بس مطعم لذيذ ده عندو فول نايم نوم

المطعم ده
فى العمارات
نظيف وكويس .
يعنى فى مساحتو ماهو كبير
الا عندو فول مع زيت الزيتون والشمار والطحينة
ما تدى الجمبك . يازول فول يرجعك للزمن الزمان زمن العيش طار وقطع
البصل بالفرار .

شكلو حيمسح ليك فول
الجحش بتاع السيدة زينب فى القاهرة
ويجدع ليك فول العبجى ( حلب سوريا ) جدع .
ولو حافظ على شكل الخدمة دى حيمسح ليك فول عطبرة زاتو .
هو الزول ده بيجيب الفول ده من ياتو جرف ؟

ومع الفول فى حاجات تانيات كتيرات .
واحد فى الخواجات المعاى متكيف قال This Chichen is Great Taste
زوجتو برضو سألت عن ال Fat قلت ليهم يا مسانيح فات شنو ؟
الزول يقول يا سيدى الحسن ويخبت .

هلا يا ابو عفان
وحباب الفول..
وقد قيل يا الفوال اسرع انا جيت
بالملاحة وجيب الزيت
رايك ايه في فول مظبط بوخو يولول زيتو مربط...
----------
وفولك بتاع العمارات ده الظاهر عليهو تاريخي ويشهي وعليه تم اعتماده ضمن الامكنة الاتي وجب زيارتها في اقرب اجازة
علها تعيد الي الذاكرة سيرة فول الاسطوري (الطيب عوض ريد ) في الدويم

اهاااااااااا قمنا علي حركات الفول ..... قلته شنو زيت زيتون ... وقطفه اولي كمان .... يعني ..... والا اقول ليك محل ما يسري يمري ... والا ياربي بقولها كيف .... اقول لك بعد الدواقه حنحكم ... بس انت خت الخريته....... هائيا يالحبيب والبلد نورت

عزيزنا وليم
سلامات
يا أخى فول الجماعة ديل نايم نوم .
وكلو طاعم ال beef على الضان على الجداد على السمك .
شغل تمام . يازول يازول .
تحياتى

عبدالكريم
سلامات
يا أخى هو تاريخى ساكت ؟
ده فول زى عجوة المحس .
والجميل جد فى هادا المطعم كان عنك تاكل وكان ما عنك تاكل .
يا أخى انا 13 سنة ما اكلت جرجير بس اليوم داك اسكت ساكت . ههههههها .

تحياتى

حبـابك في السودان ..

يلا احكي ليك قصه مطعم لذيذ دا,
دا اكن اصلا عباره عن كشك صغير او دكان صغيروني كدا
في الرياض شرع المشتل ,
وكان من اوائل المطاعم اللي فتحت هناك ,
كان بيعمل بي سندوتشات طعميه بالف جنيه ,
اكن مافي زيها في السودان كلها ,
وجمبو كان بيبيع ايسركريم رهييب ,
وكان ما بيفتح الا بعد صلاه المغرب ,
والوقت داك , كراعك ما تعرف تختا وين من الزحمه ,
بعد شويه شكلها نامت معاهو زي ما قلتا ,
وافتتح المحل الكبير في العمارات ,
و وبقى فيهو الفول الخطير دا ,
والطعميه ,
وفيهو برضو لحوم ومشويات وبيتزا , وسمكـ جميل جدا ..

فيهو عصير وايسركريم جميل جدا
وفيهو قعده حلوه فوق الصاله الدهبيه ,
وقعده في الحـوش اللي بره ..

عنـدو فروع في ام درمان برضو ..

Quote: الا عندو فول مع زيت الزيتون

لا عاش فول من غير ( زيت سمسم )
أما عن زيت الزيتون فإن لم يكن من الدرجة الأولى ( صعبة المنال)!!!
فزيت ( الفرامل ) أضمن....

عزيزنا حسن مكاوى
سلامات
هو زيت السمسم موجود وعلى كيفك .
وزيت الزيتون برضو على حسب طلبك .
وهسع زيت الزيتون ال OLIVE OIL اصبح علاج للقلب .
عديل فى الروشتات زى الAspirin .
على كل حال البقع فول الزول ده ما بحتاج لى دكتور زاتو .
تحياتى أخ حسن

بنتنا د / داليا
سلامات
خلى بالك ده ياهو فول جروف ( الشمالية نورى )
والجبنة حقت الدويم .
على قول العراقيين جبنة خوش .
كان فى شطة قبانيت الخواجة قال لى زوجتو جربى الشطة دى
قالتلو What .
لو جربت الشطة ديك كانت ما تقيف الا فى كلفورنيا .
سلامات

الحبيب\ عثمان موسي ,, سلامات وعساك بخير


صاحب مطعم لذيذ أخونا وود حلتنا نجيب الفوال , والده صاحب مطعم الفوال أول مطعم للفول في الخرطوم

منذ أوائل 1900 موقع المطعم غرب ميدان الامم المتحدة ولصق تلاجات الموز, يعني ماخدها بالوراثة.

