Post: #1
Title: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-15-2010, 09:03 AM
Parent: #0
شبه كبير بين التركين
وبين كورتنا في السودان
ليس إنقاصا من القبائل التي تأكل التركين
ولكنه وجبة سودانية خالصة
تعقد لها الولائم
ويتجمع حولها الاقارب والضيوف
في احتفالية كما الاعياد
وكورتنا نفس الشيء
من اتحادها
وانديتها
وجماهيرها
طريقة سودانية خالصة
واحتفاليات كما الاعياد
قرقشنا القراقير
والنيل يفيض
والسوكرتا
والاولاد
وسيد منو
وزعيم منو
والجرايد تكتب
والجماهير تفرح
والمواسير تغرق البلد
والله دي احتفالية جميلة
تاسبنا تماما
يبقى ما في داعي نتمرض
بافريقيا
وجرسة من الحكام
والسبعات
والاربعات
والتلاتات
خلونا في التركين ده
ناكل برانا
مافي زول اجنبي
حيشوفنا بناكل شنو
واسألو ناس الجزيرة الرياضية العاقلين
قالوا ما ممكن يختو صحن التركين مع البيتزا الايطالية
ولا الزيتون الاسباني
ولا الكبسة السعودية
لانه بصراحة قالوا
وعندهم حق
التركين ده ممتاز سوداني خالص
اكلوهو براكم
يغفر الله لكم
ونحن متشكرين
وزي ما قال مفتش الجمارك المصري
لقادم سوداني في مطار القاهرة
بعد ان فتح علبة التركين
وانطلق تسونامي الرائحة في الصالة
: أييييييييه ده
: تركين
: بتاع إيه
: أكل
: طب أنتو بتاكلو ده .. أمال بطلعو أيه
( عذرا لناس التركين وانا شخصيا شايقي وآكل التركين كالبقية)
|
Post: #2
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: الصادق صديق سلمان
Date: 05-15-2010, 09:14 AM
Parent: #1
أخي جمال
طلعت روح افكار الضحك زاتو وكان ممكن المدير يديني خطاب انهاء خدمة عشان الضحك الشرطني في الحتة التحت دي
Quote: وزي ما قال مفتش الجمارك المصري
لقادم سوداني في مطار القاهرة
بعد ان فتح علبة التركين
وانطلق تسونامي الرائحة في الصالة
: أييييييييه ده
: تركين
: بتاع إيه
: أكل
: طب أنتو بتاكلو ده .. أمال بطلعو أيه
|
الكورة السودانية والشخص السوداني
كورتنا يا جمال زينا وبس
لمن عندنا شخصية سودانية ذات عقل راجح وتخطيط لكل شبر في الحياة السودانيين بيقولوا ليك والله الزول دا زول عجيب خلاص ورجل ناجح جداً في حياتو
ياهو نفس الشيء
نحن ما بنعرف نخطط لأي حاجة في حياتنا دي يا جمال
المشكلة مشكلة إدارية كبيرة جداً واللاعبين والجمهور لا يلامون
لو كانت هناك إدارات تخطط لكل شيء منذ ظهور روزنامة الدوري الممتاز وجدول مباريات دوري الأبطال أو الكونفدرالية لكان الجمهور فرح بالنصر الذي حتماً سوف يأتي بعد ذلك.
وعدنا صلاح إدريس بالقنبلة في التسجيلات وظللنا ساهرون في انتظار القنبلة وحتى هذه اللحظة لم تأتي القنبلة يا جمال
لا يوجد تخطيط في العقل السوداني نهائياً.
حتى الاتحاد العام للكرة السودانية لا يخطط لأي شيء
أين فريقنا القومي الآن
ولي عودة إنشاء الله يا جمال
الصادق
|
Post: #3
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-15-2010, 09:34 AM
Parent: #2
طبق اليوم
وكل يوم
Quote: .::.البعثة عادت عقب المباراة والفريق يرتاح اليوم ويتدرب بملعب الامن الوطني غدا ... الهلال يصطاد الرومان ويستعيد الاتزان
فاز الهلال علي الاتحاد مدني بثلاثة اهداف دون مقابل سجلهم مهند الطاهر وعلاء الدين يوسف وهيثم مصطفي علي مدار الشوطين وقد كان الاداء متوسطا من جانب الفريقين وبالنتيجة يرتفع الهلال برصيده الي 27 نقطة ويتجمد الاتحاد في 9 نقاط. |
|
Post: #4
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-15-2010, 10:36 AM
اها
بعد التركين
نصيحة
ما تشرب موية طوالي
عشان ليبياما تفتح موية
|
Post: #5
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-15-2010, 10:44 AM
Parent: #4
طبق يوم آخر
من موقع اسفيري
Quote:
بعد الخروج المخيب لفريقي المريخ والهلال من دوري ابطال افريقيا هذا الاسبوع عاد الفريقان للتنافس المحلي وحققا الفوز على كل من الاهلي والاتحاد على التوالي ضمن مباريات الجولة 11 من بطولة الدوري السوداني الممتاز لكرة القدم .
