!!!!!!!!!!!

Post: #10
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-14-2007, 03:53 PM
Parent: #1

Quote: هسع عليكم الله دي عملة سودانية ولا شايقية ؟؟؟؟؟؟

بشلوخه الثلاثة مكان !!!!!!!!!!!!!!!!!!!

أُستاذ/ بقال الصور ما واضحة ممكن توضحها لينا؟؟؟!!

Post: #11
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-14-2007, 04:08 PM
Parent: #10

Quote: أُستاذ/ بقال الصور ما واضحة ممكن توضحها لينا؟؟؟!!

الشلوخ الثلاثة في فئة الواحد جنيه الموجودة في العملة بالجنبتين
ده رمز لشنو ؟؟ ودلالة علي شنو ؟؟؟

ما هي تلك الخطوط النايرة الجميلة الثلاثة على خدي الجنيه السوداني الجميل الوليد المتجدد ؟ وإلى ماذا تشير في تأريخ السودان وتراثه التليد المتمدد ؟

هل هي السيف أم الحربة أم الدرقة أم اللوح أم الشرافة أم الككر ؟ هل هي النيل أم توتيل أم جبل مرة ؟ هل هي مهيرة أم بنونة أم تاجوج أم بت مسيمس ؟ هل هي الإماتونج أم الجيكانج أم الإهرامات أم قصرالسلطان علي دينار ؟ هل هي الجودية أم النفير أم العشميق ؟

اذا جاوبت علي الاسئلة اعلاه الصورة بيكون ليك واضحة ,, المشكلة واضحة جداً لكن
الفي خشموا جرادي ولا بعض

Post: #12
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-14-2007, 04:20 PM
Parent: #1

Quote: ما هي تلك الخطوط النايرة الجميلة الثلاثة على خدي الجنيه السوداني الجميل الوليد المتجدد ؟ وإلى ماذا تشير في تأريخ السودان وتراثه التليد المتمدد ؟

هل هي السيف أم الحربة أم الدرقة أم اللوح أم الشرافة أم الككر ؟ هل هي النيل أم توتيل أم جبل مرة ؟ هل هي مهيرة أم بنونة أم تاجوج أم بت مسيمس ؟ هل هي الإماتونج أم الجيكانج أم الإهرامات أم قصرالسلطان علي دينار ؟ هل هي الجودية أم النفير أم العشميق ؟

كدي يا اخوي...

قبل ما أجاوب ليك... وريني إنت تناولك للموضوع دا... جدي مية المية ولة كموضوع ساخر؟؟؟

وبجيك راجع...

مودتي...

أبو الحســـــــين...

Post: #13
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ناذر محمد الخليفة
Date: 01-14-2007, 05:48 PM
Parent: #1

Post: #14
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: nile1
Date: 01-14-2007, 06:27 PM
Parent: #13

الأخ بقال

لم أكن أتصور أن شخصا يحمل هم قضية إلتففنا كلنا حولها يحمل في قلبه كل هذا الكره والبغض للشايقية..خفف من غلوائك قليلا يا أخي وأرتق بخطابك إلى مايخدم قضية القضايا درافور فهي أحق بكل جهد وحرف يضيع في أمور لا طائل من ورائهاسوي تكريس الفرقة والعنصرية البغيضة

Post: #15
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: tmbis
Date: 01-14-2007, 06:39 PM
Parent: #14

Quote: هل هي مهيرة

تاني مهيرة ( يابقال عليّي ) ؟؟
المرة دي كان وقعت فيها تاني... أحتمال كبير يلحقوك الجنية ده ..
اقصد يشلخوك شايقي..

