Post: #1
Title: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-22-2006, 10:48 AM
Parent: #0
يا أخونا الدنيا عيد كل ما تمشي تحول مبلغ تلقى الريال نازل - بالمفيد ا السبت الفات مشيت لقيتو الريال 539 - أمس 535 ؟ الحاصل شنو ؟ خلاص نحج جحة الوداع ، ونلحق باقي حقوقنا قبل ما يكون الريال ب 50 جنيه ؟؟ أها أخبار هناك شنو لحم وموية ولبن وكهرباء ودواء وتعليم وجبايات ومغتربين ووووووو مليون واو
بالله أدونا رأسنا يا عقلاء المنبر
الشفيع إبراهيم
|
Post: #2
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: ود الباوقة
Date: 12-22-2006, 01:11 PM
Parent: #1
يا أخونا الدنيا عيد كل ما تمشي تحول مبلغ تلقى الريال نازل - بالمفيد ا السبت الفات مشيت لقيتو الريال 539 - أمس 535 ؟ الحاصل شنو ؟ خلاص نحج جحة الوداع ، ونلحق باقي حقوقنا قبل ما يكون الريال ب 50 جنيه ؟؟ أها أخبار هناك شنو لحم وموية ولبن وكهرباء ودواء
اخي الكريم الشفيع نسال الله ان يجعله نزول خير وبركة ....
اما عن اخبار الداخل فاني مطمئن لقول الله تعالى ان بعد العسر يسرا . صدق الله العظيم ..
ود الباوقة
|
Post: #3
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-23-2006, 07:54 AM
Parent: #1
ود الباوقة
شكرا
لكن نحن يا خوي لا حيلة لنا في أمرنا ومافي حير تب في النزول متى سيأتي هذا الخير ونحن منتظرين سنين عددا ؟؟
يفرجها الله
|
Post: #4
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: almulaomar
Date: 12-23-2006, 08:45 AM
Parent: #1
أنا ما بعرف الريال والدولار لكين بفتكر إنو جنيهاتنا مكشوفه في السهلة وأنه ليس هناك تغطية لها عطفاً على قيمتها محلياً الواحد تلقي راتبه مليون جنيه في الشهر إتخيل والسوق مولع في السما والمليون دي زمان كانت رواتب كذا ألف شخص وفي الزمن العلينا ده بالكاد تكفي ليها أسرة من 4 أشخاص لمدة شهر بدون ملاريا أو مناسبة خاصة – والعملة الرسمية الدينار والناس بتتعامل بالجنيه وفي حتات كده تتطلب منك أن يكون معاك آله حاسبة عشان ما تدقس.
ونعم بالله إن مع العسر يسرا إن مع العسر يسرا ، ونحن طبعاً مهما بلغت درجة إيماننا بتهتز بفعل الصدمات والضربات المتلاحقة ، اللهم لا نسألك رد القضاء ولكن نسألك اللطف فيه. وزي ما قال الشاعر ضاقت ولما إستحكمت حلقاتها على الطلاق ضاقت زيادة والأخيرة تجسد واقع حالنا.
والشئ البشوفو يا أخوي الشفيع إنك بين نارين والرجعة ما تفتكر أبداً إنها ساهلة في ظل الظروف الحالية الناس سرقت وغنت وشبعت وحتى الفتات إتلحس وفي ناس لي هسع بتفكر تتخارج من البلد ولو عملت إستفتاء على المواطنين بشأن الهجرة والعيش خارج البلاد حا تلقي أكثر من ثلاثة أرباع الشعب إن لم يكن أكثر تفكر في التخارج من البلاد بعيداً عن مسألة الوطنية والقومية والكلمات الكبيرة دي لأنو الموضوع لمن يجي في مسألة الكسره بتتلخبط الصورة وبتبقي بي لون واحد فقط وحتى الجزء الباقي من الناس والذين يرغبون في العيش في السودان فهم ناس السلطة والمنتفعين والنفعيين وماسحي الجوخ وأصحاب الكروش المستديرة ومن لف لفهم. عشان كدي يا الشفيع فكر إنك بدل ترسل لي ناس البيت مصاريف شهرية تقوم ترسل ليهم جنريتر يبيعوهو في السوق ويكون مصاريف ستة شهور مثلا أو ترسل ليهم أجهزة موبايل يبيعوها برضو وتكون مصاريف كذا شهر وإذا الموضوع مشي معاك لي قدام بعدها تقدر ترسل أبواب خشب لي شقق الحرامية الكبار ومراوح سقف ومكيفات إسبيلت وعربات وأدعو لينا معاك ورسل لي تأشيرة زيارة ولا أقول ليك حا أعمل ليك مسكول كان قدرت جيت عمره بس خلي الحج اليعدي.
