محمد الحسن سليمان المغزلن تعال هنا ما تخرب بوستات الناس

اولا يا خبير الاحصاء والكوتات
لما تجيب كوت ما تدمج كوتين مع بعض عشان تفرز لكل زول كومه
واوعك تصحح لي عربي ولا غيرو انا ما عندي شغله مع لغه الاعراب
بتكلم معاك متل ما بتكلم مع اي زول في شارع الله دا .
اولا انا ود بادي ماني مولداهو لا اكلت سمايتو
عشان اثبت او انفي شايقيته
ولو لاحظت انا كلامي ركز علي الثقافه التي تتمظهر في اشعار ود بادي وحتي اتفاقي مع من تحدث عن ود بادي كانت في الناحيه الثقافيه
وقلت انهم انتجوا ثقافه تختلف عن ثقافه الجدود النازحين من منطقه الشوايقه وفي هذا اثبات انه اهل المنطقه ينحدرون في معظمهم من اصول شايقيه . فمثلا ان جدودنا الذين استقروا بمنطقه ود بانقا جاءوا من البركل .لكين ثقافتنا الان تختلف تماما عن ثقافتهم وحتي والدي الذي شهد غزوات الجهديه لا يعرف البركل ولم يره ولا نعرف لنا اي اقارب هناك انقطعت صلتنا بتلك المنطقه تماما .
. بعدين يا محمد الحسن الشئ الانت ما عارفه انه امي انا من اصل شايقي واكيد انا عشت في كنف الثقافتين ولاحظت الفرق بينهما لغه وشعرا وغناءا وحتي نوع الاكل وصفات كثيره اخري .
انت قلت انه كلامي عن القراصه والعصيده ليس صحيحا واستدلا لي ضعيف .
اها انت مش عندك رائ يختلف بل يدحض كلامي اطرحه لنري قوه استدلالك

: المهم يا أختنا دومة أن كلامك عن القراصة والعصيدة *


لا كلامي عن القراصه والعصيده صحيح ودقيق وكلام زول نجيض كمان .
لانه منطقتنا دي لا تنتج القمح البصنعو منو القراصه وهي منطقه انتاج ذره الفترتيه ام العيش والحميسي والمقد الي اخره من انواع الذره وبلاد جدي في العديره اقطع اضانك حومها واسال من محلتها دي منطقه زراعه مطريه اخر حصاد وصلنا منها قبل وفاه الوالد عام 1969اها انت اثبت لي انه منطقتنا دي منطقه انتاج قمح وهنا بيكون كلامي القلته عن معرفه اصيله ومعايشه غلط
. بعدين الفقير المدفون في قريتنا و اسمها منسوب اليه هو الشيخ صالح ود بانقا الملقب بجبل اللقمه وهو رازقي فرع من قبيله الجعليين .
مناطق الشمال النزح منها الجدود هي التي تزرع القمح و تشكل القراصه بالنسبه لهم staple food
يا زول لشلوخ جدودنا استبدلناها بي الملود حق الجعليين او الT

وما في ربابه ولا دليب هناك بس دق دلوكه والشتم المخنوق وارجع لقصيده ود بادي . ما تغااااالللللللللللت يا الحبشي ساكت حبا في الغلات .

هيع .. الليلة العزيزة خالة دومة اتلبَّشت :)..

فوق لغاية ما نجي نقص الدرب ونشوف الفلم ده بدأ وين .. وودبادي ده الجابو هنا شنو ! ..



أو أجدعوا الرابط .. يا عملات ناس البورد :)

على سبيل التحية

بي بادي ومن غير بادي .. يشرفنا حضورك يا ست الكل ..

حبابك يا طار ق
والله مشتاقون

لوووول يا منير ولدي انا كان بعرف اجدع الرابط دا حالي

الروابط دي وحاتك الا ننتظر الحبشي يجيبها فتحنالو البوست دا عشان يغالت
اصلو الحبشي كان ما لقي زول يغالتو يغالت روحو

عفاف يا جميله تسلمي يا حبيبه ويسلم ود بادي
وما زلت في انتظار الحبشي عاشق المحاججات .

Quote: بتكلم معاك متل ما بتكلم مع اي زول في شارع الله دا . اولا انا ود بادي ماني مولداهو لا اكلت سمايتو عشان اثبت او انفي شايقيته

الحبية العزيزة دوما كيفك ووينك ؟ زمن ما سمعنا صوتك زعلانة ولا شنو الحصل ؟؟

لكن كلامك الفوق ده عليك الله ما جرسة عديييييل ؟؟

حباب المسلمي ولدي لا والله ما زعلانه منك
انت ضو قبيله وشيال تقيله
وتب ما بقدر علي جزاك غير اني اشكرك سرا وجهرا
وليك كثير المعزات يا بحر العوم الخاتي اللوم .
لووووووووول اسع يجي يصقعني ليك
دا مرفوع ودا مجرور ودا جمع تكسير وكندو وكندرو
وانا في ا لمدرسه القواعد دي كنت بجليها

Quote: لووووووووول اسع يجي يصقعني ليك دا مرفوع ودا مجرور ودا جمع تكسير وكندو وكندرو وانا في ا لمدرسه القواعد دي كنت بجليها

خلاص نشوف ليك الزميل محمد زين الشفيع يعلمك التنوين
وكلام انك بتجلي الحصة ده ما بحلك وكمان بجيب ليك هوا ,, اها كنتي بتمشي وين في زمن الحصة الجليتيها ؟؟
استعدي بس للراجيك .. وكان محمد اي خلاك ناس هناي ما بخلوك

العزيزة دوما
انت قاسم الحب المشترك لهذا المنبر
نختلف في كل شي ونتفق علي حبك.
دحين محمد دا تلتقي عنده كل الدروب بين الشمال والشرق.
بشيشك يااختي .
ولك الود

الأستاذة دومة
تحياتي
أطلعت علي مقتبسك في بوست الاخ محسن ووصلت لخلاصة واضحة وهي : أنك لم تنفي الجذور الشايقية لمحمد بادي وأنما ركزتي علي الانتماء الثقافي والتراثي للشاعر وربطيه بمنطقة المنشأ -
وفي هذاالسياق سا أساهم ببعض المعلومات
- الشاعر محمد بادي -شايقي -سورابي ينتمي للعكوداب
-جده الاكبر هو عكود ود سلفاب شيخ السوراب -من فروع الشايقية- وهم من منطقة
القرير-القوز- - بسط عكود سيطرته علي أراضي شاسعة في ولاية نهر النيل وبقي بها بعض
أهله وأتباعه ومن أنضم لهم من الشوايقة لاحقا بعدالفتح التركي وقد توفي عكود قبل العهدالتركي -ونلاحظ أن شوايقة حجرالعسل والحقنة الخ لهم مايقارب ال 200 عاما في تلك النواحي وقد تزاوجوا بالجعلين وتلاقحوا ثقافيا بسكان تلك المناطق
لذا فقد أختلفت لهجتهم وفنهم وثقافتهم نسبيا عن سكان مناطق الشايقية - وحينما نتكلم عن ثقافة وفن منطقة الشايقية فإننا لانحصرهم في عرق بعينه فالنعام أدم فنان المنطقة الاول لاينتمي عرقيا لقبيلة الشايقية -من الهواوير- ولكنه شايقي ثقافة وفنا ووجدانا-وكذلك الحال بالنسبة لود اليمني ومحمد كرم الله ..........
- من هنا أفهم تماما رؤية دومة -العميقة-بأن ود بادي قد تتطبع بثقافة وأرث مناطق ولاية نهر النيل وتراثها وفنهاوأكتسب لهجتها وأنتمي لها وجدانيا- فالموضوع إذا ليس قبلية وأعراق و أنما إنتماء ثقافي ...........

تحياتي يا خالتي دوما .
بعد اذنك مداخلة تعقيبا على كمال عباس ..
كيفنك يا كمال ..
قلت :

Quote: ومحمد كرم الله

دعني اضف اليك عبد الرحيم أرقي و صديق أحمد فثلاثتهم بديرية دهمشية و ليسو شوايقة كما اشتهر عند ناس المركز .. حيث ان التفريق بين الشايقية و البديرية عندهم عسير .. و قد اشتهر فن الطمبور أنه غناء شوايقة لسبب ما رغم ان اغلب من شهروه و عرفوا الناس به لم يكونو شوايقة .. و لا هو فن خاص بالشوايقة .. فغناء الطمبور اساسا نشأ وانتشر و قام على اكتاف الرواويس .. و هم البحارة .. فكانوا يتغنون بالطمبور حنينا الى بلادهم و محبوباتهم ( غالبا المتوهمات ) .. و الرواويس كان فيهم الشايقية و غيرهم. و اغلبهم من غيرهم.
و العجيب أن يبدأ غناء الطمبور بالحنين الى البلد و يستمر هذا النغم فيه الى يومنا بشهرة أن غناء الشوايقة حنين رغم ان الثابت عنهم تاريخيا كما نقل ألن مورهد في النيل الأزرق انهم كانوا قوما محاربين قبل أن يجبرهم اسماعيل باشا على الزراعة و منها بدأ ارتباطهم بالأرض. أي ان حنين الفلاح للبلد و التمر و الجريد و أنين الساقية كلها أشياء جديدة على الشايقية استجدت بعد 1821 و كانت غصبا عنهم. لكنها صارت طبعا بسرعة.

و اضيف الى النعام آدم الذي كان من عرب الهواوير ايضا جعفر السقيد الشهير الذي صوته من مزامير غناء الطمبور الذي هو أيضا ينتمي الى العرب.
لكن قرى الشمال لها عرب و عبيد. و هم القوم الذين ينزلون بين ظهراني القرية أو القبيلة و ينتسبون اليها .. من العرب أو من بقايا الرقيق القديم.
و في الحضر غالبا ما يقدم هؤلاء انفسهم بالقرية او القبيلة المعروفة .. في شئ شبيه جدا بنظام الولاء عند العرب .. حيث كانت للقبيلة موالي ( ليسو العبيد ) لكنه الشخص الذي ينتسب للقبيلة بالنزول بين ظهرانيها و التجنس بها .. و في كتب التاريخ يقولون فلان العبسي مثلا من أنفسهم أو من مواليهم. فمن أنفسهم أي انه عبسي النسب صحيحه. و من مواليهم يعني أنه انتسب اليهم لكن نسبه ليس منهم.
و هذا حال عرب الشوايقة كبعض الهواوير .. و عبيد الشوايقة كبعض من تناسل عن الرقيق القديم.
و هذا موجود تقريبا في كل قرى الشمال.

ختاما و تلطيفا لذكر عبيد الشوايقة احكي لك ما قد تكون تعرفه عن قصة لعبد العزيز محمد داوود ..
قيل انه رحمه الله ارتكب مخالفة مرور فاستوقفه شرطي شايقي و اقتاده الى محكمة الحركة حيث قدمه امام قاضي شايقي مشلخ أيضا .. فلما سأله القاضي عن اسمه و قبيلته ( و هو الاجراء المتبع في عهد الانجليز و بعض العهود الوطنية في ذلك الزمن ) قال ابو داوود :
عبد العزيز محمد داوود .. عب شوايقة يا مولانا.

دومة
توقعى بوست مفتوح باسمك ردا على هذا البوست.

لوووووووووول يا دكتور بله هو مش مجليني اليوم دا كله ؟؟
لو فتح بوست اجلي ليك برضو
بس ما يعمله قراميط وليط وكلام العرب الما عندو لا راس لا قعر دا

ماما دوما ازيك
و الله ليك وحشة




-----------

يا حبشي ما في حاجة اسمها ما عندي علاقة بلغة الاعراب . . المنبر دا عربي . . و النبي ( ص ) ذاتو عربي . .
كلامك دا يا ماما دوما تقوليهو لحبشي ما عندو حديدة ؟
مش بتبخة كيبورديك قلت انك مستعربة جلابية ؟ . . اها خمي و صري
دا تناقض !! . . يا حبشي ما تشفّع في اللغة أي عزيز
و نحن من خلفك نشد من ازرك

Quote: مش بتبخة كيبورديك قلت انك مستعربة جلابية ؟

لووووووووووووووول داك كان تاكيدا للانتهازيه الجلابيه فقط .
ما قلنا جلابيه اعراب و قواعد
حركات اللغه دي اليمش يعملها مع الناس القدرو ناس محسن خالد ومنير وانت
انا لا قدرو الحبشي لا لحم سدرو
غايتوا يا قيقا الفيك اتعرفت

ماما دوما عاوزة تفتنيني مع الحبشي دا و لا شنو ؟
الجابني انا لمحسن خالد و منير شنو !؟
في اللغة المقامات محفوظة . .
معركة ذات ( الإعراب ) دي لا ناقة لي فيها و لا جمل . .
الا كان راندوق ساي معليش . . نحن في حزبك تب . . ناس لغة اليومي بس

لوووووووووول

انا ما عربي ذاتو كلو كلو !
نوريك النكري بالطريقة الصاح







--------



لوووووووول

اتذكرت انو اليتيم ما بوصوهو على البكى . . و الحبشي ما بوصوه على الخراب

Quote: انا ما عربي ذاتو كلو كلو ! نوريك النكري بالطريقة الصاح

مخير مش بتنتوق الداد سح والاين سح
تبقي اربي

شكرا ياحمور

Quote: دعني اضف اليك عبد الرحيم أرقي و صديق أحمد فثلاثتهم بديرية دهمشية و ليسو شوايقة كما اشتهر عند ناس المركز .. حيث ان التفريق بين الشايقية و البديرية عندهم عسير .. و قد اشتهر فن الطمبور أنه غناء شوايقة لسبب ما رغم ان اغلب من شهروه و عرفوا الناس به لم يكونو شوايقة .. و لا هو فن خاص بالشوايقة .. فغناء الطمبور اساسا نشأ وانتشر و قام على اكتاف الرواويس .. و هم البحارة .. فكانوا يتغنون بالطمبور حنينا الى بلادهم و محبوباتهم ( غالبا المتوهمات ) .. و الرواويس كان فيهم الشايقية و غيرهم. و اغلبهم من غيرهم.

.......... فن الطنبور شايقي - بالمفهوم الثقافي لا العرقي- وقد
أسهم فيه -الحسانية والهواوير والركابية والمناصير وبعض الدناقلة - وغيرهم- أنتمي الفنانين - لمختلف الوان الطيف العرقي ولكنك تجد أن معظم الشعراء شايقية......... أما البديريةوالشايقية فيعدون - كاأحمد وحاج أحمد- في نظر معظم الناس لدرجة أن الأغلبية تصنف الطيب صالح كشايقي....
..........
000 نعود لهذا البوست والذي لن يفهم بمعزل عن الحوار الذي دار في بوست محسن - حيث وثب السيد محمد إي سليمان-بطريقته الغلاطية المعروفة ليزعم أن الاستاذةدومة قد قامت - "بامحاءالاصل الشايقي لود بادي علما بأنها لم تقول بهذا !!ولم تهتم أصلا بالجانب العرقي للشاعر وإنما أهتمت بالانتماءالثقافي لو د بادي حيث ربطته بالسائد في مناطق نشأته ونشاة أهله...

الاخت دومة تحياتي

دخلت للتحية والتعارف

مع خالص الود


حياة حسين الشهيرة بام محمد

حياه حسين حبابك يا الحبيبه
تشرفني معرفتك كتير يا ام محمد .

Quote: الشاعر محمد بادي -شايقي -سورابي ينتمي للعكوداب -جده الاكبر هو عكود ود سلفاب شيخ السوراب -من فروع الشايقية- وهم من منطقة القرير-القوز- - بسط عكود سيطرته علي أراضي شاسعة في ولاية نهر النيل وبقي بها بعض أهله وأتباعه ومن أنضم لهم من الشوايقة لاحقا بعدالفتح التركي وقد توفي عكود قبل العهدالتركي -ونلاحظ أن شوايقة حجرالعسل والحقنة الخ لهم مايقارب ال 200 عاما في تلك النواحي وقد تزاوجوا بالجعلين وتلاقحوا ثقافيا بسكان تلك المناطق لذا فقد أختلفت لهجتهم وفنهم وثقافتهم نسبيا عن سكان مناطق الشايقية -

شكرا يا كمال علي الاضافه الممتازه وهذا بالضبط ما عنيته .
بالرغم من ان والدي توفي مبكرا لكنني اذكر بعضا مما حكاه لي عن اصلهم ولم اسمع منه قط نسبه الي اصل عربي بل كان يقول اصلنا حنكاب كدنقاب من جبل البركل واهل ممالك قديمه ومن ملوكهم الملك صبير وان السوراب والعونيه هم ابناء عمهم.

