مـســرحــنـا الســوداني

موقع جديد للتوثيق ولنشر الثقافة المسرحية وفعاليات المسرح السوداني
للعالم ..
رايك يهمنا ...[/green
الشكر للدكتور عصام حامد في اختيار الآسم
الشكر للفنان الرائع الغرافيكي
محمد ابوعاقلة في التصميم واللمسات الفنية
الشكر لكم جميعا في نقدكم ومتابعتكم لنا
محبة ومودة ]
http://masrahna.com/

يا قريبنا ...امل في ان يجد المسرح السوداني اسهاما(ماديا!) يجعله يستفيد من تنوع فريد في المنطقة ونري يوما مسرحا بجاويا واخر نوبيا واخر دينكاويا ونويريا وشلكاوية وفوراوياوزغاويا وبقاريا وووووو..الخ او هجينا من كل هذه (سودانيا) يخرج به من مفردة الوسط ... ....

شيخي وملاذي
ابوبكر حبيب الأمة
موضوع الدعم وتوظيف ميزانيات الانتاج في العمل المسرحي واحدة من همومنا
والعمل على دعمها بالبحث والدراسات
فالمسرحية السودانية بصفة خاصة والأعمال الفنية بصفة عامة تواجه مشكلة الانتاج
ودائما الميزانيات التي ترصد للأعمال تكون ضعيفة وناقصة
شكرا لك وهذا الموقع سوف نرصد فيه وسائل الانتاج في الأعمال الفنية
لك مودتي ومحبتي الابدية

مسرحًُنا دوت كوم
لنوثق لغد افضل

الى كل الفنانيين والأدباء
واهل التراث
لكم نمد الايادي

الى الهواة والمحترفين
وغاوي الفنون
والمهتمين
واصدقاء الحرف واللون
والكلمة الصادقة
مسرحنا موقعكم

Quote: وغاوي الفنون

غاووون خالص خالص ياكبيرنا يافنان

يامهموم بفكرتك وبتفاصيلها.....

سودوانوى ومسرحنا اجتهاد فردى حسب اعتقادى وموفق جدا

محبتى تبراك وين ماقبلت,,

التوقيع...

واحدة غاوية..

استاذنا محمد السني

تحياتي

انا واحد من الناس العرفو يعني شنو مسرح ويعني شنو ضحكة وموقف للتساؤل
لمن كنت في سن التاسعة ايام المحطة الاهلية

وشخصيا لن اصنف نفسي تبع اللستة التي اتيت بها عاليه، ناس اهل الفنون و ...

انا زول مستهلك فقط، زبون لا اكثر لا اقل

ادونا فرصة نعبر عن رأينا فيما تخلقون

تسلم يا استاذ

موقع جميل استاذتا محمد السني

جاري التسجيل

Quote: وشخصيا لن اصنف نفسي تبع اللستة التي اتيت بها عاليه، ناس اهل الفنون و ...

يابن عوف

هو على كيفك?

انتinculded فى اللستة الفوق ونص خمسة
وكان ماعجبتك وىcreate نيو لستة,,,

مش دخلت هنا?بقى خلاص...

بقول الكلام الفوق على مسؤليتى...

يا استاذنا

جميل فتحة ستارتكم ودخلة عرضكم

فى قصة اتذكرتها لمن شفت الويب سايت

حكتها لى سوزوكى ...قالت زمن البوكس داك لمن الناس بقعدوا متقابلين وفى مجرى فى النص داك

الناس بسرعه نتزلوا والتانيين بسرعه طلعوا وجه بعداك واحد سكراااااان ، من شدة ما سكران لمن اتكل على السلم وخت راسو فى ارضية البوكس ديك...قاليهم "فى حد نازل؟؟" الناس صانييين _لانو مافى حد نازل_ اخد ليه غمدة خمسة ثوانى كده ورفع راسو قاليهم: كدى اتذكرو...