بدأ مشواره بدكان صغير في تالت بيت شرق السفارة الامريكية وكان متخصص فول فقط وكان الدكان مركز تجمع

لطلاب جامعة القاهرة الفرع. أنتقل بعد ذلك كماذكرت دكتورة داليا الي الرياض وفتح لذيذ لبيع الايس كريم

والساندوتشات, ثم توسع وفتح مطعم لذيذ في العمارات شارع (1), نجيب من الناس الافاضل ورجل خير ربنا يوسع

ليه في رزقه ويوفقه . وفعلا فول لذيذ لذييييييييييييييييذ خلالالالالالالالالالالالالاص , والمشاوي حاجة عجييييييييبة.


تسلم يا ود موسي

عزيزنا سيف الدولة
سلامات
كلامك حق . أكيد الأسرة دى أسرة
عندها فهم وباع فى صناعة الجمال . طبعن صناعة المطاعم اصبحت علم يا سيف .
مطعم الفوال الزمان داك شايفو . وزى الكان عندهم وأحد من نفس الأسرة
وكيل شركة ثياب سويسرية
الثياب كانت تجى ومكتوب عليها الفوال وكانت عندها شهرة كبيرة فى السودان .
أذكر الكلام ده طشاش طشاش . بس مطعم الفوال أكيد .
عشان كدى صاحبك طلع شاطر وزول يستحق التقدير .
تحياتى أخ سيف

والله شىء يعجب
وشايف عندهم فلافل
وشاورما
وكباب
وفى كمان Carry Out لو كنت مستعجل

الاخ عثمان ،،

تحياتى ،،،

فعلا لذيذ دا عنده فوول عجييب ،،،

وانا اوصى كيكى انه يتوجه الى العمارات ،، لتناول الفووول

ويمتع عيونه ايضا ،،

الصور وين

اخونا ودالعباسية
سلامات
شايف الفول الضانى ده ؟
تضرب صحن تدفع ألفين ونص وتفنجط لو ساكن فى امدرمان تكسح الحاج يوسف عديل .
يا أخى ده فول فاهم فهم ناس العمارات .
يا ود العباسية ياريت لو فى خطة أسكانية فى الحتات دى .
تحياتى

يا سلام
على سمك النيل
عندهم FISH KABOB
وعندهم CHICKEN KABOB
وعندهم متبلات وحلويات
صحن السمك يكفى اتنين . غايتو بورداب الخرطوم كاتلين الجدادة وخامين بيضها .

عزيزنا عثمان كرار
سلامات
كيف يازول ؟
الصور فى الدرب بس شويتين كدى .
عارف يا عثمان . شكل المسطبة جميل قدام المطعم ومع المراوح فى ليل الخرطوم
السمح داك شىء عجيب . وطبعن أنت عارف ليل الخرطوم بدون مراوح همبريبو عجيب
يا سلام . يا سلام
على البلد .
..
الصور فى الدرب .
تحياتى

من تدخل المطعم طوالى تعرف
انو صاحبو عندو معرفة فى اختيار
العاملين . والعاملين هم من مصر والهند وسودانيين .

ياريت الناس الخارج البلد
يكونو عارفين وين الاكل ووين السكن وين العلاج وين المدارس
وين الشغل . عشان الزول ما يدوش ويرجع تانى يتلطع 20 سنة.
بورداب الخرطوم الكرام ممكن يساهموا كتير جدا فى التشجيع
على العودة للوطن . وفول الزول ده سبب قوى للعودة .

بس تقول العمارات
ش 1 أى بتاع امجاد يوصلك .
واضح

كل زمن بى زمنو
على كل حال دخلت علينا اكلات من مختلف بلاد الدنيا .
والمطبخ السودانى مطبخ شاطر فى فهم الشغلات .

جات انوع جديدة من السلطات
طحينه , بابا غنوج , فتوش , تبوله ,


والمعجنات
رز ابيض , مكرونه بالفرن


محاشى مشكله



كفته مشويه , كباب مشوى ,

الحلو
حلويات شرقيه , و فروت سلاد .
وبعد ده كلو الفول هو الملك مافى كلام .

