الخرطوم مدينة نظيفة يا سادتي !

أقسم بالله العظيم وكتابه الكريم أن هذا الشعب لم يقصّر قط .. تحمّل أعباء عديدة على المستوى الفردي والأسري والجماعي ، وتحمّل من العنت ما لا تطيقه الجبال .
هذا الشعب دفع ( دم قلبه ) ليتعلم الأبناء .
هذا الشعب دفع ( دم قلبه ) من أجل الدواء.
هذا الشعب دفع ( دم قلبه ) من أجل أمنه.
هذا الشعب دفع ( دم قلبه ) من أجل بيئة نظيفة
ضرائب ، زكاة ، رسوم ، دمغات ، عوائد ، وأشياء أخرى أطلقت عليها أسماء ما أنزل الله بها من سلطان.
ولكن ما النتيجة ؟

الشعب يا سادتي يقتطع من قوته ( وهو ضعيف أصلا ) ليساهم في بناء الوطن .
ربما يكون مكرها على الدفع ، لكنه أيضا ينتظر أن يحصد نتيجة ما .
وبعد طول إكراه اعتاد الشعب على الدفع مقتطعا من قوته ..
لكنه لم يحصد أي نتيجة .
نسيت أن أضع امام العنوان ( توجد نيابات ومحاكمات) ..

يطرق بابك شخص ما ..
تفتح الباب فتجد شابة أو شابا في ريعان الشباب.
يسلم عليك ، ويقدم نفسه :
نحن ناس النفايات ..
مرحب ياخي ، أنتو جايين مالكم الليلة ؟
والله يا حاج دايرين حق النفايات بتاع الشهر دا .
طيب الشهر الفات انتو شلتوا منّي حق النفايات ، وخليتو النفايات قاعدة ، وأهي دي قدّمكم ليها شهر ما اتشالت !
آي يا حاج نحن بنجمع القروش ، وفي ناس تانين مسئوليتهم يجمعوا النفايات ..
طيب ، موش انتو الاتنين شغالين مع جهة واحدة ؟
أيوة ، بس انت ادفع لينا الرسوم ، ولو متضرر امشي اشتكي .
يا جماعة أنا شايف إنكم ما بتقدموا أي خدمة لي كمواطن ، نحن هسة بقينا نلم الكوشة ونحرقها كل يومين تلاتة وانتو عايزين تجوا تشيلوا مننا رسوم.
شوف يا حاج ، انت عايز تدفع وللا ما عايز ؟
أنا عايز أدفع وبالمقابل تتشال النفايات بانتظام . يعني عايز خدمة مقابل القروش الأنا بدفعا .
والله يا حاج ده كلام ممكن تمشي تقولو هناك قدّام النيابة .
نيابة وين يا كافي البلا ؟
نيابة النفايات !
النفايات بقى عندها نيابة ؟
آآي ..

Quote: النفايات بقى عندها نيابة ؟

نعم .

يصرفوا قروشك نيابة عنك

و انت لاقي واحد يصرف قروشك

نيابة عنك ? !!!!

والله كويس

مؤدتي

دا التحصيل في زمن التأصيل يا ود قاسم ..

العزيز محمد بن قاسم...
تحياتي يا رجل

يبدو ان امر التحصيل عبر طرق الابواب امر استسلم له الناس حتي اصبح ظاهرة...
فقد صادفت امر هكذا في اجازتي السابقة...كو كو كو...انتو منو؟ نحن مسئولين
التحصيل عن الموية؟؟ قلت ليه ايوا....اتفضلوا يا اخوانا...قالوا لي لا شكرا...
مستعجلين...داب من تمشوا واجيب ليكم القروش...المهم دخلوا وكانت الموية
قاطعه....المهم...واحد فيهم توجه الي حوض ومواسير...في الحوش فتحا..وانا
اراغب فيه وقفلا سريع لأنها قالت ليه اخخخخخخخ...قلت ليه اها شفت عشان
عدم الموية دي بس تشربو عصيركم دا وتطلبوا الله...انا ادفع ليكم لي حاجه
مافي...المويه قاطعه ليها كم ....واتهديت فيهم نضم...يحاولوا يقاطعوني
وانا انضم زي الاطرش...لاني عارفهم حا يقولوا لي دي ما شغلتنا والهيئة
وقسم الشكاوي والبلاغات وباقي الحاجات الكلنا عارفنها ...اتوكلوا ومشوا
وقالوا حا يبلغوا قسم البلاغات عشان يشوف حل لي الموية...وتاني ما جوني..

