Post: #1
Title: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 04:31 AM
Parent: #0
مع مطلع هذا العام وأثناء تجوالنا بوسط مدينة نيويورك التجاري ومعي إحدى الصديقات العزيزات... زرنا مجمع أسواق Time Warner المشهورة والواقعة على تقاطع أكبر شارعين رئيسيين في قلب المدينة الصاخبة وهما برودويي والجادة التاسعة وخمسين عند مزلقان كولومبس الشهير.
ويطل هذا المجمع على الجهة الجنوبية للسنترال بارك... أجمل حدائق العالم العامة وأكبرها وأكثرها إزدحاما لموقعها وجمالها وتنوع أشجارها ومساحتها الواسعة والتي تمت الإستفادة منها بطريقة جعلتها خلابة المنظر يزورها أهل المدينة لممارسة مختلف الأنشطة الرياضية والترويحية من مشي وركض وتزحلج وسباحة وكرة السلة والبيسبول وكرة القدم والتنس. ويمارس عددا كبيرا من أهل نيويورك بها رياضة ركوب الدراجات الهوائية... كما يزار متحفها البحري للأسماك بها ومحمية الطيور والحيوانات البرية الرمزية.
داخل هذا المجمع تنقلنا بين المحلات التي هي أفرع لعلامات تجارية كبيرة من هيغو بوص "Hugo Boss" إلى بووس "Bose" ... ومن أرماني "A|X Armani " إلى أفيدا "Aveda" ... ولكني توقفت كثيرا عند فرع عملاق التكنلوجيا "Samsung " كانت لي عندهم وقفة طالت.
تقابلك حسناء عند المدخل بأبتسامة ساحرة مرحبة بك ومن معك... وتتمنى لكم قضاء وقت طيب داخل معرضهم المسى بـ Samsung Experience والذي تعرض فيه أحدث تكنلوجيا في العالم تصنعها شركة سامسونغ العالمية والتي أرادت لهذا المعرض أن يكون ساحة للقاء زبائنهم والإتطلاع على أرائهم مباشرة أو عبر البريدالإلكتروني والذي يطلبون منك مده لهم بكل لطافة... كما يمكنك الدخول بمسابقة إختيار عشوائي لأحد الإيميلات شهريا والفوز بأحدث جهاز يعرض بذلك الشهر... كما يتعهدون بمدك بأيميل أسبوعي أو شهري (حسب إختيارك) لإطلاعك على أحدث مايعرض أو يصنع... والأهم أنهم يطلبون رأيك مباشرة ويستمعون لإقتراحاتك بعناية فائقة ويسجلون كل ملاحظة صغيرة أو كبيرة من الزوار لهذا المعرض الدائم والمتجدد والفخم.
ونواصل...
|
Post: #2
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 04:42 AM
Parent: #1
إهتمامي إنصب جله على أحدث تلفاز صنع في العالم وهو الـ (UN55C900 (3D ذي البعد الثلاثي والذي لم يطرح في الأسواق في ذلك الحين. وهذا الجهار - الذي شاشته 55 بوصة - يعطيك صورة ثلاثية الأبعاد بألوان حقيقية ورؤية بلورية خالصة وصافية تسلب العقل مع صوت نقي متعدد الأبعاد يأتيك متوازيا مع الصورة والتي تأتي من العمق أو الأجناب بشكل هيلوغرامي بديع.
طلب مني مندوبهم أن أضع نظارة خاصة على وجهي لأتمكن من مشاهدة فلم قصير أعدته الشركة العالمية ليعطيك مزايا هذة التقنية الحديثة عن قرب في ثلاثة دقائق... وكانت هذة الدقائق عبارة عن سياحة "فشولية" ساحرة قررت بعدها شراء هذا الجهاز الغير معروف له سعرا في ذلك الوقت...
ولكم تمنيت عندها أن أكون سعيد الحظ وأفوز به في مسابقة ذاك الشهر رغم كثرة المسجلين!
خرجت منهم بعد إلحاح صديقتي لجوعها ومضينا في حالنا وأنا أردد سأشتريه سأشتريه... طال لزمن أوقصر سأشتريه
ومضت الأيام والشهور وإنشغلت بين العمل والسفر والترحال... وتواصلت الإيميلات من سامسونغ ومن عددا من الشركات التي عرضت هذا التلفاز بأسعار خيالية وصلت إلي 7000 دولار أمريكي وأخذت في النزول مسرعة إلى أن أتاني عرضامغريا من شركة Best Buy للإلكترونيات والذي عرضت فيه سعرا متدنيا إلى حد ما وصل 2400 دولار بالبيع الإيجاري والذي يسهل عليك الشراء والدفع خلال عام أو عامين بالتقسيط بلا سعر فائدة.
