من هو الفنان القامة الراحل يس عبد العظيم

كثيرون لايعرفون الفنان الراحل يس عبد العظيم

نفرد هذه المساحة لتكون مساحة للتعرف علي هذا الفنان المبدع

يس عبد العظيم من منطقة العفاض منطقةالبديرية فى شمال السودان

سقط يس عبد العظيم علي المسرح وهو يغنى فى منطقة منصوركتى

لم يكن حينها يعلم بانه مصاب بسرطان الدم تم إسعافه فى نفس اليوم للخرطوم

وتوفى هنالك وهو في عز شبابه وعطائه ... يرحمه الله رحمة واسعة...

كانت لوفاته صدا ودوي في نفس كل من إستمع له

غنى لمحمد الحسن سالم حميد

ود أبنعوف

وآخرون من الشعراء المعروفين سنتعرف عليهم لاحقا ً

تغنى يس عبد العطيم برائعة حميد (بت العرب النوبية)

التي لحنها لاحقا مصطفى سيد أحمد بلحن مختلف

الفرق أن يس عبد العظيم تغنى بجزء يسير منها وبإسم (بت العرب النوبية)

أما مصطفي فتغني بمعظم الكلام المكتوب وبإسم (نورة)


...............

مشينا نرفع لقينا سيد الحوش قافل الباب

جلال جبريل سلام

ياخي ده بوست تحفة

اها انا ختيت طوبتي واتحكرت وااااصل مع يس عبدالعظيم الله يرحمه ويغفر له فنان بقامة بلد وصوت لا أظن ان الدنيا ستجود علينا بمثله مرة أخرى


المرضني اريت كان قتلني اصلي من الموت ماني ماااااارق

Quote: ياخي ده بوست تحفة

ياكونت يافنان

المشكلة لقينا عمكـــ بكري عطل رفع الأغاني يامان

ندردق لامن تنفرج

وياريت بكري يفكــ الحظر لأنو الفنان يس عبد العظيم معرفة الناس بيهو قليلة



يس عبد العظيم

جلال تحياتي

الراحل المقيم يسن عبدالعظيم يستحق ان تفرد له
مساحات لتسليط الضوء على تجربته مع غناء الطمبور
رحل يسن عن الدنيا وترك لنا اغاني نرددها بشكل يومى

اتمني من الشباب المشاركة فى هذا البوست حتى يكون
بمثابة رد الجميل لهذا المبدع

Quote: الراحل المقيم يسن عبدالعظيم يستحق ان تفرد له مساحات لتسليط الضوء على تجربته مع غناء الطمبور

أخ عصام

فعلا الفنان يس رقم يجب أن نتوقف عنده

بس قول كيف ورفع الأغاني معطل المهم نواصل ونشوف

كلمات / محمد الحسن حميد
أغنية بت العرب النوبية
(نورة)
*******
الشّوق من حاطِفْ
لا قاطِفْ
يتلمّ .. يهز ليك يا نوراي
يا دَرَقة وسيفْ
يا حُضناً كيفْ
من شَرّ الصّيفْ
والشتا ضاراي .. ضاراي
يا شعلة عز بقّت جوّاي
عدّت بي ضلام بحراً عاصِفْ
يا نور قاعِدْ بِكْ .. قايم بِكْ
شايلك مورودة ومتوكِّلْ
يا نورا على الله .. علينا
والفرج القرّب .. وحايم بِكْ
يا بِت العرب النوبية
يا بت النوبة العربية
بي فردة نخوة بجاوية
أو شدر الصّحوة الزِّنجية
دسيِّني من الزمن الفارغ
من ريح المتعة الوكتية
من شر السّاحِقْ والماحِقْ
بين دَبَش المدن المدعية
والليل يتحكّر بيناته
كحّل بي دبشو عويناته
يا شمس الناس المسبية
روّحت اتنسّم أخبارِكْ
لا تشفَقْ
قالو لي نصيحي !!!
وأنا عارفك ممكونة وصابرة
لكن لي ناس إلاّ تصيحي
جواي مأساتك مغروسة
يا طفلة تفتش في باكر
ما بينات نخلة وأبنوسة
الجوع العطش الفَدْ واحدْ
الفقر الضّارب زي سوسة
الخوف والحالة المنحوسة
يا بحر الحاصِلْ
لاكْ ناشِفْ
لا قلمي الفي إيدي عصا موسى
يا ام غلباً حار .. ينْبُرْ فينا
ما عدّ صباح من ها .. الميناء
كَدْ الكُدّاح شايلا سفينة
النّاس عوجات .. تحرِسْ .. ترْجَا
ترجعبو سلاح وأنوار زينة
بمبان
شوفونير
آفات
ويسكي
للنّاس الدّمّنا بنزينا
فِقَراً تسترزقْ من دينا
بايركس إبريقن
والموية ..
تتحدّى بياض الوزّينة
خرزات السبحة أمريكية
خُصَل الموكيت إيطالية
دفتر شيكاتاً ربوية
في الجيب
والسيرة النبوية
جنب مصحف جوة البترينة
تقروقتِك .. ديمة على القبلة
ميهية إبريقِكْ بي طينا
السِّبحة أصابعِكْ يا صالحة
يا بت النَاس الصّالحين
الذِّمَمْ المشرية الطّالحة .
شتّان بين دينِكْ وبين دينا
شتّان بين يُحمد
وحاج أحمد
وقُدّاس ناس ياي وسلاطينا
شِلْناكي مع الخلِق النايحة
على أرض فلسطين الفاتحة
البركة في رملِكْ يا سيناء
إرتج أسير الدعوات
ما بين آمينك وآمينا
يا نورا
شليلك ما فات
بي عدلو شليلك جاييكي
ما جايي ألِم التمرات
لا أبكي وأقابل بالفاتحة
في زولاً ليّا مِرِضْ .. ماتْ
جاييك أتزوّد من غُلبِكْ
واقفِر خطأ غيمةً ما جاتْ
نَبْحَتْ لها كُلّ المعمورة
والنّاس يوم تمرُقْ مدخورة
يا نورا نسلِّكْ غنوات
وآمال بي باكر مضفورة
طُلاّبك وأقلامنا هويتِكْ
قدّامنا قضيتِكْ سبّورة
رتّبنا الخرطة البتوصِّل
أدِّينا الخاطر يا نورا
بالمدّ الثوري المتدافعْ
فوق دربِكْ تَبْ ما متراجعْ
رغماً عن عَنَتْ الأيام
والزّمن الجهجاه الفاجِعْ
ما رمل الدّرْب الوسطاني
وكتيني الرّاحل وصّاني
لا ترجع ساكِتْ يا شافِعْ
لا ترجع شافِعْ يا ساكِتْ
خُتْ بالك وعينك في الشّارعْ
لا ترجع
. لا .. لا
الشَارع فاتح في الشَارعْ
الشّارع صَانْ
; صَانْ الشارعْ
جاييك كايسلِكْ يا نورا ..
لا كُتْ متسوِّل لا صَايعْ
لكن العسكر باغتني ..
يا نحس الحلم الباختني
يا عفن الأيدي المأجورة
نوراي الخطوة الجابتني
للمدن الصِّبحت مهجورة
يا ناسي بطاقتي عويناتا
البضهب عنِّك بيناتا
تلمحني الفقراء .. وتلفحني
في ليلها أغني معاناتا
الفجر الكاذب يرْشَحْني
ترشَعْ بي الواطة سماواتا
شدرات السّافِل تَنْتَحْني
بي الحاصل أعبي مساماتا
الناس القُصّر تنصَحْني
أتْكَاجَرْ أتوِّر نجماتا
القمر الطّيب يفضَحْني
تنبحني سجونِكْ وآهاتا
كَجّنّا سجونَكْ لولاكْ
كم عشقاً يتيرب واطاتا
منعول الزّمن الخلاّكَا
سلّمت الوطن الهمباتة
على كيفك سيفك يتحَكّمْ
يا سوسي تكنّك ما بتعلمْ
بي شتلة تقرِّبْ تتكلّمْ
يا حَال البتألم وساكِتْ
يا حال السّاكِتْ وبتألّمْ
يتفتّق جُرحَك يوم نبرأ
ونتلمّى .. وقيدك ينحطّمْ
وين عاتِبْ هارب من بُكرة
وخطو التاريخ البتقدّمْ
للزّمن الإنساني السِّدْرَة
حا يوقِّف قولو وما بيرغَمْ
المنفى في شرعو كما الهجرة
والسِّجن متل دار الأرْقَمْ
والشّارع قارِنْ في الشّارعْ
رغماً عن عَنَت الأيام
والزّمن الَجهْجَاه الفاجِعْ
بالنّفس النّازل والطالعْ
وأنا واحد من شعب مضارعْ
سمّيت ومشيت ما متراجعْ
غنيتك يا عشقي وتيهي
يا بلاداً كم سمحة وجيهي
لو لِقَتْ النّاس البتدورا
الأيدي التنفض كانديقَا
تنقُز تلحقا في الكانديقَا
ترتالا .. تكوس لها في الجيهي
ويا بلدي الواقع بك واقف ..
الشوق من حاطف لى قاطف .

ليل الغلابة
كلمات إبراهيم إبنعوف
...........
شيلنـى .. يـا ليـل الغـلابـة .. ولِمـنـى
لفنى .. أبلعنى فـي جوفـك هنـاك وضمنـى

أنـا بسألـك بالفيـك مسـك قلبـو وشـهـق
بالبيبـكـى ودار تشـقـه العـبـرة طـــق
بالكتـم ســر حـبـو لا بــاح لا نـطـق
قول لى مخلوق حظى منك ولا من حظى اتخلق
إنتـظـر حدثـنـي لا تـعـجـل تـفــوت
يبقـى مـا تلقـانـى بـكـرة وراك أمــوت
ودا إن حصـل ألبـس ســوادك وحـدّنـى
مالـك استغربـت يـا ليـل فــي الـكـلام
مـاك عـارف الدنيـا فـي عينـي ضــلام
والقليـب عميـان يفـتـش فــي الـزحـام
لـى قلوبـاً طيبـة مـا عـرفـت خـصـام
وفـى زمنـا الطيبـة راحـت ومـا اتلـقـت
وفـوق دريبـا جريـت والكرعيـن حـفـت
والبقول يمسح دمـوع عينـى يذيدهـا يتمنـى
ان بقيـت ودرت اسمـي تعـال لـي جـاي..
ما انا الزول المسطر فوق جدار صمتك غنـاي
ماانا الروح المعذبة في منامي وفـي صحـاي
ماانا الفي الواطا قاعد وشايفه فوق نجمك مناي
ليـك حـق لـو ماعرفتـنـي مـيـن انــا
انـا ماالوليـد الشفتـو قـبـال كــم سـنـة
وهسةجيت لقيتو فـوق عصـا الريـد متحنـي
ماغريـب الحـب يقـرض الـزول قــرض
انا ياني واحـدا فـي حطامـه علـي الارض
بس الغريب انـه الظـروف تفـرض فـرض
الا اعيـش فـي دنيـا لاطــول لاعــرض
والقـدر يلعـبـي بـيـن يمـنـه وشـمـال
وابقي زي عصفور كسيـح فـي ايـد عيـال
كيـف يطيـر ؟! وجناحـو مكسـور منتنـي
ليلـي اسـرع بـي تعـال شــد الـرحـال
لـي عوالـم بيـن نجومـك مـن .. خـيـال
يبقي اصـادف بختـي بيـن طرقاتهـا ضـال
أجيبه أرجـع أجـي ألقـي ظلـم الدنيـا زال
.. يـلا قٌبّـال تطفـي شمعـاتـي الـريـاح
وقبلمـا يـنـزل عـلـي الدنـيـا الصـبـاح
وقبلـمـا تـنـزل مصيـبـة .. تخـمـنـي

الاخ جلال

لك من التحايا انضرها و انت تحملنا الى عالم الجمال و المتعة مع الراحل المقيم يس عبدالعظيم

سنكون على الرصيف فى انتظار فك الحظر على تنزيل الاغانى فهو فنان من الزمن الجميل

شكرآ لك مرة اخرى

Quote: سنكون على الرصيف فى انتظار فك الحظر على تنزيل الاغانى

ودبشير شكرا للمرور وربنا يفك الحظر شان تبقى بالغناء أجمل

ودي

أبكن ياسحيبات
إبراهيم إبنعوف
........


أبكن ياسحيبات ماكفاي بكيت
وأديكن روا .. وأنا بالدموع ما رويت

ترا الفيهم حنين يبكي ويبكي بكاي
وأحدين قالو يا ود بنعوف جنيت
كان جنيت كتير من جن ماني براي
دي المكتوبة لي وان بي قسمتي رضيت

من فارقت واديك قلت تميت حول ..
كيف يبقا العلى وأنا للسنين عديت
أنا صابر يا سحاب حولا وراهو الحول
وعارف يوم وقع فى حبو ما سميت
تراك وسط الدوع تضحك بريقك شال .

