طالعني الخلا أون لاين .. طلعت شليق وفاهم البورد غلط !

" بالرغم من تعلقي مثلي والكثيرين بسودانيز اون لاين وذلك من زمن بعيد ، إلا أني لا أعلم لما لم أطرق بابكم قبلاً طالباً حق اللجوء إلى هذا العالم الذي تقفون عليه . ربما وإلى زمن قريب لم تراودني فكرة المشاركة الفعلية فيما يجري من حولنا وكنت أكتفي فقط بمتابعة ما يكتب .

أما الآن ومع كثافة ما يطرق أبواب وطننا يوماً بعد يوم ومع مجريات الأحداث التي آخذة وطن المليون ميل إلى حيث لا نعلم ، بت أرى بحتمية إحتمائي بآخرين أشاركهم ويشاركوني الهم ، أنعم بصحبتهم وخبراتهم .. أضحك معهم وأبكي حين يبكون . بت أكثر قناعة بأن في التكتل والإلتفاف حول من أقصى أحلامهم هو وطن يسع الجميع وجيل قادم (لا مقهور ولا منهور ) أمر لا مفر منه . لذا أطلب حق الملاذ ."

كانت تلك صدرية طلبي الذي تقدمت به إلى الأخ بكري للإنضمام إلى (سودانيز) ..
لكن ما لفتني حين ( إتشالقت ) لأول مرة وبعدها كل المرات التي إما أتيت مداخلاً أو حدثت نفسي (بغباء) في أن أتداخل في إحدى المواضيع ..
أن ظاهر الأمر ليس كباطنه .. وما أتيت باحثاً عنه هنا هو حتماً ... سراب ...!
فأصل الحكاية هنا هو ببساطة لا يتعلق بما يكتب فهو للأسف يدور حول من يكتب ..
" يعني اللعب على الجسم ما على الكورة " فما أكثر الفاولات ... !
كان أن تداخلت مرة في إحدى المواضيع .. وعبرت عن رؤيتي البريئة فيما قرأت .. ومع شكل المداخلات الأخرى تنبهت إلى أن البوست - أصلاً- كان
شكلاً وفصلاً آخر من فصول " طالعني الخلا " بين صاحب البوست وآخرين ... فسخرت من ( شلاقتي)
وهذا ما يتكرر في كل حين ..
إذا وكما هو جلي وبين أن للزملاء هنا (أعداء) .. فحين يكتب أحدهم (موضوع) ..تطلق (صفارة الحرب ) فيأتي العدو ومعه آخرون للنيل من هذا الزميل أو ذاك ..
فيلتهب البوست غباراً و .. عراك ..
وبعدها يقوم ( الخائن ) بفتح موضوع آخر في مقام آخر ... وهنا يتاح المجال لمن لهم ثار .. ليأتوا ليأثروا ...!
هذا ينطبق على كل ما يطرح .. أكرر .. كل ما يطرح ...
فلو - تشرفت - بتكوين أعداء ... وكتبت مرة عن بديهية ( أن الأرض كروية ) سينبري لي من أعدائي الأعزاء من يقول بجهلي وسطحيتي .. وسأرد عليه بأسوأ مما
جاءني به ... ( وسنداوس جنس دواس ) ..
فهل لي بأعداء .. فقط لإكون فاعلاً ... ؟!!

عشان بس ما أتفهم غلط فما أنا للإصلاح قد أتيت ...
أنا أطرح سؤال ..
ما هو شكل التكتلات هنا ؟ عشان أتكتل وكده ..

سياسي ؟
ما كيزان وكيزان ( أها أنا ما كوز) يعني ناسي منو ؟
علماني وما علماني ( أها أنا علماني ) يعني ناسي منو ؟

عنصري ؟
أفارقه وعرب ؟ أنا سوداني يعني ناسي منو ؟

رياضي ؟
هلالاب ومريخاب ؟ أنا هلالابي يعني ناسي منو ؟

ثقافي ؟
مثقفاتيه وناس بساط ساااي ؟ أنا زول سااااي اها ناسي منو ؟

طيب ده بروفيلي يا البورداب .. وروني أسجل في ياتو فريق.. بس شان أبطل شلاقتي دي .. والشوت الضفاري ..

وأجي متحزم !

الاخ حاتم كاهن
اول حاجة الف فرحب بيك في البورض دا
وعشان الحاجتين ديل

Quote: رياضي ؟ هلالاب ومريخاب ؟ أنا هلالابي يعني ناسي منو ؟ ثقافي ؟ مثقفاتيه وناس بساط ساااي ؟ أنا زول سااااي اها ناسي منو ؟

انازولك تب وابقي داخل


خالص الود ياخ

الأخ ياسر ..
على قولكم ( شكراً على المرور )

والله زولي ما في كلام ...

العزيز ود العزيز\ حاتم كاهن ,,, مليون سلام

يا اخي شوت محل ما تشوت ما بتجيك عوجة...