فهرعت أركض لمحلهم داخل أسواق كامبريدج غالاريا قرب مدينة بوسطن... ورأيت "حلمي" جاثما على أرض الواقع وعليه ديباجة سعر 3000 دولار وترددت قليلا عند رؤيتي هذا السعر... ولاحظ مندوب مبيعاتهم ذلك التردد فعرض مساعدتي مبتسما. فأخبرته بالسعر الذي وصلني عبر الإيميل! فقال لي إنه سعر خاص وأن بأمكانه منحي إياه بعد التحقق من إسمي داخل قاعدة بياناتهم... وقد كان.
سعدت عندها وأخبرت المندوب بأن هدفي هو شراء هذا التلفاز لمشاهدة تصفيات بطولة كأس العالم بجنوب أفريقيا والذي أعلنت إحدى المحطات الرياضية عندنا وبرسوم إضافية عن نقله مباشرة على نظام الـ 3D الحديث... وهذا في ذاته حدث مهم أضف عليه نهائي منقول من جنوب أفريقيا.
بادرنا في إجراءات عملية الشراء والنقل والتركيب... وعندها طلب مني مارك مسؤل المبيعات مني تحديد عدد النظارات الخاصة بمشاهدة هذا التلفاز والتي بدونها لن تستطيع المشاهدة بالمرة طالما كان الجهاز يعمل بنظام الثلاثة أبعاد وإن كان بأمكانك وضعه وظبطه على نظام الـ HDTV العادي.
ونواصل...
|
Post: #3
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 04:49 AM
Parent: #2
وسألت المندوب مستغربا: "ألا يأتي هذا التلفاز مصحوبا بعدد من النظارات؟!" فقال لي: "كلا.. فكل زبون يشتري العدد الذي يناسبه من هذة النظارات والتي يصل سعرها الواحدة إلى 150 إضافة لضرائب المبيعات".
وبما أنني كنت قد أعلنت عن رغبتي لشراء هذا الجهاز لأصدقائي الذين أملوا في مشاهدة المباريات على هذا النظام الحديث... فأتوقع أن يكون عندي من 8 إلى 10 أصدقاء مجتمعين للمشاهدة في وقت واحد... ويحتاج كل واحد منهم لأن يلبس نظارة للمشاهدة على حدة. وهذا يعني إضافة 1300 إلى 1600 دولار لقيمة الجهاز المعروضة والمخفضة ليومين فقط.
طلبت من مارك عمل تخفيض لسعر النظارات وخاصة أنني بصدد شراء 6 نظارات على الأقل منهم... فطلب مني إمهاله حتى السبت الماضي ليعود لي بالنتيجة... وفي الوقت نفسه تعهد بتجميد السعر المخفض حتى السبت موعد عودته لي بالأسعار. فقلت له أنني سأكون بنيويورك وأن بأمكانه مكالمتي بالهاتف وإعطائي النتيجة.. وفي حالة موافقتي سأعطيه الـ Go النهائي ليشحن الجهاز وليتم تركيبه يوم أمس الثلاثاء بمنزلي.
وجاء نهار السبت.. وكنت بنيويورك أعد لأمسية بالرابطة السودانية الأمريكية ببروكلين. وأتتني مكالمة مارك في منتصف النهار... وكان إعتذاره لي عميقا بدا واضحا من جملته الأولى حيث قال لي: "مستر خليفة.. لقد بزلت كل جهدي لكي أحصل لك على تخفيض مناسب ولكن يبدو أنهم لم يستجيبوا لطلبي مع الأسف... فلك مني عميق الأسف. أنا أعلم أنك ترغب في شراء هذا المرئي منذ اللحظة الأولى التي رأيتك فيها".
صمت للحظات رأيت فيها إنهيار "حلمي" بمشاهدة مباريات نهائي كاس العالم على التلفاز ثلاثي الأبعاد... وقررت أن أجد لي سبيلا آخر لمشاهدته. فقلت لمارك: "أشكرك على سعيك... فأنا متأكد من أنك بزلت كل جهدك. أعدك بزيارة متجركم خلال يوم أو يومين حالما وجدت أحد الأصدقاء ممن لديهم جهاز 3D يسمح لي بمشاهدة المباريات عنده... سأتي عندكم لشراء نظارة حتى لا أكلف صديقي - إن وجد - نظارة مكلفة لمجرد مشاهدة التلفاز عنده".