والكلام يطول
عن سمك النيل فى هادا المطعم الفاخر .
السمك عندهم مدهش . الاجنبى يتكيف اكتر منك أنت زول البلد .
ويسألك السمك ده حلو كدى كيف ؟
سمك جميل وقاعد عاقل ما بخج الموية . سمك عندو طعم .

قالوا الفول بزيت السمسم هو الشىء
الوحيد الذى أتفق عليه السودانيين .
فى ها الدنيا .

حوض السليم أكبر منتج لمحصول الفول في السودان .
حافظت أسعار محصول الفول في سوق السليم بالولاية الشمالية على استقرارها في ظل وجود كميات كبيرة من المستورد، وقال متعاملون إن أسعار الجوال تتراوح ما بين 350 و450 جنيهاً، ويعد حوض السليم أكبر منتج للمحصول.

وقال مزارعون لقناة الشروق، إنهم يأملون في إنتاج وفير هذا العام يلبي احتياجاتهم ويغطي الأسواق.


وقال مدير سوق المحاصيل بسوق السليم إن الطلب على الفول يتزايد مع بدء أيام الحصاد نتيجة لزيادة الطلب عليه في أنحاء البلاد كافة.


ويقول خبراء إن محصول الفول يوفر ما لا يقل عن 85 % من غذاء السكان في السودان.


ويزرع الفول في مشروع السليم الزراعي الواقع على الضفة الشرقية لنهر النيل شرقي مدينة دنقلا حاضرة الولاية، ويمتد بمحازة ضفة النيل من كارا جنوباً إلى حدود مشروع البرقيق شمالاً، في مساحة 55 ألف فدان.

الحساب بالدولار

سعر شوال الفول حوالى 165 دولار
نوع فول حوض السليم الكبار الشوال يعمل 750 طلب فول .
سعر طلب الفول حوالى واحد دولار يعنى الشوال = 750 دولار .

الفول يقف فى وجه الأزمة الأقتصادية
__________________________________

يقف "أبو حسين" اليوم أمام عربته في بداية سوق شارع "ابن الرشد" صامداً في وجه الأزمة المالية العالمية، في زمن سقطت فيه أو "بنشرت" عدد من عجلات عربات الفول الأخرى.

يثق في جودة المنتج الذي يقدمه ويدعي أن حبة الفول الجيدة والمسلوقة بعناية هي أهم عوامل نجاحه، كما أن السرّ الحقيقي يكمن في الخلطة –خلطة البهارات- التي يضيفها إلى الصحن المباع، مكوناً صورة مشابهة لما تقوم به شركة "كنتاكي"، حيث حاول عدد من أصحاب عربات الفول الأخرى تقليده، من خلال وضع عبارات مشابهة للتي وضعها "أبو حسين" على عربته.

صحن فول "أبو حسين" المليء والمبهر كان دائماً يتطور، وإن كنّا اليوم في عصر السرعة حيث لا وقت لأن تقضي عدة دقائق لتأكل صحن الفول على عربة في منتصف الشارع، ونتيجة لمواكبة رغبة وحاجات المستهلك طوّر أبو

حسين أسلوب بيعه من صحن "الستانلس ستيل" إلى صحن كرتوني يستعمل لمرة واحدة، يمكن حمله خلال التسوق.

اسمه "محمد حسين حسين" وولده "حسين" أيضاً، ولهذا عرف عنه اسم "أبو حسين"، يقول لموقع eSyria الذي زاره بتاريخ 13 أيلول 2009: «صباحاً أخرج للتسوق ومن ثم أعود لسلق وتحضير الفول حيث تستغرق عملية السلق على النار حوالي ثلاث ساعات، وفي المساء أبعيه على عربتي».

وعن تأثير الأزمة المالية العالمية على عمله يقول: «أثرّت من حيث أسعار المواد الأولية التي ارتفعت، بالمقابل حافظت على سعر صحن الفول ثابتاً، أحببت أن أكسب الزبون الذي هو المربح الحقيقي لي».

يستأجر "أبو حسين" مكاناً يركن فيه عربيه ليلاً بمبلغ /2000/ ليرة سورية شهرياً، ويضيف: «ما أعرفه عن الأزمة العالمية أن كل ما كتبه الله سوف يصير، بأزمة عالمية أو بدونها، إن كان
أسلوب "أبو حسين" في الترويج
هناك رزقة لي فسوف آكلها».

