Post: #1
Title: الزهايمر يا إبنى ! (لم ينشر) !!
Author: الفاتح يوسف جبرا
Date: 05-07-2010, 07:39 PM
موقع الكاتب www.alfatihgabra.net
جارى (عبدالحميد) لا يعجبه العجب ولا الصيام فى رجب ، وهو عضو فى أحد الأحزاب الفاشلة التى لم تحرز صوتاً واحداً فى الإنتخابات التى جرت مؤخراً وهو لا يرى فى الإنقاذ أى حسنة كانت خاصة بعد الفوز المؤزر الذى حققه مؤخراً (حزب المؤتمر الوطنى) .
بعد أن إرتشف (جارى) من فنجان القهوة الذى وضعته له أمسك بإحدى الصحف وبدأ يحاورنى حول أزمة ما يعرف بسوق المواسير بعد أن تلا على شخصى بيان وزير العدل الذى صدر بالأمس ونشرته معظم الصحف :
- البيع الزى ده يا أستاذ مش حرام؟
- ما ظنيت .. لو حرام كان ناس (علماء السودان) طلعو ليهم (بيان) ياخى ديل أى حاجه بيطلعو فيها بيان فلو
كان حرام أكيد كانو طلعو ليهم بيان !
- الناس العملو السوق ديل (مرشحين) وكمان فازو فى الإنتخابات؟
- يعنى إنتو قايلين الناس البترشحو ديل ما بشر ؟ ما ناس عاديين بيتاجرو وبيمشوا فى الأسواق وبيعملو البعملوهو الناس؟
- وما يفوزو كان فازوا .. الفوز يا إبنى للقوى الأمين والناس ديل أقوياء وأمناء وح يرجعو للناس دى قروشا على داير المليم
- لا ومش كده شغالين فى الشرطة؟
- وفيها شنو؟ ما يكونو شغالين فى الشرطة هسه مش فى ولاة شغالين وعندهم (بيزنس) وشركاتهم شغاله فى سوق الله أكبر ده فى زول قاعد يسالهم !
- خليك من ده .. بيقولو ليكا (المتهمين) بدأوا الشغل ده من داخل مكاتب الشرطة
- مافيها حاجه .. مش الشرطة فى خدمة الشعب ... المشكلة وين يعنى؟!
- وواحد فيهم كان يترأس جمعية القرآن الكريم ؟
- وده دخلو شنو بالموضوع ؟ عاوز تدخل ليا الدين فى التجاره ؟ مالو لو ترأس جمعية القرأن الكريم فيها شنو؟ مش إحتمال يكون صوتو (حلو) وبيتلو كويس؟
- الشغل ده إستمر 11 شهر كيفن الوالى والأمن الإقتصادى والشرطة ما عارفة ؟
- الوالى فى تصريح ليهو قال نحنا عارفين الشغل ده لكن الإقتصاد (إقتصاد سوق حر) وطالما المسألة بالتراضى ومافى زول جانا إشتكا الحكومة ما بتدخل .. خلاص يابنى يبقى الكلام ده واضح .. مافى زول شال قروش زول بالقوة !
- أها أيه رأئك يا أستاذ إنو وزير العدل قال ان القانون سيطال بالحق كل مرتكب جريمة مهما علا اسمه او لونه السياسي؟
- أنا شخصياً متأكد من المسألة دى .. وزير العدل ده بالذات كلامو ما بقع واطه وقبل كده صرح تصريح واضح بإنو أنحنا فى السودان بنحارب الفساد (بالوازع الدينى) .وأكيد هسه فى قصة المواسير دى لو (الوازع الدينى) ما كان كفايه عند الناس ديل ولقوهم – فرضاً- مذنبين الحكومة ما ح تخليهم لأنها أصلو ما بتخلى ليها فاسد أو نصاب و حرامى !
- يا أستاذ أنا قريت فى الجريده دى إنو (الوالى) بيقول إنو سوق المواسير سوق عادي وهو سوق (للكسر) وهو موجود في كل مدن السودان؟ وقد تم استغلال قضية السوق من بعض الذين سقطوا في الانتخابات !! الكلام ده يا أستاذ كيفن والمتهمين مرشحين وفازوا فى الإنتخابات؟
- كلام الوالى ده صاح .. أسواق الكسر بقت عادية زى ما قال .. إنتا قايل الناس الفى السجون ديل قابضنهم عشان بيعملو فى (مفاعلات نوويه)؟ ما كووولهم ناس كسر وشيكات .. والكسر ده بقى شئ عادى زى ما قال الوالى (كبر) !
