هزيمة قاسية.....تصريحات واهية....وجمهور كفوة

نعم..إنها هزيمة قاسية بكل المقاييس

فأهل المعسكر الاحمر لا يعترفون بأن الكرة غالب ومغلوب

يبطرون عندما يفوزون ...وكأنما يادنيا ما فيكي إلا المريخ

برغم حال المريخ...الأسوأ من راكوبة في عز الخريف

إلا أن زبانية السلطان ...يصورون لهم خلاف ما يظهر


ويصدق بقية الرهط

إلي ان ينكشف المستور


وتبدأ الخطة (ب)

في البحث عن لاعب مضروب أو صاحب تاريخ منتهي

ليهللون ويرجرون لتسجيله في الكشوفات

وقد بدأ ريسهم في التمهيد لذلك منذ الامس

وهناك ملايين الدولارات أخري في طريقها إلي أحد المواسير (الداعيا ليهم أمهم)

أو الذين تمنوا اللوتري

أو المصباح السحري

فجاءهم علاء الدين في شكل ...جمال الوالي

وقال له : شلبيك لبيك....فلوس الدولة بين يديك

لينهل الماسورة

ويهلل الطمبارة

وعند اللفة

ينكشف المستور

هزيمة قاسية

جرعها لاعبو الهلال الذين إستشعروا المسئولية ...في الوقت الحرج ولا أقول في الزمن بدل الضائع


هدفان في منتهي الروعة

للغزال الذي فقد الجميع الامل في أن يسجل في مباريات القمة

ولكنه أتي بهدف عالمي...تصويبة يسارية ارضية من خارج الخط لايجيدها الا نفر محدود

والثاني ضربة يسارية قاضية فيرست تايم بعد تمريرة من الحارس الممتاز الدعيع لرجل المباراة كاريكا

كل اللاعبين أجادوا علي غير العادة

غيرة وحماس

ولكن هناك لاعب أعتبره هو كلمة السر في لاعبي الهلال

تعود الروح عندما يلعب

يفوز الهلال عندما يلعب

لا أريد التقليل من زملاءه

ولكني أعتبره وراء كل فوز


ووجوده ضرورة قصوي

هذا اللاعب هو:

أولا مبروك لي سيد البلد وزعيما

ثانيا تحليلك لحال وتصريحات أهل المريخ كان صادقا وفي محله تماما.

ثالثا اللاعب الذي تعود معه روح الهلال كلما لعب مباراة قمة هو علاء الدين يوسف (يصمة)

رابعاوأخيرا ح نطبق ليهم الحنة إن شاء الله في الكونفدرالية.

قولوا آمين

علاء الدين يوسف

لاعب محور عالمي

لاعب يستطيع أن يحترف في الدوري الاوربي

أقولها دون مبالغة


شاهدت مباراة الامس مرة تانية بهدوء

وراقبت أداء علاء الدين يوسف

وجدت أن كل هجمات المريخ قد تكسرت عند هذا اللاعب

سواء علي الجانب الايمن ..أو الايسر

تجد علاء الدين يوسف

بوعي ...وخبرة...وموهبة عالية جدا

مما سبب الاحباط لهجوم المريخ

وأعاد الثقة لهجوم الهلال

فتمكن الداهية كامبوس بإدخال كاريكا وبشة

ليجدا دفاع المريخ وقد أصابه الدوار ومهلهل تماما

بعد أن اجهز عليه سادومبا وإمبيلي

بعد المشاوير التي تجرعها سفاري وشقيقه في قلب الدفاع

ليجهز كاريكا علي الدفاع المتهالك بباصة لمهند وهدف له


ليختم به الحلقة الاخيرة من الدورة الاولي

شكرا حسن علي المرور


وكسبت الرهان

Quote: ثالثا اللاعب الذي تعود معه روح الهلال كلما لعب مباراة قمة هو علاء الدين يوسف (يصمة

)



نعم يا صديقي...فهذا اللاعب لا يقدر بثمن


أرجو أن يحافظ عليه الهلال...

