محمد النصري عشان ود جبريل وتمراتنا الفوق القيف (بوست حنيه بس)

الشايل شمسك في جواك
الشاعر : خالد شقوري




يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع


يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقّع


يا السبت عقابك وروّحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع


ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع


ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح


مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتم وكان آمسكين باعو الارواح


وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح


سايب اهلك ونخلك راحل قول وين ماشي وين آ صاح
الشمس النايره ابت تطلع والنيل يا زول اصبح رحراح
الضل قصر ما غتى رويس ولدا ساكب عرق الكتاح
الواطة ابت تديك الخير ولا انت عليك ما هابي رياح


قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح


ارجع ارجع يا زول ارجع
دي الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

مشيت بعدك بلاد الشوق



مشيت بعدك بلاد الشوق ..
غشيت في سكتي الأطلال ..
لقيتك لسة في الخاطر ..
وفي مرقة شمس باكر ..
ملان بيك طول حياتنا جمال ..

********************

رسومات روعتك تذكار .. علي ابواب بيوت الحي ..
محل تاوق .. لقيتك شوق .. مشتت في
الشوارع ضي ..
اماسينا البتسهر بيك .. نجيماتنا البتشهد لي ..
وراك لاجفت الدمعات .. ولا اتلاقن رموش عيني ..
اونس بيك نصايص الليل .. احجيك دندنة وموال ..

*************************

سألت عليك براي النيل .. تميراتنا وعصيفير الهوى الصداح ..
لقيتك في عيون الناس .. حنين ساكن القلوب مرتاح ..
بتطلع من حكاياتنا .. وخيالاتنا .. بعيد شايفك رهاب رحراح ..
اناديك تمرق من الواطه .. قلوب بيضا .. شعاع وصباح ..
يبق نورك مع الفجاج .. علي النخل العزيز وطوال ..

***********************

اتاريك إنت كلنا بيك .. بلاك نحن وبيوتنا شجن ..
تموت سيرة الفرح نبكيك .. نتوه مانلقى لينا وطن ..
جناينا وضرانا الفوق ..
قمارينا وحسيس القوق ..
رحل كل البلد وياك .. نزل جواك .. حنين وسكن ..
وأنا ( الكاتلني ) من يومداك .. علي عينيك عيوني بكن ..
اقالد ذكرتك جواي .. وأعيش باقي العمر رحال ..



سلامات وين نزل محياك ... تحياتناوأمانينا ..
اكيد باكر نجي ونلقاك ... قمر باهر أماسينا ..
تبل شوق القلوب ترتاح .. علي نمك غناوينا ..
مزاجات قهوتك جواي ..
احاسيس فيني تتحكر .. جمال نيلنا وعصارينا ..
نضاريك في العيون تظهر .. بريق لهفة ودمع هطال ..

أم الحسن خالد شقورى




وقفت بعد حلبت لبينة الشاى تكورك يالحسن
يا أم الحسن وينو الحسن
ولمن صفت رغوة شخيبات اللبن فى حلتنا المبنيه من طبق السكن
واقفه فى حوش البهايم ولسع تكورك يا الحسن
وتلاوى فى الحمل العنيد
جاها حسا من بعيد مارق من القاطوع ورا
قال ليها خير يا الحاجه خير
قالتلو خير تعال لي جاي دايراك تعنون لي جواب يا الراسى لولدى الخدير
لا تبقى زي شافع السرير يقول لى زين آيمه زين وزين تبقى بعد شهير
وان جانى يكتب فد سطير
اقولو يا سجم السجم انا زى قرايتك ما قرايتك ما قريت
لكن عويناتى بيقرزن الوريقه البيضاء من لون القلم
بعد المغيرب بى شوي جاها الحسن تعبان يسير
العشى غنمو من الدرب وسرقت ندى وشو الهجير
سوتلو شايا بى لبن قرض معاهو حرف فطير
قالتلو بسم الله قول واكتب وصيتى انا للخدير
الزمن يا ولدى ماحقاهو السنين
البعيش فى الدنيا ما بعيش مرتين
العمير فاضل لى بس منو اليقين
وانت طول فى البنادر ياالحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسى رسلو لي دحين
العوينات يا ضناي شوفن ضنين
سلامنا ليك مطرز للبنيات والبنين
ولو فى الارض يا ولدى تنشال فى الايدين انا كت
برسلا لي
فى لورى الخزين

