Post: #1
Title: الكِليك السّاده
Author: Emad Abdulla
Date: 05-21-2010, 05:45 PM
جُمعة بيض .
......
الحر هنا حر بالطريقة الصاح .. حر راضع لبن أمه .. فكأن سحابة بركان إيسلندا جاءت فخنقتنا و كندكت لنا و قعدت مقنقنة فوق راسنا .
فكفوا عن الدلع يا أيها الخواجات الربنا رماكم في بلادٍ زينة , لو تعلمون ..
( انْظُرْ كَيْفَ فَضَّلْنَا بَعْضَهُمْ عَلَى بَعْضٍ ) و برضكم قالوا ح تكونوا حطب النار .. ما تعملوا فيها فضلوكم و بتاع .
المهم في هذه السخانة اللاحمة يجيك بتاع أمجاد تقول ليهو : الأمتداد مربع إطناشر .
يقول ليك إتفضل . و عربيتو كأنها صاج دوكة الحجة الوالدة في يوم عواسة آبريه رمضان .
- ذلك يومٍ للدوكة - لا تكف فيه النار تحتها من أول الصباح لغاية في الليل ..
و الدوكة هي الصاج .. و الصاج هو يا أيها المواطنون بالمصارين البيض , هو قطعة من الحديد الصلب مسطحة و سميكة , ترفع على لدايات . و اللدايات هي أحجار ترص بعضها فوق بعض تحوط أركان الدوكة أو الصاج حتى ترفعه عن سطح الأرض , حتى فيحشر تحته " الواقود " أو الوقود .. أو الحطب .. أو الخشب , أو الهناية ديكا البيكسروها عشان تولع فيها النار .. أيهما أقرب للسانك الحنكوشي .
و قد كنت حين شببت عن الطوق فشميت ريحة أباطي و زنخ الرجولة فيه , أعمد للدوكة بطرف بإصبعي فآخد منها حبة سكناية .. ( هو السخام .. أو السناج .. أو ما عنّ لك في لسانك العربوأفريقي ) و أهو كلو عند العرب صابون .
ما علينا .. أقول كنت اشيل شوية السكن داك و بحرفنة أدهن به شوية الصويفات التي نبتت لي كشارب .. فيتحول الشارب شنباً وجيها من بعيد . و كنت أمسح بعد الإنتهاء من الميك أب الشنبي ذاك .. كنت أمسح صباعي على الحائط قرب دولاب المراية ذاك حتى حولته بمرور ديكوري لشنبي .. حولت الحائط هناك لمايشبه السبورة سواداٍ .
و كنت بشاربي الفشنك ذاك , أدخل به الحفلات و الديسكوهات زمانئذٍ . فأخرت الجماعة في عدد البلوم و الجكس الذي أوقعته في حبائل ذاك ( الود أب شنب .. حلااااااااااااااااتو ) أو كما قالت الحسان ديسكوئذٍ .
نرجع لأخونا بتاع الأمجاد .. دخلت إلى تلك الصفيحة الزرقاء و كسحنا . تونسنا و حكى لي قصة معاناته و حياته و حياة أبو أهلو ..
وصلنا فنزلت . قلت : داير كم يا خينا؟
قال : المعقول .
: المعقول يعني كم يعني ؟
: شوف إنت .. قدرا براك يا خال و ما بنختلف .
: لا لا .. ما بشوف و لا بقدر .. قول كم ياخينا .
: علي الطلاق إن ما اديتني شي زاتو ما بقول ليك بِغِم .
: شكرا .. هسه داير كم ؟
: قنالك المعقول .
: بلاش كلام فارغ معاك . انا قبل كم يوم جيت هنا من الديم بسبعة .. هاك دي السبعة .
: أصلو شنو ..
: أصلو شنو كيف يعني ؟؟
: سبعة ؟؟ صلحها شوية يا عمك .
: ما بصلحها .. ده ياهو المعقول .
: سمح تمها عشرة .
: ما بتم .. سبعة و بس .. حقك . يللا الله معاك .
: كدي دقيقة .. سبعة ما حق المشوار ده وللاي .. خليها تسعة طيب .
: يا زول هووي ..
: كويس .. غلطان أنا و الله حقو ما كان أقيف ليك زاتو . عارف نوعكم ده ..
: نوعنا بتاع فنلتك يا بني آدم ؟ دور كركعوبتك دي يللا .. إتخارج .