سلامي الكتييير للوالد العزيز عبد الله عبده كاهن

جمعتني به الغربة في صحار فكان نعم الوالد ونعم الصديق

وتحياتي لكل ال عبده كاهن وبالاخص صديقي الولد الشقي نادر.


مودتي

العزيز سيف الدولة ..
والله أنا سعيد جداً بالصدفه دي ..
وإعتبر سلامك وصل للوالد ... ولي عموم آل كاهن ...

والله داير أشوت ساي .. بس ملاوز لسه ..
بس أكيد نصيحتك محل تقدير ....

برلوم مقرم جداً







مرحب بيك ونصيحة أخوية
في الأيام الأولى أقرا كتير وأكتب شوية
قراية برة البورد غير قراية جوة البورد

بعد شوية تلقى الكيبورد يدب محل ما العقل يحب ..


ـــــــــــ
اللهم اصرف نظر ود الصايم ومن لف لفه عن هذا البوست
لأنو العصابة دي لو جات راسك حيلف شديد

Quote: اللهم اصرف نظر ود الصايم ومن لف لفه عن هذا البوست لأنو العصابة دي لو جات راسك حيلف شديد

نصيحة فى السلك
ومرحب بيك والله







سؤال : عندك علاقة ب أسامة كاهن ؟

يا الوليد ..سلام

Quote: نصيحة فى السلك ومرحب بيك والله

مالكم يا أخوانا بتشفقوا فيني أكتر مما أنا براي شفقان ؟؟؟

Quote: سؤال : عندك علاقة ب أسامة كاهن ؟

بالحيل يا الوليد .. أسامة ده أخوي الكبير ...

تحياتي ..

مش قلت ليكم ...

شليق حتى في البوست الحيجيب لي لفة راس ده ...

يا تيسير ... والله أهو بحاول أقرأ ساي ...
ونصيحتك والله شغال بيها ...

بس بدون " ود الصايم " أخواك راسو لافي ..
يعني ما فااارقه ...

شكراً على الطله ...

مع تحياتي ...

برلوم راسو لافي ..

والله ياكاهن لقيتك شديد شدة الحرامى السرق تلفزيون الناس
وهم بتفرجو فى المسلسل...
ساكن الرياض ودارس كمبونى وتقول طالعنى الخلا ؟؟ الكلمة
دا انا قايلة ناقشة ايمن الطيب بس هنا ..

وبعدين ياخ قاعد فى المنبر من شهر 4 وماقلت بغم دا غير مقاعد المتفرجين
ماعارفة قعدت فيها كم سنة .. كتابتك دى ما كتابة زول بسال ودايراجابة
دى كتابة زول ناااااقش كويس ومارق من زقاقات اونلاين دى ..

بصراحة كيفتنى الكتابة وقريتها مرة ومرتين وتلاتة وياهى نفس المخاوف والاسئلة
عند كل زول بدخل جديد المنبر ..
المنبر بقى زى اوكار الارهابيين(الليلةوووب) اى زول يجى داخل ملاوز ومتحسس مسدسو
وشايل قفة مخاوفو ..

نجى لاسئلة بروفايك غايتو ماعندى اجابة لكن لى اجر الاجتهاد

Quote: سياسي ؟ ما كيزان وكيزان ( أها أنا ما كوز) يعني ناسي منو ؟ علماني وما علماني ( أها أنا علماني ) يعني ناسي منو ؟

سؤالك دا هو سبب الغبار والكترابة القايمة فى المنبر
علمانى دى ناس الكفار ....بطريقتك

Quote: عنصري ؟ أفارقه وعرب ؟ أنا سوداني يعني ناسي منو ؟

السؤال دا اجابتو بعد الانفصال (لاحظ انفصال ما استفتاء)

Quote: رياضي ؟ هلالاب ومريخاب ؟ أنا هلالابي يعني ناسي منو ؟

ناس هلال مريخ ديل اسمهم الانصرافيين ...وقع ليك ؟

Quote: ثقافي ؟ مثقفاتيه وناس بساط ساااي ؟ أنا زول سااااي اها ناسي منو ؟

دا بقدر اجابو ليك بصراحة ..
ناس بساط ساى ديل ناس خالو امين محمد سليمان والرجرجة والرهط بتاعو وديل صعب حصرهم فى الوقت
الحالى...

ياخ الف مرحب واتمنى ما اكون خستكت ليك بالبوست بتاعك ......

مرحب بيك ياقريبي.........تحياتي لك وللاسرة الكريمة

أزهري الغالي
الله يسلمك يا قريبي ...وسلامك وصل ...

مع حبي

ملاجظة اخيرة او بالاصح خستكة اخيرة

غايتو كاهن دى برضو حتزازى بيك ...

اول يوم دخلت البورد برلومة جديدة وفى بوست الترحيب بتاعى

دينق بدل يرحب بى اول ...سالنى ..اول حاجة كدى ورينا انتى شايتة وين ؟
وقتها كانت فى هجمة بتاعة كيزان على المنبر زى هجمة الهكر

الاخيرة دى ....

