|
من ذاكرة الكتابة علي العربات ،،
|
والتي غالباً ما يكون فيها أخطاء إملائية تحيير خاصة في حرفي ( ذ ) و ( ز ) لكن فيها إشارات إجتماعية وثقافية وسياسية كثيرة وأحايين كثيرة لا تخلو من طرافة علي ما أذكر - حسب الفترة التي عشت - إنو في السبعينات كانت المقاطع الغنائية هي السائدة ،، وتمتد القائمة لتشمل الحكم الأمثال الآيات القرآنية وكلمات التحصين
أرجع بالذاكرة كدا وأتذكر ما كان يكتب علي اللواري بصفة خاصة ( الإخلاص 99 ) ،،،، وحقيقي ما عارف معناها بالضبط
|
|
|
|
|
|
|
|
Re: من ذاكرة الكتابة علي العربات ،، (Re: Fadl Karrar)
|
اخوي فضل كرار صبحك الله بالخير يا ملك ياخي والله أنا زمان كنت معجب بتلك الكتابات وما زلت حتى الأن , لانها تعبر عننا كلنا بس بطرق مضحكة احيانا ومحزنة احيانا اخرى
بس أجمل كتابة عجبتني هي
على كف القدر نمشي ولا ندري عن المكتوب بحكم إننا كل يوم سائقين في الشوارع وربنا يكفينا شر الطريق .
| |
|
|
|
|
|
|
Re: من ذاكرة الكتابة علي العربات ،، (Re: هاشم أحمد خلف الله)
|
Quote: صبحك الله بالخير يا ملك ياخي والله أنا زمان كنت معجب بتلك الكتابات وما زلت حتى الأن , لانها تعبر عننا كلنا بس بطرق مضحكة احيانا ومحزنة احيانا اخرى
بس أجمل كتابة عجبتني هي
على كف القدر نمشي ولا ندري عن المكتوب بحكم إننا كل يوم سائقين في الشوارع وربنا يكفينا شر الطريق . |
تحيات صباحيات نديات يا هاشم تصدق Quote: على كف القدر نمشي ولا ندري عن المكتوب |
كأني شايفه هسي قدامي في ضهر لوري واللا حافلة لأنها من أكثر التعابير إستخداماً علي العربات تسلم يا هاشم وتحفظ من كل شر
| |
|
|
|
|
|
|
Re: من ذاكرة الكتابة علي العربات ،، (Re: هاشم أحمد خلف الله)
|
تحياتى اخى فضل
الملصقات والعبارات التي يضعها البعض على سياراتهم تعبر عن شخصية سائق السيارة وعن الأفكار التي تسيطر عليه ، فمثلا من يضع عبارة"عين الحسود فيها عود" يكون لديه خوف شديد من الحسد ويترجم هذا الخوف من خلال هذه العبارة ، وأما من يضع عبارات الحب والغرام فهذا يؤكد أن صاحب السيارة هو من فئة الشباب الذين يحاولون لفت أنظار الجنس الآخر لهم.فى شارع مدنى قابلتنى شاحنة مكتوب فيها (بس تشيل فينى وتودى)وفى الكاملين لقيت لى كومر لساتكوالاربعه نائمه وصاحبوصنع منو قمامةمكتوب فى
الباب الايمن(( ممكون وصابر)) احزنى وضعوشديد واتخيلت ايام شبابو كيف كان وكيف جار عليه الزمن.......