وختمت مكالمتي... ومضيت خائبا على أمري.
تحت تحت...
حاليا أفكر جادا بالسفر لجنوب أفريقيا للمشاهدة لايف... فلربما كانت أرخص سعرا!
|
Post: #4
Title: Re: مشاهدة مباريات كأس العالم على الـ 3D
Author: Tragie Mustafa
Date: 06-10-2010, 04:59 AM
Parent: #3
الفاضل محمد
مشتاقين
وكثر خيركم في بوسطن اكرمتمونا....ولم تقصروا كعادتكم....
Quote: تحت تحت...
حاليا أفكر جادا بالسفر لجنوب أفريقيا للمشاهدة لايف...
فلربما كانت أرخص سعرا! |
يا بختك...يا ريتت عندنا زمن لحاجات زي دي.
معزتي وكامل الدعوات بمتعة المشاهده.
|
Post: #8
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 05:11 AM
Parent: #4
تسلمي يا تراجي وحمدالله على سلامة عودتك!
وأغفري لي سفري منكم لنيويورك لإرتباطي مع الرابطة
| Quote: يا بختك...يا ريتت عندنا زمن لحاجات زي دي. |
يعلم الله ما زمن ولا حاجة... الحكاية كلها كيتا في النظارات الغالية دي
الله ينعلن... صنعو لينا تلفزيون ما يتشاف إلا بنظارات خاصة
يعني العندو نظارة طبية الا يشوفو بنظارتين!
دمتي يا غالية... وسلامي للأولاد....
|
Post: #6
Title: Re: مشاهدة مباريات كأس العالم على الـ 3D
Author: هواري نمر
Date: 06-10-2010, 05:03 AM
Parent: #3
| Quote: حاليا أفكر جادا بالسفر لجنوب أفريقيا للمشاهدة لايف... فلربما كانت أرخص سعرا! |
بتعملها انت عارفك!!
___
تحياتي يا ابوحميد
ومشتاقين ياخي..
|
Post: #7
Title: Re: مشاهدة مباريات كأس العالم على الـ 3D
Author: هواري نمر
Date: 06-10-2010, 05:07 AM
Parent: #6
| Quote: وبما أنني كنت قد أعلنت عن رغبتي لشراء هذا الجهاز لأصدقائي الذين أملوا في مشاهدة المباريات على هذا النظام الحديث... فأتوقع أن يكون عندي من 8 إلى 10 أصدقاء مجتمعين للمشاهدة في وقت واحد... ويحتاج كل واحد منهم لأن يلبس نظارة للمشاهدة على حدة. وهذا يعني إضافة 1300 إلى 1600 دولار لقيمة الجهاز المعروضة والمخفضة ليومين فقط. |
غايتو انا بجيب معاي النضارة,عشان بعدين (كلو واحد يخلي بالو من نضاراته)
__
مبروووك ليكم الانتصار علي (الليكرز) في عقر داره
يا جنابو:
بوسطن يوسطن و ان طــــال السفر!!
(بالله ختنا في بالك)
|
Post: #9
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 05:33 AM
Parent: #7
أووووه هجم النمر هواري...
سلامات يا غالي وتحيات خالصة من جوة البطن!
| Quote: بتعملها انت عارفك!! |
يا سيدي أخوك متابع للتكنلوجيا... بس ذي ده عمري ما شفتو!!!
| Quote: غايتو انا بجيب معاي النضارة,عشان بعدين (كلو واحد يخلي بالو من نضاراته) |
ما ده ياهو زاتو الأنا قلتو لمارك!
أنا بجيب ليهم التلفزيون والفشار والمشاريب
وحرم أضبح ليهم علب الفول...
بس هم الليجيبو نظاراتهم معاهم... وكل واحد يحافظ على نظارته ويوسمها
| Quote: مبروووك ليكم الانتصار علي (الليكرز) في عقر داره |
هم غلبو؟
كلنا راجين بكرة الخميس| Quote: بوسطن يوسطن و ان طــــال السفر!! |
بوسطن كلها راجياك... وحا نعمل ليك طابور شرف
بس إنت تعال جاي
تعرف تراجي جاتنا من يومين... عملنا ليها طابور شرف في المطار
وإنتظرناها 4 ساعات... عز المطرة والعواصف
أها مرقت من المطار وركبت ليها تاكسي... وإحنا قال راجين
طبعا هي إفتكرت إنو بعد طيارتها إتأخرت نحنا مشينا
قامت مرقت من الطيارة وخرجت بباب المغادرة
ودمت يا هواري...
|
Post: #10
Title: Re: مشاهدة مباريات كأس العالم على الـ 3D
Author: هواري نمر
Date: 06-10-2010, 05:42 AM
Parent: #9
Quote: بوسطن كلها راجياك... وحا نعمل ليك طابور شرف
بس إنت تعال جاي
|
تسلم يا ابوحميد
لكن بالجد أنا جــــاي (ذهاب) بس!!