أما انا يا حليلى العمرى ما فريت
روح يا سحاب فلل عليك الليل
وبلغ لى السلام لى دارو ان مريت
كلمو بالحصل لو تانى لى يعود
وأوعة تعاتبو شان يزعل يقولك أبيت

وبعد الحول تعال غاشينى
برجاك فى محلى دة أنا بقيت حييت
وان بقة ما لقينى ابك على ونوح
واعرف انى مت بى شوقو واتفكيت

بكتب ليك
ابراهيم ابنعوف
..........
مالى أنا كل ما أقول فى نفسى إتلمينا
ألقى أقدارى تضحك ..ولى تقول كضِّاب
وكل ما أعمل حساب لظروفى
زى الما عملت حساب
مالو فراقنا مترقبنا .. دون خلق الله
واقف ديمة عند الباب
وأعمل إيه .. عشان يختانا جاى أو جاى
وبينَّا وبينو يبقى حجاب
ونشوف الدنيا موكب فرحة
لينا تغنى بى ترحاب
وتدنى عليِّا آمالن .. بشوفا سراب
ويهل سعدى .. ونجم سعدى ..
بعد ما منِّى طوَّل غاب
وأقيف خاشع .. وأقول يا الله
كل النَّاس يكونوا أحباب
***************
بكتب ليك وأطوِّل فى كتاباتى
يفيض إحساسى وأملا الدنيا
بى كلمات خطاباتى
بجمع ليك لغات الدنيا وأكتب ليك
بى لغة العجم مرات ..
وبالعربى الشديد وفصيح ..
وبى لغة الملايكة أحيان ..
وبالسريانى والتسبيح ..
وفوق كل ذرة فى ها الكون ..
بكتبا ليك وارسلا فوق بساط الريح

بكتب ليك على الأشجار .. وفى الأنهار ..
ومحل ما تمشى قدامك
تلاقى حروف رسالاتى
لأنك إنتى من ذاتى .. وفى ذاتى .. وياك ذاتى
ومهما كتبت ما بقدر أعبر ليك عن الجواي
مهما طاوعت أقلامى كلماتى

وليه ما أكتب وإنتى الماضى بى أحزانو
بى أفراحو والمستقبل الآتى
كتاباتك شوية خلاص .. ورسالاتك شوية خلاص
علىَّ الفى منامى أحلام .. علىّ الفى صحاى وسواس
وأنا الراجيكى تكتبى لىَّ .. كم دفتر وكم كرَّاس
منَّها داير أفصِّل جبة وانْدروشْ ..
وكمان طاقيِّى فوق الراس
ومن كلماتا أسوى السبحى والبخرات وكم حجبات
أداريبن عيون النَّاس
كمان تقروقة .. وفى محراب هواكى اجلس مع الجُلاّس
واخلى الباقى واتغتابو .. لو بعدك غشانى نُعاس

أنا الراجيكى تكتبى لى ..
كتاباتك تكون فى الظلمة لى نبراس
أنا العايش فراقك لى ..
بشوفك فى عيون النَّاس
وعازرك لو كتبتى قليل ..رضيان بيهو
ما دام بى وفا وإخلاص
أريت يومن فرقنى معاك ..
يكون محذوف من التاريخ ..
وتبقى أيامنا ستة .. ونبقى فيها قراب
أريت بلدن تحرمك منى ..
لو ما إنتى تبقى خراب
يسكن فى خرابا البوم ..
ويتصايح عليها غراب
تولِّع فيها نار الله ..
وتصبح كوم رماد وهباب
وتمرقى إنتى والنَّاس المعاكى قراب..
وما دعيت خاتي الا الفراق اسباب


.....

عليكم الله أجمل من الكلام دا في؟؟

رابط أغنية

ابكن ياسحيبات

بعض التسجيلات قديمة شان كدا التسجيل ماجامد

رابط أغنية

ليل الغلابة

بت العرب النوبية

نجي لي أحن أغنية

أل شئ الرابط:

يا أعز إنسان

إبراهيم إبنعوف

يا أعز إنسان لي أنا يا أعز إنسان
ماني غريب عليك يا عاشقك الهيمان
جيتك من سجون الريد بدور لي ضمان
ما تصارحيني وقولي لي بكل أمان
في قلبك دحين خاتاني ياتو مكان
قربتك وبينك بينوا كان أزمان
طريتك وفكري في عالم من النسيان
خاشع مبتهل طالب الإله سبحان
يجمع روحي بي روحك ويعيشوا إخوان
بريدك وريتي ليك ريدت عيان وبيان
وقولت أجفا كي عندي بعيدة في الحسبان
كل الدنيا من غيرك بشوفا هوان
حتى أفراحي غيرك فيها تبقا احزان
أشيلك في عيوني عليك وأظل سهران
وأسكب زاتي في زاتك وأجيب اوزان
بردد في حروف إسمك براي نشوان
يعقب في صداهو معاي كل لسان
أخلي الكون فرح يرقص معاي طربان
تغني طيورو تتمايل على الأغصان
ليه بغناكي ما أبكي الوجود ألوان
انا المكتوب لي احبك وليك أعيش فنان
تعالي وضمي صدري عليكي بي تحنان
ورجعي عمري وكتين كت مع الحبيان
بيكي نسيت شقاي كل العزاب الكان
وفيكي لقيت حنان أمي الفقدتو زمان

......
دي هدية للبكاييين ناس طارق جبريل وهناي وهناية

إبراهيم إبنعوف

تعال قص البلد وارجع للشاعر محمد الحسن حسن سالم ( حِمْيد)

تعال قص البلد وأرجع تعال أدي الغُبش طلة
بقالا الليل غـُتا ومُقــــنع سُترتك يا صــباح الله
ضُراعك ِمدو لي رضع ضروع أُماتة قطن قط
مراكب شوفا لا مشرع ولا بان في مداهن شط
تعال يا شافي يا كافي شموخاً في زمن منحط
من الفي تعال بجي المافي معاك وهطنا وإتوهط
تعالنا نحــن من شـــفع نفك الحيرة بي حيرة
متين ما الليل يصن نسمع وراء الآهات غُلب نوره
أبوي قالولنا جيبن دا صباحات الله بخيره
تويب أمي الزمن هدا صباحات الله بخيره
وصــــــباحات الله لاقيته لا كـــراسه لا قلمه
صـــــباحات الله لاقيته ململم في العيون ألمه
صباحات الله لاقيته تجود في الضحى وتضفر
صباحات الله لاقيته تليس في شقوق بيته
صباحات الله لاقيته أكان لاقيته في مشرع
مكان خليتا تتوجع اكان لاقيته في مستشفى
فطن إنداي جامع سوق محطة ملمة أكان في بيته أو مصنع
محل لاقيته تنذمر مكان خليته تتوجع
تكد تكدح تباصـــــر كم رجاء أتقطع
أبت تطلع من المدفع طلع خازوق خوازيق البلد زادت
طلع نمراً وراهو ضباع وضاع ما ضاع وكان ما كان
يفـــيض النيــــل نحيــــــض نحن
يظل حال البلــــد واقف تقع محنة
طلع خازوق خوازيق البلد زادت
سألت عليـــــــها مشيت ومشيت
مشــــيت خشــــيت علـــــى حلة
لاقيت شعاع ضال من ضو صباح الله
لاقيت شعاع أســـمرقاعــدلو فوق بنبر
كـــــابي المُـــــــــرس يســـكـــــر
قنبت جنبو معا دار الحديث ما دار
حدثني بى حرقة حبيته من جواي
حبيته حبيته
في الحلوة والمُرات شايله القُداحه معاي
آدتني وأديته حـبيته حــبيته
في يوم من الأيام هــلوس مع الفجاج
هلوست دون أحلام من دكة الحجاج
ضلوا الشمس ريحين واحد عماك يا أم زين
والتانى لفحـك وطـــار
باعوني للفرقة باعوني للدولار
ملعون أبوك فُرقه ملعون أبوك دولار
أنّ الشعــــــاع الضــــال أنينا أنينا
صنّ الشعاع الضال صنينا صنينا
ما صــــن غنى و قــــــــال
غنالي بحرقة غنالى يا هاجــر
عقبت يا باكر قاطعني يا هاجر
رددت يا هاكـــــــر
في الضلمة أولادك
في الفيها طـــول اليوم لا زاده لا زادك
يا مرمى لا ضل بيت لا أرث أجدادك
يلا وجراحاتك
طحلب ضــــلام الليل دهده صباحاتك
الســــــــولبك خلاك برد الخمور مفتون
في أفقر وضع ختاك فاجر وسخ مافون
يلا وهياك يلا
لا عن صباح الله صبح الغُـنا الميمون
صن الشعاع الضال غنا الشعاع الضال
ما صن غنا وقال يا هاجر التسعى
بين الوطـــــــــــــــــــــ ـن والبال
باب الفجر بفتح فتح القلب موال
فتح اللبق في الصيف تالا الشتل تربال
باب الفــــــــجر بفتح يا وضع يا دجال
باب الفـــــــــجر بفتح عند دقة الرجال
غنا الشعاع الضال غنينا طولنا سوا
شال النغم عتال بايتين عيالو قوى
باكرنا سترة حال ياكر رغيف وروى
باكـــرنا بقة فال باكـــــــر كتاب ودوا
باكــــــــــرنا للأجيال ينشر نور وهوا
لا تلاقي فيهو وبال لاهم بُعاد لاجوى
باكــــــرنا يا ضلال لسع بلال ما زال
وما دام بلال لسع على الرمضا وهجير يلسع
ما دام في أطفال بتتوجع
صباحـــــات الله يا بيضـــا وحيحة نوره لاهسع
فجيعة يا نوره يا فُقرا ترف من شدره لى شدره
تلف الدنيا كايسالكم صباحاتو ما انتو
بقوا من الأرض مطره تعالى وشى الوطن دركان
عساكر آخر الزمن واطه
تعـــــالى وما على كيفك
تعـــــالى وريحي الواطه
بلدنا أن جيتي دي الكوكب تعالي من اليسار شمساً
تشرق الغربوا المركب
تغربي يا غرب يا باني الكـــلب يا تجار المــــــوت والرعب
لو ريح ليلكم طفى الصحوة نسل الصحوة في جوف الشعب
ِبقى وضوي نواحى الدرب التالا الفجر الوطـــــــــــن القلب
القلب الشايلك وما ختاك وكان ختاك أبداً ما خطاك
بس يا نوره الصاح و الصبر
لمي معانا قُطـــــــنة البدري
نغزل منها كفـــــــــــن الليل
ننسج منها توب الفـــــــــــجر
فــــجرن تكسو محنتو الفُقرا
من التعب البلا صـــــــالح يجبد الكُدّح الأُجرا
يلا بوليس بلا أجرا شنو الخايفينلو يا فقرا
بيوتا جنها المطره دقيقاً ما يفك الريق
سمكتن مافي في بحرا شنو الخايفينلو يا فقرا
شديراتن بقت حطــــبه تمرتن ما تفك طلبه
شنو الخايفينلو يا فقرا بهيماتن تسوى الميع
مغبش كالترب بصرا شنو الخايفينلو يا فقرا
######تن لا قلب لا حيل هوت في شبح فوق خيل
كان يتداعر آخــــر الليل نرت والشبح حدره
صدت للصريف فتره كان صوت الرصاص قفره
أنَّت والخلق نايمين صنت والخلق نايمين
عفنت البلد يومين ###### العمدة جاب خبره
شنو الخايفينلو يا فقرا شنو الداخرنو في متره
أبو الأربل لأبو الواسوق أبو المحرات
وساقية تسوق لأبو بقره يا بقر السواقي السايقى للأمرا
شنو الخايفينلو يا فقرا
أبو البوليس إذا ما كان أباتم من طرف فقرا
يحرسوا القصر للتلفان وللفي الليل زنى ودعره
ويقوموا مع النهار وزراء
أبو البوليس إذا ما كان أراضيهم يبس شدره
يحرسوا طلمبة الجازولين يقيفوا على البنوك غفرا
إذا ما الشارع استنفر غبش عزل بستنكر
على القيصر خساستو
تقول للغيم محل مطرك قراب منك دالفينك
يضم صدر الوطن حاني يهز للظلم ساساتو
تحن لباكر الأخضر يعم بى خيرو ناســــاتو
تنادى الفارس الأسمر تطالب بي قصاصاتو
من الفجار من العسكر ابو البوليس إذا فكر
يفك فيهم رصاصاتو
أيا بوليس أيا نازل من المريخ جباة الدم من التاريخ
أيا واقف لهم كالسيخ تقيف لنا لامتين دغري
حقارتك تبقى في فقرا فضيحة فجيعة يا بوليس
وجايين من فرد شدره جنانا العاق متين تصحي
تشوف الحاصل المزري متين تدري
بأنو الصوت ده ما مكري معتق للوطن دغري
و بأنو الجاري ما منك على صدر الوطن يجري
وخطاهو التيربت قدره
تلاقى الفــــجر والفقرا

لك جزيل الشكر و التقدير علي هذا العمل الجليل
المرحوم يسين عبد العظيم شقيق العندليب الرائع عثمان عبد العظيم
و قد تغني الاستاذ عثمان عبدالعظيم بعدد من اغاني المرحوم
ولدي شريط تسجيل خاص من الاثنين او شريطين تغريبا
لا اعرف كيفية التنزيل
كما تغني له الفنان صديق احمد ب3 او 4 اغاني
لا بتالفي و لا بتوالفي ............. ابراهيم ابنعوف
يا خالق لا تفارق ................. ابراهيم ابتعوف
ولا اذكر البقية المهم لك الشكر علي هذا التوثيق الرائع
ايضا لهم اخ ثالث و هو ايضا فنان رائع

مشكور على توثيق اعمال القامة الراحل يس عبدالعظيم .
ومنتظرين تحميل الاغاني ولا تنسى (هاشم الاخضر) للشاعر حميد

الاخ جلال جبريل
شكرا لتعريفك الناس بهذا الفنان الجميل له الرحمة
بخصوص رفع الاغنيات زور الموقع دا www.esnips.com واعمل حساب بتسجل ليهو عن طريق ايميلك بشكل عادى وبيديك 5 جيجابات مجانا للتحميل ومنه ممكن تخت وصلة هنا.
خالص الود
هشام كمال

Quote: الاخ جلال جبريل شكرا لتعريفك الناس بهذا الفنان الجميل له الرحمة بخصوص رفع الاغنيات زور الموقع دا www.esnips.com واعمل حساب بتسجل ليهو عن طريق ايميلك بشكل عادى وبيديك 5 جيجابات مجانا للتحميل ومنه ممكن تخت وصلة هنا. خالص الود هشام كمال

هشام كمال مرحب بيك وشكرا للمرور

والموقع بتاع رفع الأغاني

الروابط موجودة فوق بالأحمر

Quote: ومنتظرين تحميل الاغاني

أبو القاسم

الأغاني أنا رافع ليها روابط (ظاهرة عندك في مداخلاتي) بالأحمر

Quote: مشكور على توثيق اعمال القامة الراحل يس عبدالعظيم . ومنتظرين تحميل الاغاني ولا تنسى (هاشم الاخضر) للشاعر حميد

أها يا أبو القاسم

أول شئ رابط الأغنية بصوت شقيق المرحوم يس عبد العظيم (عثمان عبد العظيم)

هاشم الأخضر

هاشم الأخضر والمقصود بيها (هشم حسن العطا)