Quote: طيب ده بروفيلي يا البورداب .. وروني أسجل في ياتو فريق

مرحب بيك اخ حاتم و نتمنى ليك اقامة طيبة في سودانيز ...
احسن حاجة تعمل رايح في المنبر دا و تبقى تقيل يعني أعمل بحكمة اذا كان الكلام من فضة فالسكوت من ذهب و الصمت ابلغ وناس لسانك حصانك ..... و الخ
بالنسبة للتسجيل ... ندعوك للانضمام لحزب البهجة
دا لو عندك زمن و مزاج للكتابة

يا غباشي .. شكراً على المرور ..

عاد لكن الصنه شن طعمها كان أخوك تعب عديل لحدي ما بكري رضى وجابني داخل ..
بس بعمل حسابي برضو ...

أها حزب البهجه ده خبروا شنو ؟

يمكن أنفع ؟

مع إحترامي

يا أميرة ..

ياخي والله حاشاك الخستكه ...

لكن كاهن دي مزازيه بي من أنا في الروضه ..
يعني أخدت عليها ..
بس مزازاة الحته دي .. نهاااااائي ما بعرفها ...

تحياتي ..

ألف مرحب بالعزيز حاتم كاهن , يا زول انت ما محتاج لناس , دخلت البورد
وشايل معاك طبنجة وعلبتين قرنيت وعصاية جنب ومع ديل كى بورد سنين الزيك
منو , سجلنى معاك من ناسك , تحايا حارة لسعادة الفريق وبلغه محبتى وتقديرى
هذا الرجل له على من الافضال ما تنوء بحمله الجبال , تتلمذت على أياديه الكريمة
بكلية الشرطة السودانية حين كان مديرها , وعملت تحت امرته فى المباحث الجنائية
المركزية وكان لى نعم القائد والأب , انا بالمناسبة يا حاتم جيت بيتكم العامر عدة
مرات أيام الخرطوم غرب , وكنت انت واخوتك ضغار وكلكم لابسين نضارات نظر ما عارف العمى
ده جبتوهو من وين , رغم أنو سعادة الفريق لم يكن يضع نظارة طبية .

يا جنابوفيصل ..
والله دفرتني عديل بي كلامك ده .. كتر الله خيرك ...
وأنت راجل أصيل وكلامك بيأكد كده .. بشكرك الف شكر ...نيابة عن الوالد ..
لكن والله قصة النضارات دي أنا ذاتي ما عارفه جايه من وين؟ والوالد لحدي هسي والحمدلله ما لبسها ..
ربنا يديم عليك وعليهو الصحه وتمام العافيه ...

خالص حبي

يا أميرة ..
ياخي والله إنت زاتك لفيتي لي راسي هسه ..

لكن ..

Quote: ساكن الرياض ودارس كمبونى وتقول طالعنى الخلا ؟؟ الكلمة دا انا قايلة ناقشة ايمن الطيب بس هنا ..

إنت الرياض دي فاهماها غلط شكلك .. شفتي نحنا ساكنين في حتة بقولو عليها إشلاق الرياض ..
إتوزعت لي ضباط الشرطه والجيش الهسي مرافيد ديل ...من زمن الرياض كانت خلا ...

شكراً على ( البريف ) وكده ...أديني فرصة أفكر وأشوف أنا طلعت بشبه ناس منو ..
تحياتي ..

عايني ..
إنتي أيمن ده منو كمان ؟

الاخ/حاتم كاهن

تحياتي؛؛؛

مرحب بيكـ في الملجة ؛

ياخوي هنا البيع بالسعر اللي بيعجبك

والحاجة الفي راسكـ كُبّها هنا ؛

تشوف الحارس واقف وين وتشوت طوالي ؛يا جات قون يا طلعت برّة

يا دقّت في القايم وجاتكـ تاني.

لتعديل الإسم.

الأخ بشير ...

إحترامي ...

شكراً ليك ولي أهل الملجه عموم ..
والله الفي راسي كتير .. أدونا معاكم فرقه بس ..
وغايتو حابدأ الشوت على مسؤوليتك .. أصلو البلد دي لعيبتا كلهم شتر ..يعني حتبقى على أنا الغلبان ده ..


تحياتي يا بشير ...

العزيز حاتم
ألف مرحب بيك في البورد
أختا محلات الدقداق والكتاحة وإن شاء الله ما بتجيك عوجة.
تحياتي للأحباب فاروق ودكتور عبدالمنعم

تحياتي ومحبتي

جعفر/جوكس

Quote: عايني .. إنتي أيمن ده منو كمان ؟

ايمن ,دا الوكيل الحصرى لمنتجات جونسون بالبورد,,


زايد مهمتو الاصلية هى متابعة السلوك العريانة(بتاعة الكهرباء)بالبورد خوفا من الحريق والمفاجات الاخرى,,,يعنى كهربجى ,,,,

ياكاهن فى داعى?

