ذكرياتى مع ود الماذون .اوراق لم تنشر عن بكرى الشين ( اليوم داك قطع شك انحنا سكرنا)

بالاذن من ود الماذون اروى هذه القصة التى حدثت فى عام 1991 وتحديدا فى عيد رمضان من تلك السنة فى شقة الثنائى الرائع بكرى الشين ووليد حقوق
وليد طبعا من اولاد بانت بامدرمان وبكرى من بانت مدنى يعنى شقة اولا بانت ولكن فى تلك الفترة كان اخونا وليد حقوق من مواطنى منطقة الوابورات ببحرى واستضاف احد ابناء منطقته الذى كان يعمل بالاسماعليلة فى تلك الفترة واظن ان لم تخنى الذاكرة ان اسمه كان (خالد) واطلقنا عليه خال راستا بسبب طريقة تصفيفه لشعره
المهم انو خالد راستا قرر ان يدخل لمحة سوداينة على العيد واصر ان (يخمر ) شربوت على الرغم من ان العيد هو عيد رمضان ونحنا طبعا ما فارقة معنا كنا ملموممين فى الشقة للمذاكرة وزنقة امتحانات وكان معنا اخونا ناصر جبريل – شقيق طارق جبريل - الشهير بناصر بلية ومعاهو بشير الشهير ببشير (خفة ) كانوا ضيوفا على الزقازيق فى تلك الفترة
فى نصف الليل طارت فوق رؤوسنا (باقة ) بعد ان انفجر الضغط بداخلها وحامت وحامت الى ان ركت اخر الامر فى الارض وكان السيد خالد راستا الوحيد الذى لم ينزعج من هذا الامر وسالناه قال (اكون كترت الخميرة شوية ) واتضح بانو اتى بعصير قصب وخت عليهو شوية خميرة بيرة منتظر انو يبقى شربوت فاصبح مادة متفجرة
ورغم تفجر هذه المادة الا ان راستا اصر على انجاز تجربته فاتى بعصير قصب مرة اخرى وقلل هذه المرة من خميرة البيرة وصبيحة العيد وكنا (مصبحين ) للصلاة بعدها جلسنا الى الكوتشينة يعنى بقى يوم مفتوح واصر راستا على تذوق الشربوت الخاص به ولم يكن امامنا الا الموافقة وبعد دقائق شعرت بلفة راس وكذلك اخونا بكورة الشين – الاثنين ما عندنا شغلة بالبهجة المغلفة فى الزجاج زى ما بقول زكى صديق مساعد – انا اختصرت الموضوع وقمت نمت ابوبكر اصر على ان يعرف ماذا جرى وكان يتحدث معى هامسا يا زول الموضوع دا شكلو سكر عديل وانا اقول ليهو ما اظن المسالة دى بتكون حرام دا عصير قصب
وبعد اسبوع واثناء مذاكرة بكرى الشين فى مادة اصول الفقة وجد فقرة واضحة جدا تقول من المسكرات ( العنب اذا خمر والبرتقال اذا خمر وكذلك عصير القصب اذا خمر ) فبات يصيح من اقصى الشقة يا ود الباشمهندس – تقديرا لوالدى الراحل عليه رحمة الله – فاجبت بعد ان اشتد الصراخ فى شنو يا ود الماذون فاتى مهرولا نحوى وهو يحمل الكتاب ويشير الى الفقرة ويصرخ – يا ود الباشمهندس اليوم داك قطع شك انحنا سكرنا –
فضلت ان ابدا بهذه القصة انتظارا لمعرفة ما قاله الوخان زهير الزناتى للشين بكرى فى التلفون عنى

عليك الله يا مجتبى مساحات الذاكرة العندك دى كان وظفتها صاح كان حلّيت مشكلة مواقف السيارات بدول الخليج قاطبة ، ياخى والله أدهشتنى بى هذه الذاكرة ... ما شاء الله تبارك الله ، الراجل إسمو خالد السر على ما أعتقد ، زول لذيذ وحبّوب ويتعامل مع الحياة وفق رؤيته الخاصّة جدّاً ، اليوم داك مجتبى نام فاغراً فاه مما جعل محمد حسن عبدالسلام يضحك بهستريا ، وكان الفاتح على بشير يغفو قليلاً ويصحو ليدخل فى نوبة ضحك وينام مرة أخرى.