Quote: دعني اضف اليك عبد الرحيم أرقي و صديق أحمد فثلاثتهم بديرية دهمشية و ليسو شوايقة كما اشتهر عند ناس المركز .. حيث ان التفريق بين الشايقية و البديرية عندهم عسير

حمور يا ولدي انا ذات نفسي لا افرق بينهم رغم ان خالتي كانت بتقول انهم بديريه دهمشيه وهم من منطقه جلاس تحديدا غايتوا امي الله يرحمها ما شغاله بالموضوع دا بتقول نحن سودانيين وبس .
كدي بالله وريني الفرق شنو بين الشايقيه والبديريه مش نفس المنطقه واللهجه والعادات ؟؟؟

سلام يمة دوما
طبعا جاي ساكي معنى مغزلن دي
من يوم داك و أنا بحك راسي..
أولتها : رايح ليهو الدرب أو مشوطن

Quote: أولتها : رايح ليهو الدرب أو مشوطن

عاد يا سعد الدين ولدي مالك علي؟؟
رايحه ليهو غزاله
عاد الغزال ان جفل بتلحق ؟؟؟!!

يا سلام يا محجوب يا ولدي والله انا احبكم جميعا يا ابناء السودان
وحلاتو وليدك دا بالله تقبله عني

Quote: امي الله يرحمها ما شغاله بالموضوع دا بتقول نحن سودانيين وبس .

Quote: امي الله يرحمها ما شغاله بالموضوع دا بتقول نحن سودانيين وبس .

والله يا سعد الدين ولدي امي الله يرحمها كانت متقدمه وسابقه لزمنها كثير جدا لو كان حضرت هذا الزمن الردئ لتحسرت علي حالنا .
امراه نادره سودانيه وطنيه اصيله ومستنيره .

Quote: كدي بالله وريني الفرق شنو بين الشايقيه والبديريه مش نفس المنطقه واللهجه والعادات ؟؟؟

و الله يا خالتي دوما كان سمعوك البديرية بتقولي كده ما بتلقي اليحجزك منهم ..
البديرية الدهمشية - عند أنفسهم - قبيلة عربية تمتد من شمال السودان الى غربه .. فبديرية الغرب ابناء عمومتهم .. و البديرية يقال انهم ابناء بدير .. و هم سبعة .. و في غرب السودان يقولون عنهم : اولادبدير السبعة الكل زول بطبعه.
بعض اشجار الانساب تجعل بدير أخا لشايق جد الشايقية .. و البعض الاخر تجعله من نسله.
لكن البديرية يعتمدون النسب الذي يجعل بدير و شايق و رباط و عرمان جد الجعليين على رؤوس ثلاثة فروع متساوية.

بالنسبة لديار البديرية فهي تمتد من حسين نارتي جنوبا الى دنقلا العجوز و الباجا/ الغابة شمالا حيث تبدأ ديار الدناقلة من قرية الغدار مسقط رأس الزبير محمد صالح.
و في داخل هذه الحدود تقع عموديات الفونج ( و هي كرمكول و دبة الفقرا و جزيرة الفونج ) و في هذه العموديات ولد سيدنا الطيب صالح و إن كان ليس من أنفسهم .. اذ يمتد نسبه شمالا بعيدا عن الفونج و البديرية.
و سبب وجود الفونج هناك ان سلاطين سنار ارسلو حامية من الجند و امراء الفونج الى حدود الشايقية الشمالية لتحمي البديرية من غارات فرسان الشايقية الذين كانوا يغيرون فينهبون و يخربون.
هذا قول شفاهي مشهور و رأيت أ.ج. آركل قال نحوه في كتابه " أصل الفونج " .. و إن كنت أميل الى رأي خاص اخر لم أجد من قال به غيري.
المهم هنا أن ديار البديرية و إن كانت محاددة للشايقية الا انها منفصلة عنها.

ثم ان ديار البديرية لوسطيتها بين الشايقية و الدناقلة و لأنها كانت مركزا تجاريا ضخما فانها فقدت كثيرا من تميزها الخاص و اكتسبت مزيجا فريدا من اختلاط الناس بها.
فالدبة قصبة ديار البديرية هي سوق قديم معروف و منها كانت القوافل تتجه الى صحراء العتمور و صحراء بيوضه.
كما ان بها ميناء أب قسي و هو واحد من اقدم و أكبر الموانئ في الشمال. و قد ذكره نعوم شقير فقال انه ميناء كبير مشهور.
و في منطقة تنقسي ( حيث اصبحت أب قسي احدى قراها ) اسر كثيرة جدا ترجع اصولها الى تجار كانوا يمرون بابقسي ثم استقروا فيها .. و فيهم من هم من انحاء السودان و فيهم من جاء من خارجه.
كما ان في قلب ديار البديرية استقر الأدارسة مبكرا فاقاموا الخلاوي .. لا اذكر الان اسم الشيخ الادريسي لكني اذكر ابنيه أحمد و عبد العال الذين انجبهما هناك في اوائل القرن التاسع عشر. و قد هاجر الى تلك الخلاوي الادريسية جماعة من الناس من أكثر من مكان.
كل هذه الهجرات و الاختلط ادى مع صغر مساحة ديار البديرية الى وجود ثقافة تشبه الكثير من الثقافات المجاورة حتى تكاد تفقد ميزتها الخاصة الا لمن دقق.
فاللغة النوبية ( الرطانة ) مؤثرة في كثير من المسميات .. أكثر بكثير من المعتاد في تسمية ادوات الزراعة .. بل تتجاوزها الى تسمية الأماكن و ألفاظ كلامية و تصريفات أفعال.

اظني كترت النضمي في سؤال عابر مش ؟
معليش ياخ اعفي لي.

شكرا الابن حمور
للاضافه لا تبخل علينا بالمزيد
المعرفه سمحه .

والله يا قيقيا انا لو وريتكم المواد القاداها كلها تعفوني خالس من القرايا ام دق
تسدق لا دين لا اربي لا تاريخ

يا محمد الحسن
اكيد
حا تكون متابع البوست ده

ما حا اهاجمك زي يافي الناس
لكن حا اديك نصيحة

كترتها شديد
شديد جدا

Quote: خلاص نشوف ليك الزميل محمد زين الشفيع يعلمك التنوين وكلام انك بتجلي الحصة ده ما بحلك وكمان بجيب ليك هوا ,, اها كنتي بتمشي وين في زمن الحصة الجليتيها ؟؟ استعدي بس للراجيك .. وكان محمد اي خلاك ناس هناي ما بخلوك

يا المسلمي ولدي انا كي بوردي دا عجمي في عضمو وانا عجميه كمان بتدور تسوي لي فيها تنوين الله يقدرنا علي التصريف ساكت من غير تنوين .
وحقيقه محمد الحسن متل عواستي دي ما قاعد يتشوط بها لانه لو باراني لمن تقوم الساعه ما بيحصي غلطاتي .
. ناس هناي هم زاتهم الضبحو وسموني دومه الجلابيه
اها قمت يا سيد اللمنتي ليك صدقت اني جلابيه
وزمن الحصه البجليها كت بسرح بغنيماتي اقدمن علي الليد ومرات احتلن البرم والخريم

ابو النسب وينك ياخ .
ما مشتاقين ولا اي حاجة

سلامو عليكو

Sister Doma
Assalam alakum

How far is Wadbannga from Wadalhabashi ?x

Quote: أولاً بالمناسبة محمد بادي ليس شايقياً .. فهو من منطقة الجعليين من جزيرة صغيرة تدعى (جزيرة عبد اللا) بالقرب من شندي ، ولقد أطلق إسم الجزيرة مسقط راأسه على قصيدة "أنا اخو البت اللكعت قرن الخمرة النازة" .... وقد يكون له جذور شايقية لأنه تغنى لجزيرة مساوي مسقط رأس السيد علي الميرغني .. فهو ختمي قح ..... والرجل له مفردات خاصة به لا هي شايقية ولا هي لهجة الوسط ولا هي من كلام السافل ولا هي حنك البطانة الصرف ... صديق عبد الجبار

Quote: تحيه طيبه يا اخ صديق عبد الجبار ماذكرته عن ود بادي العكودابي صحيحا وينطبق علي كل سكان المنطقه الممتده من جنوب شندي وحتي حجر العسل علي ضفتي النيل فالبرغم من ان الجدود نزحوا من مناطق الشمال الا انهم استقروا بهذه المنطقه وتصاهروا مع ما بها من سكان اصليين وانتجوا ثقافه تختلف عن ثقافتهم الشايقيه فمثلا لا نطرب للطنبور مثل طربنا للدلوكه ولا نحب القراصه كحبنا اللقمه او ( العصيده) وكذلك لغتنا فهي خليط كما اسلفت .شكرا علي شرحك لكلمه عاتن فقد استرجعت ذاكرتي كلمه عتن معتن . doma

Quote: كترتها شديد شديد جدا

Be my quest

Quote: المعروفة ليزعم أن الاستاذةدومة قد قامت - "بامحاء الاصل الشايقي لود بادي علما بأنها لم تقول بهذا

Is Arabic language ya Kamal ?x
what is
(قامت - "بامحاء)

البداية تكويت برضو,,,?


ماما دومة ازيك,,,

انتى وينى كوتاتك مع النسوان??

نحن غير كوتاااات اصلللللو مابنقتنع

وييييييييين يا ماما دومة
أخباركـ ومشتاقين والله

شنو ما تفتحي البوست دا إلا يوم الكيبورض الإنجليزي!

Quote: وييييييييين يا ماما دومة أخباركـ ومشتاقين والله شنو ما تفتحي البوست دا إلا يوم الكيبورض الإنجليزي!

لوووول ود الصايم يا حبيب شفت الجابتها امك دومه لروحها
اسع بقيت في تحديد مسافات كمان .
دحين املي التنكي بنزين وتعال سوقني بعربيتك الما خمج
عشان نعرف المسافه كم كيلو متر بين ود بانقا وود الحبشي غرب النيل

Quote: ماما دومة ازيك,,, انتى وينى كوتاتك مع النسوان?? نحن غير كوتاااات اصلللللو مابنقتنع

حباب بت الشخ يا العظمه
عاد انت كان وريتي امك دومه تكوت ما كان كوتت لي محمد اي سليمان دا الامحاء حقتوا التي اراد بكل قوه عين يملصها فوق كمال عباس دي!!!
. تصدقي بالله الحبشي مكوت لي هظارمع محسن خالد
قلت ليه انا جلابيه نجيضه ما برضي منك الا تهدي لي اي فون الجنريشين الرابع
. طوالي جاء الحبشي كوته ودخل فيه وحده جاذبه وانفصال و التي بات امرها مفروغ منه وليس بتجلبب دومه بل لاسباب يعرفونها جيدا دعاه الدوله الدينيه . اما موضوع ود بادي دا والعصيده والقراصه كان في بوست البت اللكعت قرن الخمره النازه وما عنده اي علاقه ببوست محسن خالد .

ألف مبروك وعقبال الشهادات العليا ومزيدا من النجاحات والتفوق
كتب محمد إي سليمان :

Quote: ......... what is (قامت - "بامحاء) Is Arabic language ya Kamal ?x what is ..........

لا داتقرنجا!
الست أنت من كتب:

Quote: المهم يا أختنا دومة أن كلامك عن القراصة والعصيدة * وامحاء الأصل الشايقي للدكتور الشاعر ود بادي غير دقيق ويلحق بذلك عموم كلامك عن منطقة حجر العسل وما جاورها .

إنت من جاء بتعبيرامحاء لاأنا!!
وما أعرفه أن المصدر من محا( محي ) يمحو محوا - وليس امحاء! ومع هذا فهذه ليست القضية.... إن وجدت خطأنحوي أوكتابي فقم يتصويبه بلا دوشة وإستعراض أجوف......
دع التقعر والتنطع والتعالم وومحاولة تصيد أخطاءالاخرين!
هذا الأسلو ب لن يجعل منك أديبا أو مثقفا!
.....

بالله يا ماما دومة طلعتي من اندنا؟؟

يا لسعادة بيت صاحبنا القرنفل

دايرين نتعارف زي حياة

Quote: بالله يا ماما دومة طلعتي من اندنا؟؟ يا لسعادة بيت صاحبنا القرنفل دايرين نتعارف زي حياة

حبابك الف يا قرادابي .
السودان دا شقيش ما اقبل اهلي .
سعيده بالتعارف .

Quote: Be my quest

Be my quest aney time

..
..........
محمد e سليمان كتب:

Quote: ........... Be my quest ...

ربما كان المقصود :
be my guest
............

والله ياود الصائم ختفتها من خشمي

ياخي في الويك اند الانجليزي بتاعو تعبان يبعد من محمد سليمان وباقي الاسبوع العربي بتاعو تعبان برضو يبعد منو

اها ياخالة دوما بدا ليك بالجغرافيا بعد شوية ح يجي يقول ليك اسم دوما ده اسم راجل هاهاهااي

غايتو ما يحلك منو الا تشيلي شباشبك وتديهو عجاج كرعيك


يامحمد اي سليمان تحياتي رشهم هاهاهاها

زاتوووو

Quote: ياخي في الويك اند الانجليزي بتاعو تعبان يبعد من محمد سليمان وباقي الاسبوع العربي بتاعو تعبان برضو يبعد منو

لوووووول يا زاتو قلت اكتب ليهو يوم الجمعه لانه لو جاء السبت بخلي ريحتي طير طير.
غايتو من يوم السبت بكون مشغوله شديده فبالله ما تتوصوا يا شباب

أنا بس دخلت أقول سلام لست البوست....
وحشتينى والله
ووحشتنى كتابتك السمحه




كل الود
إقبال

اقبال المرضي تسلمي حبيبتي
وما تشوفي وحشه يا رب .
كوني بالف خير يا جميله

ماما دوما
تحياتي واحترامي وعلك طيبة.
غايتو بوستيك ده وكلامكم عن محمد بادي, بالمناسبة انا عملته هنه بوست قبل فترة,
ذكرني بي فكرة من زمــــــــــــان كنت
عايز اعملها بوستين :
الاول..(دناقلــــــــــــــــة الصعيد)
الثاني(قراصة الصعيد وعصيدة الشمال)..
اها احنا دناقلة من آرقو ,اتولدنا واتربينا في سنجة بلد الفــــــــــــونج ذات نفسها يا حمور,وكتير من القبايل كده(محس توتي والعيلفون وبري وريف شمال ام درمان)
يبقي مصير الامة دي كلها شنو؟؟
وبعدين ياخي عــــــــــــــــادي في بيتنا الصينية بتاعة الاكل(قدح العصيدة وصاج القراصة) زي ما بجيني القمح من حواشات اهلنا في ارقو السرارية,برضو بجينا الذرة
من مشاريع الدالي والمزموم)
اها الصينية بتاعة الاكل دي,ليها دور كبير في ان نكون سودانين وبس!
يبقي السودان ده كلو زي , بنطبق عليه كلام سيدنا محسن في الخيط الجميل والمُهم بي غادي..
__
حتي الة الطمبور موش ياها زاتها الموجودة في قبايل النيل الازرق وقــــــــــاعدة في جواهم
حمور يا صاحب تحياتي واحترامي,كلامك جميل بالحيل,وما تنسي كمان معظم أدوات الزراعة والحصاد واسماء الرياح هي في بلاد الشمال,ترجع للغة النوبية بشكل واضح,وفي اعتقادي
انو (غالبـيــــــــــــــــــــة) قبايل الشمال هم (نوبة) تعربو...والله أعلم
استاذنا كمال عباس,كلامك جميل والانتماء الثقافي اكبر بكثير من الانتماء العرقي....وما عمله غير الشوايقة (عرقيا) بفن الطمبور,ظاهر وباين
هو السودان سحنات ولغة وفنون...
ليس لعرق واحد حق التميز عن الاخر وليس لثقافة معينة حق ان تفرض نفسها دون الاخرين
ومن كل القبايل واللغات واللهجات....نصير لنكون (سودانين)
_
وزي ما قالت الوالدة يا ماما دوما,كلنا سودانين وبس!

Quote: انو (غالبـيــــــــــــــــــــة) قبايل الشمال هم (نوبة) تعربو...والله أعلم

تحياتي يا هواي
ما عارف غالبية دي كيف .. لكن اكيد ده حصل و بيحصل هسه .. المحس في الوسط الأن يمكن بسهولة حسابهم تبع المجموعات العربية .. بينما يحتفظون في اقصى الشمال بموروث خاص.
لكن ما احببت ان اضيفه ان العكس أيضا حصل في عصور قديمة.
هناك قبائل عربية " تنوبت " ان صح التعبير.
و ذلك بعد هجرات من الجزيرة العربية مباشرة او من مصر.
فبعد صعود التيارات التركية في الدولة العباسية انحازت كثير من القبائل العربية من مصر جنوبا الى ما يعرف اليوم بالسودان و استوطنت مساحات واسعة .. و منهم قبائل نزلت بين النوبة و فقدت اللسان العربي و اصبحت نوبية بالكامل ( لكن المنطق يقول انها لابد ان تكون اسهمت في الثقافة السائدة بشئ ). ذكر ذلك شيخنا يوسف فضل في دراسات في تاريخ السودان و اظنه نقله عن بعض المؤرخين و الرحالة القدامى الذين زاروا بلاد النوبة.