الهلال حامل اللقب استطاع ان يعود بانتصار من ملعب مدني وحقق الفوز على الاتحاد 3-0 ليواصل مطاردته للمتصدر المريخ .
الهلال انهي الشوط الاول متقدما بهدف للاعبه مهند الطاهر في الدقيقة التاسعة , وفي الشوط الثاني اضاف هيثم مصطفي الهدف الثاني للهلال في الدقيقة 59 واحرز علاء الدين يوسف الهدف الثالث في الدقيقة 80 .
وفي ام درمان استطاع المريخ ان يواصل صدارته للمسابقة وحقق الفوز على فريق الاهلي 2-0 .
المريخ تقدم بالهدف الاول عن طريق النيجيري ستيفين وارغو في الدقيقة 27 بواسطة ركلة جزاء واضاف راجي عبد العاطي الهدف الثاني في الدقيقة 52 .
|
|
Post: #6
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: عزام حسن فرح
Date: 05-15-2010, 10:55 AM
Parent: #5
| Quote: بالجد كده خلونا في ( التركين) الممتاز ... دي ياها كورتنا البتشبهنا |
حرم (التركين) ظاطووو نحنا ما بنْخليهو ليكُم تبشْتنوهو بشتنه كورتكُم ... وبعدين إنت يا جمال السنوسي القال ليك منو إن < الويكه > ما بِتْلمو فوقا البوش الكتير وما بِتعبِر عن أشواق الناس ... يعني حقو العِنوان يِكون كِده : بالجد كده خلونا في ( الويكه ) الممتازة ... دي ياها كورتنا البتشبهنا
على الأقل ياخ ( التركين ) مِن السمك ، والسمك جا ذِكْرو في القُرآن < وَهُوَ الَّذِي سَخَّرَ الْبَحْرَ لِتَأْكُلُواْ مِنْهُ لَحْمًا طَرِيًّا ... > النحل 14
|
Post: #7
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: GamarBoBa
Date: 05-15-2010, 11:03 AM
Parent: #6
قد يكون اول بوست كورة سودانية اتداخل فيه للتضامن التام مع التركين
|
Post: #8
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: nazar hussien
Date: 05-15-2010, 11:10 AM
Parent: #7
تصدق دا راي من الاول يا جمال...(وكيفك يا رجل مشتاقون)
ان شاء الله بره بغلبونا 16 صفر برضو لما يكون الكورة
محلية وطرفا الهلال...بجمع الاعلام الاشتريتا زمان من
الاستاد...وادي الولد علم سيد البلد...والبنت
علم الهلال الجمال...واجيب ليهم ايسكريم واخليهم
يهتفوا...
آخر مباراة كانت امس...طلعنا مظاهرة في صويلينا داك..
وولعنا الانوار...(انت قايل الاحتفال بي قروش والله كورة؟؟)
بلاي شفت قون علاء الدين دا كيف؟؟
|
Post: #9
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: omer osman
Date: 05-15-2010, 11:18 AM
Parent: #8
كان للتركين ......... اخير كورتنا ....... 
|
Post: #10
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: عزام حسن فرح
Date: 05-15-2010, 11:24 AM
Parent: #9
| Quote: كان للتركين ......... اخير كورتنا ....... |
كان لكورتنا ......... اخير التركين .......
|
Post: #11
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: omer osman
Date: 05-15-2010, 11:30 AM
Parent: #10
| Quote: كان لكورتنا ......... اخير التركين ....... |
عرفتك بتجي طاير جوز ............
