Post: #1
Title: رنـــدا حاتم...
Author: نجوان
Date: 01-07-2007, 08:56 AM
وينك يا بنية؟؟
يفتقدك المكان...
حردت الورود عبيرها...
وتوقفّت الشموع عن الرقص...
ساسقت الكلمات بين المدخل.. وزوايا التواصل..
عسى ولعّل أن تسمع صدي إيقاع كيبوردك... فتهرع مرحبّة جزلة..
فلا التجافي من طبعك .. أيتها الأصيلة...
ولا قلي الأصدقاء والسمّار على شواّية الإنتظار..
(وإن كان بعضهم يستاهل)
عودي... ولو ع الماشي..
حتى يتشّرب هذا المكان بألوان يتوارى امامها.. خجلا.. قوس قزح...
وتتاوق الأزهار بغبطة وترقب..
وبيني وبينك..
كترت المساخر في غيابك..
فعودي ليعود النظام والامن العام...
|
Post: #2
Title: Re: رنـــدا حاتم...
Author: عبدالكريم الامين احمد
Date: 01-07-2007, 09:09 AM
Parent: #1
رندا زي ماقال شيخنا الحنين
زولة مبروكة...الله يخليها ياخي..!!
|
Post: #3
Title: Re: رنـــدا حاتم...
Author: أبو الحسين
Date: 01-07-2007, 09:14 AM
Parent: #1
| Quote: زولة مبروكة...الله يخليها ياخي..!! |
آمييييييين...
|
Post: #4
Title: Re: رنـــدا حاتم...
Author: Randa Hatim
Date: 01-07-2007, 10:06 AM
Parent: #3
يالله يا نجوان ... يا بت يا حديقة ...
والله بقيت اخاف لمن قلبى يرجف لما القى زول يفقدنى او اسال عنى ... يمكن ما اتعودت الولف وخايفه منو .. قالو الولف كتال ...
كيفك يا حبيبة .. انا قاعده وموجودة وحاتك لكن بس بعدت شوية ...
والله يا نجوان افتح البوستات الكنا بنتداخل فيها (بورداب الدوحه والبكا بحررو اسيادو ، لو ...) واصابعى تاكلنى على الكتابة لكن ارجع اوقف .. هسى بكتب فى 3 بوستات بالعدد وكتابة مفرقة ما بانتظام .. الاهم من انا وين انو فى انسانة فقدتنى والله حاسة انوالدنيا شعت نور .. وفى اركانا طلقو بخور ..
بريدك بالحيل يا بنية .. وبريد ريحة السودان فى كلماتك .. انا ما مهمه للدرجه دى (يفتحو لى بوست) لكن كفاية انك اهتميتى بى ...
كيكي وابو الحسين ... ان شاء الله اعيادكم دايما خير وزغاريد الفرح صداها ما يروح من حواليكم..
|
Post: #5
Title: Re: رنـــدا حاتم...
Author: willeim andrea
Date: 01-07-2007, 10:22 AM
Parent: #1
كل سنه انتي وكل الاهل طيبين
|
Post: #6
Title: Re: رنـــدا حاتم...
Author: فيصل نوبي
Date: 01-07-2007, 10:33 AM
Parent: #5
نجوان و رندا و ضيوفهم
كل سنة و انتم طيبون
عذرا للاقتحام..
عن إذنكم
أقبض وليم ده هنا
كل سنة و انت طيب يا مان .. وين مختفي ؟
|
Post: #7
Title: Re: رنـــدا حاتم...
Author: معتز القريش
Date: 01-07-2007, 10:43 AM
Parent: #6
رندا حاتم
يا الظل الوريف
اجبري بالخاطر ربنا اجبر بي خاطرك
فاقدنك وفاقدين حسك معانا
عودتينا قربك ما تعودينا غيابك يوم
|
Post: #9
Title: Re: رنـــدا حاتم...
Author: ايزابيل حلبي
Date: 01-07-2007, 11:59 AM
Parent: #5
والله إشتقنا لعيونك وحضورك رندا حاتم
شكرا نجوان طلعت شمس رندا من خلال مناجاتك
|
Post: #8
Title: Re: رنـــدا حاتم...
Author: عبد المنعم سليمان
Date: 01-07-2007, 11:38 AM
Parent: #1
والله يا جماعة احببت الكثيرين في هذا المنبر
ولم احب شخصا كحبي لهذة الانسانة الانسانة
لك ودي نجوان ولرندا مثلة
|
Post: #10
Title: Re: رنـــدا حاتم...