| |
|
|
|
|
|
|
Re: من ذاكرة الكتابة علي العربات ،، (Re: وليد الطيب قسم السيد)
|
Quote: الملصقات والعبارات التي يضعها البعض على سياراتهم تعبر عن شخصية سائق السيارة وعن الأفكار التي تسيطر عليه ، فمثلا من يضع عبارة"عين الحسود فيها عود" يكون لديه خوف شديد من الحسد ويترجم هذا الخوف من خلال هذه العبارة ، وأما من يضع عبارات الحب والغرام فهذا يؤكد أن صاحب السيارة هو من فئة الشباب الذين يحاولون لفت أنظار الجنس الآخر لهم....... |
كلام في الصميم يا وليد وأتفق معاك فيهو مليون في المية حتي لو الواحد الكتب كلام قال إنو كتبو ساي لأنو عاجبو أو قلد بيهو زول تاني بيكون في عقلو الباطن رغبة مدفونة للتعبير بنفس الكلمات الكتابة والكلام مدلولات مهمة جداً لمعرفة الشخصية وتكويناتها عشان كدا أفلاطون قال لأحد تلاميذه ( تكلم يا بني حتي أراك )
Quote: فى شارع مدنى قابلتنى شاحنة مكتوب فيها (بس تشيل فينى وتودى)وفى الكاملين لقيت لى كومر لساتكوالاربعه نائمه وصاحبوصنع منو قمامةمكتوب فى الباب الايمن(( ممكون وصابر)) احزنى وضعوشديد واتخيلت ايام شبابو كيف كان وكيف جار عليه الزمن. |
الإقتباس الفوق دا يا وليد - لو بتسمح لي - سمحت لي ؟؟؟ طيب شكراً جزيلاً الإقتباس الفوق دا يا وليد أداني إحساس بأنك زول حساس وإنسان جد وفعلاً - زي ما قلت - الكتابة تعبر عن شخصية كاتبها تسلم ياخي
| |
|
|
|
|
|
|
Re: من ذاكرة الكتابة علي العربات ،، (Re: هاشم أحمد خلف الله)
|
الكرار
اديك موقف طريف مريت بيهو بى عربيتى انا زااااااااتى.. المهم كان عندى كريسيدا 88 عاجبانى يازول عجب شديد وبعدين مجيهة ليك جيهة شديدة.. من ضمن الجيهة يازول كنت كاتب فى القزاز الخلفى (Insured By Mafia, If you Hit me WE Hit You) المهم يوم ماشى على اتجاه سوبا شويتين اشوف ليك كامرى مظللة بتتخطافى العربات ساكانى ليك من ورا.. ماكنت عارف انو ساكينى انا الا لما لقيتو ماشى جمبى وفتح القزاز وقال لى جنب جنب.. استغربتة طبعآ وقمت وقفت قلت اشوف الحاصل شنو.. جات الكامرى وقفت جمبى وعاينت لقيت عمك راجل شكلو فعلآ مسؤل.. عرفتة لاحقا انو بروفيسور تابع لى رئاسة الجمهورية مافى داعى لذكر اسمو.. المهم عمك يازول وقع ليك فينى هرش... انت يازول عارف معنى الكلام الكاتبو دا؟ قلت ليو اكيد طبعآ.. قال لى انت عارف انو كلامك دا انو انا ممكن اسجنك بيهو؟ انت منو عشان تكتب كلام زى دا؟ صراحة لمن لقيت انو دا الموضوع عرفت انو عمك بالجد ماعندو موضوع.. خليتوو ليك يازول لمن كمل كلامو كلو.. قلت ليهو ياخ مع احترامى ليك مهما كنت منو وانا ماعارف انت منو زاتو ولا داير اعرف.. لكن هل البلد دى خلاص مافيها مشاكل غير الكلام الكاتبو انا فى عربيتى دى؟؟ طبعآ الزول امتعض من كلامى وقرررررب ينزل من العربية يشاكلنى لكن لاحظ انو انا زااتى خلاص وصلت لحد لمن لقيت دا الموضوع.. المهم عمك قال لى يا ابنى انا شايف انك شكلك ود ناس والكلام دا مابيشبهك.. غايتو حاول يقنعنى بى انو امسح الكلام دا فى اقرب فرصة.. ونسبة لضيق وقتى قلت ليهو من عيونى الاتنين بس ما الليلة.. فعمك افتكر انو انا هرشتة وكدا فقام دور فات.. كم يوم بعد الكلام دا يازول لما ليك فينى واحد قال لى اشترى منك العربية وبقا لى فى رقبتى لغاية ما بعتها ليو قلت لى ياصاحبى لو يوم شوفتة ليك كامرى مظلللة مبارياك بِل راسك بس بعد فترة اشوف ليك عمك فى التلفزيون فى برنامج بالليل.. والله قدر ما حاولت اتصل على البرنامج الخط مشغول.. قلت ازنقو ليك قدام العالمين ديل كلهم.. لكن كان جازفوا ليك صاحبى البعتة ليهو الكريسيدا..