Post: #16
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ASAAD IBRAHIM
Date: 01-14-2007, 07:11 PM
Parent: #15

تعرف يا بقال كتير من مواضعيكم الهايفة دي والله تجبر الواحد وتخليهو يبقي جهوي وعنصري

يا اخوي شلوخ شنو ما نص قبائل السودان بتتشلخ

ولعلمك الشايقية ذاتم بطلوا الشلوخ

الله يهديكم

Post: #17
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: BAKASH
Date: 01-14-2007, 08:51 PM
Parent: #16

اخونا ابراهيم بقال

يا اخوى نحن ماشايقيه لكن ال يجى جنب الشوايقه بنشلخو عديييييييييييييييييييل كده

وبعدين الشلوخ دى فى كل قبايل السودان موجوده كبيره والا صغيره

يا اخوى نحن عاجبانا على كده وال ماعاجباه يشيلها ويشلخها زى ما عايزها

بدون زعل يا اخوى

بكاش

Post: #18
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: انور تاج السر
Date: 01-15-2007, 06:33 AM
Parent: #17

Quote: وإلا فإنني أطالب بتغيير هذه العملة وتغيير مدير بنك السودان المركزي

لا خلاا(لا خلاص).

ولد يا علي عثمان بالله نفذ فوراً.

Post: #19
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: انور تاج السر
Date: 01-15-2007, 06:35 AM
Parent: #18

يا بقال اوعي تكون عقدتك حكاية عنيق الامبارح يا طائر العنقاء

ارحم نفسك و ارحم الاخرين يرحمك الله.

Post: #20
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-15-2007, 07:07 AM
Parent: #1

Quote: تاني مهيرة ( يابقال عليّي ) ؟؟
المرة دي كان وقعت فيها تاني... أحتمال كبير يلحقوك الجنية ده ..
اقصد يشلخوك شايقي..

الله يجازي محنك يا تمبس يا صديقي...

خليتني أضحك من الصباح في المكتب متل الماني نصيح...

إنت عارف يا تمبس أخوي... أنا ليييييييي مداخلتي التاني قايل الموضوع دا مقصود منو موضوع ساخر وهزلي لزوم فرفشة... لكن لمن كمان زعيمة المناضلين السيدة/ تراجي نزلت موضوعها بي غادي مهاجمة كمال أُوسلي قُلت يا ود أبريدة الموضوع دا محمول محمل جد... وبراااااااااحة مرقت وقُلت أجي الصباح لقيتك والإخوة الكرام تصدو لمثل هذه الأوهام وسبحان الله زي ما قال المهندس الزاكي... جماعة عاملين فيها عندهم قضية ومناضلين قدر الدنيا... يلتفتو لي شخيتات في الجنيه زي دي... وبعدين أنا أمس في رد هزلي عليهو نحن ماب نرضى شلوخ الشايقية الزمان (وطبعاً زي ما قال الأخ أسعد الشايقية هسع بطلو الشلوخ ـ يعني علي عثمان ما مشلخ ولا محافظ بنك السودان مشلخ)!!! نحن ذاااااتنا ماب نرضى بالشلوخ الشخيتات دي... في ردي ليهو الهزلي أمس... لأن شلوخنا عرااااااااااض من بداية الخد لي نهاية الخد يجي بقال يحقر بي شلوخنا ويعملها لينا شليخات؟؟؟ والله كلام؟؟!!!

كميات مودتي... وربنا يهديكم يا تراجي وبقال والجميع ياااااااارب...

أبو الحســـــــــــين...

Post: #21
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: eyes of liberty
Date: 01-15-2007, 08:57 AM
Parent: #1

لا خلاس شلخوا التعريفة برنو
وآب قرشين قرعاني
و كلنا اكوان في بلدنا سودان

Post: #22
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: Nadia Elsir
Date: 01-15-2007, 09:25 AM
Parent: #21

Quote: لا خلاس شلخوا التعريفة برنو
وآب قرشين قرعاني
و كلنا اكوان في بلدنا سودان

يلا راجين شنو اعملوا زى ما نصحكم بيهم عيون الحرية باقى زول نصيحة !

