Post: #1
Title: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 12:04 PM
Parent: #0
إلى التي في ماليزيا ..
تور الله الأنطح .. أنا ..
و هذا سلامٌ عليك .
......
تعمدتُ ذلك أظنني ، أن أتبعها من رواقٍ لصالةٍ ففناءٍ ففسحةٍ من الأرض . ثم لما تعِبَت من إلحاحي الصموت وقفتْ فقالتْ : و بعدين معاك إنت كمان ؟؟ قلتُ و أنا لايووقاً كما يجب ، و انتهازيا : شاي .. تشربي شاي ؟؟ باللبن .
أجابت في تأففٍ حلوٍ تعمدته : شاي وين الساعة تسعة بالليل ده كمان ؟ ..
و كنتُ بعينين حمراوين لا تشيان بالقطع بأن المواطن الشعث المريب المنتصب أمامها هو نوعٌ من الخلق قد يشرب الشاي ليلاً . لكني أصررتُ على الوقوف محدقاً إليها فيما يشبه التوسل العنيد .
ذاك الشاي شربته معها أمسيتئذٍ ، و في أمسيات العمر كله من بعد .
و لأنتِ تشبهينها يا حلوتي في شيء .. ما زلت لا أعرف كنهاً له .. لكنه هناك ، عندك .
......
- أتعرفين .. تفرستك يوماً . إختلستُ ذلك حتى لا ترميني بجملتك الطفولية الوقحة : عيونك بدون نضارة بيخوفوني .
أنت جميلة كما يُتَمنى ،
لم تسمعي مني ذلك منذ كَمْ ؟؟! .. حسناً فأنتِ كذلك . زولة جميلة .
و أنا .. تور الله الأنطح أنْ لم أسمعكيها -
......
singing bar maids كان فيلماً يُعرض في سينما النيل الأزرق ، نويناه من آخر أحياء المقرن و جئناه راجلين .
قال صاحبي العارف : فيهو زولة تقطع القلب .. و غناية شديد .
فبناءً عليه دعوتها : هي لسماع الغناء ، و أنا لقطعان القلب .
......
( أتذكرك تغنين : " يا حبيب ورد الأماني الحلوة في أعماقي فتّتتتتح " .. فيتفتح للدنيا أكمام وردها و ارتعش أنا )
في غربتيَ الأولي - بعد الحب - تفرست في تلك الأغنية التي علكتيها نهارات رفقتنا و لياليها .. كلما التقينا أوغلت أنا في العُته .. فتخرجيني منه بـ: ( ورد الأماني الحلوة في أعماقي فتتتتتح ) .. فأفتح .
في فعلان وردي للغنوة تلك تفرست - و كانت ملامحك تحوطها كلما تفرستُ .. و عليها تسّاقط ، حتى فتستشريها و أصبح بكما جميلاً -
وردي يقول : ( و الزمن ما أظنو بعدك إنت يرجع تاني يجرح ) .. وردي هذا فكي ..!
إذ كيف يتفق أن أعود مساءات غربتي كلها غريبٌ لغرفة رقيعة في بلدٍ أجرد أغرب ، و بقلبي سقم الدنيا .. ثم أستحضر وردي فأصبح بني آدماً صحيحا ؟؟
......
في سينما النيل الأزرق ازدردنا مساءذاك شطائراً من الباسطرمة الباردة ، و شربنا معاً من ذات زجاجة البيزيانوس الوحيدة .
دفعت ثلاثة و عشرون قرشاً لليلةٍ من رفقةٍ رفيقة و سينما و غناء و باسطرمة باردة ، تبقى معي قرشان من بعدها ، هي حُتراب آخر طرادة من بقية البيرسري . بقيتا خميرة في جيبة بنطالي الوحيد .
قرشان من النحاس الأحمر ..
أتذكر كيف كنا صغاراً نجعله نحاساً أصفر لامعاً بدعكه على شق ليمونة .. فيعود يبرق ، ما يجعلنا نستكثره علي المقايضة بأيما سلعة في دكاكين الحي القاتمات قائماتٍ هناك في الديم .. باقياتٍ على مسكنتها الأبدية .
نرجع لكلامنا .. هل قلت " حب " ؟؟ ..
