حِلَة الحَريقة

الركن الجنوبي الشرقي للحارة التانية الثورة والمهدية

هناك ترعرعت .. جنوبها الليق ومقابر احمد شرفي وشرقها شارع الوادي والخُدير والقماير(الحفر والمرايس) وفي جنوبها الشرقي كلية التربية جامعة الخرطوم ... تحد شمالا بشارع خمسة ومدرسة البلك الثانوية للبنات ( حي انا ) .. وشرقا بالشارع الذي يمر أمام مسجد البلك ويقسم الحارة الثانية إلى نصفين

الآن اصبحت المقابر لا تري فقد شيدت المباني .. جامعة امدرمان الاسلامية ، ادارة البترول ، محكمة امدرمان شمال ، الفحص الالى للسيارات ... قديما الفسحة التي كانت بين شارع الخور وهو اول شارع في مدينة الثورة ويسمى شارع الخور وشارع المدارس .. بينه وبين مقابر احمد شرفي .. حيث ميادين الليق الثلاث .. ليق واحد وليق اثنين وليق 3 وفي اقصى الشرق ميدان السهم واقصى الغرب ميدان نادي المهدية .. هذه الفسحة كانت تقطعها طيلة اليوم قطعان الخرفان والابقار وقليلا من الابل .. قادمة من حدود امدرمان الغربية باتجاه البحر ( النيل ) لسقايتها

وليد (الشِفت)
تحياتي وسلامي وسلامة رجعتك.

طيب وين (ماو) عارف قدمو المفارق
اصلو (ماو) ده ود فريقكم وزمان علي ما اذكر
كان اسمو (معاوية بشري).
ياخ فريقكم ده (حريقه)جد جد وصحباني فيهو
بالكوم تحديداً بالقرب من شارع (حي أنت) ده
اقوليك حاجة ؟؟ كان كتبته اكتر من كده ممكن عادي
يفجخوني اولاد فريقكم ديل .
ودي لك

يا شفت مالك
في زول غالطك في حلتنا

بالله ما تنسي درمة

فيصل نوبي يا فرده

درمة ما من الحريقة
درمه من حلة السلام


لكن درمة ما بتنسي وناس السلام كانوا انداد للحريقاب

كيفك والاولاد

سفيان

انت قصدك فريق السهم
فعلا الحريقة كان فيها فريق قوي شديد وحريقة جد جد

حا افصل كتير في حتت فريق السهم دي لانو كان واحد من راكائز ونكهة الحريقة

بتعرف منو تاني في الحريقة

..
.
looool@ Nobi

Quote: يا شفت مالك في زول غالطك في حلتنا

الظاهر يا نوبي لانو شفت طلعوهو من القماير
م من اولاد المهدية
رغم انو ناس الثورات ديل كلهم شفاته
وجكسيهم نضييييييييييف للطيش .. ححححححححححى أنا ..
اتسكر فى الثورة وادردق فى المسالمة

تبلدينا

ما قريت البوست البقول

كل غزالة اخوها اسد


بعدين يا تبلدينا الثورة ما فيها سكر كتير

فيها الخانات الكتار
والعوامات اكتر


_________
اخبارك عامل كيف

اذكر أننا كنا نشاهد قطعان الأبقار والتي دائما ما بتقدمها فحل ضخم ماكن القرون .. فكنا نتقدم قليلا إلى المقابر ونصيح فيها :

التور أب جاعوره
شم الدم
وقال حرم
وقلب الهوبة
في الراكوبة

ثم نجري ونحن خائفين إلى الحلة وفي ظننا أن الثور خلفنا ويطاردنا .. وكنا نستبعد كل من يرتدي شيئا احمر اللون .. فقد كانت تسري بيننا مقولة أن الثورة يطارد من يرتدي الأحمر .. ومن يرتدي الأحمر منا يختبئ حتى يختفي القطيع عن الأنظار .. لاحقا علمت أن الأبقار لا ترى الألوان .

وكثيرا ما هاج احد الثيران وتوجه صوب الحلة يطارده الرعاة .. كانوا فرسانا من دارفور وكردفان من قبيلة البقارة يرتدون زي أهل الغرب ملثمين ويمتطون الأحصنة .. فتبدأ مطاردة مثيرة .. فنجري لنختبئ ونلتصق بالجدران أو نستلقي على الأرض .. لأننا اخبرنا أن الثور لا يهاجم من يلتصق بالجدار أو من يستلقى على الأرض بلا حراك لأنه لا يميزه منها ( أظن هذه المقولة فيها شيء من الصحة إذا كانت الأبقار فعلا لا تمييز الألوان ) .. ونتابع المطاردة من أماكن اختبائنا بخوف وفرح في آن واحد