موش شاعرين يا جماعة إنو أي حاجة أصبحت مسيخة وين حلاوة حاجات زمان

السياسة، الفن.. الغناء.. الشغل اي العمل.. العرس.. الصروح التعليمية.. الصروح العلاجية.. الشارع.. الاستمتاع بجمال عاصمتنا المثلثة... الأكل برضو أصبح مسيخ.. لذة اللبس وتجديد الملبوسات.. العلاقات الاجتماعية..
هل هذا نهاية المطاف هذه المساخة في كل شئ؟
عندي لا
وإلا أصبح الانسان متشائماً وقنوطاً..
هذا يبشر بشئ لا أدرك كنهه ولكني أحسه.. يشفع هذا القديم الذي مسخ..

لغاية سنة1975 تقريباً الواحد كان راتبو يكفيهو.. والترقيات ماشة تمام والعلاوات ماشة تمام والدرجات ذاتا ( أتش) ( دي أس) وإنت ماشي..مسمياتا ذاتا حلوة.. المكاتب منظمة وكل واحد عارف شغلو.. والتعينات على حسب الكفاءة.. الواسطة تكاد تكون معدومة.. والولاء الجهوي يكاد يكون معدوم.. مكاتب الدولة ليها هيبة والموظف ليهو هيبة وصولة وجولة..تتغير من أتش الى دي أس حتى لون تربيزتك يختلف.. وبعد ما كنتو خمسة في المكتب تكونوا إثنين.. تشعر بي طعم الوظيفة وتشعر بي طعم الترقية.. كان عينوك فراش ساكت في مصلحة حكومية إنت قيمتك في الحي كبيرة.. السلع تكاد تكون أسعارا لاتزيد بالسنين الطويلة..أنت موظف في الحي محترم ويشار اليك بالبنان.. دكان الحلة يدينك بتاع اللبن يدينك.. يقول ده عندو راتب ثابت موش على باب الله.. هسه دكان الحلة أول ما يعرفك موظف يتغابا فيك العرفة.. وكان أخرت الدين يزرزرك قدام مرتك.. وينهزرك.. ويرفع صوتو عليك وهو يكون الحرف ما بيقدر يفكو.. لكن عندو بوكسي واقف قدام الدكان ولابس عراقي خفيف والجيب فيهو رزمة قروش مجدوعة لزوم النفش.. وناس الحلة والشارع يعتمدوا عليهو هو أكثر منك إنت الموظف.. كان مرة بالليل ساكت بطنا وجعتا يصحوهو هو وإنت موظف مثقف لكن زول بيجيب خبرك مافي لأنو راتبك ما بيكفيك وقد ما يجيك راتبك شهرين.. ولا تسد ولاتقد..

الحاجات كلها بقت عشوائية
هسه ما نحن عندنا أحلى مثلث في العالم في منطقة المقرن دي
لغاية هسه ما قادرين نستفيد منو الفائدة المرجوة..
عندنا كورنيش أجمل من كورنيش ابوظبي ده؟ لكن ما قادرين نعمل فيهو التدعك.. شارع أب روف التحتاني ده لو قام بنايات زجاجية خمسة طوابق خمس طوابق زي بتاعة ابوظبي الخالدية دي.. بس خمس طوابق ما عايزين كتير.. ومشيناهو لافي كدة لغاية تحت السلاح الطبي.. كان تكون أكثر منطقة خلابة في العالم.. كان يكون هذا المثلث أجمل من مثلث برمودة.. وأجمل من مثلث حلايب..
بالله تجي بي جنب حديقة الموردة العفنة تكتلك.. ينضفوا السمك الشماشة لسه بالطريقة العشوائية ديك ويجدعوا مصارينو في الموية لغاية ما حولوا المنطقة بكاملها الي مثلث عفنة..
قلت ليها يا استاذة شايفك عادية لأنك في السودان والله شنو؟ ما شامة العفنة دي؟ قالت لى يا باشمهندس عفنة السمك تفرق.. وكت ما لاقين نآكل البلطي نشم عفنتو.. نحن بنخاف من عفنة تانية. عفنة سمك البلطي شمها مستطاب..