ما متوقع أصلاً تحضر !!

ما متوقع أصلاً تحضر
عماد الماحي

ما متوقع أصلاً تحضر
وآخِر زول في الدّنيا بظنك
إنت وحاتك ترجِع ليّ
معليش يانور عينيّ
الظن الفيك الكاين ليّ
وبرضو وحاتك
ماني الزول الكان في ظنك
ممكن أبقى القبلو شويّة
وممكن بعدو وأفضل ليّ
بس المامتوقّع أصلاً
ياحلوة أسيب الجيّة
لو بإيديّ أخلي المامتوقع
طايع ليك
وأرجع مرّة وألف أجيك
شان ما أطالع كلّ الحب البان في فيك
شان ما أشاهد أحلى عيون وكتين كفِّي يغازل
جهراً بين كفيك
أنا ما أصلاً مشتاق ليك
وكتين نفسك يعبق صندل
بي نار الشوق المنِّك وفيك
أول البارح إتذكّرتك
أسألي روحك
أو عينيك
وإنت براك قبال ما أجيك
حلفتك الله ..
مش جاك الطيف الجد حابيك
والكل قال ليك
دا منو الحابيك ؟
**
أنا لسع مشتاق ليك
كمان البارح إتذكرتك
كنت بذاكر ومحتاج ليك
لا السطر لقيتو ...
لا الدّرس وعيتو ...
وبحلف ليك
أنا لسّع مشتاق ..
**
اللّيلة جيتك ضيفك
ونازل عندك
وحياة ريدك البان في إنسان عينك
وبُيضَة سنك
أحلى بنيّة الكل عارفنك
وكل الفيك يحندك
يا الردفك حاكى الخيل
كدي قومي أرويه النّيل
خصرك خاتم
شعرك فاحم
كرمك حاتم
وحلوة جميلة وإشرنكيل.