مودتى
| |
|
|
|
|
|
|
Re: من ذاكرة الكتابة علي العربات ،، (Re: Mohammed Awad)
|
والله يا محمد عوض دا فيلم آكشن عديل
Quote: كنت كاتب فى القزاز الخلفى (Insured By Mafia, If you Hit me WE Hit You) المهم يوم ماشى على اتجاه سوبا شويتين اشوف ليك كامرى مظللة بتتخطافى العربات ساكانى ليك من ورا.. ماكنت عارف انو ساكينى انا الا لما لقيتو ماشى جمبى وفتح القزاز وقال لى جنب جنب.. استغربتة طبعآ وقمت وقفت قلت اشوف الحاصل شنو.. جات الكامرى وقفت جمبى وعاينت لقيت عمك راجل شكلو فعلآ مسؤل.. عرفتة لاحقا انو بروفيسور تابع لى رئاسة الجمهورية مافى داعى لذكر اسمو.. المهم عمك يازول وقع ليك فينى هرش... انت يازول عارف معنى الكلام الكاتبو دا؟ قلت ليو اكيد طبعآ.. قال لى انت عارف انو كلامك دا انو انا ممكن اسجنك بيهو؟ انت منو عشان تكتب كلام زى دا؟ صراحة لمن لقيت انو دا الموضوع عرفت انو عمك بالجد ماعندو موضوع.. خليتوو ليك يازول لمن كمل كلامو كلو.. قلت ليهو ياخ مع احترامى ليك مهما كنت منو وانا ماعارف انت منو زاتو ولا داير اعرف.. لكن هل البلد دى خلاص مافيها مشاكل غير الكلام الكاتبو انا فى عربيتى دى؟؟ طبعآ الزول امتعض من كلامى وقرررررب ينزل من العربية يشاكلنى لكن لاحظ انو انا زااتى خلاص وصلت لحد لمن لقيت دا الموضوع.. المهم عمك قال لى يا ابنى انا شايف انك شكلك ود ناس والكلام دا مابيشبهك.. غايتو حاول يقنعنى بى انو امسح الكلام دا فى اقرب فرصة.. ونسبة لضيق وقتى قلت ليهو من عيونى الاتنين بس ما الليلة.. فعمك افتكر انو انا هرشتة وكدا فقام دور فات.. كم يوم بعد الكلام دا يازول لما ليك فينى واحد قال لى اشترى منك العربية وبقا لى فى رقبتى لغاية ما بعتها ليو قلت لى ياصاحبى لو يوم شوفتة ليك كامرى مظلللة مبارياك بِل راسك بس بعد فترة اشوف ليك عمك فى التلفزيون فى برنامج بالليل.. والله قدر ما حاولت اتصل على البرنامج الخط مشغول.. قلت ازنقو ليك قدام العالمين ديل كلهم.. لكن كان جازفوا ليك صاحبى البعتة ليهو الكريسيدا.. |
الإشتري العربية ربنا بريدو عشان كدا الخط ما فتح معاك
| |
|
|
|
|
|
|
Re: من ذاكرة الكتابة علي العربات ،، (Re: Fadl Karrar)
|
من تلك الكتابات التي ما ذالت عالقة بالذاكرة
واقفين تحننوا راكبين تجننوا
اقدلي وسكتي الخشامة
ولكن ما استغربت له ودعاني للتاكد من ان تلك الكتابات تعبر عن حالة المجتمع واخلاقه كتابات جديدة
خليك وراء
وما تحاول
كده كيف
| |
|
|
|
|
|
|
Re: من ذاكرة الكتابة علي العربات ،، (Re: بكري عباس علي)
|
Quote: واقفين تحننوا راكبين تجننوا |
دي غالباً بيكتبوها في الحافلات يا بكري خصووووصاً للطلبة
Quote: اقدلي وسكتي الخشامة |
عشق خاص للعربية
أما ديل
Quote: خليك وراء
وما تحاول
كده كيف |
وبي منتهي حسن النية بقول إنو معناهن ما تحاول تخرم مننا أو تفوتنالأنك ما بتقدر
| |
|
|
|
|
|
|
Re: من ذاكرة الكتابة علي العربات ،، (Re: بكري عباس علي)
|
الكرار تحياتي
لو كتبت سوف اكتب ALKARAR NO-1 عشان المضايقه
في السعوديه واحد بدوي كتب علي الاندركوزر شاص (( أنا تايوتا فني وأسأل عقبة أبها عني)) وطبعا من الطرائف أن الكتابة تبدأ رومناسية جدا علي شاكلة يا سليم الذوق الدهبايه تبكي بس ( دي جديدة نوعا) ثم تتمرحل حسب حالة المركبة يا لطيف مدد يا جعلي يا رب سترك
البوست رائع جدا واتوقع ان يستمر وقد كانت هناك دراسة لشابة سودانية بنفس العنوان
| |
|
|
|
|
|
|
Re: من ذاكرة الكتابة علي العربات ،، (Re: khaleel)
|
بوست رائع وخفيف ولطيف . . العفش داخل البص على مسئولية صاحبه
زمان معظم اللواري مكتوب عليها بوراء : ياعظيم يا لطيف سترك يا رب تور البرزن الميج 23 ... ابو الزفت دا لوري الصادق ود حمد ......