أها حسة ما معاكم فى مسرحكم ده ناس تانييين؟؟ "غمدة بسيطة" كدى اتذكرو

شكرا يا بت الشيخ على الثقة

لكن وحاتك، انا زول مستهلك بس


المسرح البتمناهو هو هذا









شايفه الكلام البقول فيهو اخونا ابوبكر

تخيلوا هؤلاء الرجال والدروس التي يمروا بها كمحاربين
وعدم تشتت الذهن بالاغراءات الجنسية التي تحاولها تلكم النسوة

شوفي الميك اب، شوفي المسرح ذاتو عامل كيف، تلك مسرحية قد تمتد
لمدة يوم كامل، تخيلي من one shot انتي ممكن تقري كم حاجة في اللوحة دي
بما بالك بالمتعة لمدة ساعات

مسرحنا مرات بدخلك في دهاليز البنفسج، وتنزيل الشعور في الكستبان بمفردات
قد تشغل بالك اكتر مما دخلته

الداير اقوله فن الـ entertaiment داير المسرحيين ينزلوا شوية للناس
المساكين الزينا ديل ويعرضوا حاجة تغنيني عن الاكل والشرب

معليش يا اخوانا

عندي مشكلة في انزال الصور

الصورة التي قصدتها في بوست صلاح البندر لنساء من النوبة يرقصوا عرايات امام
محاربين

أغتصاب حليمة بشير ... مأزق المتاجرة بمأساة شعبنا في دارفور !

Quote: الناس بسرعه نتزلوا والتانيين بسرعه طلعوا وجه بعداك واحد سكراااااان ، من شدة ما سكران لمن اتكل على السلم وخت راسو فى ارضية البوكس ديك...قاليهم "فى حد نازل؟؟" الناس صانييين _لانو مافى حد نازل_ اخد ليه غمدة خمسة ثوانى كده ورفع راسو قاليهم: كدى اتذكرو...

كتلتيني بيها من الصباح...
والله ياتماضر...
you mad my day...
زي مابقـــولوا الجماعه ديل..

شكرا محمد السني ودايما سباق للخلق والإبتكار..
حاولت التسجيل مانفع..

أستاذ السني المسرحيين في السودان بقوموا بمجهودمبالغ في ظل ظروف عيش وعمل طاحنه وانتو هنا برضو رغم كل الأوجاع المعلومة والمستترة تقومون بتضحيات جسام بوقتكم ووقت صغاركم وأجسادكم المنهكه من الجري وراء لقمة العيش ، سنحكي عنكم لصغارنا يوماً وأنكم قمتم بالواجب حين عز من يوم به.

المسكون ابداع
السني
خوف السلطه من
المنشورات التحريضيه
الناطقه التي تسمي
المسرحيات..وعلاقه الخيمه و
الدبابه الواقفه في باب المسرح
القومي بامدرمان و كيف اصبحت
جزء لا يتجزأ من تاريخ الحركه
المسرحيه ...وعساكر... ورديات ...وتسليم
وتسلم.. وصفا وانتباه.. وبرفات.. وعروض مسرحيه..
وحاله تعايش النقيضيين كل يؤدي دوره
وفي ذاكرتي الجندي ود عباس وحضوره لعرض مسرحيه
{وجه الضحك المحظور} ليوميين متتاليين
والجلوس بجواري بكامل زيه العسكري
مع الشريط الذي يزين كتفه{طبعاملح}
وتعليقه الوحيد كلما حرك العرض مشاعره
{الزول اب شنب ده طابره ليهو شعره في راسو}
ويعني علي مهدي
فهل تم التوثيق لدبابه المسرح يا اجمل
مسرحي بلادي

كدا كيف يا بن عوف?