زاد بيض الجمعة بيضاً .
.......
توقفت في العصر بعد أن مررت على سيارتي عند الصلاّح لعلة في الفرامل .. و الذي طالبني بشغل يد أربعين جنيها لتغييره لقماشات ( أو فحمات ) الفرامل . فحرنت و وقفت ألف أحمر أني ما ح أزيدو عن العشرين , فأخذها .
ذهبت توقفت على مبعدة شارعين منه . بسبب إنفلات الفرامل .. جاء وقوفي أمام محل صلاّح آخر . جاءني و قال :
نشوفها ليك يا أوستاز .
قلت : شوفها ياخ .. ح تشوفها بي كم ؟
قال : المعقول .
- المعقول في بلد اللامعقول يصير معقولاً .. و الناس على دين ملوكهم ) .
قام بفك الكفر القدام يمين , لأجد فحماتي القديمات الما بتغباني زايداً عليهم علبة ميرندا ( موبايل ) مطفقة و مظبطة و مستوية محشورة و مربوطة مع القماشة كأحلى ما يكون !!!
دفعت للصلاّح الجديد المقول حق قطع الغيار - الذي تأكدت أن لايكون هذه المرة قزازة شامبيون - ثم و دفعت حق المصنعية و حق غضبتي الكبيرة عليك يا هذا البلد أب بيض .
المهم .. توقفت بسيارتي الممكونة عند طبلية سجاير .. طلبت علبة سجاير و كبريتة .
قال كبريت مافي .. ولاعة كيف معاك يا عمك ؟ قلت : لأ .. قلنا كبريتة .. مزاجي للسجاير بيكون توليعة بكبريتة .. داير كبريتة .. كبريتة و بس . عندك ؟
قال : دقيقة نجيبها ليك . و مضى .
الوقت عصراً يزال , و شمس الله ما تزال ناسية حكاية العصر دي و مديانا في أبو حناننا من حق الساعة إطناشر داك .. حر و سخانة و عفار و عرق و فقر و قرف ..
نظرتُ , فإذا ثلاث نسوة حول الطبلية تلك يبعن الشاي . حولهن عشرات الكراسي البلاستيكية الملونة و كمية خلايق و أصوات و غبرة و محن عجيبات .
إقترب إثنان مني .. : سلام عليكم .
: عليكم السلام .
: عربيتك دي كليك .. صاح ؟
: ايوه كليك .. ليه ؟
: دبليو ؟
: أظنها كده .. ليه ؟
: لأ بس دبليو وللا ما دبليو .
: إنت رايك شنو ؟
قال الآخر : أنا قلت ليهو كليك إي .. هو قال دبليو .
قلت : إنتو ما تمشوا ورا شوفوها . بتديكم الأكيدة .. يا كمان أديكم الأوراق بتاعتا عشان تتأكدوا جد جد ؟ .
: لا لا .. شوكرن ياخ .. لكن أنا قلت ليهو دي كليك دبليو .. يعني ( وورلد ) , كليك العالمية .. صاح ؟ عربات سمحة وللاي .
: وورلد عديل ؟؟ علم الله واسع غايتو .. بتكون كده .
قال الآخر : دي كليك إي .. ( إنترناشونل ) .. الكوريين قاصدين كده ..
: صاح كلامك .. الكوريين بيكونو قاصدين كده فعلاً .. قصادين الكوريين ديل .
- تلفت أبحث عن صاحب الطبلية و كبريتتي و انا أخرم من الخرم و أزهج مما يجب -
: قت ليك ياخينا .. كليكك دي دبليو وللا إي ؟؟
: أمشوا قفاها شوفوها ( في هذه البلاد الناس تشوف قفاك .. برضاك ) .
ذهبو و عادوا .
: سادة ..
: شنو ؟
: كليكك سادة ياخ .
: يا زول ؟
: علي الطلاق سااااادة .. لا وورلد لا إنترنشونل .. مرها سااااااااااااااااااكت . لاكين ما مشكلة .. المهم هي كليك .
كنت أعرف في " كليكي " انها دبليو , نزلت فنظرت في قفاي ( بيدي لا بيد عمرو ) لقيت كلكي فعلا سااااااده .
ركبت .. خشمي و عندي . جاء الزول بالكبريتة و الباقي .
إنطلقت بكليكي السادة أبو فرامل ميرندا ..
