Post: #1
Title: سيناريو تسجيلات مريخي.........(مكرر)
Author: yasir Abdelgadir
Date: 06-27-2010, 06:02 AM
مرة مشيت اغسل العربية في محطة بنزين
لقيت الشاب البيغسل العربية ..شاب أفريقي...سألته عن حالو..إشتكي عن سوء الحال والمآل
قلت ليهو...بتعرف تلعب كورة قدم...رد علي قال : سوية ,,سوية ( يقصد شوية شوية)
قلت ليهو ...عز الطلب
أركب هسي وعلي مطار الخرطوم عدل....تلقي الجماعة مرابطين هناك....عندهم واحد بيديك الجنسية من المطار ..وحيطيروا بيك عدل علي الاتحاد العام..وهناك تقبض المقسوم ..وتبصم علي طول
قال لي طيب اقول ليهم شنو؟؟؟؟
قلت ليهو : ولا حاجة...إنت تسكت خالص
ولو عصروا عليك شديييد ...قول ليهم: الهلال عاوز يسجلني
بس بعد كدا ما تنطق خاالص
بكرة الجرايد حتقول فيك كلام....لم يقله مالك في الخمر...حيطلعوك أحسن من بيلية في زمانو
قال لي : أها وبعد ما ينكشف المستور
قلت ليهو : ولا حاجة...هم براهم حيحلوا الموضوع..وحيفتشوا ليك في إعارة ...وحيقوموا باللازم وحيدفعوا للنادي الحياخدك..أما إنت تمشي تكمل نصبتك في حتة تانية...
الاسبوع البعده مشيت أغسل العربية.....مالقيت الراجل
؟؟؟
|
Post: #2
Title: Re: سيناريو تسجيلات مريخي.........(مكرر)
Author: yasir Abdelgadir
Date: 06-28-2010, 01:30 AM
Parent: #1
السنة دي الظاهر الوالي دستورو نازل في تونس...
شايفو جاب منتخب تونس كلو
او الظاهر انو منتخب تونس الفاز ستة علي السودان دا عجبو شديد..فإختصر الحكاية ..وإتعشي معاهم كلهم...وبعدها وافقوا علي طول
اصلو اي واحد يتعشي مع الوالي مستحيل يرفض يلبس شعار المريخ
ياربي الناس ديل بيكونوا اتعشوا ديك احمر مضبوح طازة
|
Post: #3
Title: Re: سيناريو تسجيلات مريخي.........(مكرر)
Author: yasir Abdelgadir
Date: 06-28-2010, 01:38 AM
Parent: #2
عندي سؤال بسيط: في حاجة إسمها كرامة لاعب كرة القدم...القصة دي محيراني جدا مع لعيبة المريخ ديل:
يعني مثلا: عبدالكريم الدافي دا...يجرجروا فيه ..امشي ..يمشي...تعال ...يجي
اربع خمسة مرات...أصلو ما قال لا...
انا لو في مكانو ...لو الوالي دا يجيب لي لبن الطير ما بجي تاني
أو وارغو: من السنة الفاتت شايف الناس ديل دايرين يتخارجوا منو...ومالاقين ليهم زول يقبل بيهو
دحين لو عندي ذرة كرامة...بلبس فنيلة الناس ديل تاني
كمان في واحد محترف في الدفاع...دا أصلو ما شفتو لاعب...السنة كلها قاعد كنبة...دا جايي يسوي شنو هنا؟؟
|
Post: #4
Title: Re: سيناريو تسجيلات مريخي.........(مكرر)
Author: حيدر بشير
Date: 06-28-2010, 05:03 AM
Parent: #3
أخونا ياسر
سلام و حباب
يا خوى مالك دايرنا نمشى نقيف فى الصف و نلبس كداراتنا عسى ولعل ان ينصلح حالنا بعد ها العمر
اليومين ديل بعد ما لاعبين تونس كملوا مشوا فى تسجيل حارس المرمى الفلسطينى و أنا خائف يكون زى على ليمونة
و على ليمونه دا حسب روياة أخونا خالد أبو الروس قال كان عندهم فريق فى الرابطة كل مبارأة مغلوب اربعة و خمسة
قام المسئول مشى كوستى و جاب ليهم حارس مرمى اسمه على و قال ليهم خلاص حليت ليكم مشكلة الحارس
أول مبارأة انهزموا 9 الجماعة مشوا للحارس قالوا ليه دا شنو قال ليهم و الله الكورة دى زى الليمونه أصلها ما بتتمسك
فأطلقوا عليه على ليمونة
|
Post: #5
Title: Re: سيناريو تسجيلات مريخي.........(مكرر)
Author: yasir Abdelgadir
Date: 06-28-2010, 05:32 AM
Parent: #4
حيدر سلامات
| Quote: قال ليهم و الله الكورة دى زى الليمونه أصلها ما بتتمسك |
ههههههههههههههههههههه
حلوة
اخونا وارغو يكون عندو نفس الراي بس ماقادر يعبر
|
|