و لو أخذنا الطمبور كمظهر ثقافي سنجد انه كان معروفا في الدولة العباسية .. و إن كنت اظن انه ليس عربيا أصيلا .. لم أبحث فيه لكن عموما لم يقابلني ذكره عند العرب القدامى و اول ما قرأت عنه في فترة بني العباس .. و له نغمات و ألحان عندهم.
فهو ليس عربي الأصل لكنه تعربن ان اعتبرنا الدولة الاسلاية العباسية دولة عربية ( و هو تقريب غير دقيق لكنه سائد )
المهم فان السؤال هو هل دخل الطمبور الى الشمال مع تلك القبائل في هجراتها ام انه نوبي قديم أصيل في المنطقة ؟
لأن وجود الطمبور في الشمال الذي تعرض للهجرات العربية و في النيل الأزرق حيث الفونج الذين ان لم يصح انهم عرب نسبا كما يدعون الا انهم تمثلوا الثقافة العربية بشدة يجعل الظن بعروبة وجوده في السودان أشبه بالصواب.

Quote: ما عارف غالبية دي كيف .. لكن اكيد ده حصل و بيحصل هسه .. المحس في الوسط الأن يمكن بسهولة حسابهم تبع المجموعات العربية .. بينما يحتفظون في اقصى الشمال بموروث خاص. لكن ما احببت ان اضيفه ان العكس أيضا حصل في عصور قديمة. هناك قبائل عربية " تنوبت " ان صح التعبير.

تحياتي يا حمور
ليس عندي (جزم) او معرفة, بأن كل القبائل هي نوبية تعربت,أو هي عربية تنوبت,وكل ما حصل هو نتاج من الاثنين , تعريب وسودنة

Quote: [المهم فان السؤال هو هل دخل الطمبور الى الشمال مع تلك القبائل في هجراتها ام انه نوبي قديم أصيل في المنطقة ؟

فعلا سؤال جميل,والشاهد الآن ان الطمبور في ارتريا واثيوبيا,هل هو قادم منها ؟ام وافد عليها ؟

Quote: [. و منهم قبائل نزلت بين النوبة و فقدت اللسان العربي و اصبحت نوبية بالكامل ( لكن المنطق يقول انها لابد ان تكون اسهمت في الثقافة السائدة بشئ ). ذكر ذلك شيخنا يوسف فضل في دراسات في تاريخ السودان و اظنه نقله عن بعض المؤرخين و الرحالة القدامى الذين زاروا بلاد النوبة.

بالتأكيد اسهمت يا حمور,بالتأكيد

ولكن يا حمور هل اكثرية السكان في ذلك الوقت هم (نوبة) ام قبائل من غير النوبة,؟؟وهل القبائل العربية التي جاءت كانت من الكبر بحيث طغت علي الثقافة النوبية؟,ام النوبة استطاعو تهجين القبايل العربية
وادخالها الي ثقافتها وحضارتها,؟ هل من اجابات يا حمور؟؟
احتاج ان اعرف لو بوجود اي خيط او بحث او كتاب,هل من وجود توثيق يدل علي ذلك التاريخ؟
شكرا لك يا حمور,واستحملنا قليلا باسئلتنا الكثيرة
ولك كل الود يا استاذ
و

Quote: ولكن يا حمور هل اكثرية السكان في ذلك الوقت هم (نوبة) ام قبائل من غير النوبة,؟؟وهل القبائل العربية التي جاءت كانت من الكبر بحيث طغت علي الثقافة النوبية؟,ام النوبة استطاعو تهجين القبايل العربية وادخالها الي ثقافتها وحضارتها,؟ هل من اجابات يا حمور؟؟

ما عندي اجابات دقيقة لكن كدي خلينا نشوف مع بعض مفاتيح ..
نعوم شقير في جغرافية و تاريخ السودان بيقول انو نوبة شمال السودان يتكونون من ثلاثة مجموعات .. نوبة أصليون..و عرب .. وأتراك.
و ربما وجود اصول تركية و قبايل عربية سابقة النزوح هو ما دفع المماليك للفرار الى السودان بعد مذبحة القلعة ليبدأو رحلتهم الهريبة التي انتهت باحاد منهم هائمين في صحاري ليبيا بعد أن فروا من السودان ثم انقطع خبرهم و لم يعرف أحد خبرهم بعد ذلك. ( و رحلة المماليك هذه رحلة مأساوية تستحق الحكي ففيها من العبر الكثير ).
المهم ...
ان واحدة من مشاكل السودان حسبما اظن هي عدم وجود تاريخ واضح محدد ينطلق من نقطة لينتهي في الحاضر.
انما اغلبها شذرات متفرقة هنا و هناك و بينه ظلام حالك.. ظلام في الدراسات التاريخية و في معرفة العامة أمثالنا على حد سواء.

التاريخ المتفرق يسجل ان قبائل عربية نزحت و تنوبت .. و أظن ذلك سابق على تعرب القبائل النوبية او السودانية.
اما الدخول المؤثر لمجموعات اخرى فاظنه كان باغلبية سكانية.
لأن العمري وحده كان في جيشه ما يزيد عن عشرة الف عربي .. و كان له ستين الف جمل تنقل له المؤن.
و قد كانت وقائع العمري في حوالي عام 869 م اي قبل اكثر من الف و مئة عام.
و كانت القبائل الموجودة هي قبائل قيس عيلان و قبائل سعد العشيرة و ربيعة و جهينة.
قبائل بمعنى القبيلة كانت موجودة في ذلك الوقت في شمال السودان.
و لم يذكر التاريخ انها خرجت و لا يوجد سبب يدعوها للخروج .. فالأوفق أن نقول أنها ذابت في الوسط الذي هي فيه.
اما بالاندماج في مجموعات عربية اخرى او الذوبان في مجموعات نوبية.

و امثلة ذلك كثيرة في التاريخ السوداني.
و منه ما ذكره ابن عمر التونسي في تشحيذ الاذهان عن العرب في دارفور.

سلام حمور:

Quote: ما عارف غالبية دي كيف .. لكن اكيد ده حصل و بيحصل هسه .. المحس في الوسط الأن يمكن بسهولة حسابهم تبع المجموعات العربية .. بينما يحتفظون في اقصى الشمال بموروث خاص. لكن ما احببت ان اضيفه ان العكس أيضا حصل في عصور قديمة. هناك قبائل عربية " تنوبت " ان صح التعبير. و ذلك بعد هجرات من الجزيرة العربية مباشرة او من مصر. فبعد صعود التيارات التركية في الدولة العباسية انحازت كثير من القبائل العربية من مصر جنوبا الى ما يعرف اليوم بالسودان و استوطنت مساحات واسعة .. و منهم قبائل نزلت بين النوبة و فقدت اللسان العربي و اصبحت نوبية بالكامل ( لكن المنطق يقول انها لابد ان تكون اسهمت في الثقافة السائدة بشئ ).

مسألة العروبة العرقية دي فيها نظرومغالطات تاريخية كبيرة !! دعني
أعود بك للقرن السابع الميلادي - الجزيرة العربية - قبائل عربية متقاتلة ومتتناحرة وطبيعة جافة وقاسية وطاردة !!
------- مصر: حضارة عريقة ومجتمع زراعي وتجاري توجد موارد طبيعية
والعراق : برضو حضارة عريقة ومجتمع زراعي بلاد الشام: نفس الشي
الشمال الأفريقي : حضارةبربرية قديمة توجد موارد طبيعية ... بلاد السودان : ممالك وتاريخ ومياه وزراعة.. عدد سكان الجزيرة ضئيل جدا ومواردها الطبيعية فقيرةمقارنة بسكان البلادالتي عددتها طيب ياحمور دعنانسأل: أذا أعتبرنا أن سكان الدول "العربية" الحالية
عربا فأين ذهب سكان البلاد الاصليين? هل إنقرضوا أم إندثروا ?
كيف يتسني لبضع الالاف من العرب أن يمارسوا عملية إزاحة وإحلال لسكان
البلاد الأصليين? كيف نفهم أن أصل أغلب سكان الشمال النيلي يرجع للعباس بن عبد
المطلب? أين ذهب بقية المهاجريين? وأين ذهب سكان المناطق التي تقع
بين دنقلا والحلفاية? هل إختفوا فجاءة وخلفوا النساء فقط ليتزوج
منهن إحفادالعباس?
------- العروبة مجرد تفاعل لساني وثقافي وحضاري وقليل من الدم
العربي ...........

الاخ الكريم :كمال عباس
تحياتي واحترامي...وشكرا لك علي الاسئلة والتي ربما تدور بفكري,ولكني لم آحسن صياغتها!,فشكرا ياخي
وحتي جنوب سوبا,فقد كانت هناك حضارة (انسان سنجة العظيم) آو العنج,والذي يرقد في المتحف البيرطاني,وهل كان من اوائل البشر هنا؟؟ ايضا مدينة (آربجي) بالجزيرةومعناها ووو غيرها
اسئلة كثيرة تحتاج لاجابات و نقاش,آتوقع منك ومن حمور واخرين افادات جميلة ونقاش مثمر


تحياتي لكما واحترامي
وعفوا يا ماما دوما ان اكثرت من الحضور والتعليق

Quote: تحياتي لكما واحترامي وعفوا يا ماما دوما ان اكثرت من الحضور والتعليق

معقوله يا هواري ولدي
انتم اسياد الدار وانا ضيفتكم .
تسعدني مداخلاتكم جميعا يا ناس التاريخ
وما بقدر اعلق علي المواضيع التاريخيه دي لانه بالجد لا افقه فيها ا شئيا .
شكرا لاثراءكم البوست بالمواد التاريخيه

انا يا كمال متفق معاك في موضوع العروبة الرقية دي ..
و اظن اني كتبت الكلام ده قبل كده في البورد حتى جات تراجي هايجه فيو و قالت لي التفريق بين عروبة العرق و عروبة الثقافة دي فلسفة ساي.
المهم انا معاك انو اغلب من يطلق عليهم عرب بعد الاسلام اكيد هم عرب ثقافة أكثر من عرب عرق.
و الملاحظ انو مسألة العرق العربي دي كانت غالبة على اطراف الدولة الاسلامية اكثر من اوساطها .. فالنسب المدني الحضري كان اعمق من النسب العرقي ..
و انا استشهد دائما بالامام احمد بن حنبل و انت تعرف ما وصل اليه من صيت بعد محنة خلق القران .. اها بعد كل هذه الشهرة سأله أحد تلاميذه قائلا : يقال انكم قوم من العرب. فرد أحمد بن حنبل : انما نحن قوم مساكين.
فترى كيف انه لم ينف النسب لأنه ثابت صحيح .. لكنه لم يثبته لأنه لا معنى له عنده .. و الذي يستفاد أكثر من هذه الحكاية ان رجل مثل ابن حنبل بشهرته في عصره كان موضع عروبته شائعة تستحق التأكد لا ثابت معروف و معلوم عنه.

المهم نرجع لحتة عربنا حقين السودان ديل ..
ممكن نظن فعلا انو بعض العرب اذين نزحوا من مصر لم يكونوا عرب نسبا .. بل عرب ثقافة.
لكن ماذا نقول عن قبائل بمسميا عربية ذكر التاريخ انهم خلعوا اوتاد خيامهم من الجزيرة العربية و رحلوا الى مصر .. خلعوا اوتاد خيامهم ده لفظ يرد بالنص في كثير من كتب التاريخ.
ثم هناك قبائل محددة باسماء محدده ذكرتها انا في المداخلة السابقة كقيس عيلان و جهينة و غيرها انتقلت الى السودان في مئات الهجرة الأولى أيام حمى الذهب و التعدين.

لذلك فلو اردنا الدقة لابد ان نسلم ان هناك عرب ثقافة نزحوا للسودان .. و عرب عرقا ايضا نزحوا بكثافة.


و اظن المعلومة التي نقلتها عن يوسف فضل التي تحدث عن قبائل عربية هاجرت باكرا قبل الاسلام الى شمال السودان و تنوبت اظنها معلومة مهمة و ساحاول توثيقها ما استطعت هنا.
لأن تسمية عرب قبل الاسلام لا اظنها تصدق الا على العرب عرقا .. لأن العرب قبل الاسلام لم يكن لهم ثقافة غالبة تجعل غيرهم يتمثلها و يدمغ فيها. بل كانوا هم الاضعف بحيث يندمغون في ثقافات النوبة او الفرس او الروم او الحبشة.

Quote: أعود بك للقرن السابع الميلادي - الجزيرة العربية - قبائل عربية متقاتلة ومتتناحرة وطبيعة جافة وقاسية وطاردة !! ------- مصر: حضارة عريقة ومجتمع زراعي وتجاري توجد موارد طبيعية والعراق : برضو حضارة عريقة ومجتمع زراعي بلاد الشام: نفس الشي الشمال الأفريقي : حضارةبربرية قديمة توجد موارد طبيعية ... بلاد السودان : ممالك وتاريخ ومياه وزراعة.. عدد سكان الجزيرة ضئيل جدا ومواردها الطبيعية فقيرةمقارنة بسكان البلادالتي عددتها طيب ياحمور دعنانسأل: أذا أعتبرنا أن سكان الدول "العربية" الحالية عربا فأين ذهب سكان البلاد الاصليين? هل إنقرضوا أم إندثروا ?

بعد رجعت تاني يا كمال لمداخلتك لقيت انو اغلب ردي كان استطراد اكثر من تعليق مباشر ..
معليش اعذرني .. عوامل السن و السهر و ما شابه ..
اول شي خلينا نقول اننا هنا ما مختلفين ..بس لعلك حاسم خياراتك بينما انا في هذه النقطة أسير أسئلة و تهويمات لا اجد حرجا في ان اعترف بها ..
بس بالنسبة للفترة الزمنية الانت ذكرتها الشام مثلا كان رومي .. رومي ثقافة .. لكن ما هو العرق الموجود في الشام قبل ان ينزل به ابوعبيدة بن الجراح ثم يستوطنه معاوية بعد ذلك و يصبح قلب الامة الاسلامية في ذلك الوقت.
العراق اظنو كان فارسي .. مش ؟
ما متأكد منو. فهل كان فارسي عرقا وله فارسي ثقافة نسبة للدولة المسيطرة عليه ؟
مصر كانت رومية ايضا و لم تكن فرعونية .. ديانتها كانت المسيحية و ثقافتها و حكمها كان بواسطة الرومان.
بلاد السودان ترانا بنتكلم عن شمالو .. لا استطيع ان احكم على اكثر من الشمال لضعف معلوماتي عن بقية المناطق.

فبكده حتلقانا رجعنا لنفس المربع انو قبل العروبة الناس دي كانت اعراقا شنو ؟
يعني ناس الشام ديل كانوا من روم وين ؟
جدهم الرومي منو ؟
هل هم روم فلا ام هم من العرب العاربه الذين اكتسبوا الثقافة الرومية قبل ان يعودوا الى الثقافة العربية مرة اخرى بعد سقوط الروم ؟
خد عندك العراق دي مثلا .. يفترض انها مسقط رأس ابراهيم ابو العرب ..فهل اهل العراق اشوريين دوما ؟

المشكلة انو الاحكام و المسميات دي حتتوهنا في الفريق الدقيق بين الفترة الفيها عرب عرقا و الفترة الفيها عرب ثقافة.
و ده صداع عديل.

تعرف يا كمال و يا هواري ..
مسألة الانتماء العرقي بالحيز الجغرافي دي دايما كانت عاملة لي مشكلة ..
المصريين الليلة البيقولو نحن فراعنة لأنهم موجودين على ذات رقعة الفراعنة .. هل يصح اننا نقول انو رأفت و هاني ديل احفاد بتاح و حور محب ؟
طيب وين المتغيرات الحصلت عبر الاف السنين ؟
دخول هكسوس و حويثيين و نوبة و روم و فرس و عرب و اغريق و بربر و اتراك و أرمن و انجليز و فرنسيين و و و و
السنين المؤلفة و البشر الكتار ديل ما بيغيرو تركيبة السكان ؟
طيب الارض دي قبل الفراعنة كان فيها شنو ؟
ليه النسبة ما تكون لما هو اقدم من الفراعنة ؟
زي نسبة انسان سنجة ده ..
سكان سنجة في عام 1100 تقريبا تغيرو بدخول الفونج .. سواء كان الفونج عرب او شلك فان انسان سنجة ده مفروض يكون نسلو يا انطع يا تغير ..
ده اقرب شي ناهيك عن متغيرات كتيرة قبل الفونج في المنطقة.
الليلة ساكن سنجة فونجاوي ما لم يثبت العكس.
لأنو دي اخر مجموعة استوطنت هناك و قادرين نباري نسبها و تفريعاتا.
طيب هل نحن التلاتة ( حمور و هواري و كمال ) احفاد لبعانخي لمجرد وجودنا في الرقعة دي ؟
اذا كانت نسبة هواري انو من عرب الهواوير ( بالاسم ساي كده ختيتا ليك ) و حمور جعلي يدعي انو جد لزم العباس و كمال عباس كنزي يدعي انو نسبو جهني .. اها موقعنا من بعانخي شنو ؟
خلينا نحن عرب الشمال ..
ناس الجنوب ديل .. علاقة باقان أموم ببعانخي شنو ؟

ياخ الحاجات دي جايطة و الاحكام فيها صعبة خلاص.
لوعايزين نصدر احكام فاظن احسن حكم هو حكم حبوبتنا أم دومة .. اننا سودانيين.
غير كده يكون ابحاث و تفاكر دون الرغبة في الوصول الى حكم عرقي قاطع.
اما بالنسبة للثقافة فالثقافات حاليا متعدده لكن تظل اللغة العربية هي الرابط الوحدوي الوحيد المتاح لربط ارجاء الوطن.
الكلام ده بحكم الواقع ما بحكم الرغبة الذاتية انو لغتي تكون القومية.

