Post: #1
Title: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-24-2010, 08:31 AM
Ladies and Gentlemen
تحياتي
بالامس تطورنا شوية وجيبنا ال LCD 40 بوصة
وفيهو مدخل USB وجربنا البوم الصور من خلاله
ولكن حسيت بانو الشوف مسيخ شوية من غير مزازيك
مشيت على بتاع ال IT وادانا محاضرة كيف ممكن اركب الصوت على الصورة
باستخدام برنامج WINDOWS MOVIE MAKER (اخوكم سطوحي باشا في المسائل الكمبيوترية)
طيب، الصور في والتلفزيون في باقي المزازيك
وين ممكن احصل على موسيقى لاغاني سودانية من غير كلمات؟؟
حقيقة لا ازور مواقع الاغاني السودانية وعلاقتي بها ضعيفة جدا
_________________________
تنبيه، اذا عاوز تشتري LCD تأكد انك ح تتعرض لخسائر اضافية
الفني بعد ما ركب الجهاز قلت ليهو الصورة ماهي الاتوقعتها
قال لي دا تقنية ال HDMI فلازم تغير الرسيفر وال DVD لاجهزة فيها التقنية دي
وكمان لازم تغير البلاي ستيشن بتاع الاولاد من تو الى ثري
ما طمني كلو كلو
حاجة تاني
ارجو الافادة عن انسب موسيقى سودانية تنفع مع عرض الصور
تحياتي
|
Post: #2
Title: Re: طلب مساعدة تقنية: اين يمكن الحصول على sound tracks لاغاني سودانية
Author: محمد عبد الماجد الصايم
Date: 05-24-2010, 08:46 AM
Parent: #1
أحمد يا عمكـ
خليكـ من الموسيقى .. يا ريت لو تلاقي موقع في أغاني
كويسة ومحفوظة بصورة كويسة، أغلب المواقع عبارة عن نسخة
واحدة، كل واحد يشيل من التاني ويخت!
المشكلة أغلب (عشان ما أقول كل) الأغاني تسجيلها ضعيف
جدا ودي بتظهر واضحة جدا لمن تقارن بين التسجيلات الصوتية
السودانية وغيرها من الأجنبية والخليجية! حاجة مختلفة تماما!
مثلا في العربية أنا لمّا أسمع الرادي العادي دا mbcFM الصوت
بكون في 8 بالكتير يصل 13 والسماعات دي بتكون ماشة باسطة بس!
لمن تجي تشغل أي حاجة سودانية إلا الصوت يكون فوق الـ 30! وبعد
دا كلو لازم ترفع الباص وتنزل التريبل عشان الأصوات تزبط شوية معاكـ!
الحقيقة الـ CD الوحيد اللقيتو ممتع صوتيا في العربية
بتاع دكتور إبراهيم عبد الحليم، فيهو توزيع موسيقي صاح!
هدية كانت مية مية!
قدّيتكـ شديد .. شكرا
|
Post: #3
Title: Re: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-24-2010, 10:57 AM
Parent: #2
شكرا يا ود الصايم
قديتني شنو يا عمك انت احبطتني عدييل كده ههههههههههه
بعدين ما قلت لينا مبروك، ومن نقبل من هدية على سبيل الترضية
كده في شكل رسيفر dream box 
ياخي من امبارح بديت اشكل خطة عمل، واظبط ليك خلفية لصور العرس على انغام الليله ساير يا ود القبائل
وصور الجامعة حيث مرتع الشواكيش على اغاني السمحة قالوا مرحلة
وصور الطفولة على اغاني تبتبات بتاعت الاستاذ محجوب شريف
هسه دي كلها طلعت احلام فشنك ساكت!!!