أميرة الشيخ ,,,سلامات

حاتم ده تفتيحه ,, أبوه عمنا عبد الله عبد كاهن

كان مدير كلية الشرطة ثم مدير المباحث المركزية

ثم مدير عام الشرطة ,,يعني ماخد من الوالد الحيطة والحذر

ما تخافي عليهو ,, الراجل طالع طوف استكشافي فقط وان شاء

الله القشة ما تعتر ليهو,,, دخليهو ضمن الزمره ويكون تحت

الحماية.

تقديري

سيف الدولة الهلالابى,,,,سلاااام,,

اخاف عليهو شنو??

دا انا خفت منو....

مداخلتى معاهو دى اسي مداخلة زول خايف على زول?

دا ختاها طاااااااخ طررخ لماكيفنى زاتو ,,

بتاع سياسة وكورةوعلمانى ويطيرو الكيزان وشنو كدا ماعارفة,,,

Quote: سلامي الكتييير للوالد العزيز عبد الله عبده كاهن

تحياتي لسعادة الفريق ومرحب بيك ياحاتم بعدين ياجماعة الزول ده ما يعمل ليكم فيها مسكين ..... ولد بوليس وفي البوليس مباحث مركزية وكان ما

اخاف الكضب بكون سكن اشلاق قبل كده يعني زول مقرم وواقع من السما سبعة مرات ...........

جنابو عمر عثمان (النفاي الرسمي للشرطةفي المنبر)

Quote: جنابو عمر عثمان (النفاي الرسمي للشرطةفي المنبر)

ومريخابى,,,



امنجى ماتنفيها عليك الله ياجنابو,,


ياكاهن,,
بشير احمد دا المتعهد الرسمى بانزال اخبار فصل الاطباء وتوقيفهم من العمل هنا بالبورد برضو,,

وبث

مرحب بيك يا حانم

احسن حاجة فى المنبر دة انك ممكن تلعب حر ....العب كما يحلو لك

يا حامد ..
شكراً على المرور ...
اللعب الحر بنعرفو .. بس خوفي من اللعب الما فير وكده ...
البجيب طرد وشيل حال ...

تحياتي ..

أمنجي كمان ؟

حوالينا وما علينا ...

متين جينا كمان ؟

مرحب بيك حاتم كاهن
وكت لغاية اسي ود الصايم ما جا لسه انا بقول ليك بتاعتو

ياخي قوم لف كدة
ولو جيت راجع تاني اخد ليك لفة

ـــــــــــــــــــــــ
ود الصايم : لا ادعي لحضورك فرسالتك وصلت لاخونا حاتم

الأخ حاتم

تحية كبيرة

يا زول إنت ما طلعت شليق و لم تفهم البورد غلط ، بل بالعكس فهمت البورد تماما بهذا البوست ، و من هنا إنطلق
أكتب و أكتب و لا تتوقف
ستجد بلا شك أن فهمك للبورد و بالتالي الذين فهموا البورد من قبل ، هم ناسك

أسمح لي أن أنقل لك هنا قصيدة كتبتها هنا من قبل تعني نفس تساؤلاتك :
***

قاصْدَك عديل
و أسلوبي كالتالي:
لو بقيتْ أحسن مثالي :
طِيرْتَك و إن طارت : غنماية
و غنمايتك كان حلبوها .. حِدَّاية
و أحْسِبها زى ما تحب
تصدق ؟
ما بعرفك لا شفتك ..
لكن كارْهك من زمان
كيف؟ ما بعرف
دي لا قضيتي لا قضيتك
سيرتك الذاتية ما قدر المقام
و بين اسمك و صورتك .. بايْن الإنفصام
قاصدك عديل بالرغم من وشوش الإبتسام
كومك إنت و كومي ... زي خطين سكة قطر ...
و رغماً عن كدة ... كبير احتمال ... يحصل صِدام
أحياناً ما تجي في مزاج يومي
أو ألقاك تعوم عكِس عومي
و قصدْتك عديل
( المهم ) ... جايز شخصنة
و ممكن شفْتنة
أنا زولاً كَلَس ... وجهاً لوجه ما بْتقْدرو
( و أعلى مافي كيبوردك .. أنْقرو )
أو سميها ثورة ضد الأنْسنة
لما لقيتك مليان أدب و كُلك مسْكنة
ناوي أجوطك و أبشْتِنك آخر بشتنة
سميها زي ما شئتَ
أو قول حَجًَْراً على أفكارك ...
بنط فوق جدار نافوخك ..
و هات يا قرصنة
و لو لقيتك فايق و رايق ...
قول جاك زول العكننة
قاصدك عديل
ما في أسف .. و ما بتراجع ..
لو صادق ... و حلفت مليون يمين
ما إنت إلا كاذْباً أشِر
يا مُضِر ..
يا أكبر مُفِر ...
يا سيف العُشر
أنا فارس الحوبة المُكِر
قاصدك عديل
مهما تتظارف
أو تجيب مليون وش بيضحك ..
برضك ثقيل
قاصدك عديل
أها شِنْ قولك ؟
يا جلابي .. يا إرهابي
قايل نفسك ما ليك مثيل ..؟
مهما كنت
و مهما تكون
أنا قاصدك عديل ...
يا مهمَّش .. يا مهشَّم ... يا مُفَرْمِل تروس التنمية
جيب أجاويدك .. رُش كلام الترضية
برضو قاصدك عديل
ود حزبك مش مُؤدْلَج ؟
و الظُلُم عندو باين و أبْلَج ؟
أنا شايف رايو أعوج
لو كلامو في استقامة السيف ..
ما بِسْوى عندي غير هرْجاً مُكعْوَج
و أنا قاصدك عديل
يا هوا الكتاحة المُهَدْرَج
يا عضو الدهماء ابْ راياً مرجرج
كلامك نُصُّو مبْهم .. لأنك بالكامل مبنج
قاصدك عديل ..
أنا برضو قاصدك عديل
( و هكذا .. تستمر شهرزاد الأسافير و لا تسكت رغم تعاقب الليل و النهار .. بينما شهريار السيرفر يئن تحت وطأة هذا السجال و لا يفقه منه غير : قاصدك عديل )
( أبو جهينة في 2 نوفمبر 2008م الرياض )

