Post: #1
Title: اغنيات لفك الدبرسة
Author: عمر المهدى
Date: 01-23-2010, 01:42 PM
Parent: #0
تحايا وسلام
معظم الناس وخاصة ايام الدراسة
ماتعلق الواحد معاة غنيةلايستطيع
الفكاك منها وربما تستمر ليوم او ساعات
حسب الحالة وكثيرا مااصاب بهذه الحالة
لدرجة مااقول الله يفكني من هذه الاغنية
واحيانا ربما تكون اغنية غير حلوة
وقد سماها اخونا الزقازيقي عوض ابراهيم
عربي اغنية الدبرسة فلة التحية فهو موجود بالرياض
ولكن اخبارة مقطوعة طولت اتمني له الخير
وآخر اغنية معلقة معاي هي عشقتو من نظره
ولي فيها مقولة فعثمان الشفيع يرددسالت مين ياناس هذا المثالي
يردد ياناس ياناس ياناس فقلت ليهم الزول دة ماقال الروب عديل
فلكم نص رائعة ود القرشي
الفنان عثمان الشفيع
عشقتو من نظرة هو قلبو خالي
كيف الطريقا البيها يتم وصالي
ما أصلو ما ممكن يرد لي سؤالي
كأنوا ما شاعر كيف بشغل بالي
يمر علي كالطيف وتضوي اللآلي
العقل فار واحتار فيك يا غزالي
سألت مين ياناس هذا المثالي
اليانعة وجناتو والخصروا بالي
المحتشم ومهذب وطرفو حالي
هل حور أم أنسان أم شيء خيالي
وفضلت أترقب برقو الموالي
وأمتع النظرات في كل غالي
ياالرموش العكسن اعتدالي
ويا ناس أجيبوني عن سؤالي
عشقتو من نظرة هو قلبو خالي
كيف الطريقا البيها يتم وصالي
وقالو لي ده الملهم في نفسو عالي
وفارض علينا هواهو وهو سالي
ده المستحيل ينزل من العلالي
ده الموحي للشعراء الدرر الغوالي
عشقتو من نظرة هو قلبو خالي
كيف الطريقا البيها يتم وصالي
ولكن غرامي عفيف وأنا ما ببالي
وروني وين أهلو أكسب منالي
|
Post: #2
Title: Re: اغنيات لفك الدبرسة
Author: زهير الزناتي
Date: 01-23-2010, 01:51 PM
Parent: #1
عمر مهدي سلامات ....
زمان أيام الزقازيق .... كان المشاكل غربة وشجن وحنين ... يعني أغنية طاعمة زي ما بيقول الكوتش ممكن تفك الدبرسة ... اها عايزين إقتراحات لدبرسة السودان يفكوها بشنو .... بس ما تقول لي أم فتفت
|
Post: #3
Title: Re: اغنيات لفك الدبرسة
Author: الرشيد بابكر
Date: 01-23-2010, 03:09 PM
Parent: #2
ود المهدي يدك العافية...بوست رائع كعادتك..بس ما تمشي تزوغ تخليهو...
أنا عندي أغنيتين مكنكشات معاي من زمن طويل...الف و أدور و أجي راجع ليم..زي نقل فؤادك حيث شئت من الههوى ما الحب الا للحبيب الأول...
ذات صباح و أنا نايم في غرفتي و الباب مفتوح على صالة كبيرة بها تلفزيون و حوله عدد من الكراسي الجلوس...يبدو أن أفراد أسرتي استيقظوا باكرا و جلسوا بالصالة يشربون الشاي ويتابعون حلقة معادة لليلة الختامية للدورة المدرسية التي كانت بالدامر على ما أعتقد...كانت هنالك فتاة تشدو برائعة أبراهيم عوض و سيف الدين الدسوقي المصير...سبحت هذه الأغنية في الهواء و رفرفت فوق سريري و ربتت على مسامعي بلطف فصحيت و وجهت كلي جة التلفزيون من مكاني رغم اني لا أرى شيئا...و بقيت في مكاني مسمرا و كأني أسمع الأغنية لأول مرة...و منذ تلك اللحظة كنكشت تلك الأغنية في وجداني و حتى الساعة...
الأغنية الثانية هي أغنية الود لوردي...بقيت في احدى السنوات في الزقازيق بعد أن سافر معظم الأصدقاء..كنت مسافرا الى الكويت و في انتظار التأشيرة...وجدت شريطا قديما في الشقة...أدخلته في الجهاز فاذا به أغنية الود كاملة...بقيت أسمع فيها حتى سافرت الى الكويت و لكني لم أتركه خلفي...
ود المهدي...المصير و الود ملصقات جواي بسلسيون...و السلسيون ده لزوم اللصقة و الكيف...
|
Post: #4
Title: Re: اغنيات لفك الدبرسة
Author: عمر المهدى
Date: 01-23-2010, 03:41 PM
Parent: #3
العزيز زهير
تحياتي وتقديري
اظن السودان الكفة فية متعادلة
يعني الدبرسة ماتكنكش في الزول
فترة طويلةيعني شبكتها ماقوية
بتقطع بكثير من المباهج المتنوعة
رشيد القوم
رب قوم ذهبو الي قوم فلم يجدوهم خدو تاكس ورجعو
بفتش ليك في مربع كاي ليقتك جوة في الخاطر
طبعا بناديها من الاغاني الرائعة لوردي
وغناها في حفلة الزقازيق وبعد انتهت المقدمة الموسيقية
المايكرفون قطع وبرضو وردي مازعل
وقال نبدأ من الاول ولا نواصل لو تذكر
وطبعا بناديها اغنية الدبرسة بتاعة عوض عربي
بتطلعي انت من صوت طفلة وسط اللمة منسية
|
Post: #5
Title: Re: اغنيات لفك الدبرسة
Author: الرشيد بابكر
Date: 01-23-2010, 03:49 PM
Parent: #4
| Quote: بتطلعي انت من صوت طفلة وسط اللمة منسية |
ود المهدي...قصدك الحزن القديم
و الله الأغنية أمال النور غنتها بمصاحبة البيانو..حاجه ما تخلص...
سجلتها بالموبايل و قدر ما حاولت أنزلها ما قدرت...
شايفك يا أخوي بي غادي...و قلت عندما تكون آخر مداخلة في مربع كاي لعمر المهدي...
أحسن أخليها لفترة طويلة..دي دعاية مجانية يا حبيب للمربع امكن تجيب لينا ناس ما بيجونا...
|
Post: #6
Title: Re: اغنيات لفك الدبرسة
Author: عمر المهدى
Date: 01-23-2010, 04:04 PM
Parent: #5
يارشيد تحياتي
رغم انة انا بحفظ جميع اغاني وردي
لكن هي زي سلطة الفواكة يصعب احيانا
التفريق بين مذاقها وصدقت
وكمان العملية اظنها عايزة كركم شوية
تاني جبنالكم سيرة الكركم والزهايمر
فوتها ياخي
ولا الحزن القديم انت
ولا لون الفرح كنت
ولاالشوق المشيت بية
غلبني اقيف
ومابنت
|
Post: #7
Title: Re: اغنيات لفك الدبرسة
Author: محمد صديق
Date: 01-23-2010, 05:26 PM
Parent: #6
سلامات يا ناس
ودالمهدى....سلام
والسلام يغشى الرشيد والزيناتى
الغنا الطاعم ...شكلو حيكون حاضر
فى البوست ده...بس زى ما قال ليك
الرشيد انت خليك ملازم البوست مش
تعمل بنظرية غيب وتعال....
انا طماع فى الغنا ...اغنية واحدة
ما بتقدر تحوشنى ...بكنكش فى شريط
كامل...ويظل مدور معاى زمن..لحدى ما
اكنكش فى واحد غيرو...
ولايفوت على فطنة القارىء انو 90%
من الاشرطة دى لمراحيم.
|
Post: #8
Title: Re: اغنيات لفك الدبرسة
Author: عصام دهب
Date: 01-24-2010, 12:54 PM
Parent: #7
تحياتي يا عمر
و يا كل االناس الرايعين ..
و زي الواحد حيقوم يلقى ليهو سبب للتكسر و الركلسة هنا ..
بس أكرمونا بأي حاجة من أبو زي دة ..
ــــ
كيف الحياة غير ليمك
في بعدك اصبح حظي زي لون هضليمك
يا نعيم الدنيا
يا حليف الخدري التايه في نعيمك
ما دام هاجرني ارسل لي نسيمك
وانعش لي روحي بندي جسيمك
او طيب المسك الفايح من تبسيمك
يا اماني حياتي البيك نور اقليمك
يتمنى التبري يلمع كأديمك
مشتاقة الشمس تظفر بي ليمك
تاخد من نورك تلثم لي قديمك
يا فرع البانة المايل في خميلك
من قامتو حبيبي متعلم ميلك
يا البدر التم ما بتم تكميلك
لو ما تجعل لي محبوبي زميلك
سيوف الهندي من لحظة عينك
ليه بيها تصيبني ايه بيني وبينك
غير كوني بريدك وحياة خدينك
كف عني صدودك يا روحي وبينك
ليك حق في صدودك وتيهك وتذليلك
ليك حق تهجرني .. ويكتر تعليلك
ما دام فردي ... على جيلك
تمتاز بالعفة المانعني اجيلك
مع صدك وهجرك لا زلت اريدك
ومنام عيني بين حظوظ جيدك
تيه بي نعيمك مولاي يزيدك
ضيعت حياتي تسلم لي ايدك
|
Post: #9
Title: Re: اغنيات لفك الدبرسة
Author: عبد الدائم سيد أحمد
Date: 01-24-2010, 01:16 PM
Parent: #8
اغنيات لفك الدبرسة .... يا بنات المدرسة
يا عمر دخل يديك فى كم الجلابية وجيب معاك العجايز ديل وسكسكو
بالهنا والشفاء
اسمع بكره بغير ليك باغنية تانية ،،،، لكن دى لو عجبتكم براحتكم
تصدق الشريط دى محتفظ بيهو من زمن الزقازيق
والاغنية دى بتجيب سعد السمين انصاص الليالى يرقص فيها
لمن يعرق وتجيهو الكاروشة
وتحياتى لست بتول
|
Post: #10
Title: Re: اغنيات لفك الدبرسة
Author: مجتبي فاروق
Date: 01-24-2010, 01:21 PM
Parent: #8
بنرد عملى وكدا يعنى واحد من شباب الزمن دا باغنية من زمنا (يعنى اخوكم مخضرم فى الغناء) لكن برضو ما دفعة دهب ولا بكرى الشين
|
Post: #11
Title: Re: اغنيات لفك الدبرسة
Author: عمر المهدى
Date: 01-24-2010, 02:49 PM
Parent: #10
العزيز محمد صديق
قدر المستطاع نحن راجينكم
وكل واحد يجيب اغنية الدبرسة حقتو
ونتفرج ونسمع فمرحب بالجميع
عصام دهب
عبد الدائم
مجتبي
مرحب بيكم والبوست نور بيكم
وصدفة غريبة الاغنيتين كيف الحياة/لوموه اللاهي
لابوداود من شريط ماستر كان عندي في الزقازيق
وكنت مشغلة طوال تواجدي بالشقة لدرجة الواحد
كان بحس بانة لورثة ابوداؤود حق او نصيب في اي نجاح
يحققةالواحد في المحاسبة التي كان يعينني عليها ذلك الشريط
وياعبد الدائم اليوم كنت اكلم محي الدين يوسف وجبنا سيرتك بالخير
فلكم التحية مزيد من الرحيق والعبق الجميل
|
Post: #12
Title: Re: اغنيات لفك الدبرسة
Author: عمر المهدى
Date: 01-24-2010, 02:55 PM
Parent: #11
عبد الدايم تحياتي
ارجو ان تمدنا باغنيتك
المذكورة اعلاة اوبديل مناسب
لانها مااشتغلت معاي ماعارف السبب شنو
|
Post: #13
Title: Re: اغنيات لفك الدبرسة
Author: عبد الدائم سيد أحمد
Date: 01-25-2010, 07:49 AM
Parent: #12
يا عمر الاغنية شغالة ميه ميه
ولســتك النظام مظبوط
راجع نفسك ،،،،، لوووول
|
Post: #14
Title: Re: اغنيات لفك الدبرسة
Author: محمد صديق
Date: 01-25-2010, 08:33 AM
Parent: #13
سلامات يا ناس
عمر لك التحية...انا الا انزل ليك شريط
Quote: والاغنية دى بتجيب سعد السمين انصاص الليالى يرقص فيها
لمن يعرق وتجيهو الكاروشة
وتحياتى لست بتول |
النضيف ...الله يجازى محنك...
سعد بس...انت لو شفت شاويش بطولو داك لما يسمع
الاغنية دى يطوطو لامن يبقى زى لستك الامجاد.
|
Post: #15
Title: Re: اغنيات لفك الدبرسة
Author: جلال عثمان
Date: 01-25-2010, 09:57 AM
Parent: #14
ينصر دينك ياعمر ياخ
وبالمرة معاك كل المكنكشين هنا ديل
يلا سريع كده جيبوا لي "ربيع الدنيا" لعثمان حسين
والله معلقة معاي من زمن شقتنا الفي شارع الشهيد
وابتسامتك لما تأسر قلبي بتحكى
عن شئ كتير ياخ
يديكم العافية
|
Post: #16
Title: Re: اغنيات لفك الدبرسة
Author: أبوبكر حامد الأمين
Date: 01-25-2010, 01:35 PM
Parent: #15
يا سلام عليك يا عمر وعلى فلتاتك الأنيقة ، أنا حالى حال جورج أكنكش فى شريط أخليهو إشتغل زى شهر ونص فى مسجل العربية ، تانى محل إطفش ما بعرفو ، ياخى الغربة ولا العمر ما عارف نزّلوا بطارية الراس فأصبح يركن ركنة يطول أو يقصر مداها حسب الزهجة ، غايتو البوست ده نسميهو زهرة الأغانى .
يا نضيف بنات المدرسة دى بالغتَ فيها ، بالله قارن بينها وبين ناس راجل المرا ، شوف الناس زمان كانت بتغنى لى بنات المدرسة ولكل ما هو جميل ، البنات زمان غير متاحات كما اليوم لذا حين تشاهد بنات المدرسة او حافلة المدرسة نفسك إقوم ، هسى إسألنى الله ......... ولا بلاش.
|
Post: #17
Title: Re: اغنيات لفك الدبرسة
Author: منصور عبد الرازق
Date: 01-27-2010, 11:51 AM
Parent: #16
لله فى خلقه شئون يا بكرى
وبوست شديدالتوفيق يا عمر المهدى
المسافة ما بين الممكن والمتاح , وغير الممكن غير المتاح هى ما يشكل مقدار انحراف الأهزوجة عن معايير الغناء المنضبط
فنسمى اغنية ما انها اغنية منضبطة وملتزمة ومؤدبة
ونسمى اخرى بأنها هابطة بمعنى غير منضبطة وغير خاضعة لمقاييس النظام
يعنى فى الأول , زمااااااااان خالص
مجرد ذكر اسم فى حنايا الأغنية كان ةانفلاتا غير محمود العواقب
عازة فى هواك , خلوها السودان كلو , وعازة ست الأسم حقها راح فى مطالب الرمزية والأشارات الخفية
تفتح البنية الباب عشان تكشح ليها شوية موية , تتنجر فيها القصائد وكأنو الموية دى المفروض تتدفق براها
لمن الموية بقت تتصرف بالسايفونات , المغسة كتلت ناس عمك ابو صلاح وعبد الرحمن الريح
ياهو الوقت داك النفس كان (بيقوم بالجد جد ) يا بكور وعمر مهدى والمتداخلين
زيدان قال بنات المدرسة , باعتبار المدارس بقت تكنيك متقدم يشابه تكنيك دفيق الموية زمان
اجاركم الله , هسى لا موية بتدفق , ولابنات المدارس بقوا (يقوموا اى حاجة )
انتقلنا لى مرحلة راجل المرة حلو حلاة , فى تصريح مباشر ممعن فى المباشرة
موغل فى اخذ المزاضيع تصريحا بعد ما استنفذت كامل كامل محاولات التلميح
لستك النظام الذى تمنى زيدان ان يكونه , محتاج لمسابقة عشان تعرفه , وسيسقط فيه الثوريين كلهم او جلهم لأن (خيالهم المريض ) سينحوا بهم تجاه لساتك المظاهرات المحروقة
ولكن راجل المرة , وحلاة الزول فى الطول والعلا
قنابل تمشى على رجلين
فما بال نفسنا (يأبى ان يقوم )
ولا بلاش يا بكرى ؟؟؟؟؟!!!!!!