نادية السر

Post: #24
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: محمد زمراوي عبدالعزيز
Date: 01-15-2007, 10:00 AM
Parent: #22

والله كنت متحمس مع اخوي بقال في كلامو والتظلمات من الجنيه الجديد وكيف انه تحول شايقي بشلوخو وطبعا احنا لسع ما شفنا شكل الجنيه الجديد وافتكرت ان الجنيه فيهو حسناء شايقية مشلخة رغم ان الاعلان الصادر من بنك السودان يقول ان الجنيه الجديد خال من الصور الشخصية للزعماء والرؤساء السابقين والحاليين..

والحمد لله الجنيه فيهو حمامات السلام وبس ويا حليل القروش ابو جمل الشعار الذي يتداول في الورقة المروسة للبنك السوداني الفرنسي..

وحماسي كان بدافع انو عندك حق يا بقال ولكن قريت
Quote: هل هي السيف أم الحربة أم الدرقة أم اللوح أم الشرافة أم الككر ؟ هل هي النيل أم توتيل أم جبل مرة ؟ هل هي مهيرة أم بنونة أم تاجوج أم بت مسيمس ؟ هل هي الإماتونج أم الجيكانج أم الإهرامات أم قصرالسلطان علي دينار ؟ هل هي الجودية أم النفير أم العشميق ؟

وانا كنوبي زعلت شديد من سردك للحاجات دي والتي غالبا غير معروفة في المنطقة النوبية الا النيل والاهرامات .. واراك تجهل ان التاريخ السوداني يبدأ من التاريخ النوبي الموغل في القدم باسماء ملوكها بغانخي وتهراقا.. وكان على مصممي الجنيه ان يراعوا تاريخ السودان اولا ويتم الربط بالقديم الى التاريخ الحديث بحمامات السلام السودانية..

لالالالالالالالالالاكين لسع زعلان من بقال شديييييييييييييد.

Post: #23
Title: الجنيه السوداني الجديد : هل هو شايقي ؟؟ (( جنيه مشلخ ))
Author: الفاتح خليل الفكي
Date: 01-15-2007, 09:50 AM
Parent: #1

الأخ / بقال
الشايقية اكبر من هذه السخافات التى تنقلها لنا
ولو انت او كاتب هذه السخافات عندكم مشكلة مع الحكومة
فما ذنب الشايقية في هذا الموضوع .
يا بقال لو عندك وقت فاضى فأرجو ان تكتب عن قضية دارفور
فهى اهم من هذه السخافات لانها لا تخدم قضيتك ولا تفيدك
فمثل هذه السخافات تدل على العنصرية والجهوية التى تتحدث عنها
فلا تنهى عن خلق وتاتى بمثله يا بقال فالشايقية لا علاقة لهم بهذا
الموضوع حتى لو كانت الحكومة كلها من الشايقية انشاء الله يكون وقع ليك
كلامى يا بقال .
أبو كريم

Post: #25
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابوعبيدة حسن محمد
Date: 01-15-2007, 10:15 AM
Parent: #1

يا اخوانا بعيداً عن النعصرية والجهوية القبلية الما بتنفع دي 00

ورونا هسع ابوشلوخ ده بساوى كم من القديم ؟!!

Post: #26
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: ابراهيم بقال سراج
Date: 01-15-2007, 01:04 PM
Parent: #25

واصلوا انا متابع

Post: #27
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: محمد فرح
Date: 01-15-2007, 01:44 PM
Parent: #26

والله مافي عنصري غيرك إنت يابقال والعنصريه عندكم فاقت كل الحدود وشابكننا جلابه وكلام فارغ .....

حسي عليك الله الخطوط دي بقيتوها شلوخ إنت وكاتب المقال الغريب ده ........

بعدين الشلوخ دي ليست لدى الشوايقه وحدهم بل لدي كل القبائل السودانيه الشوايقه والجعليه وحتى لدي أهلنا في الغرب والجنوب إختلفت الأشكال ولكنها في النهايه شلوخ ......