اميرة الشيخ اميرتنا
النبيلة
نفتح لك ستار مسرحنا
واتوهطي اميرة على موقعك
تسلمي والسماح والرضا

احمد ابن عوف
العزيز وغالي
والمستهلك وقتنا في المحبة
ياخي الفضاء مفتوح ليك عبر عن نفسك
وبعدين كده حاول شاركنا يمكن يطلع منك ناقد خطير
قلت لي انت من زمن المحطة الاهلية
ياخي انت لسه في عمر الزهور
مودتي ومحبتي

اشرف السر
الف مرحب بيك في
مسرحنا
اتمنى ان تكون اضافة حقيقية
وتساهم معنا في نهضة الثقافة والفنون والتراث
مودتي

Quote: قلت لي انت من زمن المحطة الاهلية

يا السنى
ازيك
ما لها المحطة الاهلية عيبا لى ؟
احكى ليك قصة يا سنى
لمن كنت فى اليونان
مشيت مسرح اسمه مسرح الحجر
المسرح مشيد فى جبل
المقاعد من الصخر منحوتة
الاضاءة عبارة عن مشاعل مغروزة فى انحاء الجيل الكان مسرح
انى امنت بالله ، لم يكن ثمة من استخدام لتقنية الصوت ولا الاضاءة
فكلاهما طبيعى
من وحى الجبل
كان عرضا ممتعا "لم تكن اللغة مشتركة لكن لغة المسرح
لا تحتاج للغة لتوصيلها فلقد كان الجسد هو الموصل الحقيقى"
بل انك لتقف اجلالا لفكرة المسرح وانت تقف على قمة الاوليمب
وترى كيف ان هؤلاء اليونانيين القدامى قد احالوا حياتنا الى بهجة لا تضاهى
حين وقفت هناك يا صديقى استدعيت كل ما درستموه لنا
وانحنيت اجلالا لكم
ثم انى مررت "بثيبة" وذهبت عن عمد لجزر "البلوبونيس "
هناك حيث المشاهد التى حكت عن الالهة ذات الاعين الواحدة والرجال الذين نصفهم بشر واخر فرس
يا للمشاهد يا سنى وانت ترنو من نافذة القطار حيث كل المحطات
من سالونيكا الى اثينا تحمل اسماء المدن الاغريقية التى درسنا تاريخها
اتمنى ان نفتح ستارة مسرحنا على الاحتفاء بكل من قدم للمسرح ولو كلمة
منذ الازل وحتى هذه اللحظة
تحياتى واحترامى

سلمى اخت روحي
يا صديقة
المحطة الأهلية
ما امبارح سنة 80 لي 83
انا بتكلم عن المحطة الزمن ما اكتر
لكن انت سجلت في مسرحنا
منتظرينك
ياخي وينك الايام الفاتت
والبركة فيك في اساتاذ الاجيال زنون
محبة ومنتظرين تسجيلك
وكلام المسرح

استاذنا محمد سني

تحياتي

Quote: ياخي الفضاء مفتوح ليك عبر عن نفسك

تشكر على الدعوة، دخلت على الموقع ولقيت بوست باسم سنوغرافيا

ياخي انا امكن آخد كم دقيقة عشان اعرف الفرق بين السنوغرافيا والجغرافيا

ويا بت الشيخ يا اميرة لقيتك كده

وتعالي ومعاك الاستاذ محمد سني ونونسك شوية عن العلاقة بين المشهد المسرحي الفوق
دا وبوست المعايير

اها يا بت الشيخ، انا بوست المعايير دا قريت فيه الصفحة الاولى بس وعندي مداخلة
في الصفحة الدلشيون، 18 صفحة تعني 1800 مداخلة، وما اعتقد انهم ح يصلوا اي شاطيء
لييه، لانها معركة كلامية، وبمارسوا فن الكلام ودا ما بخارج معاي في المسرح.

