لمصلحة الجنوب اتمنى لهم الانفصال ... وبالمرة ابحث عن كفيل جنوبي

حقيقة انا عن نفسي اتمنى ان انفصل من الشمال، السودان الشمالي
داخل الى مأزق تاريخي، وعليه استحقاقات كثيرة تجاه شعب الشمال
ومن الظلم ان يتحمل الانسان الجنوبي عدم جدية ساسة الشمال، معارضة
او من حكومة الاحتلال الطالبانية الجديدة.

لقد سئمنا وطوال خمس عقود من اي احتمال للتقدم للامام ولو خطوة واحدة
الى ان وصلنا مرحلة الابادات الجماعية، وسنعاني على الاقل لمدة خمسين
عاما اخرى، هذا قدرنا في الشمال ولن نهرب منه وسنواجهه بكل شجاعة.

لكن، لماذا جر الانسان الجنوبي لصراعات لا شأن له بها؟

خلوهم ياخي يؤسسوا لدولتهم كما يريدوا

الجنوب في تقديري، بشوية مساعدة امريكية ممكن ينطلق وبل في فترة
وجيزة ان يتفوق على جيرانه من كينيا او اوغندا او افريقيا الوسطى

نعلم ان البرناكج السياسي للحركة الشعبية او بناء دولة علمانية، اشتراكية
وبحكم طبيعة القيادة فيها فهي دولة ستكون شبة عسكرية، امريكا من الناحية الاخرى
على النفقيض تماما، دولة شبه دينية و راسمالية ومدنية، ولكن يمكن ان يجدوا
توليفه تصلح قاعدة للتفاهم واختلاف الراي لا يفسد للود قضية.

مبروك يا اخوتي الجنوبيين للانفصال، ونشد من ازركم، ولو دايرين اي مساعدة احنا جاهزين
معلمين، اطباء، مهندسين، محاسبين لحد اولادكم البره ديل يجوا.

____________________________

هنا في الخليج الكفيل دا ما كفيل ساي، الناس بقت عندها خبرة في الموضوع دا
يعني كفيلك لو كان امير، ما زي لو كان كفيلك وكيل امير او ضابط كبير، والقحطاني
بفرق من العتيبي بفرق من الزهراني، والاصلي بفرق من بواقي الحجيج وهكذا

حسب استطلاع قمت به من قبل، (دا طبعا اذا لم توقع دولة الجنوب
مع دولة الشمال اتفاقية مشابهة مع المصريين سميت بالحريات الاربعة) التنقل، العمل،
الامتلاك والاقامة، وافضل انكم ما توقعوا اتفاقية زي دي مع الشمال زاتو

كدي ورونا، احسن كفيل منو، الدينكاوي وللا الشلكاوي، السلطان وللا زول عادي
ضابط في الحركة الشعبية وللا مسئول عادي

واذا فعلا الفكرة دي اتمخمخت، والبزنس واعد في الجنوب هل صحيح ان افضل مدينة
هي واو؟؟

سجل معاك نمرة 2 :


مطلوب كفيل من مواطني دولة جنوب السودان


بالمناسبة

الجنوبيين حيسمو دولتهم شنو بعد الانفصال؟


س أخير: هل يمكنني الحصول على المواطنة في دولة جنوب السودان ؟

الله يرحم المواطنة والوطنة والانتماء
اذهبوا ولا اسف عليكم

سودانا اجمل منو مافى وما بنبدلو باحسن دولة قي العالم لانو مافي احسن منو

Quote: سجل معاك نمرة 2 : مطلوب كفيل من مواطني دولة جنوب السودان

سلام يا هاني

اخي الذي لم تلده امي آدم عمر من ابناء الباريا اكيد سيكون مستعد
بنشوف ليك واسطة يا معلم