حسناً ، لم يكن ذلك اسمه ليلتها ، أو فلنقل بأنيَ ما كنت استشعرت ذلك بعد .. فكبُر عليّ أن أسميه إذن .
و لا حتى لعبد العظيم حين سألني في لؤم عن : أها .. كيف ؟ . فاكتفيت بـ : زولة لذيذة .. جنها ضحك .
- لكنني أعرف الآن أنه كان كذلك . عشقٌ صغيرٌ حلو . ولدتني به أمي .. حبٌ كوحمةٍ في القلب -
تقدمنا عبد العظيم ليلتها و المشوار ما يزال ممتداً من عند النيل الأزرق حتى المقرن قطعناه مشياً بين شوارع الخرطوم و الأزقة و الظلمة و الكهارب .
يا عبد العظيم ، تعرف !! .. وددت لو أنني احتضنتها و هي تشرق ضحكاً على تصويت « سفنجتك « الحمراء الثقيلة ( القمر بوبا ) ، فردتها الشمال يا صاحبي .. هه .
لم تكتفِ قدمك بقتلي من فداحة عفونة رائحتها كلما تخالفنا السرير الحديدي الوحيد .. قدماك عند وجهي و قدماي عند وجهك و بيننا الغناء و الكلام . أشهد أننا تكلمنا عن كلما شيء .. من أول العرقي الطيب عند عشة ووكر و حتي فلسفة كانط .. و المادية الجدلية و بعكوكات البريسترويكا و خطل خطابات الرئيس القائد الشهرية و مكاشفاته المضحكات . أفدحت الآن في الشطط ياخي ..
أنا أكره سفنجنتك القمر بوبا هذه .. كلما دعستَ عليها أخرجت صوتاً غريباً فرياً .
تضحك هي و كفها حرزٌ ألمها في كفي و لها أعتصر .. فتنتقل إليّ نوبة الضحك . تتوقف أنت عن تقدمنا - يا معقد يا عبد العظيم - ملتفتٌ لنا و بك حمق لذيذ : هي هي هي هي يا كبير ؟
منذها و أنا أحب الليل برفقتها . حلوٌ هو الليل حين تمزجه ضحكاتها و البراءة في أسئلتها المشاترات .
......
يا حلوة .. أنا تور الله الأنطح هنا ..
و هذا الكلام إليك .
......
سوف أعودك حين تليل ..
أنا ممتليء الآن برهق الدنيا .. و الشوق .
|
Post: #2
Title: Re: تور الله الأنطح أنا .. و لأنتِ حبيبتي
Author: الصادق صديق سلمان
Date: 06-08-2010, 12:10 PM
Parent: #1
ياعمدة
| Quote: أنت جميلة كما يُتَمنى ، |
إذاً هي تستاهل وتستحق!!!!!!!
الصادق
|
Post: #25
Title: Re: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 08:54 PM
Parent: #2
يسعد مسا الصادق ..
منذ سنوات و هي تستحق يا صاحبي ..
أنا المطموس في نظري و مليس ..
أكعب حاجة أن تمسك عليك مشاعرك , و ألا تجعلها تندلق لمن يهدهدها و يتبتب ..
مسك المشاعر شين , و بيدخلك في ندامة .
أسألني أنا .
تحيات يا صاحب .
|
Post: #3
Title: Re: تور الله الأنطح أنا .. و لأنتِ حبيبتي
Author: ندى عثمان حسن
Date: 06-08-2010, 12:14 PM
Parent: #1
| Quote: إذ كيف يتفق أن أعود مساءات غربتي كلها غريبٌ لغرفة رقيعة في بلدٍ أجرد أغرب > و بقلبي سقم الدنيا |
| Quote: أنا ممتليء الآن برهق الدنيا .. و الشوق |
.
سلامو مُُعظّم ياجنابو.
|
Post: #4
Title: Re: تور الله الأنطح أنا .. و لأنتِ حبيبتي
Author: طارق جبريل
Date: 06-08-2010, 12:18 PM
Parent: #3
غايتو وكتين تكون رايق بتبَدِع
|
Post: #29
Title: Re: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 09:29 PM
Parent: #4
زولي اللميض .. أماني مشتاقلك .
يعلم الله آآطارق أسم مزاج واحد يخربني .. و الروقة ياحليلا .