الجداد بالفرن اخير منهم الاتنين ............
|
Post: #17
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: حمزاوي
Date: 05-15-2010, 11:53 AM
Parent: #11
جمال السنوسي اخوي
مسكاقمي
وينك مشتاقين يا اخوي
أها يا العربي يا اهل العوض
ابعد من التركين
مالها التركين ... عفن وحلو
امي قاعدة جنبي قالت الولد البتكلم عربي دي ليه يقل ادبو ويتكلم في التركين
ان شاء الله لمن نسجل الشرميطي والحضري كورتنا حتكون تمام
عشان تجي تشجع معانا الزعيم
|
Post: #28
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 04:29 PM
Parent: #17
Quote: جمال السنوسي اخوي
مسكاقمي
وينك مشتاقين يا اخوي
أها يا العربي يا اهل العوض
ابعد من التركين
مالها التركين ... عفن وحلو
امي قاعدة جنبي قالت الولد البتكلم عربي دي ليه يقل ادبو ويتكلم في التركين
ان شاء الله لمن نسجل الشرميطي والحضري كورتنا حتكون تمام
عشان تجي تشجع معانا الزعيم
|
حمزاوي
كورتنا دي
ضمنة قهاوي
وقول لي ست الكل الف تحية
اها مش لو سجلتو فلان وعلان
لو سجلتو البرازيل كلها
حيتعلموا منكم التركين والمواسير
|
Post: #12
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: GamarBoBa
Date: 05-15-2010, 11:33 AM
Parent: #10
جنابو انضبط خلي شغل ملكية
|
Post: #13
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: omer osman
Date: 05-15-2010, 11:37 AM
Parent: #12
| Quote: جنابو انضبط خلي شغل ملكية |
حاضر يا افندم .....................
من وصايا التعلمجي عباس - كلية الشرطة ............ (اذا الضابط قال ليكم الحيطة دي شجرة منقا ......... تقولوا ليهو كماااااان هندية ياسيادتك)
|
Post: #14
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: عزام حسن فرح
Date: 05-15-2010, 11:41 AM
Parent: #12
Quote: عرفتك بتجي طاير جوز ............
الجداد بالفرن اخير منهم الاتنين ............ |
لا حرم ... الجِداد طير ما نزيه كلو كلو ... بياكُل أي شئ بِقع في عينو ما عواف ... بس السمك والتمك عِز بِلِز ... التركين ده < شرموط > النوبِين ... إنتو بتْشرو اللحم فوق حبِل ، تجيهو الكتاحه ... الضُبان ... النِمِتي ... بس التركين ملح + صير + طاقة نظيفة مُتجدِدة ... وبعديهو كم بلحات وشاهي وتخلِف كِرعينك وتناضِم فوق الشوق والشوك ... أريت الزمن أكان نِساني ... شِنْ ضاريهو شكيتو على الله ...
|
Post: #15
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: khaleel
Date: 05-15-2010, 11:45 AM
Parent: #14
يا جيمي
طبعا الجمهور السوداني بحب الكورة لكن مافيش لاعبين
والله صدقني لو ان في السودان برامج اخري ومسارح وحدائق لانفض سامر الجمهور
وذهب لاماكن اخري
بعدين الكرة في السودان مصدر ارزاق لعدد مقدر من الناس
تخيل لو الاندية قفلت ناس رمضان ومزمل ياكلو عيش من وين
وقصة وما انتهت لسع
|
Post: #29
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 04:50 PM
Parent: #15
Quote: بعدين الكرة في السودان مصدر ارزاق لعدد مقدر من الناس
تخيل لو الاندية قفلت ناس رمضان ومزمل ياكلو عيش من وين
|
خليل
والله كلامك صاح
لكن انا بفكر ليهم في سوق مواسير
زي سوق الفاشر ده
ما تقول مواسيرنا مستوردة
|
Post: #16
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: omer osman
Date: 05-15-2010, 11:51 AM
Parent: #14
| Quote: لا حرم ... الجِداد طير ما نزيه كلو كلو |
ياعزام ياخي انا عاوز اعينو موظف
| Quote: إنتو بتْشرو اللحم فوق حبِل |
دي ما الشفافية ياعمك