وعلى الباب التاني ما حق السواق لزم غزل السمحة البتركب : الوسيم الشوق والريد
وعلى البرينسات : شطة بس تحياتي يا فضل بوست مريح وهادئ
| |
|
|
|
|
|
|
Re: من ذاكرة الكتابة علي العربات ،، (Re: عبدالله ود البوش)
|
ود البوش ياخ إنت شكلك زول وناس وذاكرتك ماشاء الله عليها
دي قديمة خلاص
Quote: وعلى الباب التاني ما حق السواق لزم غزل السمحة البتركب : الوسيم الشوق والريد |
يا سلام ياخ علي الرحلة الزمنية للماضي الجميل زمن كان المقعد القدام في البص محجوز للنسوان وفي النسوان العروسات الجديدات أو الغريبات - وبيكون معظمن جايات زيارة من المدينة -
Quote: وعلى البرينسات : شطة بس |
( بدون تعليق عديييل كدا )
| |
|
|
|
|
|
|
Re: من ذاكرة الكتابة علي العربات ،، (Re: khaleel)
|
Quote: شينا هاكا هاكا شينا
تصدق تلاتين سنة لم اجد مترجما لهذه العبارة |
والله يا خليل ليك حق تحتار
شينا هاكا هاكا شينا ؟؟ شينا هاكا هاكا شينا ؟؟ شينا هاكا هاكا شينا ؟؟ شينا هاكا هاكا شينا ؟؟
غايتو إحتمال يكون الكاتب زول بخيل ما بحب يمد يدو بالمساعدة ( هاكا ) = هاك عند بعض الناس والله أعلم
| |
|
|
|
|
|
|
Re: من ذاكرة الكتابة علي العربات ،، (Re: علي الكرار هاشم)
|
السلام عليكم
من الطرائف التي تحكي ان احدهم كتب في عربيته الانقاذ
وعندما سئل عن السبب
اجاب عشان ما تنقلب
من اجمل التعليقات مكتوبه في حافله خط امدرمان شعبي الخرطوم عباره
دراويش لاقو مداح
وحافله تانيه
مكتوب فيها
خارج الشبكه
| |
|
|
|
|
|
|
Re: من ذاكرة الكتابة علي العربات ،، (Re: ود الخليفه)
|
أهلاً يا ود الخليفة
Quote: من الطرائف التي تحكي ان احدهم كتب في عربيته الانقاذ وعندما سئل عن السبب اجاب عشان ما تنقلب |
دا يا زول موالي يا واحد قنعان
دي الله مبالغة عديل تخيل المنظر يكون كيف عجاجة فوووووق
تسلم ياخي
| |
|
|
|
|
|
|
Re: من ذاكرة الكتابة علي العربات ،، (Re: علي الكرار هاشم)
|
Quote: لو كتبت سوف اكتب ALKARAR NO-1 عشان المضايقه |
يا علي الكرار هاشم ،، في زول بتضايق من أبوه ؟؟؟ يا زول أكتب ولا يهمك التوقيع فضل علي كرار
Quote: في السعوديه واحد بدوي كتب علي الاندركوزر شاص (( أنا تايوتا فني وأسأل عقبة أبها عني)) |
تعرف ،،، مرات كتير بحس إنو السعوديين وبالذات البدو منهم ناس لذيذين خلاص وزولك دا أكد إحساسي
Quote: وطبعا من الطرائف أن الكتابة تبدأ رومناسية جدا علي شاكلة يا سليم الذوق الدهبايه تبكي بس ( دي جديدة نوعا) ثم تتمرحل حسب حالة المركبة يا لطيف مدد يا جعلي يا رب سترك |
وسيري وعين الله ترعاكي
تسلم يا ابوي
| |
|
|
|
|
|
|
Re: من ذاكرة الكتابة علي العربات ،، (Re: دينا خالد)
|
التحيه لك فضل كرار
من اجمل الكتابات علي الحافلات والبرنسات - سمحه العافيه - سمحه الطيبه - الهبباي
اما اللواري فاغلبها كانت مناداة الشيوخ وايضا الحيوانات المفترسه - ياود بدر - يامومو - يا ود التوم - ياتور ريا
- تور الخلا - هجام - اسد البراري - صقر البرزن
| |
|
|
|
|
|
|
Re: من ذاكرة الكتابة علي العربات ،، (Re: حمزه بابكر الكوبي)
|
Quote: اما اللواري فاغلبها كانت مناداة الشيوخ وايضا الحيوانات المفترسه - ياود بدر - - يا ود التوم - ياتور ريا |
شكراً علي الزيارة والإضافة يا حمزة الكوبي بس ،،، صراحة ما عرفتا دا من الشيوخ واللا من الحيوانات المفترسة ( وش مبسوط )
| |
|
|
|
|
|
|
Re: من ذاكرة الكتابة علي العربات ،، (Re: دينا خالد)
|
سلام عليكم فى وأحد مشترى أمجاد كرت كرتونة وعايز يكتب عليها ومتحير يكتب عليها شنو.!