مزاج فوق كم و القيامي الرابطي متحمدانا بكان روّحنا ؟؟
شوف الدنيي دي مسيخي كيفن و الدكاترة قع يبشتنوهم جنس البشتني دي ..
و بهنوك العيانين يا يابا اريتو حالهم حال العدو .. و البنوت كتلوهن في قرايتن , و شفع الملجا ماتوا من المغسي ..
و الشوارع تملا و تفضي بالغبيني و المغبونين ..
الشحاتين ما يدوك الدرب .. البلد وكيلك الله مكنكشي بس في شوية خجلي , إما كدي كان بابورنا صفر و قرعاتنا من الفقر يتطاقشن ..
و هم .. الله يعلم مطنبجين حلاة طنبجي .. قادر الله . و نضاف آآآطارق متمرين و تريانين بس العروس . ماكلين شاربين راكبين متفنكهين و يا دنيي مافيك إلانا .
أكنك راعي كدي يمين شمال .. كضاب إن لقيتلك راكوبي تتشكر في الخريف ..
ناس الغرب حالهم أخير منو سكن الدوكي داك في كعوبيتو .. و الجنوب شال مخلاتو ختاها فوق كتيفو و أدانا قفاهو ..
الشرق داك خلو ساكت .. الله بس من جودو و كرمو خاليهم ماسكين خشومهم و يراعو في الخمج .
و في الشماليي دي , الله يخليلينا بحر النيل غايتو .. إن ما هو , كان واطاتنا أصبحت .
و تلعلع الحيكومي لي يوم الليلي في الفارغة و مقدودي .. كان الهوا يشيل من البلاط شي ..
و ناسك الطيويرات الفي الاحزاب ديلاك سجم رمادهم ده ما قع يسووهو .. بلا النضمي اب شُمارةً منصولة .
هسه الجاب الكلام ده شنو ؟
و أنا حالف يمين آآآطارق تاني بس بت ام روحي دي ..
قت طـظ في السياسي و في الكلام الفقُر و في الهترشة و في الكواريك التجيب الطاش من يوم الله ده خلقنا .. بلا فايدة ..
فتر آآآآ طارق و حيلي برد .. قسمت يمين تاني بس سواة جحا ديك ( بعد أنا أمرق .. أريتو رحم أمي الينسد ) .
إت كيفنك آآآ المسنوح ؟
|
Post: #27
Title: Re: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 09:06 PM
Parent: #3
ندى التي في الشارقة ..
يا بت كيفنك ؟؟ .. مندسية وين وين ؟؟
المرة الجاية جيبي معاك كلام و تعالي ..
محمد المرتضى يشهد و غيره شاهدين .. و أنا ..
مزاج كلماتك لما بحرك يقوم .. مزاج أسطى .
الله يقوم بحرك .. قولي يامين .
ثم شكرا ياخي على هذه الـ ( جنابو ) ..
الله الجن الكلكي ..
تاني قولي يامين .
|
Post: #5
Title: Re: تور الله الأنطح أنا .. و لأنتِ حبيبتي
Author: تيسير عووضة
Date: 06-08-2010, 12:19 PM
Parent: #1
Quote: أتذكرك تغنين : " يا حبيب ورد الأماني الحلوة في أعماقي فتّتتتتح " ، فيتفتح للدنيا أكمام وردها و ارتعش أنا -
في غربتيَ الأولي - بعد الحب - تفرست في تلك الأغنية التي علكتيها نهارات رفقتنا و لياليها .. كلما التقينا و أوغلت أنا في العته تخرجيني منه بـ ( ورد الأماني الحلوة في أعماقي فتتتتتح ) .. فأفتح .
في فعلان وردي للغنوة تلك تفرست - و كانت ملامحك تحوطها و عليها تسّاقط ، حتى فتستشريها و أصبح بكما جميلاً -
وردي يقول : ( و الزمن ما أظنو بعدك إنت يرجع تاني يفرح ) .. وردي هذا فكي ..! |
نعم، هو كذلك .. وردي فكي!
نفس هذه الأغنية ونفس هذه الـ "فتتتتتح" نغنيها أنا وسيد القلب بصوته العذب وبصوتي الأشتر
حتى يتهمني أو نتهمني كل مرة بعد الفراغ من المقطع بأنني أقطّع نجيلة الغناء!
