Post: #1 Title: الفي ريدو فرَّط دقس ؟ بجي غيرو يعمل مقص Author: عليش Date: 05-27-2010, 06:29 AM
أغنيه جديده... تُساهم في هبوط .. الأغنية السودانية للدرجـــه الــ...
ياجماعة... وين لجان النصوص؟ انا كمستمع عادي تأكلت أذناي من الإنحطاط وتدني المستوي ,أعلن إعتصامي وأمتناعي عن الأكل حتي الموت...االفن قضية لاتختلف عن قضايا المجتمع السياسي او النضال بإسم الحريات..
كان باريت الهبوط الحاصل عندنا سوف تقضى بقية عمرك محتارا مكتئبا حزينا,,
قابلت قريبى شاب صغير خارج السودان وسألتو إذا عندو أغانى سودانية,, يا صحبى الزول دا أدانى فولدر زى 30 GB كدا والله أخوك إحتار فى عمرو.. أولا زى تلتمية فنان جديد كدا وأسماء وألقاب تشيب شعر راسك..
ياخ أى واحد ممكن بكل سهولة يقرر إنو هو فنان ويدور حفلاتو وعداداتو مع كمية من الهبوط والإسفاف والخلاعة والمياعة واهل العريس مبسوطين وأهل العروس مدسترين..
قال مصنفات فنية قال,,
كان عندك أورغن وساوند نرجع ندور حفلات والله أخوك صوتو كعب لكن بنلقى لينا فرقة ما بنغلب ولكل مجنهد نصيب,,
تحياتى,, وأجدع الكرور وأسمع مزيكا نضيفة حفاظا على اضانك
أول حاجة أغنيتك دى ما هابطة ولا شتين,, ياخ الأغنية دى إحتمال كبير تكون مجازة وكدا!!!!!!! شوف عليها ختم المصنفات ولا لأ,, بعدين الزول دا كلامو صاح زاتو,,يعنى دى أغنية من الواقع المعاش نحن شعب قصاص,, ويحب المقصات زى عيونو
فى أغنية مشابهه لقيتا بتقول كلماتا( إنتى يا حبوبتة القاعدة فى الراكوبة إنشاء الله تجيك الرطوبة وتتفلقى بى طوبة يالفرتقتى الخطوبة,,) بالله تأمل روعة الكلمات,,
نابرى تم باقى الأغنية لو سمحت مشيت أهبش لقيت أغلب الأغنيات لا يصلح للنشر!!!
خاصة اغانى آخر الحفلة أو القعدة كلاهما مرّ,, بعد الجماعة يصدقوا إنهم فنانين آخر الحفلة براااااهم بفكو آخرم ويجدعو البايظ,,
لكن كان ما لقيتا عند ناجى الملك أكيد حا يجيبا ليك ناذر الخليفة,, كان عندو يوست قريب دا إسمو قنبلة,,,
ياخ والله من يوم الزيطة والزمبليطة (الزمبليطة دي شنو) بتاعة المعيار والمزمار وهلمو جرا منبر بكري ده بقي شغال علي كيفو !!! هسي انا فوق كتبته كلام واضح شوف جابو كيف :-
Quote: انا الاغاني دي والله عا########ي
يجوني ناس ود الصايم وتمبس والحكايات دي ويطلعو كلامي كلام صياعة ساااااي !!! ياناس الكلمة هي عاحباني ع أ ج ب أ ن يّ .
Quote: نابرى تم باقى الأغنية لو سمحت مشيت أهبش لقيت أغلب الأغنيات لا يصلح للنشر!!!
خاصة اغانى آخر الحفلة أو القعدة كلاهما مرّ,, بعد الجماعة يصدقوا إنهم فنانين آخر الحفلة براااااهم بفكو آخرم ويجدعو البايظ,,
اذاقلنا الكلام صح ومعقول...وواقع.. القص في الفهم العام الدخول في النُص..والشربكه..وده سلوك اجتماعي متوفر بي كثرة علينا..زيّو وزي المحاكاة والتقليد في الشارع العام والشارع التجاري...حاكو حـاكو.. لكن ببقي السؤال : وين دور الفناننين في نشر فنهم الذي يدعو للتوعيه ونشر قيم الحق والجمـال؟
Post: #15 Title: Re: الفي ريدو فرَّط دقس ؟ بجي غيرو يعمل مقص Author: أمين محمد سليمان Date: 05-27-2010, 08:45 PM Parent: #14
عليش و أيمن يا حبايبنا شنو البحدد إنو الاغنيه دي هابطه و دي صاعده ؟! في تقديري إنو مافي حاجه اسمها أغنيه هابطه ، ما عجبتك الأغنيه بتعجب ناس كتااار غيرك !!!