وقف جنب الخطاطـ أهه أكتب ليك عليها سحر.. ولا المبروكة... ولا ماشاء الله ولا سمحه العافيه ولا اسد البراري...!! عمك حكه رأسو كده..!!! أقول ليك حاجة يا ابنى أكتب عليها الانقاذ كــبـــيــــــرة,,!! أى الانقاذ الانقاذ عشان ما تنقلــــــــــب يا ابنى......
| |
|
|
|
|
|
|
Re: من ذاكرة الكتابة علي العربات ،، (Re: Fadl Karrar)
|
الصورة مهداه للاخوه السفافين دى على وزن دبابين .. والخرمانبن بالخارج
الصورة مهداه لهارون دياب واساسى .... لووووب
طبعا فى السودان لو عملت اى ى ى ى حاجه لازم يحاكوك اها دا بحاكى فى ناس وليد المبارك !!
| |
|
|
|
|
|
|
Re: من ذاكرة الكتابة علي العربات ،، (Re: دينا خالد)
|
بـوســت ممـتـع يـفـك بـعـض مـن الـزهـجـة بـتـاعـة نـص اللـيـل دي !
أجمل حاجة لاقتني واحد كاتب في حافلة ( أكتب شنو ؟ ) و برضو تاكسي قديييييم كدة و ماشي بقدرة قادر كاتب من وراء ( طوًل بالك ) و دي طبعا" للزول الوراهو عشان ما يتضايق منه و بالجد جايبة نتيجة أي عربية وراهو تلقي السايق مبتسم و مقدًر الحالة الصعبة للتاكسي ههههه ربنا يعين الجميع
تـحـيـاتـي
| |
|
|
|
|
|
|
Re: من ذاكرة الكتابة علي العربات ،، (Re: فاروق أبوحوه)
|
ياحبيبنا
والله بوستيك جميل
طبعا كل نوع من العربات عندو كتابات خاصة يعني مثلا التكاسي القديمة ناس موسكوفيتش والهيلمان
معظم كتاباتهم يالطيف وزينة وعاجباني وفي العجلة الندامة
اها باقي العربات على شاكلة عنيدة مابتخافي من المجروس
في الليلة وراسم ليهو ديك يعني في الليلة ديك وفي واحد بتاع باص من بصات الثورة التاتا كان كاتب
الاية بتاعة مالهم عن التذكرة معرضون
اها بتاعين العربات الكبيرة دائما عاجباهم عرباتهم وكلماتهم كلها كلمة عنترة وقوة سه هباش - الزعيم - البفوت يموت- ماتجازف - صقر قريش - الخضراء - عروس الرمال- الراعي واعي
اها بتاعين العربات المظلة بيكون كاتبين بوب - انا والنجم والمساء - دعاش - الوسيم - سهام والهام
تحياتي
زاتوووو
| |
|
|
|
|
|
|
Re: من ذاكرة الكتابة علي العربات ،، (Re: ALZOLZATOO)
|
Quote: طبعا كل نوع من العربات عندو كتابات خاصة يعني مثلا التكاسي القديمة ناس موسكوفيتش والهيلمان
معظم كتاباتهم يالطيف وزينة وعاجباني وفي العجلة الندامة
اها باقي العربات على شاكلة عنيدة مابتخافي من المجروس
في الليلة وراسم ليهو ديك يعني في الليلة ديك وفي واحد بتاع باص من بصات الثورة التاتا كان كاتب
الاية بتاعة مالهم عن التذكرة معرضون
اها بتاعين العربات الكبيرة دائما عاجباهم عرباتهم وكلماتهم كلها كلمة عنترة وقوة سه هباش - الزعيم - البفوت يموت- ماتجازف - صقر قريش - الخضراء - عروس الرمال- الراعي واعي
اها بتاعين العربات المظلة بيكون كاتبين بوب - انا والنجم والمساء - دعاش - الوسيم - سهام والهام
تحياتي
زاتوووو |
والله يا زاتووو حيرتني أنا ذاتي خاصة ( مالهم عن التذكرة معرضون ) يا خي دا خيال عجيب ومدهش تسلم يا ملك