|
Post: #18
Title: Re: اغنيات لفك الدبرسة
Author: عمر المهدى
Date: 01-27-2010, 04:20 PM
Parent: #17
الحبايب كنا جايبين ربيع الدنيا
عشان خاطر جلال وعشانكم
نص وصوت وصوره لكن الوقت لم يسمح
ومسداري النظمتو فيك عارفة بريبنا
الا تقولي ودالمهدي زولنا حبيبنا(ودشوراني)
|
Post: #19
Title: Re: اغنيات لفك الدبرسة
Author: عمر المهدى
Date: 01-28-2010, 02:02 PM
Parent: #18
يا ربيع الدنيا في عينيا
يا نور قلبي يا معنى الجمال
يا اُختا روحي يا أماني هواي
عشت في دنيا الخيال
أنا فيك عشقته الروعة ما أحلاها في الدل والدلال
والمعاني الراسمة نور إشراقة
في عينيك ظلال
وابتسامتك لما تأسر قلبي تحكي عن المحال
تحكي عن شوقك إليا
تحكي عن بُعد الوصال
من قلبي من اجل المحبة وهبت ليك شعر الغزل
مع انو قدامي الطريق أنا عارفو يا السمحة انقفل
مافي قسمة
مافي يا نور قلبي حتى بصيص أمل
ما قدرت اقرب من ضراك
وما قدرت لي فراقك اصل
يا حبيبه ليه
ليه قلبك قسا وكتمتِ ما تُخفيهُ عني
أنا عشت في حبك مقيم
ما عرفت نُكران أو تجني
ما عرفت غير حُبك غرام
وسرحت فيهو سنين بغني
وهبته دمعاتي الغوالي
وهبته عمري أنا وهبت فني
منعا لتداخل الاصوات سحبنا بالمعزة
وابدلناكم نص ربيع الدنيا حسب توجيهات النضيف
|
Post: #20
Title: Re: اغنيات لفك الدبرسة
Author: عمر المهدى
Date: 01-28-2010, 03:14 PM
Parent: #19
كما وعدت بربيع الدنيا لكل الجدعان
بسال اللة ماتشوفو دبرسة
وان شاء الله تعلق معاكم
لانة امس انا علقت معاي مسامحك ياحبيبي
مهما قسيت علي قلبك عارفو ابيض وكلك حسن نية
وفوق البيعة لمحبي عثمان حسين نهديكم بالمعزة
|
Post: #21
Title: Re: اغنيات لفك الدبرسة
Author: جلال عثمان
Date: 01-28-2010, 11:47 PM
Parent: #20
شكرا ياعمر ياحبيب
ربيع الدنيا دي ياخ حاجة كدة والله
يديك الفي مرادك قول آمين
|
Post: #22
Title: Re: اغنيات لفك الدبرسة
Author: عمر المهدى
Date: 02-04-2010, 10:00 AM
Parent: #21
سكر السمار والخمار في حان الغرام
وانا الصاحي اري في النور اشباح الظلام
تحية لسمار ورفقاء الزقازيق
وعودا لابوداؤود اهديكم عذاري الحي
يا عذارى الحي
رفقاً بالحيارى
هل رأيتن حبيباً قد توارى يا عذارى
عليلٌ عليل
واهٍ من قلبي و ليلي الطويل
يا عذارى الحي قد راح الجميل
لم يقل حتى وداعاً في الرحيل
خبريني أي عرفيني أين سار يا عذارى
عابد الحب ديني و مراحي
صابر في الحب لم اشكو جراحي
يا تري المحبوب يدري عن براحي
لليالي الامس و اللهو المباح
أم تناسى يا عذارى
يا عذارى الحي
أين ليلاتتي
فقد مرت حيارى
عهد حبي و الاماني يا عذارى
ليلنا طهر بلا راح سكارى
بليالي الود و الود شعاره
فنساها و توارى يا عذارى
فرفقاً بالحيارى
هل رأيتن حبيباً قد توارى
يا عذارى
|
Post: #23
Title: Re: اغنيات لفك الدبرسة
Author: عمر المهدى
Date: 02-08-2010, 04:00 PM
Parent: #22
منذ ايام الصبي الاولي تعلقنا بصوت البلبل
الغريد صديق احمد واستمر هذا التعلق ومازال
عندما نتخم من الغناويالبدراوية نفكه بوجبة
بلدية طاعمة من بستان صديق الذي يجمع ثمار
ال جنان الشمال /حسن الدابي /عبدو/السرير
الشيخ ابراهيم ابنعوف اختار لكم من قصايدة
حكاية الشافعة
كيـفـن أصـبــر قلـيـبـى.. وكـيـفـن أعـمــل حـسـابـى
مـا دام عشمـى فـى نظـرة .. والعنـدو النظـرة مابـى
بجرو غنايا أحكى ليكم .. تعالو أسمعوا يـا صحابـى
حكايـة الشافعـى البريـدا .. وريــدا شقـايـا وعـذابـى
أحـن لهـا حـن القـمـارى .. تقوقيـبـا أوتــار ربـابـى
واهوى الهوى فى هواها .. وهواها قرايتـى وكتابـى
منـو الـقـال ليـكـم عقـلـتَّ .. وحاتـكـم جنـيـت دابــى
بقيـت لمـان ليهـا أفـارق .. أفـارق عقلـى وصـوابـى
أضيق لمتين ليها أرجع .. أخاف مايطول بى غيابى
أعاين زين فيها وأشبع وأزيد إعجاب على إعجابـى
أشـرِّق ويـن مـا أغـرِّب .. وأشيـل هـمـى وإكتئـابـى
محل ما أمشى ألاقى طيفاً.. مشتت فكـرى وحجابـى
تطير روحى بعيد تغـازل.. خـدودك زهـر الروابـى
تتعلـق بيـن عيـونـا .. ورمـوشـا الـبـى فـوقـا كـابـى
قليبـى يفـارق ضلوعـى .. يـلاهـى عليـهـا ويشـابـى
بعـيـد مابيـقـدر يـقـاوم.. بـريـق البـسـمـة السـحـابـى
صديـرن لمـا يتفـرَّ .. تبـق نــار الله فــى أعصـابـى
وقديلتن كيتن علـى .. وا نشـاف ريقـى وخـم ترابـى
حنينـى ومـرات بتقسـى .. تقـول فـى نفسهـا اتغـابـى
إتغابى العرفـة فيهـو .. وا زرف دمعـى ووا خرابـى
صحيح أصبحت مملوكا .. أسـوِّى أورادى وأزنابـى
متـل مـا ملكـت فـؤادى .. أنـا ملـك شيطـان الكتابـى
أخاف مـا بقـدر أعاتـب .. أقـول تزعـل مـن عتابـى
أموت أحسن من هى تزعل .. أو تزرف دمعة كابى
عشانا أنـا كـم ضُقْـتَّ مُـرَّة .. عشانـا مهمِّـل عقابـى
عرفت الله فى عذابك .. إنـتَّ خـاف الله فـى شبابـى
|
Post: #24
Title: Re: اغنيات لفك الدبرسة
Author: عمر المهدى
Date: 02-18-2010, 02:20 PM
Parent: #23
الجدعان تحياتي وسلامي
اهلنا بقولو قل المعروض جفا
اهديكم نص اغنية لابوداؤود علها تجد
وقعا في نفوسكم
همسات من ضمير الغيب تشجى مسمعى
وخيالات الأمانى رفرفت فى مضجعى
وأنا .. بين ظنوني .. وخيالي .. لا أعى
***
عربدت بى هاجسات الشوق إذ طال النوى
وتوالت ذكرياتى .. عطراتٍ ... بالهوى
كان لى فى عالم الماضي غرامٌ ... و أنطوى
كان لى بالأمس أحلام وشوق وحبيب
كان لي للجرح طبيب ... لا يدانيه طبيب
كان ... ما كان ... وبتنا كلنا ناء غريب
***
سكر السمّار ...و الخمّار فى حان الغرام
وأنا الصّاحى أرى فى النور أشباح الظلام
وغدت كأسى على راحى ... بقايا من حطام
***
عادنى الوجد إلى ليلي ... وكأسى المترع
وسعير الحب يشقينى... ويشقى مضجعى
ولهيب الشوق يدعونى فهل أنت معى؟
|
Post: #25
Title: Re: اغنيات لفك الدبرسة
Author: محمد صديق
Date: 02-18-2010, 10:12 PM
Parent: #24
سلامات يا ناس
الصدفة العجيبة والفرقة العجيلة
والقعدة اللذيذة فى تلك النجيلة
صدق ...يومنا ده كلو ابوداود!
|
Post: #26
Title: Re: اغنيات لفك الدبرسة
Author: عمر المهدى
Date: 02-25-2010, 01:42 PM
Parent: #25
اهداء للجدعان
وللحرمونا شوفتهم
اغنية امير العود
ا الحرموني منك
أنا يا حبيب قلبي سائل دوام عنك
يا الحرموني شوفتك ...
أنا في قلبي صورتك
كل ما جابوا سيرتك
تزداد بي شجوني ..
ويجفو النوم عيوني
ويزحم قلبي حبك
يا المنعوك زيارتي
هم شاعرين بحالتي
وجاهلين مكانتي
لكن التقاليد
حجبت عني شخصك
منعونا التلاقي
لكن رغم ذلك
ظل هوانا باقي
أسأل طيف خيالك
عن فرط اشتياقي
وأسأل نور جمالك
عن نار احتراقي
طبعا يا ملاكي
لو يرضيك هلاكي
أنا لا أعصى أمرك
منعوك و حيروني
أبوا ليك يذكروني
ليه يا حبيب أراهم
زايدين في جفاهم
من شدة قساهم
مانعين التفاهم
برضي أقول ...
عساهم يسمحوا لي بوصلك
|
Post: #27
Title: Re: اغنيات لفك الدبرسة
Author: عمر المهدى
Date: 03-08-2010, 01:55 PM
Parent: #26
فيضان 1946 المشهور الذي دمر المنازل والمزارع ولقد كان تأثيره كبيرا في منطقة العيلفون فصور لنا الشاعر احمد محمد الشيخ الجاغريو هذا الحدث
بقصيدته المشهورة فيضان النيل والتي سجلها للإذاعة الفنان خلف الله حمد كما تغنى الفنان مبارك حسن بركات و محمد الحسن قيقم
البحر السطيت غيرك ما في ذكره
كشفت العرائس العجوز والبكره
وهدمت القصور
********
الخولى * النشيط صار ما عنده فكره
وأصبح ساهي حاير وآلت عقله سكره
والأفكار تدور
ما هماك حالُن ما فيش ليك شكره
زملوا لى رحالن عرفوك ناوي مكره
خايضين للصدور
*********
ماكر جيتنا ساير ليلك كُله تسرى
دمرت البشاير * واتعوضنا حسره
وتيارك يفور
كلما تشوف زراعة عليها أخذت كسره
تنهض لصُراعه كاتل ليك مسره *
حُكمك كله جُور
********
تربالى * وزباينه يبكو العرق الشره
ربيت الغباين خورك ليه كَره
أصلك ما بتشور
ظُلمك جبته باين تهجم كِره كِره
تخلع للمباين * اتلقوك بره
زى يوم النشور
***********
الكـــــاســحــه * والمـــنــجـــــره
خافت من أمورك يا المنعت الدره*
ما بتدور أجُر
حايرين في جنايتك والأدهى وأمرّ
التيراب تلاشى وإنعدم بالمره
ما بنفع عُذر
**********
كسرت الطوارى البيك سوقها حرّه*
غفروا ليك سواري إنت قاصع الجرّه
محمر في الخدور
حليل شحن اللوارى من الشبكة ام غُره*
وأصوات البوارى * والخشب المغره
وميلان الحدور
*********
هددت الدواب لي درجة الدره*
حكمك ديكتاتورى في الكون كله شره
ما بحبسوك كجور
غايته بلغت غايتك بالإرادة الحره
وين يا نيل عنايتك مزارعيك فره
كايس للصبر
|
Post: #28
Title: Re: اغنيات لفك الدبرسة
Author: عمر هواري
Date: 03-08-2010, 10:15 PM
Parent: #27
فعلاً الأغنيات هي مفتاح لفك الدبرسة في كثير من الأحيان
ولابد أن يكون لأي واحد منًا أغنيةأو أغنيات لها وقع خاص في دواخله ..
حقيقي ياعمر المهدي موضوع جميل ..وبالذات أغنية ربيع الدنيا هذه كثيراً ماتم تقديمها في حفلات الزقازيق..
وعلى ماأذكر كان هناك طالب من القاهرة أسمه أسامة.. كان يتغني بأغاني الإستاذ عثمان حسين ومن ضمنها هذه
الأغنية الرائعة .. وحينها كان كل المستمعين يعيشون في حالة من النشوة والطرب الجميل ..
يالها من أغنية ويالها من أيام ..
وأذكر أيضاً أن بعض الأخوان من الزقازيق كانو يترنمون بأغاني الأستاذ مصطفى سيدأحمد خاصة العزيز سهيلى ..
.ثم أتت روائع الكابلي عبر الفنان المتألق كمال الشادي .. وجميعنا كنا نترنم بها في أوقات الدبرسة
وأيضاٍ أذكر أغنية أنا والأشواق للفنان محمد ميرغني والتي قدمها فناننا الشادي فصاح كل الحضور كأنما الأغنية قد ضربت وتراً حساسا
لديهم .. ثم أطلت علينا اغنية الذكريات وبعدها جأءت أغاني عقد الجلاد وغيرها الكثير والكثير من إبداعات عمالقة الفن السوداني ..
تمنياتي للجميع بأيام جميلة مليئة بالأغاني والموسيقى والذكريات الحلوة بعيداً عن الدبرسة..
|
Post: #29
Title: Re: اغنيات لفك الدبرسة
Author: عمر المهدى
Date: 03-09-2010, 07:19 AM
Parent: #28
الاخ عمر هواري تحياتي
شكرا للمرور
الوطن والحبيب عندما يجتمعان
تكون الخلطة عجيبة وخاصة نحن السودانيين
بنحب من بلدنا وما بره البلد
ياوطني يابلد احبابي
ومن اروع الاغنيات التي اترنم بها في حالة الشوق للوطن والحبايب
ياارض الحبيب للرائع مبارك المغربي واداها فنان المشوكشين الطيب عبدالله بروعة متناهية
هدية لاحباب الوطن وللوطن لترابة لشطئانة للدار الوريفة
يا أرض الحبيب .... كم لي فيك غرام
هابي علي طيب .... من ذكراك دوام
***
أطراك لو أبين ... كل صباح جديد
كم لي فيك شجون ... كل ما بقيت بعيد
حبك لي دين ..... قربك لي عيد
عاشقاك ما بخون.... غيرك ما بريد
وين زرق العيون .... للعينيه سود
***
كم لي فيك مراح ... يا أرض الحبيب
حنك لي لاح ... شفته قريب قريب
شفتو في نور الصباح.... شفتو في سر المغيب
شفتو و الغيد في الوشاح ... لاهية تلعب بالقلوب
شفتو في اللهو المباح .... شفتو في الشط الرحيب
****
يا مهد الجمال ... ما حبيت سواك
أيه بحر الشمال ... و انت النيل حداك
صافي يفيض زلال ... عندو جلس ملاك
في حسنه الهلال ... في سحرو الهلاك
شوقي اليكا طال ... قولي متين أراك
|
Post: #30
Title: Re: اغنيات لفك الدبرسة
Author: منصور عبد الرازق
Date: 03-09-2010, 11:09 AM
Parent: #29
والله بالغت عديل يا عمر المهدى
انت بتجيب حاجات من بيت الكلاوى ياخ
عجبتنى جدا الحرمونى منك
اما الجاغريو ده , فبحر ما بنقدر على عومو
الحرمونى منك دى بالذات , عبقريتها فى اللحن المتفرد
حسن عطية الذى لا يعجبنى صوته , ومع ذلك فان الأداء اللحنى المميز يوريك كم هو عبقرى ومختلف
تتصور , على الرغم من عدم حبى لصوت حسن عطية , الا ان بحته فى اللحن بتاع الأغنية دى بالذات , الحتة البين الكوبليهات واللى بتسبق كل مقطع لحنى
بتجننى عدييييل
اختيار موفق , مش يفك الدبرسة بس ,
ده بيعمل كمان , (حاجات تانية حاميانى )
سجل عندك يا عبد الدائم , الحرمونى منك موجودة فى البتاع ؟؟!!!!
|
Post: #31
Title: Re: اغنيات لفك الدبرسة
Author: محمد صديق
Date: 03-10-2010, 05:55 PM
Parent: #30
سلامات يا ناس
Quote: يا مهد الجمال ... ما حبيت سواك
أيه بحر الشمال ... و انت النيل حداك
صافي يفيض زلال ... عندو جلس ملاك
في حسنه الهلال ... في سحرو الهلاك
شوقي اليكا طال ... قولي متين أراك |
يا سلااااااااااااام عليك يا ود المهدى
آخر مرة سمعت الاغنية دى فى الثانوى...وكانت معلقة معاى تعليقة
عجيبة ....
شكرآ لك وانت تعيدنا الى الامس.
|
Post: #32
Title: Re: اغنيات لفك الدبرسة
Author: عمر المهدى
Date: 04-01-2010, 11:19 AM
Parent: #31
عازة الحبيبة والبلد وكل يغني علي عازته
للمشتاقين للبلد ناسه وترابة وحبيباتها
عازة الفراق بي طال تغني بها الكثيرين
وتعجبني عند اسماعيل حسب الدائم لانه يغنيها بشجن زائد
نص عازه
يا عازه الفراق بي طال
وسال سيل الدمع هطال
***************
طريت برق الفويطر الشال
وساح دمعي البكب وشال
كمل صبري ومنامي انشال
لبس من ناري عمه وشال
***************
أرض آمالي في امحال
ومن الهم بقيت في أوحال
وبعدك عزه ساء الحال
منامي وصبري أضحى محال
***************
حليل الناسا وناسا
طريت أم در حليل ناسا
وكيف أنساها وأتناسا
ومفتون بي ظبي كناسا
***************
ولع جوفي جمري الحي
وما بتطفيه آه وأحي
فيا زينة ربوع الحي
لي دياركم يعود الحي .
|
Post: #33
Title: Re: اغنيات لفك الدبرسة
Author: كمال الشادي
Date: 04-26-2010, 08:01 AM
Parent: #32
والله يا عمر
الايام دي قايمة بي غنية عجيبة جداً
قبل ده كنت حافظ منها بس بدايتها
وقررت اتمعن في كلماتها
وما أخفيك إحتجت شوية ترجمة على الشريط
لكن طلعت إنو الزول ا لاسمو مصطفي سيد احمد رحمة الله عليه
كان راجل ما ساهل
أكتر حتة في القصيدة يا عمر دقت في اوتار مشاعري كانت
الغابات جات تنشد منو
العربان راجين جياتو
اديناهو علقو وعرقو
وصورتو يقلب في كتباتو
اخليك مع النص الكامل للاغنية
مع العلم إنو في حتات كثيرة فيها مصطفي ما غناها
الاغنية طبعاً كلمات محمد الحسن حميد
--------------------------------------
Quote: شوك الشّوق .. لي الشّوفه آ خي
ضارب في إطن النسج الحي
يا مُنقاشو أحزاني إنشرّت ..
وادي الفرح إتمدّدْ صيْ
يا راحلين عِنْ دُغُش اللّيل ..
ما لاقيتو جناياً زي
تكية نخل الفجر الجاسر ..
فوق لي المترة عراجين ضيْ
يا رعّاوة العرب الرُّحّل ..
ما لاقاكم في المطراني
في كاويق الجرف الأمحلْ
بين أسراب الرهو الرّاحل ..
ساند أكتاف اللّيل الميّلْ
عِنْ ساساق الغيمة عليكم
بين رقراق الخيمة معاكم ..
ما أديتوهو شوي بي حَرْجَلْ
آ رطانة الليلهم ليّلْ
ما لاقاكم في ونساتكم
بين الشّادي وبين كاساتكم
في صلواتكم ..
