لى قنصلنا الفى بانكوك

شوقا يجرجر فى جلودنا الشوك
لى قنصلنا الفى بانكوك
عموم الناس يجوا يهنوك
اهل الخير حفايا يجوك
انت بتدى وما بيدوك
انت بتمشى الناس يبروك
جميل اوصاف كتار حبوك
عظيم الاصل اهلو مكوك
بعرف الناس كتير مدحوك
بكل الخير الليك وصفوك
يشكروا فيك وما وروك
يعصروا عليك وما بيابوك

درب اجدادو حفايا مشوك
سفر امجاد محال يمحوك

قالوا عفارم ناس البندر يوم شافوك
ما بتعامل وما بتبارى الما بيسووك
جنتلمان يحيى المك وزول مبروك
لطعم الصبر يضوق ويلوك
تعبوا اعدءك يوم لاووك
عدوك العر يكورك عووك
يفتشوا ليك وما بيلقوك
كتبلو المجد يوم ولدوك
يحى المك والمك ابوك

Re: يا اهل لندن هل تعرفون رجلا اسمه عبد الله رمرم (Re: عمار محمد ادم)

يا حليل عبد الله رمرم ..
بالجمال والحب دندن
وقالوا عايش فيها لندن.




دا الغريب اللينا محن
وليهو كل الجكس جنن
مرة يفصح ومرة ألجن
كان مناضل وتاها فى الفن
وينو جكنون ويانى جكنن
واوع يبقى زولى (جلكن)
وفى بهيم الليل سنسن!!
(

ولى مشاعرو الياها دوزن
غنى صديق وسمعتو طنطن
وليها كل الدارى بشتن
كان ليبينى ومالو جبَن
يا حليلو وشوقنا بالطن




اصلو بكرا وكان معجن
وطاريها امات منو يشكن
مرة يضحكن ومرة يبكن
ياهو هيلن وليهو ويلدن




ما مدغلب شويى اسمن
وفى جيوبو حلاوى شَكن
لاهو خمجان ولاهو ارعن
بس تمسكن وتب تمكن
كل يوم يديك وجهن
مرة صارى ومرة ضحكن

انا داير عديل اركب هناك اجيك
عارفك تنستر ما انت عاد ما كيك
والاخلاص مطاعم والله عارفه الفيك
والزول بى قروش والله ما يباريك



تاكل ودار تحلى قاشر وعامل شيك
فى مقلب اكلتو مولاى ما يوريك
تاكل فى الجداد سوسيو سكسك سيك
والمكر المكرتو ما بكرة بيك يحيك




!


الرز جوة كستر جيبولنا دية وديك
تاكل فى المطايب لامن خربت وشيك
وقاصد انو تمكر الله لا يجازيك
عبدالله استعد جايك اخرت ايديك



استرلينى حر لو جابنى ما يوديك
يازول الكرم كاتبنو فى عينيك
تصرف وما بتلاوز يديك وما بيديك
والكرم الطبع خليتو ما يخليك




جاييك واستعد جهز لى با اخى الشيك
ما باقى القروش عارف سنة تمشيك
البيت والايجار باقى المعاش الليك
حقك فى التمر وشيتا علينا وعليك




يا على شوف ابوك يتجلى كيف فى الداره
دا الزول ما حريف مليان فهم وبصاره
وان صفق معاى شايف لى فيهو شتارة
واتحضر ابوك سايقلو كان ترتارة



يا زول اصل ابوك عزة وفنون وحضارة
رمرم وطنى ثورى ما سام مبادئو تجارة
يكدح فى الحياة محظوظ وماها شطارة
فالح فى الزبالى ملخت ايدى المحارة






رموم يا مناضل مليان حماس وضكارة
من اجل البلد خليتها اقوى سفارة
تفلح فى النقز بالليل مع الطمبارة
تب جاييها لندن شرابى فى الكدارة



تعذب فينا رمرم يس
بعد سبعين تحلب التيس
بشوفو كلامى دخل الميس
وبكرة معاك ببقى عريس