| Quote: بس التركين ملح + صير + طاقة نظيفة مُتجدِدة ... وبعديهو كم بلحات وشاهي وتخلِف كِرعينك وتناضِم فوق الشوق والشوك ... أريت الزمن أكان نِساني ... شِنْ ضاريهو شكيتو على الله ... |
بي كلامك ده احتمال الواحد يوم يغامر وياكل التركين ده ......... سجن سجن غرامة غرامة
|
Post: #18
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-15-2010, 05:03 PM
Parent: #16
يا جماعة
جياييكم بي رواقة
بس اجيب التركين معاي
|
Post: #30
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 04:53 PM
Parent: #16
| Quote: بي كلامك ده احتمال الواحد يوم يغامر وياكل التركين ده ......... سجن سجن غرامة غرامة |
يا جنابو
ياخي ما دام انت قدرت تشرب السفن أب في الاردن بسهولة
تأكد انه التركين ده حتبلعو عادي زي الزبادي
|
Post: #31
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 05:00 PM
Parent: #14
| Quote: التركين ده < شرموط > النوبِين ... إنتو بتْشرو اللحم فوق حبِل ، تجيهو الكتاحه ... الضُبان ... النِمِتي ... بس التركين ملح + صير + طاقة نظيفة مُتجدِدة ... وبعديهو كم بلحات وشاهي وتخلِف كِرعينك وتناضِم فوق الشوق والشوك ... أريت الزمن أكان نِساني ... شِنْ ضاريهو شكيتو على الله ... |
ونحن قلنا شنو يا عزام
ما كورتنا زي كده
22 لاعب لابسين فنايل ( حجم الواحد فيهم زي دعاية الجوع)
و3 حكام لابسين اسود حداد (مرات ملون)
وجماهير
ومواسير
وحجارة
وليزر
وكمرتين
ومذيع
وكم جريدة
وبرنامج تلفزيوني
واستوديو تحليل ملاريا كروية
تحضر ده كله
عشان يجيك 3 صلايب سكري
وضغط يفجر مواسير راسك
اها الملح
في التركين
وفي الكورة
بداوي الجروح والعفن
|
Post: #27
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 04:26 PM
Parent: #9
| Quote: كان للتركين ......... اخير كورتنا ....... |
جنابو عمر
خلينا حب الملكية
بقينا في المباحثية
ناس النظام حاجة تمام
عارف يا جنابو
مغستي فشيتها الليلة
جبت لي اربعة سي دي من الغنا الهابط
ناس فلان وناس فلانة
وهاك يا الايقاع
بلا كورة افريقية بلا لمة
خلونا نتخج
يخجنا الخج خجيجة
|
Post: #26
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 04:22 PM
Parent: #8
Quote: آخر مباراة كانت امس...طلعنا مظاهرة في صويلينا داك..
وولعنا الانوار...(انت قايل الاحتفال بي قروش والله كورة؟؟)
|
نزار حسين
اها احتفلت بالشجرة
كان ما شفت صورك هنا مابخليك
|
Post: #24
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 03:59 PM
Parent: #7
| Quote: قد يكون اول بوست كورة سودانية اتداخل فيه للتضامن التام مع التركين |
قمر بوبا
ونحن نتضمانن معك في هذا التركين الممتاز
الدوري ممتاز
والتركين ممتاز
والبلد ممتاز
بس خلونا في الداخلي ده
بعيدين من الحمص المصري
والكسكسي التونسي
وسفن اب الاردني
وغيرهم من الاطباق الما حقتنا
|
Post: #23
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 03:55 PM
Parent: #6
| Quote: على الأقل ياخ ( التركين ) مِن السمك |
يا عزام
التركين من السمك
والسمك من البحر
والبحر من الله
والله بدي الجنة
|
Post: #19
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-15-2010, 09:38 PM
Parent: #2
Quote: طلعت روح افكار الضحك زاتو وكان ممكن المدير يديني خطاب انهاء خدمة عشان الضحك الشرطني في الحتة التحت دي
|
الصادق
نحن انشرطنا من زمااااااان
واسال الديناصورات القاعدين فيها ديل
|
Post: #20
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: مجدي نقد
Date: 05-16-2010, 00:09 AM
Parent: #19
الحبيب ود السنوسي سلامات
ياخي ما ظلمته التركين عديل كده!!
بصراحة مقارنة غير موفقة!!
قال كورة قال!!