(يا أعز الناس) السلام الجمهوري لحبنا
أو قل، السلام "الجهوري" له ..
|
Post: #6
Title: Re: تور الله الأنطح أنا .. و لأنتِ حبيبتي
Author: محمد عبد الماجد الصايم
Date: 06-08-2010, 12:27 PM
Parent: #5
طبعن يا عمكـ عارف إنو أخوكـ علاقتو بالثقافة والكتابات
دي زي علاقتي بالفور أول .. لكن عجبتني حكاية
| Quote: هي هي هي هي يا كبير ؟ |
|
Post: #7
Title: Re: تور الله الأنطح أنا .. و لأنتِ حبيبتي
Author: محمد على طه الملك
Date: 06-08-2010, 12:43 PM
Parent: #6
| Quote: سوف أعودك حين تليل .. |
اها قام للمساخه..
لو بنرجي الليل كان دا حالنا..
بلا ليل بلا زفت الليل دا ذاتو صادروه مننا زمان..
قال تليل قال - تعال اترزع هنا.
|
Post: #32
Title: Re: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 09:48 PM
Parent: #7
ود الملك ..
النهار حار ياخ .. مسيخ و حار .
أنا لو بعرف أتذكر و أحن و اشتاق بالنهار كان ده حالي ؟؟
النهار ده بس للحرابة ..
عامل كلامك اب لبيع ده ..
و بيكيف .
شكرا ياخي إنك هنا .. جميل و أصلي زي الترتيب .
|
Post: #8
Title: Re: تور الله الأنطح أنا .. و لأنتِ حبيبتي
Author: أيمن الطيب
Date: 06-08-2010, 12:46 PM
Parent: #6
يا عمدة..| Quote: لكنني أعرف الآن أنه كان كذلك . عشقٌ صغيرٌ حلو . ولدتني به أمي .. حبٌ كوحمةٍ في القلب |
تعرف لما الكلام يروح ليك,, تقيف تتأمل وتستمتع,,,
سلامات يا صاحب,,
|
Post: #9
Title: Re: تور الله الأنطح أنا .. و لأنتِ حبيبتي
Author: محمد المرتضى حامد
Date: 06-08-2010, 01:10 PM
Parent: #8
أها ، جبت لروحك الكلام براك.
|
Post: #10
Title: Re: تور الله الأنطح أنا .. و لأنتِ حبيبتي
Author: ابو جهينة
Date: 06-08-2010, 01:16 PM
Parent: #9
العماد
سلام ماكن
تخرجيني منه بـ ( ورد الأماني الحلوة في أعماقي فتتتتتح ) .. فأفتح .
في فعلان وردي للغنوة تلك تفرست - و كانت ملامحك تحوطها و عليها تسّاقط ، حتى فتستشريها و أصبح بكما جميلاً -
وردي يقول : ( و الزمن ما أظنو بعدك إنت يرجع تاني يفرح ) .. وردي هذا فكي ..!
إذ كيف يتفق أن أعود مساءات غربتي كلها غريبٌ لغرفة رقيعة في بلدٍ أجرد أغرب > و بقلبي سقم الدنيا .. ثم أستحضر وردي فأصبح بني آدماً صحيحا ؟؟
كلامك دة ذاتو ينفع حجاب في الضراع
|
Post: #11
Title: Re: تور الله الأنطح أنا .. و لأنتِ حبيبتي
Author: البدري عبد الله
Date: 06-08-2010, 01:25 PM
Parent: #10
|
Post: #12
Title: Re: تور الله الأنطح أنا .. و لأنتِ حبيبتي
Author: عمر سعد
Date: 06-08-2010, 01:34 PM
Parent: #10
عمدتنا
كيف الجوفى الخرطوم نقطه سطر جديد
ليك وحشه
|
Post: #31
Title: Re: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 09:43 PM
Parent: #6
عجبتك يا كبير .. !!
............
ياخي وجودك في اي حتة .. بيطمن .
|
Post: #30
Title: Re: تور الله الأنطح أنا .. و لأنتِ حبيبتي
Author: Emad Abdulla
Date: 06-08-2010, 09:41 PM
Parent: #5
تايسا يا صاحبة ..