وعن اللافتة التي وضعها على عربته والتي ساهمت في تحقيق شهرته يقول: «أعمل في مصلحة الفول منذ عام 1994، وتعلمت المصلحة على يد معلم فول من اللاذقية اسمه "محمد شيخ خميس" وكان يبيع الفول في "دمشق"، بعد قدومي من "اللاذقية"، قمت بتركيب شمسية للعربة وجاء الخطاط "موفق خزام" وكتب لي عبارة "احذروا التقليد ليس لدينا فرع آخر"، وقد قمت بإزالتها مؤخراً، وذلك لأن الكثير من أصحاب عربات الفول قاموا بنسخها على عرباتهم، واستبدلتها الآن بعبارات أخرى "الرزق على الله، فول أبو حسين على الأصل دوّر"، "كول فول وصلي على طه الرسول"».

وقال: «تقدمت بطلب توظيف في الشؤون الاجتماعية والعمل منذ ثماني سنوات ولم أعمل حتى الآن، فقررت أن أستمر بعملي في بيع الفول حتى توافر الشاغر».

** "أبو حسين" صديق للبيئة
يضع خلطته السرّية
أيضاً..!

حيث يضع بالقرب منه سله مهملات، ويطلب من الزبائن رمي البقايا فيها، كما أنه يقوم كل نصف ساعة بجمع المخلفات التي سقطت على الأرض ورميها في المكان المخصص لها.

ودّعت "أبو حسين" واعداً إياه بطباعة هذا المقال عنه وإحضارها له، ووعدني في حال نشرها بأن يعلقها على قسم جريدة الحائط على عربته.

الزول البعمل الفلافل عندهم ببالغ
والشطة القبانيت مع الليمون تقطع النفس وتقد الجيب .
يا أخى زول من بورداب الخرطوم يجيب لينا صورة من العمارات بس .

فى ناس بتتكلم عن محل فول
فى سوق السجانة بشتغل فطور بس . انا ما شفت المحل
بس الناس بقولوا بتاع السجانة برضو عندو فول قاطع .

واحد من ناس الاقاليم بيقراء في الجامعة الاهلية حنكوشة قالت ليهو
انا ماشة لي deluscious قال ليها مانمشي لذيذ احسن.

العنوان العنوان وخلى الصور على

عزيزنا محمد عوض
سلامات
أول شىء جيب لينا صورة من الخرطوم .
والناس ماشين .
مشتهين الخرطوم يا أخى .
تحياتى

ود مالك
سلامات
عليك امان الله يا ود مالك
لو فى فرع للمطم ده جمبك فى فرجينيا .
تانى امدرمان الا فى الحلم .
يا أخى ديل عندهم فول يخليك فى الكورة تشوف الكورة كورتين .
يازول .

Quote: ولو حافظ على شكل الخدمة دى حيمسح ليك فول عطبرة زاتو .

عثمان موسي


كلامك مقبول وعلي العين والرأس الا الكلمة الحمرة دي عاينليها كويس بعد ما تضرب فول لذيذ



يا زول فول عطبرة ما ممكن يكون في اي حتة في العالم.


حليلك يا زمان حبيب باسطة

عزيزنا ود السيدح
سلامات
يا أخى عطبرة ديك فى القلب .
انا بقول مطعم لذيذ لو حافظ على نوع الخدمة السمحة دى
ممكن يمسح الفول العطبراوى . يعنى الفول العطبراوى حتى بعد دمار السكة
حديد هو ياهو .
صاحب مطعم لذيذ زول مفتح وفاهم الشعب السودانى .
تحياتى

أهم شىء رغيف العيش
الخبز .
مطعم زى مطعم لذيذ مفروض يكون عندو مخبز حقو .
ومفروض برضو يعمل ال WHOLE WHEAT عشان نوع العيش ده صحى اكتر .

صاحب المطعم رجل أعمال ناجح .
نجح فى أختيار الموقع العجيب للمطعم موقع استراتيجى جد .
قلب العمارات . 7 دقايق كدارى الى المطار 10 دقايق كدارى الخرطوم 2
الخرطوم 3 الديوم الشرقية .

عزيزنا ناذر الخليفة
حاول اجدع ليك صورتين للمطعم ده هنا

عثمان موسى
بناكل الفول في بحري و لما نمشي لذيذ بنضرب اللحوم

تخريمة
ياخي نركز على الفول و الله على الدهب؟!

الأخ عتمان

تحياتي

موضوعك يقوم النفس وحياة ربنـا.