نويت افك درب بلد الكاوبوي دي ياخي
|
Post: #11
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 06:19 AM
Parent: #10
حبابك... حبابك ألف
أكان كده نظارتك علي
تعال يا أخوي وخليك من حيشان للبقر دي
أكيد حا تسعدك البلد ويطيب بك المكان
وتســلم...
|
Post: #12
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 03:33 PM
Parent: #11
أدعو الجميع للتعرف أكثر على هذة التقنية الحديثة
|
Post: #13
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 03:35 PM
Parent: #12
لاحظو الفرق بين الشوف بالنظارات وعدمه
|
Post: #14
Title: Re: مشاهدة مباريات كأس العالم على الـ 3D
Author: داليا الكباشى
Date: 06-10-2010, 04:54 PM
Parent: #13
احم احم ..
يا اخوانا ممكن الواحد (يتهور) ويقول ليكم شوفوا لينا معاكم (نضاره),
يمكن نجيكم بهناك عشان الـ نايس كمبني دي ..
|
Post: #15
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 05:12 PM
Parent: #14
حبابك يا دكتورة داليا...
Our company تكتمل بوجودكم معانا... وحرم نظارتك حاضرة من حسع... بس جيبي معاك بنبر لتمبس
وبالمناسبة التقنية دي وصلت البلد ولا لع؟
........
لقد إحترمت وجهة نظرك رغم إختلافي معك في الخروج عن الإجماع في قضية الإضراب
لكن كلامك كان مرتب فيهو حجة ومنطق وصراحة... لقضية حساسة جدا
فالأختلاف فيه قوة لمن ملك المنطق ومن يعايش الواقع بشفافية وتجرد
ربنا يحل المشاكل... ويجعل في إيديكم الشفاء
ودمتي يا دكتورة...
|
Post: #16
Title: Re: مشاهدة مباريات كأس العالم على الـ 3D
Author: عزيز عيسى
Date: 06-10-2010, 05:22 PM
Parent: #13
| Quote: صنعو لينا تلفزيون ما يتشاف إلا بنظارات خاصة |
ود الخليفة كيف حالك مع بوسطن..
قبل شهر كنت في مدينة أوستن لزيارة أخ صديق عزيز لمدة يومين..
تحدثنا عن التلفزيون 3D الجديد وقال لي تعال نروح على معرض Samsung
وفعلا دخلنا المحل وسألنا عن التلفزيون الجديد ورحبوا بنا آخر
ترحيب تماما كما ذكرت ثم قادنا الموظف الى مكان مخصص به التلفزيون 3M
وسلمنا نظرات خاصة وطلب منا الجلوس على مقاعد مخصصة لمشاهدة العرض على
التلفزيون ثلاثي الأبعاد..
فعلا وجدنا أنا وصديقي صعوبة في لبس النظارات الخاصة لأننا نلبس نظرات طبية
وليس هنالك حل غير أن نخلع النظارات الطبية ونضع بدلا عنها نظاراتهم
الخاصة حتى نستطيع مشاهدة الفيلم.. عرضوا علينا مبارة كرة قدم (طبعا من
باب الإغراء) إستمتعنا جدا بالمشاهدة في طريقة التصوير والعرض.
طبعا في البداية الشركة تحاول تغري الزبائن بأي شكل من الأشكال وترفع سعر
الجهاز وملحقاته من أدوات بأسعار خيالية حتى تستطيع إيراد أرباح أكثر من
مبيعات الجهاز وبأسرع فرصة ممكنة قبل أن يغمر الجهاز الأسواق وتحدث المنافسة
وبالتالي سيرخص سعره ربما يصل الى ربع السعر المعروض حاليًا.