تعرف يا كمال و يا هواري ..
مسألة الانتماء العرقي بالحيز الجغرافي دي دايما كانت عاملة لي مشكلة ..
المصريين الليلة البيقولو نحن فراعنة لأنهم موجودين على ذات رقعة الفراعنة .. هل يصح اننا نقول انو رأفت و هاني ديل احفاد بتاح و حور محب ؟
طيب وين المتغيرات الحصلت عبر الاف السنين ؟
دخول هكسوس و حويثيين و نوبة و روم و فرس و عرب و اغريق و بربر و اتراك و أرمن و انجليز و فرنسيين و و و و
السنين المؤلفة و البشر الكتار ديل ما بيغيرو تركيبة السكان ؟
طيب الارض دي قبل الفراعنة كان فيها شنو ؟
ليه النسبة ما تكون لما هو اقدم من الفراعنة ؟
زي نسبة انسان سنجة ده ..
سكان سنجة في عام 1100 تقريبا تغيرو بدخول الفونج .. سواء كان الفونج عرب او شلك فان انسان سنجة ده مفروض يكون نسلو يا انطع يا تغير ..
ده اقرب شي ناهيك عن متغيرات كتيرة قبل الفونج في المنطقة.
الليلة ساكن سنجة فونجاوي ما لم يثبت العكس.
لأنو دي اخر مجموعة استوطنت هناك و قادرين نباري نسبها و تفريعاتا.
طيب هل نحن التلاتة ( حمور و هواري و كمال ) احفاد لبعانخي لمجرد وجودنا في الرقعة دي ؟
اذا كانت نسبة هواري انو من عرب الهواوير ( بالاسم ساي كده ختيتا ليك ) و حمور جعلي يدعي انو جد لزم العباس و كمال عباس كنزي يدعي انو نسبو جهني .. اها موقعنا من بعانخي شنو ؟
خلينا نحن عرب الشمال ..
ناس الجنوب ديل .. علاقة باقان أموم ببعانخي شنو ؟

ياخ الحاجات دي جايطة و الاحكام فيها صعبة خلاص.
لوعايزين نصدر احكام فاظن احسن حكم هو حكم حبوبتنا أم دومة .. اننا سودانيين.
غير كده يكون ابحاث و تفاكر دون الرغبة في الوصول الى حكم عرقي قاطع.
اما بالنسبة للثقافة فالثقافات حاليا متعدده لكن تظل اللغة العربية هي الرابط الوحدوي الوحيد المتاح لربط ارجاء الوطن.
الكلام ده بحكم الواقع ما بحكم الرغبة الذاتية انو لغتي تكون القومية.

سلام حمور:

Quote: لكن ماذا نقول عن قبائل بمسميا عربية ذكر التاريخ انهم خلعوا اوتاد خيامهم من الجزيرة العربية و رحلوا الى مصر .. خلعوا اوتاد خيامهم ده لفظ يرد بالنص في كثير من كتب التاريخ. ثم هناك قبائل محددة باسماء محدده ذكرتها انا في المداخلة السابقة كقيس عيلان و جهينة و غيرها انتقلت الى السودان في مئات الهجرة الأولى أيام حمى الذهب و التعدين. لذلك فلو اردنا الدقة لابد ان نسلم ان هناك عرب ثقافة نزحوا للسودان .. و عرب عرقا ايضا نزحوا بكثافة.

أنا لاأنفي وجود دم عربي في بلادنا ولكني أتحدث عن حجم التأثير العرقي - حيث أصبحت كل قبائل الشمال النيلي جنوب أرض نوبة أقصي الشمال- عرباوأحفاد للعباس وأختفي رجال تلك المناطق وتبقت النساء ليتزوج بهن العرب !
فلنكن واضحين ياحمور- ملامحنا وأنوفنا والوان بشرتنا وشعرالرؤوس
يشبه لدرجة التطابق سكان شرق أفريقياالذين لم يدعو العروبة -إثيوبيا مثلا- نحن ( وأقصد بنحن القبائل التي تنسب للعروبة العرقية )نحن أفارقة ياحمور مع وجود بعضا المؤثرات العرقية العربية القليلة- هذا بالإضافة للاهم : العروبة الثقافية واللسانية والحضارية !!
يجب الانخجل من جذورنا الأفريقية ولامن المؤثرات العربية فينا.......

لا طبعا يا كمال قصة انو كلهم عرب خلّص و جدهم العباس دي مسألة انا ما قلتها و هي احاديث فخر قبايل ساي.
ما كنت اظن انو ده مقصودك بالنقاش .. ما دام دي الحتةفانا بتفق معاك انها فعلا ما حاجة دقيقة ..
لكن عشان نفيك يكون أدق حقو نقول انو الجعليين ايوه ممكن يكون جدهم العباس حسب كثير من الانساب المشهورة .. لكن هل كل مجموعة جعلية هم جعليين فعلا ام ان مجموعت كثيرة انتسبت للجعليين و العرب عموما ؟


لكن هنا كلامك عن التأثير الثقافي حيفتح باب سؤال تاني ..
التأثير الثقافي هل كان بوساطة العدد الكبير ؟ لأنو لو بعدد كبير معناها ده لازم يكون أثر على العرق برضو.

تشابهنا مع الاحباش صحيح الى حد ما .. تشابه الألوان .. لكن الملامح اظنها مختلفةجدا و يسهل التمييز عموما الا في حالات نادرة لا يعتد بها.
لكن ده برضو بيفتح سؤال تاني .. ليه اهل الجنوب الشرقي المجاور للاحباش ما بيشبهوهم بينما بيشبهو انسان الشمال الى حد ما ؟

تحية ياحمور:

Quote: لكن هنا كلامك عن التأثير الثقافي حيفتح باب سؤال تاني .. التأثير الثقافي هل كان بوساطة العدد الكبير ؟ لأنو لو بعدد كبير معناها ده لازم يكون أثر على العرق برضو.

والتأثيرالثقافي لم يقتصرعلي السودان وأنما ظهر بشكل أكبر في مصر والشمال الافريقي وبلاد الشام والعراق برغم من ضالة عدد المهاجرين العرب
مقارنة بسكان البلادالاصليين !!وبنفس القدرفقد أثرالأسبان وهم قلة علي جل أمريكا الوسطي والجنوبية حيث أثروا عليهاثقافياولغوياوحضاريا
تقول:

Quote: تشابهنا مع الاحباش صحيح الى حد ما .. تشابه الألوان .. لكن الملامح اظنها مختلفةجدا و يسهل التمييز عموما الا في حالات نادرة لا يعتد بها. لكن ده برضو بيفتح سؤال تاني .. ليه اهل الجنوب الشرقي المجاور للاحباش ما بيشبهوهم بينما بيشبهو انسان الشمال الى حد ما

المقصود بالملامح الأخري- الانوف- الشعرالخ ......ياحمور لورجعت لملامح نوبة الشمال -الذين لم ينسبوا للعرب ستجدهاتشبهنا وكذلك الرسومات في المعابد والكنائس قبل دخول الإسلام !! عموما هذه النقاط لازالت مثارجدل وإختلاف وما نطرحه هنا لايعدواأن
يكون مجرد مؤشرات/ ونقاط تستند علي المنطق العقلي بالإضافةلبعض الحقائق ......

Quote: طيب وين المتغيرات الحصلت عبر الاف السنين ؟ دخول هكسوس و حويثيين و نوبة و روم و فرس و عرب و اغريق و بربر و اتراك و أرمن و انجليز و فرنسيين و و و و السنين المؤلفة و البشر الكتار ديل ما بيغيرو تركيبة السكان ؟

طبعا يا حمور بغيرو تركيبة السكان وبشكل كبير,التغيير ممكن يكون بنسب متفاوتة,في صالح القادم الجديد آو القديم الموجود او بنسبة متساوية,
تصدق يا حمور
في الدنيا العجيبة وسفرنا فيها لاقيت كمية من الاجناس والمعتقدات, كنا بنسمع بيها حكاوي وبس!
اقول ليك شئ بسيط,كان عندي جيران من العراق ولهجتهم لا تختلف آبداً عن بقية آهل العراق,هم من الصابئة آو الصابئين,وحتي الآن عندهم كتابهم المقدس و اتفحصت كتاب
الصلاة وكيفيتها وكيف يؤدونها ,صفحة صفحة,(طبعا بعد ان سألوني بأني طاهر ام لا),الكتاب المقدس الذي يخصهم,مكتوب باللغة الآرامية
وهم يصلون ناحية الشمال ولهم شيوخ وعلماء واتباع, ويتكلمون بلغتهم فيما بينهم.
ايضاَ الاشورين والكلدانيين,وهم مسيحون,وحتي الآن يتكلمون بلغتهم وحتي آن جاري واسمه (اداورد و زوجته اسمها رغد)ببنتهما الكبري اسمها (كاليديا او كاليديه)
شوف اسم الزوجة عربي والزوج اسم قد يكون اوروبي والبنت اسمها من اسم قبيلتهم


التغيير موجود لكن الجينات تكون موجودة ومتوارثة,وقد تنتقل بين الشعوب من مكان الي اخر
للشاعر \عادل عبد الرحمن, قصة صغير اسمها (شغب جيني)
اتمني ان تقرأها.
___
انت مالك مُساهر لحدي هسي..هههه

Quote: وبعدين ياخي عــــــــــــــــادي في بيتنا الصينية بتاعة الاكل(قدح العصيدة وصاج القراصة) زي ما بجيني القمح من حواشات اهلنا في ارقو السرارية,برضو بجينا الذرة من مشاريع الدالي والمزموم)

حبابك يا هواري ولدي انت عارف ما قصدته بكلامي انه الناس بيحصل ليهاتأقلم علي البئه وحتي عادات الاكل بتتغير وكمان لو نظرنا للموضوع دا في ظرفه التاريخي ومن ناحيه لوجستيه لا يمكن وقتها ترحيل قمح مروي ودنقلا او عيش الدالي والمزموم وحتي الزراعه كانتsubsistence agriculture لما اجدادنا ديل نزحوا لا في بيواخر لا سكه حديد طبعا ياها الدواب و المراكب مما حكاه لي الوالد عن ابيه عن جده انهم كانوا يسافرون بالمراكب ويحضرون التمر من بلدهم الاصلي دي طبعا كشئ special متل ما تشتري ليك علبه ماكنتوش يعني لانه ما بيستهلك يوميا كالقراصه او الكسره .ا اكيد الناس ديل كان ليهم اهل هناك لكين الاجيال التي ولدت بمديريه نهر النيل تخلت شيئا فشئنا عن موطنها الاصلي وصارت اكثر التصاقا وتاقلما علي الموطن الحالي . ما تاخدوا كلامي اننا في ودبانقا لا ناكل القراصه ابدا بالطبع لو لقيناها ناكلها.
قبل 40 سنه العشاء بالذات لما ننزل عليهم ضيوف كان فطير بلبن وهو قراصه طبعا اقرب للpancake في سمكها مصنوعه من دقيق القمح
وانا شخصيا اموت في القراصه بالتركين الذي لا اعتقد انه معروف في نواحي منطقتنا .الشئ السمعته الان انه في فرن في ودبانقا وبقينا ناكل الرغيف . الرغيف دا زمان كان متل حلاوه كيك في ود بانقا القبه .
اقول ليكم شئ توفي والدنا ولحقت به والدتنا بعد 9 اشهر فتم ترحيلنا الي منزل خالنا وهناك لقينا الفطور قراصه القمح هل تصدقوا بالله انا واخوتي الاربعه اضربنا عن تناول وجبه الافطار وبعوس الكسره نعجنها بي مويه وملح ونرفض رفضا قاطعا اكل القراصه لو بملاح او سمن وسكر.

Quote: [حبابك يا هواري ولدي انت عارف ما قصدته بكلامي انه الناس بيحصل ليهاتأقلم علي البئه وحتي عادات الاكل بتتغير وكمان لو نظرنا للموضوع دا في ظرفه التاريخي ومن ناحيه لوجستيه لا يمكن وقتها ترحيل قمح مروي ودنقلا او عيش الدالي والمزموم وحتي الزراعه كانتsubsistence agriculture لما اجدادنا ديل نزحوا لا في بيواخر لا سكه حديد طبعا ياها الدواب و المراكب مما حكاه لي الوالد عن ابيه عن جده انهم كانوا يسافرون بالمراكب ويحضرون التمر من بلدهم الاصلي دي طبعا كشئ special متل ما تشتري ليك علبه ماكنتوش يعني لانه ما بيستهلك يوميا كالقراصه او الكسره .ا اكيد الناس ديل كان ليهم اهل هناك لكين الاجيال التي ولدت بمديريه نهر النيل تخلت شيئا فشئنا عن موطنها الاصلي وصارت اكثر التصاقا وتاقلما علي الموطن الحالي . ما تاخدوا كلامي اننا في ودبانقا لا ناكل القراصه ابدا بالطبع لو لقيناها ناكلها.

ماما دوما
تحياتي واحترامي
بالعكس انا مُتفق معاك في كلامك كلو,وفعلا التأقلم حاصل وبحصل بشكل جذري,وقصدته من (قراصة الصعيد وعصيدة الشمال),انو التغير وارد
وكتير من عادات الناس بتختلف حسب البئية,اها انا ومعاي (آميرة الشيخ وحافظ حسين والصادق عوض) عندنا بوست جاي عن (المُوليتَة) اها شفتي الموليتة لما اهلنا يجو من البلد
بقولو لينا تأكلو قش البهايم ليه..لوووووووووووووووول
شفتي كيف البيئة اثرها كبير وبتغير حتي في سلوكيات الانسان...
وبس انا ماسك في كلام حبوبتي آم ماما دوما(كلنا سودانين ) كلمتها دي حكمة بالجد

Quote: بقولو لينا تأكلو قش البهايم ليه..لوووووووووووووووول شفتي كيف البيئة اثرها كبير وبتغير حتي في سلوكيات الانسان... وبس انا ماسك في كلام حبوبتي آم ماما دوما(كلنا سودانين ) كلمتها دي حكمة بالجد

هواري ولدي والله اهلي لو عرفوني بقيت اكل شنو اسه
يقولوا بقت سحاره وليها ضنب .
.انا تجاوزت كلام امي كمان كل الارض موطن لي والانسانيه كلها لي اهل . لا افرق علي اساس العرق اواللسان او الدين .
اميز بين الناس فقط بالقيم الخيره التي اؤمن بها .
بمناسبه الموليته
المت بي وعكه قبل اسبوع وما زالت نزله ولوز ودوخه .
اتصل علي الصيني ( الهاوس مايستر ) ولا حظ ان صوتي متغيرا فجاء الي وطبعا انا ما بعرف صيني وهو بعرف شويه الماني المهم قال لي ح اجيب ليك علاج صيني تمام .
باكر الصباح جاب لي ربطه قش تشبه الموليتا بي عروقها . قام غسلها وجبت حله خت فيها مويه وغلي جزء من القش والباقي قال لي ممكن تاكليه سلطه او تطبخيه .
المهم الشئ دا مويتو مره بس الحنضل المهم مرق مني يجيب الدكشنري الصيني الماني . طوالي طعمته ليك بالسكر عشان يتبلع شويه هو طبعا قال اشربه من غير سكر . المهم يا زول شربت الكبايه لكين تاني ما زدتها
تاني يوم قلت يا بت الشئ دا بشبه الموليته وزمان امي كان بتعملها لينا سلطه بتحشها وتغسلها كم مره كدا وتحلب ليها ليمون وتعمل ليها سمسم او فول مطحون فقمت عملت كدا غسلتها وحشيتها متل الرجله وضفت ليها عصير ليمون وفول سوداني مطحون واكلتها والله طعم المراره اختفي

Quote: تاني يوم قلت يا بت الشئ دا بشبه الموليته وزمان امي كان بتعملها لينا سلطه بتحشها وتغسلها كم مره كدا وتحلب ليها ليمون وتعمل ليها سمسم او فول مطحون فقمت عملت كدا غسلتها وحشيتها متل الرجله وضفت ليها عصير ليمون وفول سوداني مطحون واكلتها والله طعم المراره اختفي