كيف عاد العيون ما تبكي


كيف عادالعيون مابتبكي مادأم في الحزن غرقان
وكيف اقدر سيلأولومك يامناي أعيان
الحزن الحزنتوعليك ماظنيت تسيغواغاني
وحبك قدرمأسعدني يأحلام صباي بكاني
اياماقضيت معاك ماظنيت يعيدزمان
وماظنيت ربوع الباديه تضحك والبلاد محلان
إنت يامولد هواي العزري وينك إنت من احزاني
ولاخلاص بعدفرقتناكل واحد يلوم التاني
اوعك من تصدقي إنوبعدك اصلواماهماني
ولاطيفك يابهية الطلعه لاخليتولاخلاني
ألناس قالولي الغاليه في شكواك دوام لايماني
وماك عارفه العزاب ألعايشو لخبط يامنياكياني
بعدك ماقدرت يانورعيني حتى ثواني
ومن فتيني يامحبوبه ضايق بي علي سوداني
غايتوعزاي في دنياياطيفك ماقسى
ونساني زادي أنالي عميري الباقي إنك يامناي طارياني

سـؤال
صلاح البوح


أسـع ياتـو فيهـم يا خلـق الله عـاد أو عـاد يـات مصـيـر لى وللولاد
تبدا أمونة رحلة ما كان فى الحساب باراها الزمن شبعا فى العذاب
من يوم سـافر أحمد قاصـد للجنوب باكى أمونة فرقة هزت للقلوب
زوجــهـــا أبـو الـــولاد الـــخــاتى العيوب
مـفـقــود مـن ســـنـــة وأعـــلـــنـــوا للحداد
وتــمـــــر الـــســــنـــة بـــى فــــوق السنة
تــمـــو أربــع ســـنـــيـــن مـــــرت محزنة
فـكــرو فــى الـكـفـيــل وبـــيـــنــاتــن جنا
ومـحــل الأبــــــــــو بــقى عـــــــــم الولاد
عـقـــدولــــو الأهـــل ســـــوو الـــمـــتــبع
مــن مــرت الأخـــــو الفــــــــــات مارجع
تــنــداس الــمـــشــــاعـــر أو قــــول اقتنع
لازم الـنــاس تــضـحـى شـــان لبنى وعماد
ويــتــــم العـقــد بيـنات الدمـوع لا فرحـا كتـيـر لا ضـوّت شموع
عجلات الزمن مابتقبل رجـوع ومابتمشى الحياة زى ماالزول أراد
سـنتـيـن بالكـتـيــر كـان جـابو الولـد والحـزن الـقـبـيل جـواهـم برد
سـمـو عـلــى الــفـــقـــيـــد الــراجل الصمد
شــان حـــفـــظ الإســــم وتــأكــيـــــد للوداد
وما كـان فــى الــحــســـاب الــزمــن العنيد
يـنــســج فى الـخـيــــوط مــن زمـنــــاً بعيد
فـى يـومـاً عــصـيـــب ومــا فـى الـبال أكيد
مــن أول جــــديــــــــد اتـكــــــــــال الرماد
فـى لـحــــظــة ســـكــــون عـمّــــــاها الديار
حــس الـــبـــاب نـــقـــــر قــايـلة أمونة جار
تـاريــهــو الــفــــقــــيــــد كـــان فى الإنتظار
مفقـود الجنوب يرجع تانى صاد كان صدمة قاسية فوق الإحتمال
خلـتـا بـيـن جحـيـم واقع أم خيال إخـتـلّ العـقل وكان آخـر سؤال
أسـع ياتـو فـيهـم يا خلـق الله عـاد أو عاد يات مصير لىّ وللولاد