( تم ترفيعك من صاحب إلى صاحبة .. و لا أحلى ) .
الله يريحك بركة النبي ..
و يا تايسا تقعدي تسمعي في جنس الغنا ده لامن من فداحة الحنين و العشق تقومي تقوقي قمرية .. .
و سيد القلب ده إن شا الله تنفيعهو ..
و تقطعوا نجيلة الغنا بعرق المحبة .
حبي يا زولة حبك و اسمعي غناك و افرحي قدر ما الله اداك .. فرحات سغيرونات يسمنن من جوع في الزمن الفقر ده ...
( أنا قبلك الأيام قضيتا سراب يسلمني لسراب ) ..
شفتي الفكي دي منعول كيفن ؟؟
|
Post: #13
Title: Re: تور الله الأنطح أنا .. و لأنتِ حبيبتي
Author: Adil Osman
Date: 06-08-2010, 01:37 PM
Parent: #1
Quote: ذاك الشاي شربته معها أمسيتئذٍ ، و في أمسيات العمر كله من بعد .
و لأنتِ تشبهينها يا حلوتي في شيء .. ما زلت لا أعرف كنهاً له .. لكنه هناك ، عندك . |
is this a love triangle? what a beautiful piece of anguish
|
Post: #14
Title: Re: تور الله الأنطح أنا .. و لأنتِ حبيبتي
Author: عزام حسن فرح
Date: 06-08-2010, 01:48 PM
Parent: #13
عماد عبدالله ... الله يِرضى عليك ياخ دُنيا وآخره ... قول آمين
|
Post: #15
Title: Re: تور الله الأنطح أنا .. و لأنتِ حبيبتي
Author: Osman Musa
Date: 06-08-2010, 03:09 PM
Parent: #14
يا أخى يلعن ...
.. يا حبيب ورد الأمانى الحلوة .. فى أعماقى فتح .
زولتك يا عماد لملمت الفطنة والحذاقة حقت الفكى وردى كلها .. هى برضو
فكى وفكى كارب كمان ساعة أنبهلت .
يا أخى فى ناس ناس ربنا بيديهم رهافة فى الحس وأنفتاح فى التفكير بالجملة .
..
سلامات
|
Post: #16
Title: Re: تور الله الأنطح أنا .. و لأنتِ حبيبتي
Author: أبو عبيدة البصاص
Date: 06-08-2010, 03:49 PM
Parent: #15
الله يخضر ايدك فقد اصابنا الجدب حيناً
عد ومعك من نحب فسيتفتح الورد حتماً
وحينما سنتمنى طوال المرض فينا
حتى تتكرر الزياره وتعال ياليل
|
Post: #17
Title: Re: تور الله الأنطح أنا .. و لأنتِ حبيبتي
Author: عبدالعزيز الفاضلابى
Date: 06-08-2010, 03:52 PM
Parent: #16
| Quote: تور الله الأنطح .. |
مامعنى تور الله الأنطح?????????????????
|
Post: #18
Title: Re: تور الله الأنطح أنا .. و لأنتِ حبيبتي
Author: تيسير عووضة
Date: 06-08-2010, 03:58 PM
Parent: #15
|
Post: #19
Title: Re: تور الله الأنطح أنا .. و لأنتِ حبيبتي
Author: محمد عبد الماجد الصايم
Date: 06-08-2010, 04:55 PM
Parent: #18
يعلي مقامكـ يا تايسا ياخ!
|
Post: #20
Title: Re: تور الله الأنطح أنا .. و لأنتِ حبيبتي
Author: محمد البشرى الخضر
Date: 06-08-2010, 06:29 PM
Parent: #19
عمدة ياخ ما معقول
الزمن مضايقنا شديد وكدا
|
Post: #21
Title: Re: تور الله الأنطح أنا .. و لأنتِ حبيبتي
Author: Nasr
Date: 06-08-2010, 06:47 PM
Parent: #20
وردي وحب وبزيانوس وسينما ونيل أزرق
وغربة
وشجني
إنت ظنيتك من بشر ما قبل الحداثة
ولا من ناس الحداثة ذاتها
هي الحداثة ذاتها خرفوها
المهم
مع إنه جرستك لذيذة زي غضب الزولة الفي الغنية ديك
برضو نقول
رد الله غربتك
أو غربتها
أو غربتنا
.
