جلطـــة نفيســــة

جلطـــة نفيســــة

الفاتح جبرا



بينما كنت أجهز نفسى صباحاً للخروج من المنزل متجهاً إلى الصحيفة قالت لى زوجتى وهى تسألنى : ما مشيت لى حاجه نفيسه دى ؟
- مشيت ليها .. مش عشان أعزيهم فى وفاة حاج عبدالمنعم؟!
- وفاة شنو ؟ حاجة نفيسه جاتا جلطة وراقدة فى المستشفى !
- معقولة؟ المرة دى والله مسكينة .. راجلا حاج عبدالمنعم فراشو يا دوبك إترفع
- ما هو الفراش ده ما ذاااتو المصيبة !!
حاج عبدالمنعم تدرج كموظف بنك حتى صار مديراً لأحد الفروع قبل وصوله لسن المعاش قبل سنوات قليلة .. متزوج من (نفيسة) زميلته فى العمل قبل أكثر من ثلاثين عاماً أنجبا خلاها عدداً من البنين والبنات .. لم يكن لحاج عبدالمنعم مشاركات إجتماعية بل كان كائناً (بيتياً) ما أن يعود من عمله بالبنك و(يقرش عربيتو) فهو لا يغادر منزله إلا لأداء صلاة العشاء بمسجد الحى ، من صفاته أنه كان هادئ الطباع حسن الهندام خفيض الصوت يتحدث إليك همساً ، توفى بصورة مفاجأة قبل حوالى أسبوع .
- كيفن الفراش هو المصيبة .. ؟؟ ما فاهم
- طيب النحكى ليكا :
قالو ليكا تانى يوم للوفاة .. والبكاء حاااار .. والنسوان ديل يعملو ليك فى البدع ونفيسه دى تردح وتشيل وتوصف
- الليلة وين يا الحاج الصلاى ... خليتنى أنا والمعاى
- الليلو وين يا الأمين البأمنوهو الملايين
- وووووب يا المثالى المشيت خليتنى فى حالى
- وووووب يا الواضح أب كلامن ما فاضح
- الليلة وييينك يا الأرباب الماك كضاب
- الليلة وييينك يا الحنان الحافظ للقرآن
- ووووب وووب وووووووووووب !!
حاجه نفيسة تشيل وتردح والدموع دى ما تديك الدرب والنسوان المعاها شغالات ليها كورس قالو ما يشوفو ليكا إلا (مرا) طويلة وعريضة وقيافه .. التوب ما توب .. واللبس ما لبس .. والحنة ما حنة والدخان ما دخان .. تدخل ليك عليهن ومعاها تلاته بنات الشعر كيفن والبلوزات كيفن والإسكيرتات كيفن ومما دخلن يطقو ليكا السكلى .. وقعدوا يصرخو بى أعلى صوت لحدت ما وقفو ليكا بيت البكا على فد كراع ...
- أها وبعدين؟
- بعدين بعد ما أخدن بكيتن .. وكل واحدة شربت ليها كباية موية بارده مشن قعدن بعيد .. يتخجخجن ويبكن
والنسوان ديل كوووولهن سابو البكا وقعدن يعاينن ليهن !
- أها وبعدين ؟
- أها قالو أخت حاجه نفيسة الصغيره قالت لى ليها برااااحة فى أضانا : إنتى النسوان ديل من وين؟
قامت حاجه نفيسه ردت عليها قالت ليها : يعمينى قبال ده ما شفتهن !
- أها والحصل شنو؟
- الحصل إنو النسوان قالن لى حاجه نفيسة أمشى أسألى المرا دى وقولى ليها إنتى منو؟ قامت الحاجه مشت على المرا وقلدتا وقعدن يبكن زيييين وبعد ما قعدن فى الواطه ومسحن دموعن قامت الحاجه سألت ليك المرا قالت ليها : ما إتعرفنا على بعض يختى !!
- أها المرا قالت ليها شنو؟
- قالت ليها أنا إحسان زوجة المرحوم على سنة الله ورسولو وديل بناتو هادية وهديل !
- وده الجاب لى حاجه نفيسة الصدمة وجاب ليها الجلطة ؟
- لا لا .. حاجه نفيسة كانت متأكده من المرحوم عشان أصلو ما كان بيطلع من البيت .. طوااالى قالت للمرا قومى أمشى من هنا قبل ما نجيب ليكى البوليس يا مرا يا محتاله .. الحاج ده من بيتو ما بيطلع إلا يمشى يصلى العشاء فى الجامع ويقعد ليهو ساعة ساعتين فى حلقة (التلاوة) !
- أها وقالت ليها شنو؟
- قالت ليها ما أنا ذاااتى (حلقة التلاوة) دى ذااااتا !!

Quote: - قالت ليها ما أنا ذاااتى (حلقة التلاوة) دى ذااااتا !!

ههههههههههههههه احشي ما اخشي ان تكون هي الباقيات الصالحات .....
والله حلوة دي ياعمر مع تحياتي عبرك للاستاذ الفاتح جبرا

يعني تاني الرجال يالفاتح جبرة ما يطلعوا حلقات تلاوة ولا شنو؟
حفر أبيار السايفون للمغتربين وعرفناهو
كمان جابت ليها حلقات تلاوة ؟!
يعني إذا كان من ناس الكوتشينة ... كان كمل النصاب ؟

يا عمر ياخي وزولك جبرا دا مالكم عايزين تجيبو للناس الهوا
هسع عايزين تبوظو علينا القعدة في نادي الشركة المرتين في الأسبوع دا