سمعت سيد الطبلية , و الإثنان ابو وورلد و أبو إنترنشونل يغنون خلفي :
الكليك السادة جابتني ليك إرادة خلت قلوبنا ندادة .
......
جمعة بيض ..
في بلد أبيض .
|
Post: #2
Title: Re: الكِليك السّاده
Author: ابراهيم عدلان
Date: 05-21-2010, 06:02 PM
Parent: #1
ابو الجن زاتو ياخ
جمعتك كاربة يا عمدة
و المعقول يا ابن العم
سلام و اشواق
|
Post: #3
Title: Re: الكِليك السّاده
Author: Emad Abdulla
Date: 05-21-2010, 06:08 PM
Parent: #2
كاربة يا ابراهيم ..
كرب يكرب فهي كاربة ..
و الكرب سادة .
.......
عندي ليك شوق يا منعول .
|
Post: #4
Title: Re: الكِليك السّاده
Author: Amira Elsheikh
Date: 05-21-2010, 07:17 PM
Parent: #3
هنا غير كليك الماوس يخربنا ..
عماد ازيك...
|
Post: #5
Title: Re: الكِليك السّاده
Author: باسط المكي
Date: 05-21-2010, 07:44 PM
Parent: #4
Quote: ...شمس الله ما تزال ناسية حكاية العصر دي و مديانا في أبو حناننا من حق الساعة إطناشر داك .. حر و سخانة و عفار و عرق و فقر و قرف ..
نظرتُ , فإذا ثلاث نسوة حول الطبلية تلك يبعن الشاي . حولهن عشرات الكراسي البلاستيكية الملونة و كمية خلايق و أصوات و غبرة و محن عجيبات |
وين انت
يااااااخي جينا ساكين
قرفكم دة وماليقناكم زمن طويل ما طليت..
ياعمدة ..ماتطول ياخ
فقدناك واتلفتنا ليك كتير..
لاتبعد يااااااااخ
|
Post: #6
Title: Re: الكِليك السّاده
Author: Osman Musa
Date: 05-21-2010, 08:15 PM
Parent: #5
يا عماد
يا أخى سعيد قال عماد ده مازعلان من السخانة
وال W والميرندا وقصة الكبريتة وكلامات الناس ديل .
سعيد قال عماد زعلان عشان رجع من رحلة البحث عن الدهب ساكت .
..
يا أخى سلامات يا فنان
تحياتى
|
Post: #7
Title: Re: الكِليك السّاده
Author: خدر
Date: 05-21-2010, 10:00 PM
Parent: #6
يا كافي البلا ما بتراعوا لي غير الناطقين بها ؟
___
( كلك ) يعني شنو يا خال ؟ 
|
Post: #8
Title: Re: الكِليك السّاده
Author: عمران حسن صالح
Date: 05-22-2010, 07:11 AM
Parent: #7
عووووووووووووووومده
(بيَضت) علينا سبِتنــا
وشكلي حا أعيد ( تدوير ) مسألة الإجازة دي !!
|
Post: #29
Title: Re: الكِليك السّاده
Author: Emad Abdulla
Date: 05-22-2010, 05:46 PM
Parent: #8
عمنا حسن بيسلم عليك ..
قال ليك : شوف لخيك ده معاك بكان ..
..........
عمران الجميل .
|
Post: #9
Title: Re: الكِليك السّاده
Author: Amira Elsheikh
Date: 05-22-2010, 07:15 AM
Parent: #7
يا كافي البلا ما بتراعوا لي غير الناطقين بها ؟
كلك الماوس بث قلنا فوق ياخدر>>>>
|
Post: #10
Title: Re: الكِليك السّاده
Author: داليا الكباشى
Date: 05-22-2010, 08:04 AM
Parent: #9
| Quote: ( كلك ) يعني شنو يا خال ؟ |
(كليك) يعني سيـــــاره
أنت يا عمده مولود قبل عام الفيل ..؟؟
|
Post: #11
Title: Re: الكِليك السّاده
Author: خدر
Date: 05-22-2010, 09:02 AM
Parent: #10
Quote:
: المعقول يعني كم يعني ؟
: شوف إنت .. قدرا براك يا خال و ما بنختلف . |
اُلتش حاقة انا ؟
|
Post: #12
Title: Re: الكِليك السّاده
Author: Giwey
Date: 05-22-2010, 09:29 AM
Parent: #11
السمسار قال كليك دبليو (فل اوبشن)
قلنا ليهو يعنى شنو (فل اوبشن) .. سكت
وبدا عليه الحرج .... شفتوا المثقافتية ديل
خربو الناس كيف؟؟؟؟؟؟
|
Post: #31
Title: Re: الكِليك السّاده
Author: Emad Abdulla
Date: 05-22-2010, 05:49 PM
Parent: #12
عبدالرحمن يا قوي ..