هو بلا التركين دا المشغل مخ ناس عزام شنو؟ ما ياهو التركين المنجضكم نجاض..هه.
|
Post: #21
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: مجدي نقد
Date: 05-16-2010, 01:12 AM
Parent: #20
الاخ جمال السنوسي
تحية طيبة،،
المشكلة ليست في مستوى اللاعب السوداني فمستواه كما كان سابقاً لم يتغير يلعب بفطرته دون ان يحقن باي جرعة اضافية من فنون لعبة كرة القدم..حيث لم يسهم لا الاتحاد و لا المدربين و لا حتى المشجع السوداني في اي اضافات له..المشكلة تكمن في الاعلام المتغول و المستغل للرياضة بدواعي الكسب المادي و الذي نجح في ان يصور لنا الكرة السودانية و كانها مارد جبار قادر على قهر كل فرق المنطقة فاضحى بذلك طموحنا لا يتناسب مع امكانياتنا..السؤال الذي يؤرقني و سيظل كذلك حتى أجد له اجابة..كيف نجح الاعلام الرياضي في ذلك؟؟؟؟
تحياتي،،
_________________________________________________________________________________________________________
اتمنى ان يسهم التركين في حل مشكلة كرة القدم لانه السبب الوحيد لوجود الكثيرين في هذا الخيط و ليس الكرة..هه
|
Post: #22
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-16-2010, 07:50 AM
Parent: #21
يا حبايبنا
المتركنين
وغير المتركنين
عذرا لعدم الرد عليكم
فردا فردا
وجاييكم بي مهل
عازمكم تركين
سوداني اصيل
قربوا جاي
بعد شوية
|
Post: #25
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: عزام حسن فرح
Date: 05-16-2010, 04:02 PM
Parent: #22
ود السنوسي ...
السمك مِن ربُنا ... والبحر مِن ربُنا
ياخ دي معلومات معروفة وشائِعة جِدًا ...
بس إنت دخلك ايه هِنا؟ يعني إنت فين في < الملجه > دي؟
(إن شاءالله بس يِقول لي أنا < البحر > في أحشاءِهِ ... علشان أسْكو ليكُم سك الجِن)
|
Post: #32
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: Nasr
Date: 05-16-2010, 05:55 PM
Parent: #25
إنت بتقول في كلام مهم خلاص
المهم يا زول إتذكرت ليك المدرسة الأولية
والكلام دا زمان جدا
كان في ثلاثة فرق للكورة
الفريق الأول وهو يضم أحرف اللعيبة
ودا البيدخلوا بيهو المنافسات مع المدارس الأخري
وفيه مدرسين بيدربوا ويديروا
وممكن يدخل المدرس في الميدان والكورة شغالة ويلبعك كف زي السلام عليكم إذا ضيغت بلنتي
لكن دا كوم والفريق الثالت كوم
مافي مدرسين
ما في مدربين
ما في ميدان
ما في قوانين
بس في كورة وناس جاريين وراها
يجييبوهم ليك المغرب من آخر البلد
لكن كان فيها قدر خيالي من المتعة والمرح
الضحك فيها أكثر من اللعب
ودي بالتحديد كورتنا
أو قل بالأحري
كورتنا عاوزينها كدا
ما دايرين نغلب البرازيل في يوم من الأيام
لكن أن نقضي وقتا في الهرج والمرج
ما عندها ثمن
Priceless
كما يقول الأمريكان
زمان كان في دوري محلي في أي مدينة
مسخن وجميل وبيكمل مش بس متعة الناس في التفرج علي الكورة
بس رغبتهم في التواصل وتكوين الشخصية المحلية للمجتمع المعني
أو المدينة المعنية
وكان أكثر أهمية للناس
مش عشان الكورة
حاجة كدا زي دار الرياضة أمدرمان
الكورة حاجة صغيرة في المولد المدور دا
شي مسرح
وشي كوميديا
إعادة إنتاج يومية للثقافة
والشخصية الجمعية
ومحاولة لتصفية الخلافات الحقيقية والمتوهمة
بين أحياء المدينة المختلفة
بوسيلة غير العنف
ويخيل لي دا في أصل تطور المنافسات الرياضية
أها لمن جابو الدوري الممتاز
وبقت كادقلي تلعب مع بورتسودان
إفتقد الناس المنافسة المحلية
وفي طعم حاجة كدا غير الكورة راح علي الناس
ناس الأمل عطبرة أمتع ليهم يغلبوا الأمير عطبرة
مما يغلبوا أهلي الأبيض
فبالله خلونا من أستيراد أفكار ما مفيدة
زي الكورة الصاح
وخلونا في تركينا دا
أو خلونا في ويكتنا دي
أحسن لينا من الدجاج بالفرن
ما عاوزين نغلب البرازيل
وما أظن ناس يستوردوا من الإبرة للطيارة
وحتي اللعيبة أنفسهم مستوردين
àà وربما كنا الدولة الوحيدة في العالم المتخلف والتي تستورد لعيبةàà