في رأيي لو إتجهت الشركة الى عمل شاشة إضافية بنفس مواصفات النظارة وتركيبها
على شاشة الجهاز الأصلية سيكون ذلك أفضل وبالتالي يستطيع الجميع مشاهدة
التلفزيون دون الحاجة الى نظارة.
|
Post: #17
Title: Re: مشاهدة مباريات كأس العالم على الـ 3D
Author: عزيز عيسى
Date: 06-10-2010, 05:29 PM
Parent: #16
Quote: لكن بالجد أنا جــــاي (ذهاب) بس!!
نويت افك درب بلد الكاوبوي دي ياخي |
أفو.. دا كلام شنو يا هواري؟!!!!
ياخي القرار دا ما سمعنا بيهو حتى الآن..
مالك الحصل ليك شنو.. بلدنا ما عجبتك؟
صدقني بوسطن دي (عجاجة) ثلجية واحدة تخليك
تفكر تتخارج منها..
وبعدين هيوستن دي إنت ما عارف سرها ساكت..
البيشرب مويتها ويعيش فيها أكثر من سنة
ما بيقدر يغادرها ويبعد عنها نهائي..
لابد أن يعود إليها ولو طال السفر.
أسمع نصيحة أخوك.. خليك في هيوستن وأنسى
الشمال الشرقي نهائيا.
والمثل بيقول: أسأل مجرب...
أو أسأل أخونا محمد الجعلي بيدك النجيضة.
|
Post: #18
Title: Re: مشاهدة مباريات كأس العالم على الـ 3D
Author: smart_ana2001
Date: 06-10-2010, 05:41 PM
سلامات الاخ محمد.
معليش.....فاهمة شعورك تماما. امس حصلت لى حاجه قريبة من كده. كميرا بعد ما وفرت سعرفها عرفت انى محتاجه معاها لعدسة ب الف دولار.
التلفزيونات دى تصبر عليها سنة واحدة بس و ح تبقى ب 1000 دولار او اقل.
معليش...تانى. و كاس عالم سعيد.
________________________________
و ابعد من هيستون
|
Post: #20
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 05:55 PM
Parent: #18
الغزيزة الإسمارت.... سلامات
يعني نصبر لكاس العالم الجاي...
وتفتكري الوكت داك ما حيطلعو لينا بالـ 4D؟
يا ستي كان عدستك بألف كمرتك تكون بي كم؟
أتاريني ما براي...
بالله وريني رأيك في المرئي ده كان شفتيهو
دمتي إسمارت مننا...
|
Post: #21
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 06:11 PM
عزيزنا...
الزول ده يا عزيز بيكون هسع نايم
والمشردو منكم نوم النهارية ده
والرطوبة العالية
قال قال لواحد في السودان: الرطوبة عاليا عندنا
رد ليهو: بختكم مرطبين!
بوسطن جميلة بس It is not my cup of tea
أنا نيويوركي المولد بعد بري
والله لفيت نص العالم بس ذي طعم نيويورك دي ما لقيت
صدقني بوسطن حا تنفع مع هواري لأنها مرتبة ونظيفة متله
تحياتي لهيوستن وأهلها المعاك
مع مودتي...
|
Post: #19
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 05:45 PM
Parent: #16
الغزيز عزيز مرحبابك...
والحمد لله لقيت ليا زولا شاف وعرف
طبعا الجهاز أسعاره نزلت في الأسواق
أها البنزل لينا أسعار النظارات اللعينة دي شنو؟
بصراحة التلفزيون ده فيهو تقنية عاليا واغرب حاجة إنو خفيف
وممكن يتعلق ذي برواز الصور...
والراجل قال ليا إنهم بيحاولوا يعملوا ليهم شاشة تحل محل النظارات
ودي محتاجة ليها زمن بس ما مستبعدة
الناس دي بعد نظام الهيلوغرافي داك والبيجيب ليك الزول جنبك
وتشوفو يتكلم معاك (بس ما بتقدر تهبشو) ما بغلبهم شئ
وتسلم يالعزيز...
|
Post: #22
Title: Re: مشاهدة مباريات كأس العالم على الـ 3D
Author: jini
Date: 06-10-2010, 07:11 PM
Parent: #19
سوى اندم ماتخلى تندم.!
انت محظوظ يا اخوى الله مرقك من القرارات السريعة
فى التسويق والاقتصاد فى مصطلح Buyer's /Purchase remorse
او ما يغرف باحساس المشترى بالندم عقب شرائه لسلعة غالية ولا يمكن التراجع عن شراءها كالشقة والمنزل والسيارة
وبالنسبة لامثالى زى التلفزيون دا وانا ندم المشترى دا اتورطت فيه لثلاث اسباب مجتمعة اولا لخوفى على صحة ابنى وثانيا لاحساسى بالتبذير وثالث لاحساسى باننى كنت صيدا سهلا لبائع محترف برغم اننى ابن كار واحد وضليع (شكار نفسه ابليس)!