عليش .. ازييك .. ما عارف لكن اذا انت قاعد في الخرطوم اكيد يوم الخميس والجمعه مستحيل تستمتع برقده في حوشكم بعد الساعه تسعه .. خصوصا جنوب الخرطوم والاشلاقات .. ما ان تغيب الشمس حتي تري الهايسات والقريسات تتطاقش ,, تحمل الساونات والعازفين وكل المستلزمات .. دقيقيتين ويكون عندك حفله زي الترتيب .. وتبدا تسمع في الحاجات العجيبه ..ورا ورا ورا .. وبعد شويه الفي ريدو فرط دقس .. ويجيك صوت تاني من بعيييد ..الشريعه جات تر ري رررم ..كسروا البارات .. حتشوف الناس هايجه ومايجه ..ما بتفرز ده من ده .. اعتقد انه المغتربين ليهم دور اساسي في الحاجه دي .. الناس ديل استوردوا لينا كميه من الساوند سيستم والاورغنات لمن عملو فيضان في المعدات الموسيقيه .. اها السلعه لما تكون كتيره لازم تلقي زول يصرفوها فيه .. اضطر بعض المنافقين انه يغشو بعض الشباب الفاشل ويقنعوهم انه اصواتهم جميله ..وفكوهم فينا.. وبما انا عدد السكان زاد بالتالي الناس اتوالدوا وانجبو وكبروا اولادهم ودايرين يعرسو .. اها ما ممكن الناس كلهم يمشو يجيبو فنان من اتحاد الفنانين .. يقوم واحد شفت يقترح للعريس يقول ليه ياخ ما نجيب ليك عوض بلنجات الزمان كان بغني لينا في الجمعيه الادبيه في المدرسه .. ويغريه انه ما بكلفو حاجه غير يأجر ليه ساوند من ناس جمال وناس جمال ديل ابوهم رسل ليهم ساوند سستم عشان المصاريف .. واللي جمال اساسا اقنعوا انه يرسل ليه الساوند ده وهو ضامن الشغل للساوند.. ويا حاج تاني ما ترسل لينا قروش امي والبنات ديل انا بعيشهم ليك من الساوند ده.. ومن يومه جمال بطل الورا والقدام وبقي نايم بالنهار ومباري الساوند بالليل ... اها جمال طبعا بعرف منير ود السعوديه .. منير ابوهو اساسا جابو هنا عشان الجامعه ..وسجلوهو في مامون حميده .. طبعا منير بحب الموسيقي من زمن البيانو البنفخوهو بالهوا داك .. قام اقنع ابوهو يشتري ليه اورغن تكنك جديد .. عشان يساعده في القرايه ..واوقات الفراغ .. طبعا جمال اقنع منير ود السعوديه انه ممكن من اورغنو ده يطلع كميه من الشرتيت .. واقنعو انه ممكن يوقف المصاريف البرسله ابوهو .. ومن ديك وعيك ..وبقت فرقه موسيقيه .. نايمين بالنهار ..وقالبين بالليل .. وقس علي ذلك .. شوف اجيال المستقبل..