ما أظنهم دايرين يغلبوا البرازيل
وما أظنهم بهذا القدر أو داك حريصين علي المنافسة
أي منافسة في أي مجال
يقال أنه كورة القدم الأمريكية طلعت من الآتي
اترص الفريقين لمنافسة كرة قدم عادية
أها مما صفر الحكم واحد من اللعيبة قام خاطف الكورة
وهاك يا جري علي القون
والجمهور يصفق
ويكورك
لمن دخلها القون
اها والحكم والمدربين والإداريين زعلانين من الفوضي الحاصلة دي
وقالو لكن ما بيلعبوها كدا
أظنهم كانو إنجليز
الجمهور قال نحن دايرنها كدا
ومن اليوم داك ولدت كورة القدم الأمريكية
مكيفاهم خالص خالص
ومافي زول غيرهم بيلعبها
أو حتي بيفهمها
خلونا في تركينا
أو وكيتنا
إمكن نطلع لينا وصفة جديدة
أقصد رياضة جديدة
|
Post: #33
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: nazar hussien
Date: 05-16-2010, 06:21 PM
Parent: #32
Quote: اها احتفلت بالشجرة
كان ما شفت صورك هنا مابخليك |
الشجرة والحماداب؟؟؟
|
Post: #34
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-17-2010, 08:51 AM
Parent: #33
Quote: وخلونا في تركينا دا
أو خلونا في ويكتنا دي
أحسن لينا من الدجاج بالفرن |
نصر
عارف يا سيدي
انا ذاتي ما بحب الجداد
لو غربتي دي انتهت ورجعت البلد
تاني افارق الجداد ده فراق الجماعة للابطال
عصيدة قراصة ام تكو مرس ومديدة دخن
تاني زول يجيب لي سيرة الجداد في البوست ده بخسرو
|
Post: #35
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: nazar hussien
Date: 05-17-2010, 10:01 AM
Parent: #34
هي كورتنا براها يا جمال...
غنانا زاتو ...بيعجبنا برانا...
بلاي انا اشيل واعيد في غنية في شريط الكابلي..وبالعربي الفصيح
(نالت علي يدها) وراكب معاي سعودي...بعد ما انتهت الغنية قال
لي وايششش يقووول هذا؟؟؟
قلت ليه دا بيقول كلام قالوه جدودك...الزمان...وانت ما عارف
قال لي ...بلاك يا رجال جدودي ما يهدرون متل ها الهرجة...
قطعت الكلام في حناني وفتحت ليه شريط حمادة بت
|
Post: #36
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-17-2010, 10:27 AM
Parent: #35
نزار
| Quote: قطعت الكلام في حناني وفتحت ليه شريط حمادة بت |
ياخي انت جميل والجابك لي برضو جميل
امبارح القريبة دي جبت لي 4 سيديهات غنا هاااااااااااابط
نوع الغنا ده
قنبلة (اول مرة اسمعها كاملة)
بطلنا حب الملكية وحبينا العساكر
النظام العام
الموبايل مليان شمار وعرباته يالايجار
وباقي غنا يفك الريق والضيق
يازول ده كلامك
جبجبة شديدة خالص
كورة شنو
خلونا ننسى التركين ( اقصد الكورة)
ونبقى ناس فرح وشبال وصقرية
|
Post: #37
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-18-2010, 02:58 PM
Parent: #36
التركين الممتاز شغال
والجرايد شغالة
والتلفزيونات شغالة
ويوسف جا
وجاي لي شنو
ياخوانا
نصيحتي لناس الادرات
واحد من اتنين
شط جميع المحترفين الاجانب من التركين
او
تجنيس 18 لاعب لكل فريق في الممتاز
عشان ما يمثولنا برة
بدل ما حاصل هسه
والله مثلوا بينا الورمونا وراحو
|
Post: #38
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: حيدر بشير
Date: 05-18-2010, 05:31 PM
Parent: #37
اخونا جمال
لك التحايا
يا ريت لو كان كورتنا زى تكرينا كان على الاقل لقت ليها ناسآ يشيدوا بيها
لكن هى حتى ما زى التركين و لا معروفة تكون زى شنو و برضو ما زال هناك من الصحفيين من يمجدها لزوم اكل عيش
الصحفيين ديل الواحد فيهم افهم من الادارى و افهم من المدرب و افهم من اللاعب يعنى سوبر كدة تجى تقول لى الطيارة فيها بورى و كورتنا تركين
و نحن لسان حالنا يقول
يا ربى تدينا الصبر لامن سنين الهم تروح
|
Post: #39
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: بدر الدين اسحاق احمد
Date: 05-18-2010, 07:09 PM
Parent: #38
والخمســات فى الملجــا )
( نسيتها ولا جليتها )
عالم ما عندها معايير ..