| |
|
|
|
|
|
|
Re: من ذاكرة الكتابة علي العربات ،، (Re: heba Elmahi)
|
Quote: أجمل حاجة لاقتني واحد كاتب في حافلة ( أكتب شنو ؟ ) و برضو تاكسي قديييييم كدة و ماشي بقدرة قادر كاتب من وراء ( طوًل بالك ) و دي طبعا" للزول الوراهو عشان ما يتضايق منه و بالجد جايبة نتيجة أي عربية وراهو تلقي السايق مبتسم و مقدًر الحالة الصعبة للتاكسي ههههه ربنا يعين الجميع |
شكراً يا هبة الماحي وفعلاً بتاع التكسي حصيف وحريف وعامل إعتذار مقدم للبي وراهو ( يعني براكم شايفين الحالة )
تعرفي يا هبة كتير بقيف وأحاول أتخيل الحالة النفسية للزول الداير يكتب جملة أو كلمة في عربيتو مثلاً لأنو أي تصرف إنساني ليهو دوافع ظاهرية أو خفية في العقل الباطن بتاع التكسي دا كيفني لأنو بالجد بيهتم بالتانيين
| |
|
|
|
|
|
|
Re: من ذاكرة الكتابة علي العربات ،، (Re: Mohammed Awad)
|
سلامات الأخ فضل,,
كثيرا ما كانت تلفت نظرى هذه الكتابات,, خاصة فى الطرق الطويلة خارج العاصمة,, إختلاف ثقافة الريف يكون واضحا فى هذه الكتابات وهى إحدى إفرازات الواقع وإنعكاساته,, فلكل مرحلة ثقافتها وبالمناسبة لكل شريحة من السائقين إدبها ولغتها وطريقة مختلفة فى التعامل عن الآخريات,, الآن دخلت الكثير من العبارات الأجنبية والعربية وهى إفرازات مرحلة الدش والقنوات الفضائيةالكثيرة.. بعض مما أذكر من تلك الكتابات,,,
المنقة رايقة ولا مضايقة!! خلوها يا حساّد.. تور الجواميس الرقادن لخ,,, رحماك يا ملاك,,, مى,, الوسيم.. الهبباى,,, كريم هون,, إشتقت ليك الهبرو ملوا!!!! جنوبية,, ست الفريق,, الحالم سبانا,,, هدندوية.. حى العرب سوكرتا,,, حلوة الصدفة الجمعتنا,, غزال البر,,, هجام فريق أم زين,, ليمون بارا.... آدمو راح,, صادّة رادّة.. ود الغرب.. يا إنتو.. أسد الكسمبر,, الحلاوى,, البطحانى.. حكومة والناس أهالى.. راستاوية,, Rasta
تحياتى,,
(عدل بواسطة أيمن الطيب on 05-16-2010, 09:18 AM)
| |
|
|
|
|
|
|
Re: من ذاكرة الكتابة علي العربات ،، (Re: أيمن الطيب)
|
,, الهينو والبيد فورد الشهير بالسفنجة كما يحب أهلنا أن يطلقوا عليه,, وجاء بعدهما النيسان,,شكلو حضورا فى أدب الريف والسفر والترحال,,
هات أجمل تعليق,,
| |
|
|
|
|
|
|
Re: من ذاكرة الكتابة علي العربات ،، (Re: أيمن الطيب)
|
Quote: كثيرا ما كانت تلفت نظرى هذه الكتابات,, خاصة فى الطرق الطويلة خارج العاصمة,, إختلاف ثقافة الريف يكون واضحا فى هذه الكتابات وهى إحدى إفرازات الواقع وإنعكاساته,, فلكل مرحلة ثقافتها وبالمناسبة لكل شريحة من السائقين إدبها ولغتها وطريقة مختلفة فى التعامل عن الآخريات,, الآن دخلت الكثير من العبارات الأجنبية والعربية وهى إفرازات مرحلة الدش والقنوات الفضائيةالكثيرة.. |
100% يا ايمن
Quote: بعض مما أذكر من تلك الكتابات,,, |
ذاكرتك ما شاء الله عليها