هسي لو ممكن صحن فول من السودان (لكن معاهو زيت سمسم) بالDHL تكون حاجة ماتخلص.

حصل جربت فول فريــد

في بحري شارع الإنقاذ جنوب حديقة عبــود؟؟؟

أستغفر الله العظيم لو داير تقوم علينـا وجع القلب ياخي.

احترامي وشوقي لفول فريد

عزيزى الحاج حمد الحاج
سلامات
اسمع يا أخوى نركز على الدهب والفول
عشان نطلع من الأزمة الأقتصادية العالمية .
سلام كتير

عزيزنا ياسر عبدالعزيز
سلامات
الدنيا السودانية تعشق حبيب الشعب وتتفنن فيه .
بس يا ياسر أخوى . زولك صاحب لذيذ فنان عمل الفول بفهم جديد .
زولك فيه دم حلب وأنت عارف اهلنا الحلب هم الناس الجابو الحاجات
الجميلة فى السودان . ناس أصحاب حضارة اكيد .
تحياتى

الجرجير
الجرجير أخ من الجرجير .
الجرجير ده هو السبب البخلى الناس ترجع السودان
وبدون عودة . تعال شوف الفول بالجرجير ده .

عثمان عاين ايام الزمن الاخضر مش مطاعمك اللملصقة دي اقرا بس

حليل زمن البيوت المو بيوت ضيق

وحيشانا المبردحة ماها محيق

ولقاديبنا المبلطة خاطي شقيق

مضللة بالفِلَق ما فيها رقريق

المرق مرقا صنط وساوينلو ارنيق

وراصين القداحي صفوف معاليق

وبرنداتنا الكرارق بالشباريق

الطير بعضو عشعش في السباليق

زمن الناس حنينين مافي فريق

لا جفا لا غلت لا حتى نقنيق

ونحن سايقين السواقي وعيشنا متيق

ولابسين الشمامير والعراريق

وتسمع لاااااتحت دق المداديق

يجي احمد للفطور وشايلو باسيق

مالي الشبكة قش وقاطعلو اشميق

يفسخ ويمشي مالو جيوبه دِفيق

ويجدع منجله الما حام كتاريق

تجيبلو ام زين حريف يفكبو الريق

ويا حلات النومة وقت الضل يجي ارتيق

عزيزنا شيخ العرب الطيب شيقوق
يا أخى السلامات شواويل شواويل

عمك عثمان اليمنى قال :
ويجدع منجله الما حام كتاليق .
..
الأيامات ديك يا الطيب ولا أزمة أقتصادية ولا شىء .
حليل ديك الأيام وقت زيت السمسم بالصفيح والتقلية حدها الركب .
تحياتى .
أسمع فى الأجازة عازمك 3 وجبات فول بس فى لذيذ ومعاك ود القرشى
يا الطيب ناس د / ود القرشى ود / بخيت عندهم بتاع فول خترى
جدا فى عمارة السكر ما عارفو هسع فى ولا رحل الكلام ده
سنة 1985 .
تحياتى

سلامات يا عثمان وحمدا لله علي السلامه
معاك حق : فول لذيذ فعلا لذيذ
وكمان عندهم طعميه مباااااالغه .. ان شاء الله تكون جربتها
انا غايتو زبون رسمي لطعمية لذيذ فرع الرياض
الشي الاجمل من كل دا . . انه صاحب المطعم زول خير
شاهدت كثير من البرامج والمواقف التي قام بها مطعم لذيذ لافعال الخير

Quote: أسمع فى الأجازة عازمك 3 وجبات فول بس فى لذيذ ومعاك ود القرشى يا الطيب ناس د / ود القرشى ود / بخيت عندهم بتاع فول خترى جدا فى عمارة السكر ما عارفو هسع فى ولا رحل الكلام ده سنة 1985

.

انت عثمان بتعرف ود القرشي دا قبل سودانيز يعني ؟

يا الطيب أخوى
سودانيز دى ما هسع .
هو منو فى البلد الما بعرف ود القرشى خطيب النشاط .
وبعدين جمعا شغل الانتفاضة ديك الأيام 1984 وعرفتو عن طريق
سيف ود / شداد ومجذوب وبخيت وعمارة السلام . ود القرشى أخوى من زمان .
تحياتى

Quote: هو منو فى البلد الما بعرف ود القرشى خطيب النشاط . وبعدين جمعا شغل الانتفاضة ديك الأيام 1984 وعرفتو عن طريق سيف ود / شداد ومجذوب وبخيت وعمارة السلام . ود القرشى أخوى من زمان .