اها شوفي البيان بالعمل كيف عن القبيلة النوباوية دي، البنيات ديل جابوا ليك
الحياء (على ما اعتقد السؤال الاساسي في بوست المعايير كان المعيار هل هو الحياء ام
الاخلاق) اها البنيات ديل ، او المؤلف ان صح التعبير والمؤلف هو البيئة والتاريخ
اها، جابوا ليك الحياء وختوهو في نص المسرح وادوهو شلوت جدعوهو بره
الحلة ذاتو، وتحدوا رجال القبيلة المحاربين بمعاييرهم الاخلاقيه، قالوا كده المحاربين
ديل ومشوا جابوا ليك الحياء الجدعوه البنات ديل ولبسوه هم، والمخرج (المخرج هو الزمن، قاعد
سنين طويله امتدت لآلاف السنين في انو يختار ليهم الوضعية المناسبة، وقاليهم قبلوا غادي
وامعانا في قمع الحاجات الذكورية قاليهم تقبلوا وتدنقرو كمان.

دا اسمه مسرح Genuine ، اصيل، كفن، بعبر عن ما وصلت اليه اخلاق اي أمة


سؤال من مستهلك يا استاذ السني:

لييه ما عندنا مسرحيات غنائية؟؟


و شكرا لاتاحة الفرصة

الفنان الجميل محمد سني دفع الله
تحياتي وإحترامي
البشوفني متداخل في بوست بعنوان المسرح يقول خلاص دا العبادي أو أبو الروس في الشأن المسرحي وأنا بكل صراحة في الحتات دي بشوتها بوز يعني كعب كعب لمن كعب. لكين بحب المسرح ولدي إيمان كبير لا يخالجه شك أن للمسرح دور عظيم في حياة وتاريخ وثقافة ورقي وتطور الأمم ، وأن أمة بلا مسرح هي أمة بلا هوية لا لون لها ولا طعم ولا رائحة.
هناك الكثير من المعوقات بلا شك التي تحول بين المسرح وبين أداء رسالته العظيمة في المجتمع لكن كل هذا لا يكفي فالمسرح غائب ومغيب تماماً والمشتغلين بالهم والعمل المسرحي لم يعودوا كذلك.
المجتمع يرزح تحت وطأة الأمراض الإجتماعية والثقافية والعادات والتقاليد وغيرها من مشاكل وهي كلها أمور تحتاج لممن يقف ويعبر عنها بسهولة ويطرح أو يجد الحلول لها ، وليس أقدر في ذلك العمل غير المسرح ، نحتاج إلى تعلم لغة التسامح والمحبة والوطنية والصدق وكل القيم الجميلة وهي تدخل العقل والقلب من خلال المسرح زيها وزي الحقن في الوريد أو التغذية بالدربات على طول في الدم.
معليش عكيت كتير يا سني لكين والله أجد شخصياً أن كل مشاكلنا يمكن أن تحل من خلال خشبة المسرح فقد جربنا كل الحلول الأخرى من سياسة وإقتتال وتخاصم وتعاهد وتهادن وتناوش ولم تجدي نفعاً فلنعطي المسرح فرصة.
الموقع لا يرقي للتعبير عن المسرح العريق "المسرح السوداني" ولا يمكن إختزال دور هؤلاء الرواد العمالقة في سطور موجزة كما ورد في الموقع ، هو جهد يشكر عليه فاعله وإن كان لا يرقي للدور العظيم للمسرح والذي لم يعد يلبي حاجات وتطلعات الناس.
شكراً محمد سني وشكراً لكل الذي مروا من هنا

تماضوووور
لك المحبة الابدية
فاقدنك بي جد
اتمنى ان تكوني سجلتي
اما بخصوص كلامك
(((أها حسة ما معاكم فى مسرحكم ده ناس تانييين؟؟ "غمدة بسيطة" كدى اتذكرو ))
كده اتذكري
واكتبي لينا
البتقولي اوامر
ننفذ على طول

الحبيب السني...


الفنان المخضرم..