- طيب خلاس فهمنى كلام الوالى بتاع إنو (الشئ الحصل ده ائتلاف بين بعض الساقطين في الانتخابات والهاربين من العدالة والساعين لطمس معالم جريمتهم النكراء بأكل والاستيلاء على اموال المساكين والفقراء) !
- إنتا متأكد إنو الكلام ده قالو الوالى؟
- أهو ده فى الجريده
- أيواا أنا أوريك الوالى عاوز يقول شنو؟ الوالى عاوز يقول إنو الساقطين فى الإنتخابات والهاربين من العدالة قامو حرشو (المتهمين) ديل عشان يعملو السوق ده عشان يستولو على اموال المساكين والفقراء ويحصل الإنفلات الأمنى ده ووضع الحكومة يتدهور !
- لكن يا أستاذ المتهمين ديل مش .. مرشحين وفازوا كمان ؟
- آه ... والله نسيت .. فعلن والله .. معليش الزهايمر يا إبنى !!
كسرة :
هو الكسر ده فضل لينا فيها كسرات
|
Post: #2
Title: Re: الزهايمر يا إبنى ! (لم ينشر) !!
Author: مؤيد شريف
Date: 05-07-2010, 10:41 PM
Parent: #1
سلامات أستاذنا أبو ناجي
وندعو لك بالصحة والعافية
مسلسل تغييب الأقلام المعارضة يتواصل بكل أسف..
ويبدو أن دائرة التواطؤ في إتساع!!
أما موضوع المواسير
فصدقني أن أمر التجارة بالسياسة والنفوذ ليس بالجديد
وإليك نموذجا واحدا حدث قبل سنوات ولا يكاد يُعرف إلا لدى قلة :
وحدا من جماعة الإنقاذ "الإعلاميين" والمنتميين لمؤسسة "الفداء" لإسحق فضل الله
عُهد إليه "أو سقط عليه عطاء " لإمداد معسكرات الخدمة الإلزامية بالفول والعدس وما إلى ذلك
قام الشخص "السعيد" هذا بلهف مليارات الجنيهات
وعندما إنكشف أمره وهو لا يزال في موقعه الإعلامي وقائم على "عطاءه" الإلزامي
رفض إرجاع الاموال وهدد بكشف المستور وتعرية من هم "فوقه" ومعه في الغنيمة المليارية
خرج "السعيد" أو هم أخرجوه بالميناء الجوي "على عينك يا تاجر
وتكتموا على المال والجرم فيه والمفسدات فيهم
ولايزال "السعيد" مبرطعا بالمليارات في دولة جارة "ولا من شاف ولا من دري"
وثالثة الأثافي : أن نافذ منهم له معه "نسب" ويوفر له الحماية التامة
يزوره كلما حل النافذ بالدولة المجاورة
ويقتسمان المال الحرام !!!
عهدهم كله مواسير
وما ماسورة الفاشر إلا ماسورة واحدة تكشفت لغباء يسمهم ويشمهم على الدوام
وما اكثر المواسير المستترة
تحايا وتقدير
|
Post: #3
Title: Re: الزهايمر يا إبنى ! (لم ينشر) !!
Author: الفاتح يوسف جبرا
Date: 05-08-2010, 06:51 AM
Parent: #2
عزيزى مؤيد
التحايا والود
أعتقد أن ما حدث فى هذا السوق إمتحان عسير بالنسبة للإنقاذ فى بداية دورتها (الشرعية) وأفتكر حقو تضحى بالجنين والأم عشان يعيش الزوج !!
|
Post: #4
Title: Re: الزهايمر يا إبنى ! (لم ينشر) !!
Author: nazar hussien
Date: 05-08-2010, 07:06 AM
Parent: #3
| Quote: تضحى بالجنين والأم عشان يعيش الزوج !! |
ويتحول الي سوق الهوامير
|
Post: #5
Title: Re: الزهايمر يا إبنى ! (لم ينشر) !!
Author: عمران حسن صالح
Date: 05-08-2010, 07:15 AM
Parent: #3
حين يأتي ذاكـ اليوم تكون الساعة قد اقتربت ولا شكـ في ذلكـ البتتتتتتتتتتتتتة
والبتة الفوق دي ( الشدة ) يا أستاذنا الجميل لن تعطي الكلمة ( شِدتها ) التي أقصد
أصلاً وحسب قناعاتي ( المتخلفة ) إلى حين ، أعتقد أن أِشراط الساعة لم يتم ( ترقيتها ) وتعديل بعض بنودها بما يتماشى وروح العصر
ترقية بمعنى Up grade ( ما عارفة والله ملصقَة ولا كل كلمة براها كدي ) ..