دعونا من هذه النعرات العنصريه القبيحه ......

والله يهدي الجميع .....

Post: #28
Title: بجدكم آجماعة ؟!
Author: ملكة سبأ
Date: 01-15-2007, 02:12 PM
Parent: #1

Quote: وإلا فإنني أطالب بتغيير هذه العملة وتغيير مدير بنك السودان المركزي وكل المسئولين عن إصدار تلك العملة ومحاسبتهم ..

Post: #29
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: Al-Shaygi
Date: 01-15-2007, 02:48 PM
Parent: #1

أهه دابي جيتك يا بقال الفارغة والمقدوده
كان إنت ولا كاتب المقال عديمي الشغلة.

بالله في ذمتك (أكان عندك) دي شلوخ ،،، حتى الشلوخ ما بتعرفها...
متمني أعرف إنت بتعرف شنو؟؟؟

آآآآآآيييييييييي
شلخنا الجنيه شايقيييييييييي وجوه عينك وعين أي عقلية بمستوى غقليتك.

وحات سيدي علي ألم فيك إلا أشلخك شايقي وأمسح الشلوخ تاني لأنها ما راح تليق عليك.
يا وليد ما تمشي تشوف ليك حاجة تنفعك وتنفع أهلك غير الهبلسة والكلام الفارغ ولا أمشي وقع مع حرامية الإنقاذ خليهم يدوك كم صرة جنيهات وبعد داك سوي سواة قريبك أمشي عرس وكمستجد نعمه شتت القروش في العرس زي ما سوى.

وبعدين إنت اللقيته من ورا الهبيش ده ما قنعك!!!!

ما زمان قلنا ليك روق وأكل عيشك ولا والله يوم تقوم من النوم تعاين في المراية تلقى رقبتك مشلخ تقوم تمرق الشارع بقميص النوم!! وتكورك: شلخوني ،،، شلخوني ،، ومنها عديل على الحوش الجنب بيت البشير قبل ما يبقى رئيس (مصحة كوبر).

الله يشفيك من المرض الشايله في عقلك.

الشايقي

فاوضني بلا زعل

Post: #30
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-15-2007, 03:09 PM
Parent: #1

كتب بقال::
Quote: واصلوا انا متابع

يا لذيذ يا رايق إنت؟؟؟!!!

Post: #31
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: Moawia Mohammed
Date: 01-15-2007, 03:37 PM
Parent: #1

وقياسا علي فهمك يا بقال انو الخطوط التلاته تدل علي قبيلة الشايقية وفيا تكريث للقبلية
فأنا شايف أنو الطير الفي الجنيه الجديد فيهو تكريث للجهوية لانو طوالي بذكرني قرية أم الطيور
وبرضو الرقم واحد المكتوب في الجنيه دلالة علي حكم الفرد وفيهو تكريث للشمولية

بقال ياخوي

والذي نفسه بغير جمال لا يري في الوجود شيئا جميلا
وتري الشوك في الورود وتعمي أن تري فوقها الندي أكليلا

Post: #32
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: gessan
Date: 01-15-2007, 03:59 PM
Parent: #1

سلام ..
الموضوع دا ذكرني بتلك الإيميلات التي يتم تبادلها بكثرة والتي تتحدث عن وجود أسم الجلالة او اسم "محمد"مثلا على أحذية أطفال .. او "الشهادة" على ظهر سمكة تم إصطيادها على شواطيء البحر الفلاني ..او "البسملة" على جذع شجرة في سقط لقط..
وكلها رؤى وقراءات قرافيكية ..وإجتهادات لإستبيان شكل ما ..ولكنها مدعومة ومغلفة بالخطاب الديني حتى يسهل تمريرها وتبريرها..

كما في حالة هذا الموضوع -الجنيه اب شلوخ- هي محاولة لقراءة التصميم الجديد ..ولكني اراها متعجلة ومغلفة بخطاب قبلي ..بكل اسف..كما انها إشارة "ممسوخة" ومضحكة في نفس الوقت..