Quote:
والسبعات
والاربعات
والتلاتات
|
|
Post: #40
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 05-31-2010, 02:47 PM
Parent: #39
Quote:
عالم ما عندها معايير ..
|
معليش يا ود اسحق
عندنا تركين ممتاز
ده معيارنا في الصحن
|
Post: #41
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: Mahmoud Mustafa Mahmoud
Date: 05-31-2010, 06:36 PM
Parent: #40
يا جمال صاحبي... أكيد بتعرف ثقافة المكاتب والمعاملات هنا في بلاد الحرمين الشريفين...
يعني كلمات زي "معاملة".."تعقيب".."تعميد"..
كويس معاك؟؟
أها مرة من المرات..وأخوك معروف بصياغة الخطابات الكاربة سواء بالإنجليزي أو العربي..
يعني لما يكون في موضوع جامد كدا.. طوالي (عليكم بالزول..ترى ما يحتاح..ماشاالله عليه)..
المهم بعد أن فرغت من صياغة وطباعة وتنسيق الموضوع.. سلمتو ليك لمدير مكتب الزول طالب الخطاب..
حلو لحدي هنا؟؟
بعد شوية يجيني اتصال في مكتبي في صمة خشمي: يا محمود .. الخطاب ممتاز ممتاز ماشاالله عليك..
بس الله يخليك..أنا مزكن على الشباب لا تجيبولي معاملة من غير "تركين"..
قلت في سري والله قوية.. السعودي دي أدمن ولا شنو؟؟
يعني ما يوقع أي معاملة إلا يضرب الهناي دا؟؟ والله الشي دا سرو باتع أتاريهو...
شوية ويدخل علي مدير مكتبه مبتسماً .. : ركِّن الخطاب يا أبو محمد ..سامحني..
أخدت لي تليشة وضهبة كدا.. وبعفوية شديدة سألتو: أركِّن كيف يعني؟؟
قال لي يعني توقيع مصغر كدا هنا.. اسمو "تركين"..
بسرعة "ركَّنت".. وبس الشاب طلع بي هنا إلا وأنا شميت يدي وقعدت أضحك زي المجنون..
ضريسة:
لن ينصلح حال كورتنا.. هوبليس كيس..
لن تشاهد فريقاً قومياً سودانياً في أي نهائيات في العالم.. إلا عندما يظهر على منيو الفنادق العالمية
وجبات زي التركين والنعيمية والتقلية ويزداد الطلب على أم تكشو وأم بقبق والكول ..
ودمت حبيباً قريباً إلى القلب..
|
Post: #42
Title: Re: بالجد كده خلونا في ( التركين) الممتاز ... دي ياها كورتنا البتشبهنا
Author: جمال السنوسي
Date: 06-01-2010, 07:47 AM
Parent: #41
Quote:
لن تشاهد فريقاً قومياً سودانياً في أي نهائيات في العالم.. إلا عندما يظهر على منيو الفنادق العالمية
وجبات زي التركين والنعيمية والتقلية ويزداد الطلب على أم تكشو وأم بقبق والكول ..
|
كمان يا محمود يا صاحبي
ما تنسى التسالي والنبق واللالوب والقنقليز
وفي المشروبات الكركدي والعرديب
ما داير اقول المريسة والعسلية
يجو ناس النظام العام
ياكلوني اربعين صحن تركين
|
|