الحمد لله يا ماما دوما,شهدتِ بي بالموليتة بعملوها بالسمسم,قلته للصادق سلاطين واميرة الشيخ كده,قالو لي دي فلهمة ناس سنجة ساكت..هههههههههه
منتظرنك في البوست الجاي ح يكون(الموليتة جرجير الخريف),شفتي الشباب كيف ماسك في القديم
لوووووووووووول

سلامي للجميع وخصوصا الخالة دوما

Quote: لكن عشان نفيك يكون أدق حقو نقول انو الجعليين ايوه ممكن يكون جدهم العباس حسب كثير من الانساب المشهورة .. لكن هل كل مجموعة جعلية هم جعليين فعلا ام ان مجموعت كثيرة انتسبت للجعليين و العرب عموما ؟

استاذنا حمور

هذه النقطة بالذات شغلتني كثيرا،وانا اؤيد الفرضية التي تقول ان الحضارة المستقرة والسكان الاكثر عددا هم النوبيون وبقية السكان الاصليين للمناطق السودانية التي استوطن بها العرب، وان القادمون العرب كانو هم القلة عدديا

لكن الذي يثير التساؤل هو لماذا سادت ثقافة المجموعة السكانية الاقل عددا في بلاد حضارتها اعرق واقدم؟

وجدت كثير من الاجابات في الاطروحة التي قدمها البروفيسير وليم آدمز بعنوان : النوبة رواق افريقيا

وقد قام بدراسة مسالة الانساب والتقسيمات القبلية في جزيرة العرب، وقارنها بطبيعة الحضارة التي كانت سائدة ابان الحضارة المروية في السودان، مما فهمته انه ايضا يتفق معك في ان الحضارة المروية لا تمثل عرقا واحدا ، ولكنها كانت مركزا لمجموعات سكانية كثيرة ولم تكن المملكة المروية سوي مركزا حضاريا لها

هذا القول يجاوب لنا علي النقاط التي طرحتها اعلاه حول الاصول السكانية للمالك القديمة في بلاد فارس والعراق ومصر

حيث ان الحضارات القديمة جميعها وحتي الامبراطوريات التي سبقت قيام الدولة الحديثة لم تكن تقوم علي عرق واحد
واحيانا ما نجد ان الاسرة الحاكمة تختلف عرقيا عن المحكوميين ومثال ذلك البطالمة في مصر
والمملكة الواحدة تضم اشتاتا عرقية واقوام كثر لكنهم ينسبون انفسهم الي مركز الحضارة في ذلك التاريخ

اطروحة وليم آدمز تقوم علي ان دخول المجموعات العربية الي شمال السودان تزامن مع ضعف وانهيار الدويلات النوبية التي كانت قائمة والتي هي وريثة الحضارة المروية العظيمة، (وليم آدمز يصر علي التفريق بين الحضارة المروية والدويلات النوبية) والمجتمع في ذلك الوقت كان زراعيا مستقرا، وساهم دخول المجموعات العربية في زعزعة استقرار المجتمعات المستقرة زراعيا وحدث شبه تحول في علاقات ونمط الانتاج السائد من مجتمع زراعي الي مجتمع رعوي، اضافة الي نقل سمات مجتمع الجزيرة العربية، هذا الوضع ساهم في تحول طرق كسب العيش لدي السكان الاصليين الي مايشبه ماهو سائد في الجزيرة العربية، كقبائل تعتمد علي الرعي، والاغارة ايضا وما يتبعها من تحول الي طبيعة قتالية للقبائل (ولديه كلام كثير عن قبيلة الشوايقة في هذه النقطة)
في لحظة تاريخية معينة ونسبة الي تغير طبيعة المجتمع صارت هنالك حوجة الي تبني نظام الانساب العربي
النقطة المهمة الاخري التي طرحها وليم آدمز هو ان نظام الانساب في الجزيرة العربية ذات نفسها لا يقوم علي قرابة الدم وحدها
وانما تتدخل عوامل اخري كثيرة تجعل من بعض بطون القبائل تنسلخ عن قرابتها بالدم وتنتسب الي قبيلة اخري

اطمع في اطلاعك علي الكتاب المذكور ويا حبذا لو قمت بتقديم عرض له علي المنبر

الف مراحب بيك يا عبد الله عيدروس
ومنكم نستفيد

الحبشي حبابك يا زول
الكلام الانت بتجيب فيو بالاحمر من كلام صديق عبد الجبار دا انا شفتو لكين تجاوزته عن عمد لانه في كلامي بصوره غير مباشره اثبت انه ود بادي ينحدر من اصل شايقي وكل الهماني انه تمت adaptation للقبائل التي نزحت من الشماليه لمديريه النيل بالذات منطقه جنوب شندي شرقا وغربا نفس التكوينه في عموميتها جعليين وشوايقه وقبائل اخري باثر اقل وانا اساسا دا ما الجزء الهماني في كلام صديق عن ودبادي . ولو في محاججه ولا غلات سوو مع صديق عبد الجبار لانه هو نفي شايقيه ود بادي ثم عاد وقال انه له جذور من مساوي .
وبالجد كدا اسع انا ذاتي ما بعرف لي جنس ولا لابوي جنس لاننا لخبته شديده المهم اصلنا من اهل السودان .
يا زول انا قلت الرووووووووووب . والله ما بعرف البعد بين ود بانقا وود الحبشي وانا للان ود الحبشي دي قدمي ما وطئتها لكين هي بخط الغرب ونحن بالشرق اصلوا انا الغرب دا شفتو مرتين في حياتي عند زيارتي للجريف فقط . لكين لو بتدور تعرف بعدها كم بسال لك اهلي ناس الكمر ولا ناس الجريف .
والبسابير دي شفتها مرتين وحجر العسل شفتها مرتين
وود بانقا نفسها ممكن تعد مشيتي ليها علي اصابع الليد الواحده .
يا اخي انا بت مدينه لووووووووووووووول

Quote: Be my quest

صحيح اني مشيت بلاد الانجليز مرتين
لكن برضو انجليزتي تعبانه

الكلام الفوق ده يعني شنو ؟

Quote: صحيح اني مشيت بلاد الانجليز مرتين لكن برضو انجليزتي تعبانه الكلام الفوق ده يعني شنو ؟

لووووول الشفت ولدي الكلام دا معناتوا كن ضيفي فاسمتعك
الترجمه دي بتصرف يا حبشي يا اخي

Quote: كن ضيفي فاسمتعك

اجِّي !!

ده كلام شنو يا خاله ..

كان الشرح ده صحيح تعال لينا يا محمد بهناك مكان البوست (غير الممعير) داك

لووووووووووووول الشفت الترجمه دي بتصرف
يعني كن ضيفي افعل ما تشاء
او مرحب بيك أو علي الرحب والسعه .

وليد ولدي اناقصدت انه you are invited to be his guest and he will entertain you, as he usually does. truly I find him quite
entertaining

خفتي يا خاله ؟

ما تقافي انا فاهمك وفاهمو

لكن هي رسالة عشان محمد ما يكون حرفي ويدقق في كلام الناس شديد ويحاسبهم بيه قدر ده

لول منك انت ما خايفه يا وليد
خايفه منو هو اسع يقول تزوير كمان
اصلوا الزول ما يرقد لمحمد الحسن في امان

أختي العزيزة دوما
ليكي وحشة
لعل الحبشي يقصد be my guest وليس be my quest
على العموم الخلط بين حرف g وحرف q وارد ، لذلك لا يجب للحبشي أن " يعصر " على الناس كثير في مثل هذه الأخطاء البسيطة .

تحياتي ومحبتي

حباب اخوي الضو
تصدقوا بالله من اشوف اسم جعفر اسماعيل دا بقوم ليه بشهمه تشبه طيبته وجمال نفسه
تسلم اخو الزين وتحياتي للسروره .

Quote: الحمد لله يا ماما دوما,شهدتِ بي بالموليتة بعملوها بالسمسم,قلته للصادق سلاطين واميرة الشيخ كده,قالو لي دي فلهمة ناس سنجة ساكت..هههههههههه

تخيل انها بالسمسم كمان دي وصفتها الاساسيه واحلي من بالفول .

Quote: هذه النقطة بالذات شغلتني كثيرا،وانا اؤيد الفرضية التي تقول ان الحضارة المستقرة والسكان الاكثر عددا هم النوبيون وبقية السكان الاصليين للمناطق السودانية التي استوطن بها العرب، وان القادمون العرب كانو هم القلة عدديا

تحياتي يا عيدروس ..
صراحة مسألة تحديد الاكثرية دي اظنهاصعبة شوية و إن كان قال بها البعض ..
لأنو في الأول حنحتاج نحدد نحن بنتكلم عن ياتو فترة من فترات الهجرات العربية ؟
العرب لم يدخلوا السودان مجموعة غزاة فاتحين في سنة محددة من السنين كما يكاد يشتهر عند اغلب الناس.
فلو كان جيش غازي لأمكننا ان نجزم انه اقل من أهل البلد الأصليين ..
لكنها هجرات امتدت لأزمان طويلة جدا من قبل الاسلام ثم بعد اتفاقية البقط ثم بعد سقوط الدولة الأموية ثم بعد حمى التعدين . كما كانت هناك هجرات بسبب القحط ايضا.
من الهجرات ما اتى مباشرة من نجد .. و منها ما جاء من مصر و هو الأغلب.

فلو قلنا ان السكان الاصليين ( النوبة ) كانوا هم الأكثر في كل الفترات فاننا نحتاج ان ندلل على ذلك .. لأن احتضار الحضارات و تشرذم الممالك غالبا ما يصاحبه نقص في عدد السكان .. خصوصا مع تغير انماط الحياة.. و اظن البيئة نفسها تغيرت في فترة مابما لم يكن يناسب النوبة مما أثر بلا شك على تعدادهم. فقد ذكر ياقوت الحموي في معجم البلدان حين تكلم عن دنقلة أن زرع أهلها التين و العنب .. و هذا يحتاج جو بارد لم نره و لم نعهده في صحارينا .. و لا يشبه ما يمكن أن يغري عرب جهينة للانتقال اليه . فلا بد أن متغيرات عديدة مرت بالمنطقة أثرت لا شك على عدد السكان.
فلا اظن ان كل الهجرات كان عدده اقل من اهل البلادالاصليين .. بل لابد أن تعدد الهجرات و تتابعها ادى الى زيادة عدد المهاجرين على السكان.

خذ عندك واحدة من الهجرات مثلا كانت هجرة عبدالله و عبيد الله ابني مروان الحمار اخر ملوك بني امية .. هذان دخلا النوبة في جماعة بين الألفين و الأربعة ألف .. و لم يخرج منهم مع عبد الله الا حوالي الأربعين شخص كما ذكر اليعقوبي في تاريخه. فأين ذهب الباقين ؟ هل هلكوا جميعا ؟ ام استقر منهم ألف أو نحوه الألف في بلاد النوبة ؟
ذكر الطبري أن القمي دخل بلاد البجا في عشرين ألف لمحاربتهم. و رغم ان بعض المؤرخين يرى ان العدد مبالغ فيه الا ان العدد مهما نقصنا منه سيظل عددا مهولا يضاف الى ما قبله و ما بعده من الهجرات و الغزوات.

اذن تظل مسألةأيهم أكثر مسألة تحتاج الى مراجعة حسب الفترات الزمنية .. و هو أمر عسير جدا ..
لكن يظل الثابت أنه و بعد الاسلام استعرب كثير من النوبة و البربر و النبط و الفينيقيين.
و هذا الاستعراب الثقافي اختلط مع العرق العربي الوافد ثم قامت عليه دويلات و امارات و مشايخ عربية في ظل سلطنة الفونج.

Quote: هذه النقطة بالذات شغلتني كثيرا،وانا اؤيد الفرضية التي تقول ان الحضارة المستقرة والسكان الاكثر عددا هم النوبيون وبقية السكان الاصليين للمناطق السودانية التي استوطن بها العرب، وان القادمون العرب كانو هم القلة عدديا

تحياتي يا عيدروس ..
صراحة مسألة تحديد الاكثرية دي اظنهاصعبة شوية و إن كان قال بها البعض ..
لأنو في الأول حنحتاج نحدد نحن بنتكلم عن ياتو فترة من فترات الهجرات العربية ؟
العرب لم يدخلوا السودان مجموعة غزاة فاتحين في سنة محددة من السنين كما يكاد يشتهر عند اغلب الناس.
فلو كان جيش غازي لأمكننا ان نجزم انه اقل من أهل البلد الأصليين ..
لكنها هجرات امتدت لأزمان طويلة جدا من قبل الاسلام ثم بعد اتفاقية البقط ثم بعد سقوط الدولة الأموية ثم بعد حمى التعدين . كما كانت هناك هجرات بسبب القحط ايضا.
من الهجرات ما اتى مباشرة من نجد .. و منها ما جاء من مصر و هو الأغلب.

فلو قلنا ان السكان الاصليين ( النوبة ) كانوا هم الأكثر في كل الفترات فاننا نحتاج ان ندلل على ذلك .. لأن احتضار الحضارات و تشرذم الممالك غالبا ما يصاحبه نقص في عدد السكان .. خصوصا مع تغير انماط الحياة.. و اظن البيئة نفسها تغيرت في فترة مابما لم يكن يناسب النوبة مما أثر بلا شك على تعدادهم. فقد ذكر ياقوت الحموي في معجم البلدان حين تكلم عن دنقلة أن زرع أهلها التين و العنب .. و هذا يحتاج جو بارد لم نره و لم نعهده في صحارينا .. و لا يشبه ما يمكن أن يغري عرب جهينة للانتقال اليه . فلا بد أن متغيرات عديدة مرت بالمنطقة أثرت لا شك على عدد السكان.
فلا اظن ان كل الهجرات كان عدده اقل من اهل البلادالاصليين .. بل لابد أن تعدد الهجرات و تتابعها ادى الى زيادة عدد المهاجرين على السكان.

خذ عندك واحدة من الهجرات مثلا كانت هجرة عبدالله و عبيد الله ابني مروان الحمار اخر ملوك بني امية .. هذان دخلا النوبة في جماعة بين الألفين و الأربعة ألف .. و لم يخرج منهم مع عبد الله الا حوالي الأربعين شخص كما ذكر اليعقوبي في تاريخه. فأين ذهب الباقين ؟ هل هلكوا جميعا ؟ ام استقر منهم ألف أو نحوه الألف في بلاد النوبة ؟
ذكر الطبري أن القمي دخل بلاد البجا في عشرين ألف لمحاربتهم. و رغم ان بعض المؤرخين يرى ان العدد مبالغ فيه الا ان العدد مهما نقصنا منه سيظل عددا مهولا يضاف الى ما قبله و ما بعده من الهجرات و الغزوات.

اذن تظل مسألةأيهم أكثر مسألة تحتاج الى مراجعة حسب الفترات الزمنية .. و هو أمر عسير جدا ..
لكن يظل الثابت أنه و بعد الاسلام استعرب كثير من النوبة و البربر و النبط و الفينيقيين.
و هذا الاستعراب الثقافي اختلط مع العرق العربي الوافد ثم قامت عليه دويلات و امارات و مشايخ عربية في ظل سلطنة الفونج.

Quote: بعدين الفقير المدفون في قريتنا و اسمها منسوب اليه هو الشيخ صالح ود بانقا الملقب بجبل اللقمه وهو رازقي فرع من قبيله الجعليين

الف ورحمة عليك دكتور محي الدين عبد الرحمن الزين حفيد الشيخ
صالح ودبانقا جبل اللقمة...
من خلاله عرفت الرازقية ودور الشيخ صالح ودبانقا
وتلك الاراضي التي تحدثت عنها..
التي اهدي منها الكتير للاهالي لزراعتها في
مواسم المحل ..الشيخ صالح ودبانقا ..كان بيهب
اراضي للضعفاءوالمساكين
فعلا اراضي منتجة جدا لللمقد والحميسي وانواع
اخري..
شكرا دوما من خلال مداخلتك ..
تزكرت ..دكتور محي الدين عبد ارحمن الزين حفيد الشيخ
صالح ودبانقا كان معرفة وموسوعة
لكل شي حتي..وكان بتحدث عن المنطقة بفخر
لايوصف..
تقبلي مروري

عادلكن يا دومة ما بسعلك (ما بسعلك دي مقصود منها نسيان القواعد وكده)
طلعت من بنوتنا !!!!
بمناسبة اللف والدوران أمس أخونا بتاع BP زروه زرة شديدة في لجنة التحقيق ما لقى حل إلا الزوغان شديد اللهجة.
واحد سناتور زهج منه قام سأله سؤال ما عنده غير إجابة واحدة
Yesterday was Thursdy, Yes or No?d
تحياتي وكتري من الزعل الزي ده

لوووووووول دكتوره اسماء كيف يا اخي ما بتكم بتكم ونص وخمسه
وشندي ذاتها عندي فيها عمي لزم .

