أصحي للون يا بكري أبوبكر

كل سنه والجميع بخير والسودان بخير
والله يا أخوانا أنا بفهم شويه في الفن ومسائل الألوان وأكيد في أكثر من فنان مبدع في هذا المنتدي الخلاني أقول الكلام ده هو نوعية الألوان التي يختارها الأخ بكري أبوبكر أو غيره لخلفية المنتدي يا بكري شيل من النيل شويه ومن رهيد البردي ومن مريدي ومن كسلا ومن جبل توتيل ومن الشلالات ولا بأس بصحراء العتمور ومن الباوقة ومن كردفان ومروي وجوبا في مليون لون ولون وشكل فأرحمنا من هذه الألوان الكئيبة على الأقل بمناسبة العام الميلادي الجديد.

Quote: تسلم يا ناذر وغالي والطلب رخيص لكين مع شديد الأسف آخر شريط كاسيت طرفي فيهو أغنية بتقول جلسن يا حلاتن ، الناعسات كاحلاتن وبعديها ما قدرت أفهم الباقي لأنو فنانين زمان ديل كانوا لو ما وقفوا لط ما بغنو.

هههههههههههههههههههههههههههه
الكوت دا شلتو من بوستك في المنتدى السابق وحوالت ارد عليهو وما قدرت
أها في النهاية قلت أكبو ليك هنا

لا تعليق لي على الألوان

بدر الدين الجميل
والله الأشواق ما ليها حد ، وكدي أنا برضي بي حكمك لأنك راجل فنان وحكاية لاتعليق دي ما بقبلها وهو كان ما علقت إنت البعلق منو قول رايك وأرفع صوتك وأنتخب ممثلكم ، ومين يتحدى الرمزو مخده.
كل سنة وإنت وإنتو كلكم أحلي وأجمل وربنا يحقق أمانيكم مش السنة الجاية على طول و on the spot دي جملة يا البدري سمعتها في فيلم غير مترجم وحارقاني شديد أها كبيتها ليك وإن شاء الله تكون جات في محلتها.

الملا عمر كيفك ..

بس شايف رايك مختلف عن راي عماد عبد الله !!

صدق لون المنتدى اصبح متل لون زينب
وزينب دى سفنجة لونها غامض كل ما البسها
بتعمل لى ورم فى اصبعى الكبير...هو انت يا بكرى
مالقيت ليك لون غير ده؟؟؟؟؟؟؟
هنالك عدة اعياد فى الطريق اجعل لون المنتدى فرايحى
افرحك الله دنيا واخرة

أخي وليد
كنت أظن إلى قبل إنقضاء العام 2006م أن لون زينب هذا هو لون حيران أو بمعني آخر مركب من عدة ألوان يعني مجهجه ، وكنت أحسب أيضاً وحساباتي دايماً غلط لتسللي في مرحلة الأساس من حصص الحساب ولأن الحساب يوم الحساب كنت فاكر إنو القمر بوبا هي ضرب من ضروب السفنجات لكن لم أكن أعرف ماذا يصنع صاحبنا بقزازة العصير بعد أن يكمل العصير فهل سوف يبيعها للتاجر عا قزاز عا شوالات عا صفايح أم له فيها مآرب أخرى.
ثم هل هي زينب أم زنوبه في كل الأحوال ما تلبسها عشان ما تورم ليك أصبعك بس لازم ترتاد المنبر مهما كانت النتائج. أكرر يا بكري فسر لي سبب إختيارك للون الحالي للمنتدي أو قل لي إسم اللون بس ما في خيارات

ناذر كل سنة وأنت وجميع أفراد الأسرة الكريمة بخير وعافية
فتشت لي رأي أخونا عماد عبد الله وفعلاً لقيتو مختلف تماماً عن ما ذكرته ومع تقديري لرأي الأخ عماد إلا أنني ما زلت متمسك بما قلته ، وهسع الألوان الفي خلفية صورتك دي رأيك فيها شنو مش كان بكري أبوبكر يسترشد بيها.
ويا ناذر كدي خليني من رأي عماد إنت رأيك شنو في ألوان المنتدى؟ ويا ريت برضو بكري يورينا ويوضح لينا تفسيره لإختيار هذه الألوان

بالغت يا ولي في دي :

Quote: وزينب دى سفنجة لونها غامض كل ما البسها بتعمل لى ورم فى اصبعى الكبير...

اما نحن يا الملا عمر وكعادتنا عندما نلاعب اي فريق يرتدي الأحمر فنردد :
أضرب اللون ..

ولا ادري حتى الان هل المقصود بها ان نضرب اللون ضرباً مبرحاً ما بعالجو البرهم
أم نضرب اللون كما يُضرب الضريب والذي هو الاخر لا اعرف له معنى واضح ..
والأقرب هو ان نضرب اللون بوهية فيتحول إلى لون اخر كالأزرق مثلاً ...

ويا المُلا أضرب اللون ..

Quote: ولا بأس بصحراء العتمور ومن الباوقة ومن كردفان ومروي وجوبا في مليون لون ولون وشكل فأرحمنا من هذه الألوان الكئيبة على الأقل بمناسبة العام الميلادي الجديد.

العزيز الملا عمر

الوان حاج بكري هي درجات من اللون التركيني <من تركين>
و بعض المشاركات بتكمل المشهد بأضافة الرائحة
فعليك بالليمون
لكن بالنسبة ليكم انتوا ناس الجزيرة و الصعيد و ناس
الغرب بتذكركم الالوان دي الويكاب؟

اهو برضو سودنة لعالم الانترنت