.
.
كان لقينا سينما ونيل أزرق وبزيانوس
والناس العسل
.
.
والتيران النطح؟؟؟؟
|
Post: #23
Title: Re: تور الله الأنطح أنا .. و لأنتِ حبيبتي
Author: Mahmoud Mustafa Mahmoud
Date: 06-08-2010, 07:00 PM
Parent: #21
إيماد أبدووولا ؟؟
دا منو دا؟؟
ياخ أمشي ياخ.. أقول ليك حاجة؟؟ أجري جري عديل..
أنصحكم بحاجة ؟؟ غير مازا... أنصحكم بعدم التعود على قراءة هذا الشخص المجنون..
لا تجربوا ذلك البتة... حلوة البتة دي؟؟
حاجة من أجمل ما يكون يا عماد..
إنت وين يا رماد؟؟
هسي باللاي دا بورتريه نصاح دا؟؟
علي بالأيمان البلد دي قاعدة أمفكو ساااااااااي..
|
Post: #22
Title: Re: تور الله الأنطح أنا .. و لأنتِ حبيبتي
Author: عمر عشاري
Date: 06-08-2010, 06:54 PM
Parent: #20
عماد ياعبد الله
يعليك مايدليك
______________________
ود الصايم ياحبيب
أقرأ ليك كم بوست زي دة ...وأرجع خش المعاينة تاني ....
لاتقنط ياصديقي
|
Post: #24
Title: Re: تور الله الأنطح أنا .. و لأنتِ حبيبتي
Author: الشفيع محمد صادق
Date: 06-08-2010, 07:20 PM
Parent: #22
Quote: أنصحكم بعدم التعود على قراءة هذا الشخص المجنون..
لا تجربوا ذلك البتة... حلوة البتة دي؟؟ |
#### مانشرب ... إماد ما نقري؟!
|
Post: #26
Title: Re: تور الله الأنطح أنا .. و لأنتِ حبيبتي
Author: salah ismail
Date: 06-08-2010, 08:56 PM
Parent: #24
عماد !!!
عماد؟؟؟
عماد
عمااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااد
عمااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااد
حديقة نيويورك المركزية ___شتاء 2010
|
Post: #28
Title: Re: تور الله الأنطح أنا .. و لأنتِ حبيبتي
Author: esam gabralla
Date: 06-08-2010, 09:19 PM
و لاحقآ قطعان الجيب
بتجيب النفس للكلام السمح ده من وين؟
و الزولة البتستحقو دى لقيتا وين؟ بالله هو في نوع زى ده؟
سبحان الله ....
|
Post: #33
Title: Re: تور الله الأنطح أنا .. و لأنتِ حبيبتي
Author: دينا خالد
Date: 06-09-2010, 07:05 AM
Parent: #28
اووول مرة اشوف لى راجل بحب مرتو !!
ـــــــــــــــــ
بالرغم من انو فى الاول مشيت لناس ماليزيا ا
.. لوووووب
|
Post: #34
Title: Re: تور الله الأنطح أنا .. و لأنتِ حبيبتي
Author: فادية اليمني
Date: 06-09-2010, 12:12 PM
Parent: #33
Quote: إلى التي في ماليزيا ..
|
الله يخليكم لبعض...
والبركة فيها لانها مرقت منك كل جميل و خلتنا نستمتع بكلامك الزين والسمح...
ويخليك لينا يا| Quote: تور الله الأنطح .. أنت ده .. |
و منا لك ولها السلام
|
Post: #35
Title: Re: تور الله الأنطح أنا .. و لأنتِ حبيبتي
Author: أميرة فاروق عبد العال
Date: 06-09-2010, 12:38 PM
Parent: #34
Quote: فبناءً عليه دعوتها : هي لسماع الغناء ،
و أنا لقطعان القلب . |
وهي سمعت الغناء!!
ونحن معاك في القطعان ده!!!
يسلم بنانك ياخ..
|
Post: #36
Title: Re: تور الله الأنطح أنا .. و لأنتِ حبيبتي
Author: omer osman
Date: 06-09-2010, 12:55 PM
Parent: #35
| Quote: عماد عبدالله ... الله يِرضى عليك ياخ دُنيا وآخره ... قول آمين |
|
|