لكن يا ود الصايم، قالوا في جهاز جديد كده شوفتو في حلقتين
مرة في الشروق ومرة تحدث عنه الاستاذ الموصلي في سهرتو بتاعت
عقد الجلاد ديك، الجهاز بقوم بعمل اوركسترا كاملة، وقرينا هنا
في المنبر انه بالفعل تم استعماله والعازفين كانوا بعملوا في وهمات
للمشاهدين الوهم الزيي كده
طيب، طالما الجهاز في، فمعنى كده ممكن نتوقع ان تتسرب موسيقى حاف
للمستهلك العادي؟؟؟؟؟
ونعمل حفلات كاريوكي سودانية وبدل الاربعتاشر برنامج بتاع سباق اغاني
وخرتمية فنان واعد، بكون عندنا وفرة وممكن نفكر في التصدير كمان
|
Post: #4
Title: Re: طلب مساعدة تقنية: اين يمكن الحصول على sound tracks لاغاني سودانية
Author: محمد عبد الماجد الصايم
Date: 05-24-2010, 12:11 PM
Parent: #3
يا عمكـ .. الدريم بوكس دي ذكرتني قبل أمس
في كورة النهائي، ناس الجزيرة بثوا إعلان تحت الشاشة
عن افتتاح قناة الـ 3D، أخوكـ قال يجرب الحاصل شنو
ونزلّتها ليكـ في أمانة الله! بالله لمن غيّرت القناة التلفزيون
دا تعب تعب السنين .. والـ Crow كضم عديل .. أي والله!
ف .. يا عمكـ ألف مبروكـ التلفزيون الغيامة دا
وعقبال عندينا نغيروا كلو إن شاء الله!
_
طيب أديكـ النجيضة .. تبدل التلفزيون دا بسوني بلايستيشن 3؟
|
Post: #5
Title: Re: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-24-2010, 12:51 PM
Parent: #4
| Quote: عن افتتاح قناة الـ 3D، |
لو عندك مزاج في 3d وعاوز تبدل التلفزيون انتظر شوية
ناس سوني منزلنو في السوق السعودي قريب
| Quote: طيب أديكـ النجيضة .. تبدل التلفزيون دا بسوني بلايستيشن 3؟ |
دا ما نجيضة يا عمك، دا شوي عديييل كده ونظام دقس الفاره ههههههه
تلفزيوني بجيب تلاتة بلاي ستيشن ثري
النجيضة على قولك
المنبر على ما اعتقد وحسب عنوان بوست في الصفحة الاولى فيهو مستشاريين بتعين مزازيك
وين الناس ديل، ما يفيدونا!!!!!!!!
|
Post: #6
Title: Re: طلب مساعدة تقنية: اين يمكن الحصول على sound tracks لاغاني سودانية
Author: omer osman
Date: 05-24-2010, 12:58 PM
Parent: #5
بوست مترف ......
ياخي نحنا تلفزيونا أبيض وأسود وبدل الاريل خاتين فوق رأس البيت غطه حله ......
|
Post: #7
Title: Re: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-24-2010, 01:21 PM
Parent: #6
سلام اخي عمر
مترف من الناحية التقنية ونوعية الاجهزة بس
لكن الفكرة يا عمك انو احنا ما عندنا مزازيك سودانية من غير غناء
الموضوع شاغلني ليهو مدة، ياخي مثلا داير اسمع لحن
عازة في هواك لكن ما داير اسمع صوت زول؟؟
لكن بالامس فقط احتجت للحاجة دي
ايه المعني انو اشغل البوم صور على اغاني موسيقى اجنبية
او في المطاعم في الخرطوم والكافتريات؟؟ ما بقدروا الا يشغلوا
موسيقى اجنبية ليييه، لانو مافي موسيقى سودانية
اهو، بوست زي دا ممكن يشجع ليهو زول يعمل لينا حركة زي دي
| Quote: ياخي نحنا تلفزيونا أبيض وأسود وبدل الاريل خاتين فوق رأس البيت غطه حله |
الوش المدردق بتاع ود الصايم شايفو...... بس
يعني لو جربت الـ 3D بتاعت ود الصايم تلفزيونك دا الا تقلبوا
دولاب وللا تربيزه للحوش هههههههههه
بعدين على ما اعتقد انو ود الصايم دا هلالابي
وانا هلالابي
وانت ما يحتاج، العنوان باين من صورتك
عرفنا الكورة، كمان لاحقننا في المزازيك ههههههههههه
شكرا لمرورك يا عمر
|
Post: #8
