Post: #1 Title: العندو باقي التسجيل ده يفزعنا! Author: saadeldin abdelrahman Date: 12-28-2006, 03:23 AM Parent: #0
سمعت الجزء ده و هاجمني "ابو الشهيق" حالف ما يروح الا بي باقي الغنية!
---------
الفاروق / ملاسي/ جبرا يمتنعون.. و اذا جيتونا من غير اقامة بنلحقكم عشة بت الصديق
* تحية لهشام.
Post: #2 Title: Re: العندو باقي التسجيل ده يفزعنا! Author: saadeldin abdelrahman Date: 12-28-2006, 03:59 AM Parent: #1
فلق الصباح!!!
هذه الاغنية (تحديدا) كانت هي الشئ الوحيد الذي يطلق اساريري بعد عبوس الصحو المبكر "يا ولد قوم المدرسة!" و الاستعداد بينما انا جالس على الكرسي المجلد بالبلاستيك الاصفر تحت الراكوبة.. جوار باب المطبخ وكانت شارة البرنامج
تأتي : جيلي أنا جيل العطاء المشرئب الى النجوم بصوت " رجاء حسن حامد " على ما أذكر - هل كان اسم البرنامج "صباح الخير يا وطني"- شئ من هذا القبيل! يحدوني الأمل القريب و البعيد- ال في غفلة راح - حتى اضاعونا و أي جيل اضاعوا!
Post: #3 Title: Re: العندو باقي التسجيل ده يفزعنا! Author: saadeldin abdelrahman Date: 12-28-2006, 07:00 AM Parent: #1
فلق الصباح(1)
فلق الصباح قول لى أهو نورك لاح خلى يا خفيف اــــلروح هو هذا نــــداك ام ندى الازهار
من جنان رضوان أصلك لذا كل ربيع فصلك إتنفس فــــــوح تتنفــــس ناس و رياض و بحار
ما ألذ نسيم وصلك ما رأيت يا جميل مثلك يا بليل الســـوح هو هذا هــــــواك ام هوى الاسحار
إنت روضه و ليك زهره وله كوكب و ليك بهره ضمخوك للجــــبير زعفران و عــــــبير إنت نار فى بهار
صبغ الخدين حمره بعد ساعه بشوف صفره الاصفرار ده كتير أخجلوك يا أمــــير وله نمت نهار
صبح البستان شايل شجر الرمان مايل السلاف فى الدنان والكنار فى حنان و الََهَزَار فى هِِزار
إنت كالطاووس خائل كبرياءك و فيك خايل(2) انزل إنت كمان غنِّ قول يا زمان وين حبيبى آذار
ما عرفنا عدوك ذاهل وله لسه غلام جاهل متهلك صــــــــيف شنا عندك كــــيف فى اللعب بالنار
فى لهيبك أشوف ساحل كالفراشه أجيك راحل أنا خايف كــــــيف يا لطيف الطـــــيف أهوى و أبقى فى نار
فلق الصباح نور لى نحور الغيد صـــور جمعن فى الدور من خدود و بــــــدور َصَََدََفه و ُمحََّّـــار
عزه شوفى الحوش نور بى نجوم الليل غوَّر با صباح النـــــور على العيون الحــور و الخديد الحــار
عزه قومى كفاك نومك و كفانا دلال يومك إنت يا الكبرتوك البنــــات فاتوك فى القطار الطــار
عزه شوفى شباب قومك سبقوك على كومك بت رجال ولــــدوك للقبيله هــدوك إنت عز و بطــار
الجمال فى كمال وصفك أدبك و جمال خِلفِك الضمير كالعــــــود و العيون الســـود فى البطانه كتار
منزلك عُنوان ُظرِفــك نوريه يصون إلفك زعلك يا أم خـــدود سوِّى ليه حـــدود و منه يا ستار
(1) قصيدة عن الوطن كما يراه خليل، اصله من جنان رضوان، و كل ربيع فصله، هذا هو حبه الاسمى والصفات الحسنات اللائى خلعهن على الموصوف تجل فى تقديرنا عن حبيبه أو عشيقه.
(2) خائل: من خيلاء و خايل لائق او مناسب.
* نقلت القصيدة من ديوان خليل فرح. تحقيق: على المك. دار جامعة الخرطوم للنشر. 1977. Thanks ustaz Magdi Galal ابناء و احفاد خليل فرح
Post: #4 Title: Re: العندو باقي التسجيل ده يفزعنا! Author: Adil Osman Date: 12-28-2006, 11:11 AM Parent: #3
Post: #7 Title: Re: العندو باقي التسجيل ده يفزعنا! Author: saadeldin abdelrahman Date: 12-28-2006, 08:08 PM Parent: #4
العزيز عادل
تسلم على التسجيل الجميل بصوت ابوداؤود و أنا استمع اليه مع اول ساعات الصباح هنا و كل سنة و انت طيب.