Quote: بالمناسبة الجنوبيين حيسمو دولتهم شنو بعد الانفصال؟

واحد من اتنين اما دولة جنوب السودان او السودان الجديد

Quote: س أخير: هل يمكنني الحصول على المواطنة في دولة جنوب السودان ؟

سبقتني يا حبيب

السؤال دا كان حيكون مدالختي القادمة

من المعروف ان السودان من الدول التي تسمح بازدواجية الجنسية كغيرها من بعض
دول العالم، ولكن في ظني ونكاية من بني كوز الطالبانيين، لن يسمحوا بهذا
للمواطن الجنوبي، غتاته كده بس، اي لن يسمحوا للمواطن الجنوبي ان يكون عنده
جنسيتين واحده للشمال والخرى للجنوب، لكن تعال شوف ازدواجية المعايير، ممكن
يسمحوا للمواطن الشمالي ان يحصل على جنسية دولة الجنوب، طبعا اذا سمحت الاخيرة
بمنحها لنا.

الحاجات دي طبعا بتتناقش بالتفصيل في مفاوضات استحقاقات الانفصال و استحقاقات الوجدة

كدي الننتظر ونشوف قوانينهم لمنح الجنسية بالتجنس حتكون كيف، واحتمال ما نحتاج لدا كله
اذا كان قانون الاستثمار (للاجانب الشماليين) ممكن يديك حق الاقامة والعمل


لكن الدينكا ديل عموما عاملين في امراء في الجنوب، اخير تشوف ليك دينكاوي، اما لو داير
ضهر يحميك تمام فشوف ليك نويراوي، الشلك ديل مساكين ساكت

اخونا الشيخ

هدي شوية يا حبيب

Quote: الله يرحم المواطنة والوطنة والانتماء اذهبوا ولا اسف عليكم

التقول ماشين بمزاجنا، ياتو مواطنة دي البنزعل عليها
8 مليون مهاجر على اربعة مليون نازح داخلي

هؤلاء ثلث الشعب السوداني تم طردهم بالعصر او القصف بالطيران
ثلاثة اتفاقيات سلام وانتخابات وما زلنا نسلخ جلود ابنائنا في بيوت الاشباح

مال الجنوبيين والبهدلة القاعدين يعملوا فيه ساستنا؟؟

انت قايل الفيلم في الشمال انتهى؟ لسه ح نعمل مظاهرات واضرابات وانقلابات
وزعزعة للامن الداخلي والدولي وعيييييييك

بعدين الجنوب دا لو انفصل حيمشي وين يعني، بتصل كوستي من الخرطوم في 4 ساعات
تاخد تاشيرة وتدخل الجنوب طوالي، وممكن يكونوا معانا ظريفين شوية ويدونا
تاشيرة upon arrival

أبن عوف انت قاعد بي جاي وبوستاتك وصلت كتير كدا مرحب بيك

مهما يكون دا بلدنا ودا عزنا يجب ان نعملجميعا لتنمية السودان مش الهروب

احسن برضوا الواحد فى الاجازة الصيفية 2011 ننزل فى مطار جوباا لدولى بدل مطار الكيزان

ابو جنزير يا حبيب (وللا الجماعة بي جاي ما جايبين خبر الاسم دا)

كيفك يا رجل

Quote: أبن عوف انت قاعد بي جاي وبوستاتك وصلت كتير كدا مرحب بيك

والله بقينا مواطنين هنا في سودانيز والحالة كانت صعبة شوية والبلاوي الله لا وراك
ما تديك الدرب

تشكر على الترحيب

اخونا الشيخ

ما عشان كده قلت ليك هدي شوية

قلت

Quote: مهما يكون دا بلدنا ودا عزنا يجب ان نعملجميعا لتنمية السودان مش الهروب

وانا فوق في مداخلتي الاساسية كتبت

Quote: هذا قدرنا في الشمال ولن نهرب منه وسنواجهه بكل شجاعة

اذا ربنا كتب علينا امثال هؤلاء القادة مال الجنوبيين ويتحملوهم معنا؟؟

نعم لن نهرب من ارض المعركة في الشمال، وحنبنيهو البنحلم بيهو يوماتي

وكل الافلام والوهمات دي مصيرنا، لكن فكوا الناس ديل، ياخي ديل يادوب
بقوا عندهم اطفال بمشوا المدارس واهلهم ما خايفين تجيهم ضربة من السماء؟