عيدكم مبارك
وخرفان تتعارك
وكل سنه وإنتو طيبين
وضفيرة كمونيتكم مترين
|
Post: #5
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-23-2006, 11:05 AM
Parent: #1
أخي الملا عمر
صدقت في كل ما ذكرت - لكن شغلانة نرسل بضائع ونبيعها ما عملية نحن مع قلة سفرنا للسودان تلاقي أصناف وأنواع من التعذيب والمساءلة ونحلف طلاق وحرام وقسم أنها مرسلة من فلان لزوجته فلانه وندفع عليها الجمرك وعليها لحسة (أصبع) - ماا بالك نرسل بضائع للبيع والتجارة ؟؟ راح يفتحوا لينا ملف ضريبي يعجز الشيطان عن طرقه
لك الشكر والتقدير
الشفيع
|
Post: #6
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: abuguta
Date: 12-23-2006, 11:43 AM
Parent: #5
الشفيع اخوى
والله الريال بقى زى ود الموية..واطئنك شديد..قبل 2007 دى تدخل.. بصفر على ال500
ولقد قلت للكلام لقريبى من ناس الثلاثينات غربة ..ويومها كان الريال ب 650 ..يازول الريال...ممكن ينزل ل 500 قال لى وقتها بمشى نهائى..اسى شكلو قعد نهائى..وما قاعد يسال الريال بكم..
لكن حتى الاسعار فى المملكة زادت..
لكن انت ما اطلعت على سعر الجنيه الجديد...
والله بقى حديد...تصور ان الجنيه ابو جبة وسرول
يساوى مرتين ابو صلعة الدولار, و 50 قرش من الريال ابو عقال
ها ها ها ها ..والله رجعتنا ياعمر لزمن الازهرى..
لكن الانقاذ دى قوية..مش جاءت عشان الريال ما يصل 25 ..اها اسى ب 50 بس
وحالتها محاربة اقتصاديا..عالميا وداخليا..
لكن انا بعزى سبب هبوط الريال لمشاكل دار فور..رايك شنو فى التحليل السياسى دا..
|
Post: #7
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-23-2006, 11:57 AM
Parent: #1
يا ابو قوته أخوي انت ولا أشهر سياسي تحليلك معقول - اها نمشي نزرع القطن في الحوشات بالمطر أحسن لينا من وجع القلب على الريال
مودتي
الشفيع
|
Post: #8
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: عبدالله علي عجبنا
Date: 12-23-2006, 12:18 PM
Parent: #7
الاخ الشفيع
تحياتي وبقول ليك كل عام وانتم بخير ،، ونتمنى ان ينزل سعر خروف الضحية كما نزل الريال .. الحقيقة التي لا خلاف حولها هي ان الريال نزل كثير وماشي نازل لسه ويمكن بعد ما الجنيه الجديد دا يطلع "بالمناسبة هو الجنيه الجديد ده حيكون بعمه و لا بدون" يكون وصل 450 او 400 كدا. و الحقيقة الثانية التي لا جدال حولها ايضا انه الاسعار لو مازادت ما نقصت وارد ليك بعض النماذج من الاسعار لأني انا قريب دا كنت في السودان:
علبة الحليب ليدو وليس نيدو الذي تنمو معه الاجيال 26000 جنيه يعني حوالى 50 ريال
كيلو اللحم الضاني 14000 جنيه "دا في المحلات العامة وليس السياحية" يعني حوالى 26 ريال بينما سعره في السعودية 25 ريال "اللحوم المبردة والمستوردة من السودان"
كيلو البطاطس والبامية 4000 جينه يعني حوالى 7 ريال
رطل السكر 1000 جنيه يعني حوالي 2 ريال، بينما الكيلو 2.25 رطل في السعودية ب 2 ريال
اسعار الاطباء:
تتراوح بين 50000 في شارع الدكاترة جنب مستشفى ام درمان الى 75000 في مستوصف ومركز "يستشفون" فأي شفاء هذا؟..