يا أبو جهينه ...
أنا برضي قاصدك عديل ...

لكن كدي قول لي ده منو القصدتو قدر ده ؟
وقصدتو في شنو .. شان يمكن نتقاصد ...

يا أميرة الشيخ ...
أها البريف مطلوب بي جاي ...

تحياتي يا أبوجهينه ..

شكرا يا محمد إبراهيم ..

لا كان كده ود الصايم جيتو ما في ليها داعي .. رسالتو ووصلت على أكمل وجه ...

الله يرفع البلاء عن دكتور الهادي والأبوابي وكل الشرفاء ...

خالص حبي ...

يا جنابو عمر ..

الله ييسلمك ياخ ...
أنا غايتو مولود في إشلاق ... بس الباقي ده ما عارفو والله ...

خالص حبي ...

يا أميرة

والله سحبت سؤالي خلاص ما في داعي ...

تحياتي ليك وليهو برضو ..

الله يدينا خيركم ..

أخي جوكس ..
وغزير محبتي كمان ..

Quote: أختا محلات الدقداق والكتاحة وإن شاء الله ما بتجيك عوجة.

والله كان أختى البورد ده كلو .. هو أنا اللابشني شنو غير الدقداق ده ... ؟

شكراً على النصيحه يا حبيب

أي كاهِن مُتحرِك بنْحييهو ... بس ورينا ياتو كوم دايِر تِتْكَوم فوقو ... عِندك يا سيدي الآمنت ليك الآتي :
- كورة
- حقوق مرأة وجندرِية
- مآسي وأفلام هِندِية
- نِضالات إسْفيرية وعضلات تِبِش
- قبائل وعنصرية
- نرجِسِيات
- عواطِف جياشه
- سياسة أمر واقِع (فقة الضرورة)

حدِد لينا علشان الإخْتِساس وكِده


وبرضو بننصح في الفِترة الأولى بِالإبْتِعاد عن ود الصايِم ، كاكاتو تراها ما مُريحه أبدًا

حاتم

أنا برضي قاصدك عديل ...

لكن كدي قول لي ده منو القصدتو قدر ده ؟
وقصدتو في شنو .. شان يمكن نتقاصد ...

دة ما أنا
ولا في زولا معين بالإسم
دة حال البورد ياخوي
لسان الحال هو : قاصدك عديل
لو سألت عن السبب أو عن من هو هذا المقصود عديل ، ستجد الإجابة في مضامين النص و هي نفس الأسئلة التي أتت في صدر البوست أعلاه

يا أبوجهينه ..

النص ملان والله .. إستمعت بيهو جدا ..
بس زادني قلق ما أغشك ..

قريتو أكتر من مرة ...

شكراً ياخ ..

يا عزام ..

مالك زي الجيتني مكوم براك ..وكومك ياتو في ديل ..

والله ودالصايم ده إلا أراسلو بعد ده في الخاص ...

شكراً على المرور يا عزام

ماسورة جديدة

علماني وكمان هلالابي ؟؟


كويس انك جيت بي ولي امرك معاك

Quote: ماسورة جديدة علماني وكمان هلالابي ؟؟ كويس انك جيت بي ولي امرك معاك

أيوا كده علينا جاي ...

المواسير ورااااقده زي ما أهو شايف ...

علماني وهلالابي ؟؟ أها كتير الاتنين سوا ولا شنو ؟ كان بتكفي واحده ؟
ولي أمري ؟ بالغت يا راجل ...

هلا ومرحبتين بيك حاتم كاهن

Quote: ما هو شكل التكتلات هنا ؟ عشان أتكتل وكده ..