اتجنستك بالميلاد




الأيام مالن ما هن في الآلام داقالي أوتاد
الأيام كاتفاني حزين سوجرن الأشواق
كندكن الأحلام بالحسرة ويبسن الوديان في المسرة
لو بتعدل الخطوة العترة ما اتراوحت وجيتك صاد
****
ما حبيت عينيك بالصدف وما لقيتك دون ميعاد
يا أحلام القلب الراد
اتلاقينا صباح الدنيا وشلتك منيا واتجنستك بالميلاد
اتحسستك حب بالفطرة وعشتك فكرة
من شقيتي طريق أشواقنا ولامن جيت من عندك صاد
يوم ما جيت من عندك راجع وكلي مواجع ونوح وسهاد
اتوكيتك حزناً دامس بين خلاجات القلب الراد
التفت عشان ألقاك فرحة زول بي زولو العاد
****
أنا ماشي مباري دريب الرجعة محطة محطة لقيتا رماد
حتة كنا وحتة قلنا وحتة كان الشوق وقاد
الأطلال إحساس الوحدة والآمال منشري سواد
لا لاقيت أطفال بيغنو ولا اتنين قاعدين يتمنو
وداي الخير مرَّابو جراد
****
اتذكرت ليالي الهجعة وفيك الشوق مشدود وقاد
وعينيك كان أسباب الوجعة وسفر الطير في العتمة جهاد
يا مامشين فوق دربك أسعى طول الليل شقيت لي بلاد
وكم كبيت فوق دربك دمعة واستنيت طيفك ما عاد
****
وآه يا زول أهديتو حياة أهديتو عيون ومروة وزاد
آه يا زول أهديتو بيوت أديتو خيوط شعري العقاد
لو فاضل فيك من ريدي رماد
أطرح لي وشيك أنا داير أجيك
ليه بابك ساد ليه الأحزان ليه الآهات زظوالدمعة حصاد

ياتو طريق يجبرني اجيكي


ياتو طريق يجبرني واجيك
ياتو طبيعة وياتو سلام
لو ما اصلا جاييك
وحارس طيفك بالايام
يا البتقولي وماك مهتمي
كيف الحال انشا الله تمام
والحول الزاد فوق حولو
عارفة علي مشهادك تام
بحلم بيك والدنيا أماني
والأحلام ياها الأحلام
الاحلام كيف تبقي حقيقة
والبحلم بيناتنا يلام
تزكري يوم اتلاقينا
وماكان في خاطرنا غرام
غير اشواق لي لقية احبة
ومامعروف تكون يات عام
والمستقبل في ايد سيدو
يا افراح يا يبقي الام
كيف ما نرضابو ونقبل
طالا ما نؤمن بالاقسام
وفي يوم مامتزكر اسمو
من شدة ما عشت صدام
لاح لي صباحك واتحسست
باقي معالمك في الارحام
شفتك في افاقي بعيدة
مسرورة ومسكونة هيام
كاسيك الحسن الرباني
ذوق وسماح لون وقوام
شفت عيون مخلوقة اريدة
وشوفتا تصبح لي حرام
بتمناها ولي تاكد
كل غناي الحارسو حطام
اتخيلت كتير في الدنيا
شوق وماسي وكم الام
الا عيونك تبقي بعيدة
وبيني وبينن يجري خصام
ومهما الليل اشيدة ضراهو
يملاء مسار احلامي حطام
لابد من يشرق لي صباحو
وروضي يهب فوقو النسام
مؤمن بي مقسوم القسمة
حتي ان كانت كاسا سام
والاغدار وكت الله يجيبا
ياها نهاية كل كلام

Quote: كيف عادالعيون مابتبكي مادأم في الحزن غرقان وكيف اقدر سيلأولومك يامناي أعيان الحزن الحزنتوعليك ماظنيت تسيغواغاني وحبك قدرمأسعدني يأحلام صباي بكاني

التحية للفنان محمد النصري

ويالكونت تعيش وتاخد تاني
الشاكوش حار

Quote: التحية للفنان محمد النصري ويالكونت تعيش وتاخد تاني الشاكوش حار

شاكوش شنو ياحبيبه قولي بسم الله
ده بوست تمر وجروف وقمره وليل وطمبور ساااكت مافيه شواكيش

بالله الشرك ده كلو ما قبض (ود جبرين)!!