تصريحات واهية:

هي تصريحات جمال الوالي لقناة النيل الازرق بعد المباراة


فهي تصريحات ماكانت مقدمة البرنامج (الحمراء التوجه وإن حاولت التمويه بإرتداء الثوب الازرق) في حاجة للاتصال المباشر حتي تسمعها للمرة المليون من رئيس نادي المريخ

كان يكفيها إعادة أي شريط مسجل خلال الثمان سنوات الماضية ..لتسمع نفس الحديث للرجل (يمكن أن نستثني عاما واحدا هو عام الحكام الشهير من مباراة بورتسودان وحتي هدف قبضة قلق الشهير في عطبرة مرورا بذبح الهلال في مدني يوم مباراته المشهورة أيضا) في هذا العام منح الاتحاد المريخ بطولة الممتاز للمريخ حتي لا تبور بضاعته


عدا ذلك..فالوالي الغالي كل عام يكرر نفس الحديث


وعند كل هزيمة ....يوعد الجمهور بلاعب جديد قنبلة

يأتي اللاعب ويهير ما يهبر....ويطلع قنبلة دخان

وقبل أن يتذكر أحد ماقاله...يوعد بقنبله جديدة

وتخصص في هجوم نادي الهلال

نضف هجومنا نضافة

هيثم طمبل...علاء طيارة..كليتشي..وحتي وارغو الذي فكر فيه الهلال مجرد فكرة راقت له هو واستخدم عضلاته (ونحمد الله علي ذلك)


إستخدم كل أنواع المكر والدهاء والحندقة بما يمتلكه النادي من مال لإستقطاب لاعبينا

ظنا منه أن كل القصة.....مال


ولكن لأن المكر السيئ يحيق بأهلة


ولأن السر ليس في المال وحده


بارت تجارته

وهاهو بلأمس...يروج لبضاعته الكاسدة مرة أخري

وأكيد ستكون متبوعه بدعم لوجستي من الطمبارة الصحفيين الحمر


أرجو أن تكون هذه المرة حوالينا ولا علينا..وأرجو أن يكونوا قد وعوا الدروس


فحواء كرة القدم ولود.....وقدامك المونديال يا والي

بالله أبعد من أولادنا

وأرجو ألا أسمع كلمة (ولدنا) عندكم لأي من أبناء نادي الهلال

نعم عندكم المال

لكن أبعدوا من أولادنا

نحن نريد أولادنا كده...غلابة وفقرانين ..عشان يمتعونا....


نحن عارفنهم بيعانوا عندنا...لكن نحن عايزنهم كدا ...مش قالوا المعاناة تولد الابداع

بالله خلوا لينا اولادنا...عشان الدماء تجري في عروقنا

خلوا لينا أولادنا ...عشان نعرف نشتغل..وننتج...

خلوا لينا أولادنا ..وبطلوا حسادة...لو ما عشانا عشان سودانا

وقدامك المونديال بكبره...إن شاء الله تجيب ميسي

ما خصانا ...بس خلي لينا أولادنا

أقول كدا..لانو شميت في كلامك أمبارح نفس الريحة البنشمها كل سنة

إنك عايز تسكت جمهورك...بحرق حشا ناس الهلال ..بتسجيل لاعب منهم...وليس بالفوز عليهم داخل الميدان

والموضوع دا أثبت فشله...يبقي من المنطق تغييره

دا إذا فضل عندكم منطق

أما الجمهور الكفوة


هو جمهور المريخ ...بدون منازع


ودا ما رأينا برانا


دا رأي الفيفا...والكاف....وكل من يعرف كرة قدم


جمهور أي مباراة في إستاده تنتهي بطرده شر طرده

أها جمهور زي دا لو عنده كرامة تاني ما مفروض يدخل الاستاد دا نهائي

والاستاد الجميل دا (كلو قزاز كدا ) مفروض يقلبوهو فضية..

بعدين هم نفسهم جابوا لنفسهم الكفوة بأن سموا أنفسهم صفوة


جمهور كرة قدم...يبقي كلوا صفوة كيف


جمهور فيهو : الاستاذ الجامعي والطبيب..والمهندس..والموظف..والعاطل...والفاقد التربوي...وخريج السجون...والبلطجي...والحرامي...