عِنْ دعواتكم
أو دقساتكم
عِزْ خلواتكم
زول زول الله إن ِمحِن آ بسألْ
الهبّاد لي غُلْب اخواتو
الفرّاح عوّان الحلِّي
الفدّار لي الليل ظلماتو
آ نجمات شِقّيشْ قولِنلِّي
ما لاقاك طالع مندَلِّي
المطعوم من طيبة أمّاتو
كالفَجّاج الندّ نباتو
موج البحر الأحمر هوجتو
وعِرْق العَرَق اللاّوي ثباتو
جانا الشُّدَر الأخضر منو
ونار الشُّدر الأخضر جاتو
راح شقيش أب قولاً واحدْ
ليش ما يرجع من غُرباتو
طوّل .. طول ما طلّ علينا
وقاطع مننا جواباتو
الغابات جات تنشد منّو
العُربان راجين جيّاتو
أديناهم عَلَقو وعَرَقُو
وصورتو يقلِّب في كتباتو
ضُل رشّاشُو ..
ركيزة زولو
ساعات سِلْمو ويوم حوباتو
سِنْ طوريتو ..
ولون أبرولو
وحِسْ طمبورو البي نغماتو
لهلب عشق النّاس الفُقَرا
وبرّد جوفِن ..
بغنواتو .. الدّخَلت فينا ..
تمرق جينا على جلاّتو
وجيداً جينا ..
طلقنا وشينا ..
ووش أطفالنا الليلة حلاتو
غني معانا غُنانا هويتو
غني العالم غني حياتو
لا ساومنا عليها قضيتو
ولا فكّينا من إيدنا وصاتو
ألف شليل يا نورا يفوتو
شان ما يجيكي شليلك ذاتو
ولما يجيكي .. شليلك ذاتو |
|
Post: #34
Title: Re: اغنيات لفك الدبرسة
Author: عمر المهدى
Date: 04-26-2010, 04:31 PM
Parent: #33
يا شادي
بي زيارتك بيتنا نور وكله زينة
مشكور علي الاغنية الرائعة
هذا حميد متنبئ هذا الزمان
المتنبئ لجودة شعره والمتنبئ
الذي صحت نبوءته في خزان الحماداب
سد مروي
هَرَدْتَ لهاتي بالغنوات ...
وقُتْ يبُردْ حَشَاك يا امِّي
ومن التّعب البلا صَالِحْ ..
تفيقي ..
تروقي ...
تنجمِّي
تسوِّي مكانسِكْ المطرة ..
تضوِّي البيت وتنحَمِّي
تمرقي صبوحة للجيران ...
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك ...
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب ...
تميد بالخُضرة منقسمي
ولا غابار .. ولا هو سحاب ..
وتنهجمي .. من الدّهشة
وتحاحيهُن ...
غناكُن نيي ...
غناكنُ نيي ..
غُنا الوهْمي
ويهتفوا زي كلاب الحي ..
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة .. بقت تشرب من الحامدابْ
تشربي عافيي من إيديّ ...
تدوِّي اليوية بي حِشْمي
تسوّي السّي .. وتبتسمي
تشوفي رهاب بُعُد نجمي
واشوفو قريب قُرُب نَضْمِي
اشوف العالم التِّحْتَاني ..
هيلا هوب وقف ناهِضْ
ودكّ عمايد الفوقاني ...
جوه الُّجب رَمى العارضْ
وفي السّابو الدّمَار أفراق
عريق الحب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي ..
وارْمُلا من عصب عشّاق ..
أنُطْ تُلُّبْ واجيك عارِضْ
واجُرْ نمَيِّ
أدودي لهاتي بالغنوات ...
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ ..
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا انحزْمي ..
هيا انخلْقي ..
هيا انعتْقي ..
متين مو دايرة ري تسْقِي
ولا في إيد النّزيف نبقَى ...
ولا في إيد الخريف تبقِي
ولا الفيضان يبدِّع بِكْ ....
ولا في القيفة تنهدْمِي
ولا انْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي
فيا حزن البلد عوك كَرْ
ويا سعد الولد
ضَرْ ضَرْ ...
مع النّسْمِي
و ألِوْ .. قيمة العَمَل عِمِّي ..
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ ..
دَويها عَلَيْ ..
اذا ما اخر العلاج الكَيْ ...
مراويدِكْ حُمُر صَمِّي
مراويدِكْ حُمُر يا امِّي
بليلتي ... ولا ضبايح طَيْ ؟؟؟
قليلتي ... ولا كُتُر سِمِّي ؟؟؟
وطني ... ولا مِلي بطني !!!!
سُكَاتي .. ولا الكلام النيّ !!!
|
Post: #35
Title: Re: اغنيات لفك الدبرسة
Author: كمال الشادي
Date: 04-26-2010, 06:01 PM
Parent: #34
يا عمر المهدي
يسلم لسانك
وتسلم إيدك يا أخي
جبت سيرة الكلام الحلو
هاك دي
المرة دي
القدال
---
يا محبوب هاك مني مكتوبي
صـدّاح الغُنـا المكتوم
ومدّاح الجمال والنور
كلمة حُـب فى قلب حبيبي
وقليب حبيبي من توبي
تشـوِّش جـوّه قلب النيل
مع اللهفة العلى ولدى
يا معشوقي ..
ليك من شوقى كل الشوق
فيا الخرطوم إذا نامت عليك عيون
تشوف الضلمة في الضحى
والنَهار مخنوق
ولو غنيت والغُـنا للسلام مخنوق
أعرفي إنك الزمن اللى جاي شـروق
وأعرفي إنك .. الزمن الحبيبوحنون
فيا الخرطوم ..
عيون الحق ما بتنوم
عيون الحق ما بتنوم
أعرفي إنك ..
الزمن اللى جاي شـروق
وأعرفي إنك ..
الزمن الحبيبوحنون
-----------------
وهاك دي
-----------------
شيخ تلب الشاعر القدال
----------
حزينة وجوفك دمدم حزين
حزنت وقلب الحازنك خلى
تعدى الحلم الشفتيهو قديم
وتملا حسارك قلبك ملى
وكل ما هبهب قاصدك نسيم
يلهب جلدك كضباً طلى
فطمت جناك وحضنك رحيم
وحنـّك تب ما صابو البلى
سمعت غناك وصوتك رخيم
شديد اوتارك زايد حلى
عرفت الغم الصارلك نديم
وشفت الكون بى شوفاً جلى
لقيت الكاتلك كافر زنيم
وانت وحيدك قلبك ولى
يا شيخ تلـّب انزل كبكب
وارمى الحترب فى الميضنة
فى الباردة تعب لى الحارة تسب
عجمان وعرب فى المضنة
البس خضرب وادخل قصرب
والحس واشرب فى الميضنة
دى الدنيا تهب شقيش ما تصب
القبلى حرب ..
لى سيدك حب لا تخش ضرب
لى يوسف جب فى الميضنة
دقنا وشنب درويشنا يسوق
تايوتا تكب فى الميضنة
يا شيخ تلب وين الزغلب
الكانو تلب
ديل صبحو غرب
ام اضحو جنب
فى الميضنة
انزل كبكب وارمى الحترب
فى الميضنة
كبس االهم على
والحال قبض يا سيد
غبنا فيا كج
وتادو جنبى معيد
مو جنا تجيب
سلسل جنازرو تقيد
بلا غيبوبة البلد
النصيحو مصيد
كنا تلاتة ...
ود النوق وديك وعتيد
قلنا نكمل الفرض
العلينا نشيـد
جينا عليكى يا المحبوبة
شوقنا يأيـد
بقينا ضهابة متل زولاً
ضرير وبليد
ود النوق مركوبو
العليهو يشفق
بقى يتباطأ
فى خبة مشيهو يلفق
ان جاهو العلوق
صيحة نفاقو تنفق
اصبح جدوا وكل
ما شافلو سلقة يصفق
- وديك الجن
رفيق همى وغنايا وفنى
سوا طريقو فى نخبة
وصبح متهنى
ما هماهو باسط مية
سكرة ينى
كل ما شافلو زفة
جديدة فوقة يغنى
- يا عتيد الرماد
نط الحيط بالزانة
تفضى الخانة
تلقى جنابو سيد الخانة
فارش دارو لى اسيادو
بيت كرخانة
غافل ضبحة الفجرى
وجرى السلخانة
يا حميد اقيف
شوف الخلوق محنانة
كفكف دمعتك
والعبرة فوت خنقانة
عسلك سال بحر
فوقو النحل ونانة
ياد ان طاق غرق
جازاك دباير دانة
-------------------
الليلة تب
ما قصرت معاك
----------------
فتك عافية
|
Post: #36
Title: Re: اغنيات لفك الدبرسة
Author: الرشيد بابكر
Date: 04-27-2010, 07:15 AM
Parent: #35
ود المهدي...جاييك و معاي حميد كمان في واحدة من روائعه ...سوقني معاك يا حمام و التي يغنيها الفنان المبدع محمد النصري...الأغنية جاهزة و لكني خفت أعمل لخبطة في البوست...ننزلها ليك بعد ما تنقلب الصفحة...
سوقنى معاك يا حمام
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
سوقني محل ماالمحنة
وأيادي تقطر سلام
سماحة الحياة فوق أهلنا
وبلادي تقرقر وئام
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام
فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
ولِيد مخلوق للقراية
خزين مدخور للجِسام
تتمر نيتو التخاية
إلاما مذهلل إلام
درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
بساط أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
فلاحة العالم تعمر
محبّة مودة ووئام
تشمِّر ساعد السلام
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام
|
Post: #37
Title: Re: اغنيات لفك الدبرسة
Author: كمال الشادي
Date: 04-27-2010, 07:25 AM
Parent: #36
الرشيد بابكر ده من زمااااااااااااان عهدي بيهو
بيحب الحمام
وشارع الحمام
والحتات الجنب شارع الحمام
والاكلات البتشبه الحمام
وصوت الحمام
ومشية الحمام
|
Post: #38
Title: Re: اغنيات لفك الدبرسة
Author: عمر المهدى
Date: 04-28-2010, 03:21 PM
Parent: #37
مرحبتين رشيد القوم
ومراحب بالشادي
حكمة اخذتها من الرشيد مرة عملت مداخلة
في كاي قل لي مارديت عليك عاوز اكبر قدر
من العرض قلت خلي الشادي يجيب الناس الحلوة
وماخاب ظني
نورة تحلم بي عوالم
زي رؤى الاطفال حوالم
مرحب بي حميد المبدع المدهش
رقيص الرتينة بت سالم في حنة علي الشاشوق
بنية لي سلم ولد عثمان
صلاة الزين وسموها الرتينة
امها بت علي الخمجان
خريف الرازةعزينه
كبار الحلة ابواتا
بكار الحلة اماتا
تمرق زينة
تبرق زينا
تمشي تحاكي وزينة
مرحب ايضا بالرائع القدال
ياقمرتنا هولب لب
يااللوز الفتق في الوادي هو لب لب
وزي مابقولو اهلنا قل المعروض جفا
نقدم لكم .. سافر --- الشاعر قاسم أبو زيد
سافــــــــــــــــــــــــر
مطارات الوداع ضجت قدامك ..
وراك بيضا
وسماك غنـّاى
مساحات الأسى الفى عيونّا
تتفجر مدينة وناى
بطاقات دعوة الرجعة ..
تساب عينين من الفرحة
دموع للحاضرين فجت
زغاريد غطت الدنيا
وعاد .. فرح الرجوع منية
صداك الريح .. ومتل السنبل الغناى
كتير بنعاتب الحاضر
ولا أسفاً على الماضى
صدق الرؤية من قلبك
.. بين الشوف وإنسانك
نغم فنان يعيش راضى
مداك إتعدى حد الشوف
دخلت على الشعر .. إنسان
وهواك .. إتختّ جوة الجوف
وإنتحر النهار .. هسـّة
نغنيك لى مدن .. شاخت
معاك أحلامى .. ما تنسى
تغنيك القرى الراحت
خلاص يا غربة .. ما ترسى
غنيناك .. وبنغنى
وبتحدى الزمن .. فنان
..
|
Post: #39
Title: Re: اغنيات لفك الدبرسة
Author: محمد صديق
Date: 04-28-2010, 03:53 PM
Parent: #38
سلامات يا ناس
كل الغنّايين ...سلام
يُسيطر على هذه الايام ...صالح الضى
يا طير يا ماشى لى اهلنا
ويا جميل يا حلو
وان قلت والله بيحبونى..
ادونا حاجة منو.
|
Post: #40
Title: Re: اغنيات لفك الدبرسة
Author: كمال الشادي
Date: 05-02-2010, 09:01 AM
Parent: #39
العزيز محمد صديق
| Quote: يُسيطر على هذه الايام ...صالح الضى |
| Quote: يُسيطر على هذه الايام ...صالح الضى |
اها يا أخوي السيطرة فكت والله لسه شابكا
انا شخصياً قلت اشاطرك الشغلانة
جبت كل غنا صالح الضي وبقيت اسمع فيهو من جديد
يا أخي الراجل ده رحمة الله عليه كان فنان صاحب حس عجيب
على فكرة اتذكرت حاجة حلوة يا محمد صديق
إذاعة وادي النيل لمن كنا في مصر
وصالح الضي إتوفى
عملت حلقة خاصة عنه
في إذاعة وادي النيل
غنيت فيها انا اربعة من أجمل اغانيهو بالعود
وكان التسجيل في ماسبيرو مبني الاذاعة والتلفزيون المصري
الله يرحم
كانت ايام
|
Post: #41
Title: Re: اغنيات لفك الدبرسة
Author: عمر المهدى
Date: 05-09-2010, 02:13 PM
Parent: #40
البلبل الغريد بادي محمد الطيب
طير الوِّدى
يا طير الودى نزَّاح تسابق الشـارده (1)
بتجوب الفضا وتثكـل ثكيل الفارده (2)
نيـاتكْ سُـلام ما حاره عينك بارده
ميـَّال للطبيعة والهبيبـه البــارده(3)
أنيس الرياض ما بتخفى عنك شارده
ويكيف غريدك ذى دمـوع الحارده
جفَّاك من حبايبك وما بتشبقك عارده
والنيل بيك تآنس والصحارى الجارده(4)
قول لى ما وراءك يا عصام بالواحده
عاطفتك كريمة وبالخبير ما جاحـده(5)
لا زال النخيل فى توتى مادى الشاحده(6)
وشمبات لسَّه ترفل فى نعيمه وجاحده
كنانة آمون مشغولة قايـده وشـايده(7)
من ولدانه بى تلك القصور الشـايده(
هديك الفلايك وديك (لوتس) و(عايده)(9)
وداك عاشق مدلل وديك حبيبه معانده
ناس الأم حُنان وان منى منعوا الرايده(10)
مـا حسوا لى أنا وما ظنوا فىَّ الفايده
زينتى وشينتى عاد إياها فوقن عايده
والأيام ظروف صايده وتكون ماصايده
|
Post: #42
Title: Re: اغنيات لفك الدبرسة
Author: عمر المهدى
Date: 05-13-2010, 09:16 AM
Parent: #41
كيف الحياة غير ليمك
في بعدك اصبح حظي زي لون هضليمك
يا نعيم الدنيا
سيد الحوش سعادة المستشار عصام دهب
قلنا حاتكون معانا وين انت ما بنت
ورو قلوبنا وين كنتو ياناس انتو
وين رحتو مابنتو
محمد حسنين
|
Post: #43
Title: Re: اغنيات لفك الدبرسة
Author: عمر المهدى
Date: 05-16-2010, 02:10 PM
Parent: #42
مساء الخير يا الأمير ..
يا الحبك شغل الضمير..
أي والله ..
غـيركـ ما لي سمير ..
باهي طلعة وما ليك نظير ..
الزهر في خديك نضير
طيف خيالك بقى لي سمير
بي حنانك أنا مستجير
عار الصيد منك عيون
وأهدت ليك البانة لون
مال ثمارك هدل الغصون
تقسى كيف الود يهون
إنت منظر يفرح رؤاك
إنت ديما الخير في خطاك
نشقى نحن وطالبين رضاك
تمسى بالخير ويسعد مساك
مساء الخييييير ..!!!
|
Post: #44
Title: Re: اغنيات لفك الدبرسة
Author: جلال عثمان
Date: 05-17-2010, 08:05 AM
Parent: #43
ود المهدي ...
عليك دينك عاين الكلام دا ... شئ عجيب ياخ
لوموهو اللاهي في الغرام بالله
قولو ليه الحب شي طبيعي إلهي
الغرام مابخير بين كبير وصغير
من زمان الحب امرو فينا يحير
ياجميل يانضير خلي هجرك غيّر
بكرة والله الحب بنلقي عمرو قصير
نادو لينا البنا يبني لينا الجنة
يبني طوبة حب ويرمي مونة محنة
بالكتاب والسنة يعقدو لينا اهلنا
انتصر ياحب نحنا نلنا املنا
سيرونا لنيلنا وسووا لينا عديلنا
فوق جناح الحب الملايكة تشيلنا
يوم تقلب خيلنا فوقا شبان جيلنا
والزغاريد حب خلي مافي مثيلنا
العاقبة لي حبانا وللبشاركو معانا
نحنا ناس الحب الله مابنسانا
نحنا صنا هوانا بشرف وامانة
ياجمال الحب وياجمال دنيانا
------
بالله ... بالله ... زول يجيبا لينا هنا ...
ناس الايبودات ... نكتوا المستخبي ...
|
Post: #45
Title: Re: اغنيات لفك الدبرسة
Author: محمد صديق
Date: 05-17-2010, 02:33 PM
Parent: #44
سلامات يا ناس
صالح الضى......
|
Post: #46
Title: Re: اغنيات لفك الدبرسة
Author: كمال الشادي
Date: 05-17-2010, 03:24 PM
Parent: #45
فترة طويلة من الوقت كنت أعتقد إنو ما إنكتب شيء في الغناء السوداني أجمل من المقطعين ديل
الاولاني :
تبقى سيرتك هي ا لكلام
وتبقى صورتك هي الرؤى الحلوة البعيشها
في صحوتي أو حتى في عز المنام
التاني :
أخاف شوق العمر كلو
يفاجئك يوم في عيني
|
Post: #47
Title: Re: اغنيات لفك الدبرسة
Author: عمر المهدى
Date: 05-17-2010, 03:26 PM
Parent: #45
شكرا ياطاعم علي قفلتنا ابوداؤود
واليك ياكوتش صالح الضي
|
Post: #48
Title: Re: اغنيات لفك الدبرسة
Author: عمر المهدى
Date: 05-26-2010, 01:39 PM
Parent: #47
حديثك شوقنا ليك قولنا اي كلام نسمعو
ولا قولنا مابتريدنا ويلا قولنا قومو ارجعو
اما مدبرسين شديد مابتفكها اغنية
او العكس اتمنى لكم دوام الافراح
|
Post: #49
Title: Re: اغنيات لفك الدبرسة
Author: محمد صديق
Date: 05-26-2010, 08:54 PM
Parent: #48
سلامات يا ناس
ود المهدى الغناى ...سلام وشوق
ما فى دبرسة زما فى اى شى يا زول
بس تعليقة صالح الضى لى هسة ما نزلت.
|
Post: #50
Title: Re: اغنيات لفك الدبرسة
Author: عمر المهدى
Date: 06-03-2010, 08:55 AM
Parent: #49
قسم بي محيك البدري
الشاعر / صالح عبدالسيد أبو صلاح
.......................