أنا السمسار قال لي : يا زول قول لا إله إلا الله ..
قمت قلتها ..
قام ظيييييطك لصق فيني الحاجة دي .
.........
كان ما أقول ... صاح ؟
|
Post: #13
Title: Re: الكِليك السّاده
Author: داليا الكباشى
Date: 05-22-2010, 09:29 AM
Parent: #11
بتـاع الامجاد قــدركـ ..؟؟
|
Post: #14
Title: Re: الكِليك السّاده
Author: محمد عبد الماجد الصايم
Date: 05-22-2010, 10:14 AM
Parent: #13
ينصر دينكـ ودين دينكـ زاتو!
|
Post: #15
Title: Re: الكِليك السّاده
Author: خدر
Date: 05-22-2010, 10:17 AM
Parent: #14
| Quote: ينصر دينكـ ودين دينكـ زاتو! |
|
Post: #16
Title: Re: الكِليك السّاده
Author: محمد عبد الماجد الصايم
Date: 05-22-2010, 10:25 AM
Parent: #15
مدح بما يشبه الذم .. ولّ كيف؟
|
Post: #17
Title: Re: الكِليك السّاده
Author: داليا الكباشى
Date: 05-22-2010, 10:38 AM
Parent: #16
| Quote: مدح بما يشبه الذم .. |
السغــافه الجاتك على كبر دي مااااا مريحاني !
قاتل الله المعيـار!
|
Post: #19
Title: Re: الكِليك السّاده
Author: محمد عبد الماجد الصايم
Date: 05-22-2010, 10:42 AM
Parent: #17
طيب العكس يا داليا ياخ!
مابتريحوا الزول في انفعالاتو!
|
Post: #18
Title: Re: الكِليك السّاده
Author: طارق جبريل
Date: 05-22-2010, 10:39 AM
Parent: #16
اللهم باعد بيننا وبين كلكات القوم
عمدة كيفنك ابوي
|
Post: #20
Title: Re: الكِليك السّاده
Author: محمود بكر
Date: 05-22-2010, 11:33 AM
Parent: #18
الفاضل عمدة بدون اطيان
انت مشيت الامتداد ليه؟؟؟؟
اوع تكون سمعت كلامي وعرست
تحياتي للعيال
|
Post: #21
Title: Re: الكِليك السّاده
Author: الملك
Date: 05-22-2010, 12:05 PM
Parent: #20
درجة الحرارة حالياً... فى سماء الخرطوم
47 درجة مئوية...
الواحد تانى الا يلبس سادة
ويسوق سادة
...
...
ويقرأ سادة
يا عماد يا سادة
:)
|
Post: #35
Title: Re: الكِليك السّاده
Author: Emad Abdulla
Date: 05-22-2010, 05:55 PM
Parent: #21
سيد ناجي ياخ ..
أخوك محتاجك .. إتصرف
تعال نفك فيك الحالة السادة دي ..
سكتووووو من أبو كديس .
ياخي أمرق تعال .
|
Post: #34
Title: Re: الكِليك السّاده
Author: Emad Abdulla
Date: 05-22-2010, 05:53 PM
Parent: #20
أوووووه .. شيخ محمود ..
إزيك يا جد العيال .
يا زول بقينا للنص ..
أريتني كان سمعت كلامك ..
ما كنت إتكلكت .
مودتي يا زول يا سمح .
|
Post: #33
Title: Re: الكِليك السّاده
Author: Emad Abdulla
Date: 05-22-2010, 05:51 PM
Parent: #18
طارق ..
تتبارك ما تتشارك ..
قول آمين .
|
Post: #32
Title: Re: الكِليك السّاده
Author: Emad Abdulla
Date: 05-22-2010, 05:50 PM
Parent: #14
عار يعيرُ فهي عايرة يا ود الصايم ..
ما عندك سوط ؟؟
|
Post: #30
Title: Re: الكِليك السّاده
Author: Emad Abdulla
Date: 05-22-2010, 05:47 PM
Parent: #10
يا دكتورة ..