إن شاء الله يبقا طيب بس..

وتشكر على الروعة يا عبد المجيد..

Quote: بالله الشرك ده كلو ما قبض (ود جبرين)!! إن شاء الله يبقا طيب بس.. وتشكر على الروعة يا عبد المجيد..

يا أميره ود جبرين عارفني قاصده وحاقد عليه

اسي تلقيه يتحاوم بي بره لكن مصيره يجي داخل هني ويقع في الجغب ده وياخد نخجته

تعرف يا رائع

أول اجازة لي في السودان من الخرطوم للبلد طوووووووووووووالي وطول الطريق بنسمع في ود النصري


متعة حقيقية والله


عليك الله ما تشوف لينا أغنية ما لقينا بيت

محبتي الاكيدة وطارق اسع بيجيك ناطي

Quote: تعرف يا رائع أول اجازة لي في السودان من الخرطوم للبلد طوووووووووووووالي وطول الطريق بنسمع في ود النصري متعة حقيقية والله عليك الله ما تشوف لينا أغنية ما لقينا بيت محبتي الاكيدة وطارق اسع بيجيك ناطي

هلا ود جبريل الصغير ونورت البوست
طارق جبريل انا متأكد انو حايم بي بره بره تلقاه اسع يفتش له في بديقه لكن قوله ماف طريقه انت على ضفاف الاطلسي وانا على ضفاف الخليج العربي ما في اي شي لمنا بلا الوجع ده


طلباتك أوامر
أغنية بيت النمل
ما قلت لي رغم الظروف **** حأسكنك جوة الحروف
وسكنت في حرف البكى **** لون عيوني ضباب وخوف
تاوقت مابين الرموش **** سدت ملامح الوجعة شوف
ورجعت تاني اقول كفاي **** غير الحرق ما عندي جوف
مالقينا بيت،،،
مالقينا بيت،،،
مالقينا بيت لو حتى من الطينة طوف
لا حتى حتة نسوره ومن حولها ندور نطوف
ونلبي لامن ننكفي وفي وشنا نعيد الوقوف
مالقينا بيت،،،
مالقينا بيت،،،
مالقينا بيت يسترنا من عين القدر
ما الدنيا ضاقت بالبشر
فتشنا جحر النملة قصينا الاتر
لمن دخلنا علي النمل قالينا خشو بلا زعل
قرصنا ما قاصد هو شر **** عبر عن الفرح الغمر
وبي قلبو لمن شافنا قال **** معقولة يتواضع بشر
ويسيب في بيوت الدنيا **** يزهد في ترابها وفي البحر
ويخلي كل مفاتنا **** وآمالها واحلام العمر
ويعيش مع النمل البكد في **** الصخرة شان حبة امل
جحرا مضلم مافي نور **** لا حتى طاقة ولا قمر
لاموية لا جدول يكب **** لما الخريف يتكي المطر
مالقينا بيت،،،
مالقينا بيت،،،
مالقينا غير جحرا تبيت النملة فيهو
وسكنا ما دافعين ايجار لما النمل ما هان عليهو
تلقانا واقعين في الأرض ويدوسنا في سكة مشيهو
وقال لينا في الصيف اسكنو
ولما الشتا يزور الديار نفرح معاكم بي مجيهو
مالقينا بيت،،،
مالقينا بيت،،،
ما لقينا بيت نتكل عليو كل الهموم
مالقينا غير ناسا تنوم شان تصحى تاني عشان تنوم
واحلامنا ما بتقدر تقوم
كيفن بتتقطر مطر قبال تكون اصلا غيوم
مالقينا بيت،،،
مالقينا بيت،،،
يا دنيا دست في حشاها مساحتا
نكرت ولد انسانا قالت ماخلق آدم زمان من طينتا
يا زايلة زالت من قليبا محنتا
لا نحنا شاحدين حنها لا حتى دايرين سكنتا
باكر على الجنة بنعيش والدنيا تعرف غلطتا