قسم بي محيك البدري
غرامك منه ضاق صدري
حبيبي بي العلي تدري
***
المَحَي نور ليلة القدر
نصب قوس حاجبه لي غدري
و معاك في داخل ألخدري
فؤادي المالكة من بدري
***
حياتي ونعمتي ويسري
رضيت لو يرضي بي أسري
وفرض يا دموعي تنتثري
إذا منه النسيم يسري
***
حمام الأيك والقمــري
يصيح ينبيك عن أمري
وبين عوا سلك السمري
روا يحي وفاكهتي وخمري
***
أراك وتوفي بي نذري
دموعي ألفي الوجـن تزري
حنانك ما عليك وزري
أنا قاسيت الهوى العذري
***
صحيح لجروحي لا تبري
هواك برضاي مـا جبري
وبسيمات فاهك ألتبري
يا جميل كم قللت صبري
|
Post: #51
Title: Re: اغنيات لفك الدبرسة
Author: محمد صديق
Date: 06-04-2010, 08:25 AM
Parent: #50
سلامات يا ناس
ودالمهدى الغنّاى ...سلام
شنو ياخوى قطعت كراعك مننا بى هناك
النّم خليتو ؟؟
Quote: حياتي ونعمتي ويسري
رضيت لو يرضي بي أسري
وفرض يا دموعي تنتثري
إذا منه النسيم يسري |
ابو البكا زاتو.
|
Post: #52
Title: Re: اغنيات لفك الدبرسة
Author: كمال الشادي
Date: 06-09-2010, 12:59 PM
Parent: #51
جديات العسين
جديات العسين قالن لى
احمى رهودنا عن اسد الشره
و امنع ضواري فهودنا
قالن لى لو تحفظ مواثيقنا و تراعى عهودنا
تتوسد غدائرنا و تنام فى نهودنا
اريل شم شروق
شراكى مانى الشابك
و شم نفسك يفوح
مسك العشارى الشابك
عشبة بان قسى المى فريك نقادة
ارضه البان قسى ديسها المهضلم قادها
يا خالق المسى بدله منام لرقاده
ياخالق الوجود انا قلبى كاتم سره
وما لقيت من يدرك المعنى بيه ابره
قصبة منصح الوادى المخدر دره
قعدت قلبى تطويه و كل ساعة تفره
|
Post: #53
Title: Re: اغنيات لفك الدبرسة
Author: Safa Fagiri
Date: 06-12-2010, 05:52 PM
Parent: #52
بوست رائع
ويجب أن يكون عاليا.
قادني إليه
"عشقتو من نظرة"
Greetings
to all
|
Post: #54
Title: Re: اغنيات لفك الدبرسة
Author: عمر المهدى
Date: 06-13-2010, 12:23 PM
Parent: #53
باسم ناس الزقازيق
وباسم اغنيات لفك الدبرسه
ترحيب حار بالقلم الفنان
الاخت صفاء فقيري
بي زيارتك بيتنا نور كلو زينه
|
Post: #56
Title: Re: اغنيات لفك الدبرسة
Author: عمر المهدى
Date: 06-17-2010, 09:32 AM
Parent: #55
سيد عبالعزيز
الكروان بادي محمد الطيب
نظره يالسمحه ام عجن
لو كان قليل تبرى الشجن
أعرف صفا الأيام أفيقن
أنظر جمال تلك الوجن
دولات صدودك ماوعن
ألامى وبى اتدرعن
أبكى واصيح متضرعاً
يا ناس دموع عينى ترعاً
أرحمونى مارضنى الظعن
أمالى جور لى قاطعن
أحشاي هديل أتقطعن
وبالفرقة نشابك طعن
يا منبع النور والفطن
يا الفقتى يعرب والرطن
فى جوفى من حبك قطن
يا جاهلة مليون ألف طن
كيف أسلى عينيك والوجن
يالبسمتك نور الدجن
جسمك حرير ناسجة العجن
ناضر وباللون انعجن
الضاوية زى خديك من
فى الدنيا يا نور الزمن
أرواح نسائمك لى رمن
نرجس مزج لى مسك اليمن
ما احلاك يا الجيدك شدن
يالعمرى فيك ضائع سدىً
انا عندى شوفتك يا اللدن
أحسن من الروح فى البدن
يا منبع الذوق آه يا من
حبك غرز فى الجوف كمن
يا غالية قط ما ليك تمن
إن هب او جار الزمن
ليك السلام ما ولعن
خديك بالنور يلمعن
وعدد النجوم ما يطلعن
يرضيك وبيك لى يجمعن
|
Post: #57
Title: Re: اغنيات لفك الدبرسة
Author: عمر المهدى
Date: 06-21-2010, 03:56 PM
Parent: #56
نور بيتنا و شارع بيتنا يوم ما جيتنا
يالهليت فرحت قلوبنا إطريتنا الليلة وجيتنا
كنا فرشنا السكة ورود لو كلمتنا كان بالجية
خطوة عزيزة ويوم موعود الخلاك تطرانا شوية
الحظ الجانا غشى سكتنا جانا وجابك لينا هدية
يالهليت فرحت قلوبنا إطريتنا الليلة وجيتنا
شوف شتلاتك كيف نشوانا والفل فرهد فرحان في البيت
والريحان طربان يتمايل غازل زهرة وعاين ليك
كل البيت خليتو في فرحة ضحكه قلوب وقلوب منشرحة
جيت واكتملت بيك اللوحة تسلم سيرتك أهلاً بيك
|
Post: #58
Title: Re: اغنيات لفك الدبرسة
Author: أحمد إسماعيل
Date: 06-22-2010, 07:36 AM
Parent: #57
Quote: جديات العسين قالن لى
احمى رهودنا عن اسد الشره
و امنع ضواري فهودنا
قالن لى لو تحفظ مواثيقنا و تراعى عهودنا
تتوسد غدائرنا و تنام فى نهودنا
اريل شم شروق
شراكى مانى الشابك
و شم نفسك يفوح
مسك العشارى الشابك
عشبة بان قسى المى فريك نقادة
ارضه البان قسى ديسها المهضلم قادها
يا خالق المسى بدله منام لرقاده
ياخالق الوجود انا قلبى كاتم سره
وما لقيت من يدرك المعنى بيه ابره
قصبة منصح الوادى المخدر دره
قعدت قلبى تطويه و كل ساعة تفره
|
سلام للأخ عمر المهدي وشكرا للبوست المعبر هذا
الأخ كمال الشادي ياشادي شكرا لك على هذا الإختيار الجميل
قصيدة تعبير ووصف وتشبيه عجيب ، تقطع الرأس
وحقيقة مافي حيوان أجمل من الغزال وكمان عنده طيب المسك
والشعراء لهم الحق بأن يشبهوا حسناوات حواء به
عشب البان قسي المي فيك نفادة ، نحن البقارة في الغرب نقول للماء ألمي
هو نفس المعنى
وأيضا الديس الهضلم عندنا يسمى تيس قارو
وتيس قارو هذا نعرف عمره من عدد العقد في قرنو يعني العشاري هذا قرنه فيه عشرعقد
والشمس نقول لها الشم
|
Post: #59
Title: Re: اغنيات لفك الدبرسة
Author: كمال الشادي
Date: 06-22-2010, 08:05 AM
Parent: #58
الراجل الراقي أحمد اسماعيل
مجرد تعليقك ومرورك على إختياري للقصيدة الفاتت دي شرفني جدا
إنت راجل معروف في النت كلو بي إختياراتك الرائعة وبي كلامك الموزون
وبي الحاجات والحكم العجيبة الماعارف بتجيبها من وين
تحياتي لك وشكراً على ثنائك على اختياري
ونشكر الاخ عمر الخلا لينا مكان حلو زي عشان نفك فيهو الدبرسة
Quote: سلام للأخ عمر المهدي وشكرا للبوست المعبر هذا
الأخ كمال الشادي ياشادي شكرا لك على هذا الإختيار الجميل
قصيدة تعبير ووصف وتشبيه عجيب ، تقطع الرأس
وحقيقة مافي حيوان أجمل من الغزال وكمان عنده طيب المسك
والشعراء لهم الحق بأن يشبهوا حسناوات حواء به
عشب البان قسي المي فيك نفادة ، نحن البقارة في الغرب نقول للماء ألمي
هو نفس المعنى
وأيضا الديس الهضلم عندنا يسمى تيس قارو
وتيس قارو هذا نعرف عمره من عدد العقد في قرنو يعني العشاري هذا قرنه فيه عشرعقد
والشمس نقول لها الشم |
شوف احمد انالحدي هسة امي الله يديها العافية رغم انها عايشا في الخرطوم
اكتر من اربعين سنة
لكنها تقول للموية المي
كأنها مافارت مروي في الشمالية يوم واحد
نفس اللهجة ونفس التعبير
اما تيس قارو
والشم فدي معلومات جديدة
ارجو انك ما تحرمنا من جديدك دائما
تحياتي
|
Post: #60
Title: Re: اغنيات لفك الدبرسة
Author: عمر المهدى
Date: 06-22-2010, 02:15 PM
Parent: #59
احمد اسماعيل
كمال الشادي
مرحبتين ودخلتكم دي بالدنيا
شكرا للاختيار الراقي والشرح الوافي
وبنسال احمد اسماعيل عن الهضليم
كثير من شعراء الدوبيت يطلقون الهضليم
علي الشعر الغزير الاسود للمحبوبه ويراد
به التشبيه بذكر النعام
الهضليمو زي الضل
ضافره الكسره مشاطو ام اصابعين سل
لذيذ للغايه ما عاش في درادر وذل
|
Post: #61
Title: Re: اغنيات لفك الدبرسة
Author: كمال الشادي
Date: 06-23-2010, 07:44 AM
Parent: #60
منو البقدر يخاصم طفلة
صِبحت هازلة فوق مدّ
الأسى .. الحرّاق
يا غنوتنا ما تفوتى
ويا كلمتنا ما تموتى
فتشى فوق ضمير الكلمة
عن وتراً رحل ... فرّاق
وعن ولداً رحل ... فرّاق
وعن بلداً رحل ... فرّاق
وعن عِلماً رحل ... فرّاق
تعالى نشوف ..
غُنانا الفينا ما بشفع
حديثنا الجوه ما بينفع
|
Post: #62
Title: Re: اغنيات لفك الدبرسة
Author: كمال الشادي
Date: 06-27-2010, 06:50 AM
Parent: #61
أدينى شهادة فقدان
وجدان وضمير إتوفى
لو أنى كتبت قصيدة
تطقطق أصابع حاكم زلفى
بيناتنا رفعنا ستار الكلفه
وأكلنا سويا قوت الشعب
منو الظلمات فيهن نتخفى
منى الكلمات تبقى محفه
حملتو عليها يلوح.. يلوح بالمنديل
ولسانى بساط احمر مدود.. يتمشى عليهو
لحدت مايدخل بستان النوم
تبا للكلمه بتتسكع.. تركع
تدفع اكثر.. تمدح اكثر.. تلبس اقصر
وسط الهالات.. تعبر صالات
الجنرالات وكبار القوم
ادينى شهادة فقدان وجدان
وضمير اتوفى فى ذاك اليوم
|
Post: #63
Title: Re: اغنيات لفك الدبرسة
Author: عمر المهدى
Date: 06-29-2010, 06:43 AM
Parent: #62
ماتمر بي ناعسه اجفان الاو تخطر بي رائعه محمد بشير عتيق
ناعس الاجفان (ان شاء الله ينوم ذاتو ) مع قمه الروعه اسمعوها
عند سميره دنيا بتعمل فيها عمايل لكم نصها كلها
يا ناعس الاجفان أنا من صفاك مسحور
بالله انت ملاك والا من حسان الحور
***
تذرف عيوني بحور
أقضي الليالي قيام ما بين شوق وهيام
وارعي النجوم في سحور
وفؤادي آه منحور
مقتول بغير سلاح وأقول بكل صراح
سبب العيون الحور
***
فيك الكمال محصور
أكظمت كل حسود وحسنك مقامه يسود
علي كل جيل في عصور
طرفك لحاظه تريع أسدا شجاع وهصور
ليك نفرة الغزلان مع جبرة الفرسان
في هيبة المنصور
***
أهيف رشيق متبور
تتهادي تيه ودلال ما بيت غرف وظلال
نعمة وترف وحبور
وسهمك علي مهبور
أيه ذنبي غير هواك وانا يا جميل
بهواك من قلبي ما مجبور
***
يا البي العفاف مشهور
نيدك عبير فياح وقوامك المياح
أينع ثمار وزهور
بي حبي دمعي جهور
أنا في دجاك يا ليل نجمك بقالي خليل
فارقت نومي دهور
***
أنا من زمان مأسور
هجراني ما هماك يا ليلي قاسي لماك
من طول جفاك محسور
وحياة خديدك وجيدك وطريفك المكسور
أنا شعري ما بيوفيك مهما أبالغ فيك منظومي والمنثور
|
Post: #64
Title: Re: اغنيات لفك الدبرسة
Author: كمال الشادي
Date: 07-03-2010, 03:15 PM
Parent: #63
باب الروح مَتاكَا انسَربي
صَاحيات الحَدائق أرعِي
قُبال مَنجَنيقْ الخوف
يَعاوِد ضَربي
قبل الطير وصَعلوقْ النَحَلْ مُنكَبي
هِشي العَافية من تَمري
المُخمِّر و عَبي
مِتل النيل طَبقْ مَركوبو
مارِقْ للبَحرْ مُدَّبي
أدخُلي في الجَسد مَحمومة
بى المَـرَض المُحيِّر طِبي
|
Post: #65
Title: Re: اغنيات لفك الدبرسة
Author: عمر المهدى
Date: 07-10-2010, 02:13 PM
Parent: #64
وسط الدايرة
وسط الدايرة أجمل نايرة
خلي قلوبنا تطير
وارحلي بينا فراشة حنينة
بين زينات وعبير
ولما الخصلة تدور طربانة
تبقي حرير في حرير
فرحي خلق الله واتّنّي ياشبه القمرة
وارقصي رشي عبيرك فينا وفتحي يا زهرة
أرقصي زيدي الساحة سماحة
نحن معاك نشيل
نغني غناوي ..نحكي حكاوي
لما ندوب في الليل
لا ترتاحي لا تريحينا
لسة الوقت طويل
عمرك كل فرح يا زينة
شيلي من الأفراح وادينا
راقصي البسمة راقصي النسمة
خلي الموجة تدور بينا
أوعي تهدي
كمان اتحدي
يلا جميلك تمي علينا علينا
|
Post: #66
Title: Re: اغنيات لفك الدبرسة
Author: الرشيد بابكر
Date: 07-10-2010, 02:47 PM
Parent: #65
Quote: فرحي خلق الله واتّنّي ياشبه القمرة
وارقصي رشي عبيرك فينا وفتحي يا زهرة
|
يا سلام يا عمر...
الأغنية دي فيها كمية بتاعت بهجة و فرح ما عادي...
و رغم أن كلماتها تعتبر عادية جدا...الا أنها من الأغنيات التي تعتبر علامة كبيرة...
و طبعا أي أغنية يختارها وردي و يغنيها بيكون اختارها بي فهم...
يعني الأغنية دي لو غناها أي زول ما كان اتسمعت حتى...
|
Post: #67
Title: Re: اغنيات لفك الدبرسة
Author: محمد صديق
Date: 07-10-2010, 08:27 PM
Parent: #66
سلامات يا ناس
يا ناس الغنا الطاعم ...إزيّكم
كم نظرنا هلال ما شاقنا غير هلالو
ما اظنو زلال يروينا غير زلالو
بالله كمِّلوا لينا الطاعمة دى ...
اصلها مكنكشة فينى اليومين دى وانا مكنكش فيها
|
Post: #68
Title: Re: اغنيات لفك الدبرسة
Author: عمر المهدى
Date: 07-11-2010, 06:54 AM
Parent: #67
يارشيدنا نحن نبحث عن الفرحه
وتحليل بالمسطره والمنقله والبرجل
لكن فيها لحن يطير من الفرحهمع وردي
لو تذكر حفله الزقازيق والله وردي دا هلال
مريخ عديل (في حضرته لايطيب الجلوس )
ياكوتش ياغناي تحياتي كم نظرنا هلال (لعيونك)
زي مابقول الشوام
كلمات اغنية كم نظرنا هلال
كم نظرنا هلال
كم نظرنا هلال ما شاقنا غير هلالو *** ما أظنو زلال يروينا غير زلالو
أرى الهلال ينقص وأرى محيو يتجلالو *** كل يوم يزداد في خديدو نور يحلالو
تتقاصر الأبصار من حسنو من إجلالو *** يتيه يصد باسم آه .. ما ألذ دلالو
ألذ شيء قُربو وغزلي النظر في جمالو *** وأمرّ شيء بعدو وجفاهو وإهمالو
أرى الغصون بتميل وأظن هواها أمالو *** على الخلاف وإذا مَيّل عليّ أنا مالو
طرفو ليه نعسان وأنا طرفي ليه يصحالو *** يتلو آية الحب الفي الخدود لايحالو
جمالو كل ما يزيد جسمي يزيد إنحالو *** أما قلبي الضّاع خلّي اليروح في حالو
إذا أدار لحظو على جبل دكّالو *** ولو بَسَم أنزل دمع السحاب أبكالو
قلبو لا يشفق على عاشقو مهما شكالو *** حبيبي طبع الطير ينزل على أشكالو
أنا لي حبيب يا ليل نوم العيون ملالو *** وليْ حبيب يا ليل قتل النفوس حلالو
وليْ حبيب يا ليل تشوف خِدودو يلالو *** مع الظلام تشتاق الزهرة تدّلالو
|
Post: #69
Title: Re: اغنيات لفك الدبرسة
Author: محمد صديق
Date: 07-13-2010, 10:40 AM
Parent: #68
سلامات يا ناس
Quote: أنا لي حبيب يا ليل نوم العيون ملالو *** وليْ حبيب يا ليل قتل النفوس حلالو
وليْ حبيب يا ليل تشوف خِدودو يلالو *** مع الظلام تشتاق الزهرة تدّلالو |
شكراً يا حبيب على الإستجابة وسرعتها.
|
Post: #70
Title: Re: اغنيات لفك الدبرسة
Author: عمر المهدى
Date: 07-25-2010, 03:57 PM
Parent: #69
ماناسينكم تصرفنا الصوارف
لكم مع مودتي دره الشفيع
سألوني مين عنك
عرفتهم
إيه الصفات عنك
خبرتهم
شافو الجمال منك
أقنعتهم
طولت لكنك
انا يا حبيب الروح
أعفيني من ظنك
محبوبي الجميل
سالمني بإيدو
والدمع انهمر
ذكرني بريدو
في أوقات السمر
ساحرني بمحيو
و جنني و أسر
شاغلني بنورو
و كم أخجل قمر
بس تنسى كيفنك
و إنت الوحيد بالذات
الكنا ذاكرينك
محبوبي الجميل
وفيما الملامة يا روحي
وكل هياما يا روحي
ويامن تعامى يا روحي
سلاما سلاما يا روحي
وذكرى محب يا روحي
تموج بقلبي يا روحي
وأنت بقربي يا حبيبي
حياتي و حبي يا روحي
أهنأ وانت بعيــد
ما كنا ناسينك
و الحب عليك إزداد
غمر النفوس ضنك
محبوبي الجميل
لحن الحياة منك
و ما تقول نسينا الماضي
و صرنا ناسينك
محبوبي الجميل
|
Post: #71
Title: Re: اغنيات لفك الدبرسة
Author: الرشيد بابكر
Date: 07-31-2010, 02:46 PM
Parent: #70
ود المهدي...مساك الله بالخير
اليوم و أنا في طريق عودتي الى مكان عملي عثرت على شريط لحنان النيل...