والله يا ود موسى الراجل دا طيب ومسكين اصلي ما شايفو بشبه الشدايد والمناكفات

ولا كبر وعقل يا اخوانا ؟

عثمان موسى
تحية من الخرطوم وقريب جدا من مطعم لذيذ العمارات .
المطعم كويس بدون شك ، لكنه مصاب بكثير من خطايا المطاعم في السودان .
أولا عليه طلب عالي بالرغم من ارتفاع أسعاره . بالمناسبة الفول عندهم بأربعة جنيهات ، يعني لو أكلت فول يوميا من لذيذ سيكلفك في الشهر 120 جنيه . بعدين غالبية وجبات المشويات ب 22 جنيه . سلطة لذيذ مشكّلة ب 6 جنيه . والسندوتشات متوسط أسعارها 5 جنيه ، وساندويتش الفول ب 2.5 جنيه ، وكذلك الطعمية ، والمشكّل بثلاثة او أكثر .
العصير ب 5 جنيه .
ملاحظات سلبية :
يوفر المطعم مناديل ورقية للزبائن لكنها غير منتظمة .
المطعم مثله مثل غالبية المطاعم السودانية يحاسبك على العيش ويقدم لكل طلب عيشة واحدة .
مستوى نظافة المطعم ونظافة العمال عادي أو أقل ، وكثيرا ما تفوح رائحة العرق من عامل النظافة .
المغاسل ضيقة ومحدودة جدا ، وعلبة الصابون التي تعمل بالضغط معطلة منذ فترة دون إصلاح .
المطعم لا يضع على المناضد احتياجات الزبون مثل قارورة الزيت ، الخل ، الكاتشب ، وخلافه .
ملاحظة أخيرة :
هناك محلات عديدة في الخرطوم تقدم طبق الفول بخلطة أحلى وبسعر أقل .. وليست هناك أسباب مقنعة لغلاء الأسعار ..

عزيزنا ودقاسم
سلامات
وصفك للمطعم ده معناتو أنت زبون دايم ياودقاسم .
ومعناتو الخدمة عجبتك . الساندوتش حق الفول الكبير حوالى دولار واحد .
طلب الفول صحن داخل المطعم حوالى دولار ونص .
يا أخى سعر وجباتو ما كعب . والنظافة محترمة والتعامل محترم والفول مافى
منو والسمك مافى منو .
تحياتى

Quote: و وبقى فيهو الفول الخطير دا , والطعميه , وفيهو برضو لحوم ومشويات وبيتزا , وسمكـ جميل جدا .. فيهو عصير وايسركريم جميل جدا وفيهو قعده حلوه فوق الصاله الدهبيه , وقعده في الحـوش اللي بره ..

أها يا عثمان موسي ضريتنا
وداليا تمت الباقي لامن شميت الريحة
قبل تلاتين سنة أكلت لي فول في العالياب المحطة ، الدنيا برد والساعة تمانية صباحاً
والله العظيم ريحتو لي حسي بتذكره
هنا في الرياض في منطقة السليمانية يوجد محل اسمو أبو جبارة ، فرع للمطعم الأصل بعمان الأردن
ياخي ده فيهو سمنة بلدية تشمها من الإشارة
من زباينو حميضة وطمبس
شكلي بزوغ الآن عليهو

عزيزنا نوفل
سلامات
هو كمان المطعم ده عندو فروع ؟
ده كلام يستحق التشجيع من الناس .
تحياتى

عثمان

علمك ود القرشي فط المتداخلين

اها بديك نصف ساعة اكان ما رديت على تاني وحاة ود حيسونة لا بيني لا بينك

ود شيقوق
البفطك منو يا شيخ العرب ؟
أنت يا سيد السواقى تكاكى وزين .
أنت يا سيد التقلية بالجراكين .
هازول كيف .
..
عاين

صاحبك الدغور برضو عارف محلات فول عجيب وزلك فى البلد زارعو تب .

عزيزنا عمران صالح
سلامات
نان يا عمران العالياب هى ما بلد الفول .
هناك الفول حلو لا زيت لا ملح . تقع فى الصحن تطرقع حنانو زاتو .
أنت قايل البطرقع الصحون فى محطة العالياب منو ؟
ما ياهو أنت ده .
يا أخى سلامات

الحصاحيصا ياسعادتك مانمشي منها ساكت عندهم فول زي الدلكة علي قول
اخونا ابوالدسق مابيدفق من الصحن حتي لو كفيتو .

