Post: #1
Title: عبارة بتورّط الإنسان
Author: Nasruddin Al Basheer
Date: 12-26-2006, 01:45 PM
دايرة أشوف جديدك قبل ما أموت..
|
Post: #2
Title: Re: عبارة بتورّط الإنسان
Author: Nasruddin Al Basheer
Date: 12-26-2006, 01:52 PM
Parent: #1
إذا استجبت لهذه العبارة قبل ما تصلح ورقك حاتلقى نفسك عرّجت
وإذا عرجت ما أظن تفتح على سهولة، اللهم إلا تجر ليك جوكرين.
والخطوبة يا جماعة بتشبه النزول، مرات بتصلح الورق ومرات بتخلي
ليك ورقك (حمير حلبة) زي ما بقول حبيبنا مجنون الويست.
العرس سمح ما في شك لكن بنصح الناس يتخذوا هذا القرار بعد قراءة
صحيحة للأحداث من جميع الجوانب.
يعني ممكن تأجل عرسك أو خطوبتك لأسباب سياسية مثلاً..
أنا أمي الله يطول عمرها ما قالت لي العبارة دي ما عارف ليه؟
ربما تكون عاوزة تحتفظ بي كورقة ضغط على البنات..
وطبعاً ما سألتها.. ومسألة إني أبقى بايركس ما كانت شاغلاني كتير..
وأنا ذاتي ما عارف الخلاني أكتب البوست ده شنو خاصة والعيد على الأبواب
والله العظيم الواحد مرات كده بدخل في ورطات عجيبة خالص
زي ورطة العرس وكتابة مثل هذا البوست.
والناس كمان برضها ما بتريّح،
إذا ما خطبت يقول ليك شنو يا اخ ما لقيت سعيدة الحظ لسه؟
وهم طبعاً بكونوا قاصدين تعيسة الحظ..
وإذا خطبت يقولوا ليك العرس متين..
وإذا عرست يقولوا ليك ما بقيتوا تلاتة؟
يعني مواضيع خاصة جداً بيتدخلوا فيها ليه أنا ما عارف!
تجيب ولد واحد ينجهوك إنتو ولدكم ده ما كبر ما تشوفوا غيرو
وإذا ولدتوا أولاد كتيرين يقولوا ليك
(الله يغطي عليك، الولادة الكتيرة دي بتقصّر العمر)..
أها يا جماعة الناس تعمل شنو عشان ترضي الناس؟..
أكذب ما كتب عن العرس والحب:
حبيبي تعال تعال نتلم
ما دام الريد اختلط بالدم..
حبيبي المنقة والتفاح
حبيبي عسل والناس مساخ..
لكن بعد تجي وتعرس تتحول إنت المنقة والتفاح إلى دوم وقنقليز
وتبقى في نظر المغني إنسان مسيخ..
أمس ما كنتوا بتغنوا حبيبي المنقة والتفاح
الليلة الجدّ شنو.. ناس بتبدل مواقفها بشكل عجيب..
الإنسان لما يكون دمو تقيل بيكون مرتاح في نفسو
ومتعب الآخرين عشان كده الناس الدمهم تقيل بيفكروا صاح..
أنا لما سمعت الأغنية دي شعرت بأنها فيها كذب كتير
والقافية ذاتها ما مستقيمة .. آآآح .. آآآخ..
وآآآخ ياخ من العرس ومن العيون..
سئل شيخ العزابة بسوق (الله شافك)
لماذا لم تتزوج حتى الآن؟
فأجاب بثقة يحسد عيها (والله نسيت)..
(سوق الله) شافك سوق خصص لبيع الأقاشي والتبش والعجور
ويقع في الميدان الواقع جنوب استاد مدني.
|
Post: #3
Title: Re: عبارة بتورّط الإنسان
Author: ALGARADABI
Date: 12-26-2006, 06:20 PM
Parent: #1
الحبيب نصرالدين
حاجتين عايز أقولم على عجل ( عجل حديد لأنو الماهية ما نزلت لسه):
1- أول حاجه طول الوقت ده وانا قايلك متزوج (أتاريك نص دين؟)
كمل النص التانى بالله عشان عايزين نشوف جديدك قبل علاء الدين يوقع للهلال!!!
2- بالله أتاريك حريف وست ونحنا ما عارفين؟؟
وقعتا معاى لأنو أحيانا بنحتار فى البربعا
|
Post: #4
Title: Re: عبارة بتورّط الإنسان
Author: Nasruddin Al Basheer
Date: 12-27-2006, 12:28 PM
Parent: #3
Quote: - أول حاجه طول الوقت ده وانا قايلك متزوج (أتاريك نص دين؟)
كمل النص التانى بالله عشان عايزين نشوف جديدك قبل علاء الدين يوقع للهلال!!!
2- بالله أتاريك حريف وست ونحنا ما عارفين؟؟
وقعتا معاى لأنو أحيانا بنحتار فى البربعا |
مرحب بيك يا عمر وعساك بخير
الظاهر يا اخوي الثنائية + طمبل مسحوا ليك الذاكرة
نسيت إنو ولدي كان معاي في إفطار رمضان؟
لكن تحريفك للاسم إلى (نص دين) عملية ذكية وبت لذين..
علاء الدين حايسجل للهلال والمعز للمريخ ولا عزاء للمفلسين
لو عندك أي لمة ويست قول ليك عوووك.
حركوا لينا العربي ده ياخ قبل ما ينسى الموضوع
|
|