كان الشريط مفقودا فعثرت عليه قابعا في آسفل صنوق بجوار مقعدي...
أخرجته و أدخلته في مشغل الكاسيت و أنا أعرف مسبقا محتوياته...
سمعته و كأني أسمعه لأول مرة بعد ان انقطعت عنه زمنا طويلا...
و عندما سمعت هذه الأغنية قلت ان مكانها هنا عندك...
بس ما تطول الغيبه....
وداعاً روضتي الغنّاء .. وداعاّ معبدي القدسي
طويت الماضي في قلبي .. وعشت على صدى الزكرى
وهذا الدمع قد ينبي .. بظلم المهجة الحيرى
لماذا الهجر يا حبي .. لماذا الهجر يا حبي
لماذا دهرنا ضنّ .. وشبع روحي باليأس
وداعاً روضتي الغنّاء .. وداعاّ معبدي القدسي
نسيتي الماضي ياليلى .. وماضي الحب والطهر
ليالي نقطع الليل .. بحلو النجوى والشعر
نسيتي ليلى إذ كنا .. نفدي النفس بالنفس
وداعاً روضتي الغنّاء .. وداعاّ معبدي القدسي
أظل أردد الشكوى .. على ما نلت من وجد
حبيب الروح لا أقوى .. على حمل الهوى وحدي
ولما لم أجد سلوى .. ولما لم أجد سلوى
كسرت ابريقي والدنا .. وسكبت على الثرى كأسي
وداعاً جنتي الغنّاء .. وداعاّ معبدي القدسي
|
Post: #72
Title: Re: اغنيات لفك الدبرسة
Author: عمر المهدى
Date: 07-31-2010, 04:23 PM
Parent: #71
مرحب برشيد القوم ماتخوفنا
وتقول وداع
ونحن يادوب ابتدينا
شكرا للروعه وفعلا حنان النيل
بتالم في روضتي الغناء
المصـــــــــــــــــــــــــــــير
إبراهيم عوض
==============
ليه بنهرب من مصيرنا ونقضى ايامنا في عذاب
ليه تقول لى انتهينا ونحن فى عز الشباب
نحن فى الأيام بقينا
قصة ما بتعرف نهاية
ابتدت ريدة ومحبة واصبحت فى ذاتها غاية
كنت تمنحنى السعادة
ولى تتفجر عطايا
ولما أغرق فى دموعى
تبكى من قلبك معايا
***
كنا فى ماضينا قوة
قوة تتحدى الصعاب
نقطع الليل المخيم ونمشى فى القفر اليباب
كنا للناس رمز طيبة
وكنا عنوان للشباب
وهسى تائهين لينا مدة نجرى من خلف السراب
***
تانى ما تقول إنتهينا
تنهى جيل ينظر الينا
بانى أماله وطموحه ومعتمد أبداً علينا
نحن قلب الدنيا ديه ونحن عز الدنيا بينا
تانى ما تقول إنتهينا
نحن يا دوب إبتدينا
|
Post: #73
Title: Re: اغنيات لفك الدبرسة
Author: زينب التجاني
Date: 07-31-2010, 08:27 PM
Parent: #72
سلام يا ود المهدى
ويسلم البوست الرهيب دة
انت عارف كل ما افتح المنبر بمر على البوست دة من الاول
واقول كدى اكتب برواقة
والروقة يا حليلا
وكل ما اكون فى البيت فى روتينى العادى او فى المطبخ بعلق فى غنية ودايما مذاج الحولى ما زى مذاجى
وبيقولو بجيب حاجات عجيبة
بما انو الاسرة الانا وسطها اسرة فرفورية(من فرفور) دة ما تقليل من فرفور
واغانى هجيج وبس
فانا متعاليه عليهم بحسى الهم بيقولو عليهو عجيب
اليومين دى م######شة فى
اه يا زمن للجابرى
كملوها
|
Post: #74
Title: Re: اغنيات لفك الدبرسة
Author: عمر المهدى
Date: 08-01-2010, 01:40 PM
Parent: #73
بت النوبه تحياتي
وتسلمي للمرور الانيق
هم العيال لو سمعو فرفور
برضه خير وبركه يعتبرو كانهم
بسمعو الكاشف اوحسن عطية
وبرضه اغاني الهجيج والربه تغيير
وكسر للغناء الجاد
واليك الجابري
هات يازمن
جيب كل أحزانك
تعال جيب المحن
طول يا أسى
وكتر ينابيع الشجن
جرعني كأس
من لوعة من آلام
ما المحبوب خلاص
خلاني ليك الليلة راح
خلف في قلبي الحسرة
والشوق والجراح
خلي النواح
فاض قلبي شمعة
وحيدة في هوج الرياح
خلاني ليك أنا يا زمن
وخلى الشجن
---------------
الليل يهوّد بي
ويبقى تلت الأخير
يطويني في رحابه الوثير
أنا والظنون
وعذابي
والصمت المثير
خلاني وحدي جناح كسير
وانا والدموع والشكوى والليل والشجن
رماني ليك راح يا زمن
وخلى الشجن
من بعد ما علمني ريد
فجر عواطفي غنا ونشيد
بدل مراير الوحدة والهم أحلى عيد
علمني أبني حياتي من أول جديد
أشرق في عمري هواه زي أجمل صباح
وكساني بالآمال وشاح
قلبي المتيم بيهو
بي احلامه باح
تاه في رياضو الرائعة في جنة استراح
لكنه وين الليلة راح
واصبحت يا أيام حزين
---------------
باكي العيون محتار
أقول ماليه حنين
إيه غيرو
بدل عواطفو صبح ضنين
إمكن ظنون
إمكن خلاص إن شك في قلبي الأمين
قلبي المحال في يوم يخون
قلبي الملان حنية زاخر بالأمل ومهما حصل
أملي الوحيد لحبه مكتوب في الأزل
لايمكن
أبداً
مستحيل
في يوم أميل
لغيره وأعشق تاني زول
مهما يكون بالود بخيل
لو حتى يجرح قلبي
أنا برضي صابر يا زمن
بكل أحزانك تعال
جيب المحن
|
Post: #75
Title: Re: اغنيات لفك الدبرسة
Author: عمر المهدى
Date: 08-04-2010, 07:19 AM
Parent: #74
مرحب بالناس الظهرت
وعشمنا في اكتمال العقد
اليكم هذه الاحتفاليه
انتم نجومي وشمسي
بادي مع ابوصلاح
الكواكب احتفلو بالقمر
ام دي روض دريه السمر
اقرب بهجه الاهيف الضمر
وديسو للدروع قسم الخبر
طريت شباك ورشرشو العمر
العيون سيوف تقضي ما امر
وديسو للقدم وصل الخبر
الصدير برز قلع وانتبر
والنهيد رخص لسه ما جبر
وقلبي مالو طار هجا ما صبر
ودمعي مالو فاض شابه البحر
ما طفى العلي من لهيبو حر
عقلي انفقد وقلبي ما انسحر
وتدري بالعلي نجمه السحر
العشق نصيب والغرام قدر
القلوب تطيع امرك الصدر
ونارنا ما انطفت وشوقنا ما فتر
ضعنا والنفس فينا ما ندر
الشعر نزل للردف ستر
وزاحم القدم وفيه كم عثر
الصدير قلع والردف نتر
الضمير تعب حالتو في خطر
خاتم السعود من نجم زهر
الاحتفال ختام نور اشتهر
انتهز فرص ويانع الزهر
وعشته في نعيم مده الدهر
|
Post: #76
Title: Re: اغنيات لفك الدبرسة
Author: محمد صديق
Date: 08-04-2010, 07:58 AM
Parent: #75
سلامات يا ناس
Quote: الليل يهوّد بي
ويبقى تلت الأخير
يطويني في رحابه الوثير
أنا والظنون
وعذابي
والصمت المثير |
ودالمهدى الغنَّاى....سلام
تعرف الجابرى ده عليه رحمة الله كان صوت عجيب وبه امكانات عالية
وله مقدرة على التطريب ما عادية..وقدرتو التانية هى اختيار الكلمات
وده بيقودنى عشان اقول ليك كمِّل جميلك واذكر لينا اسماء شعراء الاغنيات
البتجيبا لينا...
Quote: وقلبي مالو طار هجا ما صبر
ودمعي مالو فاض شابه البحر
ما طفى العلي من لهيبو حر
عقلي انفقد وقلبي ما انسحر
وتدري بالعلي نجمه السحر |
بادى ده حكاية تانية ...كنت فى العام 2005 فى دورة تدريبية فترتها زى تلاتة
شهور ..من ضمن البرامج المصاحبة ليها برنامج ثقافى وانا كنت مسؤول اللجنة
الثقافية وكنا بنعمل على تنويع البرامج ...اخترنا مرة اغنية الحقيبة وقابلنا
الاستاذ عوض بابكر..وافق على الفكرة وقال لينا بالعبارة دى(إذا دايرين البرنامج
ده ينجح اقنعوا بادى يشارك فيهو) وقد كان ..لم نجد صعوبة فى اقناعه ووافق قبل
نكمل كلامنا ...القصة طويلة وداخل العربة ومن ونستم مع بعض اكتشفت انو بادى يحفظ
اغنيات الحقيبة كاملة وان المُغنَّى منها تنقصه أبيات عديدة....
يذكرنى بالمرحلة المتوسطة والثانوى وارتباط ذلك بأمر طريف ...منطقة ودرحوم جنوب
رفاعة جُلّ اهلها من الأنصار (والمطاميس منهم يعشقون بادى وكل مطموس تجده يغنى لبادى
كأنه هو ..لى صديق من هؤلاء المطاميس...)كانوا يحرصون على حضور بادى لحفلات الاعراس
وتانى يوم فى سوق رفاعة اكتر الناس المستفيدين هم النقلتية.
لك الود ولكل المتابعين والمستمتعين
وما تنسى الطاعمين الشعراء اديهم حقهم او اشتكيك لى ناس المِلْكِية.
|
Post: #77
Title: Re: اغنيات لفك الدبرسة
Author: عمر المهدى
Date: 08-05-2010, 05:02 PM
Parent: #76
ياكوتش ياغناي
سمعنا واطعنا فبلغو سلامنا الى من كان للوصل يمنع
الموضوع مهم لكن نظام سرعه وكده
|
Post: #78
Title: Re: اغنيات لفك الدبرسة
Author: زينب التجاني
Date: 08-11-2010, 00:45 AM
Parent: #77
سلام يا ود المهدى
لو تعرف انا معلقة فى شنو
نالت على يدها
الكابلى ويذيد بن معاوية
بس لو سمعنا ليها الشادى
تسلم وتصوم وتفطر على خير
|
Post: #79
Title: Re: اغنيات لفك الدبرسة
Author: سناء الصباغ
Date: 08-11-2010, 01:16 AM
Parent: #78
سلام ود المهدي
كل مرة بسجل زيارة للبوست لكن ما بخلي دليل وراي
الليلة قلت أثبت الزيارة وأسجل اعجابي بالملام الجميل المدور
بيجاي وبالمرة أطلب منكم تكملوا لي الأغنية دي
أصلها عا########ي من أيام الزقازيق كان بيغنيها عاطف ود تجارة
وتاني سمعتها مرة واحدة من عابدة الشيخ عاوزة أعرف شاعرها ومغنيها الأصلي
الأغنية بتقول :
مقاصدي آه ما أجسمها لي نية في قمر السما
الموضوع دا ذكرني قصة لذيذة أيام كنا في دبي
كنا في جلسة بتاعة غناء راقية كان نجمها شقيقي الرائع يسن وهو رجل
فنان يجيد العزف على العود والكيبورد ويغني بصوت عميق وجميل وكمان مزاجه عالي في أختيار الأغاني
وكان في تلك الجلسة صديق اريتري متربي في السودان قام فجاة كدا والناس صانة
قال يا خوانا زمان كان في أغنية بتاع حقيبة جميلة وحاول يتذكر ونحن محاولين نساعده بعدين قام قال
أيوة اتذكرت الأغنية بيقول:
واي واي خلاني براي السافر ما جا خلاني براي
وانفجر كل الحاضرون بالضحك
|
Post: #80
Title: Re: اغنيات لفك الدبرسة
Author: عمر المهدى
Date: 08-11-2010, 11:37 AM
Parent: #79
مراحب د سناء
تصومو وتفطرو على خير
غالي والطرب رخيص
الاغنيه لسيد عبد العزيز/ حقيبه
واشهر من غناها بادي محمد الطيب
لي نيه في قمر السماء
لـي نيه في قمر السما مقاصدي آه ما أجسما
أبـني الـفكر وأهدما والعين تسيل دمعة الدما
والـدمعة مـرات أعـدما لحبيبي روحي أقدما
يـــا ... لـيـتـه يـرضـى .. يـخـدما
حـواسي مـالها كـلما هـبت نـسمة تـألما
روح ليها يـا نـسيم كلما لو جاهلة كنت أعلما
حـــن .. الـمـعـذب لــي ... الـلـما
عـجباً
|
Post: #81
Title: Re: اغنيات لفك الدبرسة
Author: عمر المهدى
Date: 08-11-2010, 11:38 AM
Parent: #79
مراحب د سناء
تصومو وتفطرو على خير
غالي والطرب رخيص
الاغنيه لسيد عبد العزيز/ حقيبه
واشهر من غناها بادي محمد الطيب
لي نيه في قمر السماء
لـي نيه في قمر السما مقاصدي آه ما أجسما
أبـني الـفكر وأهدما والعين تسيل دمعة الدما
والـدمعة مـرات أعـدما لحبيبي روحي أقدما
يـــا ... لـيـتـه يـرضـى .. يـخـدما
حـواسي مـالها كـلما هـبت نـسمة تـألما
روح ليها يـا نـسيم كلما لو جاهلة كنت أعلما
حـــن .. الـمـعـذب لــي ... الـلـما
عـجباً ملاك ساكن حما في حماية الحيا أحتما
منعه الدلال يظهر حما هلك النفوس وأبى يرحما
مــن ... هـجـره يـا حـامي ... الـحما
بـديها روحي تقسما بدل الزهور في مواسمها
مـهما النفوس قدرن سما تفدي العيون الباسما
الـفـي ... الـقـلوب مـمـضي ... اسـما
كـم من محاسن أعظما فيك خايله خلقه منظما
زي مـعنى شاعر نظما صفا بهجتك ما أعظما
شـوفـتك ... ظـمـا وتـروي ..... الـظما
حـي المسالمة ومسلمه الذكراها انسىوقلما
الـذكرى دائـماً مـؤلمه لله أمـوري أسلما
الـقـمـره ... مــا لـقـيت .... سـلمـا
|
Post: #82
Title: Re: اغنيات لفك الدبرسة
Author: عمر المهدى
Date: 09-16-2010, 04:48 PM
Parent: #81
رائعة عكير الدامر
عبقرية الوصف وجزالة التعبير وألق الكلمة
يـــا مولايَ بشـــكِيلَك شـــقايَ وغُـــلبي
حظِّي الدِّيمَة مـن رِد الأنيـس جـافِـلْبـي
طــالْـتَ السَّـفْـرة واتحفَّـت مناسِـم تِلْبـي
هـبَّ الرَّيـْم وعــاودَك الحنيـن يا قلـبـي
***
مالِـك نفسـي مطـعــونـة وتمَـلِّـي تنيـنـي
مالِـــك عينـي للغُمَّيـــد أبـــيـتـي تليـنـي
عطشان ديمة كَفـْحَ المـويـة مـا بروينـي
كـاتلانـي الطــريفـيـة البـريـــدا قريـنـي
***
غصباً عني فارقتَ الضريح غير أمري
كــل ما هبّ نسَّــام منُّو زاد في جمْري
جرحي القرَّب يبرا وكادْ يودِّر عـمري
عــوَّدُو ليَّ تغـــريد بـُلبــلك يا قُــمري
***
النَــاس عَيـَّـدَتْ مَــرَقتْ عَــلَي أصْحَابَا
وانا فرَّيتْ عَلَى الجَاهلَة السَمِحْ تِرحَـابَا
فَـاطْــراً يحكِـي بَرَّاق البِـدَودِي سِـحَابَا
لفَّــتْ قَــلَبي زي لفْ طَـرْحَتَا اللافحَابَا
***
أَخَدَرْ لَيهُو ضُلْ فَوقُـو المَحَاسِنْ شَـرَّنْ
أَفْلج فَاطرُو زَي برق السَواري الكرَّنْ
يِتقَسَّـــمْ مَقَاطِـع في المَشِــي ويتْحـرَّنْ
زي فــرخ القطـا الأمَّاتو رَكَّـنْ وفرَّنْ
***
من البيتْ جَــا طَــالــع بيْ لُطُـــفْ يتكَّـلْ
الطِّــيب المَفَـحَّــلْ بْي القُــرُنفُــل عَكَّـــلْ
فوق سَدْرُو وتحتْ تَوبُو الَرهيف ومَشَكَّلْ
يَغـطِـــس ومَـــرَّة يقْـلَع بُرْتُكانْ البركَــلْ
***
ختَّتْ أيدها فـوق إيـدي انجذبـتَ خِــدِرْتَ
حبيت أمشي من كُتر الطـرب مـا قـدِرْتَ
بقــت الحنـَّة بيـن إيـدي وأيديهـا انـدِرْتَ
لـولا الحنـَّة بينـي وبينهـا كــنـت ودِرْتَ
آآه من غلبي من النارو حرقت قلبي يا مولاي
شـــعـرِك منتظـــم زي السـلاسـل فتـْلـُو
وعينيكِ ترقِّص الحجـر إن بقـت شافتْلُـو
الطـاؤوسة قاصـدة مشيكـي مـا عرفتْلـُو
واعصـاب الـرءآك اتكـهـربـت تِـلْفَـتْـلُـو
***
كََـوْنِي حَلِيفُو مَـالُو عَليَّ بِعْلِنْ حَـرْبُو
طَـالِعْ سَـعْدُو في شَرْقوُ وَمُنَوِّرْ غَرْبُو
سَيَـانْ عِندِي وَاحِد بُعْدُو أو كَانْ قُرْبُو
مَا بَـارَحْني في مُرُورْ النَفَسْ بَشْعُرْبُو
***
ممشُــوق القــوام المــا وجــدتا مثيــــلو
خصامو معايَ أخير ليْ من محنَّة غيرو
جافــانى العـــزيز الكنتا ديمـــه نصـيرو
هو يسـوِّى الغلط وانا اسوِّي كتَّر خيرو
***
إَِتمنَّى الدَهَبْ لَــو لَــونُو يِشْـبَه لَونِـكْ
وأشــتهَت الدُرَرْ لَو هِيَ تبْقَى سْـنُونٍكْ
مَجْنُــونْ لَيلي حَالتُو أقل مِن مَجْنُونِكْ
زَيْ مَا ليلي كَانَتْ في المحاسِنْ دُونِك
***
عَــمْ الهَــادِي نَشَّـابْ البَــريــدَا ضَــربْـنِي
قَسَّــمْ نومِــي مِن تَيبَــانْ حَـيَــايَ سَـلـَّبـْني
حَاكْمِ انصــافي أَبَي يقْبَـلْ سُؤَاليِ صَـلبْني
وصَــبْري الكَانْ جميل جَرَّبْتُو كُلُّو غَلبْني
***
أَحْ والوَحَّـــه مَاب تَدُورْ تَفَــارِقْ قَلْبِي
أحْ من نـار فلانة وجرحها النوسربي
يا نفسيِ الَصــبُر لوُكيهُو لا تنْسَــلبي
الحَظْ مَا بدُومْ يَومْ غَالبَة يوَمْ تنغَـلْبيَ
***
عن من أحبـُّه غيـر خاطـري أنا فُـرِقْـتَ
هائج بي غرام عن حالتـي كلـي سُرِقـْتَ
لولا أدمعـي مـن نـــاري كـنـت حـرِقـْتَ
ولولا ناري مـن كتـرة دموعـي غرقـْتَ
آآه من غلبي من النارو حرقت قلبي يا مولاي
|
Post: #83
Title: Re: اغنيات لفك الدبرسة
Author: كمال الشادي
Date: 09-25-2010, 12:08 PM
Parent: #82
الاخ الفاضل عمر المهدي
ارجو اعتبار المداخلة دي
مع القصيدة
إعتذار عن إنقطاعي عن ركنك الرائع ده
وعيديدة رغم إنها متأخرة وكل سنة وانت بألف خير وأولادك وأمهم وخالاتهم وعماتهم
-------------------
يا قلب...انا كنت قايلك تبت من
تعب السفر.....