على اي حال:
في ظني أنه لو قصد "المصمم" -ومصمم العملة تحديداً- و"بيّت النية" على تمرير الشلوخ او اي إشارة اخرى داخل التصميم ..لما إستطاعت العين العادية لمحته بهذه السهولة وبهذه السرعة ..!!

اقعدوا عافية

--------------

Post: #33
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: السنجك
Date: 01-15-2007, 04:05 PM
Parent: #32

هناك محاوله من البعض لعنصرة القضيه

القضيه واضحه وضوح الشمس بين سلطه غاشمه فيها الشايقى والبرقاوى والتامه والدنقلاوى والزغاوى وبين شعب السودان المتنوع المتعدد الثقافات والقبائل والاعراف

اما محاولة البعض بعنصرة القضيه فهى تصب فى صالح الجبهجيه الذين يريدونها عنصريه

السنجك

Post: #34
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: عبد الواحد أبراهيم
Date: 01-15-2007, 05:24 PM
Parent: #33

بقال تحياتى بلاحدود
امل ان يكون النقاش من
قبل الاخوه المتداخون موضوعى
على انيناقش احدى الموضوعات
المرتبطة بالبوست مثل:
علاقة القبيلة بالسلطة فى سودان الانقاذ
علاقة الشايقية وارتباطهم بالسلطة منذ
اعهد الفونج..دولة محمدعلى باشا
الحكومات المسماة وطنية ..عسكرية ..مدنية
او يناقش الشلوخ باعتبارها عادات مو
على العموم الموضوع طويل
لنا عودة
عبدالواحدابراهيم

Post: #35
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: wesamm
Date: 01-15-2007, 07:49 PM

ياربي كاتب المقال دا خالد موسي بتاع امن سفارة السودان في واشنطون عشان كان دا خالد موتر تبقي كارثة
عشان تعرف الانصرافية المقصودة ودا شغل بتاع امن هسع عليك الله ما لقيت في مشاكل السودان دي كلها وبلاوي نظام الانقاذ والفساد الذي عم القري والحضر ومصائب جهاز امنك وجرائمه مالقيت غير شلوخ الجنيه الجديد وكمان قال بطالب يالتحقيق واقالة محافظ بنك السودان بسبب الشلوخ الفي خدود الجنيه ياعيني علي المسئوليه والمحاسبة

ليه ماقلت رايك في كل جرائم النظام وفساده علي كل الاصعدة وجاي تعمل الشلوخ موضوع بالله في انصرافيه اكثر من كدة

Post: #36
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: nile1
Date: 01-15-2007, 10:26 PM
Parent: #35

الأخ بقال
Quote: واصلوا انا متابع

سامحك الله..هذا منتهي الإستفزاز والإستخفاف بما كتبناه ردا عليك..لن نواصل ولن تجد ما تتابعه فلدينا ماهو أهم من الإستجابة للإستفزاز..ونعم الجنيه مشلخ شايقي..كأني بكاهلك قد ناء بحمل قضية دارفور فقررت تركها وحمل وزر الإساءة والإستخفاف..أرجو أن تراجع نفسك وتحترم مشاعر إخوتك في المنبر..أرجو من الإخوة المتداخلين عدم المواصلة قتلا للفتنتة في مهدها..تحياتي وودي للجميع

Post: #37
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: أبو الحسين
Date: 01-16-2007, 07:25 AM
Parent: #1

كتب باشمهندس الزاكي...
Quote: سامحك الله..هذا منتهي الإستفزاز والإستخفاف بما كتبناه ردا عليك..لن نواصل ولن تجد ما تتابعه فلدينا ماهو أهم من الإستجابة للإستفزاز..ونعم الجنيه مشلخ شايقي..كأني بكاهلك قد ناء بحمل قضية دارفور فقررت تركها وحمل وزر الإساءة والإستخفاف..أرجو أن تراجع نفسك وتحترم مشاعر إخوتك في المنبر..أرجو من الإخوة المتداخلين عدم المواصلة قتلا للفتنتة في مهدها..تحياتي وودي للجميع

أنا أول المستجيبين لندائك هذا يا حكيمنا...