محمد الحسن سالم

جايي أغنِّيها وأقول
طيبة زي قولة سلام
قاله تربالاً دغيش
لي مراكبيةً تجول
شاله كف الموج بشيش
لي بنياتاً بيردن
تمّن أزيار السبيل
ومدّن إيدن كورا .. كورا
رشرشن قلب الشتول
أدّن الطيّانة دورة
وشويمن تالا المدارس
خدَّرن كل الفصول
صفقّن هلا يا حبيبة
جايي أغنِّيها وأقول
طيبة جبّارة خواطر
وجنَّها الريح التطفِّر
للعصافير التكاجر
ما تعشعِش إلاَّ وين
في الحراز اليومو ماطر
ولاَّ بين سمرة النخل
التقدِّم تالا باكر
وكت أكون صبحان مسافر
زادة ليّا معَ الزوادة
صنّة بسمعا في البنادر
ماب أقول لك ما تساهر
ساهر السهر اليفيد
لاب أقول لك ما تظاهر
وإنت هسَّع كم شهيد
ماب أوصِّيك وإنت شاعر
تبقى عشرة على القصيد
تدِّي يوم الليلي باكر
أدّك الأطفال نشيد
إلاّ أقول لك أوعى حاذر
أحذر أولاد الحرام
المطاليق
المساليط
الخواذيق الضلام
وأحذرك صنت قبالي
وقمت تمِّيت الكلام
جايي أغنِّيها وأقول
داخلى فيِّ عديل وهيطة
زي وهاطة النيل وبرضو
مارقي منِّي هديل موالف
زي ولِف تربال على أرضو
علّمت شفّع غناي
يبقوا آفة متين ويرضو
وناس سمح جيبو ومجبّر
برّة داراته آب يعرضو
عرفتني على الفقارى
قالت إخواني الكبار
المظاليم الحيارى
قلت أخيّاني الصغار
أمِّي قالت أبوي مسافر
إلاَّ نومته بي مرارة
تصقع الحجر آعمارة
أرفع الحجر آعمارة
ولمّا تاوق بالعبارة
بي قدح مونتو وجسارتو
شفتو واقع من عمارة
القدح بي مونتو روّح
أمِّي ما لقت الجسارة
إلاّ وكتينا الكبرنا
وأدّت البلد البشارة
ويا بلد جيت مبتليبه
جيت أغنّي المن عيونكن
يبدا يومه وينتهيبه
التشيل الليل تذاكر
أو تفاكر في حبيبه
ينقطع ضهر القصائد
عند مريقته من وشينا
حلّة قرية مدينة ميناء
تمشي فوق أتره الغناوي
الأناشيد التقاوي
بالمواويل والحكاوي
سكة الجوع الخرافة
وتنتحِن لهة المسافة
ينقطع ضهر القصائد
الأناشيد الغناوي
المواويل الحكاوي
ينقطع ضهر المسافة
لمّا تقفرا بالمواكب
منصهر بالدم ه########
والمواكب ما تجيبه
ينقطع ضهر المواكب
الأناشيد الغناوي
المواويل والحكاوي
ينقطع ضهر الحبيبة
وما تسيبه
جنّها وجن المهازل تتبرج
من إذاعات هراء
وجرائد إمِّعة
والدواخل تتفرج
في طنين الرؤساء
اليكفّي العالم التابع
موتاً ودماراً وفناء
تكفت الرادي وتذيع
لا دواء
أيها المرضى
لدى الزمن البنوكي
العتلي الذنيم
لا عليماً بك غيرك
كصغار الشعراء
أنت تنتفخين برداً
أو شموساً محرقات
وعواء
أنت تمتلئين هذا العام
جوعاً أو خواء
أنتِ ترتعدين صيفاً
يا بيوت الفقراء
أنتِ تحترقين
حتى أن يجئ
من يحيل النيل قسراً
نيل ماء
وينطلق ضهر القصائد
الأناشيد الغناوي
المواويل والحكاوي
بالحبيبة الخيرا زائد
ينطرح وجه الغلابة
يا إذاعات يا جرائد
والبلد فوق اللمليس
انطرح في خاطر باكر
وجيت أغنِّي لكم حبيبتي
إلاّ يا غبش العساكر
نتَّفت عصب الكمنجة
وصادرت منِّي الدفاتر
دخلت فيِّ الطبنجة
فرَّ من رأس غلبي شاعر
وركَّ فوق كتف الكلام
والعيون كانوا المحابر
هرَّب الشوق الحرام
من بيوتاً في المقابر
لي شموساً في الظلام
هاشم الأخضر سلام
التحيات النواضر
نبدا بي مين الرسالة
ونبدا من وين يا رفيق
عازّة فوق قيف البداية
وإنت في آخر الطريق
وإحنا بيناتكم محاصر
شوقنا بالريح والحريق
إحنا بيناتكم نصارع
زيّنا وزي الغريق
مرّة نمسك في المياه
مرّة في ضل الوطن
مرّة في عيدان حزينة
زنّت الريح في البحر
فنّت الريح من حراز
لما فطّاهو المطر
مرّة نمسك فينا آه
يا بحر مأساتنا آه
يا بحر مأساتنا بس
يا بحر مأساتنا فيق
يا بحر مأساتنا أوسع
أوسع أسّع ولاَّ ضيق
يا بحر بي غادي هاشم
هاشم التحراهو مين
هاشم الشكّعت فوقو
ريحك المزّع شراعو
موجك الصادربو شوقو
طوقو والزمن القضاهو
تالا هم باكر مسافر
ما رجف ساعة وداعو
هاشم السوِّيته فيهو
وسبتو يضرب بي كراعو
ما غرِق غرقت مراكبو
هاشم الأخضر ضراعو
ما يبِس يبست هدومو
ما حرق شومش شعاعو
وبقَّ كالحلم المصوبر
في الخواطر كوم أماني
هاشم العشم المعتّق
في خوابي الجوف أغاني
يا بحر تحراهو مين
يا بحر بي غادي زولاً
ماب ندلِّي الإيد بلاه
إيدو في إيد الرفاقة
وإيدو بي جاي في الرسن
ماشي في خاطر الغلابة
البيفصح والرطن
سار مقوِّنو التعابى وجايي
قاصدك يا وطن
والجا قاصدك كالزمن
ماب يصدنو العوارض
لاب يهدّنو المحن
ويا محن هاشم قمحنا
فأسنا كراسنا وقدحنا
هاشم المجروح جرحنا
هاشم الفرحان فرحنا
نلقى في زينّا وسمحنا
يوي وسي نغماً صدحنا
وفي ترحنا صبر ملحنا
نلقى في كل المراتع
في المزارع والمصانع
إيديه راية وفجر فاقع
في المدارس والمسارح
في البيوت فطن الشوارع
في الكنائس والجوامع
نلقى في كل المواقع
هاشم القاصدنو نحنا
هاشم الأخضر ضراعو
ما وقع يا نيل في فيضك
وإنت ماب يغباك شراعو
هاشم السمح المعافى
هاشم التسلم خطا
ويسلم الدرب الخطا
هاشم الكم لله أدّا
والبرادى تدور غطا
وشن غطاها بلا غطا
هاشم الحسن العطا
هاشم الحسن العطا
هاشم الصاح يا خطا
هاشم الحسَن العطا
سافر قبلنا وقلنا ليه
يا ماشي للوطن الوسيع
يا ماشي يا كم زول يجوا
يا جايي بي كم زول مشوا
يا ماشي في كم زول تصل
رسِّل سريع
وبلِّغ سلامنا
الشوق فظيع
سلِّم على المحجوب
وجوزيف والشفيع
سلِّم على حلمك محمد والمسيح
سلِّم على نفسك يا هاشم
ود جميع
من فات يوقِّينا الخطر
من قولب الحر والصقيع
بيناتو شان يطلع مطر
أو يحضن العالم ربيع
الناس بترحل قول لو ليه
شان حق يفضِّل ما يضيع
الناس بترحل كل يوم
والحق معاهو على العموم
الناس بترحل وماب تضيع
والحق بيفضل وماب يضيع
الحق حيرجع يا بلد
حقِّك حيرجع ليك وبيك
قوليها وإحنا معانا حق
الحق حيفضل يا قطيع
نتلاقى فوق قيف الفجر
بين التيقظ والهجيع
ويا إنتو يا نحنا
يا نحنا يا إنتو
يا أبّان ضميراً تاه
نتلاقى يوماً يوم
وبيناتنا حد الله
ويا إنتو يا نحنا
يا نحنا يا إنتو
يا نحنا يا المحنة
محنة
محنة
إحنا
القلبِ يشوف قبّال العين
من قبلِ أقابلك شفتك وين
في ياتو عريس مخضر إيدين
بين حضنو حلم يلصف لا وين
والناس في الدارة إتنين إتنين
كل خطوة تشيله عديلة وزين
قوق قمريتين فوق كروقتين
قيساب الشوق نوريقو متين
يا رش الغيم يا ريحة الطين
يا بختي أنا وكل الصابرين
يا زول يا زين أنا شفتك وين
في ياتو صباح باهي ووضّاح
الطير صدّاح للزهر الفاح
صفق البرسيم للطل مرتاح
والناس أرواح في حضرة راح
العشق الدغري العذري الصاح
يا قومة بدري وفوتة الدار
من أجل حلم راجنو صغار
في ياتو محطة غشاها قطار
إندهده فيها وقضّى نهار
حس العمال تحت الأمطار
الربط الخط ما فكَّ الخط
يا كم في الخط هيلا وأنفار
والناس النار أم قلباً حار
فتحوها بيوتن للسفّار
الزول الوافي العوّافي
يدِّيك العافي من المافي
وما يأخد إلاّ الأخبار
لاقيتك آهن لاقيتك
في سرِّي ندهتك ولبيتك
مع إنِّي ولا خابر إسمك
لا الجيهة المنها لابيتك
إنت الإنسان الغنيتك
إتمنوا الناس إتمنيتك
يا ريتك تخبر ياريتك
كم صبرِ وعشم إستنيتك
لو قبلِ أقابلك ما شفتك
ما كان في حزَّتي حبيتك
أنا وإنت قبل ده إتلاقينا
شقِّينا على الدنيا جداول
جبدنا زمانا الكان عاول
والعالم سوِّينا جنينة
يا رتة غيمة عتاميره
ربّة عربان وطنابيره
قندول الشوق الحين لبّن
جاب لي بيّوضة عصافيره
يا ريح الزنج إذا اشتاقت
تفتِق بأنفاسه مزاميره
يا القمحة السمحة المدخورة
قسِّيبته قلبي مطاميره
أنا شفتك وين ؟؟
قبلِ أقابلك
يا دنيا الريد ومقاديره

Quote: كما تغني له الفنان صديق احمد ب3 او 4 اغاني

شادول يارائع

من أجمل الأغاني التي تغنى بها صديق وهي من أغاني يس

صابر جرا

حكاية الشافعة

ليل الغلابة

....
تنويه الأغاني بالمناسبة مرفوعة في مداخلاتي بالأحمر وتحته خط

فووووق

..

من أغاني أدب الرحلات للشاعر المرحوم عبد الله محمد خير

قيل أن البت الإتكتبت فيهاهذه الأغنية كانت تجلس في المقعد الأمام يمين سائق النيسان (البص)

زمن السفر كان الباصات النيسان، وهي تجلس في هذا المقعد كان عبد الله محمد خير يجلس في المقعد

الأول في الصندوق الخالفي في مكان يتيح له أن يرى السائق وتلك الفتاة معا عبر المرآة ومن جمالها

تأسف عبر القصيدة لسفرها من خلال سؤاله المتكرر للسائق (صابر جِرا) وللذين يرتادون مواقف الشمالية

والسوق الشعبي يعرفون شخصية صابر جِرا جيدا ً...

أغنية صابر جِرا:

رابط الأغنية :

صابر جِرا

.
.
.

أدونا خبر الروابط دي شغالة ؟

الاخ جلال
لك الشكر الجزيل وانت توثق للفنان القامة يس عبدالعظيم وبالطبع هذا يحتاج الي جهد كبير
والي تعاون من كل محبي الفنان الراحل
حمتو
للشاعر حميد

لامتين لامتين يا حمتو شرق

الزمان الساعة سايرة
المكان فوق ارض دايرة
الحديد والواطه فايره
سيل عرق نازل يغرق
راسو مقطوع حيرتو حايرة
فكرو واقف بين يطرق
وبين يشيل جالون يشرق
يمسك المنجل يطرق
ينقر الشاكوش يطربق
حمتو شرق حمتو شرق
حمتو من اوليك تشرق
تاني من اوليك تغرب
حمتو ما ولدوك مهندس
حمتو ما خلقوك مدرس
فيك بوم الهم معشعش
ولا متين للراس تنكس

يطرا لامن كان ابوهو
يدي ردمة من الحديد
وياما قام زير عرقو نقع
وجسمو نبق بالحديد
ماب يهمو قميص مرقع
والله سروالا جديد

حمتو مرة سال ابوهو
لم شفع كاتلوهو
يابه وين طينا وارضنا
قام ابوهو انضارا غادي
ورش بي دمعو الحدادي
حمتو صاقع وين ارضنا
ووين دواليبنا واوضنا
تاني ابوهو انضاري غادي
ورش بي دمعو الحدادي
انت مالك يابه ساكت
ي مالك الدقاك منو
قام ابوهو اسغفر الله
وشالو قرشين قالو يالله
اشتريبا حلاوة يالله
حمتو راح باع الحلاوة
في الطريق حاشوهو شفع
من قبل يصل الحدادي
نوحو كان سباق واسرع
ورا ابوهو سبب بكاهو
وبي عقاب صوتا مقطع
قام ابوهو عشان يحصل
لاحظ الخطوات بترجع
لي طويقات غلبو قفل
وكفلت القلب الموجع

في جنينة سيدي حايم
بين ضلال الرامي يرتع
جنب بهيماتا تقنقت
كايسي حن اماتا ترضع
حمتو برطع للحدادي
لم فجاءة لمحلو شفع
قدرو جاي من القرايه
للفطور شان تاني ترجع
في الصريف انضاره لابد
والنفس حاميهو يطلع
بي بشيش دودر كلابو
وفوق خطاهم ليها شكع
حمتو قرقر لم قرقر
الضحك دنقربو صنقع
ما انتقم من خصمو هسع
وبكره لي ######ينو ودع