تحياتي

الاخ حسن سنادة

تحياتي

Quote: احسن برضوا الواحد فى الاجازة الصيفية 2011 ننزل فى مطار جوباا لدولى بدل مطار الكيزان

شكلك كده اكيد سمعت بحكاية البت في مطار الخرطوم التي رفض الضابط دخولها
لبلاد بني طالبان الا تغير هدومها

يا زول في مطار جوبا تقلع في الطيارة وتجي نازل ميطي زول بسألك مافي

يعني ممكن تقديرا وحسب معيار الزوق العام ممكن تتلفح ليك بدلقانه كدى

تحياتي

واقول انني اتبرع بنصيب فرد من ابناء الجنوب فيما
يخص مسألة الشيرنغ في ديون السودان الخارجية

خالص التحيات اخ احمد ... وبقية المتداخلين
عندى عدة علامات استفهام حول البوست ...
ربط الانقاذ بالشعب السودانى عموما او حتى بالشمال الجغرافى ربط يحتاج لكثير من المراجعة !!!
ومحاولة انحياز بعض المثقفين الشماليين او حتى غير المثقفين للجنوب الجغرافى باعتبار انو فى حالة الانفصال حيكون مرفأ الديموقراطية وحقوق الانسان الاوحد واستعجالهم للوصول الى ارض الخلاص عبر التخلص من الشمال بى ناسو ديل كلهم ( خراج مظلة الانقاذ ) ... هل تكون نوع من ( الملكية اكثر من الملك ) ؟؟؟؟ فى وجود العديد من الجنوبيين الان الذين عاشو وسط الشماليين ( الناس العاديين ) ولم يرو الكثير من الترهات التى تطلق عن فقدان الحقوق ووووو !!!
والان اذا تم عمل استطلاع للشماليين فقط ...كيف ستكون اراء الغالبية عن فكرة الانفصال ؟؟؟ هل سيعتبرون الانفصال نعمة ؟؟؟ ام نقمة ؟؟؟؟

الاخ خالد احمد محمد

مداخلتك ثرة وتشكر عليها، واحتمال بعض اسئلتك ان جاوبت عليها في مداخلتي
الاساسية، لكن لا باس من توضيح راينا

Quote: ربط الانقاذ بالشعب السودانى عموما او حتى بالشمال الجغرافى ربط يحتاج لكثير من المراجعة !!!

في مقابلة في التلفزيون القومي (حينما كانوا يستقبلون المعارضة) قال د. مضوي الترابي
في اجابة له عن الاسلام وما ادراك ما الحكومة الاسلامية

قال بالحرف، في انتخابات 1986 دخلنا نحن الاتحادي الديموقراطي ببرنامج ديني (نسيت اسمه)
وحزب الامة دخل ببرنامج ديني اسمه دولة الصحوة والجبهة الاسلامية ايضا دخلت ببرنامج ديني

يعني الماساة الاحنا فيها دي مسئولين منها كلنا، وما بنقدر نعارض الجبهة الاسلامية كتير

والدليل اين الصادق المهدي اليوم واين محمد عثمان الميرغني؟؟ كلهم انقاذ وكلهم اسلاميين
بدرجات متفاوتة من يمين الوسط الى اليمين المتطرف

Quote: ومحاولة انحياز بعض المثقفين الشماليين او حتى غير المثقفين للجنوب الجغرافى باعتبار انو فى حالة الانفصال حيكون مرفأ الديموقراطية وحقوق الانسان الاوحد واستعجالهم للوصول الى ارض الخلاص عبر التخلص من الشمال بى ناسو ديل كلهم ( خراج مظلة الانقاذ ) ... هل تكون نوع من ( الملكية اكثر من الملك ) ؟؟؟؟