Post: #5 Title: Re: العندو باقي التسجيل ده يفزعنا! Author: Haytham Abdulaziz Date: 12-28-2006, 12:34 PM Parent: #1
أبو السعود كيفك:
تعرف يا معلم الغُنية دي لو إنت إستمعت ليهـا بصوت الراحل عبدالعزيز العميري .. قطع شك سوف تسيل مشاعرك جداول ... و إن شاءالله حبيبو لؤي شمت تكون عندو عشان تسمع و تستمتع ... بس الأيام دي أنا عارفو مشغول شديد .. لكن لو شاف البوست دة أكيد ما بقصر ... هانـذا اكتب لك الكلمات بورود الصباح... إلى أن نستمع لها بصوت العميري...
فلق الصباح قول لي أهو نورك لاح خلي يا خفيف الروح هو هذا نــــداك ام ندى الازهار..! من جنان رضوان أصلك لذا كل ربيع فصلك يتنفس فــــــوح تتنفــــس ناس ورياض وبحار ما ألذ نسيم وصلك ما رأيت يا جميل مثلك يا بليل الســـوح هو هذا هــــــواك ام هوى الاسحار إنت روضه و ليك زهره ولا كوكب و ليك بهره ضمخوك للجــــبير زعفران و عــــــبير إنت نار فى بهار صبغ الخدين حمرة بعد ساعه بشوف صفرة الاصفرار ده كتير أخجلوك يا أمــــير ولا نمت نهار صبح البستان شايل شجر الرمان مايل السلاف فى الدنان والكنار فى حنان و الََهَزَار فى إزار إنت كالطاووس خائل كبرياءك و فيك خايل انزل إنت كمان غنِّ قول يا زمان وين حبيبى آذار ما عرفنا عدوك ذاهل ولا لسه غلام جاهل متهلك صــــــــيف شتا عندك كــــيف فى اللعب بالنار فى لهيبك أشوف ساحل كالفراشه أجيك راحل أنا خايف كــــــيف يا لطيف الطـــــيف أهوى و أبقى فى نار فلق الصباح نوّر لى نحور الغيد صـــوّر تجمعن فى الدُور من خدود و بــــــدور َصَََدََفات و ُمحََّّـــار عزه شوفى الحوش نوّر بى نجوم الليل غوَّّر با صباح النـــــور على العيون الحــور والخديد الحــار عزه قومى كفاك نومك و كفانا دلال يومك إنت يا الكبرتوك البنــــات فاتوك فى القطار الطــار عزه شوفى شباب قومك سبقوك على كومك بت رجال ولــــدوك للقبيله هــدوك إنت عز و بطــار الجمال فى كمال وصفك أدبك وكمال لُطفك الضمير كالعــــــود والعيون الســـود فى البطانه كتار منزلك عُنوان ُظرِفــك نوريه يصون إلفك زعلك يا أم خـــدود سوِّى ليه حـــدود و منه يا ستار فكـن بخير يا عزيزي.... هيثـم القـوز....
Post: #10 Title: Re: العندو باقي التسجيل ده يفزعنا! Author: saadeldin abdelrahman Date: 12-28-2006, 09:40 PM Parent: #5
هيثم القوز الحبوب
عساك والأولاد طيبين....
العميـري! زهرة شباب البلد "الظالم سلاطينها" حكر الغنية دي في جوانا بدندنة العود الوناس الذي كان يصاحبه.. عندي التسجيل لكن خليته مع اهلي. يا هيثم ما بتصدق! فكرة البوست ده اصلا "تسول" طبعا لكن و أنا راجع اليوم على البيت كانت الفكرة دي تجول بالخاطر.. كنت بقول والله بعد العميري و حنان النيل.. نانسي دي ضاقت عليها فرصة التحليق بالغنية دي ( حيث أني لم استمع لها كاملة) اها جيت لقيت النشامى منزلين لأبوداؤود و الكاشف (مرة واحدة) اها فرصتها كدا بقت كم.. بجيك راجع لأنو حندخل في مقارنات اداء في حتة ضيقة جدا.. ده غير (روح الغنية)
Post: #13 Title: Re: العندو باقي التسجيل ده يفزعنا! Author: Haytham Abdulaziz Date: 12-30-2006, 10:15 AM Parent: #10
سعـد كل سنة و إنت طيب و عيدكـم مبـارك....
أنـا غايتو لامن أسمـع الغُنية دي عندي الراحل العميــري و بكل صراحة و مع إحترامي لبقية الأصوات سوى كان نانسي أو الراحل الكاشف ... فعند العميري عندها صدى رهيب و وقع خاص في النفس ... كدي إنت خش مع لؤي في شغل عملي زي ما قال ليك ... و خلي يجيبا لينا بصوت العميري و بعداك ممكن يكون في رأي آخــر.... حتى جديد اللقاء كـن بخيـر....
هيثـــم القوز....