لو عايز تريح بالك وتكسب زمنك ما تتكتل شوت في الإتجاه البتشوفو مناسب في كل موضوع


مورتا زول ما متكتل

يا مرتضى شاكرك على النصيحه يا أخوي ...
وده الكنت قايل رقبتي بقدر عليهو .. بس بالحالة الصعبه الهنا دي ... ما ظنيت حأقدر ...

Quote: مورتا زول ما متكتل

عليك الله دي عملتها كيف يا مورتا ..

خالص تحياتي ...

يُنظر ويُفاد!!



يا عمكـ
شايفكـ أخدت ليكـ كم لفة
واصل كـدا لحدي ما بكره نشوف الحاصل شنو!

ود الصايم شخصياً

شكراً على المرور ياخي ...

الناس دي مالها معاك ولا إنت المالك مع الناس ...

تحياتي لي باكر ...

يا عمكـ .. عندي حساسات في البورض!
أول ما أجي خاشي الشاشة بتعمل لي جك .. جك!
أها لقيت ليكـ الشاشة كلها ماشة على البوست دا!

يا حبيبنا ، سلام
كدي ورينا إنت وين لخالد و اسامه كاهن و بعدين بنجي نشوف قصتك شنو !!

حاااااتم كاهن والله نوًرت البورد يا ود الخالة و بالجد إتمنيتك في
المكان دا من بدري ، خوش يا زول بي رجلك اليمين و سمي بالرحمن إتلفت
كوووويس بي جاي و بي جاي و شووووت طواااالي و التصنيف
بلبسك برااااهو ، و فجاءة كدة لا ايدك لا كراعك تلقي نفسك إتصنفت !!
المهم ما تشتغل بي زول خليك نفسك و بس ...

يا جماعة حاتم دا زول كويس والله بس عيبه حاجة وااااحدة، أسوأ حاجة ممكن الزول
يعملها في نفسه ... هلالابي !!

Quote: يا حبيبنا ، سلام كدي ورينا إنت وين لخالد و اسامه كاهن و بعدين بنجي نشوف قصتك شنو !!

خالد و اسامة أخوان حاتم و هم التلاتة ( ربنا يحفظهم ) أولاد خالتي


تحيااااات كميااات يا حاتم

هبه يا بت خالتي .. ( أها يا القال لي جيت بي ولي أمرك داك ، بقى عندي ولي أمر وبت خاله والمافي شنو ؟ )

والله يا هبه داخل بالاتنين وغايتو ربنا يكضب الشينه ..

Quote: يا جماعة حاتم دا زول كويس والله بس عيبه حاجة وااااحدة، أسوأ حاجة ممكن الزول يعملها في نفسه ... هلالابي !!

أنا هلالابي فرع الجنوب بعد ما ينفصل .. يعني ما عندي دخل بي هلالابكم الشمالين الهنا ديل ...
فدحين ما ظنيت في أي مشكل ...!

تحياتي للكل ...

Quote: يا عمكـ .. عندي حساسات في البورض! أول ما أجي خاشي الشاشة بتعمل لي جك .. جك! أها لقيت ليكـ الشاشة كلها ماشة على البوست دا!

شفتا يا كاهن ..
دا الكنا عاملين حسابو
الزول دا لو ما لحّقك الوش الأخدر الذي يتخذه شعاراً دا لومني





ـــــــــــ

Quote: زايد مهمتو الاصلية هى متابعة السلوك العريانة(بتاعة الكهرباء)بالبورد خوفا من الحريق والمفاجات الاخرى,,,

يا أميرة غايتو دا أدق توصيف يقابلني لأيمن الطيب

يا تيسير ..

أهو ود الصايم جا ماري بي كل وهدوء ورويه .. لا في زول راسو لفا لا شيتين ؟

الراجل مظلوم ساي ...

أما

Quote: زايد مهمتو الاصلية هى متابعة السلوك العريانة(بتاعة الكهرباء)بالبورد خوفا من الحريق والمفاجات الاخرى,,,

فدي أنا بقرأ فيها من أمبارح وما فهمتها بالمرة ...

الحبيب أمين ..

Quote: كدي ورينا إنت وين لخالد و اسامه كاهن و بعدين بنجي نشوف قصتك شنو !!

جيت بعدهم بي مده كده ...

أها قصتي إتعرفت ؟

سلام ياحاتم

مرحب بيك ومنور البورد

والله طلعت شفت ومقرم وتمام مولود فى اشلاق الاوسط

كل النصايح الفوق دى اعمل بيها, واهمها على الاطلاق,

كب الكلام العايز تقوله طالما مقتنع بيه ومحل رهيفة التنقد.

تحياتى للوالد وخالد واسامة

اجدع تلفونك فى الخاص.

يا إبراهيم ياخي عاش من لاقاك ..
تراني حارم نفسي ساي ... تحياتي ليك وللأهل عموم ...
وسلامك وصل يا إبراهيم ...