القصة تكمن فى ان ابنى الاول عانى من التهاب فيروسي فى الرئة شخصه الدكتور وهو للاسف سودانى بانه حساسية وتم ادخاله للمستشفى لمدة يومين دفعت فيهما
5500 ريال سعودى يعنى قرابة 1500 دولار!
وعقب حروجه من المستشفى باسبوع زارنى بائع بتوصية من ابن عم لى عارضا على مكنسة امريكية تعمل بفلتر مائى تقوم بالكنس والغسيل للموكيت والبلاط والستائر والكنب والتعقيم والتعطير لجو المنزل وبسعر 2200 دولا تقريبا وباقساط شهرية لمدة سنة قبلعت الطعم قلت يا ولد انت فى يومين دفعت 1500 دولارمن اجل صحة ضناك ويمكن الموضوع يتكرر ما دام حساسية!
وبعد داك اتضح ان الموضوع التهاب فيروسي وبقينا ننضف المكنسة الامريكية من الغبار بواسطة مكنسة كورية لان تركيب المكنسة الامريكية وفكها زى الكربرتر!
قربت اقول للمدام ليه ما حلفت على لانها كان حاضرة الديمونستريشن باعتبارها طرف معنى!
غايتو بقى على المثل الجاتك فى مالك سامحتك!
غايتو محصل القسط الشهرى لو كان عندى ###### كنت فكيتو فيهو!
|
Post: #23
Title: Re: مشاهدة مباريات كأس العالم على الـ 3D
Author: jini
Date: 06-10-2010, 07:36 PM
Parent: #22
ودى صورة اللغم (المكنسة) قبل انفجاره فى جنى!
جنى
|
Post: #25
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 08:04 PM
Parent: #23
| Quote: ودى صورة اللغم (المكنسة)بعد انفجاره فى جنى! |
إنتا يا جني النصيبة دي ماليا نشارة (وش ملصق بيضحك)؟
إشتريتها متين؟ وهل الورنتيي صالحة؟
أكان ليها أقل من سنة مفروض عليهم يصلحوها أول يغيروها ليك
لو كانت أمريكية وبالسعر ده... رسل ليا أوراقها بالإيميل
وإنشاء أساعدك من هنا مع شركتها المصنعة
وتســلم...
|
Post: #24
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 07:56 PM
Parent: #22
حيدر أخوي سلامات...
أخوك ليهو ستة شهور بحسب فيها يمين وشمال
التلفزيون ده يعلم الله بيستاهل... والماشافو أتمنى إنه يشوفو
وبصراحة كدة الفرجة فيهو متعة ... والغالي بغلاتو!
حمد الله على سلامة الوليد وربنا يعينكم ويصبركم ويديكم الأجر
وشكرن على النصيحة...
بس تعرف عندنا هنا بيدوك شهر تجرب الحاجة
وكان ما عجبتك ترجعها ليهم من غير سوعالا واحد
واحد صاحبي قرأ البوست ده ضرب ليا تلفون وقال ليا جبيبو ورجعو ليهم نهاية الشهر
وطبعا المباريات بتنتهي بعد شهر كامل...
أها قلتا ليهو بترضى ليا أكون ذي بعض الناس البيشترو البدل والفساتين يقشروا بيهم ليوم واحد ويرجعوها المحل!
أها المحل يختها في الـ clearance ... بعدها يجو يشتروها بـ 60 ل 80 في المية أرخص!
أنا بحب التمحيص والتفحيص عند تسوقي... والحمد لله محظوظ فيهو
أمبارح إشتريت ليا طباعة HP ليزر بالألوان جديدة بـ 75 دولار جديدة لنج (سعرها الأصلي 299 دولار)
من محل جنب مكتبي متخصص في شراء وبيع المعدات المكتبية والمكاتب من الشركات المجددة والخارجة عن البيزينس
ومعاها بالمناسبة مروحة فلتر لتنقية الهواء جديدة أداني ليها فوق البيعة بخمسة دولارات
قال ليا لما تخت الفلتر ما بتشتغل... وصلتا البيت وختيت الفلتر إشتغلت تش
وتعرف لو في طريقة أشحنها ليك للولد لأنها بتنفعه... بس رسل ليا عنوانك البريدي على الماسنجر
بالمناسبة جاتكم التلفزيونات الـ 3D في السعودية ولا لع؟
معزتي ليك وللأولاد...