دحين بتاع النفايات دا ما يخوفكم بي النيابة...اذا ما بشيلو النفايات
ما يشيلو قروش حتي لو ودوكم النيابة زاتو...النيابة عايزه تعين ناس
النفايات علي القلع...ما يجو اولا يقلعوا النفايات حتين يقلعوا القروش

وثم ثانيا: طيب الحكومه دي خدماته شنو؟؟؟ تعليم بي قروشي وصحة بي قروشي
ومواصلات بي قروشي واكل بي قروشي...وامن بي عكازي...وسكن بي قروشي...
وموية بي قروشي...

نزار
تحية وسلاماً
والله يا نزار يزعجوك ويخلعوك ويعكّروا صفوك ..
وهم كأنهم لا يعيشون في هذا البلد ، وكأنهم ليسو من أهله .
وهناك من يسندهم ويعضّدهم ، وهناك شرطة وقضاء يأخذ من المواطن مالا دون أن يتلقى أي خدمة ..
والناس أدمنت ، واستسلمت ، منهم من يقول لك :
يأخي كلها عشرة جنيه أدفعها وريّح بالك .
أو :
يا أخي ديل ناس بتاعين مشاكل ، أحسن ليك تداوي البلا بالبليلة .

فتحي
ليتهم أصّلوا شيئا بعد ما حصّلوا .
المشكلة إنك تدفع ليهم ونفاياتك ونفايات جيرانك قاعدة لمّن تجوا يوم الجمعة تلموها وتحرقوها ..
إنه ( تأصيل ) الكوشة .

فيصل
لك التحية وأنت تهديني ما يضحكني في هذا الزمن القاسي ..
بس يا فيصل ديل بيحاولوا يصرفوا قروشي وقروش اللي خلفوني ..
ممكن نسيب ليهم الحاضر بس كمان التاريخ مالهم ومالو؟

ودقاسم ازيك ياخ
عارف ناس النفايات ديل قبل كم شهر كده أنا (مزقت فاتورتهم نهائياً)
القصة بدأت كالتالي
لحوالي شهر ونص شارعنا محروم من زيارة عربية النفايات
لدرجة انو الناس طرحت نفاياتها في الشارع وردموها بالتراب
المهم الشارع بقي مغسل ومكوي ونضيف بعد مرور 24 ساعة من القصة دي
صحيت علي صوت الكو كو كو كرورو بتاعتهم ديك
في الحقيقة انا استغربت لأنو عادة بتاع اللبن بجي العصرية
المهم قمت من نومي وفتحت الباب
فلقيت شابة ظريفة ودار بيننا الحوار الاتي :
أنا : اهلا وسهلاً إتفضلي
الشابة الظريفة : لا شكراً نحنا مستعجلين والله معاك ناس النفايات
أنا : اتشرفنا والله أها خير
الشابة الظريفة : خير والله عايزين رسوم النفايات
أنا : لي شنو يعني
الشابة الظريفة : نحنا ناس التحصيل
أنا : وببرود انجليزي أيواااا
في الحقيقة يا استاذة أنا تاني قررت ماأدفع من هنا ولي قدام
ولو في سكة حأحاول أرجع القروش الدفعوها ليكم ناس بيتنا أيام المغترب

في اللحظة ديك الشابة الظريفة تحولت لحاجة تانية خالص
وشبكتني : حتدفع غصباً عنك
قمت ببساطة قلت ليها
تاني لو حصل ساي دقيت باب البت ده أنا ما حأخليكي
ومن دربك ده أمشي لرئيس المحلية وقولي ليهو
في مواطن سوداني ساكن بي جاي
قال ليك