والنصايح ماخد بيها والله ...

كتير إحترامي ..

Quote: الناس دي مالها معاك ولا إنت المالك مع الناس

والله يا عمكـ بديهم النجيضة بس!

أها يا ود الصايم ..

كان جيت للجد .. النجيضة مطلوبه ..

عُلم يا عمك ...

سلام يا حاتم كاهن,,

غالبا ما ستصبح كاهن البورد قريبا..يازول إنت مذاكر تمام التمام لكن برضو دخول المنطقة الصناعية ما زى المرقة منها !!! لا كيف يا صاحب!!!ياخ محاولاتك فى الفهم عالية جدا جدا وتكتيكك تكتيك شفوت شرق الخرطوم دا غالبا تكتل جديد فيه عدة فصائل بعضها منشق وبعضها موال وكل ما نتزنق نكلم لينا فصيل منهم يطلعو الخلا ويدفرو الجماعة دانتين وشوية هاونات وبالطريقة دى حا يفاوضونا,,سنعلن عن تشكيله قريبا فلا تذهب بعيدا ..

Quote: أنا بقرأ فيها من أمبارح وما فهمتها بالمرة ...

المرة دى مافى مشكلة لكن من الآن فصاعدا لما ما تفهم أعمل رايح خاصة لما تقع ليك بين فكى كماشة زى الوقعت فيها دى,, Cycling 1000 .وال Recyclig قدام,,

مودتى وسلامى لناس مربع واحد وعشرين,,,

أووو أيمن الطيب ياخي ...

يا صديقي .. ياخي البلد ملانه كهنه ومدفقه عديل .. الله لينا نحنا ناس مربع 21 ديل ..
خايف بس من قصة الروحه دي ما تبقى إختياريه .. وتبقى واقع وتحصيل حاصل .. إف يو نو وت آي مين !!!

طبعاً أنا زول إنشقاقي بي طبعي وكده .. بس عندي حساسية من ال Recycling من تبيت برضو ...

والمنطقة الصناعية ( الصناعية) دي .. ما داير أمرق منها أصلي .. ما شايفني جاي حافي .. ومفلفل ليها شعري كيف ؟؟؟

يا أيمن .. بس ألكزني لمن أجي قريب من السلوك (العريانه طبعاً ) .. والبتعمل حريق .. وقولي لي : (ها)...

تشكر يا صاحب ...

ايمن وصل وبداء فى مراجعة التوصيلات يا كاهن ..



شفت كيف؟

يا أميره

Quote: ايمن وصل وبداء فى مراجعة التوصيلات يا كاهن ..

بس لقاني في السليم ...

شفتي كيف ؟

Quote: يا أيمن .. بس ألكزني لمن أجي قريب من السلوك (العريانه طبعاً ) .. والبتعمل حريق .. وقولي لي : (ها)...

ها يا كاهن هااااااااااااااااااااااااااا

تحياتى يا صاحب

Quote: جيت بعدهم بي مده كده ... أها قصتي إتعرفت ؟

يعني طلعت أخو خالد و اسامه كاهن !!!
تعرف يا حاتم أنا لو كنت لو كنت أخو خالد و اسامه كاهن ديل كان علقت يافطه في ضهري إنو أنا أخو الناس دي !!!

Quote: دا ختاها طاااااااخ طررخ لماكيفنى زاتو ,, بتاع سياسة وكورةوعلمانى ويطيرو الكيزان وشنو كدا ماعارفة

الاخ حــــاتم كاهن

مرحب بيك يا جسور

ما فضل ليك غير تكون من اولاد ام درمــــــــــــــان

يكفي انك من عشاق الازرق أنسي انو لو ماناس ام درمان ديل قطعوا راس غردون كان بحصل شنو ؟

النجيضة المريخاب .... ديل ما يدردقـــوك ... اوعك من الســــــارق

محمد الفاتح الهلالابي ...

ومولود في أمدرمان كمان .. تاني شنو ؟؟

ومريخاب شنو كمان .. أخوك جاهز ما تشيل همو ...

خالص حبي ...

يا أمين .. تحياتي العطرات

Quote: تعرف يا حاتم أنا لو كنت لو كنت أخو خالد و اسامه كاهن ديل كان علقت يافطه في ضهري إنو أنا أخو الناس دي !!!

والله يا أمين اليافطه معلقها وفيها هشام برضو بالمناسبة وأخت غالية إسمها أمل ..

الله يعزك يا أمين ..

اوووه سلامات يا كاهن والله انا من لقيت طالعني الخلا دي عرفت سيدها زول مسلط عديييل.
مرحب حبابك وابقي داخل لا جوه وشوت ساي ما تفرز .
تقبل مودتي

ليلي عثمان شخصياً ...
وكثير مودتي والله ...

شكراً على النصيحه .. وأبقوا مارقين ساي ..

تحياتي للكل ..