حتى انت يازينب الفحل تحزمتى لزرزرة محمد سليمان شخصيا
هذه الايام اتعاطف مع اي شخص مزرزر حتى لو كان ذلك المزرزر
هو اللعين كيكى

يا ود الامير الحاجه سافرت ولا؟؟
في دحين ماكان بيناتنا وعد انك ترسل لي تلفونكم عشان اتصل اتونس معها
باقي بريد ونسه الامات بالحيل.
ولا ياها وصيه الميت التحت راسو؟؟.
بالله تسلم علي الوالده الحرم كثير السلام .

غايتوا انا بفتكر انها عروبه ثقافيه اكثر من كونها عرقيه
واصل لها الدين الاسلامي لانه package متكامل عماده اللغه العربيه واللغه وسيط هام في نقل اي ثقافه .

Quote: دكتور محي الدين عبد الرحمن الزين حفيد الشيخ صالح ودبانقا جبل اللقمة...

حبابك يا باسط المكي
والف رحمه ونور علي روح دكتور محي الدين عبد الرحمن الزين
وان لم تخني الذاكره فهو اخ غير شقيق لابن بت عمي الزين عبد الرحمن الزين .
نعم الشيخ صالح جبل اللقمه وعبد الرحمن اب شعر وابوي الشيخ المامون يرقدون بتلك المنطقه قبه الشيخ صالح ود بانقا جبل اللقمه .

Salam sister doma

Quote: يا زول انا قلت الرووووووووووب . والله ما بعرف البعد بين ود بانقا وود الحبشي وانا للان ود الحبشي دي قدمي ما وطئتها لكين هي بخط الغرب ونحن بالشرق اصلوا انا الغرب دا شفتو مرتين في حياتي عند زيارتي للجريف فقط . لكين لو بتدور تعرف بعدها كم بسال لك اهلي ناس الكمر ولا ناس الجريف . والبسابير دي شفتها مرتين وحجر العسل شفتها مرتين وود بانقا نفسها ممكن تعد مشيتي ليها علي اصابع الليد الواحده . يا اخي انا بت مدينه لووووووووووووووول

That is great

What about Salawa ?x
---------------------------
Mahjoob Ali and Munir
salam
you both know alot about Ismaein Hasan

Quote: دعني اضف اليك عبد الرحيم أرقي و صديق أحمد فثلاثتهم بديرية دهمشية و ليسو شوايقة كما اشتهر عند ناس المركز

You can also add Hajj Almahi and Awlad HajjAlmahi of Al-Kasinjar
But Wad Alymani is from AlGurair
So he is half Shaygi

Quote: أو أجدعوا الرابط .. يا عملات ناس البورد :)

Ya Munir
If you wait for them
wait for the water delivered using
algadoos anny wa algraa assmaa wa alghurbal
(:

Quote: وارجع لقصيده ود بادي . ما تغااااالللللللللللت يا الحبشي ساكت حبا في الغلات .

OK

سلام أستاذة دومة
نقل عن صديق عبدالجبار
:

Quote: أولاً بالمناسبة محمد بادي ليس شايقياً .. فهو من منطقة الجعليين من جزيرة صغيرة تدعى (جزيرة عبد اللا) بالقرب من شندي ، ولقد أطلق إسم الجزيرة مسقط راأسه على قصيدة "أنا اخو البت اللكعت قرن الخمرة النازة" .... وقد يكون له جذور شايقية لأنه تغنى لجزيرة مساوي مسقط رأس السيد علي الميرغني .. فهو ختمي قح ..... والرجل له مفردات خاصة به لا هي شايقية ولا هي لهجة الوسط ولا هي من كلام السافل ولا هي حنك البطانة الصرف ... صديق عبد الجبار

كلام صديق غلط في جزئية الأصل العرقي لودبادي صحيح فيما عداها- ودبادي - شايقي- سورابي - عكودابي - جده عكود شيخ السوراب - عكودمن القريرالقوز ومنطقتهم لازالت تعرف بالعكوداب....
كلام أستاذة دومة دقيق :

Quote: ماذكرته عن ود بادي العكودابي صحيحا وينطبق علي كل سكان المنطقه الممتده من جنوب شندي وحتي حجر العسل علي ضفتي النيل فالبرغم من ان الجدود نزحوا من مناطق الشمال الا انهم استقروا بهذه المنطقه وتصاهروا مع ما بها من سكان اصليين وانتجوا ثقافه تختلف عن ثقافتهم الشايقيه فمثلا لا نطرب للطنبور مثل طربنا للدلوكه ولا نحب القراصه كحبنا اللقمه او ( العصيده) وكذلك لغتنا فهي خليط كما اسلفت .شكرا علي شرحك لكلمه عاتن فقد استرجعت ذاكرتي كلمه عتن معتن . doma ......

فمن الواضح أنها قد أختلفت مع صديق في جزئية الأصل القبلي للشاعر وأتفقت فيما عدا ذك:
دومة أثبتت أن جدوده نزحوا من الشمال وهذه حقيقة تاريخية وقولها أنهم تصاهروامع سكان المنطقة هو حقيقة أخري وكذلك الحال بالنسبة لقولها

Quote: انتجوا ثقافه تختلف عن ثقافتهم الشايقيه فمثلا لا نطرب للطنبور مثل طربنا للدلوكه ولا نحب القراصه كحبنا اللقمه او ( العصيده) وكذلك لغتنا فهي خليط

إذا فهي قدأمنت علي هذه الجزئية في كلام صديق عبد الجبار

Quote: والرجل له مفردات خاصة به لا هي شايقية ولا هي لهجة الوسط ولا هي من كلام السافل ولا هي حنك البطانة الصرف

...
وهوأيضا كلام سليم ......
.......

منقول من بوست صديق عبدالجبار

Quote: كتب محمد بادي في جدّه "سعيد ولد بادي العكودابي" بعد عشرين حسبتها يابا يوم فوق يوم وعام فوق عام حنينكم طش فى طشيش ويا مالقيت تملى الحنين جمام اتلفحت شال الشوق احادى الراحلة لا قدام كسحت شمال وحس طمبوركم الولوال نحاس ابواتكم الرزام صليلن يصحى فى الشوق اذا ما نسم النسام نزلت قرير اهالى الشان بعشو الضيف بخيلم فنجرى وعزام كرفت الطينة ارث الفات وما كفانى الا بركت فوق الدار واتنسمت من السام شرفت على رمال القوز واترحمت على حرزا هناك مركوز على راسم سريع النهمة كان ودتوم وكان فى الماضى مو نوام ردفت الصيحة فوق الصيحة واتحزمت ابكى رجال بكيت سيوفن المدروعة فى الحيطان وزى ما هم رقادن طال رقادن طال بكيت فرواتن المفروشه للجهال ويا ما قال ويا ما قال ويا ما عرض الصهال نشدت الفى الضريح راقدين عليكم الله يا خالدين عليكم عزتن كان زمن زينكم ودنياكم لبن معسول وتشربوا فيها بى هينكم جدى سعيد ولد بادى العكودابى دحين يا ابواتى كان بينكم قالوا اتربى فوق خيركم ويوم الحارة شايل شيلتو من شيلكم يخالطكم قداحة الخير ويتحزم وكت شينكم وشكاراتو سمعن قولى قالن سى بدن شكرو وقالن لى يمين ما قلت فى جدك كلام قدرو وكل القلتو فيه قليل وما قارب عشر عشرو الصهالة والوقالةوالرقالة وام غره هو ركابن الجهتية والقطنية والمحوية وام درة الباريها حلابن العشاية والشاشايةوالسباية وام ضرة لى ضيفانو بسخاين المزروعة والمقروعة والمفدوعة لا برة متمسح ديمة قيسابن المفزوعة والمقلوعة والممنوعة بالمرة كان من مافى جيابن راكب الفصلوا انسابن ودايما قدمو فى ركابن اسود الغابة غلابن وبعرف يكسر انيابن حلفوا الشافوا قدحو الحار وشافو كتار وماهو كضب قالوا وساعو مركب زان يشيل اطنان وخرسو هلب جفير سكينو دمو ينز وداك برادو واسكت كب اهل السايحة والمتراوحة خاتمة وعاقبة بى قدامو سوا درب ده ماهو كتير على ولدا مربى على ضفاف النيل ويوم ولدوه دفنو ابواتو صرتو فوف مراقد الخيل عكود الكان بعبر الكيل يمين الدنيا جاتو هينة ولينة بالخيرات مشيلة شيل سواقى تسوق تلوت الليل ونخلوا متنى شايل العجوة والقنديل عيوشو مصوبرات كيمان وعيش الريف ولد تيمان وخاتى البودة والعسيل ده شيتا كم دقون شافنو بين شفقة وحرص عبدنو والعقار لعابن يسيل الا سعيد الطلق الزايلة وخطب بى مالو دارا خالدة كان عزام وباعو طويل بساطو الاحمدى المحضور غدا وعشيات ملاقية فطور وديمة ضيوفو ديل فوق ديل يختف من مطايب الدكة لى ضيفانو ما ضباح حميل ######يل طحاناتو ما نامن جبال اللقمة كم عامن فوق سمنا مصفى تقيل ويوم الودع الحبان ونورو الضاو تحت التراب ما بان كان الفقد فيهو كبير وكان اليوم ده ما خاتنو فى الحسبان وكان ميراثو كل ميراثو قدحا ناز وسيف فولاذ وفروة ناس اصال وعزاز وسبحة ملانة يا حنان ويا منان قبل العم وقبل الخال بكوا العدام ..بكوا الايتام بكى الكرم الصبح مشلول وكل ابواتو راحو وغابو فى الرهبان ونحن عشنا لازمنا قبل ما يبنوا فيه البيت يكوسو الطبلة والجنزيز مع البيبان زمان الصالة والصالون زمان الرغوة والبالون حليل الكان حليل الدانقة والديوان حليل النافق اموالو وتدى يمينو وما تعرف حسابو شمال خليك من يعرفوا فلان كل فضيلة فى الاجداد ابت ما تبقى فى الاحفاد ومسكت فى النعوش الطاهرة واندفنت مع الجثمان وكل مكارم العابرين معاهم راقدة فى شبرين وبقت امجادنا كانوا زمان وكانوا زمان ,,,,,,,,,,, ,

أنا أخو البت اللكعت ... قرن الخمرة النازة


بالمناسبة صديق أعتذر عن نفيه لشايقية محمد بادي -وأتي ما يثبت أن
إفتراضه الأول خطأ وهكذاهو حال من يبحث عن الحقيقةويراهن عليها!!

هسع لو ود بادي دا لو طلع شايقي أو ما شايقي

أنشتاين حا يستفيد منو في شنو?

اي يا محمد E سليمان
بعرفها سلوه والجكيكه بالغرب
يا اخي انا كلمتك اني ما تولدت لا اتربيت هناك
لكين كنا نذهب لفترات قصيره لانه امي خرطوميه وحياه الريف ما بتبقي ليها
لكين يا اخوي انا ما قاعده فوق اضنيي
بسمع من والدي
و بعرف تاريخ اهلي ولغتهم واكلهم وحالهم واحوالهم.
من وقت السفر كان بالبابور
ومن زمن السفر لبورتسودان كان بمر بهناك
ومن قصص ابوي بعرف وادي العواتيب والكربكان والعروس
وناس الملاحه والعرب النازلين فوق العروس اهلي
وان سدرت لي بير الترك ولاد المك اهلي .
وان جيت المحطه اللت ود بانقا برضو بعرف ناسها وحمت فوق قلعها داك وقبضت القبور وشركت للطير
ولي فيها اهل وعشيره .
وان مشيت لقندتو عندي فيها اهل .
واليوم في زيجات جديده ومبشره انه الاختلاط والانصهار مستمر
وفي طريق انك ما تفرز السوداني لو من مروي ولا مليط
و مايهمني هو تزاوج الثقافات واختلاط الاعراق لانها تعني الثراء في كل النواحي .

العزيز كمال عباس مرحب بيك دوما
والله عاجزه عن شكرك يا ابني
حقيقي انت بتفهمني تماما .
شاكره لتكرمك بنقل الكوتات وشرح ما قصدته من حديثي .
---------------------------
لا اعتقد ان الحبشي لم يفهمني لكنها مماحكاته المتواصله فيما لا يستحق .

تحياتي ي أخت دومة

Quote: بعرفها سلوه والجكيكه بالغرب

دا بيت القصيد
الدكتور ود بادي من سلوة وغرب وشرق تفرق.
والحديث الذي ساقه الأخ صديق ليس دقيقا على إطلاقه
صحيح أن ود بادي له أصوات شعرية متعددة إلا إن تأثره بالشايقية
واضح جدا قارني مرثيات إسماعين حسن لأمه ورثاء ود بادي لإسماعين
أو حتى غزليات ود بادي ومعرضتها لغزليات إسماعين .
------------------------------------------
الغزالة !!!
ههه والله ما سمعتها من بعد 1986 م تفريبا

يا سقراط إنت لسان الطير عرفته
نامن تعرف الغزلنة ؟

تحياتي يا محجوب
وأنت ربطتك علاقة بأسرة الراحل
إسماعين ود حسن عشان كدا ممكن تساعدنا في تثقيف
الربع من بني عمنا بثقافتهم
أما أنا فقد برئت إلى عرينة من عرين
وعرفت جعفرا وبني أبيه وأنكرت ...إلخ

Quote: العزيزة دوما انت قاسم الحب المشترك لهذا المنبر نختلف في كل شي ونتفق علي حبك. دحين محمد دا تلتقي عنده كل الدروب بين الشمال والشرق. بشيشك يااختي . ولك الود

أختك زينب كماتحة بالزنابيل إن أنظرتها تظما
وإن أعجلتها تدمى . ذهبت مرة تنازعني معنى "السليط "
وهي لاتدري انها من لغة البجا

Quote: وزمن الحصه البجليها كت بسرح بغنيماتي اقدمن علي الليد ومرات احتلن البرم والخريم

عشان بفهموها ليك ناس العوض
تحتيلين وبرضك ماك حنكابية ؟

لوووووووووول يا محموووود
ومرق علي التحتانيه لقطت لي قرون ويكه وسبروق ولسان طير
دحين بتعرف كلمه اقرد ؟؟؟

Quote: أختك زينب كماتحة بالزنابيل إن أنظرتها تظما وإن أعجلتها تدمى . ذهبت مرة تنازعني معنى "السليط " وهي لاتدري انها من لغة البجا

لووووووووووووووووولب اها انا ما قلت ليكم الحبشي ان جاء بخلي ريحتي طير طير
ها زول ها الغزاله !!!
والله يا الحبشي انت عارف الناس الوحيدين الما عندي فيهم طريقه تب هم اهلك ناس الشرق ديل .
لا حصل جاورتهم لا حصل عاشرتهم لا ناسبتهم .
عاد البعرفني معني السليط شنو انا كنت قايلاهو الزيت

يا محمد الحسن

لوالدي نادرة ،انه كان لهم جار من احدي قبائل البجا وكان في بسطة عيش واغلب طعامه لحم ضان، وكان يعيب علي اهل القرية(احدي قري ولاية نهر النيل) تناولهم لانواع من الخضار لا يري فيها فائدة ومنها لسان الطير هذا *

يحكي والدي ان احوال هذا الرجل المالية قد ساءت ولم يستطيع شراء اللحم ، فصاح ذات ظهيرة مناديا زوجته:

يا فلانة ... لسان الدرودور تدور


* من خلال نادرة والدي هذه كنت اظن ان سكان شرق السودان لا يعرفون لسان الطير ولا يتناولونه في طعامهم - ارجو افادتي

Quote: عشان نعرف المسافه كم كيلو متر بين ود بانقا وود الحبشي غرب النيل

طيب المسافة كم تقريبا بين سلوة وود الحبشي ؟

---------------------

Quote: غايتوا انا بفتكر انها عروبه ثقافيه اكثر من كونها عرقيه واصل لها الدين الاسلامي لانه package متكامل عماده اللغه العربيه واللغه وسيط هام في نقل اي ثقافه .