معليش ما لقيت ليها فيديو

من قبييييييييييل يا كونت اتحاوم من برة لاااابرة
عارف نفسي ان بقيت دخلت هني بتعوق ضُمة ضُمة
وزي ما قالتلك بت ناس ود بلي أليلين البركل ديك (أميرة فاروق)
يمين الشرك قبض قبيييييل
علي الحنيي الفي صوت الخرابة دة يمين توجع في الخاتر
اشتهيت اهلي يا ناس الله
اشتهيت تميراتنا في البركل
اشتهيت قبر امي
اشتهيت دفيق شبا


يا ناس الله انا فِتِر ضُمة ضُمة

Quote: يا ناس الله انا فِتِر ضُمة ضُمة

نان هو وجع يا قريبي

غايتو انا اليومين متورن تورين شديييد خلاس وما بخليك تاني الا اسمع بك في شبا


بس ياتفتر انت يا يفتر ود النصري

Quote: غايتو انا اليومين متورن تورين شديييد خلاس وما بخليك تاني الا اسمع بك في شبا

وحاتك علي اطلع في برج ود درقي أليل الحمام وأفكها زغروتة بي اعلى صوتي واجوعر زيييييييييييييين
واااااامغستي نا يا قريبي

Quote: وحاتك علي اطلع في برج ود درقي أليل الحمام وأفكها زغروتة بي اعلى صوتي واجوعر زيييييييييييييين واااااامغستي نا يا قريبي

اها شفت دي يا استاذ طارق بس غتاته مني ماني داير جوعيرتك دي تقيف الا تسافر وتسوق الوليد الضكر داك وتمشي البركل ياخي الناس هناك والله مشتهنك وانا زاتي مشتهيك