تسلم يا هندسة...

مودتي...

أبو الحســــــــين...

Post: #38
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: محمد فرح
Date: 01-16-2007, 08:19 AM
Parent: #37

Quote: والذي نفسه بغير جمال لا يري في الوجود شيئا جميلا
وتري الشوك في الورود وتعمي أن تري فوقها الندي أكليلا

الأخ بقال ذكر لي أحد العاملين بمطابع العمله أمس وكنت قد ذكرت له قصة بوستك العنصري هذا أن هذه الشلوخ ليست الشلوخ التي تقصدها ولكنها علامات تساعد الإخوه الذبن فقدوا نعمة البصر في التعرف على العملات وإذا ركزت في هذه الخطوط التي تسميها شلوخ تجدها تتفاوت في كل فئه من فئات العمله كما أن بها دائره تجدها تارة في أوسط الخطوك وتارة في أعلاها كما أن الخطوط يمكن تحسسها للتعرف عليها وهي للأعمى يابقال وحقيقه أعجبتني الفكره جدا جداً وأحيي مصممي العمله على هذه اللفته البارعه جداُ ..

Quote: والذي نفسه بغير جمال لا يري في الوجود شيئا جميلا
وتري الشوك في الورود وتعمي أن تري فوقها الندي أكليلا

Post: #40
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: Aymen Tabir
Date: 01-16-2007, 08:44 AM
Parent: #38

بقال
أولا جبته المقال وعلقته عليه ، وتاني قلته ما حقك وبعدين ضريت عيشك وقلته الداير تقوله ولفيت اللف الداير تلفه كلو ؟؟ حيرتنا !!!!!!!!!!!!!!
بقال
متذكر موضوعك بتاع عبد العزيز خالد كان اول مره ادخل ليك في موضوع ودي التانيه واتكنى ما تتكرر لانو دايما بتضطراني ليها ،
عموما لو ما رجعته لي موضوعك داك وقريت الرد اديك ليهو تاني :
- اصحاب القضايا والبدافعو عنها دايما بكونوا محايدين بطالبوا بحق كل الناس المعاهم والما معاهم فكونك تكون من القابضين بي جمر قضيه ما ، اركز وابقى محايد في طرحك عشان الناس تحترم قضيتك وتسمع ليك وتساندك .
- قلته ليك برضو السياسي الشاطر اخر خطوه بلجأ ليها مضطر انو يعادي شريحه او فئه ناس بي عينه ، كدي اقرا كلامك الفوق ده وراجعه شوف نتيجته شنو الهنا خليك من الناس البره.
- برضو هناك قلته ليك القياده والتلميع ما كراسي بتلف ومؤتمرات صحفيه وصور مع الخواجات ،خاصه لقيادات سموها قيادات قضايا الهامش ، القيادات دي بتفهم مشكلته في عمق مشاكل التانين عشان في الآخر تصل وتبقى ثيادة كل الناس .
ختاما ومع احترامي
بطلوا استعداء شعب احوج ما يكون لي انو يتلمى والنار البتلعبوا بيها وبتضحكوا دي حتكون نار من جهنم لكن اول ما تحرق حتحرقكم انتو القايلنها هظار !
ابقى بخير وكان ده فهمكم
انشاء الله بكره البشير يشلخ قاعة الصداقه
ايمن السر

Post: #39
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: othman mohmmadien
Date: 01-16-2007, 08:36 AM
Parent: #37

هي الناس لسي قاعدي تشلخ يا إبراهيم؟؟؟؟؟؟؟؟؟؟؟؟؟؟؟؟؟؟

Post: #41
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: BAKASH
Date: 01-16-2007, 08:57 AM
Parent: #39