الأخ حاتم عبدالله عبده كاهن
تحية طيبة
ومرحبا بك يا نسيبي العزيز في فضاء
سودانيز اون لاين وامنياتنا لك بوجود
مفعم بالنشاط والمشاركات الفاعلة في
هذا المكان
والتحايا عبرك لجميع الأهل والاحباب
بالخرطوم وشندي وامدرمان

يحيي مصطفي

أخي يحي ..
أشكرك جداً على الترحاب الكريم ..
وتحاياك للأهل عموم وصلت تب ..

يلا إيدكم معانا ..


خالص حبي ..

كاهن .. ياخ شوت وشلت ...

علمانى مسلم كافر هلالابى مريخابى موردابى ..

بس اهم حاجة سودانى دى ...

وطالما انك سودانى ..

انتا زول الجميع هنا ..

.........................................

البتاعت وصلت .. ح اتصل بيك :)

كتو ..
شكراُ يا حبيب ...
وراجي إتصالك ...

يا كاهن مرحب بيك حبابك و اكيد حبابك الف يازول خش فى اي قروب ما عندك اي عوجه تب



تحياتي لهشام كاهن

شكراً يا سيد ...
وإعتبر التحايا وصلت ..

خالص حبي ...

ههههههههههه

احمد ربك اهو لقيت ليك (مدخل) ..

عقبال نحن

بالمناسبة كنا ساكنين (بالإيجار) في حي ناصر (شارع أوماك) .. جيران (الرياض)

بدور اسعلك ... عشيري كيف ؟؟ (طبعاًً نحن (أهل عوض) سااااكت)

فطائر (عشيري) دي لينا (قمة المتعة)

حاتم يادفعـــة
سلامـــــات
تعرف انا كمان زيك وواحد,,,, بس قلتا لحدت ماالواحد يشوف شايت وين ينتظر شوية
ويلزم الصمت عشان مايقولوليك ايو مداخلة قد تحسب ضدك ولك الحق فى الاحتماء تحت جناح ما..
غايتو ياالحبيب
وحسب كتابتك الانيقه شكلاً ومعنى
الا تعملينا تكتل ولك ان تقوده
ونحن وراك وومعاك وبالجنبتين كمان

تحايا لك وللمتداخلين الذين رحبوا بك وبنا من قبل
والشكر مجدداً لسيد الحوش بكرى وبالمعية كدا لى ود الصايم زاتو

Quote: والشكر مجدداً لسيد الحوش بكرى وبالمعية كدا لى ود الصايم زاتو

أخي البرلوم الزيو زي ..
بكري الشكر من هنا لي عندو ما بيوفيهو حقو ... أما ود الصايم فده أول زول تجي من برة تشكروا طوالي وبعداك تشوف الفاضل شنو

..

Quote: وحسب كتابتك الانيقه شكلاً ومعنى

والله بكون لخمتك ساي .. بس ده ما يمنع أشكرك ...

Quote: ويلزم الصمت عشان مايقولوليك ايو مداخلة قد تحسب ضدك ولك الحق فى الاحتماء تحت جناح ما

لو قريت مداخلات الجميلين في البوست ده .. حتعرف إنو الناس دي أرحب ما تكون .. وأجمل .. فعلى قولهم بقول ليك .. شوت ساااي ..

Quote: الا تعملينا تكتل ولك ان تقوده

أهااااا ما كنا كويسين .. مالك علينا هسي يا أحمد

خالص حبي

.. كاهن ..

يا مجاهد ..
اهل العوض وعشيري ديل ما بيتلموا ..
شكراُ على المرور ( الدخاني ) ده ..
تحياتي العطرات

..كاهن ..

better late than never ....


تحيه و مراحب ..و تحيه للوالد....


الصادق سلاطين

أخي الغالي إبن الغالي ...
الصادق عوض سلاطين

فعلاً أن تأتي خيرمما ألا تأتي أبداً ..

وأهو أتينا ...

حبي لك وللأهل جميعاً ...

..كاهن..

حاتم
تحياتي وعوافي...علك بخير
خليك زي ما آنت
كده أجمل ما يكون
ومرحب بك وحبابك الف.


_
كن مع الحق والانسانية والخير والمحبة والسلام

هواري ..

شكراً على المرور يا جميل ..
وأكيد محاولاتنا في (البقاء) زي ما نحنا ما حتقيف ..

Quote: كن مع الحق والانسانية والخير والمحبة والسلام

والحرية والعدالة ...

كثير حبي ..

.. كاهن ..

Quote: والحرية والعدالة ...

هو ذاك...هو ذاك
كما قُلت من قبل,في تعليق لصورة حفل افتتاح كاس العالم\جنوب افريقيا
(الصورة توضح اختلاف الآلوان,ووحدة الآنسان)
نرتقي بانسانيتنا فوق,الظلم,العنف,الفحش من القول والفعل,العنصرية,الاستعلاء,الكراهية,وووووووووو

Quote: كثير حبي ..

ولك آضعافه

__
الكلمة الطيبة جواز سفر.....