ابدا لسنا ملكيين اكثر من الملك، و بالعكس كل المثقفين الشماليين يرون الوحدة هي
الهدف الاسمى، ودي انانية منهم، وح اكون معاك صريح اكتر (وخلي الكبع يحصل) المثقفين
الشماليين ديل زاتم خشم بيوت، في الشمالي العربي وفي الشمالي من الهامش، شماليوا
الهامش المثقفين هم من يرون ان الوحدة هي ضمانهم الوحيد من غدر الشمالي العروبي
لمزيد من البهدلة، اما مثقفي الشمالي العروبي فديل نوعين، نوع زي كده برى انو
الجنوبيين ديل ليس عليهم ان يتحملوا بلاوينا في الشمال، ومن حوه قلبنا نتمنى لدولتهم
التقدم، وفي نوع تاني بتاع ناس العمق الايه ما بعرف استراتيجي، وآه على وطني الممزق
ياخي احنا عندنا اليوم صحفي راقد ممزق في لحمو وما قادرين نعمل حاجة، حقيقي
لا انكر عليهم وطنيتهم وحبهم لخريطة السودان القديمة، كلن خليهم ينظروا للامر من زاوية
اخرى، ودا هدف البوست، اذا كانوا فعلا يحبوا الجنوب والجنوبيين كاخوان لهم، فل يتمنوا
لهم الخير.

Quote: والان اذا تم عمل استطلاع للشماليين فقط ...كيف ستكون اراء الغالبية عن فكرة الانفصال ؟؟؟ هل سيعتبرون الانفصال نعمة ؟؟؟ ام نقمة ؟؟؟؟

الناس تحسبها، ما هو الافضل للجنوبي؟؟

الناس في الشمال شوية تبطل تفكر في مصلحتها وبترولها الضائع

وتبدأ تفكر في مصلحة الجنوبي، هذا الانسان الذي لم يرى خيرا
منذ الاستقلال

الانفصال ح يكون من مصلحة الانسان الجنوبي، وليس بالضرورة ان يكون
في مصلحة الشمال

الاخ خالد محمد احمد

وازيدك اعتراف من عندي

انا كنت واحد من الانانيين ديل زاتم، وجود السودان موحد
كان الضمانة الوحيدة انو دستور السودان لا يكون مطابقا
لدستور طالبان في افغانستان، لكن بعد تزوير الانتخابات
وسكوت السادة ملوك السودان عما يفعله صبية الانقاذ، والمعركة
الدينية (بين الاسلاميين نفسهم) تلوح في الافق، يبقى الناس لازم تغير
قناعاتها.

الجنوب لن يكون ملجأ الديموقراطية بين يوم وليله، فمازالت الحكومة
حكومة شبه عسكرية وناس خارجه مع معارك وسلاح متوفر ووضع صعب، دي حقائق
الناس ما بتنكرها، لكن الارضية الصالحة للديموقراطية موجودة الا وهي الليبرالية

الجنوبي خلقة كده زول ليبرالي

هسه ليبرالي دي في الشمال بعد شوية ممكن يقيموا فيك الحد

على ما اعتقد 40 جلدة

شكرا ليك يا احمد على الرد الضافى ... قبيل لما اتحدثت ليك عن استفتاء الشماليين كنت قاصد بدرجة اكبر يا احمد انو فى ناس كتار فى الشماليين برضو دايرين الجنوب ينفصل وتفكيرهم فى النقطة دى مابطريقة ( جلد الذات ) السائدة الايام دى وانو نحن سوينا للجنوب وفعلنا ووووووووو لكن بى فهم جديد انو نحن طيلة ارتباط الشمال والجنوب الكاثوليكى الفات ده كانت النتيجة شنو ؟؟؟؟ هل فى اى بوادر حقت انصهار ولا تمازج عشان نتباكى عليها بعدين ؟؟؟؟ كراى شخصى فينفصل الجنوب ولنحاول تطوير شمالنا ده بالموارد المتاحة ليهو دى بعيدا عن السودان القديم الكلو حروب وضغائن ...السودان القديم بى وحدتو الهشة اللى قاعدة تتضعضع فى اقرب ملف من محكات التمازج ودونك ودوننا حادثة موت الدكتور جون قرنق اللى كشفت مدى هزال فكرة الوحدة فى السودان !!!!