حائط الايام تكسر
حمتو شب وحمتو يكبر
وكل مايكبر الصراع البينو يكبر
حمتو سب ووه زمجر
وكلما يودر هم
قبل ما حمتو ينسر
يلق تاني التحتو بنقر
جا المطر في ليلة هظر
ولي كرارق حمتو كسر
لي العفيش والعدي شتت
والحديد الراجي صقر
في جنينة سيدي صنقر
تحتو كوم اطفال مغبر

يطرا لامن ماتت امو
مالقا الناس البحمو
لا لقا الزول البصيح
ولا لقا الناس البجمو
لا لقا الناس البعزو
ولا لقا الناس البصلو
ولا لقا الناس البدفنو
رغم انو وانو انو
هم ما مقصر كلو كلو

مرت الايام درايش
وحمتو محتار كيف هو عايش
جاري في الارزاق يحاوش
روب وقع بيناتا دايش
حمتو مات بين المعايش
مات وسبلتو الحدادي
ونعشو شيعتو الانادي
مات وما طقالو صايح
لا خبيرو طقشلو رادي
مات وما نعتو الجرايد
لا بقتلو قبير بلادي
مات مع الانسان وسطنا
يوم صبح عالمنا مادي
لامن الصلاي تبلو
في قفا الجامع عبادي
لم صوت الرب تكسر
والقيم باتت قلادي
حمتو في الاخرة ويعاين
للبيوت روق الجناين
زي لنيبة وسط رتاين
حمتو بس يسكت يعاين
بس يعاين لي الجناين

رحمه الله تعالى
نحن السودانيين لانعرف قدر البشر وهم بيننا هلا راجعنا ثقافتنا المتأخرة

نوريت شكرا للمرور ياعمكـــ

أحمد عبد العاطي شكرا للمرور

وفعلا البوست مخاطرة كبيرة

ودا رابط أغنية حمدتو

حمدتو

التعديل لإدخال الرابط

100% يا عمك

التحايا للجميع
يس عبد العظيم رحيله كان فاجعة كتب الشعراء رثاء يس كلمات بطعم الدموع

تحضرني بعض الابيات كتب في رحيل الراحل يس للأسف لا اعرف من هو كاتبها

لو ما القدر بدري انكتب في اللوح
ما كت مت يا غريد بلابل الدوح ... يا ياسين
قطع كبد ابوك وامك الراجاك
لا دقتا الجديد لا نحنا سيرناك

هذا فقط ما اسعفتني زاكرتي به ولكنها بحق ابيات تبكي الحجر
اتمنى ان يكون احد الشباب يحفظ كلماتها والكثير من القصائد
كتبت في رحيل ياسين


كما غني ياسين لحميد ... يابا لوجيتك اديني فاضي ... يابا ماك راح تبقى راضي
شكرا لكم

Quote: تحضرني بعض الابيات كتب في رحيل الراحل يس للأسف لا اعرف من هو كاتبها لو ما القدر بدري انكتب في اللوح ما كت مت يا غريد بلابل الدوح ... يا ياسين قطع كبد ابوك وامك الراجاك لا دقتا الجديد لا نحنا سيرناك

ود الجمام سلام

الرثاء كتبه الشاعر ودإبنعوف وهو كما تعرف أكثر قصائده لحنها

وغناها يس عبد العظيم القصيدة بدأ ابنعوف في قرآتها بعد عام تقريبا من وفاة يس

أي في العام 1987

(إبراهيم أبنعوف / أكتوبر ـ1987م)



إن كان ما الأجل بدري اتكتب في اللوح
أو كان النفوس تتفدي , روح .. بي روح
ما كان ... مت ياغريد بلابل الدوح
وآحي .. وآ وحيح قلباً عليك مجروح
***
بنوت الشعر الليلة ليش ... ساكتات
شبن في صدور كل الغناة .. وراواة
هينن الرماد كبن علي القافيات
أبكن ومنحن ونوحن مع النايحات
***
أثكلن الجنا الماب يتولد لامات
ارثن روعة الفن البملك الذات
في (ليل الغلابه وحمتو والشافعات
يلا أها سوون (الحي ووب) عريسكن مات
وماتت طيبة في الوجه التملي صبوح
أحي وآ وحيحي قلباً عليك مجروح
***
قولن ليه يا النجم السطع في سماك
غبت بلا خبر شن شفت في دنياك
صغير وما بقيت مالو القبير ضماك
لا شفت الجديد لا نحنا .. سيرناك
وآ أسفي الشديد واسفاً عليه صباك
يا البكيت قلوب كانت عزاها غناك
قطع كبد أبوك وأمل .. الراجاك
واخواتك يجرن في المناحه نباك
واخوانك منو الفيهم عليك ما بنوح
أحي , وآ وحيح قلباً عليك مجروح
***
كنت إنسان ملايكي وماك زول شرير
وصدرك كان يصفي الشر يمسك الخير
يا شيال هموم الناس كبير وصغير
عالجت المريض شلت الكسيح وعزير
وكنت علي حساب نفسك تجامل الغير
الا الدنيا صح غشاشه ما دار خير
وسمح العشره ياهو الفيها عمرو قصير
والطب والعلاج من الأجل .. ما بجير
وزايله الدنيا يالفوق النعش مطروح
أحي , وآ وحيح قلباً عليك مجروح
***
ما كان قصدي أجامل فيك يوم الشين
قصدي القاك عريس بين العديل والزين
قصدي تهزو سوطك والجنيات راكزين
قصدي غنا البنات والسيرة .. لي يس
وجات الفرحه فوق عتب الفريق عرزين
كربه وأبكر العفاض شمال ويمين
راجين يوم جديدك وكلهم دايرين
يردولك جمايلك يا الوليد الزين
وياريت كنت عشت والأماني تروح
أحي , وآ وحيح قلباً عليك مجروح
***
كيفن (ياالرميله) شمالنا .. ما يحزن
بايني احزانو فوق نخل انتني .. ودندن
في النيل في الجروف في الصوبن عدن
فوق وجه البنيات الملن .. وصدن
في الجنيات في السلك الوقف ما رن
فوق قيزان رمالو الهيلن وكبن
حزين اداك وليدو المافي ليهو وزن
ويا بخت التراب الضم كل الفن
وضم اجمل رسالة اجمل متون وشروح
أحي وآ وحيح قلباً عليك مجروح
***
كيف حال الأهل وحال العشيرة عموم
وكيف حال أمك التفطر عليك وتصوم
وكيف حال الصحاب حين سمعوا خبر الشوم
شطاب , والعوض ود أحمد المكلوم
ناس توفيق كذا الزين لا ولد توم
حميد والحبيب جاد ونور القوم
شيخ ود بادي في وصف الكرام مفهوم
وكيف حالي الغلبني ارثاك مجافي النوم
أبكي وتبكي إرقي واوسلي منصوركتي , سافل ابدوم
كونو اصعب فراقك من فراق الروح
أحي , وآ وحيح قلباً عليك مجروح
***
الموت اصلو حق , إلا المصيبه كمان
ما قادرين نصدق يوم رحيلك كان
معقول يرحل البيناتنا كان رحمن ؟
معقول يسكت الصداح علي الأفنان ؟
معقول يرحل الطرب الغشي الوجدان ؟
وتتكسر الربابه وتصمت الألحان ؟
كان ما أمر الله كان قلنا الملك وهمان ؟
ودي أول مره مات الفن مع الفنان
آ ياعرب الحجاز عزونا في حسان
نحنا اليوم فقدنا الطيب الإنسان
وفقدنا ليه لا بيكون ولا قد .. كان
ويا هول القدر في سواد عيون النوح
أحي وآ وحيح قلباً عليك مجروح
***
سلام الله عليك يسن مع الأخيار
سلاماً يوم جيت شرفت هادي الدار
وسلاماً يوم مت ويوم نعشك سار
وسلاماً يوم تقوم وتبعث مع الأبرار
وعليك سلامنا بالآلاف من التكرار
سلام أرق من نسماً من الأسحار
وأزكي وأحلي من نفحة شذي الأزهار
ما طلع الصباح ... ما غنت الأطيار
وما غرد علي سفح الروابي كنار
وما (بوبا) القمر وإتجمعوا السمار
وما صدحت لحون , وما قيلت الأشعار
وما عزف الرباب واترنمت أوتار
ولا يوم النشور يومة تعود الروح
أحي وآ وحيح قلباً عليك مجروح
***
(يس) جاك غريب أغفرلو يا مولاي
غفران ذلة العبد الدوام نساي
سحاب الرحمه فوق قبرو اليكب بكاي
وأنزلو منزلة عبداً تقي وصلاي
وعوضو في شبابو الجنه يا عطــاي
فوق ميمونه يسرح فيها جاي لآجاي
وأكرمو بي (حواري) وقولو هذا جزاي
وزوجو من حسان , كان للحسان غناي
ات ياك الكريم ال للضعيف .. رتاي
وياك الباقي ازل وكل الخليقه تروح
أحي وآ وحيح قلباً عليك مجروح .

معاوية سلام

وماقصرت تب

بعد أن رثى ودإبنعوف رفيقه يس

وجد نفسه رفيقا فنيا لأخيه عثمان عبد العظيم

من نتاجهم

أغنية طير الغروب....

رابط الأغنية:

طير الغروب

النص


يا طير الغروب أسكـت كفاكـا رطـن
قبلك كم بكيت وكم من نفوس يبكن
***
بكاك الفـراق راحـل بعيـد تسكـن
ولا فقـد جنـاك واصبحـت متجـنـن
تـرى الفاقـد جنـاه وراه .. متيقـن
وما كل الرحـل فـارق ديـارو حـزِن
***
إنت المك ماهو ذى ألماً على مُزمـن
وفقدك لو تقول ذى فقدى ما ممكـن
فارقنى البريدو حياتى عـاد كيفـن
وفتق لى الجروح قبـل الجـروح يبـرن
***
نيران الغـرام فـى حالـى ما بيرتـن
ساكنات فى عضاى يصّبحِـن ويمسـن
كـل الاشتكيلـو اقولـو لـى .. طمـن
يقولى ما بتطيب انت اتمكنت مكـن
***
كل أسبابى من زولاً صغير فى السـن
سيافـات رموشـو والعيـون يـرمـن
بسمة فاطرو تضوى الليل بعد يدكـن
وان جيت للخدود جلّ العلى الصنعـن
***
إتحيّـر بقيـت فـى أمـرى متمحِّـن
أحفّر فى الارض مرات براى وادفـن
حِيلـىِ معـاه لا بجيـبـن ولا بــوَدّن
دا الغارى الجمال وفى طبعه متعجِـن
***
داير اكتبلو أقولـو قليبـى متبشتـن
يتوحـوح كتيـر ريشـاتـو يتـهـزِّن
يبكى الماضى وأفراحو الرحل زمنـن
مسكين ما لقى الفى حالو يرتى يحِـن
***
قالك فى شبابـك يـوم أخدلـك إذن
لاترجّـى الاجـازة دة للإجـازة بـجِـن
لو فاكر حيصبر زى قبيـل مـا أظـن
يتصبـر وراك ربـع القبيـل صَبَـرِن
***
من وسط الجحيم ليكـم رسايلـو بِجِـن
ويهدى ليك سـلام وتحايـا مـا بغِبّـن
ما أشرق صباح بى يوم جديـد يعلـن
وما عانق نسيمو فريع رطيـب ولـدِن
***
ما سالن دموع فـوق الخـدود يجـرِن
وما ناح العشوق يبكى الفراق وغِبِـن
وما سهرن قلوب جار الزمـن ظلمِـن
وعَد ما ابواب وصالك ليـه يندسـدن
***
إبتدى فى الكتابـة عيونـى يتقـدِن
محل ما كتبت كلمة القى الدموع يمحِن
خليت الكتابـة أها يـا الدمـوع صُبِّـن
واجرن لا تقيفن وفى الصبيـب جِـدِّن

ماضي الذكري/ إبراهيم إبنعوف
.....................

الرابط:

ماضي الذكرى
.............
النص

ماعارفين حبـــال الذكـــــري
تنجـــــــر فـوق قليبي سيوف
نرسمو خلا ما ضي الذكـري
غدار في الغرام معــــــروف
***
ياخــــــــــــــلا تعرفــو البيـا
البي ما بتطـلو حـــــــــروف
ما لســــــه وتـــــــراي للــي
في سجـــــــن الغرام مكتوف
***
الحـــــــــال التوصفــــو فيـه
ظاهـر وللعيون مكشــــــــوف
والله العظــــــــــــيم كان تبكو
لو شفتــــو الدفين في الجوف
***
داجـــــــــــــــي علي ياخلايا
اهيم البال علي مغــــــــروف
مـــــــــــــا جايب خبير للدنيا
زي فاقد السمـــــــع والشوف
***
ناحل جسمــــــي شاحب لوني
زي زهرا ضبل ملفـــــــــوف
لكن الهمـــــــــــــوم والحسره
زي الضاربي فوقــــــي دفوف
***
ياخلا البريـــــــــــــــــده قليبي
يوم لقياها ما معـــــــــــــروف
املتا وكتيــــــــــــــــر راجيها
خاب ظني ورجع مكـسوف
***
ماقادر اقـــول خلــــــــــــــتني
او جارت عليـــــــــها ظــروف
ولا قــــــــــــادر اطمن نفســـي
من فارق الظنــــــــون والخوف
***
بقيــــــــــــــت اشـــــــتاق لليل
اقول يمــــــــــكن خيالا يطوف
يرجع لي صوابــــي افيــــــــق
يعـــــــــود قلبي القبيل مختوف
***
تمر ســــــــــالت دقيش نسمات
عبير طيـــــــــبا يفوح مسروف
يرد روحي و يبل شـــــــــــوقي
ويصيب جـــرح الاسي المالوف
***
يعود الليـــــــــل واعــــود لبكايا
في ليلا طــــويل مــــــــــردوف
منداري من الجحــــــــــــيم ياخلا
من فوج بالهموم مزفــــــــــوف
***
اسوق بين الدمــــــــوع والحسره
داير لصباحــــــــــــــــــي اشوف
حليل شمسا تعيدو صبـــــــــــاحي
في دنيايا طــــــــــــــــاقي كٍـسوف
***
قط ما كان غريب ياخـــــــــــــــلا
الحب لمصـــــــــــــــــايبو اشوف
من شدة هــــــــــــــواي في دربو
صار عندي العــــــــــذاب مالوف
***
يسعــــــــــــدني اني صنتو هواها
بادلتا العــــــــــــــــــذاب معروف
زي ما صان قليـــــــــــــبي هواها
طوع في غناها حــــــــــ ــــــروف

مالى أنا كل ما أقول فى نفسى إتلمينا
ألقى أقدارى تضحك ..ولى تقول كضِّاب
وكل ما أعمل حساب لظروفى
زى الما عملت حساب
مالو فراقنا مترقبنا .. دون خلق الله
واقف ديمة عند الباب


بوست رائع جدا

الرحمة للراحل ياسين عبدالعظيم

Quote: بوست رائع جدا الرحمة للراحل ياسين عبدالعظيم

بت الصادق شكرا للمرور وربنا يخليك

شكرا علي هذا البوست الجميل
ممكن روابط لحفظ الاغاني؟

الله يرحم يس عبدالعظيم الذي رحل سريعاً
ولكنه ركز مداميك الغناء المعافى
الله يرحمو والبركة في عثمان عبدالعظيم
وبقية العقد الفريد من الشباب الذين
طوروا الطمبور بالكلام الجديد الحديد
ولي عودة كان الله هون.