ياخي خبر مسعد، وبوابة عتيقة، لمدينة المسرح العتيقة..
لهؤلاء النفر، الذين سكبوا روحهم، تسطيرا، وتمثيلا، واخراجا، ونقدا.. وفرجة...

للحق تفتقد المكتبة السودانية، وكل مهتم لهذا الموقع الهام..



محبتي، وتقديري، وشكرا من القلب لكل من ساهم في بناء هذا الصرح المعلوماتي الهام..

قبيل ايام كنت اقرأ في سلسلة عالم المعرفة.. وهي عن المسرح العربي، ولم اجد سوى صفحة أو ثلاث فقط عن المسرح السوداني، وعزا
مؤلف الكتاب ذلك لنقص المراجع السودانية التي تهتم بالمسرح، وتاريخه، ودوره، ورسالته..


شكرا من القلب..

Quote: قبيل ايام كنت اقرأ في سلسلة عالم المعرفة.. وهي عن المسرح العربي، ولم اجد سوى صفحة أو ثلاث فقط عن المسرح السوداني، وعزا مؤلف الكتاب ذلك لنقص المراجع السودانية التي تهتم بالمسرح، وتاريخه، ودوره، ورسالته..

للاسف هذ صحيح تماما
فلم يتم توثيق للمسرح القومى سوى كتيب اصدره سعد يوسف وعثمان على الفكى العام 1979
وبعض كتابات لخالد المبارك وعثمان النصيرى
رغم ان العديد من البحوث التى تخرج بها الطلاب فى المعهد
كان يمكن الاستفادة منها وتطويرها لتغدو مراجعا
لكن لاننا غير معنيين بالتوثيق ـ سوى لاحقا ـ
اتمنى ان يجدالنقاد فى السودان الزمن الكافى لتوثيق مسيرة المسرح
حيث عشرات من الخريجين بلا وظائف اتمنى ان يستفيد منهم اهل المعهد والمسرح معا
وازعم ان لديهم الوقت لكن التمويل للنشر هو العقبة الاساسية وان كانت ممكنة الحل
شكرا يا عب غنى على هذه الاشارة

جيناكم
من اجل توثيق كل ذرة غبار تناثرت
من تحت اقدام المبدعين
مسرحنا عالم من الفرح يتسع للجميع
التحية لكل ما يمكن ان يبدع

الفنان السني دفع الله..
عظمة يا مبدع..
على أنغام حنجرة الفنان الكابي..


في حضرة من أهوى عبثت بي الأشواق..

يلا واصلوا المشوار..



المليون يبدأ بخطوة..

مدثر محمد عمر
قريبي العزيز
لك المودة وشكرا على كلماتك الرقيقة
ولك منى المودة الصافية والتحيات النضرة
وهذا ابسط ما نقدمه لحركتنا الفتية
بالمناسبة الحركة المسرحية السودانية من الحركات المميزة ولكن لاتجد الاعلام
اتمنى ان يكون هذا الموقع موثقا وناشرا للفن المسرحي الأصيل
محبتي ابدا

ابو النسب الأستاذ محمد السني

سلام كبير

سيكون الموقع و بجانب مجهوداتك المقدرة النواة الحقيقية لمسرح سوداني فاعل و متفاعل

إلى الأمام دوما

بارك الله فيك أستاذ السنى
وكتر خيرك يا أخى .
وجد دى تكون فائدة كبيرة للمسرح السودانى .
وأنت الزول العارف الكتير من صفحات تاريخ المسرح العربى المصرى .
من عهد نابليون . يا أخى أنشاءالله الشغل ده يتم عشان
يساعد المسرح السودانى يكون ند للمسرح العربى المصرى .
والمسرحى السودانى قادر على هضم المسرح العربى والعالمى اكتر من الند لو
اتيحت له بعض الشغلات .
..
تحياتى ومعليش على التنطنط خارج حوش الموضوع