يعني باختصار كده هناك الحكاية بايظه جدا وهنابرضه بايظه .. خليها على الله
|
Post: #9
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: nazar hussien
Date: 12-23-2006, 04:50 PM
Parent: #8
والزول سعرو بي كم يا عجبنا؟
يعني
سعر العملة يرتفع مقابل الدولار
....ترتفع اسعار السلع
العملة تنخفض تختفي السلع...
يا ربي النظرية الاقتصادية دي لقوها وين؟
الحكاية شكلها جايطة جوطة والما غني هسي في مرحلة تبديل العملة دي ما بغنا
|
Post: #10
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-23-2006, 05:04 PM
Parent: #1
أخي ود عجبنا
والله كلامك يخوف ؟؟؟ ها الماشين ليهو شنو ؟؟ بس كمان نغطيها كيف من هنا ؟؟؟؟
وقول خروف الضحية رخيص يا ودعجبنا نشتريه لزوم التربية والدلع ؟؟ أها لو ذبحوه كبف (إنجضوه) ؟؟ ولو جاك إسهال ولا أي طاري اسعار الدكتارة دي البقدر عليها منو ؟؟؟ الله يسلط على الكان السبب
مودتي
الشفيع
|
Post: #11
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-23-2006, 05:07 PM
Parent: #1
أخي نزار
كيفين يكون الغنى في هذه المرحلة وعينك تشوف الفرق بين السعر القديم والجديد ؟؟؟؟ يا خوي الله يكون في عون شريحة العاملين بالخارج من نار الداخل -
لك مودتي
الشفيع
|
Post: #12
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: omergoda
Date: 12-23-2006, 08:40 PM
Parent: #1
التحيه للجميع
صدقو ام لا تصدقو حجاج السنه دى فى الخرطوم ما شغالين بالريال
|
Post: #13
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-24-2006, 08:32 AM
Parent: #1
أخي عمر
طيب الحجاج ديل جايين بالجنيه الجديد؟؟ لا يا عمر الحكومة باعت ليهم الريال بطريقتها ومعرفتها
لك شكري
الشفيع
|
Post: #14
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: عبدالله علي عجبنا
Date: 12-24-2006, 01:31 PM
Parent: #13
الاخ نزار والاخ الشفيع
العملة الصعبة نازلة شديد والاسعار مرتفعة أشد، سعر اللحم في الخرطوم زي سعر اللحم في جده (المستورد من السودان)، انا والله زيكم بسأل يا ربي النظريةالاقتصادية دي جنسها شنو، وانه نزول الريال ده لمصلحة مين، طبعا الشيء الأكيد انه جميع شرائح المغتربين تعاني منه لأنه زي ما بيقولوا ناس الاقتصاد أن دخل المغتربين الحقيقي انخفض بينما ظل دخلهم النقدي كما هو، ولربما انخفض هو أيضا لدى بعض الفئات، يعني بمعنى انه ال 1000 ريال التي كنت تحولها سابقاوكانت تعود عليك ب 650000 جنيه سوداني، الآن تعود عليك ب 534000 جنيه سوداني، وهو فرق مبرر لو أن الاسعار نزلت بنفس النسبة. باختصار الله يكون في عون المغتربين لو قعدوا في بلاد الاغتراب ووب ولو عادوا ووبين. غايتو شدو حيلكم..