Quote: ولي عودة كان الله هون.

أكيد بهون يا محمد غناء يس بجيبك راجع

يا ود جبريل معليش انا الفرجيخة في الواطة غلبتني جبت الكرسي ده وجيت بس ما يجي طارق جبريل يقومني منه

Quote: يا ود جبريل معليش انا الفرجيخة في الواطة غلبتني جبت الكرسي ده وجيت بس ما يجي طارق جبريل يقومني منه

ياكونت كرسيك مامشكلة بس رجعو لي وراء شوية شان الدارة توسع شوية

وبعدين طارق كان جاء ياهو الكبير تقوم طوالي

يس عبد العظيم يحكي طرائفه في الحفلات

العيد مبارك

الرابط:

العيد مبارك

أبراهيم ابنعوف


العيد مبارك والمراد ينتم حبيبى
ونقابل الجاى فرحانين نفارق الهم
فى بعدك بقاسى المرة وأتألم
واتصبر واقول المولى ليا قسم
أأخر فى شبابى الفات ويتقدم
ألا بس ما عارفو من عمرى المفضل كم
حبيبى بتعذب عشان عينيكى ما بندم
وغيرن ما شكيت لى زول ولا أتظلم
فى حورن بشوف سعدى وشقاى متلم
وريدن يجرى فى أعماقى مجرى الدم
حبيبى أساسق فوق دريب وصلك ولا بنجم
من شوقى العليك لى يأسى ما استسلم
كلما أمالى فيك قدامى تتهدم
أرجع بدموعى ... وبكرة فيك اعشم
حبيبى اجيك مشتاق وأقول بالبيا اتكلم
وانسى انا لما اشوف عينيكى تتبسم
اخشى انا فى عتابى معاك أتلوم
أنت زعلك ما بدورو وما بدورلك هم
حبيبى واشوفك زى عيونى ومن عيونى أعظم
ومنو الفى خاطرى صورته وفى لسانى نغم
غيرك أنتى ياالغيرك حياتى عدم .

فوووق

لك كل الشكر جلال للتوثيق وروابط الاغاني التي نقلتني الى سنوات مضت .

Quote: لك كل الشكر جلال للتوثيق وروابط الاغاني التي نقلتني الى سنوات مضت .

ود حسن خليك قريب الغريق قدام

أبويسرا إنت جبت النص أحب أشير ليك لي حاجة في الأغنية دي

كتير من النص لم يلحن، وهنالك نص تم تعديله من قبل يس والشاعر ولايوجد في القصيدة

دا الرابط:

العام بدا

Quote: تعال قص البلد وارجع للشاعر محمد الحسن حسن سالم ( حِمْيد) تعال قص البلد وأرجع تعال أدي الغُبش طلة بقالا الليل غـُتا ومُقــــنع سُترتك يا صــباح الله ضُراعك ِمدو لي رضع ضروع أُماتو قطن قط مراكب شوفا لا مشرع ولا بان في مداهن شط تعال يا شافي يا كافي شموخاً في زمن منحط من الفي تعال بجي المافي معاك وهطنا وإتوهط تعالنا نحــن من شـــفع نفك الحيرة بي حيرة متين ما الليل يصن نسمع وراء الآهات غُلب نوره أبوي قالولنا جيبن دا صباحات الله بخيره تويب أمي الزمن هدا صباحات الله بخيره وصــــــباحات الله لاقيته لا كـــراسه لا قلمه صـــــباحات الله لاقيته ململم في العيون ألمه صباحات الله لاقيته تجود في الضحى وتضفر صباحات الله لاقيته تليس في شقوق بيته صباحات الله لاقيته أكان لاقيته في مشرع مكان خليتا تتوجع اكان لاقيته في مستشفى فطن إنداي جامع سوق محطة ملمة أكان في بيته أو مصنع محل لاقيته تنذمر مكان خليته تتوجع تكد تكدح تباصـــــر كم رجاء أتقطع أبت تطلع من المدفع طلع خازوق خوازيق البلد زادت طلع نمراً وراهو ضباع وضاع ما ضاع وكان ما كان يفـــيض النيــــل نحيــــــض نحن يظل حال البلــــد واقف تقع محنة طلع خازوق خوازيق البلد زادت سألت عليـــــــها مشيت ومشيت مشــــيت خشــــيت علـــــى حلة لاقيت شعاع ضال من ضو صباح الله لاقيت شعاع أســـمرقاعــدلو فوق بنبر كـــــابي المُـــــــــرس يســـكـــــر قنبت جنبو معا دار الحديث ما دار حدثني بى حرقة حبيته من جواي حبيته حبيته في الحلوة والمُرات شايله القُداحه معاي آدتني وأديته حـبيته حــبيته في يوم من الأيام هــلوس مع الفجاج هلوست دون أحلام من دكة الحجاج ضلوا الشمس ريحين واحد عماك يا أم زين والتانى لفحـك وطـــار باعوني للفرقة باعوني للدولار ملعون أبوك فُرقه ملعون أبوك دولار أنّ الشعــــــاع الضــــال أنينا أنينا صنّ الشعاع الضال صنينا صنينا ما صــــن غنى و قــــــــال غنالي بحرقة غنالى يا هاجــر عقبت يا باكر قاطعني يا هاجر رددت يا هاكـــــــر في الضلمة أولادك في الفيها طـــول اليوم لا زاده لا زادك يا مرمى لا ضل بيت لا أرث أجدادك يلا وجراحاتك طحلب ضــــلام الليل دهده صباحاتك الســــــــولبك خلاك برد الخمور مفتون في أفقر وضع ختاك فاجر وسخ مافون يلا وهياك يلا لا عن صباح الله صبح الغُـنا الميمون صن الشعاع الضال غنا الشعاع الضال ما صن غنا وقال يا هاجر التسعى بين الوطـــــــــــــــــــــ ـن والبال باب الفجر بفتح فتح القلب موال فتح اللبق في الصيف تالا الشتل تربال باب الفــــــــجر بفتح يا وضع يا دجال باب الفـــــــــجر بفتح عند دقة الرجال غنا الشعاع الضال غنينا طولنا سوا شال النغم عتال بايتين عيالو قوى باكرنا سترة حال ياكر رغيف وروى باكـــرنا بقة فال باكـــــــر كتاب ودوا باكــــــــــرنا للأجيال ينشر نور وهوا لا تلاقي فيهو وبال لاهم بُعاد لاجوى باكــــــرنا يا ضلال لسع بلال ما زال وما دام بلال لسع على الرمضا وهجير يلسع ما دام في أطفال بتتوجع صباحـــــات الله يا بيضـــا وحيحة نوره لاهسع فجيعة يا نوره يا فُقرا ترف من شدره لى شدره تلف الدنيا كايسالكم صباحاتو ما انتو بقوا من الأرض مطره تعالى وشى الوطن دركان عساكر آخر الزمن واطه تعـــــالى وما على كيفك تعـــــالى وريحي الواطه بلدنا أن جيتي دي الكوكب تعالي من اليسار شمساً تشرق الغربوا المركب تغربي يا غرب يا باني الكـــلب يا تجار المــــــوت والرعب لو ريح ليلكم طفى الصحوة نسل الصحوة في جوف الشعب ِبقى وضوي نواحى الدرب التالا الفجر الوطـــــــــــن القلب القلب الشايلك وما ختاك وكان ختاك أبداً ما خطاك بس يا نوره الصاح و الصبر لمي معانا قُطـــــــنة البدري نغزل منها كفـــــــــــن الليل ننسج منها توب الفـــــــــــجر فــــجرن تكسو محنتو الفُقرا من التعب البلا صـــــــالح يجبد الكُدّح الأُجرا يلا بوليس بلا أجرا شنو الخايفينلو يا فقرا بيوتا جنها المطره دقيقاً ما يفك الريق سمكتن مافي في بحرا شنو الخايفينلو يا فقرا شديراتن بقت حطــــبه تمرتن ما تفك طلبه شنو الخايفينلو يا فقرا بهيماتن تسوى الميع مغبش كالترب بصرا شنو الخايفينلو يا فقرا ######تن لا قلب لا حيل هوت في شبح فوق خيل كان يتداعر آخــــر الليل نرت والشبح حدره صدت للصريف فتره كان صوت الرصاص قفره أنَّت والخلق نايمين صنت والخلق نايمين عفنت البلد يومين ###### العمدة جاب خبره شنو الخايفينلو يا فقرا شنو الداخرنو في متره أبو الأربل لأبو الواسوق أبو المحرات وساقية تسوق لأبو بقره يا بقر السواقي السايقى للأمرا شنو الخايفينلو يا فقرا أبو البوليس إذا ما كان أباتم من طرف فقرا يحرسوا القصر للتلفان وللفي الليل زنى ودعره ويقوموا مع النهار وزراء أبو البوليس إذا ما كان أراضيهم يبس شدره يحرسوا طلمبة الجازولين يقيفوا على البنوك غفرا إذا ما الشارع استنفر غبش عزل بستنكر على القيصر خساستو تقول للغيم محل مطرك قراب منك دالفينك يضم صدر الوطن حاني يهز للظلم ساساتو تحن لباكر الأخضر يعم بى خيرو ناســــاتو تنادى الفارس الأسمر تطالب بي قصاصاتو من الفجار من العسكر ابو البوليس إذا فكر يفك فيهم رصاصاتو أيا بوليس أيا نازل من المريخ جباة الدم من التاريخ أيا واقف لهم كالسيخ تقيف لنا لامتين دغري حقارتك تبقى في فقرا فضيحة فجيعة يا بوليس وجايين من فرد شدره جنانا العاق متين تصحي تشوف الحاصل المزري متين تدري بأنو الصوت ده ما مكري معتق للوطن دغري و بأنو الجاري ما منك على صدر الوطن يجري وخطاهو التيربت قدره تلاقى الفــــجر والفقرا

أهلي الافاضل
حبال الذكرى
المن الله واصلي
أهلي الافاضل
من الشعراء أيضا
الحبيب وعوض أحمد عمر
... كان رحيل يسين فاجعة
أذكر أثناء مرورنا لتوزيع بوستر التابين في المنطقة من حسينارتي وحتى الدبة
مررنا بمنطقة (عبسه) وكان الناس يتحدثون عن شابة تدعى (جمال) ظلت في حالة أقرب للصيام ولم يقرب الماء جسدها لأكثر من شهر
على فكرة أقيم التأبين أمام دار اتحاد جامعة القاهرة الفرع (1987) وابنه أبراهيم ابنعوف بقصيدته المذكورة والتي تم تلحين جزء منها واداؤه من خلال مجموعة من الفنانين كما أبنه حميد بقصيدة يسين.