|
Post: #26
Title: Re: مشاهدة مباريات كأس العالم على الـ 3D
Author: أسامة البلال
Date: 06-10-2010, 08:24 PM
Parent: #24
سلام محمد يس
فعلا نقلة كبيرة وخطيرة في عالم صورة التلفزيون. لقد بهرتني صورة ال 3D في فلم AVATAR عشان كدا الواحد منتظر لحدي ما التلفزيون 3D سعرو ينزل لي ألف دولار لأنو أسي نازل في اسواق النرويج سامسونج 50 بوصة بي 5 الاف دولار لكن بعد سنة اكيد حيكون في متناول الأيدي
|
Post: #27
Title: Re: مشاهدة مباريات كأس العالم على الـ 3D
Author: smart_ana2001
Date: 06-10-2010, 08:33 PM
Parent: #26
جنى ..دى فولترن عديل كده!!!
و فعلا الجاتك فى مالك سامحتك....
الاخ محمد...محلات الادوات الكربية ذى بست باى بيكونوا خاتين بالهم للناس البرجعوا الحجات بعد ما يشيلوها....و بيختوك فى حاجه ذى بلاك لست
ما عارفه ممكن يعملوا بيها شنو...لكن اظن ان عندهم الحق انهم ما يرجعوا حاجه لو ما عاوزين.
و عموما حركة الناس تشيل حاجه تستعملها و بعدين ترجعها دى حركة ما محترمة....و من غشنا ليس منا...
|
Post: #29
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 09:22 PM
Parent: #27
| Quote: عموما حركة الناس تشيل حاجه تستعملها و بعدين ترجعها دى حركة ما محترمة.... |
تعرفي يا سمارت أنا بستاء جدا من العادة القبيحة دي
وآخر حاجة أعملها في الدنيا دي إني أرجع ليا حاجة إستعملتها وما فيها عيب
زمان أشتريت الماجيك جاك (التلفون الأونلاين) وحاولتا أرجعو ليهم لانو زمان كان فيهو مشاكل
أها أدوني رقم تاني إضافي وعضوية سنة مجاني... حسع شغال معاي كويس
بالمناسبة...
هل لقيتي ليك طريقة تشوفي وقفة المونديال الشغالة لايف؟
أنا بتفرج فبهاعلى الـ ESPN2... قبل دقائق غنت أليشا كنغ نيويورك نيويورك
بعد شوية جاية شكيرا
مع مودتي...
|
Post: #28
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 09:02 PM
Parent: #26
حباب البلال أسامة...
تعرف يا باشمهندس أسعار التلفزيونات دي ملحوقة وبتنزل بكرة أو بعده
أنا في النضارات... البنقصا شنو؟
سعيدون بوصوله ليكم في البنيلوكس... إنا الله سعره يخف قبل بياتكم الشتوي
باقي ليا إنه عندكم بيصبح Must ....
وبعد طلوع الشمس عندكم حا تلقو الـ 4D راجيكم... وهلما جرى
دمت يا عزيزي...
|
Post: #30
Title: Re: مشاهدة مباريات كأس العالم على الـ 3D
Author: عزيز عيسى
Date: 06-10-2010, 09:57 PM
Parent: #28
ود الخليفة.. ما تنسى بالنسبة للأجهزة الغالية مثل الـ 3D
لو إشتريتو وتحاول ترجعه بعد شهر ما حيرجعوه ليك إلا يكون
فيهو عيب.. ولو فيهو عيب سيستبدل بجهاز آخر إذا تأكدوا
بأن إصلاحه سيتطلب وقت طويل.
|
Post: #33
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 10:57 PM
Parent: #30
Quote: لو إشتريتو وتحاول ترجعه بعد شهر ما حيرجعوه ليك إلا يكون
فيهو عيب.. |
عزيزي العزيز...
