Post: #1
Title: كديسنا (الضكر) ويا معركة ما تمت !!! ..
Author: معتصم مكاوي
Date: 06-22-2010, 04:45 PM
يوم كنت زهجاااان والغربة وصلت الحلقوم قلت النخالف الطبيعة وبلاها يا غريب كون أديب ختيت كرسيني في الشارع أتفرج ع الماشي والغاشي جاء كديساً (ضكر) سمين وأمين في شكل بمبر إتمدد رقد قريب مني يتمطى ويتشهق لمان خلاني اشتهيت النوم أهه جاء (جقر) ليهو ضل أكبر من توم بتاع جيري يتضرع في المشي كأنه أحد صعاليق سينما برامبل (والجقر هو ذكر الفأر) لمن لا يعلم أهه قلت الليلة يا عمك رايح أشهد صراع نجمين سينتهي حتماً بفوز كديسنا الضكر الذي رفع شعار يا ماكل يا ماكل مفيش فرصة لماكول ويا فرحة ما تمت إذ خاب فألي وكديسنا عينه على الجقر راح مقبل من كده وكأن الأمر لا يعنيه لكنه لمح خيبة الأمل في وجهي .. فقام قال ..
أنا عمري ما آكل جقر ..
آكل سجم آكل رماد ..
اصلي ما باكل جقر ..
لو حتى جنيت أو ودر ..
والله ما باكل جقر ..
وآكل جقر أنا مالي بس ..
أصلي عايش في الخليج ..
ما بين سمك طاجن لذيذ ..
والمقلي ما يديك درب ..
أما اللحم شيتاً كتر ..
ما بين مشاوي اللت جمر ..
وواحد محمر في الفرن ..
أما الدجاج أسكت أكل ..
ومجبوسنا فاق حد الصور ..
أهه يا كدايس حتتي ..
غلطان أنا أو بحتضر ..
ما بين أكل حالي ولذيذ ..
كأنه جات ليلة القدر ..
أمشي وأفتش لي جقر ..
مجنون أكيد ..
في الحالة دي ..
ألقى النعم وآكل جقر ..
حرم كمان وعلي طلاق ..
لو نفسي دخلت في جقر ..
ما عندي بس غير إنتحر ..
|
Post: #2
Title: Re: كديسنا (الضكر) ويا معركة ما تمت !!! ..
Author: محمد النيل
Date: 06-22-2010, 05:36 PM
Parent: #1
هسع انا طلع من بوست قالوا فيه انه فريقنا القومى انطق 6
طلعت من البوست داك بوجه مكشر
وخارج من بوستك دا بوجه باسم ضاحك
عملت لينا شد فى عضلات الوش
شكرا للابتسامة
|
Post: #3
Title: Re: كديسنا (الضكر) ويا معركة ما تمت !!! ..
Author: على محمد على بشير
Date: 06-22-2010, 05:51 PM
Parent: #2
هجمتنا ياخ
انا قلت كديسكم الضكر دا احماك النوم بالليل , ولكن طالما القصه كديس وجقر فمافى عوجه تب .
لكن القصيده فى السلك .. اضحك الله سنك
|
Post: #4
Title: Re: كديسنا (الضكر) ويا معركة ما تمت !!! ..
Author: معاوية عبيد الصائم
Date: 06-22-2010, 06:04 PM
Parent: #3
السودان ازعمطت 6
من منو
يطرشنى؟؟
الله يسعلك ده خبر تجيبوا بعد الكلام الفوق ده
|
Post: #6
Title: Re: كديسنا (الضكر) ويا معركة ما تمت !!! ..
Author: معاوية عبيد الصائم
Date: 06-22-2010, 06:30 PM
Parent: #5
ود النيل
استغر الله
وكمان عند اهلنا
المواطن معاوية عبيد اخر من يعلم ؟؟
كتر خيرك ود النيل
|
Post: #7
Title: Re: كديسنا (الضكر) ويا معركة ما تمت !!! ..
Author: محمد النيل
Date: 06-22-2010, 07:09 PM
Parent: #6
يعنى الكلام صاح؟
التفاصيل التفاصيل التفاصيل
معليش يا صاحب الكديس
طلعنا بر الموضوع
|
Post: #8
Title: Re: كديسنا (الضكر) ويا معركة ما تمت !!! ..
Author: معتصم مكاوي
Date: 06-22-2010, 07:47 PM
Parent: #7
هو بيني وبينك ليك حق ..
والله كديسي الضكر ده ..
أخير من كدايس منتخبنا المذعورة دي ..
ستة ؟؟ ..
ياعيب الشوم !!!
|
|