Quote: المنقة رايقة ولا مضايقة!! خلوها يا حساّد.. تور الجواميس الرقادن لخ,,, رحماك يا ملاك,,, مى,, الوسيم.. الهبباى,,, كريم هون,, إشتقت ليك الهبرو ملوا!!!! جنوبية,, ست الفريق,,الحالم سبانا,,, هدندوية.. حى العرب سوكرتا,,, حلوة الصدفة الجمعتنا,, غزال البر,,, هجام فريق أم زين,, ليمون بارا.... آدمو راح,,صادّة رادّة.. ود الغرب.. يا إنتو..أسد الكسمبر,, الحلاوى,, البطحانى.. حكومة والناس أهالى..راستاوية,, Rasta |
ما تحته خط إستوقفوني كتير ونالن إعجابي
شكرن جزيلن
| |
|
|
|
|
|
|
Re: من ذاكرة الكتابة علي العربات ،، (Re: Mohammed Awad)
|
محمد عوض بتاع الكريسيدا السمحة وسمح سيدا,, 22 R وكدا,,
ياخ سبحان الله مغير الأحوال,, بعد ما كنت Insured by the Mafia بقيت Wanted Dead Or Alive والأفضل ميتا,,
بالمناسبة ال88 22R دى كانت طيارة تمشى على الأرض,,,SMILE!!! أوعا تكون إنت الكنت معلق على عربيتك SMILE!!! coz' smiling is the best second thing you can do with your lips
تحياتى..,,,,
| |
|
|
|
|
|
|
Re: من ذاكرة الكتابة علي العربات ،، (Re: أيمن الطيب)
|
Quote: بعد ما كنت Insured by the Mafia بقيت Wanted Dead Or Alive والأفضل ميتا,, |
ادى الله وادى حكمتو.. الجماعة شبكونا طبنجة طبنجة لمن لحقونا الترابى
Quote: بالمناسبة ال88 22R دى كانت طيارة تمشى على الأرض |
تعرف انا كنت بقول الناس ديل لو ضافوا نتروجين لل 22R يعنى الكريسيدا بس الا جناحين تانى..
| |
|
|
|
|
|
|
Re: من ذاكرة الكتابة علي العربات ،، (Re: Mohammed Awad)
|
البوست دا حلاوة لكوم بس تاخد قرمة وتاني تجي راجع تاخد قرمة تانية ومعاها حبة سفوفة شوية من السكر الللبيض المسحون فوق حلاوة لكوم ( حلاوة لكوم القديمة ) مش المسيخة اللسع دي . . واحد كان راكب جنبي وماشين في امان الله بس بعد شوية اسمعو ليك : ترم فكم سطط اتلفت عليهو يا زول مالك ؟ قال لي يا زول امش مشيك ساي انا طبعي كدي اي لوحة عربية قدامة بقراها واعلاه ارقام لوحات العربات ت ر م 128 ف ك م 906 س ط ط 531
. . لاقتني رقشة في امدرمان مكتوب عليها تمبس
| |
|
|
|
|
|
|
Re: من ذاكرة الكتابة علي العربات ،، (Re: Fadl Karrar)
|
Quote: : ت ر م 128 ف ك م 906 س ط ط 531
وين النمر دي ؟؟؟ |
السعودية امراض نفسية . . ودي لقيتها مكتوبة كبيرة في بيت عذابة في منفوحة بالرياض . وفيهو العذابة بتونسو واحد قال والله لو لقيت حق البوكسي الليلة دي ارجع واحد خت سفة وعاين ليهو كدا .. بالله شوف الاهبل دا قول ركشة ركشة بس يا عمك فتبسم من حضر اليهم جديدا تبسم ملخبط ببكية مغبشة سعلوه مالك آ زول الببكيك شنو ؟ قال انا مشكلتي بعت الحافلة وجيت والغريبة كان مكتوب عليها وا أسفاي
| |
|
|
|
|
|
|
Re: من ذاكرة الكتابة علي العربات ،، (Re: Fadl Karrar)
|
التحايا لصاحب البوست وضيوفه الكرام
اكثر ما كتب على العربات الجمل والعبارات الماخوذة من كلمات الاغاني التي كانت رائجة حينها ..