Post: #17 Title: Re: الفي ريدو فرَّط دقس ؟ بجي غيرو يعمل مقص Author: أمين محمد سليمان Date: 05-27-2010, 10:03 PM Parent: #16
شكرااان علي الغنيه يا أبو الفاء ... أنا ما زول بتاع غناء و من ما الله خلقني ما بتذكر اشتريت لي شريط غنا و ما عندي شرايط في عربيتي ذاتها ، يعني ما خبير في المجال ده : لكن سمعت غنيتك الجبتها دي و استمتعت بيها جدا ، الصوت جميل جدا و الموسيقي جميله : يبدو إنو تصنيفكم للهبوط جاي من الكلمات ، و دي حاجه الناس ممكن تختلف و تتفق عليها !!! يا عليش ، أيمن و هسي فيصل : في رايي الغير متواضع في حاجه اسمها الأغنيه دي عجبتني و دي ما عجبتني لكن ما في حاجه اسمها أغنيه هابطه و أغنيه ما هابطه !!!
ياجماعة.. ده مجرد لفت نظر فقط,,ومايهمني في الموضوع البحث في القيّم الإجتماعية الظاهرة الأن في الشارع السوداني,,وقضية الفن المناص به تربية وعكس الثقافات..إن مانسمعه اليوم مابالضرورة يحكي عن نضال مهيرة بت عبود ولا بثورة القرشي ده اذا اعتبرناهو شهيدا مناضللا,,مايهمني هو مانقدمه الان للاجيال القادمه..هل هو صالح لجيل يعتمد علية في رفعة وطن كبير متعدد الثقافات والاديان؟
فيصل الرشيد سلام وشكرا للحضور... انا ماقاعد في السودان لكن متابع شديد.. والظاهرة البتقوله دي مابدت هسه..من زمـــــان..لكن هسه انتشرت كالايدز او السرطانات..والمشكله حتتفوق علي الباقي الفضل ويصبح الشوال كله متعفن..
Quote: شنو البحدد إنو الاغنيه دي هابطه و دي صاعده ؟!
الهبوط هو النزول درجه.. وده معناهو انو الاغنيه نزلت درجه من مسار الشكل العام المتعارف عليه..مثلا تغني الكاشف.. الشوق والريد.. ماعايز اخش لتحليل ونقد لكن مستوي الاغنيه يعكس معاني وقيّم كلنا حسيناها,,وفهمناها بل وحفظناها,, عثمان حسين.. محمد اللمين وغيره...الفنان الذري ابراهيم عوض,, كيف لا اعشق جمالك.. انها ذاكرة جمعيه نتفق عليها جميعا,,ونلتقي فيها بطرب وشجون.. هل يسهل علينا القفز من ذاكرة جميله تهمنا وتمثلنا في كل المستويات ..الي قاع رخيص متعفن لايمثل ذاكرتنا هذه؟ ماهو دور الإعلام في الحتة دي؟
Quote: يا عليش ، أيمن و هسي فيصل : في رايي الغير متواضع في حاجه اسمها الأغنيه دي عجبتني و دي ما عجبتني لكن ما في حاجه اسمها أغنيه هابطه و أغنيه ما هابطه !!!
يا امين والله مشتاقين .. وخليني اختلف معاك في وجهة نظرك اللي انا احترمها جدا .. توجد اغاني هابطه يا امين و احتمال لانك انت بعيد وما قاعد تسمع الحاجات لانها معظمه غير مطبوع في اشرطه رسميه الا ما يتم تسجيله في الحفلات .. ما جعلها هابطه ليس الموسيقي علي العكس انا اطرب جدا للموسيق ولكن استاء واتضايق وتفقع مرارتي حين سماع الكلمات .. بعض الكلمات جارحه بل خادشه للحياء يا امين ..ومن اجلها اختلقو رقصات فاضحه لا يمكن ان تتخيلها وعليك باليو تيوب ان اردت التاكد.. قديما احتوت الحقيبة علي كلمات واوصاف يمكن انو توصف بالناشذه ..لكنها جميله ومعبره ولا تشعر بالخجل وانت تستمع لها .. الا انها لا يمكن قياسها بما يحدث الان .. يا امين اخوي ..والله في اغاني انا سمعتها ما بقدر انزله هنا ولا بقدر اكتب ليك كلماته مهما حصل .. صدقني حاجه تخوف ... انتشار الهواتف النقاله عند الاطفال وبامكانيه التسجيل والاستماع احدث نقله سريعه في تدهور السلوك لدي الناشئه .. ... ياخ تعال اجازه وانا بقنعك انه في هبوط ..بسرعه الصوت ..