الفاتح علي التوم
لك محبتي الخالصة
مرة ونحن بنعرض في مسرحية
حالة طوارئ
للفنان عثمان احمد حمد
قلت ليهو غير العنوان
نخاف الجمهور يجي ويلقى العنوان ويشوف الدبابة
يتخارج
وجابت النكتة حقها طلب المدير ان تدارى الدبابات قبل العرض وتعود للبوابة بعد انتهاء العرض
وقد كان
لك المودة الخالصة

السنى يا جميل
رجاء ارسال حساب للدخول على ايميلى طرفكم
موقع جميل
تصميم جميل
شكرا صديقى سنى ومحمد ابوعاقلة

الملا عمر
الحبيب الغالي
يا خي جينا مرتين ولمن نجدك
الاجازة دي لازم نشوفك
وبعد داك نحدد معانا ولا مع الخيانة

لك المودة والمحبة
ودمت للفنون والثقافة والتراث

اخوي الغالي عبد الغنيي كرم الله
لك المحبة والمودة الابدية
كلامك في محلو الكتابة عن المسرح السوداني في المجال الأدبي العربي
كتابات قليلة
وحتى في المجال الافريقي
الان من خلال المشاركات المتعددة في الفترة الاخيرة في المهرجانات ااصبح اسم السودان يلمع ويبرق
نسبة لان فن المسرح عندنا متقدم وبنتاول قضايا شائكة وبنقدمها بصورة عميقة
نتمنى ان يكون موقعنا مساهما في نقل التجربة المسرحية السودانية للعالم
مودتي

Quote: الملا عمر الحبيب الغالي يا خي جينا مرتين ولمن نجدك الاجازة دي لازم نشوفك وبعد داك نحدد معانا ولا مع الخيانة لك المودة والمحبة ودمت للفنون والثقافة والتراث

محمد سني دفع الله الفنان الجميل وين لقيتك لامن آباك ، يا أخي أي مكان تمشيهو مكاني وأنا عنواني شارع العدني الأمدرماني وتلقاني في قهوة خلف الله التي تأسست في العام 1934 – تصور من الزمن داك دي المفروض هسي تبيع أسلحة نووية مش شاي وقهوة – المهم يا سني بتلقاني كتير هناك خاصة في الويك إند ، وطبعاً إنت زول ظريف وفنان مرهف عشان كده أنا ما داير أدخلك في حتات فيها العرجاء وأم كرو والنطيحة "سوق أب زيد" للخرفان والإبل كمان بتلقاني هنا اليوم كله سبابي لم أسب أو أشتم أحد لكنني أعمل بالأسباب في كسب الرزق يعني بلغة ناس وول ستريت agent أتمنى أن أراك هذه المرة ومع أمنياتي لك وللأسرة الكريمة بإجازة سعيدة خاصة وأننا في غيابكم أخذنا نصيبكم من حرارة الصيف وشمس نص النهار وسفينا لواري من الكتاحات التي تدخل وتلج كل فج عميق وبدون إذن ، أها كان جيتو بي سرعه بتحضروا معانا تباشير الخريف وليك على أعزمك فطور وجبة فسيخ ما حصلت بشرط يكون بالكسرة وليمون كميات يا عمك تعرف الفسيخ من الجريف ودقيق الكسرة من الجزيرة والليمون من الجيلي والجرجير من شمبات والبصل الأخضر من السروراب والدكوة من سوق أمدرمان العتيق أها في تنوع وطعامه أكتر من كده.
قلت لي في أوروبا والدول المتقدمة ... الله يديك الصحة والعافية يا سني

كدي يا صديقي النزيح الستاره ونقول كما قالت الفنانه تماضر:

ما اتذكرتوا...!!!

السنى الفنان

موقع مهم جدا
جاء فى وقت نحتاجه بشدة

حافظ كنجالي

التحيات ومنتظرينك في حوش مسرحنا
مودتي ومحبتي