ود شيقوق
فى محل فول فى الشارقة
اسمو مون صاحبو مصرى يا أخى ده عندو فول عفريت عديل .
عليك الله يا الطيب المطعم ده لو موجود اجدع لينا منو صورة
آخر عهدى بالمطعم 1988
كنت بمشى كدارى ساعتين عشان هادا الفول .

Quote: علمك ود القرشي فط المتداخلين

Quote: اها بديك نصف ساعة اكان ما رديت على تاني وحاة ود حيسونة لا بيني لا بينك

يا ود شيقوق بطل الابتزاز

عثمان موسى دا زول واجب

بيكرمك وبزيادة

وبزور اي بوست وبقدم مساهمته

لكن انت عليك شفقة بت حريكه

تحياتي عثمان موسى

ودمالك عزيزنا
الزول البيعرف السمك الحلو وهو فى بحرو
سلامات .
قالوا ياود مالك زمان كنت بتحضر الزيت قبال الصارقيل .
اها الحوت السمح وين ؟

عثمان موسى كيف الحال والاحوال ان شاء الله بخير

تعرف الفول ده انا ما قاعد ادورو خير شر .. ما بقى لي حلو الا بعد ما جاني القاوت ومنعوني منّو.
لذيذ عندهم حاجات تانية غير الفول فظيعة ياخ وانت ذكرتها ..يعني انا اقوم من الامتداد امشي شارع واحد عشان اكل فول !!! واخلي الحاجات العجيبة التانية دي .
مرّة كان عندنا بكاء في الرياض (السعودية) ومشينا انا ومعاي واحد نجيب العشاء (فول وطعمية وسلطة اسود) من مطعم العباسية قمت انا قلت لبتاع المطعم عليك الله ادينا عشرين فول مصلّح .. الزول المعاي قال لي ياخي ما تظبّط الفول نحن عندنا بكاء خلي يدينا فول سادة البكاء ما بشيلو ليهو فول مظبّط .. نططت عيوني وقلت ليهو : ياخي نحن مظبطنّو بي كمنجة !!! ما مظبطنّو بي جبنة وبيض مسلوق .

يختو لي الفول والكبدة واللحمة في صينية ويقولوا لي هووووي يا امير انت عندك القاوت ابعد من الكبدة واللحمة ديل .. وهو الفول ذاااتو بيجيب القاوت عليك النبي الفول ده ما سلبطة منّو ساكت متلصق في اللحمة والكبدة في جيب القاوت .. اصلو وكت القاوت جاييني جاييني اخير يجيني باللحمة من يجيني بالفول .

اول ما امشي اجازة حا امشي مطعم لذيذ وحا اطلب لحمة وجداد وسمك .. واعاين للفول بي طرف عيني .

الاخ عثمان موسى
حمد الله علي السلامة
بالنسبة للفول ومادراك مالفول
هل سمعت بفوال ابو ظريفة في ودمدني
دا عنده فول لو قلبت السودان دا طوبة طوبة مابلاقيك زي فول ابو ظريفة
انت عارف لو عاوز تاكل فول عنده لا زم تحجز طلبك قبل يوم (هههههههههه)
مع العلم انه المطعم دا ليه اكتر من سبعين عام لكن لغاية الان محتفظ بنفس مذاقه وطعمه
اما عن السمك فمطعم حسن جاد الله ممكن تسال عنه اصحابك ناس مدني
مع تمنياتي لك بقضاء اجازة سعيدة وسط الاهل والاصحاب
اسامة

عزيزنا د / أحمد القرشى
سلامات
اها السنة دى الاجازة كيف ؟
يا أخى دايرين ننتهى من قصة الهجرة دى ونشوف لينا كشك
فى نواصى البندر حقنا .. ما فضل فى العمر كتير . ربنا يرجعنا بالسلامة
تحياتى

Quote: يلا احكي ليك قصه مطعم لذيذ دا, دا اكن اصلا عباره عن كشك صغير او دكان صغيروني كدا في الرياض شرع المشتل , وكان من اوائل المطاعم اللي فتحت هناك , كان بيعمل بي سندوتشات طعميه بالف جنيه , اكن مافي زيها في السودان كلها , وجمبو كان بيبيع ايسركريم رهييب , وكان ما بيفتح الا بعد صلاه المغرب , والوقت داك , كراعك ما تعرف تختا وين من الزحمه , بعد شويه شكلها نامت معاهو زي ما قلتا , وافتتح المحل الكبير في العمارات , و وبقى فيهو الفول الخطير دا , والطعميه , وفيهو برضو لحوم ومشويات وبيتزا , وسمكـ جميل جدا .. فيهو عصير وايسركريم جميل جدا وفيهو قعده حلوه فوق الصاله الدهبيه , وقعده في الحـوش اللي بره .. عنـدو فروع في ام درمان برضو ..