Title: Re: طلب مساعدة تقنية: اين يمكن الحصول على sound tracks لاغاني سودانية
Author: جلال جبريل
Date: 05-24-2010, 01:33 PM
Parent: #7
ود إبن عوف
مبروك التلفزيون الهجيمة
غايتو بريحك من حاجة مهمة
كان جات فيهو موية جارية بتعاين ليها تروي طوالي
كاس العالم ماعندكم
|
Post: #9
Title: Re: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-24-2010, 01:41 PM
Parent: #8
الله يبارك فيك وان شاء الله تعتر ليك في واحد 46 بوصة قريب
Quote: ود إبن عوف
مبروك التلفزيون الهجيمة
غايتو بريحك من حاجة مهمة
كان جات فيهو موية جارية بتعاين ليها تروي طوالي
كاس العالم ماعندكم |
كاس العالم في انتظار الرسيفر من ود الصايم
ياخي ديل عندهم بنغاله في البطحاء ممكن يودوك جنوب افريقيا عديل
تحياتي
|
Post: #10
Title: Re: طلب مساعدة تقنية: اين يمكن الحصول على sound tracks لاغاني سودانية
Author: بكري عباس علي
Date: 05-24-2010, 03:22 PM
Parent: #9
اخي احمد
مبروك ال L. C .D
فعلا نعاني من مشكلة انعدام موسيقي سودانية بحتة وان وجدت فهي لا ترقي لمستوي مقبول حتي وذلك لعدم وجود الاهتمام بدراسة هندسة الصوت حيث ان جميع من يعملون في المجال هم مجرد جربندية حتي علي مستوي الاذاعات والتلفزيونات لذلك تاتي كل اعمالنا مشوهة ومبشتنة كما ذكر لك ود الصائم
كدي حاول مع الموقع دا امكن تلقي
http://www.sudani.ws/music/hafez/johar_sader_almhafil.html
|
Post: #11
Title: Re: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-25-2010, 05:09 AM
Parent: #10
الله يبارك فيك يا بكري يا اخوي
حاحاول الموقع بتاع سوداني ان شاء الله، عسى ولعل
لكن دا وضع، على الموسيقيين والمهتمين بالفن ان يعالجوا المسألة دي
وما افتكر دايرة امكانات ضخمة
تحياتي
|
Post: #12
Title: Re: طلب مساعدة تقنية: اين يمكن الحصول على sound tracks لاغاني سودانية
Author: محمد عبد الماجد الصايم
Date: 05-26-2010, 11:29 AM
Parent: #11
أها يا بكري .. التبلقاهو في الموقع دا ياهو المكرور
في كل المواقع السودانية .. وبعدين العيوب بتاعت الصوت
بتظهر ليكـ لمن تشغل الأغاني دي في المسرح المنزلي!
يمين كل سماعة تلقاها شغالة حاجة براها!
دا غير سماعتين بكونوا شغالين هوا ساي (وشششش)
|
Post: #13
Title: Re: طلب مساعدة تقنية: اين يمكن الحصول على sound tracks لاغاني سودانية
Author: أحمد ابن عوف
Date: 05-26-2010, 01:21 PM
Parent: #12
وعمر يقول ليك ترف
ما يجي يشوف
بتاع ود الصايم دا
بكري .. للاسف لسه ما قدرت ادخل على الموقع، في انتظار لاب توب جديد ههههههه
طيب يا شباب سؤال:
تمسك القنوات السودانية دي بالرص، وتكون مثبت صباعك في الريموت
القومية، الشروق، النيل الازرق، هارموني، زول، ساهور، الامل، SSTV
في لحظة ما، وبتتكرر كتير معاي بكونوا شغالين غناء في وقت وااااااحد
مرات كمان بتلقى بتاعت طيبة زاتا شغالة اناشيد دينية
تفتكر انو السودان دا، خبراء الموسيقى وجودتها مفروض تكون ضاربه العلالي
ياخي خليك من دا
احنا لينا كم اسبوع، والتحية للاستاذ الفنان الموصلي وما قصدي حاجة لكن تعليق
بسيط
الموصلي جاء، الموصلي ح يحل المشكلة، النو حردان، متابعة لصيقة، الليله في نادي الضباط
بكرة في نادي الما ضباط وزول واحد جايب ليك خبر محمد ابراهيم نقد مافي
وبعد دا كله يطلع ما عندنا موسيقى نضيفة؟؟؟؟؟؟؟؟؟؟
ياخي السودانيين ديل فعلا الذ ناس في الدنيا
|
|