كدي قولي خير
|
Post: #28
Title: Re: الكِليك السّاده
Author: Emad Abdulla
Date: 05-22-2010, 05:44 PM
Parent: #7
ود التوم ..!!!!
أصبر لي بس .
بلقاك انا .
|
Post: #27
Title: Re: الكِليك السّاده
Author: Emad Abdulla
Date: 05-22-2010, 05:43 PM
Parent: #6
النبي فيك يا عصمان إن ما شفت لي لوتري معاك ..
إشا الله لوتري راعي .
كلو ما جايب همو يا قريبي .
أمسك قوي يا عصمان ..
الحكاية ما معروقة .
|
Post: #26
Title: Re: الكِليك السّاده
Author: Emad Abdulla
Date: 05-22-2010, 05:41 PM
Parent: #5
ود المكي يا زول يا حلو ..
هسه باقيلك دي حالة يدخلوا فيها أي حتة ؟؟
و بعدين ياخ المكان ده بقى غريب ..
ماااااااااااااااااا ياهو أبداً ..
و أقرا و شوف ..!!
محن يا ابن خالتي .. محن .
الله يديك العافية يا باسط .
|
Post: #25
Title: Re: الكِليك السّاده
Author: Emad Abdulla
Date: 05-22-2010, 05:39 PM
Parent: #4
أميرة الشيخ هنا ؟؟
إزيك ياخ .
|
Post: #22
Title: Re: الكِليك السّاده
Author: طيفور
Date: 05-22-2010, 12:57 PM
Parent: #1
|
Post: #24
Title: Re: الكِليك السّاده
Author: دينا خالد
Date: 05-22-2010, 05:35 PM
Parent: #22
وووووووووووو يا عمدة وينك ياخ ؟
وانا اقووول المغنية من الديوم يومداك بتغنى
يا سااااااااااااااايق الكلك ... هكذا بدون ياء
كمان .. مش بدون دبليو !
هسه عماد عماد عماد دى انت راكب ليك كلك ؟؟
تالله لن يغفر لك انها سادة او مشلخة او بى ام دبليو حتى ..
وكمان الشنب تامى سكن ؟؟ لووووووووب الله يستر من الباقى ..
اتوقف هنا .. لانو ما شفتا فى غيبتك دى
ياعمدة جاتنا معايير فى صمة خشمنا... اصبح الواحد
يتحسس كيبورده وهو يكتب .. بقينا نشيييل ونعبر
قبل ارسل رد .. اصلو م اى سليمان دا لو ما قفل المحل
دا ما برتاح لووووووول يا محمد ..
ـــــــــــــــــــ
Quote: جمعة بيض ..
في بلد أبيض |
ويوميات زول ابياااااااض ! هسه لو دورت
مشيت لقاء السحاب من الصباح داك مش كان احسن !
|
Post: #37
Title: Re: الكِليك السّاده
Author: Emad Abdulla
Date: 05-22-2010, 06:03 PM
Parent: #24
دينا ..
بللاي إنتي لسسسه ؟؟؟
يا حليلك
|
Post: #36
Title: Re: الكِليك السّاده
Author: Emad Abdulla
Date: 05-22-2010, 06:02 PM
Parent: #22
طيفور ..
إنت بس تعال ..
لو ما كرررررررررررررررررررررر ..
تشوف براك .
إنعل أبو ميتين دي حالة ..
( مافي طريقة اسب السب داك الإنت عارفو .. يقومو يقبضونا كمان )
إنت مقبوض ؟؟
ح انتظر جيتك .. عشان نفتو مع بعض مع بعض .
|
Post: #23
Title: Re: الكِليك السّاده
Author: ASHRAF TAHA
Date: 05-22-2010, 04:42 PM
Parent: #1
|
Post: #38
Title: Re: الكِليك السّاده
Author: Emad Abdulla
Date: 05-22-2010, 06:04 PM
Parent: #23
أشرف ..
SOS .. SOS
سريع سريع
|
Post: #40
Title: Re: الكِليك السّاده
Author: ASHRAF TAHA
Date: 05-23-2010, 07:34 AM
Parent: #38
Quote: أشرف ..