كل ديل في إستاد واحد...تسميهم صفوة كيف..؟؟؟؟

أهو دا نوع من أنواع النفاق البيمارسها مجلس الادارة والطمبارة من الصحفييين علي جمهور ناديهم


والنتيجة

كل يوم بيطردوهم من الاستاد شر طردة

اها يكونوا صفوة كيف وهم بيتجلدوا بالكرباج كل مباراة

لا لا كدا إنتو أسأتوا لإسم صفوة


وجردتوهو

وأنا تاني أي زول بحترموا ما بصفوا بأنو صفوة..كدا بكون أسأت ليهو شديد

والحمد لله إنو الواحد تاني ما حيشوف ليهو أي واحد صفوة لمدة شهر

يلا

نشوفكم بعد المونديال


وفي الختام العفو والعافية


أخوكم

د. ياسر عبد القادر

يا دكتور ياسر...

حقو الهلال يبيع ليهم كاريكا...
والمعز...وسادومبا...وعمر بخيت...

ويوزعا علي الباقين ديل...


حالتو دي امس ديمبا باري مافي...

يا د. ياسر عبد القادر
براحة على الكفوة
مش كفاية مسخنا عليهم المونديال




لكن ما بهدلتهم!

يسلم قلمك
تحياتى

الصديق العزيز نزار حسين

Quote: حقو الهلال يبيع ليهم كاريكا... والمعز...وسادومبا...وعمر بخيت

صدقني لو راجعت موبايل الوالي الان...حتلقي علي الاقل إتصال لو ما أكثر لكل واحد من القائمة بتاعتك دي


الراجل دا نضارتو ما بشوف بيها غير لاعبي الهلال



تحياتي

الصديق : محمد النيل

Quote: براحة على الكفوة مش كفاية مسخنا عليهم المونديال

والله هم المسخوا علينا المونديل...شلاليت جوة الميدان...وكرابيج برة الميدان

الواحد مفروض يمشي يشوف ليهو حاجة تعدل مزاجو قبل المونديال


تحياتي

يا رضا مصطفي الشيخ ياخ عذذذذذذذذذذبتنا


يا تتكلم يا تخلي ضيفك يتكلم


ولا أقول ليك ...ياخ إنت جايب ضيف ليه ذاتوووو ما تتكلم براك وخلاص

وناس الجزيرة ذاتو كرهونا الكورة


كورة اوانطة رجعولنا فلوسنا

الدكتور ياسر

لك التحايا و الاهلة يحتفلون بمرمطة الوصيف

و لك التحايا و جمهور الليزراب يمارسون هوايتهم المفضلة من قذف بالحجارة عند كل خسارة

يا خوى الجماعة ديل مشكلتهم انهم اصبحوا وصمة على جبين المشجعين السودانيين
و السبب الرئيسى هو انه لم يتم معاقبتهم من قبل لجنة الانضباط التى تخشى الوالى و سطوته
و طالما انهم يعلمون انه لا عقاب فسيواصلون فى جمع الحجارة من كل شوارع ام درمان
و غايتو برضو من مصلحة البلدية هناك لانهم بيساعدوها فى نظافة الشوارع


المرة الماضية اعلن الوالى بعد بطحتى سادومبا انهم قرروا فى مجلس ادارة المريخ ان لا يلعبوا مع الهلال فى ظل تحكيم محلى

امس جاء و بلع تصريحاته و لعب لكن الظاهر كان موعود بى محاباة خاصة بعد نقض قون امبيلى الواضح و صرف ضربة الجزاء لهيثم
لكن ناس مهند و كاريكا ديل ما كلموهم بالاتفاقية دى و ماهم عارفنها عشان كدة اعادوا البطحتين بس المرة دى لمحمد كمال
و بى نفس الطريقة كل بطحة فى جهة عشان ما يحصل ليه ارتجاج فى احد الجنبات

الصديق العزيز

حيدر

Quote: يا خوى الجماعة ديل مشكلتهم انهم اصبحوا وصمة على جبين المشجعين السودانيين و السبب الرئيسى هو انه لم يتم معاقبتهم من قبل لجنة الانضباط التى تخشى الوالى و سطوته و طالما انهم يعلمون انه لا عقاب فسيواصلون فى جمع الحجارة من كل شوارع ام درمان و غايتو برضو من مصلحة البلدية هناك لانهم بيساعدوها فى نظافة الشوارع

فعلا الجماعة ديل لو بيعاقبوهم ماكان تمادوا ...بس منو البيعاقب؟؟؟؟