Post: #1
Title: خرطوم العجائب
Author: عثمان محمد كرار
Date: 06-26-2010, 06:00 PM
Parent: #0
بالايميل
استئجار (نائحات) في المآتم هي إحدى ظواهر عديدة اجتاحت المجتمع السوداني الذي تسارعت فيه عجلة التغيير في السنين الأخيرة. هذه الظاهرة تناولها بطرافة ;كتاب (عجائب )الخرطوم : لفت نظري قبل ثلاثة أسابيع في منزل ضخم واسع بوسط محافظة الخرطوم حيث ذهبنا لتعزية صديق في والده, لفت انتباهي مرور امرأتين في حالة بكاء وعويل وهما تدوران حول المبنى الداخلي وبالتفرس في وجهيهما وسحنتيهما أيقنت أنهما ليستا من أقارب المرحوم ولاحتى من معارفه, ولما اشتد بي (الشمار) سألت أحد أقارب المرحوم من الشباب عنهما فقال لي: ديل يا عمو (بكايات) يعني ببكن بالقروش، المستطيع يأجرهن طوال أيام المأتم والعاجز يكتفي باليوم الأول فقط!! لاحظ العاجز دي.. تحضر النائحة إلى منزل العزاء وتطلب الـسي في ، أي السيرة الذاتية للميت من زوجته أو ابنته الكبرى: العمر: 70 عاما. المهنة: ضابط معاش وله وكالة سفر وسياحة. المستوى التعليمي: دبلوم الحربية زائدا بعض الكورسات في الترجمة والحاسوب. أسماء أكبر الأبناء والبنات: فيصل, أحلام, رابحة, عواطف. هل قام بأي عمل بطولي: نعم, محاولة انقلابية فشلت في فترة الرئيس نميري. تأخذ النائحة المعلومات وتعقد اجتماعا عاجلا بزميلاتها وبعد التداول يخرجن للملأ وهن يرددن: الليلة ياب دقنا دايرة وخدودا نايرة وقدرتن فايرة وشيكاتن طايرة- كتلنا فيك الليلة يا أبو أحلام يا الشالوك للصالح العام وحكموا عليك بالإعدام – ما دايم إلا الله ووووووووووووووووووووووووب وأحييييييييا.. الليلة يا السايق الكراون يا أب مدفعا هاون وينك لينا؟ أوروروووووووووووووووك.. وهنا يهج البيت ويفور بالعويل والنواح وتميل النائحة يسارا ثم تنحني ضاغطة بيدها اليسرى على أنفها ثم تنظر إلى ابنته الكبرى نظرة ذات فحوى ولسان حالها يقول: لقيتيني كيف؟ وتواصل في الوصف وتعديد مآثر الفقيد: الليلة يا الساكن ديم لطفي أب كلمة تشفي الما متزوج عرض زايلة وخربانة (يعني مازول دنيا) ، البجيك بتجبرو والواقع بتشيلو يا السايق الباجيرو.. مو دار عمار فقدتك السكرتيرة والطربيزة المستديرة والمرسيدس الخنزيرة خليتنا لمنو ياخووووووووووي يي يي يييي إهيء ؟! لاحظ العربة قبل دقائق كانت كراون! بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف والبارد والساخن وعند الانتهاء من هذه المأدبة تنقد البنت الكبيرة النائحات مبلغ 300 ألف جنيه وتقول لهن همسا: ضروري حضوركن بكرة المغرب عشان ناس السعودية والبلد جايين... كويس؟ تحياتى
|
Post: #2
Title: Re: خرطوم العجائب
Author: ايهاب الطيب بله
Date: 06-26-2010, 06:11 PM
Parent: #1
معقول......!!!!!!
|
Post: #3
Title: Re: خرطوم العجائب
Author: عثمان محمد كرار
Date: 06-26-2010, 06:16 PM
ايهاب الطيب
كل شي معقول ياحبيب
|
Post: #4
Title: Re: خرطوم العجائب
Author: حسين نوباتيا
Date: 06-26-2010, 06:25 PM
Parent: #3
يعني الزول ممكن يجي السودان وياجر ليهو صالة ويعمل بروفة للبكاء بتاعتوا؟؟
كلام والله!!
|
Post: #5
Title: Re: خرطوم العجائب
Author: عثمان محمد كرار
Date: 06-26-2010, 07:11 PM
Parent: #4
حسين نوباتيا
ظبط السي في بتاعك بس
|
Post: #6
Title: Re: خرطوم العجائب
Author: عثمان محمد كرار
Date: 06-26-2010, 08:24 PM
Parent: #5
عجائب
|
Post: #7
Title: Re: خرطوم العجائب
Author: عثمان محمد كرار
Date: 06-27-2010, 11:08 PM
Parent: #6
_
|
|