Post: #1
Title: وتقولي كيف ؟؟
Author: فاروق أبوحوه
Date: 06-19-2010, 08:09 AM
بتقولي كيف ؟
هو الغربة خلت فيها كيف
وتقولي كيف ؟
والغربة كيف عاد فيها كيف
لما الحريق يبقي الرفيق
وين الغريق بِلقالو قيف ؟
زادت همومنا وكل هم
جوانا منو جبال ألم
بتقولي كيف
والغربة في أعماقنا سيف ؟
فيها الدموع شلال وجع
فوق الطريف الما هجع
فيها الوليد الما رجع
لسه الفرح جواهُ ضيف
في بالو أُمو وحِلتو
مالغربة زادت عِلتو
ياحليلو ليلو الهدَّ حيلو
وفي الحلم راجيلو طيف
بالاً مشتت في المِحن
وروحاً معلّقه بالوطن
ما اظنها تتهنّي يوم
أو مره بس يغشاها كيف
تنجم متين ؟
تتلم متين ؟
ترتاح متين يا صاح
لما الرياح تملا الجناح
الساعه ديك
قوليلي
كيف
|
Post: #2
Title: Re: وتقولي كيف ؟؟
Author: معاوية عوض الكريم
Date: 06-19-2010, 08:16 AM
Parent: #1
الكيف جبنة وشاي يا قريبي 
|
Post: #3
Title: Re: وتقولي كيف ؟؟
Author: فاروق أبوحوه
Date: 06-20-2010, 05:33 AM
Parent: #2
| Quote: الكيف جبنة وشاي يا قريبي |
صدقت يا حبوب
وفنجان جبنه بي شمالو
يسوي الدنيا بي حالو
القريفه كاتلانا يا سيد
كل الود
|
Post: #4
Title: Re: وتقولي كيف ؟؟
Author: فاروق أبوحوه
Date: 06-21-2010, 10:22 AM
Parent: #3
المغارب لابسة
اقصر من خيال المفترى
ونحنا مديونين نسيم!!!
- عاطف خيري -
--------
بس يا عاطف ؟
|
Post: #5
Title: Re: وتقولي كيف ؟؟
Author: عواطف ادريس اسماعيل
Date: 06-21-2010, 01:27 PM
Parent: #4
رحلة حروف ..
شلال حزن ..
حالة غريب ..
فقد.. الوطن
هجر الأحبة ..
شاف المحن ..
رائع كعهدنا بك يا أبو حوة ...
|
Post: #7
Title: Re: وتقولي كيف ؟؟
Author: فاروق أبوحوه
Date: 06-26-2010, 11:14 AM
Parent: #5
Quote: رحلة حروف ..
شلال حزن ..
حالة غريب ..
فقد.. الوطن
هجر الأحبة ..
شاف المحن ..
رائع كعهدنا بك يا أبو حوة ... |
أستاذه عواطف :
تعرفي واحد صاحبي لم يكتو بنار الغربة زينا
سألني ذات مره عن ماهية الغربة وكيف تبدو.؟
أجبته:
والله يا حبوب أصلو ما لقيتلها شبه غير (الحصحاصة في المركوب)
ولك أن تتخيلي حجم الألم والشحتفة .
غايتو نباصر فيها لما نلقي لينا درب مرقه علي بلدنا.
تسلمي..
|
|