لأن ناس الدين ( اللابسين بدل ) عدلو في شرح بعض الأشياء حتى وإن كانت آيات وبما يتماشى مع روح العصر ..
يعني التطاول في البنيان ، إلى آخره ، أِشياء لم يعد لها علاقة بالساعة المقصودة ( الآن ) ، بالتالي هناكـ إضافات لا بد لها أن تتم .
كيف ؟؟
والله أنا زول دنيا ساااااااااي والدين علاقتي بيهو الأركان الخمسة بس .
المهم سألتني : تقصد ياتو يوم العايزو يجي وتكون الساعة قد إقتربت ؟؟
اليوم يا أستاذي الجميل التقدر تنشر فيهو كلام زي في صحافة اليوم .
.
.
بس
( بعد بس دي ضغطت Enter لامن المفتاح إنقلع )
|
Post: #6
Title: Re: الزهايمر يا إبنى ! (لم ينشر) !!
Author: محمد عبد الماجد الصايم
Date: 05-08-2010, 07:47 AM
Parent: #5
والله يا عمكـ .. بعد دا الناس ديل يا رشّوكـ يا رشّوكـ!
يا كمان طلعوكـ الحاجة القلتها زماااان ديكـ
|
Post: #7
Title: Re: الزهايمر يا إبنى ! (لم ينشر) !!
Author: جعفر محي الدين
Date: 05-08-2010, 08:01 AM
Parent: #6
أستاذ الفاتح جبرا
أولا شكر يجب أن يتكرر كل يوم لمشاركتك لنا فيما تكتب
ونثمن الجهد الذي يقوم به شخصكم الكريم في تنوير الشعب السوداني
عن ممارسات الحكام اللئام
بعد دا مجرد ذكر اسمك سيكون غير قابل للنشر
الله يعينك ويعين البلد في مصيبتها الجاثمة على صدرها كل هذه السنين العجاف
|
Post: #8
Title: Re: الزهايمر يا إبنى ! (لم ينشر) !!
Author: Mohamed Yassin Khalifa
Date: 05-08-2010, 08:09 AM
Parent: #5
رائع يا أستاذنا جبرا...
والله متعتنا بالمقالة دي والقبليها... الأتنين في الصميم
وشوف عينك كان جوك بـ "ماسورة توتو" وحللوها وكبرو ليها
بعد شقلبة الأسم مراعاااااة لحقوق المؤلف
عشان ما تجي تطالب ليك بحقا ليك أو ماسورة
.....
تحت تحت...
وبالله عليك المنع نشر الإبداعين الثقافيين ديل منو؟
الله لا كسبه دنيا ولا آخرة...
|
Post: #9
Title: Re: الزهايمر يا إبنى ! (لم ينشر) !!
Author: الفاتح يوسف جبرا
Date: 05-08-2010, 08:18 AM
Parent: #8
الأحباء الأعزاء
شكراً على المداخلات الأنيقة ... أهلنا زمان قالوا : (إسمع كلام الببكيك وما تسمع كلام البيضحكك) .. ما عارفين نعمل شنو؟ نبكى (بالشده على الكاف) ما ينفع ... نضحك (بالشده على الحاء) ما ينفع !!
|
Post: #10
Title: Re: الزهايمر يا إبنى ! (لم ينشر) !!
Author: ismeil abbas
Date: 05-08-2010, 08:48 AM
Parent: #9
اخونا واستاذنا الفاتح جبرا..
السلام عليكم..
مقال قوى وامين وفى المليان..ولو زرزروك قول ليهم انا عندى الزهايمر..
زمان فى محطة باصات فى امبده إسمها المواسير..ياربى حتى ألأن موجودة؟؟واعملوا حسابكم ياناس أمبدة كان مازالت موجودة..
الواحد بقى يخاف لما يشرب من الماسورة..
الله يمتعك بالصحة والعافية..كلام بسيط ومعبر ولاذع.
|
Post: #11
Title: Re: الزهايمر يا إبنى ! (لم ينشر) !!
Author: الفاتح يوسف جبرا
Date: 05-08-2010, 09:28 AM
Parent: #10
Quote: السلام عليكم..
مقال قوى وامين وفى المليان.. |
عزيزى إسماعيل
تحياتى
على الإنقاذ وهى فى بدية عهد ما يسمى بـ(الشرعية) أن تتعامل مع الفساد والمفسدين بكل قوة .. وأهو أنحنا قاعدين نسدى النصح إن كانت هنالك آذان تصغى !!
|
Post: #12
Title: Re: الزهايمر يا إبنى ! (لم ينشر) !!