الاخ خالد

شكرا لمواصلة الحوار

تحديدا شفت النقطة دي يتضحكني لمن اسمعها من العالم الوهم

Quote: والجنوب الكاثوليكى

ياخي الجنوبيين ديل عرفوا المسيحية بتين؟؟ قبل 50 وللا 100 سنة؟؟

ياخي احنا في الشمال كنا مسيحيين لمدة 1000 سنة، ولا يعيبنا في حاجة وربنا
زاتو ما بسالنا، بل بالعكس آمنا بنبيه ورسالتة الى ابن مريم عليه السلام

احنا ياخي مسيحيين اكتر من الجنوبيين، لكن التقول شنو، جونا ناس بني كوز
وطلعونا ما مسلمين زاتو

Quote: ودوننا حادثة موت الدكتور جون قرنق اللى كشفت مدى هزال فكرة الوحدة فى السودان !!!!

الحوادث بعد موت جون قرنق، ممكن نضعها في خانة الغضب والتعبير عن الغضب

لكن ليس لاننا مسلمين او عرب

عندما غضب الانصار من التوقيع على دستور السودان في احداث مارس الشهيرة
نزل الانصار في نفس الشوارع التي نزل فيها الجنوبيين وبداوا في تقتيل الناس

الغضب والتعبير عنه سودانيا نتشابه فيه كلنا، وان كان الجنوبي كذلك فكلنا كذلك

Quote: كراى شخصى فينفصل الجنوب ولنحاول تطوير شمالنا ده بالموارد المتاحة ليهو دى بعيدا عن السودان القديم الكلو حروب وضغائن

اتفق معك تماما، لكن امامنا معراك كثير نخوضها

الاخ أحمد بن عوف

لك التحية الطيبة


اتمنى ان يتناول موضوع الانفصال او الوجدة بجدية لان كل حرف يكتب فى هذا المكان وغيره

حتما سوف يكون له اثره و تاثيره ... نحن أهل السودان كل السودان بعيدا عن الجهة او القبيلة نريد

الوحدة و التضامن لكل اهل السودان من اجل دولة قوة

و من أجل ان ينعم جيل المستقبل باستقرار


تجد رائى فى موضوع الانفصال ادناه

اشكرك


الطيب رحمه

الانفصال ...

Quote: الوحدة و التضامن لكل اهل السودان من اجل دولة قوة

يسلم قلمك الحبيب الطيب رحمه قريمان

الحبيب أحمد بن عوف

Quote: لمصلحة الجنوب اتمنى لهم الانفصال ... وبالمرة ابحث عن كفيل جنوبي

هل هي دعوة للإنفصال ؟؟ فأهل الجنوب أدرى بمصلحتهم وإلا ما ترك لهم خيار الوحدة
أو الانفصال

أبوحميد العزيز ....
تحياتي و خالص أشواقي لك و للأسرة الكريمة ...
رأيت إسم صاحب البوست فقلت لنفسي ... يا ربي دا أحمد ابن عوف زولنا و لا اسم على اسم ...
دخلت على بروفايلك ... تأكدت و عدت سعيداً لأرحب بك هنا فالمكان بك سيكون أكثر جمالاً ...
التقيت بشرى لأول مرة في اجازتي السابقة للسودان و اعجبت جداً بشخصيته أسأل الله أن يجعله متميزاً طول حياته و أن يسعدكم جميعاً ...
تحياتي لك و للأسرة الكريمة ...
ــــــــــــــــــــــــــــ
في الصميم :
أتمنى أن ينفصل الشمال عن الشمال و شمال الشمال عن الشمال و حينها سأنفصل أنا عن شمال شمال الشمال بدولة شمال شمال شمال شمال السودان ... رأيك شنو ؟؟؟؟ :)
مودتي و أطيب تمنياتي ...

الاخ احمد ... خالص التحيات
رجعت عشان اوضح ليك انو :

Quote: فهم جديد انو نحن طيلة ارتباط الشمال والجنوب الكاثوليكى الفات ده كانت النتيجة شنو ؟؟؟؟

الكاثوليكى فى الاقتباس راجعة للارتباط اى مثل ( الزواج الكاثوليكى ) لاطلاق فيه كمثل صورة السودان القديم !!
ولذلك اخلى طرفى من ادخال اى تنميط دينى فى هذا الحوار ....