عشانك ياود جبريل


لا تزعلي




لاتزعلي .. لا تبكي لا.. لاتحزني .. لا ترثي مركبنا الغرق

قـدر العشـق انـا وإنتـي نتلمـة ونوالـف ونتفـرق

لا إنتي .. لا أنا ..للقلوب الشايلـة حبنـا بـي صـدق

تقدر تبل زرع السنين بي فيـض دموعنـا بعـد حـرق



غـيـر نـسـأل الله يسـهـل القـاسـي وتـهــون

يدينـا فـي باقـي العمـر صبـرا نجففـبـو العـيـون

دي القسمة والقـدر الوقـع .. والدايـره اقدارنـا بيكـون

بس نحن ناس طيبين خلاص ..أحسنا في الدنيا الظنـون



سامحيني كان سقتك معاي .. في سكة في مشـوار ضيـاع

ومليت حياتك بالمنى .. وأحلام مسافـرة بـلا شـراع

وعميت عيونـك بالغنـا .. وكيـف مـرن الأيـام سـراع

ما قايلك اسـه بتكتبـي .. مجبـورة بـي قلمـي الـوداع



لكن خـلاص ..قبـل الـوداع وتفوتـي والأيـام تفـوت

خليـك قـدر البينـا كـان .. لاتفكـي روسيـن الخيـوت

لا تخلـي قلبـك للسنيـن .. لايبنـي فوقـو العنكـبـوت

أمليهو بي عشم الله خيـر .. لاتنسـي إحساسـك يمـوت



وانا أصلي مابنساكي يـوم .. مهمـا يطـول بينـا العمـر

وعارفك كمان شايلاني شـوق .. وغـرام مقلـد بالصبـر

وذكرى وحنيـن لـي ماضـي راح وأيـام تغفلنـا وتمـر

وعـارفـانـي مـابـقـدر بـــلاك إلا الـجـبـر

لكن معاك أخـوك أخـوك لامـن يضـم جسـدي القبـر

Quote: فـى لـحــــظــة ســـكــــون عـمّــــــاها الديار حــس الـــبـــاب نـــقـــــر قــايـلة أمونة جار تـاريــهــو الــفــــقــــيــــد كـــان فى الإنتظار مفقـود الجنوب يرجع تانى صاد كان صدمة قاسية فوق الإحتمال خلـتـا بـيـن جحـيـم واقع أم خيال إخـتـلّ العـقل وكان آخـر سؤال أسـع ياتـو فـيهـم يا خلـق الله عـاد أو عاد يات مصير لىّ وللولاد

لاحولا ,غايتو المرحوم بالغ
اهه امونه عملت شنو
الشرك ما جاب ود جبرين براهو
من الصباح ساكنين في البوست دا
شكرا عبد المجيد

Quote: لاحولا ,غايتو المرحوم بالغ اهه امونه عملت شنو الشرك ما جاب ود جبرين براهو من الصباح ساكنين في البوست دا شكرا عبد المجيد

..

مرحب بييك يا نون يا غاليه

البوست ده لي الجميع وودجبرين ده رمز لي حنية أهلنا وطيبتم الزول ده يدخل القلب بدون ما يستأذن ويملكه كله عشان كده كل ما نتزكر اهلنا وبلدنا ومزارعنا وتحنان ابواتنا واماتنا وخالاتنا وعماتنا نتزكر حنية ود جبريل

انا عندي اخوي في السودان مره بتكلم معاه في التلفون سمع ود النصري في مسجل العربيه قال شوف يازول النصري ده لو باريته في الغربه بتجن اها شفتي ده ياهو المخوفنا من الغربه داير دايرين نرجع بلدنا والله

عبدالمجيد يا كونت
يديك العافيه وتتفتح عليك
شقيش ما تقبل
والله النصري ده
ممكن الواحد يسمعوا السنه كلها
لكن عندي ملاحظه بسيطة
او في الحقيقه طلب صغير
اولا تكتب لينا شاعر الاغنيه
والاغاني الما عندها فيديو اكيد في اوديو
والصوت كمان تحميله وسماعة اسهل واسرع

وتاني كتر خير وما عدمناك
وما نوكن تقلنا عليك كمان
تحياتي

Quote: عبدالمجيد يا كونت يديك العافيه وتتفتح عليك شقيش ما تقبل والله النصري ده ممكن الواحد يسمعوا السنه كلها لكن عندي ملاحظه بسيطة او في الحقيقه طلب صغير اولا تكتب لينا شاعر الاغنيه والاغاني الما عندها فيديو اكيد في اوديو والصوت كمان تحميله وسماعة اسهل واسرع وتاني كتر خير وما عدمناك وما نوكن تقلنا عليك كمان تحياتي

طارق نقد مرحب بيك يا حبيب والبوست يطيب بي وجودك
تعرف ياطارق اخوي نحن ذي السمك تمرقنا من بلدنا ديك نطق الجرسه لانا ناس غربه ولا شي وبعد ده متشوبرين اسي شوف طارق جبريل ده مشى لحدي المغرب وطريقه ترجعه ماها في
محمد النصري انسان بمعنى الكلمه قبل أن يكون فنان
جمعتني به لحظات استثنائيه فلم تكن صداقة بالمعنى الكامل لها ولكنني وجدت فيه دماثة خلق ووعي ورحابه في التعامل جعلته فعلا مميزا على اقرانه من فناني الطمبور
يمتلك قدرات عاليه جدا في العزف على الطمبور (الولد خال طبعا عوض الجرف خال محمد النصري عشان كده هو مبدع في العزف ) ويختار كلماته بنفسه غير متقيدا بالاسماء الكبيره وسط الشعراء لذا تجد كل البوماته جيده
يغني من أعماقه وبصدق شديد عشان كده بتقدر تعيش معاه الاغنيه بي كل تفاصيله
البعض يعيب عليه انه يغوص في مفردات اللهجة الشايقيه والتي تستعصي على الكثيرين من أبناء السودان المختلفين ولكني ارى في ذلك تميزا له وتفردا