Author: osama fadlalla
Date: 05-08-2010, 10:30 AM
Parent: #11
ما قلنا ليك يا استاذنا ... ماتجيب سيرة الربا لو داير الوليدات يحّلو ...
ياخي قول سرقة ..يعني انت بتعرف اكتر من سبدرات..
يديك العافية... يارب
|
Post: #13
Title: Re: الزهايمر يا إبنى ! (لم ينشر) !!
Author: Al-Shaygi
Date: 05-08-2010, 11:28 AM
Parent: #11
Quote:
على الإنقاذ وهى فى بدية عهد ما يسمى بـ(الشرعية) أن تتعامل مع الفساد والمفسدين بكل قوة .. وأهو أنحنا قاعدين نسدى النصح إن كانت هنالك آذان تصغى !!
|
ما هو كمان ما تبالغ يا أستاذنا...
في زول بيتعامل مع روحو بالقوة؟؟؟
الشايقي
http://www.youtube.com/watch?v=WjNosdjuv7s
[email protected]
http://alkatwah.com
.
|
Post: #14
Title: Re: الزهايمر يا إبنى ! (لم ينشر) !!
Author: خالد عبد الحليم سعيد
Date: 05-08-2010, 12:55 PM
Parent: #13
الله يديك العافيه
يادكتور
لكن عمنا عبد الحميد اتلومت معاو
بس يا دكتور ابقى نجيض مع الهكر الحايم اليومين ديل
الناس ديل خترين خلاص فى التهكير دا
|
Post: #15
Title: Re: الزهايمر يا إبنى ! (لم ينشر) !!
Author: الفاتح يوسف جبرا
Date: 05-08-2010, 01:30 PM
Parent: #13
Quote: ما هو كمان ما تبالغ يا أستاذنا...
في زول بيتعامل مع روحو بالقوة؟؟؟
|
غايتو يا شايقى نحنا عملنا العلينا !!
|
Post: #17
Title: Re: الزهايمر يا إبنى ! (لم ينشر) !!
Author: wadalzain
Date: 05-08-2010, 02:40 PM
Parent: #15
شكرا أستاذنا الفاتح جبرة على كل ما تكتبه فهو دائم فى الصميم
ولكننى يا الفاتح ارغب فى أن ارى واسمع ردة فعل شخص وحيد ما فتأ يقرظ فى هذا النظام على الرغم مما يرى ويضحك مما يسمع وهو الدكتور عبدالله على ابراهيم ، فقد كتب فى كتابه الارهاق الخلاق والذى هو تجميع لمقالات كتبها فى بداية الانقاذ ، كتب قائلا فى ذم المعارضة ومدح الانقاذ :
( فلو لم تكن المعارضة مسكونة بالسلبيات لقدرت حماسة النظام الراهن لرد الاعتبار للمال العام فى وقت اصبحت الاموال المختلسة من الدولة عبئا ماليا تكرر ذكره فى تقارير المراجع العام ، فقد استحسنت مثلا اقدام أعضاء الانقاذ الوطنى لتقديم اقرارات ذمة بما يملكون حاليا فى محاولة منهم لتطهير الحكم من دنس الثراء من موقع السلطة ) ويواصل فى صفحة 18 من كتابه هذا قائلا ( مما يحمد للنظام الحاكم مساع له دءوبة للكشف عن الفسادفى ميادين لا يمكن اتهامه بأن له غرض سياسى واضح فيها )
تخيل الدكتور يقول عن الحكومة هذه حماستها لرد الاعتبار للمال العام ومحاولتهم لتطهير الحكم من دنس الثراء من موقع السلطة
الزول ده نظرو قصر ولا شنو ولا له مآرب أخرى ؟
|
Post: #18
Title: Re: الزهايمر يا إبنى ! (لم ينشر) !!
Author: الفاتح يوسف جبرا
Date: 05-08-2010, 03:59 PM
Parent: #17
Quote: تخيل الدكتور يقول عن الحكومة هذه حماستها لرد الاعتبار للمال العام ومحاولتهم لتطهير الحكم من دنس الثراء من موقع السلطة
|
الحبيب ودالزين
الدكتور يكون شايف كده !!
|
Post: #19
Title: Re: الزهايمر يا إبنى ! (لم ينشر) !!
Author: عبدالكريم الامين احمد
Date: 05-08-2010, 04:39 PM
Parent: #18
الدهن دوما في العتاقي..
ومتعة كبيرة سياحية في واقعية المواسير السحرية
وتحياتي
|
Post: #20
Title: Re: الزهايمر يا إبنى ! (لم ينشر) !!