|
Post: #15
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-24-2006, 04:26 PM
Parent: #1
أخي ودعجبنا
غايتو الله يكون في ( الجهاز) وديوان الوكاة يشدوا حيلهم وزي ما كنا شايلين ( التقيلة ) ردحا من الزمن ، كمان جاء دورهم ومنتظرين منهم الحلول الصادقة الجادة لمشكلة المغتربين
شئ لا يصدقه عاقل لكن حكم ال ........
لك تقديري
الشفيع
|
Post: #17
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: hanadi yousif
Date: 12-24-2006, 05:08 PM
Parent: #15
الاخ/الشفيع
الود والتحايا
ربنا يرد غربة كل السودانين الذين ضيعوا العمر من اجل حياة افضل للاسر
ولك التحية
|
Post: #16
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: أبو الحسين
Date: 12-24-2006, 05:07 PM
Parent: #1
| Quote: غايتو الله يكون في ( الجهاز) وديوان الوكاة يشدوا حيلهم وزي ما كنا شايلين ( التقيلة ) ردحا من الزمن ، كمان جاء دورهم ومنتظرين منهم الحلول الصادقة الجادة لمشكلة المغتربين |
ما خلاص عفوكم من الضرائب والزكاة تاني دايرين شنو؟؟؟
والله يا الشفيع أخوي أنا أعرف واحد هنا ليهو سنين غالبو ما يسافر أهلو عشان المعادلة بقت صعبة...
وهسع الجنيه لمن ينزل الريال يبقى بي 53 جنيه ونكوس طريق الرجعة ما نعرف بابو بي وين...
بس الدعوات الدعوات في العشر النواضر دي... ربنا يعدل الحال ويساوي الجنيه بالريال ويرخي الأسعار...
مودتي...
أبو الحســـــــــــين...
|
Post: #18
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-24-2006, 05:45 PM
Parent: #1
الأخت هنادي
ما حد حاسب للقديم
وهم منتظرين حيلة جديدة ليقضوا حتى على الباقي من حقوق المغتربين
مشكورة
الشفيع
|
Post: #19
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-24-2006, 05:50 PM
Parent: #1
أخي ابو الحسين
نعم ليتهم تركوا الضرائب ، وليت سعر الصرف كان مجديا يناسب ضرورات حياة كريمة للموجود بالداخل والخارج ، ما ممكن اشتري نصف كيلو سكر أو أقل من نصف الكيلو ب ما يعادل ريالين ونحن ننتج السكر ؟؟؟؟ بالله شوفوا
شكري
الشفيع
|
Post: #20
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: عبد المطلب خضر عبد المطلب
Date: 12-24-2006, 08:07 PM
Parent: #1
سلام يا الشفيع وبقية المتداخلين
وكل سنه وانتو طيبين
انا مع الملا عمر انو الجنيه مكشوف ..
وبتذكر انو _ رغم ادعائهم انو عندهم احتياطي مالي _ مره لما احتاجو في وزارة الماليه
لي مبلغ كبير اضطروا انهم يبيعوا اسهم ( الشعب ) الحكومه في سوداتل .. عشان يوفروا سيوله
محتاجنها.. واتذكر باعوها لي شركة عبدالرحيم حمدي بي سعر ما يحلم بيهو .. بدل ما كان يطرحوها
للشعب عامه عشان يشتريها..
ووزارة الماليه شغاله بي نظرية طاقية دا في راس دا ..
وبتحدد سعر صرف الجنيه بقرار اداري ولا يعكس حال الاقتصاد..
عشان كده تبدو المفارقه الغريبه بين تضخم الاسعار وزيادتها باستمرار داخل السودان
وبين العافيه الدبت في الجنيه..