Quote: ... كان رحيل يسين فاجعة

أخونا عبد المنعم الحاج شكرا للمرور وإثراء البوست وياريت تحكي لينا عن يوم الرثاء


رثاء يس عبد العظيم
كلمات : خالد عباس شقورى
ألحان : عبد العظيم منصور
غناء :عبد العظيم منصور

رابط اللحن:

رثاء يس

عـِــيـــنــِـيـــنـَــا سَـــالـَـــتْ أدْمُــعــِــنْ كـِـيــفـِـــنْ دُمُــوعْـــنـَـــا بــِـنـَـحْــبــِــسـِــن
مَــانـِـحْــنَ يـَـا الــرَّاحْـــلْ الـمُـقـِــيـــمْ فـِى الــدُّنـْــيــَـــا لـِــسَّـــه بــِــنــِـمْـــتـَـحـِــن
الــلـِّـيـــلـَــه يـَـا لـِـيــلـْــنـَــا الـطـَّـويـــــلْ ويـــنـِــنْ نـُـجـُــــومَــــكْ وضَــــوَّهــِـــن
والــــــلاَّ الــحُـــــــزُنْ غـَـــيـَّـــــمْ سَــــمَـــــاكْ خـَـــلاَّهـُـــو سَـــاهــِــلْ عـَـــدَّهــِـن
أنـَــا كـَـانْ بـَـكـِـيـــتْ أنـَــا كـَـانْ شَـــكـِــيـــتْ أنـَــا لـَــوْ عـُــيـُـونـِـى أقــَــلـِّــعــِــن
دَمْـــعـَـــاتـِــى مَــابْ طـُــولـِــــنْ رَثــَـــاكْ عــِــيـــنـَــيـَّــا حَـــقــَّـــكْ مَــابْ يـَــفـِــن
( يـَــســـنْ ) أخـُــوىْ عـَـــادْ الــسِّــــنــِــيـــنْ كـُــــلَّ الـحَــصَــــلْ مَــا مـِــنــَّـهــِـن
وأيــَّــامْـــنـَــــا مَــحْــسُـــوبــَــاتْ هـِــنـَـــاكْ فـِـى الــلـُّـــوحْ مَـــلاكْ بــِــيـــدَوِّنــِـن
يـَـا حـِـلـِــيــلْ حـِــلـِــيــلـُـو غـُــنـَـا الــفـَـريــقْ لـَــمَّــنْ يـُــطـُــوفْ فـِـى حَــيـَّـهــِـن
تـَــلـْــقـَـــاهـِــنْ الـــبـَــنـُّــوتْ هـِــنـَــاكْ فـِـى لـَــهْــفـَــه لـِـيــكـَــا بــِــيـَـسْــمَــعــِـن
يـَـا حـِـلـِـيــلْ رَبـَــابـْــتـَــكْ فـِى الــعــِـصــِـيــرْ وأسْـــلاكـَــه دِيـــمَــه يـَــنـَــوِّحـِــن
تـَـحْــكـِـى الـدَّفـِـيــنْ شُــوقْ أبْــنـَـعُــوفْ فـِى ألـَــمْ الــسِّــنـِــيــنْ ومَــصَـايــِــبــِـن
صُــوتـَــكْ يـَــسَـــافــِــرْ فـِـى الــقـُــلـُـــــوبْ جُـــوَّانـَـــا يـَــرْسَـــى ويــِـنـْــكـَـمــِـن
وحـِــنـَّـــكْ يـَــبــِــيـــنْ بــِــيـــنْ الـحُــــرُوفْ ومـِــنـُّــو الـحُــــرُوفْ يــِـتـْــأوَّهــِـن
حـَــتــَّـى الـغـُــصُـــــونْ الـكـَـــانْ تـَــمــِــيـــلْ حـِـــسْ الـقـَــمَـــارى يـَــهــِــزَّهــِـن
الـــلـِّـــيـــلـَـــه عـَـــادْ حـُـــزْنْ الـــزَّمـَــــانْ قــَــبـَّـــلْ عـَــلـِــيــهــِـنْ ويـَــبـَّــســِـن
نـَــخـَـــلْ الــغـُــبـُــشْ أهَـــلـِـى الـحُــنـَـانْ يـَـا غـَــالــِـى لـِــيـــكْ دَايـْـمَـــاً يـَـحـِــن
وفـِى الـطـِّـيــنْ تـِـحـِـتْ مِـنْ فـُـوقْ يـَـحـِـتْ تـَــمْــرَاتْ سَــبــِـيــطـُـو يـَــشَــتــِّـتـِـن
الــنـِّـــيــــلْ هَـــمَـــدْ حـَــزْنـَــانْ عَــلـِــيـــكْ رَافــِــضْ مَـــرَاكـْــبـُــو يـَــسَــــيــِّـرن
ومِـنْ قـِـيــفْ حَــضَـــنْ فـِى يـُــومْ خـُـطـَـاكْ مُـوجـَـاتـُــو قــَـاسـِـى بــِـيـَـرْحَـــلـِـن
أتــَـارى الــسَّـــوَاقـِــى الــكـَــانْ زَمَــانْ تـِــتـْــبـَـاكـَــا طـُــولْ الــلـِّــيـــلْ تـَـــئــِــن
عـَـــارْفـَــــاتْ فــُـــرَاقــَــــكْ لـلـــدِّيـَــارْ ودَه الــشِّــى الـحَــمَـــاهــِـنْ يـَــفـْــرَحـِــن
وآه الــشَّـــمـِــسْ حـَــضَـــنـَـــتْ غـُـــيــُــومْ مَـــزَجـَــتْ صَــفــَــارَا بــِحُــمْــرَتــِـن
سَـــكـَــبـَـــتْ دُمُــــــوعْ لـُــــونْ الــشَّـــفـَـــقْ كـَـــانْ الـغـُــيــُــومْ يــِـتـْــصَــبــَّـرن
والـكـُــونْ بـَــكـَــاكْ لـَــفـَّــاهـُــو لـِــيـــلْ مَــا عـَـادْ نـُــجُـــومُـــو بــِـيـَــشْـــرقــِــن
وقــَــفْ الــزَّمـَــنْ فِـى يـُـــومْ أسَـــاكْ أسْـــــيـَــانْ ســِــنـِــيـــنـُــو يـَــضُـــمَّــهــِـن
يـَــبـْــكـِــيــــكْ أخـُـــــوكْ يـَــبـْــكـِــيـــكْ أبـُــــوكْ أخـْـــوَاتـَـــكْ إنـْــتَ وأمَّـــهــِـــن
وأصْـحـَــابـَــكْ الـعَــايـْــشـِــيـــنْ مَـعـَـــاكْ حـِـلـْــوَاتْ ســِــنــِــيــنـَـــكْ ومُـــرَّهــِـن
نـَــبـْــكـِــيـــكَ نـِـحْـــنَ الــكـَـــانْ دَوَامْ فـِـى عـِـــزْ غـُـــنـَـــاكَ بــِــنــِــنـْــسَـــجــِــن
وغـُـــنـَــــاكَ يـَـا طـِـــــــبَّ الـجـِّــــــرَاحْ الـــمــِــــنْ غـُــنــَـــــاكَ بــِــيـَــنـْـــزفــِــن
يـَـا غـَــالـِــى لـَـــوْ كـَــانْ الــسِّـــنــِـيـــنْ الــــزُّولْ بــِـى إيـــِـــدُو يـَـــقـَــسِّـــمــِــن
قــَــدْرْ الــبـَـعــِــيــشـِــنْ تـَــانــِـى عـَـــادْ أنـَـــا لــِــيـــكـَـــا طـَـــايــِــعْ أوْهــِـبـــِــن
لــَـــكـِــنـُّـــو آه رَاحْ الـــزَّمَــــانْ وتـَــانـِـى الــسِّـــــنـِــيـــنْ مَــــابْ يـَــرْجـَـــعــِــن
وعـَـــزَانـَـــا إنــَّـــكْ فـِى الــشُّــعـُـــورْ فـِى ذاتـْـــنـَـــا فـِى الــسِّـــــلـْـــكْ الــبــِــرن

شكرا لك ولاهتمامك بالفنان الكبير الاخ يس عبد العظيم
لقد قمت بتوثيق مهم لمعظم اعمال الفنان بس فى هذا الموقع من قبل وفى مواقع اخرى ..
ونسبة للاهتمام الكبير الذى يجده من القراء انقلكم مباشرة بتوثيق مهم قمت به لموقع زول لابناء العفاض عن الاخ الصديق يس
اشكر كاتب البوست الاخ جلال والمتداخلين على اهتمامهم الكبير
...


اقر هنا



http://www.zoal.org/vb/t391.html

Quote: لقد قمت بتوثيق مهم لمعظم اعمال الفنان بس فى هذا الموقع من قبل وفى مواقع اخرى ..

الكيك سلام ليك وربنا يرحم يس

قريت البوست بس إسمح لي بي ملاحظة بدون زعل

التوثيق ما كان لمعظم أعمالو

وناقص الأغاني كاتب شعر بس

ودي

عيني بالدموع ملياني

إبراهيم أبنعوف

رابط الأغنية:

عيني بالدموع ملياني


النص:

عيني بالدمـوع مليـاني عيني بالــــدموع مليانـــي
ماعـارف المحن بمشيلا ولا هي قاصــدي تتلقاني
***
ليه ما اكتب غنـاي بدمعي وامزج بالحزن الحاني
اشعار تحكي عن مأساتــــي تشـرح للبعيد والداني
***
داير اقـــولا ياخلق الله ياخلق الله مــــــالو زماني
لارحم الصغر في صغري لارحم الكبر في كياني
***
الناس في سعــاده وبهجه انا بحر الهمـوم ضماني
وين قـــارب نجاتي آخلقو ولا انا دايمــا الأخراني
***
ياريت السعــــاده قريبي كان تسمعني أو تلفـــاني
لكن كيف أصيـح ليها والعبرات معضــــي لساني
***
اهرب من دناي وين أمشي ياريت الامــاني اماني
طال ما الدنيا ياهـا الدنيا طال ما ياني ياني انا ياني
***
ياسجم السجم يابخـــــــــتي ياحظــي المولي وفاني
كيفن في الشقــــاوه عترتا والخير فاتني وإتعــداني
***
اه يامرتـــــــي المليــــــوكه يانار قيدي قيـدي وتاني
من مغصا مقطع قلــــــبي في جــــواي كاتمو لساني
***
اه ياقدري كـــون في همي راجيك من قبل ترجـاني
هـــــــم وأحـد بودر سيدو متلمــات علـــي تمــانــي
***
في ها الدنيا شــن ســويتا متعـــــــذب كانـي الجاني
شان لاتبــتا لااستغفرتا من حب زول مـلك وجـداني
***
حتي الكان كفر بي سببي دا بي صور الجمال أغراني
اصلي انا من لمحـــــتو كفرتا إتشهـــدتا وأســـلم تاني

Quote: وااااصل مع يس عبدالعظيم الله يرحمه ويغفر له فنان بقامة بلد وصوت لا أظن ان الدنيا ستجود علينا بمثله مرة أخرى

ود الشريف ياعمكـــ
خليك مع الطنبور بتاع يس الشبعان دا

احيييييييييييييييييي انا من الوجع ده



في ها الدنيا شن سوييت
متعذب كاني الجاني
شان لا تبت لا استغفرت من حب زول ملك وجداني

جلال جبريل ياخى مالك علينا زكرتنا الليله بى زولن بكيناه بدل الدموع دم ياخى عبد العظيم ده لو مالغدر اتكتب فى اللوح كان بكون علم فى الغناء السودانى كله وغنا الطمبور خاصة وحانقول شنو غير الهم ارحمه رحمة واسعة فقد كان بسمة تنعكس فى وجوه كل الذين بسمعونه .
اللهم يارحمن يارحيم ارحم يسين وادحله الجنة

جلال جبريل يارائع
اسعدتنا وابيكتنا معا لك كل الود

وضعت رابط لأغنية ياريت الدموع تنفعني على حائط الفيسبوك فوصلتني هذه الرسالة

Quote: مجيد أماني ما قلّب علي مواجع عارف يوم المرحوم الفنان يسن صاحب المدرسه الما بتتكرر صعدت روحو الطيبه لي باريها ونحن راجعين من زواج صديقي المهندس ابراهيم شمعون للخرطوم فجأه أسمعلك ركاب الباص كلهن حريم ورجال يتنخجو لحظتا كنا في منصوركتي سألت اقرب زول جمبي وعرف منو إنو جاهن خبر وفاة يسن تصدِّق وتامن لامن وصلنا أمدرمان تاني يوم البكي ما وقف وزول ضاقلو لقمه مافي رغم إننا باص عرس؟

Quote: تصدِّق وتامن لامن وصلنا أمدرمان تاني يوم البكي ما وقف وزول ضاقلو لقمه مافي رغم إننا باص عرس؟

يوم وفاة يس هو اليوم الوحيد الكانت فيهو الشمالية حزنانة في وكت واااحد

الفنان الراحل مصطفي سيد احمد بحكم انه انسان مبدع وكان يري ما لايراه الاخرين
في اعتقادي انه انتبه الي موهبة الراحل ياسين مبكرا جدا(اي في بداية يس الفنية)
فقد تناول مصطي عدد كبير من اغانيه بطريقة مختلفة(لحنا وكلمات) علي سبيل المثال-يامطر=بت العرب النوبية- نزرا- الشوق من حاطف لاقاطف وغيرها كثير
للفقيدين الرحمة

Quote: الفنان الراحل مصطفي سيد احمد بحكم انه انسان مبدع وكان يري ما لايراه الاخرين في اعتقادي انه انتبه الي موهبة الراحل ياسين مبكرا جدا(اي في بداية يس الفنية) فقد تناول مصطي عدد كبير من اغانيه بطريقة مختلفة(لحنا وكلمات) علي سبيل المثال-يامطر=بت العرب النوبية- نزرا- الشوق من حاطف لاقاطف وغيرها كثير للفقيدين الرحمة

ودي خطوة لي قدام إنشاء الله نشوف الأعمال الإجتمعوا فيها مصطفى ويس

شكرا يا أحمد ياخ

Quote: جلال جبريل ياخى مالك علينا زكرتنا الليله بى زولن بكيناه بدل الدموع دم

صدقني شافت عيني ناس لي هسي بيبكو عليهو لامن غناهو يتغنى في الحفلات يانور الدين ربنا يرحمو

Quote: احيييييييييييييييييي انا من الوجع ده

تصدق ياعبد المجيد أنا مع صوت يس ماممكن أسمع أي شئ

حتى إني بقفلو لامن يكون في زول بيتكلم معي

يا اخ جلال او الكونت
عايزه اغنية القوافل الراحلة ليعقوب تاج السر
رحم الله ملك الطمبور ياسين عبدالعظيم
ياحليل ايام الجامعة ورابطة الدبة ومروي والغابة

Quote: يا اخ جلال او الكونت عايزه اغنية القوافل الراحلة ليعقوب تاج السر رحم الله ملك الطمبور ياسين عبدالعظيم ياحليل ايام الجامعة ورابطة الدبة ومروي والغابة

أكرام أزيك أمسكي عندك القوافل الراحلي

دوسي الرابط تبدأ الأغنية في التحميل معاكـــ طوالي

القوافل الراحلي

رابط أغنية:

