ياجماعة الخير..فيكم زول .. حصل . اكل رجلة عيون. ..معزومين معانا

اول الموضوع

امس رجعت الى البيت اخر الدوام وعشان انا زول مقاطع الماكولات الامريكية

ولزوم التوفير بصبر على الفطور الى ان ارجع الى البيت ياريت مارجعت.

عندنا واحد من العذابة جديد لجنج قال كان شغال طباخ فى فندق تو

استار فى احد فنادق العاصمة وقال ممكن يعمل رجلة انما ايه وقالو

الشباب الاخ المقصود بدا العمل فى الطبيخ قبل صلاة الظهر وكان شادى

حلتين واحدة فيها العدس وواحدة فيها الرجلة التى قطعها ربط ربط زى

لما يكون عندك كتاكيت وانا اعايين فى ساعتى وانتظر -مش بضحك- لما

رجعت البيت قبل ان اخلع ملابس الشغل وادخل فى جلابيتى الرمادية المكرفسة.

على طول جريت المطبخ ووجدت الحلة ملاينة طبيخ وفرحت فرح شديد لان

بيتنا زى زريبة الهوامل حتى العوائل الساكنين جنبنا لوالواحد زعلان من

مراته بجى بيتنا وبدخل المطبخ وبقدها فى انا لانى اخر واحد بجى من

الدوام واقوم امشى البقالة واجيب لى زبادى لكن امس وجدت الحلة

مليانة والرجلة حايمةكبار كبار وفيها شى دوائر وانا بقيت حائر اكل

تانى زبادى ولا انتظر العشاء ولما جواا الشباب وهم يموتوووون من

الضحك .. قالوا للليلة الحلة كانت رجلة عيون ..
وانا بقيت محزون
وشربت موية ليمون

أبو قوتة : تحياتي
الله يجبر الكسر. أخوكم دة زي الحلاق بتاع سجيمان ، أكيد دة كان طباخ في إستراحة من إستراحات اللواري في الخلا ( ناس قطر قام ).

أنا بعرف واحد زميلنا عمل لينا شعيرية في سحور رمضان ، و لأول مرة أشوف نظرية الجاذبية في الحلة ديك ، كل حبة شعيرية واقفا بالطول ، يعني ما راقدة مكرفسة. ( واقفة زي شعر المغناطيس ). بس برضو أكلناها لأنو ما كان عندنا زبادي ولا دكان قريب و لا حتى كسرة ناشفة.
تسلم أبو قوتة.

عزيزنا ابوجهينة
تسلم

واحد ابن عمنا كا ساكن مع عذابة فى الخرطوم ويوم كانت حلة رمضان عليه
طلع بدرى عشان يظبط الحلة وكسر فيها رقبته وطلعت مظبوطة بس بقى متحير لان لونها مازال اغبش عايز يقلبها حمراء كيف ما عرف..والناس كانو
بغيرو اللون كيف برضو ما عرف فى النهاية توكل على الله وكب فيها نصف
فتيل الفراولة وخلها تجقق مع الطعم الفراولى


وشكرا على الطلة

لوووووووووووول والله بوست خفيف الهضم كالذبادي ذكرتني الرجله في الداخليه الله يقطع يومها برضو بتكون عيون ومويه شرارو .الغريبه اليوم طبخت رجله انما ايه تاكل صوابعك وراها وهنالا توجد رجله لكين بنشتري السبانخ واحشوا كالرجله واعمل معاه الشمار الاخضر او الشبت بلغه اهلي من الشماليه والعدس وبطبخها من غير لحم, لان فلس الساكن معانا ما بحب اللحم

الاخ حبوبة شروق

تحياتى

اكل الداخلية الرجلة براها الشرورة .الاسود كان الشباب يسمونه البراطيش

اكل الطيش.

ليش ما فى لحمة اصلك فى الهند وصاحب البيت هندوزى ولا شنو

والله ذكرتنى ايامها كان صاحب غرفتى هندوزى راجنيشى محرم على حتى اكل

البيض ويوم البجد قشر بيض فى البلدية جنجال كتير. كنت لما اشوف دم

اسعر عديل كدا

شكرا على الطلة والكترت الشلة

ابوقوتا،اهم حاجة زولكم دا حرق القدحة ولا لا،يعني قعر الحلة محروق ولا ما محرووق،لو محرووق قوش طواالي،من تحت الحلة طبعا

حبيبنا ابو قوته

لك التحية

والله بصراحة انتو ظلمتوا الراجل ده ياخى
حسب تحليلى فالراجل شايف البيت زى التكية والاكيلة (جمع وصيغة مبالغة للاكال) كتار قام فكر يعمل ليكم بوش بتاع رجلة ودعنا نجعله اكثر رقيا ونقول فتة رجلة عشان تكفى الغاشى والماشى .. ياخوى انتو ساكنين فى جمعية ولا شنو ؟؟؟

احكى ليك رجلة عيون حقيقية
فى احدى اجازاتى وكانت الدنيا خريف وانا بحب الموليته شديد( ما بتعرفها سيبك منها) فاحبها اولادى كذلك وعندما عدنا للغربة طلب الاولاد موليته فما كان من امهم الا ان اتت بالرجلة وهاك يا حش ويا تظبيط (نية طبعا) بالدكوة والبصل وقدمتها لينا وحاتك اكلناها بشرارها زى الجداد والغريبة طلعت فاهمة جدا وظريفة خالص ..