* الابيض ضميرك * مرسال الشوق * اربعة سنين * جميلة ومستحيلة * كدراوية * الكنداكا * نسايم الليل * اسمعنا مره * عقد الجواهر * توتيل * صحو الذكرة المنسية * في الليلة ديك ( وبدلا عن كتابة كلمة( ديك) تستبدل برسمة الديك * الهبروا ملوا *ووووووو
| |
|
|
|
|
|
|
Re: من ذاكرة الكتابة علي العربات ،، (Re: البدري عبد الله)
|
البدري عبد الله
السلام عليكم ورحمة الله
Quote: الابيض ضميرك * مرسال الشوق * اربعة سنين * جميلة ومستحيلة * كدراوية * الكنداكا * نسايم الليل * اسمعنا مره * عقد الجواهر * توتيل * صحو الذكرة المنسية * في الليلة ديك ( وبدلا عن كتابة كلمة( ديك) تستبدل برسمة الديك * الهبروا ملوا |
تسلم علي المرور والمساهمة يا حبيب
| |
|
|
|
|
|
|
Re: من ذاكرة الكتابة علي العربات ،، (Re: نادر النور آدم)
|
Quote: واللوري الذي حزن الجميع لبيعه :) وخروجه من الحلة
العمـــيد .. لوري جمال احمد موسى |
أيووووواتك ،، جيتني في مربط الفرس يا نادر تعرف ،،، الكتابة الفي العربية تبقي مميزة ليها أكتر من النمرة ذاتها وبيسموا بيها العربية خاصة الحافلات تلقي في الموقف أسماء الحافلات الدكتورة ، مي ، تباريح الهوي ، دسكفري ، وهلم جرا بدل ما يوصفوا ليك الحافلة الروزا الحمراء 2000 ونمرتها كدا مثلاً طوالي يقولوا ليك ( الدكتورة )
الكتابة دي زي السماية واللا مش كدا ؟؟؟
| |
|
|
|
|
|
|
Re: من ذاكرة الكتابة علي العربات ،، (Re: محمد عبد الماجد الصايم)
|
شكرا كتير وانت ترجعنا لايام حلوة ولحظات جميلة جد ومن الطرائف انو بيتنا على الشارع مباشرة وتلقى الاطفال بيلعبوا فى الحوش وكل ماتمر عربية من الصوت يعرفوها ( دى عربية حسن لا دى الدهباية ) ويفتحوا الباب ويجروا يتاكدوا والفايز تلقاهو فرحان وينطط بس من الحاجات المابنساها فى حافلة صغيرة ولونها عنابى كانت شغالة فى خط ال11 امبده مكتوب عليها ( غلطة ما كانت تكون ) فشدتنى العبارة وسالت السائق وطلع بن عم صاحبها فقال لى : والله الراجل ده كان فى السعودية وسجنوه لمدة عام كامل بسسبب خطأ كان ممكن تجاوزه بسهولة ورفض يقول التفاصيل واكتفيت انا .
ياو ود البوش ياخى موتنا بالضحك واحلى واحدة بتاعت الرقشة المكتوب عليها تمبس دى .
| |
|
|
|
|
|
|
Re: من ذاكرة الكتابة علي العربات ،، (Re: نور الدين عثمان)
|
فتأمل
Quote: من الحاجات المابنساها فى حافلة صغيرة ولونها عنابى كانت شغالة فى خط ال11 امبده مكتوب عليها ( غلطة ما كانت تكون ) فشدتنى العبارة وسالت السائق وطلع بن عم صاحبها فقال لى : والله الراجل ده كان فى السعودية وسجنوه لمدة عام كامل بسسبب خطأ كان ممكن تجاوزه بسهولة ورفض يقول التفاصيل واكتفيت انا . |
شكراً يا نور الدين عثمان علي هذه الومضة الإنسانية الباهرة
| |
|
|
|
|
|
|
|