أبيت

ـــــ
ياود قاسم ياخ نحنا اساساً مافي زول شاورنا في شركة النفايات دي
وماعندنا معاهم عقود ملزمة دي حاجات ونجرات بتخص لمحليات
أمش معاهم محل يودوك
نفايات بتاعت الساعة كم يازول
مودتي يا عزيزي

ودقاسم

سلام


عشان كده اساسي رشحك لماسورة المنبر

ماتعصر عليهم الناس ديل

قريبي وصاحبي سيف
تحيات وارفات
لا يهمك أساسي ، much cry,little wool
بس مع الجماعة ديل العصرة بعشرة أمثالها

النفايات بقى عندها نيابة ؟







إنا لله !

ياجماعة مافي حاجة مجاناً في البلد دي؟؟

أيمن دياب
تحية وسلاما
ياسيدي نحن ما بنفتّش على حاجة مجّانية ، نحن عايزين الناس ديل بالقروش يشيلوا النفايات دي يمرقوها من البلد والشوارع تبقى نظيفة ، والبلد تكون بلد محترمة , والبيئة تظل بيئة نقية ..

خالد
إن شاء الله تمام
والله يا خالد النفايات لها نيابة ..
تخيل نيابة تحاكم الناس على خدمة لم يتم تقديمها لهم ، وترغمهم على سداد رسوم شهرية ، وتعاقب من يرفض سداد الرسوم..
وتظل أكوام القمامة تغطي شوارعنا في كل الأحياء ..
الجدير بالذكر أن من يطرقون أبوابنا لتحصيل رسوم النفايات هم من موظفي الشركات وليسو موظفي دولة .

خضر حسين
تحية وسلاما
أنا يا خضر مستغرب ناس زي ديل بيجيبوهم من وين ؟ الواحد شايف أكوام النفايات قدّام عينو ، لا يختشي لا يستحي ، يقيف يدق الأبواب ويطلب رسوم نفايات ..
يمكن هم قاصديقن رسوم بقاء النفايات بالشوارع وإقامة الكوش ..
تعرف يا خضر واحد جاء للبيت ودق الباب وقال للمدام - التي رفضت مقدما الدفع له - أنه مستعد أن يشهد في النيابة أن أكوام النفايات مكومة وأن عربة النفايات لا تأتي إلا بعد أن تعلم تماما أننا والجيران قمنا بحرق كل النفايات .. ويقول لها أن هؤلاء الناس سيجعلونكم تدفعون لأن وكيل النيابة يأخذ حافز من مال النفايات الذي يتم جمعه عن طريق النيابة,,,

طيب نحن بندفع يا ود قاسم لكن في كم نفر كده في الحلة زي ناس خضر هليل ديل ما بيدفعوا قاموا ناس النفايات عاقبونا كلنا الدافع و الما دافع و الوساخة-اسم الدلع نفايات- بقت مردومة بالشوالات و القفف جوة و برة البيوت و في ناس اضطروا يدفعوا قروش تاني لبتاعين الكارو عشان يشيلوا السيدة نفايات يرموها في الخلا و للا قدام البحر و للا في اي مصيبة تانية بعيدة من البيوت.
و لما سألناهم قالوا لو ما الناس كلهم دفعوا هم ما بيلتزموا بتقديم الخدمة...تصور !!

ودقاسم الخال
مسكاقمي
قلت لي ناس النفايات ... هو في نقايات غيرهم
كدي نشيلهم وبقية الناس الشغالة سف
والمطلعين دين الناس والبلد
وبعدين نفكر في نفايات البيوت

الأخ الكريم سيف النصر
تحية واحتراما
حتى لو دفع أهل المقابر فلن يقدموا خدمة لأحد ..
ليس في الأمر جدية ، وليست فيه أمانة ، هم يريدون الرسوم دون أن يقدموا خدمة ، فإما أن تدفع وإما أن تدفع .