تفطس فى الشعر فطيس
وكان صديق ليك جليس
رمرم تب لعن ابليس
واصلو امام وما قسيس




1امانى زولى ما لبيس
يشك ويحير البوليس
بيشبه يا على القديس
بلا الرحمن مالو رئيس





اريتك بكرة تملا الكيس
واصلك خبرة فى الونيس
ترانى الليلى فى الوسويس
اجر مقشاشتى للكنيس


نحنس عاد جنس تحنيس
ونملس فى الكلام مليس
بعد لندن على باريس
كفاكم غربة ليلى وقيس





تعربد انت فى لندن وحالنا خواضة فى المطرة
تشمشم انت فى لندن وسر عبدالله فى النخرة
تعاين يا جنى رمرم تبحلق بس تقول صبرة
توكر فينا يارمرم وبيت الثورة ما وكرة


مكانك تسقى ياعبد الله فى المترة
تساوى الارض بالواسوق وشك غطتو الغبرة
وتشرب من جديول فوق ونومك فى ضليل شجرة
نكركع يا ابو البنوت ونحنا قلال وما كترة




وكانت حفلى بى سكرها
سكر عبد الله قام شترها
يمينا انت ماك بشرا
واريت عبدالله ما حضرا

براكا طلبت الغلبة( يامنان)
صحيح عبد الله زول انسان
ياهو الزول العرفتو زمان
يعيش فى لندن الغربة
وقليبوا معانافى السودان




سلامك ليهو تب يوصل
بشوفها زيارتو هى الحل
يبقى تلاقى فى البركل
وفى لندن يكون افضل


خفيف عبد الله ماهو بغل
بيطلق ضحكة فى الاول
وزول لعاب تقول طمبل
وليها شتارتو نتحمل


حقيقة الزول هناك طوَل
وخايف جيتو يتبهدل
يشوت ضفارى اتارى أشول
وليها البهجة ما كمل

فى رثاء فقيد نورى الراحل سيف الناطق

نسم الروح العطرك عابق
شبح الموت الداخل ومارق
ولع فى اعماقى محارق
ليه الجو الساكن ورايق
فى لحظات اتعكر خانق
ياهو الموت اللينا يلاحق
زى الخيل فى الدنيا يسابق
جوه الغيب اوخلفو يسارق
حزنا فينا يشب ويناتق
نهرب منو يجينا يعانق
ويخطف مننا سيف الناطق
دابها الدنيا هب دعاشها ولاح لها بارق
ياها الدنيا الصارى وشيها شلوخها مطارق
وقبل الفجر تبينلو مشارق
لحظة موتو تشد وتزانق
كانت باقى ايامو دقايق
وفى التمتام الماها البيت التامن طابق
كان الموت الجاييى يتاوق
نصب اوتار ربابتو مشانق
وشوف الفقرة الدمها دافق
بقالد نورى انسان و مناطق
وشانك سيف انا غاضب حانق
شابت من ريسينا مفارق
دا زولا لينا واصلو مفارق


عمار محمد ادم 12ابريل2010 نورى الباجور

يا قلمى انهمر واكتب غناك فى سيف.
والدمع الهميل ما اظنو تانى يقيف
الزول فى السماح اكبر من الوصيف
دا الشدر الكبار رويان وضلو وريف

الحزن الجثم فى صدرى يا اخى كثيف
ممسوك بالصبر لكنو حالى مخيف
غرقان فى الهموم وما اظنى لاحق القيف
يا ربى الثبات وقدرك علينا لطيف




!
غنيت يا حمام وغنيت معاها الطيف
يا اجمل جميل دااصيل واصلو شريف
يا طيب القلب فنان ودمو خفيف
محزون يارفاق محزون وجرحى نزيف






يا سيف الفراق والدنيا عز الصيف
مصدومة المدن والحزن عم الريف
ترحل ياجميل ما حالنا اصلو اسيف
ترحل فى الهجير دمعا نصبو خريف