ودي عشانك يا حبيب


ارحل ياحمام
رامي قسم السيد عبد الرسول





أرحل يا حمام شيل اشواقي وارجوك لا تغيب
وصل كل مشاعري وريدي لي دار الحبيب
قولو قليبي يا محبوبي غيرك ما بيطيب
واي ديار بلا عينيكَ فيها اكون غريب
السبب المعذب قلبي وخلى الراس يشيب
فراقك يا اعزّ الناس بعد ما كُت قريب

الشوق والحنين البيّ أكتبو ليك ملام
وخايف من يكون في غيبتي جابولك كلام
لو كان البُعاد نسّاكَ لي عهد الغرام
ما كان يا جميل تحرمني شوفك والسلام

ارحل يا حمام قول ليهو اصبر يا جميل
ولو مالت عليّ الدنيا عنك ما بميل
كيف انسى البلد والخضرة والنيل والنخيل
والوجه السحرني جمالو والطرف الكحيل

مشتاق لي نجيمة تضّوي لي قلبي الطريق
وللبسمة التفيض حنية من ثغرو الرقيق
تهت انا في ديار الغربة لا زاد لا رفيق
وما كان يا زمان ترميني بي ما لا اطيق

ما فارقني طيفك لحظة في ليلي البهيم
وياما الشوق بِرجع سيدو لي دارو القديم
لا بد الزمان يجمعنا والحال يستقيم
وانسى ايام شقاي والقاكِ وارتع في النعيم

يا قريبي أنا وِدِر ضُمة ضُمة

الكونت ..

التحايا لكل مبدعي منحنى النيل

من حسونة وود حليب وحاج الماحي والنعام ادم ....

حتى جيل ود النصري والسقيد

وزي ما قال خالد شقوري

بلدا لمّت الطنبور .. ود لقاى .. موية النيل .. حاج الماحي والقمحة

كيفن ما بنغنيها .. وكيفن ما بتكون سمحة

.....

البوست رائع وجدير بالمداخلة

Quote: الكونت .. التحايا لكل مبدعي منحنى النيل من حسونة وود حليب وحاج الماحي والنعام ادم .... حتى جيل ود النصري والسقيد وزي ما قال خالد شقوري بلدا لمّت الطنبور .. ود لقاى .. موية النيل .. حاج الماحي والقمحة كيفن ما بنغنيها .. وكيفن ما بتكون سمحة ..... البوست رائع وجدير بالمداخلة

ود قسم السيد الف شكر لك على المداخله الجميله والمثريه للبوست
وحقيقة بلدا لمت الطمبور وودلقاي وموية النيل وحاج الماحي والقمحة كيفن ما بتكون سمحه
بلدا لمتنا بيكم كيفن مابتكون سمحة وكيفن ما بنغنيها
وخالد شقوري شاعر عنده مقدرات تصويريه عاليه تخلينا نرحل معاه لي بلدنا ونعيش فيها مهما ابتعدت اجسادنا عنها

ورغم ان البوست كنا نود حصره في صوت المبدع محمد النصري الا ان مداخلتك فرضت علينا ان نضيف مبدعين اخرين من تلك الديار
ثنائي العامراب حيث انسجام الصوت وحنية الاهل ودفء الكلمه