الاخ الطيب رحمة

آسف لتأخري في الرد

Quote: نحن أهل السودان كل السودان بعيدا عن الجهة او القبيلة نريد الوحدة و التضامن لكل اهل السودان من اجل دولة قوة و من أجل ان ينعم جيل المستقبل باستقرار

دخلت على بوستك بعنوان الانفصال

ومعلوم حجة واسباب تخوف مناطق التماس من الانفصال، وليس كما يتوهم البعض
انه هاجس النوبة او الفونج وحدهم بل هو هاجس البقارة العرب ايضا، في جنوب
كريدفان وجنوب دارفور، لكن هذه يمكن حلها عبر اتفاقية حدود يلتزم بها كل
الاطراف. ولكن لا يعني هذا باي حال من الاحوال ان يتحمل شعب الجنوب اكثر مما تحمل
حتى اتفاقية نيفاشا نفسها، ويا حبذا لو طالعت في وجه سلفاكير طيلة الخمس سنوات الماضية
"ممكون وصابر"

انا اليوم ارى اطفال في الجنوب يذهبون الى المدارس
ارى مرضى يذهبون الى المستشفيات
ارى عمالا يعملون في تعبيد الطرق

كل هذا سيتوقف مرة اخرى اذا قرروا الوحدة

موش لان الشماليين بطاليين، بس لان الشماليين مشاكلهم كثيرة ولم يحلوها بعد
ما زالنا نعتقل رؤساء الاحزاب، ما زلنا نصادر الحريات، ما زلنا نغتال الطلبة
وسيستمر هذا الوضع الا ان نفتك من احتلال القوات الاسلامية للسودان.

الحبيب سيف اليزل

Quote: هل هي دعوة للإنفصال ؟؟ فأهل الجنوب أدرى بمصلحتهم وإلا ما ترك لهم خيار الوحدة أو الانفصال

هي ليست دعوة للانفصال، بل تمني فقط، حسب ما ارى ان طريقنا لحل مشاكلنا في الشمال
يقع ضمن المعضلة الاسلامية من ناحية وتحديد من هو العربي ومن هو الهامش، ومن له
حق في المركز؟؟؟؟

بالضرورة سأكون مطمئنا انك لن تشك لحظة انني من هؤلاء العنصريين التعساء من يرون
في الجنوبي المسيحي، الوثني، الذي لا يتورع ان يمشي عاريا في منتصف الطريق هو مسبة
لدولة الخلافة الاسلامية السودانية المزعومة، وخير لنا ان ينفصل؟؟

بعدين المشكلة وين، حتى لو انفصلوا، قلنا الجنوب دا حيكون قاعد في محله، ممكن بعدين
نتوحد تاني، احسن من نقوم نتوحد وبعد سنة سنتين نفتش على الانفصال، الغبينة عمرها 50 سنة
وليست كما يرى البعض انها حرب 23 سنة.

النسيب الحبيب د. اشرف البنا

الف تحية ليك وانت ترحب بنا هنا

Quote: أبوحميد العزيز .... تحياتي و خالص أشواقي لك و للأسرة الكريمة ... رأيت إسم صاحب البوست فقلت لنفسي ... يا ربي دا أحمد ابن عوف زولنا و لا اسم على اسم ... دخلت على بروفايلك ... تأكدت و عدت سعيداً لأرحب بك هنا فالمكان بك سيكون أكثر جمالاً ... التقيت بشرى لأول مرة في اجازتي السابقة للسودان و اعجبت جداً بشخصيته أسأل الله أن يجعله متميزاً طول حياته و أن يسعدكم جميعاً ... تحياتي لك و للأسرة الكريمة ...

اتمنى ان تكون كل الاسرة بخير وعافية، ولمزيد من التواصل هنا يا دكتور

Quote: في الصميم : أتمنى أن ينفصل الشمال عن الشمال و شمال الشمال عن الشمال و حينها سأنفصل أنا عن شمال شمال الشمال بدولة شمال شمال شمال شمال السودان ... رأيك شنو ؟؟؟؟ :) مودتي و أطيب تمنياتي ...