Quote: صاحب مطعم لذيذ أخونا وود حلتنا نجيب الفوال , والده صاحب مطعم الفوال أول مطعم للفول في الخرطوم منذ أوائل 1900 موقع المطعم غرب ميدان الامم المتحدة ولصق تلاجات الموز, يعني ماخدها بالوراثة. بدأ مشواره بدكان صغير في تالت بيت شرق السفارة الامريكية وكان متخصص فول فقط وكان الدكان مركز تجمع لطلاب جامعة القاهرة الفرع. أنتقل بعد ذلك كماذكرت دكتورة داليا الي الرياض وفتح لذيذ لبيع الايس كريم والساندوتشات, ثم توسع وفتح مطعم لذيذ في العمارات شارع (1),

كلام سيف مكمل لكلام دكتورة داليا ..... والزيادة من عندي ....... نجيب ايضاً صاحب محل ايسكريم بمبينو في شارع الحرية وكان مشهور لوقت طويل جداً قبل ما يفتح لذيذ الرياض بعد لذيذ الرياض قام نجيب بفتح فرع لذيذ في النادي العائلي (نادي ابولو سابقاً) شمال نادي الضباط استمر الفرع لفترة بسيطة قبل ان يقفلها وينتقل الى لذيذ الحالي بالعمارات ش 1 الغريبة ان نفس الموقع الحالي كان كافتريا اسمها (نجف) لم تحقق عشر ما حققه لذيذ ......................... اخونا عثمان ......... كان في السودان لسه جرب فول طلعت في شارع 41 العمارات ........ المحل حالياً يملكه سوداني لكنه اشتهر باسم طلعت مالكه السابق وهو لبناني على ما اظن في رأي الشخصي اخطر من فول لذيذ مية مرة .............

جنابو عمر
سلامات
ضرورى نشوف حق شارع 41 العمارات بعد نرجع أنشاءالله .
شارع 41 يا جنابو من الشوارع العامرات فى العمارات مش كدى ؟
انا اذكر شارع 15 شارع مليان ومنعنش كدى ثم شارع 1 . الا والله يا عمر
ما قادر اجمع .. الزمن طال والكبر حصل .
تحياتى

عزيزنا اسامة ابوالحسن
سلامات
كيف يا أخى أبوظريفة تاريخ
زى المحالج وزى مكتب بركات ده فول طويل التيلة يا ابوالحسن .
..
تحياتى

عزيزنا الجمرى
سلامات
يا أخى بعد ما توسعت زراعة الفول فى كلفورنيا .
وكل الدراسات تقول أن الفول يسهل عملية خفض الوزن فى ظل الانتشار الكبير للسمنة
.. مافى علاقة بين القاوت والفول . ده كلام ساكت يا الجمرى أخوى
الفول بشيل القاوت .
تحياتى

..

Quote: مافى علاقة بين القاوت والفول . ده كلام ساكت يا الجمرى أخوى الفول بشيل القاوت . تحياتى

عثمان موسى عايز تكعوجني وتلولوني مالك ؟
مرة كان عندي نزلة شديدة جدا جاني فيصل الصحافة قال لي اكل ايسكريم واشرب موية من الفريزر .


انت وفيصل عايزين تودوني التوج .
بس تلقوها عند الغافل ..
الفول ده ما باكلو ما باكلو .. ونشوف اللذيذ عند لذيذ .

عزيزنا الجمرى
سلامات
يا أخى جد الفول لا بلولو ولا بكعوج .
يا أخى ده اسمو الخرصانة . البتكعوج المراوح والمكيفات والبكعوج اكتر
عدم الحركة . الفول يا الجمرى حتى علاج للكلسترول . بس المهم الزيت
يكون زيت جيد . سمسم أو زيت زيتون .
وأحد قال اللحمة دى بتطلع د... الركب .

غايتو حظ بورداب الخرطوم
.. ده يا هو نوع الفول البرمى فى الخور .

.
.

ياعثمان موسى

البوست ده بدون صور ماليه طعم .
لازم صور لكل المطاعم التي ذكرت وصور لي صحانة الفول .

كمان فول النادي الأهلي في الخرطوم حاجة ماتخلص .

.
.