ومن مخاواة القماري
ومن شراب موية المطر
تاريك كامن لي بشيتا كتر
مازمان انا وانت لفينا الموانئ
بالقطارات والمطارات والسفن
دقينا اجراس الجديد...
وعدنا ترتيب المعانئ
الليله راجع لي تبق بق
بتنتل الاهه و ترقرق...
زي تقول ياداب عرفت الاندهاش
ياقليب ما لك علئ...
ما انت عارف نقطة الضعف القديمه
وزي ضايق الارتعاش...
يا قليب يا ما سرحنا
مره جينا والف رحنا
ومره شاي عصريه في طرف الغمامه
ومره دوبيت للمحنه...
ومره حاجاتا جميله
وانحناءت للحمامه...
جاي تسالني الدباره
ياقليب مافيش دباره...
لا المراكب قادره تكسح في النزيف
ولا نحنا شايفين الفناره......
----------------
لو الرشيد بابكر عدى بي جاي
حا يقول ليك يا اللهههههههههههههه
جبي جبتوها من وين
تحياتي
|
Post: #84
Title: Re: اغنيات لفك الدبرسة
Author: عمر المهدى
Date: 09-28-2010, 07:11 AM
Parent: #83
انشر جناحك ميل
حي الربيع ياجميل
خلي الشمس تسكب ذهب الاصيل
في النيل
مراحب الشادي ونورت الاغنيات
واليكم رائعه سبدرات بشير عباس والبلابل
رجـعـنـالـك وجـينـا غـفـرنا انـك بالوشـاية فـصـدت كبـد الـفـرحة فـينـا
رجـعـنـالـك وعـينـينا الـبكـت فـجعـت رموشـه دمـوع سـخـينـة
وبـفـرح عـودتـنا رفـت زغـردت كلـمات حـنـيـنـة
رجـعـنـالـك عشـان تـاه الـفـرح مـن دارنــا
رجـعـنـالـك وانـت ديــــــــار فـرحنــــا
رجـعـنـالـك عـشـان نـاحــت سـواقــيـنا
رجـعـنـالـك وبـكـت شـتـلات قـمـحـنــا
رجـعـنـالـك عـشـان يـسـكـت جـرحـنـا الانـت جـارح قـلبـو بجـراحاتـنا آحنـا
رجـعـنـالـك وكـيـف نـرفـض رجـوع الـقـمـرة لـوطـن الـقـمارى
يـا الـتقـوقـى على نخـيـلاتـنا الـقمـارى
وانـت واحـش نـيـل وطـنـا عـلـيـنا شـمـتـه الصحارى
رجـعـنـالـك عـشـان انـت الـجـرف الـفـيـهو شــتلات حـنـة لـفـرح الـقـبـيـلـة
رجـعـنـالـك عـشــان جــرتــقــنـا وسـيـرتـنــا وجـديــلـة
رجـعـنـالـك نـغـنـى فـرحـنـا فـيـك ونـقـول عـديـلــة
يـفـرح الـلـيـل بـفـرح صـنـدل يــفـوح يـكـســـى الـقـبـيـلــة
|
Post: #85
Title: Re: اغنيات لفك الدبرسة
Author: كمال الشادي
Date: 09-28-2010, 10:28 AM
Parent: #84
عمر
القصيدة المرفقة
اغنية
بس غااااااااااااطسة
ماكل الناس بتعرفها
اكان ماسمعتها قبل ده
قول بي بنزليا ليك
----
وتــمــرك مــفــرع بـالـجـريــد
شـــدرك أمــــد حــــدّ الـسـمــى
طـيــنــك مــعــتــق بـالـطــمــى
نبنـيـك أكـيـد .. نبنـيـك هـــوى
نبـنـيـك أيـــوه ســـوا .. ســــوا
مـــن أوجـديــد نبـنـيـك جــديــد
****************
ياإيـد أبــوى عـلـى إيــد أخــوى
عــــلـــــى إيـــــــــدى انــــــــــا
عــــلـــــى إيـــــــــد و إيــــــــــد
تــجــدع بـعـيــد فـــــى الـلــجــة
فـــــى مـــــن راس مـيـضــنــة
حـيـكـومــة الــفــقــر الـــدمـــار
الــكــضــبـــن و الـصــهــيــنــة
الـلــى نـقــاص أيـامـنـا كــــاس
اليـالـطـيـف ســــوس الـبــحــر
نـرجــم قـفـاهـو حـجــر حـجــر
مـــــــن هــــــــا الــرصـــيـــف
الــــمـــــا قــــــــــدر قــــــــــدام
سـريــحــة الـــمـــوج يــقــيــف
الــــــــمــــــــا انـــــســــــتــــــر
الارزقـيــة ونـــاس مــــو يــــا
نسقـيـهـا كــــاس أسـقـتـنـا يــــا
نوريـهـا كـيـف عـشـق الحـيـاة
سنانـا فـوق حـجـر القـصـاص
سـوانــا نـــاس ارض الـبـحــر
جـوانـا احــد مــن الـرصــاص
*************
يــــا ضــــو حبـيـبـيـن الـقــســا
طول ما انت غرقان فى الأسى
تبـت يـديـن مــا تـرمـى ســاس
مــا تبـنـى مـجـدك مــن جـديــد
تـفـتــح شـبـابـيــك الــخـــلاص
تــدخـــل نـسـيـمــات الـنـشــيــد
بيت القصيد يستقبله مستقبله ..
و الـحـاضـر الـمـاضـى التـلـيـد
******************
يابلـدى يافـردة جناحـى التـانـى
وكـت النـاس تطيـر لـى عالمـه
وآ وجـعــة الــــزول البـيـجـيـك
مــا يلـقـى فـيـك غـيـر الهجـيـر
نـــاســـا تـــواتـــى مـســالــمــة
كـــــل الـبـشــاشــات الـقـبــيــل
يـلـقــاهــا مــيــتـــه مـســمــمــة
والجـاتـه جـاتــه مـــن الأرض
مــا جـاتــه مـــن تـــالا الـسـمـا
مـــا أعـتــى غـبـنـك يـــا ولــــد
وأعـــدل قـضـيـتـك وأعـظـمــة
لاتــرجــع الـسـيــف الـجـفـيــر
والـدنـيــا فــايـــره مـصــادمــة
مـن غيـر تجـيـب تــار البـلـد ..
ريــــح الــعــوارض تـهــزمــة
تـطــرد مـــع ابـلـيـس الأخـيــر
دعة الضلال من جنتك يا آدمة
تـاكــل مـــن الـشـجـر الـحــلال
يغشاك نعـاس فـى ضـل رمـى
تخـتـاك هـضـاريـب الـصـعـب
كـــربـــة لــيــالــى الـمـظـلـمــة
***********
يانـيـل قـبـل خـاطـرك يـطـيـب
أرضــــك تــفـــزع باللهيـــــب
تكـشـح تـواريــب الـغـضـب ..
صـــــعـــــب الـــــمــــــراس ..
نوبـة و زنـوج و بجـة و حلـب
رطـانــه عـربــان مـــو أشــــو
ومولدين تلقانا أو نلقاك ضـوء
ظـلــمــة لـيـالـيــك الــعــجــاف
رشــــه نـهـاراتـنــا الـنــشــاف
آمـــنـــا بـــيـــك ومــوحــديـــن
فى إيدنـا فـاس وقلـم رصـاص
شتـلـة و كمنـجـة و مسـطـريـن
و طبنـجـة فــى خـــط الـتـمـاس
حـراســة مــــن كــيــد الـبـكـيـد
ضــد الـرصـاص والانتـكـاس
نبـنـيـك هـــوى وأشـــد بــــاس
|
Post: #86
Title: Re: اغنيات لفك الدبرسة
Author: عمر المهدى
Date: 09-28-2010, 11:13 AM
Parent: #85
الشادي اشكر لك مبادرتك الكريمه
واليكم مصطفى+عاطف خيري
شهيق
ما تتضارى ورا الدعوات
وما تتلبسى فرح الفات
بسكن فيك النغم الزايف
ويسرق حاسة شوفنا الواقفة على رجلين جوانا
نحن الهاوية .. والمتطامن من الأرض
آه من نحلك ساعة يرحل
ولمن يكتب فينا الحنضل
ويختم عمرو بفعل الشهد
قال الجدول :
طلوع النخلة .. مرور الريح .. واحد
لكن الريح بعانق حقل
ونحن بنطلع نخلة .. وننزل
ونكتب فى ذاكرة الصفق الأخضر
سجنا الريح فى الورق الأبيض
وجهناها ضد التمر الناعس
يسقط زى قبعة الحارس
زى الكان بيناتنا .. و فات
قالت غيمة :
".. بين قوسين غيمة لئيمة"
أولاد الشارع فهرس لى كل المدن
التهرس جوفك بالأسمنت
قالت ريح :
شوف الناس قنديل
لو ما نور يحرق كوخ .. وباقى الحلة تنور
أو جبة جوخ .. أو ينزل بوخ
يقول للنسمة الزايفة .. أقيفى
لو تتفرد ريح .. تتشرد ريح .. ريح الخوف
لو تتفرد ريح تبدا تفرتق ضفاير المدن الكاذبة
تعيد تسريحتك
ويوم سمايتك .. شكل قامتك
كيف تموتى .. وتحيى تانى
ويوم قيامتك .. هو البيدينا الثبات
يا مجلوبة فى قافلة رق
ما بستحمل صدرك رصاصة ظلم
يا صابت رحم الفال
يا قطعت حبل الحلم
يا كنا نبيعك .. يا نسرق
إخترنا النار .. الضلها يحرق
طمنـّاك إنو الدنيا بخشها ضو
يجرح جلد العتمة
دم الليل قربان فجرك
يا بت يا نيل
لو نامت قمحة على الأبيض .. وإتشرت زيو
وزاد الأبيض فى غيو
ومدد رجلو اليسرى
ما كان الكسرة .. جاتك من برة
صفرا .. ومنكسرة
زوجناك الشهدا وِلاد ال######
الماتو عشان الشعب
زوجناك ما عندك ضرة
زوجناك ما جاتك ضرة
وما إنشاف ماعونك فى الحلة يساسق
ويلقى فتات
قال الأبيض لى الأزرق:
يبقى ضد الإنتباه
وضد تواريخ التمازج بينى .. بينك
البشوفك فى مراهقة الخرائط
وفينا من وجع المسافرين .. واطه .. ما لاقت هوية
رد الأزرق:
مطر الحبش لو كان نبش جواك سقف
أو هد حيلك فى الدواخل
وشدّ عصبك فى المداخل
صوت مراكبى
وإيد بتسأل فى القمح
وفينا من فرح المسافرين قصة الشمس .. القضية
يا أعشاب النيل الأبيض .. ما تتضارى ورا الدعوات
أقرا تاريخك .. وأخاف
أسأل جبين الفجر .. وألقى الفجر مطعون فى القفا
هل سافرت فى دمك المحقون رجا
حبة غضب
ما شلنا جمرك .. وإنطفا جوانا نارك .. والمطر
جايين بالكتابة .. وضربة الناس المهابة
لو هز نخلك باشبزق
ما غادرت تمرة السبيط
وما ساور الطورية شك
إنو الأرض أنثى .. وبتحمل بالحلال
مين اللى قال
إنو المسافة البينا بين الشمس طاقة
أو مياه النيل
بتدخل فى عروق السنبلة المسقية بى عرق الجعانين ..
والمساهرين بالبطاقة
أقرى تاريخك .. وأقيف
جواكى .. والزمن النضيف
جواى .. من جواك غضب
سلم مفاتيح السؤال
جيل الشمس .. موكب حريق
واقف على باب الدخول
بيناتو بينات الوصول ..
لحظة شهيق
|
Post: #87
Title: Re: اغنيات لفك الدبرسة
Author: كمال الشادي
Date: 09-28-2010, 12:20 PM
Parent: #86
بلداً هيلى انا
كلمات والحان طارق الامين
اداء نانسي عجاج
بلداً هيلي نا..
دموعها.. دموعي نا..
أساها...أساي أنا..
ضميرها..ضميري نا..
كل آمالي نا..
السلام يملاها..يطلع من هنا..
و الحَمَام يتشابى
****
تقدل طفلة حلوة و بين إيديها كتابا..
و الحبوبة تمسح بالحنين أثوابا..
و القمرية تصدح..تستريح دبابة..
و القطر القبيل يمشي و يشق الغابة..
البالمبو يفتح للقلوب أبوابا..
و النُقارة زي أم كيكي و الربٌابة.
****
البلد الحنين ..سميتو يُمٌة و يابا...
بين العالمين ..عزة و جمال و مهابة..
الحزن القديم ...تمطر تزيلو سحابة..
لا أطفال حزانى...لا نازحين و غلابة.
****
في العصرية ..شٌفع جارية لألعابا..
و الشاي في المغارب ذكرياتو صبابة..
أشجار التبلدي العامرة بالترحابا...
وأشجار النخيل..و قُدرتا الخلابة.
****
ناس من كل لون ..إتعمٌرت أنسابا
و النيل في الهجير...دوٌزن وتر أعصابا..
سمحة الدنيا..بيك..و بين إيدينا حبابا..
يانا أهل بلدنا و قُدرَتم غلاٌٌبة
بلدا هيلى انا
|
Post: #88
Title: Re: اغنيات لفك الدبرسة
Author: عمر المهدى
Date: 10-14-2010, 06:24 AM
Parent: #87
لك التحيه ياشادي
بت عجاج دي بتعجبني فيها انها بتغني باحساس عالي
يجوك الجماعه يقولو ليك ماعندها حاجه والله ياشادي نحن اي
زول بغني بنسمع ليه ان شاء الله مره واحده يعني ماعندنا قشه مره
كل آمالي انا السلام يملاها
يطلع من هنا والحمام يتشابى
|
Post: #89
Title: Re: اغنيات لفك الدبرسة
Author: عمر المهدى
Date: 10-14-2010, 06:26 AM
Parent: #88
اليكم رائعه عبد الرحمن الريح
الحرموني شوفتك
حسن عطيه
كابلي وآخرون
يا الحرموني منك
أنا يا حبيب قلبي سائل دوام عنك
يا الحرموني شوفتك ...
أنا في قلبي صورتك
كل ما جابوا سيرتك
تزداد بي شجوني ..