بلاهي شوف الحكومه السعوديه عملت شنو لما جاها فايض بسبب الزياده في اسعار بيع البترول..
السنه الفاتت زادوا الرواتب
واسسوا بنك للتسليف ..
وانفقوا على المشروعات الصحيه والتعليميه
واول بشارات السنه الجايه دي خفضوا سعر البنزين لي 45 هلله..
أها نحنا حكومتنا الرشيده سوت شنو بالفائض الجاها من زياده اسعار بيع البترول
عن السعر الكان متوقع في الميزانيه
الفاجعه انها زادت اسعار السكر والبترول ؟؟!!
|
Post: #21
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Sabri Elshareef
Date: 12-25-2006, 05:13 PM
Parent: #1
الاخ الشفيع ابراهيم
سلامي للاسرة اينما حلت عليهم الاسفرة
الحيكومة لاعبه قمار مع لعيبة الداخل والخارج وهم شكار في خرت الاخرين
الامر يدل علي مزيد من الغربة ولعنه الدولة الدنيية اينما قامت
لانها اورثتنا الفقر والجهجهة والبهدلة وكل واحد خاتي ليهو اله حاسبه ويجمع ويطرح
واذا دخلت لموضوع الاراضي دي مسالة تانية
اما جهجة اطفال المنافي فهي الابلغ سوء لان التعليم عندك حدو حسن اقصد الثانوي
وبعد ذلك تاتي رحلة العودة كرها لان الاولاد والبنات رجعوا /ن للعلام بالداخل
لا تتحدث ان امور تسوء للجميع
العلاج والتعليم والغذاء والكساء ( الغريبة ان لا زال من يعشم في مزيد من التلتلة والبهدلة)
الوطن يقف علي حافة الانهيار ويشوبه جومشاب بالحذر
الوصع الاقتصادي يحتاج الي فكي اظنو وسلامي لمحمد المصطفي وكفي
|
Post: #22
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-26-2006, 10:14 AM
Parent: #1
أخي عبد المطلب
اصدقك القول فيما ذهبت ، وأذكرك أنو حكومتنا تقر بفائض العملة الأجنبية لتبرر خفض سعر صرف الدولار ، وتنكر العملة الأجنبية عندما واجهت عجز مالي وإنفاق شيطاني على الرواتب والمخصصات والاحتفالات والموتممرات وووو حاجات تاني معروفة لجأت للشعب وفرضت زيادة سعر السكر والمحروقات - أها في عاقل يقنعنا بأن الحكومة عندها فائض في العملة الصعبة ؟؟؟
لك التقدير
الشفيع
|
Post: #23
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-26-2006, 10:22 AM
Parent: #1
أخي صبري
لك السلام الحار والتقدير الكثير وشكرا على السؤال عنا ، وسلامك للأخ محمد وصل
وكلامك ده الحكومة الرشيدة فايت ( أضانها) لكن أضانها (طرشه) ونحن ندرك تماما ثمن إلغاء الضريبة على جزء من شريحة المغتربين هو خفض الريال والدولار سياسيا ، حكومتنا لا تعرف المنح والهبات تقربا وإبتهالا لله تعالى ، حكومتنا الرشيدة تأخذ أكثر واضعاف ما تمنح
فعلا عاوزين فكي كبير ،
مودتي
الشفيع
|
Post: #24
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: د.محمد حسن
Date: 12-26-2006, 10:49 AM
Parent: #23
الاخ الشفيع
هل هو فائض عملة؟
ام
غسيل عملة؟
الذي جهجه الجنيه والسوداني
جوة وبرة
مودتي
|
Post: #25
Title: Re: المغتربين حجة الوداع ولا عزاء للمماطلين : الريال باي باي ؟؟؟
Author: Alshafea Ibrahim
Date: 12-26-2006, 10:56 AM
Parent: #1
غسيل يا دكتور بالضبط
خليهم يشربوا موية كمان
مودتي
الشفيع
|
|