Post: #16 Title: Re: العندو باقي التسجيل ده يفزعنا! Author: saadeldin abdelrahman Date: 01-01-2007, 11:21 PM Parent: #13
يا هيثم
تتبارك ايامك
Quote: إنت خش مع لؤي في شغل عملي زي ما قال ليك
كدي قح الـ Sharing
لؤي دا قال (عمليين) و تدفعوا كم.
Post: #6 Title: Re: العندو باقي التسجيل ده يفزعنا! Author: Moawia Mohammed Date: 12-28-2006, 12:51 PM Parent: #1
Post: #11 Title: Re: العندو باقي التسجيل ده يفزعنا! Author: saadeldin abdelrahman Date: 12-29-2006, 08:19 PM Parent: #6
الاخ الحبيب / معاوية كل سنة و انت طيب و القابلة على امانيكم..
-------
هههه قلت لي اخونا " السعران" داك كان اشتغل لي في تاكسي بجيب كثافتو? اخوي في التلفون قال لي الزول ده بالغ ههههه تسلم على التسجيل بصوت العملاق الكاشف رحمه الله و اول مرة اسمعا بالايقاع السريع ده. يا اخوانا في زول متذكر التسجيل بتاع "صباح الخير يا وطني" داك كان بي منو هو قطع شك فنان/ ين حقيبة. تحياتي
Post: #8 Title: Re: العندو باقي التسجيل ده يفزعنا! Author: لؤى Date: 12-28-2006, 08:28 PM Parent: #1
أبو السّعود أسمعني
خلّينا عمليّين وقول لي
تدفع كم ؟؟؟
Post: #9 Title: Re: العندو باقي التسجيل ده يفزعنا! Author: saadeldin abdelrahman Date: 12-28-2006, 08:54 PM Parent: #8
ابو اللول
كل سنة و انت طيب
Quote: خلّينا عمليّين وقول لي
تدفع كم ؟؟؟
انت تأمر!.. لكن عارفك حتنط بعدين فأحسن ليك قايط.
Post: #12 Title: Re: العندو باقي التسجيل ده يفزعنا! Author: saadeldin abdelrahman Date: 12-30-2006, 04:11 AM Parent: #9
انتو يا اخوانا " ابوالشهيق" ده بقى مكلف قدر دا ما ادونا خبر والله! كان شربنا موية و خلاص
Post: #14 Title: Re: العندو باقي التسجيل ده يفزعنا! Author: حسن الطيب يس Date: 12-30-2006, 09:08 PM Parent: #8
لؤي إنت سجل و الحساب ولد كلنا في الإنتظار
Post: #15 Title: Re: العندو باقي التسجيل ده يفزعنا! Author: saadeldin abdelrahman Date: 12-31-2006, 12:26 PM Parent: #14
كل سنة وانت طيب يا حسن و الجميع بخير و ربنا يحقق الاماني ابواللول قلت ليهو ابو الشهيق قال لي تدفع كم حقو الواحد يديهو دولارين و يقول ليهو جننتونا اي حاجة Sharing sharing ! ههههههه
Post: #17 Title: Re: العندو باقي التسجيل ده يفزعنا! Author: saadeldin abdelrahman Date: 01-03-2007, 04:15 AM Parent: #1
فى لهيبك .. هـكذا كان يقتحمها الراحل عميري!
لا ادري إن كانت نانسي قد استبدلتها بـ (في ربيعك) مثلما ابدلت الراحلة ليلى المغربي نطق (الحضن الملاذ) بكسر الحاء بدلا عن الضم في قصيدة الاستاذ صلاح حاج سعيد (عدى فات) أم أن نانسي أخطأت و خلطت بين هذا المقطع و ذاك الذي فيه (لذا كل ربيع فصلك) .. أميل الى أنها تعمدت.
Post: #18 Title: Re: العندو باقي التسجيل ده يفزعنا! Author: saadeldin abdelrahman Date: 01-07-2007, 09:05 PM Parent: #1
لعناية الاحباب/
ودعقيد و رجل الاعمال/ لؤي
الى حين.
Post: #19 Title: Re: العندو باقي التسجيل ده يفزعنا! Author: saadeldin abdelrahman Date: 01-16-2007, 01:08 AM Parent: #18
زمان قالوا الناس لما تسمع كلمة فزع ولا مروة دي الحلة كلها تجي بي فوق الحيطة!
هيـــــــــــــع
Post: #20 Title: Re: العندو باقي التسجيل ده يفزعنا! Author: saadeldin abdelrahman Date: 01-27-2007, 11:17 PM Parent: #1
قنعنا من "فزع" غايتو!
نسمع غناء الشباب ديل البيذكر لمات الكنبة الاخيرة.
Post: #21 Title: Re: العندو باقي التسجيل ده يفزعنا! Author: saadeldin abdelrahman Date: 03-09-2007, 02:03 PM Parent: #1
تحية لخليل فرح و لعلى عبداللطيف و عازة و نانسي عجاج و الحلوين.