Author: khaleel
Date: 01-07-2007, 12:19 PM
Parent: #8
سودانا يا سودان الهنا
جوة القلوب ساكن هنا
اشتقنا ليك يا النيل عريس
وامدر عروس متحننة
رندا حاتم كل سنة وانتي طيبة ونجوان دوما كما عودتنا بتسال علي الحبان
ما تطولي الغيبة يا رندا وشكرا نجوان
|
Post: #11
Title: Re: رنـــدا حاتم...
Author: بدر الدين الأمير
Date: 01-07-2007, 01:39 PM
Parent: #10
نجوان تبحث عن رندا
هل يختبىء البستان فى الوردة ؟! ام خبأت الوردة البستان !؟
ويالخباء عرفتكم ومعارفكم تعرفن ولا تتعرفن .............
لأن يانجوان ورندا استطعم أغنية ابراهيم عوض (ليه بيتسأل عنى تانى) بس
بشكل مختلف تماما وكأنى اسمعه يقول : ليه مابتسأل عنى تانى وانت معك
مابتضيع الامانى وانا مدخرك لزمانى لانو عارفو معك لن يكون لا عليك ولا عليا جانى
تسلم رندا من غير جمع تكسير سالم وتبقى نجوان نجوى لاكسير الصفاء والاصفياء
|
Post: #12
Title: Re: رنـــدا حاتم...
Author: sudania2000
Date: 01-07-2007, 02:12 PM
Parent: #11
Quote: هل يختبىء البستان فى الوردة ؟! ام خبأت الوردة البستان !؟
ويالخباء عرفتكم ومعارفكم تعرفن ولا تتعرفن .............
|
الرقيقة نجوان تحية و سلام
الرائعة رندا سلام
اعجبني التعبير اعلاه فقلت استعيره بعد الاذن
تسلموا
|
Post: #13
Title: Re: رنـــدا حاتم...
Author: نجوان
Date: 01-08-2007, 09:45 AM
Parent: #12
رندا
يا راندوك..
كل العرفوك رادوك..
مرحبا بست المروة... الزاهية برّة وجوّة..
ورُب أسافير تجمعنا بالأخيار... وأنقياء الدواخل..
فيصبحون مثلهم مثل من أحببناهم ونشأنا معهم... بل وأعزّ...
وحضورك أنتي أيضا أختي ...
حضور الجذور الممعنة في الأصالة ...ومتأصلة في معاني الولف والتحنان...
وكل الحكي.. منبعه ومصبه... تراب الوطن الغالي..
يا قمر دورين .. أنا شفتك وين ؟
طبعاً في الليل ... وفي ضفاير النيل
في رمال سهرانه... راجياك تسيل
وفي عيون سرحانه ... غارقه في التكحيل
وفي دموع الساقيه ... يرنو ليها نخيل
وكل ديل في وطني ... أحبك يا وطني
أريدك يا وطني..
القومة ليك يا وطني...
|
Post: #14
Title: Re: رنـــدا حاتم...
Author: نجوان
Date: 01-08-2007, 01:06 PM
Parent: #13
هي كذلك رندا..
يا كريم..
وموعودين.. أتمنى.. بمزيد من التواصل معها وبقية العقد الفريد..
_____
آمين يا أبو الحسين..
شكرا على الدعوات..
_____
وليام..
كل سنة وانت طيب..
مشكور على التوقيع...
_____
مرحبا بفيصل نوبي...
كل سنة وانت بخير..
سعيدين بمساعدتك في قبض وليام...
_____
اهلا معتّز..
فاقدنها فعلا... وربنا يجبر بخاطر الجميع..
|
Post: #15
Title: Re: رنـــدا حاتم...
Author: نجوان
Date: 01-08-2007, 01:11 PM
Parent: #14
هلا بإيزابيل..
كان لابد من مناجاة من طال غيابهم..
شكرا على المرور..
_____
مرحبا عبد المنعم...
هي فعلا جديرة بالإحتفاء ..
مشكور ..
_____
خليل..
يسأل منك الخير..
ما زلت في البلد... أم رجعت للشتات..
يشيلك شوق وسط عينين
يوديك .. مقرن النيلين
يخضـِّر فيك .. عقيد ياسمين
وتقوم شتلة محنـّه مثال
أريجها دعاش .. وحزمة فال
قبال توتي .. أُ م خضاراً شال
عيون أم در .. لبيت المال
غريب والغربه أقسي نضال
_____
ود الأمير..
ورندا.. وردة وبستان..
ولك كل الاماني محققة.. ولا جناية عليك من زمن أو إنسان..
ومشكور على الكلمات العطرات..
______
سودانية 2000
يا مراحب..
وإستلفي زى ما تحبي.. ومثلك لا يحتاج إذن ولا تصريح..
مشكورة على الطلة..
|
|