SOS .. SOS
سريع سريع |
دي ذكرتني شكلت المصرية البطة في سوق نايف مع الهندي لمن قال ليها (ما ساء الله سامان مية مية)
وردت عليهو: بص بأاا يو مصت كوليكت يور سيلف وللا آي ويل كوليكت يو!
احب ليك سوس زاتو
|
Post: #39
Title: Re: الكِليك السّاده
Author: ابراهيم عدلان
Date: 05-22-2010, 06:09 PM
Parent: #23
الفردة يا عمده عندنا هنا تعني الصداقة القوية بين مجموعة تتعدي الثلاث
you are in my click
و مستخدمة بكثرة في الشركات حيث يشار للزول العارف القرارات قبال ما تطلع انو في ال inner click
اما الكليك بتاعتك دي و الله قدر ما حاولت اتذكر شكلها غلبني
بس ان شاء الله تكون بلو فاتح
|
Post: #41
Title: Re: الكِليك السّاده
Author: محمد سنى دفع الله
Date: 05-23-2010, 07:47 AM
Parent: #39
( في هذه البلاد الناس تشوف قفاك .. برضاك ) .
|
Post: #42
Title: Re: الكِليك السّاده
Author: محمد الطيب يوسف
Date: 05-23-2010, 08:24 AM
Parent: #41
عمدة ياااااااااخ
|
Post: #43
Title: Re: الكِليك السّاده
Author: نادر النور آدم
Date: 05-23-2010, 03:36 PM
Parent: #42
| Quote: لأجد فحماتي القديمات الما بتغباني زايداً عليهم علبة ميرندا ( موبايل ) مطفقة و مظبطة و مستوية محشورة و مربوطة مع القماشة كأحلى ما يكون !!! |
كامل تضامني يا أديب..
تحياتي
|
Post: #44
Title: Re: الكِليك السّاده
Author: Hadeer Alzain
Date: 05-23-2010, 07:11 PM
Parent: #43
عماد يا بروفايل روعة!
لو ربنا أكرمنا (بعد ده!) بجو جميل طول العام، أها وسخر لينا
البشير وملتو يخلو الكهرباء والموية متوفرات أربعة وعشرين ساعة
وأدانا محليات هميمة وشباب همة ينضفو الشوارع والأحياء والخيران !!
تاني في زول بنقنق من كدر البلد وحال حكومتها المهببة دي؟!!
الكِليك السّاده دي نفسيات ساي تاني ما حا تخسر ! 
والغلاء بكون مبرر وعندو طعم غير حنضلي!
وكثير التحايا ..
_______
أحلام زلوط
|
Post: #45
Title: Re: الكِليك السّاده
Author: هواري نمر
Date: 05-24-2010, 00:58 AM
Parent: #44
| Quote: أدخل به الحفلات و الديسكوهات زمانئذٍ . فأخرت الجماعة في عدد البلوم و الجكس الذي أوقعته في حبائل ذاك ( الود أب شنب .. حلااااااااااااااااتو ) أو كما قالت الحسان ديسكوئذٍ . |
حليل آبـــــــــــــــــوي..
حليلنا منها الزائلة.... ياآآآ عمدة
ــــ
مشتاقين يا فنان..
تحياتي واحترامي يا(خال),,,,بتاع الامجاد ما عمل فيك خير كلو كلو!!
|
Post: #46
Title: Re: الكِليك السّاده
Author: ibrahim kojan
Date: 05-28-2010, 08:51 AM
Parent: #45
they say here
it is so hot people started to forget their names
so click or international may not be the the name!!
could be the name that came from the back side of forgetfulness
good Friday ya Emad
do you know i .......
TRY TO ENJOY IT
NO MATTER WHAT
|
Post: #47
Title: Re: الكِليك السّاده
Author: عبدالحليم حامد النعيم
Date: 05-28-2010, 09:31 AM
Parent: #46
...
..
العمدة والله طولت الغيبة علينا بالحيل
وعشان كمان الحكاية ما تجوط لينا في راسنا
عندي اول حاجة سؤال ..
ليه ما مشيت مربع أربعة ... ليه اطناشر ؟؟
تاني صـور لينا العربية عشان بس نعرفا ...
والبريحك... من قفاها ... ولا من ... قفاها
أكيد المودة والتقدير
|
Post: #48
Title: Re: الكِليك السّاده
Author: رشا سالم
Date: 06-03-2010, 11:11 AM
Parent: #47
عيب لي الكليك دي..
ناس ما بتحمدش ربونا..
|
|
