Post: #1
Title: تسألني بس خجيتو ليه ؟ رد أدروب للأخ معاوية البرير
Author: عبداللطيف محجوب
Date: 05-05-2010, 04:38 PM
Parent: #0
رد ادروب للا خ معاويه المدير
إلي الأخ معاويه والي كل الحادبين علي الوطن والحرية هذا ماجاشت به قريحتي في ما فعلناه وهو الشر الذي لابد منه أو مايسمي بالانحناء للعاصفة في وطن أصبح فيه الإنسان يباع ويشتري
تسألني بس خجيتو ليه ؟
ما دار بفكرك غير كده
تسأل منو
تسألني أنا
أسأل هناك ناس فوق
من (عمر) لي و(د حمد)
ناساً سمان ومنفخين نهبونا من كمين سنه
خلونا نحن مرمدين
يقول ليك بس خجيتو ليه
خجيتو شان نحن الحيارة
مقطعين
مابين عطاله وذلتين
ماسمعت يوم بالهندسه
ماقالو فيها مثلثات
اقعد تعال نديك حصص
جهل
ومرض
وافتقار
هذا المثلث منذ كان
ما فاتنا يوم
باقيلنا ايش
باقي الموات
لسع تقول خجيتو ليه
خجيتو شان جونا السمان
قالونا هوي
اما الفقر والحكننه
او تقولو كمان انا
أملأ الصناديق جكنه
لو ما كده
ما فيش وظائف عندنا
لا رواتب لاهنا
لاحتي موية الزير هنا
تمشي وتغادرحينا
كداري بالشارع البعيد
صحراء . رمال. ما يهمنا ؟
والموت عليك محتوم عديل
مين قال كده
ديل السمان ومنفخين
بل حتي حاربنا الامين
لسع تقول خجيتو ليه ؟
ما كان قصدي اخجو خج
والله بس لولا المحن
قالونا بس بالدين عديل
الشغله كلها فرض عين
أي ياتو دين
ما نحن ديل حالفين يمين
والله نحن موظفين ...
ايوه انتو موظفين
والدوله كلها لمنو
مانحن ديل حاكمين سنين
أدوك كم ؟؟
قلت لي كم ؟؟
مين يدي مين
ديل هم حرامية السنين
سرقونا من عشرين سنه
يدونا ايش
غير الكضب والعكننه
عفت يدينا والسنا
إطرانه ايه نعمل كده
غير الجبر والموت عديل
اصل الحكاية مجننه
قالو الفقيه من عهد هود
الموت هناك لو جاك عديل
تأكل الفطيسه وتلعنا
نحن الحكاية الفينا جد
أكل الفطيسه الهينه
والجاي اكثر من كده
امشي النيابة
وكلمهم
افتح بلاغ في كل مكان
كل الصحف
والامكنه
وانا بمشي اشهد ليك نهار
انو الحكاية مزورة
جبرونا بس نعمل كده
مين ؟
كلهم
ناسا سمان ومنفخين..
يادرة الوطن الحزين
العهد بيكم اجمعين
قولتنا حق
لو جاء المبين
ونقوله بالصوت المبين
مين الكانو مزورين
مين اللقال نعمل كده ؟
لو كان راقص او لعين
او حتي شيطان بدقن
فاكرنا نحن مغفلين
ونجدد العهد الدفين
انو الوطن فوق الجبين
ياخائنين يامجرمين ؟
خجيتو خج ..
خجيتو بي ايديا ديل
شاهد ملك
احلف يمين
لما العداله تكون يمين
وانا مابراي
عندك هناك
هيا الشمال
لانقيب شرق
كترة خلوق وموظفين
إقطع قطع
ختم ختم
اشخت شجر
واحد فوق راسهم وقف
اقطع كتير
و(أيلا) يازول منزنق
ماتشيلو هم
نفس الكلام نفس النضم
قالونا دين
لامويه لا كلأ يبين
ياتو دين
يامجرمين ..
واحد يطنطن بتحت
ياجبهجية الشوم
يا وجع السنين
تخلونا نحن مزورين
لكنو بس قدر السماء
والوقت والزمن الخطأ
ولما ن يحين وقت الصواب
ويذهب الزبد الهباب
تلقانا فوق كل الهضاب
نصدح بصوت الحق عديل
هم الكانو مزورين
هم الكانو مزورين
اخوك ابو محمد
بورتسودان
منقول من هنا http://samaportsudan.com/vb/showthread.php?t=9435
بقلم العضو طراي من منتديات سما بورتسودان ..
______________________________________
* التعديل لتصحيح إسم العضو
|
Post: #2
Title: Re: تسألني بس خجيتو ليه ؟ رد أدروب للأخ معاوية البرير
Author: عبداللطيف محجوب
Date: 05-05-2010, 07:58 PM
Parent: #1
UP
|
Post: #3
Title: Re: تسألني بس خجيتو ليه ؟ رد أدروب للأخ معاوية البرير
Author: عبداللطيف محجوب
Date: 05-06-2010, 12:51 PM
Parent: #2
يا جماعة وين أخونا الأدروبات، الكان دقوا جرس في الناس الكانوا قاعدين يضحكوا في بوست الشِعر بتاع أخونا معاوية البرير، المفروض تجو تشكرو الزول ده على الرد، ولا ديل ناس دق جرس سااي لكن الشُكر ما بعرفو ليه ؟
|
Post: #4
Title: Re: تسألني بس خجيتو ليه ؟ رد أدروب للأخ معاوية البرير
Author: معاوية المدير
Date: 05-06-2010, 12:59 PM
Parent: #3
دبايوا، عبد اللطيف...
مشكور اخي عبد اللطيف، فقد سبقك الأخ حامد
بإيراد الرد في هذا المنبر.
يا اخي انا معاوية المدير ما معاوية البرير،
وانا معاك هنا في المنبر.
الشكر لك وموصول عبرك لأخي ابو محمد.
|
|