Author: سيف اليزل برعي البدوي
Date: 05-09-2010, 03:08 PM
Parent: #19
أصبح معظم الناس يتهمون (الهموم) والمشاغل بأنها قد جلبت لهم كثيراً من (الآفات) والأمراض كمرض السكر والضغط والمصران العصبى والقرحة بأنواعها إلأ أنهم يتفقون جميعاً بأن من أبرز هذه الآفات هى آفة النسيان ، حيث يكاد غالبية الناس يشتكون من هذه المسألة التي أصبحت توقعهم في مواقف محرجة كثيرة، ولم يعد هناك فرق كبير بين الرجال والنساء حيث يصرخ النوعان بأنهم إذا إستمر الحال على هذا المنوال فسوف يصلون لمرحلة نسيان (أسمائهم) على طريقة (سرحان عبدالبصير) فى رائعة (عادل إمام) شاهد ما شفش حاجة!
ولعل الشئ الغريب فى الأمر أن هذه الظاهرة أصبح يعانى منها حتى الأطفال فقد أصبح (شئ عادى) أن تقوم بإرسال أحد (الأطفال) ليأتيك بكوب ماء مثلاً وعندما يطول إنتظارك و(تناديهو) والشرر يتطاير من عينيك وتسأله: أنا يا ود مش قلتا ليك جيب ليا موية؟
فتأتيك الإجابة ... والله نسيت!!
نعم .. لقد كانت عبارة ( والله ما بتذكر فطرتا بى شنو؟) عبارة تقال من باب التظاهر بأهمية قائلها وكثرة (مشغولياتو) أما اليوم فأصبحت لا تقال ولكنها تحدث فعلاً، علماً أن العلماء المختصين في مجال (علم الذاكرة) يؤكدون على عدم أهمية تذكرك إنك (فطرتا بى شنو؟) أو (إتغديت بى شنو؟ ) وأن تذكر هذه الأشياء لا يجدي شيئاً ولكنه يحتل حيزاً من التفكير!!
هنالك الكثير من المواقف المحرجة التى تفرزها الإصابة بداء النسيان فعندما زرت صديقى (م) الذى يعانى من مرض النسيان سألته :
- عامل كيف مع قصة النسيان دى؟
- لا .. ما خلاس إتعالجتا منو الحمد لله؟
- وإتعالجتا منو وين؟
- (هنا وضع يديه على راسه) : يأخي كدى اتذكر معاي حاجه بتجى للزول وهو نائم ولمن يصحى مرات ما بتذكرا..
- قصدك أحلام..
- (فرحاً): بس .. أحلام دى ذاااتا..
ثم إلتفت نحو إبنته الصغيرة يسألها:
- يا بت يا أحلام إسم المستوصف المشيناهو كان إسمو شنو؟
وقريب من هذا الموقف قصة ذلك المريض الذى ما أن غادر عيادة الطبيب حتى نسى التشخيص الذى قاله له فأخذ يسأل نفسه:
- يا ربى قال ليا عندك شنو؟ شق فى الصحن ؟ خفجه فى الصينية ؟ ترمه فى الكباية ... جلبه فى الماسورة!!؟
وعندما لم يفلح فى تذكر ما قاله له الدكتور عاد إليه وسأله:
- يا دكتور إنتا قلتا ليا عندى شنو؟
- شق فى الحوض .. شق فى الحووووض!!
ما دعانى للكتابة فى مسألة النسيان دى موقف حدث لى الجمعة الماضية .. حيث تحركت من منزلنا الكائن بأمدرمان نحو مدينة (بحرى) لزيارة صديق لى وبعد إنتهاء الزيارة التى إستغرقت بعض الوقت ً إستأذنته فى الإنصراف ، وقمت بركوب أمجاد عائداً للمنزل ، عندما دخلنا (الحى) وقربنا من (البيت) أدخلت يدى فى (جيب الجلابية) لتحضير قيمة المشوار لصاحب الأمجاد الذى أوصلنى ففوجئت بوجود جسم صلب تحسسته فقلت للسواق فى الحال:
- بالله يا أخينا رجعنى للحته الشلتنى منها!
- (مندهشا): إن شاء الله مافى عوجة..
- هو فى عوجه أكتر من كده؟
- مالك؟
- ده مفتاح عربيتى نسيتا هناك!!
كسرة:
شويه والواحد ينسى اسمو ذاتو .. بالله ده إسمو كلاااام!!
الفاتح جبرا
http://www.rayaam.info/Raay_view.aspx?pid=613&id=47160
|
|