سبقت يا حبيب

فوق انا قلت انا زاااتو داير انفصل عن الدولة التعيسة في الشمال دي
مال الجنوبيين ومال مشاكلنا

وطالما انت يا الانصاري هنا النسالك

السيد الصادق، الم يقترح بأن يبني مدينة جديدة اسمها "البقعة الجديدة"
مدينة ذات طابع انصاري خاص ولكنها ستكون مفتوحة لاستيعاب كل مكونات
الشعب السوداني

اليس هذا نوع من الانفصال؟؟ وان كان جزئي

تحياتي

احمد بن عوف ...سلامات ..

انت عارف يااحمد دايماً وكت عايز اتخذ موقف او رأى زي ده بقوم بقيف موقف الآخر طوالي ..يعني عايز اشوف مصلحة الجنوب هل هي في الوحدة ولا الانفصال فبقوم للحظة كده ببقى جنوبي واحكم حينها يكون من الغباء مجرد التفكير في الوحدة ...ودايماً بقول اذا كان الانفصال ثمن لسلام دائم بين الجنوب والشمال فليكن ذلك ..


المشكلة مافي الجنوب .. المشكلة في الغرب ...فإن لم تحل بعدل وحكمة فسوف تفوق مآسيها وآلامها ومعاناتها مشكلة الجنوب وستستمر الى ان تقوم الساعة ...




تحياتي للجميع ...

الاخ فايز ود القاضي

تحياتي

Quote: ...ودايماً بقول اذا كان الانفصال ثمن لسلام دائم بين الجنوب والشمال فليكن ذلك ..

thats it

ما نريده هو سلام، وليس وحدة معها حرب جديدة، هذا من ناحية، وطالما ان الشمال
ليس مستقر تماما، فمن الافضل ان لاي كونوا جزءا من الحل او المشكلة على الاقل في المستقبل القريب.

Quote: المشكلة مافي الجنوب .. المشكلة في الغرب

ومشكلة الغرب جزء من مشكلة الشمال، فالانسان الجنوبي لا ناقة له ولا جمل
في عبثنا في الشمال

Quote: فبقوم للحظة كده ببقى جنوبي واحكم حينها يكون من الغباء مجرد التفكير في الوحدة

وهذا هدف البوست، ان ننظر لامر الانفصال او الوحدة من خلال عيون الجنوبي

ان كان فيه خير لهم، فعلى الناس دعم هذا الخيار ومساعدتهم

عودة لمسالة السلام والحرب

كان ان قام مركز هولندي بدراسة ووضع اربعة سيناريوهات للسودان في 2012

وصفها كالآتي:

حالة الوحدة واللا حرب

حالة الوحدة وعودة الحرب

حالة الانفصال واللا حرب

حالة الانفصال والعودة الى الحرب

ايا كان الخيار، فهو السلام اولا، بعد كده الناس تشوف
ايهما يحقق السلام، الوحدة ام الانفصال

في رايي المتواضع، طالما الشمال غير مستقر سياسيا، وما زالت
حرب تدور في غربه، اذن خيار الانفصال هو الاقرب لحالة السلم

الاخ محمد فرح طالب بكري بأن يسكت الاصوات التي تنادي بالانفصال بالقوة

ما ياهو بوست فاتح، ما تناقشونا بدل شغل القوة الما بتعرفو غيرو ده

أحمد ابن عوف
هذا البوست عار عليك
نحن في مرحلة حرجه


*
اتمنى أن يحذف هذا البوست أخ بكري

يا زول عار شنو

صلح كلامك دا، العار بجيب دم طوالي


امسك كلامي حتة حتة وناقشه بكل راحتك واسألني اسئلة منكر ونكير

امكن اقتنع بفكرتك ياخي

لكن بس توش عار عليك وبكري اسحب البوست

فوق في افكار، وتحليل وتصورات وتهيؤات ممكن نكون اصبنا فيها وممكن نكون غلطانين

لكن الغلط في الافكار عمرو ما كان عار


خففوا اللغة دي، دي حالتكم دايرين وحدة