يا ريتو العمر يمتد ميه ونيف
لكن الزمن ليه حالو اضحى مخيف
يدينا الوداد كم كان حنين واليف
يطرب ويبتسم انسانى طبعو ظريف



استوت القبور كم فيها قصر منيف
والدنيا العبوس يا سيفنا خدعه وزيف
المركب غرق وريسنا فى القديف
تايهين يا زمن وفشلنا شافو كفيف


اواه اه يا سيف انسانى قلبو نضيف
فارقت البلد والناس بتسأل كيف
ودعت كيف يا سيف انسان كريم وعفيف
عمانا الحزن والغم ليهو رديف

عمار محمد ادم الخرطوم

اعاين فى الشرق حميد
واعاين فى الغرب حميد
اقولك يا اخى جيدا جيت
اقولك يابا شن سويت
اشوفك بى تحت مريت
انا ديك يا اخى كيف امسيت
وتمرق بى ضراه البيت
تقولى انشاء الله جيت مبيت
ترانى فى الدجى اتواريت
وجانى الشعر دابى بديت
اقولو تعال يقولى ابيت



تقول عنى مشيول حال
وعندى الليلى ليك سؤال
دا موعدنا ذى الحجة
وليه اخرتو لى شوال
دا اصلو معاى ما بطال
وعرسك من زمن راجينو ياحميد
نضبح فى الصباح عتان
ونضبح فى الضهر حملين
تغنى الشول عديلة وزين
بقيت غريس لحقت الزين





وقالت عاشى ما بترجى
بخيت وسعيد بختك جاء
عقب انسد باب الريد
الكان متاقة زمان
وكنت الشاعر المسئول
يمين حاشاك ما عربيد
لاك درويش ولاكا بليد
وقال قبلى كم عدو
فضل انا الويحيد
وقتلو اطرانى يا حميد
دحين اطرانا يوم عرسك
وجيب سيرتى فى نفسك
يبقى اكون معاك عريس
انطط زى دحيشا قى الزرع مطلوق
يمين ممكون برانى الشوق
تقول مجنون واصلى عشوق
حمى الريدى فى احشاى
واصلو الريد سكن جواى
اكيد معيون ومانى براى



حليلك انت يا حميد
مجلبط فى الوغش بالطين
وباقى اليوم هموم وحنين
جعيص حميد وما مسكين
شيوعى كمان وحبة دين
يغنى العوده والفوده
ويمدح فيهو سيدى على
وقال لى تعال
امانى الليلى ما وقعت قبض شركها
تعاند الدنيا تتملص وطب حميدسريع مسكها
خطة قوييى السر حبكها
وضاع العمر فى العيشة
فى الفى وما فيشها
جدادى خلاص نتف ريشها
امانى الدنيا ما خاينى
يعجبك فينابرطيشها



وبعد الليلى منو البيعزى فى البكيات
ومنو البيوارى للاموات
ومنو البيكفكف الدمعات
وسف سعوطو واندله
تطوف اقدامو فى الحله
ويعاين فى خلايق الله
وبعد ما شاب واصبح جد
ولدلو ولد
جلدو تخين
سمى وليدو قاسم امين
قبض حميد
يمين قبض حميد
الا المتلو ما بيقبض
يبقى الشى..
حقوق الثورى فى التركة
نصيب الختمى فى البركه
حزب شيوعى والحركه
مسك ايديهو تب فركها
وقت براى فى نفسى
وقع حميد ماسم لعن ابليس
اصلو زولا حى وماهو فطيس
بقالنا عريس
خلاص حميد صبح مشغول
يكابس فى قديرة الفول
وقبل روحى ماتنسل
طلعت بطل
وانسرينا يا حميد
يبارك ليك ربى يزيد
يكسر فى الوغش واقود
يدندن بى غنى المولود

عمار محمد ادم (عرس حميد)

سفيرا لبنا فى تايلاند
وسيط الخير مع الفرحه
يقدم لى صديقو جميل
تزغرد ليهو بت سمحه


(نواصل)