ويجفو النوم عيوني
ويزحم قلبي حبك
يا المنعوك زيارتي
هم شاعرين بحالتي
وجاهلين مكانتي
لكن التقاليد
حجبت عني شخصك
منعونا التلاقي
لكن رغم ذلك
ظل هوانا باقي
أسأل طيف خيالك
عن فرط اشتياقي
وأسأل نور جمالك
عن نار احتراقي
طبعا يا ملاكي
لو يرضيك هلاكي
أنا لا أعصى أمرك
منعوك و حيروني
أبوا ليك يذكروني
ليه يا حبيب أراهم
زايدين في جفاهم
من شدة قساهم
مانعين التفاهم
برضي أقول ...
عساهم يسمحوا لي بوصلك
|
Post: #90
Title: Re: اغنيات لفك الدبرسة
Author: سناء الصباغ
Date: 10-20-2010, 11:49 AM
Parent: #89
أداء رائع لأغنية من الزمن الجميل
قلت أعمل ليكم بيها Break شايفاكم كتّرتو النصوص
وخايفة عليكم من الرتابة .. حبة تغيير ليكم للشكل .. وليس المضمون طبعا
http://www.youtube.com/watch?v=UdSoAdHq2uU
|
Post: #91
Title: Re: اغنيات لفك الدبرسة
Author: كمال الشادي
Date: 10-25-2010, 08:07 AM
Parent: #90
الدكتورة الغالية سناء الصباغ
التحيات العطرة
والله أول مرة اتأكد إنو البوست ده الاسمو ( اغنيات لفك الدبرسة )
ممكن يفك الدبرسة
كتر خيرك في الفيديو الراقي ده
بالنسبة لي أول مرة اسمع هذه - زينه افتيموس
صراحة حاجة جميلة
كتر خيرك سناء
تحياتي
|
Post: #92
Title: Re: اغنيات لفك الدبرسة
Author: عمر المهدى
Date: 11-30-2010, 04:54 PM
Parent: #91
الدكتوره سناء لك التحايا
ومثلها للحبيب الشادي
بعد ان عشنا مع الاسمرالمنتج
بغير سمر نعود للنصوص علها تجد
صدى وتمسح عن احد قليل من الدبرسه
اليكم علي المساح
غصن الرياض المايد
يا غصن الرياض المايد
يا الناحِلني هجرك وانت ناضر وزايد
تهجرني ليه.. وأنا ليك رايد؟
يا غصن الرياض المايد
ما أظن عن غرامك لو أموت ما حايد
سهران ليلي طال و العين صِحت ما قايد
تعبان قصدي ليمك، وإنت ناضر وزايد
يا الهاجر جفيتني بنظرة لي ماك عايد
شوفتك زي هلال العيد، وفيهو بعايد
أنا و حبك ترعرعنا ونشأنا ندايد
من زمنا قِبيل، أيام قُلال وعدايد
ما خلِص القديم، و تبين مصايبو جدايد
حِن يا حبيب .. كفاي مُر العذاب وشدايد
يا خُلاصة الحواري الـمن جِنان وخوالد
حُسنك ليك يدوم، لا أم تلِد لا والد
راسخ في ظلال مجدو التليد التالد
يا الـلابس العفاف حلية وعقود وقلايد
|
Post: #93
Title: Re: اغنيات لفك الدبرسة
Author: عمر المهدى
Date: 12-26-2010, 04:30 PM
Parent: #92
لكل الاحباب
قام محمد بشر
هز فوق تيجانن
سل سيفو وكشر زي بدر التمام
كل الاغنيات تحمل العميق من المعاني
المفرحه والمفيده التي تسمو بالروح الانسانيه
وخاصه تلك التي تدعو لمكارم الاخلاق
اليكم من اجمل الصفات التي يمدح بها صاحبها
الشاعر الامي
مابخاف من شي برضي خابر الـمُـقـدّر لابـد يـكـون
ان اتـاني الهـم جيشو دافر يلـقي ياخِلاّي صبري وافر
يلـقي عـقلي التام ليه خافر يلقي قلبي شجاع ما جَبُون
بالعِـدا مـعروف مـابـبادر مـابخون الجار ماني غادر
مـابـقول للناس مثلي نادر بـل بـقول للخالق شئون
مـاعصيت مولاي ماني فاجر لا و لا بـالـعـالم بـتاجر
نـفسي يا احـباب ليها زاجر لـم اكون كل يوم ليّ لون
الثـبات مـعروف لَيْ مُعاصر لـو بقيت في داخل مَعاصر
والإلـه غـير شك ليّ ناصر رغـم انف الواشي الخؤون
قول لِي شاهد الزور فيم سائر هّـدي روعك قبل الخسائر
يـاما قـبلك عـميت بصائر مـن لساني وقولي الهتون
قول لي اهل الجور والمساخر مـافي اوّل مالـيـهو آخر
مـا بدوم العـز والمـفـاخر و ما بدوم الظل و الحصون
عـن لسـان الحق ماني نافر و ما جحدت الخير ماني كافر
مـاضمرت السوء ماني حافر للـصديق هاويات السجون
|
Post: #94
Title: Re: اغنيات لفك الدبرسة
Author: زهير الزناتي
Date: 12-26-2010, 05:29 PM
Parent: #93
يا سلام علي الغنا الطاعم يا ود المهدي ... متخيلكم واقفين لسه في الرمضانات ... جيت لقيت مصطفي ونانسي عجاج وما شاء الله ماشين كويس وقريب حا تصلوا ناس احمد الصادق وحسين الصادق ...
|
Post: #95
Title: Re: اغنيات لفك الدبرسة
Author: عمر المهدى
Date: 12-27-2010, 07:32 AM
Parent: #94
ابو الزوز لك التحيه
انا زي ماقلت ماعندي قشه مره
كلو بنسمعو ولاتوجد لدينا آراء مسبقه
بنسمع احمد الصادق وحسين اخوه (بعجبني اكتر)
لكن في البنيات الجداد لو لقيت عافيه في التلفزيون
مابفوته وحسب تقديري من اميز الظاهرين في الآونه الاخيره
بتغني باحساس عالي وصوته قوي وصافي
|
Post: #96
Title: Re: اغنيات لفك الدبرسة
Author: محمد صديق
Date: 12-27-2010, 10:15 AM
Parent: #95
سلامات يا ناس
Quote:
فترة طويلة من الوقت كنت أعتقد إنو ما إنكتب شيء في الغناء السوداني أجمل من المقطعين ديل
الاولاني :
تبقى سيرتك هي ا لكلام
وتبقى صورتك هي الرؤى الحلوة البعيشها
في صحوتي أو حتى في عز المنام
التاني :
أخاف شوق العمر كلو
يفاجئك يوم في عيني |
ما عندنا كلام خلاف كده...لكن رايك شنو فى دى:
وصوتك كان يهدهد روحى
ويحملنى بجناح اغر
يحلِّق بى حيث لا امنيات تخيب
ولا كائنات تمر.
|
Post: #97
Title: Re: اغنيات لفك الدبرسة
Author: الرشيد بابكر
Date: 12-27-2010, 10:41 AM
Parent: #96
و أنا برضو ما عندي كلام...
لكن دي قصيدة كل تحاول تنتقي منها بيتين أو بيتين...
تجد نفسك مجبرا أن تختارها كلها...
وشوشنى العبير ..فانتشيت
وساقنى الهوى فما أبيت
يد الحرير أرتعشت بكفى
فبكيت من رقتها..بكيت
صبية ..العطر يشتهيها
أمذنب أنا اذا اشتهيت؟
جدائل الليل على كتفيها
تهدلت حولى فما اهتديت
أجمل منها ما أحتوى
فالعبق الصادح ما أحتويت
حبيبتى أغرودة العذارى
ورنة الأفراح ان غنيت
لا تسألنى كيف كان الملتقى
وكيف فى دروبها مشيت
وكيف طاف الثغر فى ابتهال
وكيف فى محرابها صليت
سر عميق حبها بقلبى
ما قلته للناس ما حكيت
فان روى الغيثار سر قلبى
قولوا ما قلت وما رويت
لكنه حين بكى حنينا
بكيت من رقته ..بكيت
|
Post: #98
Title: Re: اغنيات لفك الدبرسة
Author: عمر المهدى
Date: 12-27-2010, 02:45 PM
Parent: #97
ضنين الوعد
كلمات صديق مدثر
يا ضنين الوعد أهديتك حبي
من فؤاد يبعث الحب نديا
ان يكن حسنك مجهول المدى
فخيال الشعر يرتاد الثريا
كلما أخفيته في القلب
تنبي عنه عيناكا ولا يخفى عليا
أنا إن شئت فمن أعماق قلبي
أرسل الالحان شلالا رويا
وابث الليل اسرار الهوى
واصوغ الصبح لون بابليا
لا تقول إني بعيد في الثرى
فخيال الشعر يرتاد الثريا
يا ضنين الوعد
**
كان بالأمس لقاءنا عابرا
كان وهما كان رمزا عبقريا
كان لو لا أنني ابصرته
وتبينت ارتعاشا في يديا
بعض احلام التي انسجها
في خيالي واناجيها مليا
يا ضنين الوعد
**
ومضة عشت على اشراقها
وانقضت عجلى وما أصغت إليا
كلمة خبئتها في خافقي وترفقت بها
برا حفيا . . من دمي غذيتها
حتى غدت ذات جرسا ياسر الاذن شجيا
وافترقــــــــــــــــــنا
وبعيني المنى غالها
الدمع وما ابصرت شئيا
ان تكن أنت جميلا فانا
شاعرا يستنطق الصخر العصيا
ان تكن أنت بعيداً عن يدي
فخيالي يدرك النائي القصيا
لا تقول إني بعيد في الثرى
فخيال الشعر يرتاد الثريا
كلام زي العسل
لكن الواحد لما يفارق
وعيونو تملأ دموع حتي لا يستطيع الرويا
برضها قويه شديد
وافترقــــــــــــــــــنا
وبعيني المنى غالها
الدمع وما ابصرت شئيا
وشوشني العبير وانتشيت
لكم مودتي
|
Post: #99
Title: Re: اغنيات لفك الدبرسة
Author: عمر المهدى
Date: 01-02-2011, 11:12 AM
Parent: #98
عام سعيد وعمر مديد
حيرت قلبي معاك - كلمات محجوب سراج
غناء ثنائى العاصمة
حيرتا قلبى معاك خليتو بيك مشغول
يا احلى من ضماك مابصح عذابو يطول
ويطول ليالى نواك حيرتا قلبى معاك
ياما قضيت ايام ابنى الامانى عليك
واترجم الآلآم غنيات عسى يرضيك
اخفى الدموع عنك واضحك امام عينيك
وتفيض عيونى حنان لمن تعاين ليك
اصلو العيون حباك حيرتا قلبى معاك
يا عاطفه فى الوجدان يـا صورة ساكنه العين
يا بمن نور محياك اسعدتا كل حزين
طاوعتا ظنك ليه فرقتا بين قلبين
وقطعتا حبل الود الكان زمان موصول
يا حبى ما اقساك حيرت قلبى معاك
عاهدتا قلبى اعيش راضى السهاد والبين
امكن اصـــل فـى يـوم غاية الامل يا زين
وآخر طريق الشوق السرنا فيهو سنين
بين الأمل يا حبيـب والخوف من المجهول
من إنى ما القاك حيرتا قلبى معاك
|
Post: #100
Title: Re: اغنيات لفك الدبرسة
Author: عمر المهدى
Date: 01-09-2011, 02:47 PM
Parent: #99
قمر الزمان
كتبت ليك ... لا بينى بينك ريدة ..
لا قصة غرام
إخترت ليك ....أجمل حروف وأصدق فواصل
نادرة فى لغة الكلام..لا قصدى ألهو معاكى
بى كلمات غنا ... لا شعرى ليك مرجيحة
من شعر الغمام ... كتبت ليك والله يا قمر الزمان
شان جيتى بى زمن المحنة ... وشفت فى عينيكى ..
حس أهلى القُدام
كتبت ليك وأنا جايى ... فى زمن الشقا
المرسوم على وش ... الثوانى .. مظللا
تتمدد الساعات سنين ... تتفتح الأحزان غريبة .. ومذهلة
وأشتاق أفتش نسمة .. . فى الزمن العذاب
وأيامى من كتر الأسى ... وكتر العزوف .. والإغتراب
صارت حروف مترهلة ... لحظات أسيفة .. ومهملة
كتبت ليك .. ووقفت ليك ..
لامن لقيتك جايه ... من قلب الطريق
ولمحت فيك ... راحة المشاوير البعيدة
ولنفحة النسمة الحنينة ... الجاية من جوف المضيق
حسيت عجايب الدنيا إتلمـت ... بقت جايـّانى من عصراً سحيق
عينيكى حس أطفال بنادوا ... القمرة لى الغايب .. يعود
وجبينك الضوّاى ... حجا الحبـّوبة فى الزمن السعيد
يا قمرة اقلبى السنسنة الحمرة ... وشوفى ليه ما جا
وأنا فى قساوة الموحش
الزمن المكهرب .. بى الحريق
أنا حيلتى أيه
قولي لى يا قمر الزمان
غير أتـّكى .. وأحلم معاك
وأحضن أماسى الصحو ..
والأمل البريق
|
Post: #101
Title: Re: اغنيات لفك الدبرسة
Author: محمد صديق
Date: 01-10-2011, 02:12 PM
Parent: #100
سلامات يا ناس
ود المهدى ...مشتاقين
ياخى انكت لينا ..افكارى تايهة حقت ابراهيم خوجلى
|
Post: #102
Title: Re: اغنيات لفك الدبرسة
Author: عمر المهدى
Date: 01-11-2011, 07:01 AM
Parent: #101
ياكوتش لك التحايا ونحن بالاكتر
لكن افكارنا تايهه من اشياء عديده
قربك لي سعادة شوفتك لي مفيدة ..
بشكيلك حظوظي وظروفي العنيدة ..
يا الناعسات عيونك لي عيناً سهيدة ..
بي حالي وسهادي نجوم الليل شهيدة ..
افكاري تايهة ..
يا جميل انت جافي نيراني بتزيدا..
شايل قلبي عندك والروح انت سيدا..
يا عقد الجواهر يا معنى القصيدة ..
تضرب بي سهامك ارواحنا وتصيدا..
افكاري تايهة ..
حبك يا حبيبي اصبح لي فريضة ..
يا الوصفك مكمل يا الذاتك فريدة ..
انت سلبت روحي وانا روحك بريدا
شفنا الصيدا عارت من جيدك وريدا..
افكاري تايهة ..
الروح تهوى ذاتك يا حبيب وانت عيدا..
والبدر انت هابك من حسنك بعيدا..
نظراتك دواي وما منظور تعيدا..
لو طيفك يزورني دي الليلة السعيدة ..
افكاري تايهة
في اوصاف عديدة ظهرت في قوافي وفنون جديدة ..
..
|
Post: #103
Title: Re: اغنيات لفك الدبرسة
Author: عبد الدائم سيد أحمد
Date: 01-11-2011, 07:05 AM
Parent: #102
اسمع
غناء ناس الاقاليم والمندلين ده ما بينفع معانا
شوف لينا حاجة خفيفة كده لحسين الصادق ولا طه ولا نجاة غرزة ..
ــــــــــ
انت بتندسى وتجى داخل هنا مالك من غير سلام
|
Post: #104
Title: Re: اغنيات لفك الدبرسة
Author: عمر المهدى
Date: 01-11-2011, 07:13 AM
Parent: #103
عبد الدايم لك سلام كامل الدسم
ابراهيم خوجلي ما من الاقاليم دا من توتي قلب الخرطوم
وبعدين الاغنيه طلب خاص من الكوتش وكنت اعول
على انك حاتنزلها لينا فيديو في بت صغيره من نجوم الغد
بتغنيها حلو وبدون مندلين هاتا لينا
يسعد صباحكم
|
Post: #105
Title: Re: اغنيات لفك الدبرسة
Author: محمد صديق
Date: 01-19-2011, 12:12 PM
Parent: #104
سلامات يا ناس
Quote: ابراهيم خوجلي ما من الاقاليم دا من توتي قلب الخرطوم
|
شكراً يا ود المهدى ...
بعدين عبدالدايم ده بتاع مماحكات ...