تعرف إذا إشتريت التلفزيون ده ما أظني مرجعو ليهم
يا أخي صورة رهيبة وصوت واضح... أنا شفتا لي حديقة فيهو
يعلم الله جنة بس... تقول الناس ديل بيدوك شئ طبيعي
أنا عارف إنو كلامي كتييير في الحتة دي... لكن من شاف ليس كمن سمع
مع مودتي...
|
Post: #31
Title: Re: مشاهدة مباريات كأس العالم على الـ 3D
Author: smart_ana2001
Date: 06-10-2010, 10:01 PM
Parent: #28
Quote: هل لقيتي ليك طريقة تشوفي وقفة المونديال الشغالة لايف؟
أنا بتفرج فبهاعلى الـ ESPN2... قبل دقائق غنت أليشا كنغ نيويورك نيويورك
بعد شوية جاية شكيرا |
مشيت البيت حضرت جزء من الحفل و رجعت الشغل تانى. (البيت من الشغل 15 دقيقة)
سبت اليشا كيز بتغنى و مرقت....sad, right? C
|
Post: #32
Title: Re: مشاهدة مباريات كأس العالم على الـ 3D
Author: jini
Date: 06-10-2010, 10:12 PM
Parent: #31
Quote:
إنتا يا جني النصيبة دي ماليا نشارة (وش ملصق بيضحك)؟
إشتريتها متين؟ وهل الورنتيي صالحة؟
أكان ليها أقل من سنة مفروض عليهم يصلحوها أول يغيروها ليك
لو كانت أمريكية وبالسعر ده... رسل ليا أوراقها بالإيميل
وإنشاء أساعدك من هنا مع شركتها المصنعة
وتســلم... |
جست كيدينق اوفر ماى سيلف
هى شغالة والضمان بتجدد كل تلاتة سنوات لخمسة مرات يعنى اكتر من الجواز السودانى
بقصد انه بتكون مرتبة لمن يبيعوها ليك وبتفككها فى الحالة التانية يعنى عشان تفككها وتربطها تحتاج لى اجازتك السنوية!
اسمارت ازيك وازى اسرتك الصغيرة
جنى
|
Post: #35
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 11:17 PM
Parent: #32
الحمد لله يا جني... وقت بقت على الفك والتركيب يبقى على أقل من مهلتك
قول ليا أصلو الواحد ماشي يحارب
زمان في الكديت في القديمة فزت بمسابقة الفك والتركيب للبندقية أبوعشرة
عمك الصول بابكر قال ليهم الزعيم ده (اللهو أنا) يدو خفيفة!
بالله شوف النصيبة دي عريض كيف
وتســلم...
...............
خارج النص:
عليك الله خفف نفسك شوية مع صاحبي العزيز
|
Post: #34
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-10-2010, 11:05 PM
Parent: #31
يا إسمارت إتخيلي أخوك بيشاهد ليهو مبارة على الـ 3D
أو بيتفرج على الوقفة اليوم الفيها غنايين من كل العالم
بيغنو Oh Africa أو Viva Africa
يا أخي دي متعة والله
من جنوب أفريقيا الكانت عنوان للعنصرية البغيضة
لجنوب أفريقيا الجمعت كل الألوان في هارموني بديع
!Oh Africa
|
Post: #36
Title: Re: مشاهدة مباريات كأس العالم على الـ 3D
Author: smart_ana2001
Date: 06-11-2010, 00:44 AM
Parent: #34
تسلم يا جنى و شكرا على السؤال. كويسين نحمد الله. بس الصيف جاء و بدات الغلبة. الناس ديل ما عاوزيين يقعدوا فى البيت كلو كلو. و متلتلنى معاهم.
عارف يا محمد ال 3D ح يخلى المابيحب يحضر تلفزيون يحب التلفزيون.
حقيقى انا ما جربت واحد (حتى الان). و الفكرة انو انا و بعلى بنحب الانترتينمت و التكلنوجيا جدا. لكن ابدا ما بنشترى الجيل الاول من اى شئ. الجيل الاول دائما فيه مشاكل و غالى جدا. بنرجى الجيل التانى ذى ما عملنا فى ال Xbox360 و الاى فون و ح نعمل فى الiPad . عشان كده اتفقنا اننا ما ح نعاين حتى لواحد فى بست باى. امس كنا هنال (عشان الكاميرا) و ما مرينا حتى بحتة التلفزيونات
كوربرت امريكا دى عاوزه تنهب قروشنا بس. طول بالك....و ما ح تندم.
|
Post: #37
Title: Re: مشاهدة مباريات كأس العالم على الـ 3D
Author: Mohamed Yassin Khalifa
Date: 06-11-2010, 06:51 AM
Parent: #36
| Quote: حقيقى انا ما جربت واحد (حتى الان). |
أكان كده تلات أرباع عمرك ضايع!
بالله عليك أمشي مع الباشمهندس لأقرب محل إلكترونيات
وجربو البتاع ده... وتعالي أدينا رأيك
دا كان ما أشتريتوهو بأعلى سعر
والمرة فتشي على واحد فليبس ذي ده:
وتسلمي...
|
|