شكرأ اخونا محمد فرح للتوضيح وحقيقه فكره جميله

يعنى انت قصدك يا محمد فرح بقال يغمض عيونو ويتحسس عشان يعرفها خطوط والا شلوخ؟؟؟؟

دا الفرق بين البصر والبصيره يا بقال

بكاش

Post: #42
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: Ahmed Yousif Abu Harira
Date: 01-16-2007, 10:31 AM
Parent: #41

Quote: واصلوا انا متابع

ها (سناجك) أمانه ما إتلومتو في (وليد) بقال ده... لوما الجبال ما بتحملوا ...

آآآ ناس الزول ده شكلوا جاب المقال ده في شكل (ملحه) أو قفشه... وما اظنو بيكون قاصد الكلام الجد الإنتو كتبتو ده كلو...

الزول ده زولا واعي وما ظنيتو يكون ده (فهمو)

كما ظنيت أنو (لبدتو) دي فوق رأي

دحين نحن في انتظاره ليثبت/يدحض وجهة نظري/نظركم دي في أقرب فرصة...

Post: #43
Title: Re: الجنيه السوداني الجديد : هل هو شايقي ؟؟ (( جنيه مشلخ ))
Author: Amin Hamad
Date: 01-17-2007, 08:31 PM
Parent: #1

الفاضل ابراهيم

اعيد ما كتبته في بوست تراجي

كنت بصدد قضاء أمر شخصي بأحد المكاتب في مدينة
امريكية وبينما كنت احرر شيكاً دخل احدهم وقال "هاي"
رديت الهاي ب هاي وواصلت ما كنت بصدده، وبعد ان
فرغت نظرت للداخل فاذا به رجل اسمر وعلي خديه شلوخ
أبي عليه الرحمة، وعندها تراءت لي سواقي القرير وعبق
المكان بريحة الجروف والدفيق وطربت لنهيق الحمير ومأمأة
النعاج عند الغروب وقلت في نفسي" وا حلالي لقيت سنجكاوي
وسط الجليد، وحتماً سيكون دفئاً وسلاماً علي روحي المدردرة
بالمساسقة يوماتي علي خف الخيال، فحادثته قائلاً"من وين الزويل؟
فأبتسم ببلاهة ولم يقل شيئاً، فقلت بلغة المكان من وين انت؟
فأجاب من نيجيريا، فقلت "من أين لك تلك الشلوخ وهي سمة
قبيلتي؟ فقال هل انت من السودان؟ فقلت "نعم" فبدأ يتذكر
اسم القبيلة ولما أعيته الذاكرة اسعفته وقلت شايقية، فقال نعم
عرفت ذلك من احد السودانيين وحاولت ان ابحث وسط قبيلتي
ان كان هناك علاقة ما بشايقية السودان ولم اتوصل الي اي نتيجة،
فقلت في نفسي ربما أستعر الخلاف بين احد جدودنا وأخوانه
في ميراث بعض النخلات فحرد وقرر الرحيل، فقادته الاقدار
لهؤلاء الطيبين فعاش بينهم زعيماً بل عمل علي تشليخهم شر
مشلخ حتي يثبت زعامته المطلقة ولكن بفيض من حنان ودفقات
من وداد يحفظ به أهله الجدد وديل أهلي(حلوة مش) ، أما شايقية
الانقاذ فأن هم شلخوا الجنيه فذلك لأن المال صار قبيلتهم واهلهم
بعد أن فقدوا الاهل والقبيلة بسبب تعديهم علي السودانوية،
قبيلتنا الفتية، ومعاً من الممكن ان يعيش دينق بين السواقي
وان يفلح أدروب وسط الحواكير، وأن يقدل محمد عثمان مع
ميري، وأن يردد اسحق كسلا كسلا أنا قلبي غازلا، ودمتم

أمين حمد