*-*فى السودان الحالة صعبة! والغربة مرة ! نعمل شنوا !؟ *-*

ربنا يديك الصحة والعافية يا محمد سعيد دفع الله

أما النوم أبي وجافاني أصبح داجي ساهر ..
حتي الطيف رحل خلاني ماطيب لي خاطر ..
*****
قليل ياطيف أقيف وأرجاني وين فايتني عابر ..
شن حارس وراك أنا تاني ياني معاك مسافر ..
*****
لا لا ماتقولي كده استناني بمشي وأجيك باكر...
يبقي ما ألم فيك انا تاني مين عارف المصائر ..
*****
هاك أسمع رنين الحاني وأبقي معايا سامر ..
خفف لي قليل احزاني ياما انا عشت صابر..
*****
الليلة احوم وارجع افوتها مكاني مقطوع رأسي حائر ..
وين احبابي وين خلاني آآهـ يالله قادر..
*****
ماعارف العلي تراني فوق كرعي ساير ..
اكتب اسوي في اوزاني اشعار مالا آخر ..
*****
الليلة شوف كيفن بسوي زماني ديمة علي جائر ..
آهـ مر العذاب وراني سهمو الفي قلبي غاير ..
*****
وانت ياطير عليك احزاني بي شوية كابر ..
عشان خاطر قليبي عشانو بس لحظات تخاطر ..
*****
وحتي الطيف رحل خلاني ماطيب لي خااااااطر ..

قصيدة "مرارة الغربة" ايضاً لمحمد سعيد دفع الله غناها الفنان عبد القيوم الشريفي
مرارة الغربة
استســرع الأيــام تمـــر.. مــع انهـــن نقيص عمر
*****
داير لقاكم يا العزاز غيركم محال الحال يسر
*****
في بعدكم تقل الزمن براحة للخطوات يجر
*****
والحال تبدل يا سلام كل شي بشوفو كتر كتر
*****
كان شفتوا كيف حالي العلي فرشي وغطاي نيران جمر
*****
لا لاقي زول يرأف علي لا إنسان يقول لي برية كر
*****
ما لاقي ايد تمسح شقاي فوق وجهي كالنسمات تمر
*****
هديت للبيت السعيد مافيك خير تعرف تضر
*****
وريتني أهوالاً جسام شفت النجوم عز الضهر
*****
الله من الغربة الجحيم الفيها ماب يجدي الصبر
*****
ما كان بعدت أنا يا العزاز فارقتكم لو ما الجبر
*****
ضحيت عشان خاطر الصغار خايف لهم عيشة الفقر
*****
مستني يا أهلي البريد والله بي فارغ الصبر
*****
علو البريد يعطف يجود ويجيب رساله بعد عقر
*****
داير جواب يشفي الجراح يا خدني في مرقة اعصر
*****
بين البراسيم والمقد والبرتكان منقه وتمر
*****
يومي الأشوف واقرا الحروف يا أهلي حتى ولو سطر
*****
داك ياهو عاد عز المراد وزارتني أكيد ليله القدر