اهى دى الرجلة عيون يا فردة

مع تحياتى

الاخ manubia

تحياتى

هو خلى فى نفس عشان نشوف قعر الحلة وبعدين هى مليانة شديد

فعلا كانت فيها قدحة وساعمل بنظريتك فى المستقبل لو دا حصل تانى

شكرا على الطلة

عمدتنا قرشــــــــو

مشكور على تعليقك على بوشنا ما هو كل البوشات مسيخة الا بوش البورد حقنا.

نحن عندنا جمعية منفصة لكن بيتناصار جمعية بالقوة عارف كيف نحن 5 انفار مؤجرين شقة كل واحد لو جاه قريب اى كلام بوديه الجمعية ولو واحد
خريج وابوه كان فى الخليج بنجيبو معانا لما بيتنا ذاتو صار جمعية

اما عن الموليته:- رجعتنى 20 سنة للوراء ايام الابتدائى ابوى ساقنى
الى الجزيرة انجييت_فى النيل الابيض بعد خزان جبل اولياء ب 40 كيلو_عندنا فيها فدادين كان ابوى بزرعها وعايز يدرعنى فى الشغلة ديك من الصغر لكن من ديك وعيك وقتها اكلت الموليته بالشطة وشكراعلى تذكيرنا بتلك الحادثة

ومشكور على الطلة

ابقوتة....... انا اشك فيك انت شخصيا او الحلة بتاعت الطبيخ.... ما شاكي في الرجلة.....روح راجع القصة دي

اخوى سجيمان
تحياتى

زى ما قال اخونا ابو جهينة دى طالعة زى حلاقك

اولا :- انا لو شديت موية فى النار بتحرق

ثانيا:- الحلة طبعا قديمة وواحدة كمان، ممكن يكون منها

ثالثا:- كنت تمنيت لو كنت معى عشان تصورها باسلوبك الشيق وتسطرها

بقلمك الاحمر
ولونك الاسمر
ونحنا فيك بنتكسر
عشان بتركب راسك الاشقر
تصور امس عايز اركب راسى كنت داير انزل اجازة وقالو لى ما بنديك الايام دى اجازة قربت اقدم استقالتى وفى النهاية تذكرت امى لسع بيتها ما تم واختى فى الكلية واخوى الصغير عايز اقامة طوالى نزلت وخليت راسى براه مدور

مشكور على الزيارة ياود الحارة

ابوقوته
والله ضحكتني بحكايه خليت راسي بره مدور دي

انا بس داير اديك نصائح من زول خبير بامور العزابه خبر لا تحسب عدد سنينه من كترته ومساخته

اول حاجه تشتري ليك شنطه حديد من حراج الصواريخ وتكون المقاس الكبييير ومعاها طبله اكبر من طبله القراش
تاني حاجه تنزل البقاله نهاية الشهر دا بعد ما عمك يسلمك راتبك المتأخر ليهو 9شهور داااااااااااااااااك
وتشتري ليك علبه طحنيه
عسل
مربه
تمر
بسكويت ابوولد وشاي الصباح وماشاكلها
وتقول لسيد البقاله يختها ليك في كيس مايكون شفاف
وتشيله وتمشي علي البيت برااااااحه وتفتح طبله الشنطه وكرب تقفله

بعد دا تجي من الشغل علي راحتك وتجي علي الشباب اها يا شباب العشاء كيف كان قالو ليك رجله زي حقتك دي قول ليهم والله احسن الزول ينوم خفيف شيل عيشك وافتح طبلتك واحشي وانحشي

واخد نومتك



عزابي متحرر

الاخ هوبلس

اولا:- انت صاح عذابى محترف عذابى طلبة

ذكرتنى ايام الداخليات كانت اغلى حاجة عندنا الطحنية والفول المصرى,الواحد كان بكترمنها لما يرجع السودان او لما تجيه وصية من امه
واحد اخونا جاب معاه كرتونة طحنية وقفلها فى شنطة الحديد بتاعته ولما الطلاب يكونو فى الحصص ينسرق منهم ويحشى عيشته ويطلع على الشجر عشان ياكل بمزاج لكن النمل كشف الخطة واخيرا سرقنا الطحنية وكان اليوم داك مشكلة لما عايز يوصلها البوليس عشان نحن كسرنا الشنطة

ثانبا:- انا مرتاح من قصة عم عمنا الشركة بتدينا الراتب يوم 29 ويوم 3 بنشحد حق البنزين والله ياهوبلس كل ما اشوف اسمك اتذكر الغربة دى وسنينا الضايعة فيها وعمرنا يضيع هوبلس

شكرا على الطلة

الاخ ابو قوته
انا عازمك رجلة هندية رايك شنو

اخوى متولى

ذكرتنى ايام التجلى

وذات الشعر المتدلى

والقطر المحلى

والسفر الى بونا ودلى.


انا موافق على العزومة بس تكون اللحمة من الموتن ماركت

تسلم