يا أختنا زينب إن تركنا أهلك السعداب والحنكاب والعونية ودعواهم بالعروبة العرقية
فأين تذهبين بالقريات مثلا ؟

تحياتي أستاذة دومة::

Quote: العزيز كمال عباس مرحب بيك دوما والله عاجزه عن شكرك يا ابني حقيقي انت بتفهمني تماما . شاكره لتكرمك بنقل الكوتات وشرح ما قصدته من حديثي

.
حينما نتحدث عن الفوارق النسبية بين - شوايقة المنبع وشوايقة مناطق
الجعليين و الجزيرة فإننا نضع في الأعتبار :
- الإيقاع الشايقي والطنبور
- التعبير الجسدي أو الرقص
- اللحن والكلمة وطبيعة القصيدة
-اللهجة
شايقية أقصي الشمال -إيقاعهم الغنائي مميز والة العزف عندهم هي الطمبور والتعبيرالجسدي هو الرقص النسائي بأسلوب معين والصفقة الرجالية بطريقتها المعروفة - العرضة تقع في الهامش- الكلمة حنينة ورقيقة تتناول الغزل والحنين للارض والبلد والشجن كما أن أهل المنطقة يتميزون بمفردات معينة وطريقة في النطق -اللهجة-تختلف عن ماهو سائد في بقية المناطق
بينما تأثر شايقية نهر النيل بثقافة وفن المناطق التي سكنوا فيها حيث إختفت اللهجة والمفردة الشايقية وأختلف كذلك الإيقاع الغنائي والرقص وطغي الأسلوب الحماسي والعرضة والفخر هذاأمر طبيعي لأناس أنقطعوا عن ديار الشايقية لأكثر من 150 عاما....
يبقي الحديث عن بعض الطابع المحدود والتي يظهر بشكل مقصود في قليل من قصائد ودبادي التي يمجد فيها رموز منطقة الشايقية أو يتناول تراثها مثلا - يبقي مرد ذلك لأتساع ثقافة الشاعر وإطلاعه بشكل مكتسب ومستحدث علي ثقافة منطقة الشايقية وهو نفس الشي الذي نجده في بعض أغاني مصطفي سيدأحمد التي يبرز فيها الطابع الشايقي -اللحن والإيقاع-
........

الأخ كمال عباس
تحياتي
شكرا لانحيازك إلى الحقائق
تصويبك للأخطاء محل الخلاف أسعدني وهي مرتبطة
بالحقائق المجردة لا بالتحليل ووجهات النظر.
وعموما هذه مسائل الجهل بها لا يضر والعلم بها لا ينفع
ومع ذلك يشرفني أن أثقف البعض في ثقافتهم وأنورهم عن تراثهم .
حاج الماحي جعلي !
صاح يا كمال ؟
ود الحبشي تعرفها ؟

كتب محمد e سليمان:

Quote: ومع ذلك يشرفني أن أثقف البعض في ثقافتهم وأنورهم عن تراثهم . حاج الماحي جعلي ! صاح يا كمال

؟
ياسيد محمد حاج الماحي جعلي عرقيا ولكنه شايقي ومنصوري -الثقافة
والتراث والمفردة مثله مثل النعام أدم-الهواري القبيلة ولكنه شايقي ثقافيا وتراثيا أكثر من الفنان عثمان حسين !!
وكثيرا من البيوتات الدينية والاخري ذات المكانةالأجتماعية -في ديار الشايقية- لاتنتمي عرقيا لبطون الشايقية ولكنهم أستقرواوأستوطنوا بديار الشايقية وتزاوجوا وأختلطوا بالشايقية وأصبحوا شوايقة إنتماء
وثقافة!
وبنفس القدر ستجد شوايقة -عرقا- في الجزيرة والخرطوم وديار الجعليين لاتجمعهم مع الشوايقة الا عبارة-جذوري شايقية!!- هذا التلاقح والأنصهار العرقي والقبلي يصب في مصلحة الوطن ويضعف النعرات العنصريةوالجهوية

..........

راجع هذا الرابط سيقودك لكتاب ا لاستاذة فاطمة احمد علي عمر -تحديدا
الفصل الخامس- ستجد في معلومات قيمة عن أسماء ورموز كبيرة وبيوتات
عريقة -جذورها ليست شايقية:
http://www.tawtheeg.com/vb/showthread.php?t=9180

تحياتي يا عيدروس

Quote: من خلال نادرة والدي هذه كنت اظن ان سكان شرق السودان لا يعرفون لسان الطير ولا يتناولونه في طعامهم - ارجو افادتي

بحسب علمي القليل فأهلنا في الريف الجنوبي عموما علاقتهم بأطباق " الأوراق " و"السباريق "
غير حميمة باستثناء "شريفة" وينطبق هذا الأمر حتى داخل العمق الأرتري .
معلوماتي عن أمزجة المأكل لدى أهل الجزء الشمالي وأهل البحر الأحمر
تكاد تكون معدومة . لسان الطير بالتحديد عرفه الشرق من أهل الشمال .

يا أختنا الكريمة زينب
السليط \السليت ياهو الزيت
وأنا في بوست المفراكة ما قلت غير هذا .
-----------------
كمال عباس شكرا على مدي بالكتاب
لكن هذا لا يمنع أن ترحبوا بي مثقفا لكم ومنورا عن
ثقافتكم المحلية .
حتى معظم المعلومات التي وردت من قيفكم كانت غير صحيحة
فود بادي من سلوة .
ما عندك نص مكتوب لقصيدة "لسان الحال *" يا كمال ؟

___________
*أرجو أن يكون اسم القصيدة لود الدابي صحيحا

محمد e سليمان:

Quote: لكن هذا لا يمنع أن ترحبوا بي مثقفا لكم ومنورا عن ثقافتكم المحلية . حتى معظم المعلومات التي وردت من قيفكم كانت غير صحيحة فود بادي من سلوة . ما عندك نص مكتوب لقصيدة "لسان الحال *" يا كمال ؟

وهل قلت أن الرجل ليس من سلوة! وهل هذه النقطة أصلا خلافية ?
الخلاف كان حول مانسبته أنت لدومة حول أصول ودبادي العرقية
أما تراث وثقافة وفن مناطق الشايقية فهو تراث وإرث سوداني يخص كل السودانيين والإهتمام به ليس حكرا علي الشوايقة!
........قصيدة لسان الحال تخص الدابي الإبن -حاتم حسن الدابي
وإستجابة لطلبك سوف أرفدك بها:


لسان الحال


الكاتما فى جواى كتير متملك الجوف والعصب
وما كت دايرة أقولو ليك لكن لسان الحال غلـب
ما بنسى يـوم ودعتـنا وسافـرت فى غـرة رجـب
خليت وراك الدار حزين يتباكـا والدمع انسكـب
أعذرنى والله العظيم لو ما الضرورة أنا ما كتب
وأنا خايفة فى بعدك يكون الضاع هو ضعف المكتسب
اليومة داك ناس البلد هنونى شايقيى وعرب
قالو لى مبروك خير وجاك يكتب سلامتو الإغترب
قالو لى دوب نجم السعد طلاكى من بعد إحتجـب
يا دوبو بالك يستريح وتنسى العذابات والتعب ..
فضّلت أحسب فى الشهور قاعدالى فوق نيران لهـب
صابرة وحريصة على الولاد لا بيقو للريح فى المهـب
سديت خانتك مــن مشيت قايمـابو واجبـى كأم وأب
والأسرة يضنيها المسير .. وتتهاوى لو ما فيها رب
والله ما بنـكر جميلك برضـو لينا ثناك وجب ..
موكب هداياك ما انقطع .. كان سترة فى الزمـن الصعب
لابسين وماكلين والنعيم كايلنا فى يوم ما نضب ..
وعايشين معيشـة المترفين .. طولنا والطبع إتخرب
البيت مفرش بالحرير ومليانة إيدى بالدهب..
لكن خسارة على محل .. عاش سيدو خمسة سنين عزب
الشى المهم ما قلتو ليك وليهو إنت ما ظنيت حسب
كبرو الصغيرونين خلاص .. خايفالم الطبع الكعب ...
وصولوها مرحلة الخطر .. والأمن ما زال مستتب
وانا كتّ قادراهم زمان لكــن بعد كبرو اتغلب ...
حصلنى قبل الجد يفوت .. دوبنهم فوق العتب
قبال نحصد الخير ندم .. ومابيجدى كان لمت وعتب
خايفالم الطيش فى الدروس .. ومابرضى لو واحد رسب
خوفنى المتعبنى الكبير بعدين يمرقو بلا أدب
وريتك الحاصل على لا فيهو ثورة ولا غضب ...
شان الحديث مايبقى نى والواحة يكتنفا الجدب
أنا قلبى مازال لسة حى .. ونجمو الملاهج ماغرب
وآخر كلامى ترد على لا أبقة بكرة أنا السبب
.........
http://www.tawtheeg.com/vb/showthread.php?t=245

شكرا يا كمال على القصيدة والرابط

Quote: يا أختنا زينب إن تركنا أهلك السعداب والحنكاب والعونية ودعواهم بالعروبة العرقية فأين تذهبين بالقريات مثلا ؟

يا اخانا محمد الحسن والله ما اكضب عليك للان القريات ديل ما شفتهم
بعرف الذبيديه الذين يقطنون نحواحي قروره وهم بدو ما عندنا بيهم اي دخل .
اهلي ديل لو شوايقه ولا جعليين كلهم فيهم ملامح شرق افريقيا اكثر من الملامح العربيه اذا لماذا الانتساب للعرق العربي فقط؟؟

يا أختنا زينب
تحياتي

Quote: يا اخانا محمد الحسن والله ما اكضب عليك للان القريات ديل ما شفتهم بعرف الذبيديه الذين يقطنون نحواحي قروره وهم بدو ما عندنا بيهم اي دخل

كيف الكلام دا ؟
القريات عندكم في نهر النيل .
كدي النسأل ولاد باسبار ؟
أخونا محمد عثمان الحاج وين يا جماعة ؟

بعدين مفردات "عرب" و"عربي" من الأضداد تقريبا في ثقافة الشمال الشعبية .
أقرب مثال عندك في قصيدة حاتم ود الدابي :

Quote: اليومة داك ناس البلد هنونى شايقيى وعرب قالو لى مبروك خير وجاك يكتب سلامتو الإغترب

غايتو لو ما ظروف الامتحانات
يا أختنا دومة كنت ثقفتكم ثقافة شديدة
إنت البوست دا ما طلبت من بكري ينقله للربع القادم
عشان عندي إجازة وممكن بتفرغ ليكم ؟

إلى الآن شايفكم كلكم مجلين موضوع ود الحبشي دا :
كم تبعد ود الحبشي من سلوة ؟

Quote: غايتو لو ما ظروف الامتحانات يا أختنا دومة كنت ثقفتكم ثقافة شديدة إنت البوست دا ما طلبت من بكري ينقله للربع القادم عشان عندي إجازة وممكن بتفرغ ليكم ؟ إلى الآن شايفكم كلكم مجلين موضوع ود الحبشي دا : كم تبعد ود الحبشي من سلوة ؟

والله يا الحبشي الثقافه ما بنابها بس تبعد لي من عربي الاعراب ناس سليت وزنابيل
عرين من عرينة ليس منا ... برئت إلى عرينة من عرين ومعرون .
انا غايتوا ذاتي مسافره يوم 8 سبعه
وما برجع الا شهر تسعه
اها اخير خلو يغتس وتاني بنفتح بوست نتونس و تثقفنا

اييييييييييييييييييييييييك بالله انت برضو عندكم رطانة يا دوما طلعتو.... و حياة ديني و إيماني انا مجلي من العنوان

المغزلن ؟
لسان الطير؟
كماتحة؟
الزنابيل؟
السليط دا سليط اللسان؟
البرم بعرفة نوار الطلح ... الا الخريم دا نهي
سبروق؟
اقرد؟

دايرين ترجمة نحنا غراااااااااااااااااااابة ساي ما بنعرف جنس النضمي دا

بالجد انا سعيد جداً بالبوست و عرفت فيهو حاجات كتيرة عن ثقافة بالنسبة لي ما كانت معروفة اي هو بدأ بشايقية ود بادي لكن ماشي علي أجمل مايكون...
لذا رجاء ترحلوا لينا البوست دا للربع الجاي يا ماما دوما و محمد الحسن سليمان ...دا بس رجاء
-----------------------------------
*عيدروس الغتيت انا ماشي معاهم الليل و النهار يسمع في حكاوي و نوادر أهلي و يتكشم و ما يقول اي حاجة عن أهله ...
أما لقيت ......... غتيت بالجد يا عيدروس؟

بوست مدرسة عديل كده ..

نطالب بنقله للربع الثاني ..

حمور .. شكرا اتحفتنا .. وكل من مدانا بمعلومات جميله ..

Quote: تخيل انها بالسمسم كمان دي وصفتها الاساسيه واحلي من بالفول .

شنو هي المليته ... ؟؟
ممكن نستفيد منها يا دومه يا حبيبة اصلو اللوز عامله معنا كونترات ..

تحياتي يا حافظ وعواطف

Quote: شنو هي المليته ... ؟؟ ممكن نستفيد منها يا دومه يا حبيبة اصلو اللوز عامله معنا كونترات ..

الموليتة نبتة ذات فوائد طبية بحسب
الاعتقاد الشعبي السائدو تستخدم لعلاج بعض
أمراض الجهاز الهضمي التي تسببها الطفيليات السوطية مثل ديدان
القارديا.

Quote: تحياتي يا حافظ وعواطف

شكرا يا محمد على المعلومة ..

تحياتى عفاف الـ ما عواطف .. هههههههه

عذرا للخطأ في الاسم

دقيقة دقيقة بالله
يا دومة أنت من ناس شرق ؟ تمام ؟
عموديتكم تاريخيا عند السعداب تمام ؟
والمنطقة مفتوحة باتصال على البطانة تمام ؟
لكنك قلت :

Quote: وهم بدو ما عندنا بيهم اي دخل

هذا يتناقض مع حقائق الجغرافيا والتاريخ !
ورجعت بنا مرة أخرى إلى اختلافنا حول لغة ود بادي ومفرداته الشعرية !
باختصار كلامكم آخره ينسف أوله !

Quote: إلى الآن شايفكم كلكم مجلين موضوع ود الحبشي دا : كم تبعد ود الحبشي من سلوة ؟

السلام عليكم

اسمع يا محمد الحسن سليمان

جبت سيرة ود الحبشى اول مرة سكتنا ليك.
اها اتجهت شمالا مشيت الجريف وسلوة وطبقة والجكيكة قلنا
كويس الزول دا سافر ماشى للمتمة.

تانى جيت راجع لود الحبشى((ما اصلو العرق بحن))

يا زول انت عاوز ياتو ود الحبشى؟؟
الفوق ول التحت؟؟
داير نقيسا ليك بالضرع ام العود ام الحبل.

يا زول امرق من المنطقة دى.
تانى اكان شفتك حايم بجاى بكسر كرعيك المشققات ديل.
__________________

وكمان أكمل ليك غلاتك . ودبادى ما من سلوى ذاتا.
اها رأيك شنو؟؟

Quote: وكمان أكمل ليك غلاتك . ودبادى ما من سلوى ذاتا. اها رأيك شنو؟؟

لووووووووول ود محجوب عليك الله ان ما غالتوا الحبشي دا
ورنا من وين ود بادي دا ؟؟

Quote: وهم بدو ما عندنا بيهم اي دخل

محمد الحسن يا جنا ها الغزاله !!!
الكلام دا يخص حديثي عن عرب الرشايده البتلقاهم ضاربين خيامهم في خلاء قروره وانت تعرف اكثر من غيرك انها قبيله عربيه سعوديه بس فاصلهم البحر الاحمر .وبالحيل ديل عرب سعوديين ما عندنا بيهم علاقه .
يا محمد الحسن اسفه للخطا انا بقصد الرشايده وليس الذبيديه

طيب يا حبشي ما ياهو دا اتا مفيد !! . . ليه بقلوا عليك كدا !؟

ثقف المستعربين ديل . . ثقفم . . و اريتو يطمر فيهم !
و الترحيب خليهو علي انا دا - الشئ شنو !؟ عرفناك الولد البدور الشكرة ! برضو بتدور الترحيب !؟ - نديك ترحيب ، المافي شنو !؟ : مرحب بيك كتييييييييييييير
اها قصرت معاك !؟



الغنية دي ( يا دنيا ) جاتني عن طريق الغلط - غلط من النوع الحلو داك - و شبكت معاي . . جهاز البيت / العربية / و جهاز المكتب الرفعتا منو دا ذاتو* . . المافي شنو !؟
و حالة كوني اعاني من إلتواث و ما مثقف شايقي فلا عارف ليها شاعر و لا عارف البغني فيها دا منو !! . . لكن رهيييييييييبة



-------------

النسألك يا حبشي وكت الله هداك و بقيت مواطن عادي و بتتونس زي الناس - ما زي الناس شديد لكن اخير من العدم - النسألك يا اللخو انت الكيبورد ( عربي / انقليزي ) بكم عندكم هناك في مضاربكم ديك ؟! . . ابشرك . . هنا في الغربية بعشرين بس . . و قيل خمسطاشر بتلقاهو . . الا النصيحة ما اصلي
اها يا اللخو بطل فلهمة و تاني دغمس معانا بحروف عربي ساي خليك من الانقليزي !! . . دا بدورلو مشهاد . . سمح !؟

سلام يا حبشي و خلي السلاح صاحي
نمش السودان الشغيغ و نجيك
العفو فوق العافية يا حبيب
العفو و العافية يا ناس
يا ماما دوما كمان كان فوق العفو اديتينا الفاتحة ما بناباها

هيا يا ماما دومة المغزلن دي ذاتها يعني شنو لوووول

Quote: تصدقوا بالله من اشوف اسم جعفر اسماعيل

عمو جعفر الراجل الطيب دا ابو الولد الطيب / سعد الدين عبد الرحمن عارفة المعلومة دي يا ماما دومة


جيت ما لقيتك ..