المن الله واصل

إبراهيم أبنعوف

أبكـى إنتـى وأنــا اللإتبـكـى .. الـمـن الله واصــل
إيه فى إيدنا غير ما نبكى .. نحكـى البينـا حاصـل
***
تعاتبيني وتهـيَّـج نــارى .. قـولـة مــاك مـواصـل
إنتى ما عارفة السبـب مـن أهلـك الباقيـن عـوازل
كاسوا فراقنا بس دايرنى .. أحيا غريـب وهامـل
وأنا أرحم لىْ فـراق الدنيـا .. مـن عينيك و ساهـل
***
أريتن عرفو روحى بلاكـى روضـاً زهـرو زابـل
مــن تلـقـاك تفـرهـد تـانـى .. زى الصـابـا وابــل
تلاقـى الفرحـة فـى عينيكـى .. للأشـواق تـغـازل
فوق جدول أمل يتجـارى .. يـروى الريـد مشاتـل
***
تسـألـى بالبسيـمـة التـايـه.. كـيــف بالله عـامــل
أخاف حزنك وأخبى البى معاكى أضحك وأجامل
عمرى العشتو كلو وراكـى .. بـى أحزانـو حافـل
لـكـن الصـبـر يــا روحــى .. كــل الفيـهـا زايــل
***
زى ما إنتـى تسألـى عنِّـى .. عنِّـك برضـو سائـل
وصورتك عايشة فى أعماقي طالـع بيك و نـازل
ألقاك فـى الصبَّـاح وإشراقـو .. فـى نغـم البلابـل
فـى كلمـات كتبتهـا ليكـى .. تــب مــا قــالا قـايـل
***
لو بقدر أفارقك بيك مـا أصبـح جسمـى ناحـل
ولا بـاريـتَّ درب الـريـد .. ودرب الـريـدة قـاتـل
ولا شقَّتْ مراكب آمالـى .. لججاً غير سواحل
ولا أمسيتَّ أناجى دموعى .. والليل نجمـو راحـل
***
هـم دايريـن يفرقـو قليبـى .. شافـو عليكـى مـايـل
منـو الفيهـم يفـرق النسمـة .. مـن زهـر الخمـايـل
مهمـا أشقـى أضـوق المُـرَّة .. لـلأهـوال أقـابـل
أبداً يا كتاب حبى المقدس عندى مابيقراكـا جاهـل

مشكور ياودجبريل

ربنا يديك العافية

Quote: مشكور ياودجبريل ربنا يديك العافية

العفو يابت الصادق نحن تحت أمركـــ

بالمناسبة نحن دي شان معاي الكونت

فوووق

حكاية الشافعة

رابط الأغنية:

حكاية الشافعة

إبراهيم أبنعوف

مادام عشمي في نظرة والندو النظرة مابي
كيفن أصبرقليبي كيفن اعمل حسابي
أجرو غناي احكيليكم اقيفو اسمعو يا صحابي
حكاية الشافعة البريدا وريدا شقاي وعذابي
أحن الحن القماري تقوقي باوتار ربابي
أهوى الهوا في هواها وهواها قرايتي وكتابتي
***
منو القال ليكم عقلت وحاتكم جنيتا دابي
بقيت لمن ليها افارق افارق عقلي وصوابي
اقول لمتين ليها ارجع اخاف يطول بي غيابي
اعاين زين فيها وأشبع وازيد اعجاب على اعجابي
***
أشرق وين وين أغرب اشيل همي واكتئابي
محل ما امشي الاقي طيفا يهاتك فكري وحجابي
تطير روحي تقيف تقارن خدودا وزهر الروابي
وتتعلق بين عيونا ورموشا البي فوقا تابي
***
قليبي يفارق ضلوعي يلاهي عليها ويشابي
ضعيف مابيقدر يقاوم بريق البسمة السحابي
صديرا لما يهتز يبق نار الله في اعصابي
ايديتن كيتن علي آنشاف ريقي وخم ترابي
***
حنيني ومرات بتقسى تقول في نفسها اتغابي
وتتغابا العرفة فيهو آدرابت الحب وخرابي
صحيح أصبحت مملوكا تسوي الراضي والمابي
متل مما ملكت فؤادي ملك شيطان الكتابي
***
أخاف ما بقدر أعاتب أقول تزعل من عتابي
أموت أحسن من هي تزعل أو تزرف دمعة صابي
عشانة انا كم ضقت مرة عشانا مهمل عقابي
وعرفت الله في عذابا وتخاف الله في شبابي

أغنية هاشة باشة ودي من الأغاني النادرة للراحل يس

رابط الأغنية:

هاشة باشة

تسجيل نادر لأغنية هيام


رابط الأغنية:

هيام

أحبك ياربيع روحي

الربط:

أحبكـــ ياربيع روحي

أحبك ياربيع روحي

الربط:

أحبكـــ ياربيع روحي

أخونا ود جبريل..
رغم أن المقام والمقال في التوثيق لأعمال وسيرة الراحل يسن عبدالعظيم..
إلا أنني لفت نظري واسترعى انتباهي الملمح التصويري والإبداعي للفنان ابراهيم ابنعوف..
فهو امتداد لسيرة العمالقة: ود الدابي وعبدالله محمد خير وسيد أحمد عبدالحميد..
وجيل الشباب محمد سفلة وعلاء عبدالرحيم ود شقوري وحاتم وغيرهم من المبدعين..
رغم أنني لا أمتّ بأية صلة لمنطقة الشايقية.. وآقصى ما رأيت من حدود الشمال مدينة الكدرو..
إلا أنني من المهتمين بهذا التراث الانساني البديع..
وقابلت عثمان عبدالعظيم في زيارته للرياض قبل خمس سنوات..
كان يحمل صورة الراحل يسن في محفظة نقوده.. ولا تفارقه لحظة..
ويتحدث عنه بإعجاب وفخر ومودة وحميمية..
واصل في التوثيق.. فالجيل الجديد حُرم من موهبة يسن الذي رحل مبكياً على شبابه..
له الرحمة والمغفرة ونسأل الله أن يتقبله عنده مع الصالحين والصديقين..
التعديل لاضافة اسم سيد أحمد عبدالحميد..

Quote: وقابلت عثمان عبدالعظيم في زيارته للرياض قبل خمس سنوات.. كان يحمل صورة الراحل يسن في محفظة نقوده.. ولا تفارقه لحظة.. ويتحدث عنه بإعجاب وفخر ومودة وحميمية..

أيمن دياب أتحفتنا بي مرورك

يس فقدته الشمالية كلها ولازالو يبكون حين تردد أغانيه

يبكون وكأنه توفى يوم أمس ... وأول الذين لازالو يبكون عليه

أخيه عثمان والشاعر ودأبنعوف ربنا يرحمو ويغفر ليهو

الأخ جلال جبريل

لك التحية

نسأل الله الرحمة والمغفرة للفنان يسن الذي اختطفته يد المنون وهو في ريعان شبابه وتدفق عطائه. نقلت هذه النبذة وقصيدة الرثاء من منتدى التوثيق www.tawtheeg.net والنبذة والقصيدة بقلم الدكتور توفيق الطيب البشير الي ربطته بالمرحوم علاقة صداقة قوية

Quote: تمهيد بهذه الكلمات التي لا تفوق دمعة حزن نزرفها في حق فقيد الفن والشباب حاولت أن أرثي أخي وصديقي الراحل الموهوب المبدع يسن عبد العظيم ... البلبل الغرد الذي هز الغصون وحرك الأوراقا ... بكيته فقصر البكاء عن حاجتي لراحة النفس وتعزيتها، ورثيته فقصرت الكلمات عن مخزون حزن شق عباب قلبي، واحتسبته فلم أجد أحر من الصبر واللوعة ... وفي ليلة من ليالي الحزن العصي ونحن في عمق النكبة قرأت هذه الكلمات على مسرح التأبين في جامعة القاهرة فرع الخرطوم ، وكنت قد لحنت هذه الكلمات لحناً حزينا بعمق الصدمة، واستخدمت فيه الصفارة الحزينة بدلاً من الطنبور وتدراستها مع الاخ الصديق الفنان المبدع صديق احمد فلما جاء وقت تقديمها اقعدته العبرة عن ترديدها وحرمته الدمعة من رؤيتها فتوليت قراءتها مكسور الخاطر ولم نزد على ذلك حتى يومنا هذا ... قطرات دم نزرفها على فقيد الشباب والفن كانت الحياة على ضفتي نادي الطنبور هانئة حالمة وكان الأمل يضيف إلى لوحته الرائقة في كل يوم لونا جديدا ... فامتزجت هذه الألوان وتجانست فبدت الصورة رائعة جميلة واكتمل الشكل ... ذلك الشكل الذي جسد ببراعة طريق الفن والإبداع ... وفي الثامن من اكتوبر من العام 1987م .. والليل وجيع .. اندفق المداد على لوحة الفن الهادئة فشوه معالمها ... وغاب القمر في ليلة بهائه عن سماء الإبداع .. فحلق غراب الشؤم على بقايا الوتر الجريح ... ضاعت حروف اللفيا ... وشلت عناقيد الكلام ... وصمت الحرف والليل والنغم ، فقد ماتت تلك البسمة التي ولدتها الطفولة البريئة وصقلتها سنوات الشباب المستنيرة بادب الدين وسماحة الإسلام فجاءت خالصة من كل شائبة وماتت خلفها كل بسمه كانت قد لمست رحيلها ! وذهبنا جميعا ندفن الفرح الذي تربى في وجداننا لتخرج لنا الحياة من رحمها الما وأسى وحسرة... لقد انتقل يسن إلى جوار ربه ونحن راضون بقضاء الله وقدره فكما اعطى اخذ .... رحل يسن ... كما يرحل العظماء ... وخلف وراءه اعظم ذكرى وأروع تراث .. فقد ترك خلفه بصمات جيدة الملامح على طريق ادينا الشعبي ... لقد كان طيب العشرة .. حسن الخلق ... وافر الأخلاق جم الأدب أحبه كل من عرفه ... وفقده كل من جالسه... واصطفاه كل من خالطه ... وفضله كل من استمع إليه ... فهو – رحمه الله - .... لم يكن مبدعا فحسب بل كان انسانا وقورا وأخا كريما ... ورفيقا مخلصا ... اعطى كل ما يملك ... فقد كان من الذين يؤثرون على انفسهم ولو كان بهم خصاصة ..... ولقد حاولنا ولازلنا نحاول أن نقدم لفقيد الشباب والفن وعلى أقل درجة من درجات العطاء كلمة نعبر فيها عن قليل مما قدم في رحلته القصيرة من أعمال تستحق الاجلال والتقدير إلا أننا عجزنا العجز كله ولم نقدم حتى ما يسد الرمق ... هذه مرثيتي أكتبها واعلم أني – إذ اقدمها – كساكب قطرة في لج بحر اقدمها لتعبر عن قليل مما تركه في نفسي رحيل الاستاذ يسن الا رحمه الله رحمة واسعة والهمنا الصبر وحسن العزاء ... قصيدة رثاء للمرحوم يسن قلبي تجـــــلدْ .. لاتعذبْني إني تقطّـــــعَ بالبكا كبِدي إني أراك اليــــوم مفتقداً ما فيك من صبر ومن جلد قد مات خير الصحب منزلة بالســــيف في بدر وفي أحد واستشـــــهدوا جودا بأنفسهمْ من لم يجـــــد بالروح لم يجُدِ كم قد شرَوْا بالجنة انفســهم واستبســـــلوا بالمال والولد فاســــــــتُبدلوا داراً بدارهمُ في عدلها اليربـــوع كالأسد ------------------- قلبي تجلدْ, لا تعـــــــــذبني إني تقطّع بالبـــــــــكا كبدي يسن قلى كيف فارقنــــا نغمٌ به نلقاك في حشـــــد قد زدت فوق الفن موهبة فانعــــم بها في عالم الأبد تــــــأتي بها مملوءة أدبــــا شِبْها لها ما طاف بالخـــلد يسن كل النــــــاس تعرفه من عاش أو من مات في لحد كم جسد الماضي البعيد لنا من دونه لا مرحبــــــا بغد ------------------- قلبي تجلدْ ... لاتعذبني إني تقطع بالبكا كبدي يسن نفساً, كان أطيبنا أفضاله تترى بلا عدد يسن جوداً, كان أكرمنا كان الندى من كفه يُعْدِى روحاً وحساً, كان أصدقنا في كل بيت كان كالوتـــد يسن حيّ, في جوانحـــــنا إن لم يكن قد عاش بالجسد يسن فينا ظل مشـــــــــتعلا إن فارق الدنيـــــــا ولم يعد ------------------- قلبـــــــي تجلدْ لا تعذبني إني تقطــــــــع بالبكا كبدي بُلِّغت في جوف المَسا خبراً أُسْمعتُه قسراً ولم ... أُرِد مالي أرى الدنيــــا معلقة في جيدنا حبلاً من المسد يمنا ويسراً لو نحــركه كيما نُجردْ, زاد في العُقَد قَدّ النّعيُّ الــــيوم سامعتي في جانبيّ الصوت كالرعد تبكى عليــــه العين عمشها دمــــــــــع غزير بيدَ لم يفِدِ ------------------- يسن قلي كيـــــف تتركـــــنا نسعى بلا رأس ولا جســد إن الحيــــــــاة الدنيا زائلة والموت حق ليـــس من بُدِّ والمرءُ فانٍ إن قضى أجل من قبل ذا، ما مُــــدّ في فند ما دام غيـــــر الله في أزل من خلقه ما دام من أحـــد لاشيء غير الدمـــع نزرفه نرضى بحكم الواحد الأحد 15/10/1987

مامان مرحب بيك

وجرح الطنبوربوفاة يس لازال ينزف

جلال... بكل أسف تسبب في موته مستمعيه
نحن كمستمعين طبعنا شين.. لما تكون حاجة جيدة نمصها حتى آخر قطرة
يس عبد العظيم ما كان بيقول لى زول لا
يغني للصباح عشان يرضى الناس و ويواصل الصباح بالليل وما بياكل لامن دمو اتحرق
مافي اتنين تلاتة بيختلفوا في أن صوت يس لايتكرر
مشيت أزورو في مستشفى الشعب.. لقيت أخو ود اليمني قال لى الدوام لله

Quote: يغني للصباح عشان يرضى الناس و ويواصل الصباح بالليل وما بياكل لامن دمو اتحرق

أخونا منصوري كلامك صحيح والطبعة دي في عبد القيوم الشريف هسي

شكرا ليك ع المرور

الوداع




إبراهيم إبنعوف

بس قول لي متين شفناك متين في الحي بقيتلنا جار
متين الإلفة تمت بينا لما الإلفة تبقا حسار
ليه داير تسيبني تفوت لسع ما انتهى المشوار
اخاف انو الزمن ينسيك ذكراي والزمن غدار يا غدار
ولا اطمني بي لقياك تقولي الزمان دوار
لا توصيني كتم الريدة ما بقدر على الاسرار
خلي الفي علوم الغيب انا السافي الفراق محتار
وراكي ألقى الصبر من وين وكت صبري لي إنهار
بعد الفات ده كلو تسيبني في الدرب النهايتو دمار
لا كلمات تطمن قلبي او صورتك تكون لي تذكار
ول خلاص تودر ريدي فاكر حبي ليك هظار
صدق ول ما تصدق ده إحساسي البخم أشعار
أمشي هناك أهدى ونوم وسوبني اسهر مع السهار
عشان في عيونك أعبد ربي واتلو اسمك مع الزكار
وإن هاجت على زكراك بترجى النسيم المار
إن كان فيهو جيب رواية او منك يجيب اخبار
وداعا والإله يرعاك اما انا حالي يا ستار
ما بقدر اقول أرجاك مخير واحب الأعمار
ولا بقدر الومو زماني اقوليكي الزمان بي جار
ما دام السبب بي إيدي كيفن ألعن الأقدار