هسة كان الاغنية دى نزلها هو كان حيقول لينا (نضِّفوا إضنينكم)
|
Post: #106
Title: Re: اغنيات لفك الدبرسة
Author: عمر المهدى
Date: 03-05-2011, 03:36 PM
Parent: #105
بمناسبه طول الهجران تحيه لكل الجدعات والجدعان
اخادع نفسى بى حبك
أخادع نفسي بي حبك وامنيها
واهرب حتى من ذكراك
الاقيها
دموع الحسرة في عينية اخفيها
نار الشوق اقول الصبر يطفيها
اقول انساك وانسى شقاي لو قادر
وطول الغربة والحرمان بلا آخر
اسيبك كيف وانت الناهي والآمر
وكيف اصبر وعارف نفسي ما صابر
شبابي معاك ما أضيع امانيه
وعمر هواك ما أقصر لياليه
رضيت بي ظلمو أحياه أقاسيه
ولو خلاني ما بقدر اخليه
تخاصم وتفتكر إحساسي اتبدل
وقايل قلبي مال لي سواك واتحول
وحاة ريدتنا وحياة الهوى الأول
بنرجع تاني لو زاد الجفا وطول
|
Post: #107
Title: Re: اغنيات لفك الدبرسة
Author: محمد صديق
Date: 03-08-2011, 01:11 PM
Parent: #106
سلامات يا ناس
سلام عليك ايها الاخ وزوارك الكرام
والبركة فى جيتك وجيّتى.
|
Post: #108
Title: Re: اغنيات لفك الدبرسة
Author: عمر المهدى
Date: 03-31-2011, 10:44 AM
Parent: #107
أشعار خليل فرح
بادي محمد الطيب
طير الوِدي نزَّاح تسابق الشاردة
بتجوب الفضا وتثكل ثكيل الفارده
نياتك سلام ما حارة عينك بارده
ميال للطبيعة والهبيبة البارده
أنيس الرياض ما بتخفى عنك شارده
ويكيِّف غريدك زي دموع الحارده
جفّال من حبايبك وما بتشيقك عارده
والنيل بيك تآنس والصحاري الجارده
قول لي ما وراءك يا عصام بالواحدة
عاطفتك كريمة وبالخبير ما جاحدة
لا زال النخيل في توتي مادي الشاحده
وشمبات لسه ترفل في نعيمة وجاحده
كنانة آمون مشغولة قايدة وشايدة
من ولدانه بي تلك القصور الشايدة
هديك الفلايك وديك (لوتس) و(عاندة)
وداك عاشق مدلل وديك حبيبة معاندة
ناس الأم حنان وإن مني متعوا الرايده
ما حسبو لي أنا وما أظنوا فيَ الفايده
زينتي وشينني عاد إياها فوقن عايده
والأيام ظروف صايدة وتكون ما صايده
التحيه للزوار واهداء خاص للكوتش محمد صديق
والمشتاقين للطبيعه والهبيبه البارده
|
Post: #109
Title: Re: اغنيات لفك الدبرسة
Author: عمر المهدى
Date: 04-28-2011, 01:54 PM
Parent: #108
اغنيه اللحو خايف عليك منك سمعتها عند احمد الصادق حاجه روعه
زول ينزلها من احمد الصادق وكما تعذر علي ولو اللحو مابطال ذاكرو
الكلمات لحد ماتنزل الاغنيه فيديو لكم غالي الاماني
خايف عليك منكـ ... يا الما بتعـرف الخوف
خايف غيوم ظنكـ ... تحجب عليك الشوف
وخايف عليك منك انا في هواك رحال
حارمني من حنك شاجيني بي ترحال
ارحل عليك بالريد ترحل تسيبني في حال
وابراك زي غنوة تشرح لسان الحـال
وأبراك في الاوتار من غنوة لى غنوة
وانت القريب للدار يصبح لقاك منية
اقصد هواك اشعار تقصد جفاي عنيه
لوما الغــرام اسـرار كان بوحتا للدنيا
ويا المابتعرف الخوف يا البجفاك بعيد
جرب غلاوة الريد صدقنى تبقى سعيد
ماتتبع الاوهام الظن خصيم الريد
واعلم مع الايام الريد مصيره يريد
|
Post: #110
Title: Re: اغنيات لفك الدبرسة
Author: محمد صديق
Date: 05-02-2011, 08:10 PM
سلامات يا ناس
ودالمهدى الغنّاى....سلام
مرور للتحية وتجديد النشاط.
|
Post: #111
Title: Re: اغنيات لفك الدبرسة
Author: عمر المهدى
Date: 06-23-2011, 05:32 PM
Parent: #110
جاهل وديع
جاهل وديع مغرور
فى احلام صباه
نايم خلى ومسرور
ماعرف الهوى
فى سورو داخل سور
فى روض الزهور غنى
قصور فى قصور
آية جمال مبهور
احلام الربيع
فى هيبة المنصور
باهى الدلال موفور
محجوب الخدور
ماهو الخليع وسفور
يذداد نفور فى نفور
واصبح قلبى فى
ايدو اليمين عصفور
لو ينفع المحزون
مالى ومال هواهو
الضامر المفزور
قاسى ومنيع مابزول
لكن دابو سال
جاهل صغير معزور
خلى الهلال فى حجور
متقلب نجوم
لافح حزارلايجور
مابرحم المهجور
محسور الجمال
قال برضى حكم
الجور
ناعس لواحظ حور
هاروت لو رآهن
مثلى كان مسحور
فاق الحسان الحور
فى خدو الزهور
زاهية وجواره بحور
|
Post: #112
Title: Re: اغنيات لفك الدبرسة
Author: محمد صديق
Date: 07-02-2011, 09:59 AM
Parent: #111
سلامات يا ناس
يا ود المهدى حمداً لله على السلامة
ياخ ما تغيب كتير ...المنبر ده
امشاركة فيهو قليلة...وفى ناس
قلال شايلين شيلتو ...ما تنقصهم .
شوف لينا عليك الله ...الشاغل الافكار للشفيع
ويا ريت يكون معاها صوت.
|
Post: #113
Title: Re: اغنيات لفك الدبرسة
Author: عمر المهدى
Date: 12-27-2011, 03:32 PM
Parent: #112
بخاف من ايام الصبا كلمات تعبرعن سامعها وينصب نفسه شاعرا لها بصوت الرائع ابو عركي
وظنه في ليله من ليالي الزقازيق الشعريه استضاف شاعرنا مختار دفع الله شاعرها يمكن صاح ويمكن لا
بخاف
حسن السر
أخاف أسال عليك الناس
وسر الريده بينا يذيع
اخاف أكثر كمان ياغالي
من إيديّ إنت تضيع
وأعيش بعدك حياتي جفاف
مواسم ريده مافي ربيع
بخاف يا إنت لوجيتك
ألملم في خطاوي الشوق
وأزور بيتك
يقولو عليّ حبيتك
بخاف لوبرضي غبت عليك
تقول نسيت وجافيتك
بَهـِم لو صدفه لاقيتك
درب حِـِلـِّتنا جابك يوم
تشيل ياروحي ترمي اللوم
عليّ وتزيد همومي هموم
تقال جافيك وأنا نسيتك
أريت تعرف
حنيني إليك ياريتك
كمان تعرف
لحدة وين بعزك
وفي أعماقي حسيتك
ياريت إنت تعرف
وبس خايف إذا جيتك
حكاية الريده تمشي تذيع
ومن إيديَّ إنت تضيع
وأعيش بعدك حياتي جفاف
موسم ريده مافي ربيع
|
Post: #114
Title: Re: اغنيات لفك الدبرسة
Author: محمد صديق
Date: 12-28-2011, 06:34 AM
Parent: #113
سلامات يا ناس
عوداً حميداً
Quote: شوف لينا عليك الله ...الشاغل الافكار للشفيع
ويا ريت يكون معاها صوت. |
|
Post: #115
Title: Re: اغنيات لفك الدبرسة
Author: عمر المهدى
Date: 12-28-2011, 12:11 PM
Parent: #114
العزيز محمد اليك نص الشاغل الافكار والنص التاني بعد شويه
الشاغل الافكار
محمد عوض الكريم القرشي
الشاغل الافكار سلمتو قلبي وسار هل من عوده لي
قابلتو دون ستار سعدت بيه مرار
اخلص لي والاخلاص يا ربي دومو
ولمست فيه شعور لغيري ما معروف
وتراني ليل ونهار
انا اشكي وابكي الحبيب الشالو القطار
يلاك نزور الديار الفيها قطف الثمار
ريدنا النبيل يا حليلو يا حليلو ليلنا الطويل
انا كم رشفت رضاك من فاهو كالسلسبيل
تشهد نجوم الليل تشهد زهور الخميل
وفيما يجدي الملام او يسمر السمار
هل نلمح ظبي الديار
صدفه الحبيب اختار قربي وهوائي شعار
عرفتو اني محب انظم هوائي اشعار
عرفني انو دان لقلبي دون إشعار
فتعال يا أسفار يا الشاغل الافكار
نمرح مع الاطيار والحب يصفو لي ..
|
Post: #116
Title: Re: اغنيات لفك الدبرسة
Author: عبد الدائم سيد أحمد
Date: 12-29-2011, 06:22 AM
Parent: #115
| Quote: والنص التاني بعد شويه |
دى ما ياها الدبرسة زاتا ...
ما عندكم مهندس صوت يا كافى البلاء ....
|
Post: #117
Title: Re: اغنيات لفك الدبرسة
Author: عمر المهدى
Date: 01-11-2012, 03:05 PM
Parent: #116
نبدا من البدايه نامل ان تكون في الاعاده افاده وتفك الدبرسه
ياناس ياناس اجيبوني عن سؤالي
http://youtu.be/0qcbih3nNUo
|
Post: #118
Title: Re: اغنيات لفك الدبرسة
Author: محمد صديق
Date: 01-11-2012, 03:19 PM
Parent: #117
سلامات يا ناس
| Quote: نبدا من البدايه نامل ان تكون في الاعاده افاده وتفك الدبرسه |
الشاغل الأفكار : صورة وصوت .وبالميت : صوت.
|
Post: #119
Title: Re: اغنيات لفك الدبرسة
Author: عمر المهدى
Date: 01-11-2012, 03:57 PM
Parent: #118
ياكوتش تحياتي واليك الشاغل الافكار من ضرع امها
http://youtu.be/gag843B917o
|
Post: #120
Title: Re: اغنيات لفك الدبرسة
Author: عمر المهدى
Date: 01-11-2012, 04:13 PM
Parent: #119
ياكوتش فوق البيعه نديك شويه بيتزا يمكن تعجبك واهي برضه الشفيع آخر موديل
وبنيه غنايه بالجد وتغني زي ماوصفه الدكتور بلا تحريف زد على ذلك اظن ان صوتها رائع
http://youtu.be/oxUdN81xQk4
|
Post: #121
Title: Re: اغنيات لفك الدبرسة
Author: الرشيد بابكر
Date: 01-12-2012, 06:29 AM
Parent: #120
ود المهدي صبحك الله بالخير و السرور
يا سلام على البيتزا ياخي...
شموس دي غناية جدا و عندها صوت جميل...
بس ان شاء الله تعجب الكوتش...
|
Post: #122
Title: Re: اغنيات لفك الدبرسة
Author: عمر المهدى
Date: 01-15-2012, 05:45 PM
Parent: #121
الحبايب اليوم معلقه معاي مابقدر ابوح وهي من ارشق الاغاني
بايقاع راقص مفرح انيق وقصدت تكون من منابعها
http://youtu.be/z_qSwAR2QJM
|
Post: #123
Title: Re: اغنيات لفك الدبرسة
Author: محمد آدم النور
Date: 01-16-2012, 06:26 AM
Parent: #122
بالله الزول لمن يكون مدبرس يجي هنا!!!!!
يعني البكان دا للمتعة و الترويح
أثابك الله يا هذا
ما بقدر أقول أنا ما داير أصرح
يمكن قولي يروح ويمكن قولي يجرح
يمكن شي يفوح والناس ما بتريح
ما بقدر أقول أنا الزول داك سباني
ما بقدر أقول الزول داك سباني
والشوق كان رسول حرك لي جناني
أخاف الناس تقول تقول عن حناني
ولا يوم يزول وين ألقاهو تاني
ما بصرح يوم بأسمو ما بقول لي الناس جميل
أخشى أنو يجيبو سيرتو ويحكو عنو كل حين
ما بقول لي الناس حكايتو وبحياتو في المتين
بعتا العمر عشان حياتو وباقي العمر عليا دين
حنانك حبيبي وين حنانك حنانك يا حبيبي الروح عشانك
سيب الجفا سيبو أرحم كفا أنا قلبي داب من العزاب
وعمري ضاع مع السراب
|
Post: #124
Title: Re: اغنيات لفك الدبرسة
Author: الرشيد بابكر
Date: 01-16-2012, 06:43 AM
Parent: #123
صبحك الله بالخير يا ود المهدي...
حدثتني والدتي و أكد لي والدي ان فنانة زواجهم...
كانت الفنانة الراحلة منى الخير...
أضيئت مئات الرتاين في الكوه فأحالت ليل الكوة نهارا...
و صدحت منى الخير في ميكرفون تم تشغيله بالبطارية...
بصوت قوي رصين حتى يشاع أن أهل الكريدة بالضفة الأخرى من النيل..
لم يحتاجوا لكي يعبروا النيل الى الكوة...
لأنهم كانوا يسمعون بوضوح و هم في مكانهم منى الخير و هي تغني...
لكن والدتي تحت كده كانت تفضل أبراهيم عوض..
و تردد أغنياته سرا..لقد مسكتها متلبسة عدة مرات...
يبدو ان والدي لم يشاورها في فنان العرس ده...
و ده طبيعي لأنه لم يكن متاحا له ملاقاتها...
و ربما كان شايف نفسه جايب (سيلين ديون)...
لما جاب منى الخير في العرس...
أنا ورثت عن أمي حبي لأبراهيم عوض...
أعشق كل أغنياته و أرددها علانية...
أجيد غناء أغنياته و أنا داخل الحمام...
و لكني عندما أخرج لا أعرف ماذا يحدث لصوتي...
ربما يصبح الصوت رخيما بفعل الماء...
و يتغير بمجرد انقطاع الماء...
قديتكم ...مش؟
انت القال ليك تجيب أبراهيم عوض منو...
تحية ليكم يا ود المهدي و يا جلا...
|
Post: #125
Title: Re: اغنيات لفك الدبرسة
Author: عمر المهدى
Date: 01-16-2012, 07:30 AM
Parent: #124
الحبيب جلا بي زيارتك بيتنا نور كلو زينه جاتنا فرحه
مرحبا بك لو داير تصرح او عاوز تقول او عاوز تفك الدبرسه
ابعد الله عنا وعنكم ماعصلج منها وماسهل لك مودتي
|
Post: #126
Title: Re: اغنيات لفك الدبرسة
Author: عمر المهدى
Date: 01-16-2012, 07:44 AM
Parent: #125
بى زيارتك بيتنا نوّر
والله نوّر
كله زينه
جاتنا بسمه فايحه نسمه
همسه حلوه فى عنينا
والله سمحه
لونا قمحه
عاد خدوده يا حلاتن بى حنينا
يا حلاته خصله تايه
ومره سارحه
ومره نازله فوق جبينا
بيتنا نوّر...بيتنا نوّر
دارنا أصبح ليكى دار
فى بعادك كم تعبنا وكم شقينا
شوفى كيف لهفتنا باينه
يا حلاتك بى مشاعرك تحتوينا
تسعدينا
تحكى لينا
كيف بدينا وكيف مشينا
خطوه خطوه
أحلى غنوه
قصه يروى الشوق سنينا
بيتنا نوّر...بيتنا نوّر
إنتى رسمك فى قليبنا
حاشا غيرك ما عرفنا وما هوينا
سيبى قلبك بس معانا
وأعزرينا إحنا لسا ما روينا
نظرات عيونك
فيها نسرح
وليها نشرح
كل هوانا وما علينا
كم حلفنا نعيش نحبك
ياما حبك زاد عمرنا الباقى لينا
بيتنا نوّر
رشيدنا لذكرى الحبايب والمؤازره والكلام الحلو
اهديكم هذه الاغنيه التي تدغدغ مشاعر الكل
وترتبط بزياره المحبوب لبيتك لاول مره فتجد ان الدنيا
قد ازدانت وتعطرت بالقدوم الاجمل لك امنياتي
http://youtu.be/kISS3P5ph2A
|
Post: #127
Title: Re: اغنيات لفك الدبرسة
Author: محمد صديق
Date: 05-18-2013, 10:09 AM
Parent: #126
سلامات يا حلوين
وين الزول سيد الحوش ده...
الناس دى كلها مدبرسة تعال فكّها ليهم .
|
Post: #128
Title: Re: اغنيات لفك الدبرسة
Author: عمر المهدى
Date: 12-15-2013, 11:14 AM
Parent: #126
ضليت : كلمات : قاسم ابو زيد
ضليت هرب مني الامل جنيت
جافني الشروق حنيت
وكنتي معاي في لمة دليب شاشاي
وفي ايقاع حشى المردوم
وفي جيد الزمن سوميت
مرقت على محطات السفر غربة
وما لقيتك امل شارد
مع انك معاي في زحمة المشوار
وحتى يقيني عاد من تاني
صحاك يوم حنين ذاتي
نجمة الفرحة يا عايد
تعالي معاي
من زفة نفس مسدار
ولا جلست فرح كانت
ولاطعم الشقا الروح
خطاي هانت
انت معاني شايلاها القوافي معزة
في عمق الفرح دوبيت
وكت ضليت قعدت براي
حسيتك بتطلعي من نفسي طورية ضامة الطين
من دمعات وجع طول
ندى العرق البنادي حنين
واناديك وانت في ذاتي
مخاوف سكة آهاتي
مداين قرية لابس القمرة شامة ضو
يحن يغشاها مرة شروق
يخدر من عرق تربال
يرتاح في ضليل واسوق
ينادي تراب
يغازل خدرة السيال
تطلُ شروق
تكون قمر السعد ضويت
|
Post: #129
Title: Re: اغنيات لفك الدبرسة
Author: محمد صديق
Date: 12-15-2013, 12:44 PM
Parent: #128
أهلاً يا زول يا رائع..
الحمد لله إنك طيّب.
وما تغيب .
|
Post: #130
Title: Re: اغنيات لفك الدبرسة
Author: عمر المهدى
Date: 05-19-2014, 02:16 PM
Parent: #129
عيونك علمن عينى بكى الخنساء ايرضيك؟
عيونك فيها مايمنع عيونى عن الغزل فيك
خدودك فيها ما يضاعف هيام قلبي المصافيك
وقد خطفت مياه بصرى بلمعان در عقيد فيك
فهذا كله حاصل الا يا سلمى يرضيك
انا التذليل موالينى وانت العز مواليك
جمر الحب محلينى وفن الصيد محليك
حويتى الرقة والعفة بها زادت معاليك
فاصبح كسبك العظمة وكسبى الاشتياق ليك
ليتنى كنت مملوك واقف بين يديك
لترعينى وارعاك واتغزل فى خديك
الهى يفنى عزالى ويسكنى فى واديك
الهى يفنى كل واشى على سلوانى يهديك
مهما كنت اهواك واخوض بحر الهيام بيك
وانتظر النداء منك لاتسرع بلبيك
وافعل ما تريديه بأحوالى سانبيك
وانظر فيك هلالين الا وهما حواجبيك
كنت احب اقول وصفك واقول هذى اغانيك
لكن ضاعت امالى وعلى عزت معانيك
اتسمحى مرة نتلاقى لتدنيني وادنيك
وعلى ما نلت من عظمة بروح الحب اهنيك
https://soundcloud.com/mahammed-awad-mostafa/fixxdbumjt8i
|
Post: #131
Title: Re: اغنيات لفك الدبرسة
Author: محمد صديق
Date: 05-20-2014, 08:44 AM
Parent: #130
مراحب بالحبيب ود المهدى ...
وعوداً حميداً ...
وشكراً على الهدية الصباحية الطااااااااااااااااااااااااعمة .
|
Post: #132
Title: Re: اغنيات لفك الدبرسة
Author: عمر المهدى
Date: 12-08-2014, 12:31 PM
Parent: #131
يالرحتو طولتو وعلي ماسالتو
دعوه للعوده
https://soundcloud.com/oma-8/sjcoplw1qpor
|
Post: #133
Title: Re: اغنيات لفك الدبرسة
Author: محمد صديق
Date: 12-09-2014, 12:39 PM
Parent: #132
.
Quote: يالرحتو طولتو وعلي ماسالتو
دعوه للعوده |
Quote: يالرحتو طولتو وعلي ماسالتو
]
جاهزين .
|
|
|