يا ود محجوب
وعليكم السلام ورحمة الله
سبحان الله
في المداخلة دي كنت أريد دردقتك للبوست دا .
طول الوقت دا كنت فاكي الموضوع لبتاعين قطاع الشمال
كويس قمت جئت براك !
بجيك راجع برواقة .
شقيق الكرعين ماني ناكرو
فقد كنا نمشي حفاة إلا من نعال طبقات الحسك* الكثيف
على بطون أقدامنا حتى
إذا اشتد علينا حر الهجير في الفرناغة والرمضاء
قددنا لأقدامنا نعالا أخرى من أوراق العشر وخصفناها بسعف الدوم
--------------------

Quote: وهل قلت أن الرجل ليس من سلوة! وهل هذه النقطة أصلا خلافية ?

كيف ما خلافية يا كمال ؟
كدي راجع كلام الأخ صديق .
أنا خلني كدي تعال غالط د. ود محجوب دا !

__________
* فالانتقاش له مواسم ومناسبات

Quote: أعذرنى والله العظيم لو ما الضرورة أنا ما كتب

الشاعر سكن تاء المتكلم نطقا ثم حذفت رسما لضرورة القافية
وهذا عندي من براهين فصاحة متقدمي الشايقية وركاكة متأخريهم .

Quote: الشاعر سكن تاء المتكلم نطقا ثم حذفت رسما لضرورة القافية وهذا عندي من براهين فصاحة متقدمي الشايقية وركاكة متأخريهم

تاء المتكلم حذفت هنا نطقا ورسما ، يا محمد الحسن

وليس لضرورة القافية بل لان هذا من صميم اللهجة وطريقة الكلام ولها مثيلات كثيرة

Quote: يا سقراط إنت لسان الطير عرفته نامن تعرف الغزلنة ؟

كان لسان العصفور يا تأبط نحوا

تحياتي

معليش يا اختنا دوما دخلنا بوستك دو اذن.
لكن شايف ((المهمش)) دا حايم فى بلدنا حوامتو دى قلبى اكلنى عليها.
قلت قطع شك
ضاق ملاح (( الكداد)). هو متعلم على (( امتكشو))

Quote: ضاق ملاح (( الكداد)). هو متعلم على (( امتكشو))

قصدك :ضاق ملاح (( السبانخ)). هو متعلم على (( أم علي))

---------------
تعرف الأوراق دي علاقتي بيها ما توطدت إلا في السعودية ؟
عارف حكاية شافع المغتربين الحير حبوبته وقعد يبكي ليها في البلد:
أنا عايز سلق ؟
أنا عايز سلق ؟
والحبوبة فاكراه عايز لو أكل من بلاد برة

Quote: كيف ما خلافية يا كمال ؟ كدي راجع كلام الأخ صديق . أنا خلني كدي تعال غالط د. ود محجوب دا !

محمد الحسن انت زول لولوه ود بادي من سلوه ولا الهوبجي
ما موضوع غلاط نهائي .
اصلوا الغلاط كان في اننا فقدنا معظم ثقافه اهلنا الرحلوا من الشمال مناطق الشايقيه وسكنوا دار جعل دي
وبيقينا بين بين وشلنا كثير من الثقافه الجعليه عرضتنا رقيص رقبتنا دق دلوكتنا مفردات لغتنا النطق زاتو
ما بتكي الكلام متل اهل امي ولا بنعرف القسيبه ولا القاطوع ولا بنقول للشمامه القاعونه وما بنجيب في فرحنا فنان بالطنبور
بتذكر زواج بن خالتي طبعا هم شوايقه صر
اها نحن بنيات لابسات الطرح ومتحضرين للحفل يوم الحنه بلا جابوا الشوايقه
ودقوا الدليب اها انا قلت بيس دا فنانهم؟؟!! وصدف سمعني ابوهو وبلؤم الشوايقه داك
قال لي لا يجيبولكن الجعليين؟؟!!! بمساخه كدا .
وانا بحماقه الجعليين طوالي دورت خلف ويا بيتنا جاك زول
تاني ما شفت عرسهم داك ولا العروس شفتها الا بعد شهر العسل بزمن
يوم براها جاءت مع اخت العريس لزيارتنا .
كونه ود بادي رجع القرير واتر قبر جدو العكودابي دي ما القاعده
كونه بستعمل مفردات شايقيه برضو ماالقاعده . وانت سيد العارفين وبتاع statistics
فما معقول عشان قصيدتين لي ود بادي ولا زياره ود بادي لي قبر جدو تقول اهل المنطقه دي لا ينطبق عليهم ما قالوا صديق عبد الجبار او ما قالته دومه فيما يخص موضوع اختلاف ثقافتنا .

محمد e سليمان:

Quote: كيف ما خلافية يا كمال ؟ كدي راجع كلام الأخ صديق . أنا خلني كدي تعال غالط د. ود محجوب دا !

ولماذا أغالطه? وأنا أصلا لم أنفي أنه من سلوة !! مايهمني عموما أنه
من مناطق ولاية نهرالنيل - ديار الجعليين -يكون من ود حامد - الحقنة - البسابير .. حجرالعسل أو سلوة دي ماكانت قضيتي .... نقطتي هي إثبات أن جذوره شايقية سورابية عكودابية من القرير !وأن ثقافته وتراثه ولسانه أرتبط بثقافة منطقة المولد والمنشأ
تقول:

Quote: بعدين مفردات "عرب" و"عربي" من الأضداد تقريبا في ثقافة الشمال الشعبية . أقرب مثال عندك في قصيدة حاتم ود الدابي

:
عربي في قاموس وثقافة أهل الشمال-الشايقية تحديدا تعني البدو والرحل ومن لايملك أرض زراعية نيلية موروثة
النيل تقابله الصحراء والزراعةيقابلها الرعي والأستقرار يقابله التجول ويقال للشايقي الذي باع أرضه بقي عربي ساكت!وهناك جزء من بطن السوراب وهم شايقية- إختار التجوال والرعي فما كان أهل المنطقة الأ وأن أطلقواعليهم -عرب السوراب!
وكانت قبائل الهواوير والحسانية يأتون لديار الشايقية في فترةالجفاف ويرحلون للخلاء في موسم الخريف وكانت إقامتهم مؤقتة في بيوت من الشعر والقش ولكن وبمرور السنين أستقروا وأستوطنوا في ديار الشايقيةوتمازجوا مع سكان المنطقة وأكتسبوا ثقافتها وتراثها وتملك بعضهم الاراضي
........

Quote: ولا بنقول للشمامه القاعونه

هههههههههههه
والكريفون كيف ؟
قرفتن \قرفتناية ؟
هههههه

Quote: عربي في قاموس وثقافة أهل الشمال-الشايقية تحديدا تعني البدو والرحل ومن لايملك أرض زراعية نيلية موروثة النيل تقابله الصحراء والزراعةيقابلها الرعي والأستقرار يقابله التجول ويقال للشايقي الذي باع أرضه بقي عربي ساكت!وهناك جزء من بطن السوراب وهم شايقية- إختار التجوال والرعي فما كان أهل المنطقة الأ وأن أطلقواعليهم -عرب السوراب!

كلام سليم ميه في الميه يا كمال سمعت من ابي الذي يسكن منطقعه ود بانقا يطلق كلمه ناس فلان ديل عرب ساكت
ويقصد انهم لا يمتلكون السواقي او الاراضي النيليه .

Quote: ولماذا أغالطه? وأنا أصلا لم أنفي أنه من سلوة !

الأخ كمال عباس
ياخى بس ان حبيت اشوش شويه على اخونا محمد الحسن ز
ود بادى فعلا من سلوة ((حى الفقرا))

Quote: هيا يا ماما دومة المغزلن دي ذاتها يعني شنو لوووول

والله يا العروس ام خروس شوايقه الخرتوم ديل ما بنقدر تشرح ليهم.كدي اسالي عريسك

Quote: شنو هي المليته ... ؟؟ ممكن نستفيد منها يا دومه يا حبيبة اصلو اللوز عامله معنا كونترات ..

Quote: لموليتة نبتة ذات فوائد طبية بحسب الاعتقاد الشعبي السائدو تستخدم لعلاج بعض أمراض الجهاز الهضمي التي تسببها الطفيليات السوطية مثل ديدان القارديا.

عفاف يا حبيبه انت تبري من وجع من اللوز الله يقطعن كعبات يمسخن علي الزول الحياه .
اضافه لما قاله اخي الحبشي عن الاعتقاد بانها تعالج Giardia which is a protozoan parasite
الموليته نبات بيقوم بروس وبتكون انواع كتيره (genus Taraxacum ) بالالماني Löwenzahn ترجمتها سن الاسد عشان شكل الصفق تسمي Dandelion in English
.في ارض السار بالمانيا تؤكل كسلطه يطلق عليها بت سيشار مع انه الكلمه دي ما حصل شفتها مكتوبه لكين بحاول اكتبها حسب النطق السمعتو Bettsaecher وتعني بلل السرير لانها مدره للبول.
الصيني جابها لي قال انها تخلص الجسم من السموم .
المهم انها مره الطعم ولا اعلم ان كانت حقا تفيد في علاج التهاب اللوز
مشيت الطبيب و اخدت مضاد حيوي

Quote: كيف الكلام دا ؟ القريات عندكم في نهر النيل . كدي النسأل ولاد باسبار ؟

والله القريات ما بعرفهم لكين ناس باسبار بالحيل بعرفهم ومعظم اهل البسابير والجرافه غربهم
لكين ابدا ما بفرز الي اي مجموعه ينتمون لانه اللغه بقت نفسها وكل الصفات متشابهه
بواليد ,عكوداب , زياييد , جميلاب , توماب , مراداب ,سعداب, صلوعاب , شيخاب , حداربه , عتامنه , قطوعه , كبوتاب, فكياب ,سلافيب , رازقيه. كزاعره .مزق , كفونجه , فادنيه , حسانيه , حجاج الي اخرهم حتي من نزح واستقر بالمنطقه اخيرا كالفتافيت مثلا وهم اساسا ناصراب من جلاس تزاوجوا مع اهل المنطقه واستقروا بمنطقه ود بانقا المحطه .

Quote: النسألك يا حبشي وكت الله هداك و بقيت مواطن عادي و بتتونس زي الناس - ما زي الناس شديد لكن اخير من العدم - النسألك يا اللخو انت الكيبورد ( عربي / انقليزي ) بكم عندكم هناك في مضاربكم ديك ؟! . . ابشرك . . هنا في الغربية بعشرين بس . . و قيل خمسطاشر بتلقاهو . . الا النصيحة ما اصلي

لووووووووووووول قيقا يا اخي القالكم ليك منو انه ما مواطن عادي؟؟!!
عادي ونص وخمسه واسع تلقاه من ود الحبشي كمان
بس طالع في الكفر بي العربي بتاعو دا
بدل القفف يقول لينا الزنابيل
اتلقي هو زاتو من ود الحبشي .
لكين غايتوا محنتني يا قيقا كي بورد شنو العربي انجليزي؟؟؟!!
انا بكتب بي كي بورد انجليزي زمني دا كله
صحيح بغلط كثير في الحروف وبصلح كثير
لكين ممكن الزول يكتب بيهو
اخونا الحبشي بريد الفلهمه
عاد لو اتعلم الانجليزي
تاني البورد دا ما بشيلنا معاه

نبات الموليته
لناس البنادر

Quote: البرم بعرفة نوار الطلح ... الا الخريم دا نهي سبروق؟ اقرد؟

لووووووووووووووول يا حافظ ولدي السليط او السليت والزنابيل وعرين وعرينه رطانه عربيه فصيحه يتسعل منها الحبشي
لكين انا بقول ليك معني رطانتنا نحن
الخريم بضم الخا دا ثمار اشجار الحراز .
لسان الطير دا نبات بقوم بروس في الجروف و ممكن خلطه مع اي ملاح اخدر مفروك , صفقه رقاق اظن عشان كدي سموه لسان الطير .
السبروق هو صفق الباميه يمكن فركه ويخلط بقرون باميه خدرا
.
اقرد ولا يقرد معناتو يورق اي فرز صفق الملوخيه عن سيقانها
.يقولون لقيت ناس فلانه يقردن في خدره .

Quote: السليت والزنابيل وعرين وعرينه رطانه عربيه فصيحه

زنابيل من غالب لغة أهل أرتريا عربا وغير عرب.
فهم يقولون للقفة: زنبيل / زبيل /جنبيل .

زنابيل مصنوعه من اطارات السيارات القديمه
وتصنع من سعف النخيل ايضا

Quote: كيف الكلام دا ؟ القريات عندكم في نهر النيل . كدي النسأل ولاد باسبار ؟

انت عارف يا محمد الحسن بخصوص القريات

قابلت راجل مسن من شمال السعودية ((رويلى)) وكان عندو
فكرة عن بعض قبائل السودان أدانى معلومة عن ((القريات ))
القريات نسبة لمدينة القريات شمال السعودية فهم فى الأصل (( عنوز))خر اتجه جنوبا هاجروا لسيناء ومنها
دخلوا مصر وتقسموا لقسمين. جزء اتجه غربا واستوطن غرب الأسكندرية ويسمون ((اولاد على))
او ((ولادعة)) كما كان ينطقها والجزء الآخر اتجه جنوبا واستوطن السودان وهم ((القريات))
والله اعلم بصحة هذه الرواية.

يا ود محجوب انا ما بعرفهم القريات ديل غايتوا بالشرق اصلوا ما سمعت من ابوي قال قريات بيقولوا الشكريه والكواهله والبطاحين الهواواير الا قريات ما سمعت بيهم ممكن تدينا فكره اكثر عنهم اين يتمركزون ؟؟ وان اختلطوا بالسكان الاصليين ام مازالوا كالذبيديه ؟؟

Quote: يا ود محجوب انا ما بعرفهم القريات ديل غايتوا بالشرق اصلوا ما سمعت من ابوي قال قريات بيقولوا الشكريه والكواهله والبطاحين الهواواير الا قريات ما سمعت بيهم ممكن تدينا فكره اكثر عنهم اين يتمركزون ؟؟

تعال يا دكتور أد أختنا زينب فكرة عن عرب القريات .
لو محتاج مساعدة ننادي زميلنا بالمنبر محمد عثمان الحاج .الزول دا عمل تحليل حمض نووي فأثبتت النتائج عروبته.

Quote: تعال يا دكتور أد أختنا زينب فكرة عن عرب القريات . لو محتاج مساعدة ننادي زميلنا بالمنبر محمد عثمان الحاج .الزول دا عمل تحليل حمض نووي فأثبتت النتائج عروبته.

اها يا اخانا محمد الحسن قم علي القرايه بالاضنيين
انا ما انكرت عروبتهم لكين قلت ما بعرفهم يطرشني ما سمعت بيهم .
نوروني وروني اين يتمركزون ولو كمان جبتوا لينا صورهم يكون كويس انا شخصيا من غير تحليل حامض نووي تقاطيعي تدل علي انني لست بعربيه الحمض النووي .

لا لا يا أختنا دومة
أنا ما قلت كدا
ولا قلت محمد عثمان الحاج قرياتي
فمعذرة .
حاولت أقوقل ليك القريات
لقيت عندهم منتدى مدينة القريات وجدت فيه :

Quote: بسم الله الرحمن الرحيم تتقدم قبيلة العوازم كافة بكل المناطق بالمملكه العربيه السعوديه والكويت ومصر والسودان والأردن ودول الخليج بخالص الشكر والعرفان الى قبيلة حرب عامه .....

(:
(:

المغزلن دي على وزن المجنتر ولّ كيف؟

Quote: يا ود محجوب انا ما بعرفهم القريات ديل غايتوا بالشرق اصلوا ما سمعت من ابوي قال قريات بيقولوا الشكريه والكواهله والبطاحين الهواواير الا قريات ما سمعت بيهم ممكن تدينا فكره اكثر عنهم اين يتمركزون ؟؟ وان اختلطوا بالسكان الاصليين ام مازالوا كالذبيديه ؟؟

الأخت الكريمة دوما تحياتى

لا استغرب عدم سماعك عنهم . فوجودهم عندكم قليل . وهم من العرب
الهاجروا حديثا ((نسبيا)) يوجودون بالغرب والشرق ولكن اكثر مناطق وجودهم
غرب ام درمان. وهم اختلطوا بجميع القبائل الموجودة بالزواج مع الجعليين والشايقية
والحسانية والهواوير وغيرهم الجزء الأكبر فيهم ((تجانى الطريقة))

خلعتني يا(عمنا) الدكتور
وخليتني فسراع فسراع أفتح بروفايلك (:

تشكر كثيرا يا ود محجوب علي المعلومات عن عرب القريات
وكت اختلطوا باهل البلد الاصليين ما في عوجه
الكلام الناس المبرزه بعيده
وتخوجل في ارضنا دون الاختلاط بنا .