أغنية الشاعر المبدع حسن الدابي المشهورة شتيلة قريرة تغنى بيها عدد كتير من الفنانين

والحن مختلف




شتيلة قريرا
الفجر نبحن بوابيرا
حليل تغريد عصافيرا
بلاها أصبحنا في حيرة
يازهرتنا النضيرة
حرام نقلك من الجيرة
دهب زادوه تجميرا
لفة خاتم ضميرا
شبيهة البدر المنيرة
ليك تاجوج ماها سيرة
نزلت العقلات الضفيرة
تداعب رمان صديرا
نظرتك قاسي تفسيرا
فيها انذارات خطيرة
ست الكل يا أميرة
روحي كفاها تدميرا
ضاقت وغلبت بصيرا
خلاص اتحقق مصيرا
فراقكم زادتي تعكيرا
وبلاك ما عندي تفكيرا
يا صلاح أم شديرة
تعود ونشم من عبيرا

جدي البرعن أراكن
سبيبك ولا ليل ساكن
إنت طبيبي بس لكن
رحل كت في القرير ساكن

يفوح المسك من فاه
مضمر واحسرتاه
الفريع الهتف نداه
تموع تتنى ما لاه

ليه عجلتي بالقومة
قريرنا معاكي شن لوما
عيني ما رأت نومة
بقت لك سبب الحكومة

ياظبية جنان مالك
فارقت القرير مالك
ربنا مالك الممالك
يحرق الكومر الشالك

شبيهة الصيد في البوادي
محكم عودك النادي
فاطرك برقو عبادي
الرزق يا جاهلة جبادي

فراقك قاسي ألمني
سواد عينيكي جنني
على الأحباب ماب تحني
فقد عقلي بقيت أغني

ليك برسل تحياتي
بضمنه موتي وحياتي
أتكرن وأمشي فلاتي
عليك يازهرة الشاطي

فريع المحلب القايد
عشانو أقاسي الشدايد
سهامو رماني أوصايد
ألمي الراح جاني عايد

بصلي وبعبد الباري
أقيم ليلي وأصوم نهاري
عشان الشاغلة أفكاري
الشلوخة قضيب الكباري

حليل الروقة والبسمة
حليل الضامرة منقسمة
شلوخ خديها مترسمة
قامت وكل شي قسمة

هنا

أجد نفسي مبعثر

بين

تذوق الهمس وجمال الدواخل


شكر جلال جبريل .. على هذه المساحة الجميلة للانسان المرحوم يس برد الله ثراه

تحياتي واحترامي

رميتي

لاتتبعثر يابا خليكـــ ململم

شان تستمتع معانا بالذكريات بتاعت يس دي ياخ

فوق

سنين الشقى مني عدك

إبراهيم إبنعوف

صِحْ بِقولو الريدة الكتيرة أساساً للجن مبادئ
وأناالبهديني من ريدك اخير يمشي يكوسلو هادئ

نادوس

محمد الحسن سالم

الحال وراك كيفن تسر باقيلك انتي بلاك في زين
ما تهشم ابريق الرضا خنست نسيمات السمح
والبسمه زي حبه قمح
لفحا وطفر طيرآ كتر
أورث غصافيري الضنى يبس غناها مع الفجر
هطل على الشجر الهموم وشاشات نهارات العنا
عانيت وراك جنس عنا
بوغ سهادي كرو النجوم
خطو المواويل ارتعش
حرس عصاتي بنات نعش
دومست فوق حجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت على كم ميضنه
وما بين عيونك والمغول
ساهد بي قافله الحروف
وايقاع ظنابير الزمن
انصربع ايقاع الفصول
هبطت غمامه ورا الجبل
راحت من الليل الجروف
شهقت شعاب انساني خوف منك عليك على أي زول
وك نياق شوقا الضنا سرح عصا التسيار قبل
درب الحياه المرمول فنا
يا وقعة الواقفين هنال يا وقفه الواقعين هنا
يا آفة الوطن الجريح اشمعنى لا وصلك دنا
لا آفه الزمن المشيح قدرت رويحتي تيقنا
من جيتك المرقت بسيم الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكيه فوق شعب الصبر
ساندتها علم بطانا الشيطنه
غنيت معاهم سودانا يا سودانا....
للمتهم والدنيا ليل والقمره بت فاتا القطر
وصف لهم حتة شليل
ردد حروفهم ردتها
وقف سحابي مع الدغش شهدتها
شهدت معايا على العذاب الهد أضلاع الغبش راعفتها
تكلت خدودا على بكاي لا قيت سجون جاهد بها
بي جيهة الجذب القديم دخلت مكندك بالشباب خنت التراب راودتها
فوق ها التراب واعدتها
لا انتي جيتي ولا هي آه روحت وين
يا وين مرقت مشيتي وين
كل البنات جو من المللى
هشت بكت شدت حكت وأزيارنا والمرحات خلي
يا انتي يا مرت العدل ماك في صعيدا تترجي
روحت وين قوليلنا بس من الغلبان تجي

لو فينا أطلعي مننا أو بره أدخلى ... أدخلى
غنيتك البارح براي انصلبتو التانيين غناي
والليل بتواتاك شعر دونو انعتاقك أو فناي
هيا يا مغنين الشعر..ضد ها الزمان وطبنجتو
شعر الشعر...شعر أيوه يلا علينا جاي
ونكر المغني كمنجتو
نادوس يا فجر القصائد اندلق
ما حك جلدك مثل ظفرك فأنطلق
انا شرحنا لك صدرك أو شرخنا فأنعتق
يا أنت يا كل الذين لأجل خاطرهم طهوت غداه عقم زهور كلم لتنفتق
غضبآ يؤرق موقديه كورته
رجمآ لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك...تبت يدا كل الذين تغامزوا
وتهامزو وتلامزو وتقززو وتلذذو
من فيه جرحك يا وطن
نادوس أه ... نادوس يا.........
أمسينا يا نادوس وأصبحنا بيك يا أم
يا سوسه ضد السوس قلبآ بلاك يضم
ليل الضياع مهووس يحلم هواك يؤم
بعض الحصاد الروس عالم نداهو بعم
ختيت هواك فانوس بقالي شلتو وحم
جيت المدن باخوس لاقيتو جالب السم
راشح هجير البوس وكل الوجود دم دم
كوركت يا نادوس أم الغبش يا أم
يا نخل يا أبنوس يا سامبا يا تم تم
يالبيك غناي محروس دخري الغلابه هلم
دهمني كم مجروس وعكمت تاني وقم
حمرت في السحب المكبرته
يا دخان يا ريحه يا قواده للبحر المخنس والعساكر والملمس..ما تختشى
بيوضه يا ماخده الخريف ما طمبرت عربانا شي
مستني في الزمن النزيف القال بجي وفات بي وشي
رشت النهار بالصبر أبت المغارب تترشي
دقست سواقي المتعبين كايسالا فيها عقاب عشي
بيوضه آه أواه لو الكلمات حصى
قالت لي الله أقرب فرج
أواه لو الكلمات لهب نرجم به وش زمن القسا
قالت في اطن الليل وهج هدام أمان الناس نسي
دنقرت للأرض السربله بالسراب فرغت بي غلبي العوج
فقدت أيادي العصا شديت حزامات الجلد تالا ضرا الواطه
كوركت صد أرجع يا ولد
طوريه أبوك تراها دي عاند كواريك مشيت طوريه أبويا نراها ديك
لفحوها لمن قام يصلي خطاب بكارات الغمام مغرب صباح ليله دخلتو على البلد
حرق عرق الفي الكلام عطشان سقيت عرق الشديره من المطيره الفي كان حس
العساكر لا ورا قالت لي أجر شدره غنايا جريك ضرايا جريك ضرا قبل العساكر ما
تصل قبل الدرادر ما تبين وكانوا العساكر في وشي قت أقول وقع طينه الجداول
ما ها زي طينه جسارتك يا بلد والكل طين
يا نبوت دقه تفوت و لا حلم يموت
النندق نندق نندق ويفضل باقي لهيب الحق
حق الناس ينزل في الحلق
او ينعارض شوكه حوت
يا كهنوت اليجي كابروت
يا جبوت اليجي كابروت
يا كابروت يا كابروت يا كابروت
كابروت عشم وطن الغلابا الحال بلاك تب ما يسر
ما بان صباح أو عسعست قدامنا ليله تزيدنا ضر
أوتارنا يا آخر الغنا حردان عشياتا النغم
فرغت مجالسنا البلاك عنكب على أبوابنا السأم
أنزح كفانا كضب رياح وبكاء رعود وضحك برق
العشب مالي حشا الأراضي جواهو لمن العش حرق
الشعب حي بس كيفت تصد يملابك المليون عرق
كدبنا في الثرى في رجالك ما فينا زولآ ما عرق
ساوين عصا الأشواق مرق
عربان ونوبا نهاتي بيك والزنج تتمناك عتق
ورا يا وجع هيا يا طلق
صد لي ملامحك يا حراز ريح العوارض غربت
فرتق ضفايرك في الرذاذ جية العصافير قربت
لاقيتا في غابه مدينتي وسط شتيلة حبحبت
على عش صغارا الدوب حبت
ما وقف الليل ولا الهجير كم جفت ريقآ وورتبت
لاقت من العنت الكتير ملت الفيافي أحد أحد
فايده جناحى بلا أطير الموت ولا العيشه النكد
با نيل مدد
يا غيث مدد
ندى دمر نادوس ونشوغا
وخلى الناس الصبحت يوم من حيات الخور ملدوغه
خلى الصوت الكبتو الجوع يلقى براحو يضوع ويضوع
الصوت العالي يا صوت الناس التحت الواطى ما مسموع

فرحة المحزون (ضميني)




إبراهيم إبنعوف

ضميـنـى ضميـنـى يــا فـرحــة الـمـحـزون
لا الصبر قادر اطيق لا الضم معاهو سكون
يـا عايشـة فـى جـواى بيكـى الفـؤاد ملـيـان
أنـا مـن بعيـد جاييـك شـارد مــن الاحــزان
غفلتـا قــدرى وجـيـت لاقيـنـى بالاحـضـان
لفينـى فـى جيـدك طــوق والبسيـنـى كـمـان
ورينـى كيـف بيكـون دفء الحـنـان بحـنـان
ما انتى لى وانـا ليـك رغـم اليكـون والكـان
انــا شـاعـرا غـنـاك فـــى اروع الالـحــان
وانا بين يديـك فنـان والفـن جنـون و جنـون
شن داير اقولـك عـاد مـا القـول علـى تقيـل
انـا والنجـوم شـهـاد مــن ديــل اتـابـع ديــل
تنكش كلاب الشوق فى جوفى طـول الليـل
لامـن لحقتـا المـوت المـوت ابـانـى عـديـل
يـومـا يلمـنـى فـيـك يـومـا صـعـب بالحـيـل
كـتـرتـلـو التـحـنـيـس كـمـلـتــو الـوســيــل
حـلـفـتـو بـالـقــران خـصـمـتـو بـالانـجـيـل
وناديتـو مـن سجيـل خيـب رجــا الممـكـون
ولهـان عليكـى قليـب يهـواك يحبـك مــوت
صبـرتـو بـالآمـال صـبـرا غزلـتـو خـيــوط
شـان مـا يميـل للغيـر كرهتـو فـى البـنـوت
وسـدتــو بـالاحــلام ختـيـتـو فـــى تـابــوت
رهبنتـو ليـك رهبـيـن فـوّتـو فــوت الـفـوت
حفظتـو زكــر الـريـد يـذكـر مغـيـب يــوت
لامــن بقـالـو كــلام لامــن بقـالـو سـكـوت
ونزرا على مكتوب والله يكـون فـى العـون
سامحينى كـان ذليـت وكلامـى مـا ارضـاك
الناس تسامح الناس وانتـى السماحـة بـراك
يــا رقـــة الحـلـويـن يـــا قـســوة الـقـسـاك
بـى زاتـك اتوسـل طالـب عفـوك ورضـاك
مديـلـى حـبـل الـريـد قويـهـو مـــن تـــالاك
خلينـى اكـون عايـش علـى انـى يـوم القـاك
يبقـى السعـد يصـدق وتمـسـك يـدايـا يــداك
وا شوقـى لليـوم داك يــوم يقـعـد الـمـاذون

درب المُرَّة

لك التحية أخ جلال
ولكل زوارك في هذا الخيط الهام،
وليكم كلكم، هذا الر ابط لمحاولة سابقة وهامة جداً للتوثيق لياسين بمبادرة من الأديب القانوني والشاعر عزالدين عثمان.

ياسين عبد العظيم : مغنى الشجن

أرجو أن يكون هذا البوست إضافة دسمة لذاك الذي سبق.
وليتواصل التوثيق..
وليبقى صوت ياسين خالداً بيننا..
ولنا ولكم كل الشجى والشجن.
،
،
دمتم

Quote: أرجو أن يكون هذا البوست إضافة دسمة لذاك الذي سبق.

ود الياس البوست الجبتو شبعان شديد شكرا ليك ياخ

فعايل الغربة (يمة)

http://www.youtube.com/watch?v=irk7MaI_WzA

http://www.youtube.com/watch?v=xeGj9R8kldo&NR=1

http://www.youtube.com/watch?v=xeGj9R8kldo&NR=1

ياعما شكرا للمرور مرتضي العفاض رقم قادم


.بس داير أقول ليك حاجة ياخوي

فتلت البوست

...

البوليـــاب

في بلدا بعيد بعيد