Quote: وكان معنا اخونا ناصر جبريل – شقيق طارق جبريل - الشهير بناصر بلية ومعاهو بشير الشهير ببشير (خفة ) كانوا ضيوفا على الزقازيق فى تلك الفترة

ضيوف بيقعدوا 3 سنة يا مجتبى إطرشنا ماسمعنا بيهم ، ديل ضيوف الرحمن يادوبك إتمّوا شهر واقطعوا وشّهم.

مجتبي النضيف ...

ود الماذون ده واحد تاني الفاتح ليهو البوست ده ولا ياهو بكري حامد بعد البوست الأول ، ياخي ما تجهحه باكاتنا ... خليك في البوست الأول وأنقل المداخلتين ديل هناك ... خلينا نستمتع ....
وبعدين بكري ده يسألني الله آخر مره إتكلمت معاهو فترة طويلة ... ما تخليك شكاك ... والفي راسو صلعة ... يعمل زراعة .... (مثل جديد)

Quote: وبعدين بكري ده يسألني الله آخر مره إتكلمت معاهو فترة طويلة ...

إنت يا زناتى بى وبدونى الله سائلك سائلك ، هسى كان ميزانك كلو حسنات ، وجا مارى يوم القيامة جمبك عبد الوهاب وقال ليك ياخال ، ده موش سبب كافى تكب فى جهنم على وشّك ، ياخى وهبة ده خبرو شنو؟ والله يا زهير ما إتمنيت مزاملة زول من خارج الزقازيق قدر ما إتمنيت مزاملة وهبة الجميل.

موضوع التلفون ده طبعاً فرية منّى وشغل أركان نقاش حبّيت أهدد بيهو بادى لأنو بدأ إحرِّش فى مجتبى ، حكمة الله الطلقة الفشنك أصابت مجتبى .

Quote: والفي راسو صلعة ... يعمل زراعة .... (مثل جديد)

وقيل ( إعمل زراعة ومجتبى فاروق ، قصدى شارع فاروق - مثل صينى )

Quote: ضيوف بيقعدوا 3 سنة يا مجتبى إطرشنا ماسمعنا بيهم ، ديل ضيوف الرحمن يادوبك إتمّوا شهر واقطعوا وشّهم.

الله يجازي محنك يا بكور ..

خليتني قاعد أضحك زي المجنون ..

ــ

يا جماعة مثل هذه القفشات يطلقها بكور و هو ماشي ..

وحياة الله يا مجتبى
بوست احلى من ده ما شفتو ولا دخلتو
يا أخي القصص الرائعة والذكريات العجيبة دي كتر لينا منها خلينا نضحك
انعل ابو الضحك الما بيعرف يجينا هنا في البلد التعيسة دي
الله يجازي شيطانك يا مجتبى

Quote: الله يجازي محنك يا بكور .. خليتني قاعد أضحك زي المجنون .. ــ يا جماعة مثل هذه القفشات يطلقها بكور و هو ماشي ..

عليك الله يا عصام مجتبى ده موش بالغ لمّا قال ناصر جبريل وبشير خفّة كانوا ضيوف فى الزقازيق ؟ مع إنهم إكتسبوا شهرة وكانوا منتشرين أكتر من بعض طلاّب الزقازيق المغمورين ، ناصر وبشير بجمال دواخلهما إكتسبا محبّة الجميع .

Quote: بوست احلى من ده ما شفتو ولا دخلتو يا أخي القصص الرائعة والذكريات العجيبة دي كتر لينا منها خلينا نضحك انعل ابو الضحك الما بيعرف يجينا هنا في البلد التعيسة دي الله يجازي شيطانك يا مجتبى

حلوة عيونك وروحك يا أبو منار ، عليك الله لو عندك أى طريقة إجازة تزورنا فى البحرين واكيد ح تستمع