بلدا لمت الطمبور وود لقاي وموية النيل وحاج الماحي والقمحة

ثنائي العامراب

الشاعر خالد شقوري





بلداً لمَّت الطنبور . ود لقاي . موية النيل . حاج الماحي والقمحة
كيفن ما بغنيها ... وكيفن ما بتكون سمحة
النسمة التجيك مِندلي ... شاقي اللوبي حين تصلك
تدلّي رِحالا جواكا ... وتقالدك إنت بين أهلك
تنوم لامن براك تصحى
الدرب البسوقك لا تحت عَلاَّك
النخل البلا تطلع لو يندلى ويقول لك هاك
الزول البتمشي عليهو .. يمشي عليكا ما بيرجاك
والحن البيملا براحو ... مارق منو .. دارِك جاك
نتقالد نحِن لبعضنا ... تبقى نفوسنا منشرحة
الخضرة المقالدي النيل
العز البسند الحيل
الليل البعقبو صباحو ... أبداً ليلنا ما هو طويل
والرزق اليدردر سيدو .. ياهو حلالو .. ينجمَّالو ليهو يشيل
خيرك كلو بين إيديكا ... مو داير لو فد سرحة

Quote: يا قريبي أنا وِدِر ضُمة ضُمة

نان الحل شنو يا قريبي
قوم لملم شنطك وسوق الوليدات وعلي البركل طواالي ياخي تعال عيد رمضان تلقاني قااااااااعد هناك

أرحل يا حمام شيل اشواقي وارجوك لا تغيب
وصل كل مشاعري وريدي لي دار الحبيب
قولو قليبي يا محبوبي غيرك ما بيطيب
واي ديار بلا عينيكَ فيها اكون غريب
السبب المعذب قلبي وخلى الراس يشيب
فراقك يا اعزّ الناس بعد ما كُت قريب

يا قريبي من هسي دي انا قايم لي عيد رمضان
اها شن قولك

Quote: يا قريبي من هسي دي انا قايم لي عيد رمضان اها شن قولك

ده والله أجمل خبر وقطع شك حنتقابل هناك

ومادام جاي عيد رمضان تاني بنخفف عليك من اغني الحنيه دي ونجيب لك الاغاني الكشه مشه ساكت عشان ما نتورن نفسك


يا قريبي والله مبسوووووووووووط عشان حا الاقيك في العيد كان الله حيانا ويبقن لي عيدين

يا قريبي الرسول فيك آآآبلقى عندك:
الرسول يا الزينة ما تزعلي
ألت ود اليمني

Quote: يا قريبي الرسول فيك آآآبلقى عندك: الرسول يا الزينة ما تزعلي ألت ود اليمني

غايتو ياقريبي قدر مافتش الاغنيه القاصدة لكن جبت لك وحدي تاني بتنفع تب .
نوره

..

قمارينا وحسيس القوق ..

Quote: قمارينا وحسيس القوق ..

رحل كل البلد وياك .. نزل جواك .. حنين وسكن ..


شكرا ملكة سبأ على المرور الانيق

يا قريبي ياخي انتهيت مني
شفتة الحتة بتاعة:
اشيل طنبوري اباريها
انقرش اباري كرعيها
وحاتك قمت اخدتلي نقزي في نص المكتب
والمغاربة ديل اصلهم قايلني جنيت ضُمة ضُمة

الكونت سلامات

والله لو قدرت جبت لينا دي تكون ما قصرت

منو القال اقفلوا النفاج ، قطع حبل الوداد والحن

وعلاه الجدار يا حلوة عاد تاني الوصال كيفن

ود جبرين الليلي يبقالي الكونت دا قاصدك عديييل شكيتو علي الله الجنا اب رويس دا.

الكونت عارفاك يوم بالنصري دا بتشلنا دحين خفف علينا و رمضان خليك هناك صومو قبلك واخير ترجي الضحيه وليك علي اجهز الراكوبة وارشها واخت لك عنقريب هباب وزير شربوت تلقي راقد في الكيم. اها قصرت

Quote: الكونت عارفاك يوم بالنصري دا بتشلنا دحين خفف علينا و رمضان خليك هناك صومو قبلك واخير ترجي الضحيه وليك علي اجهز الراكوبة وارشها واخت لك عنقريب هباب وزير شربوت تلقي راقد في الكيم. اها قصرت

يمين بالله يا ليالي انا ود جبريل فايته بيهناك في المغسة فحال انا مسافتي قريبي وقيدي مابينفك تجي تقولي لي اقعد لاعند الضحية لالا مابقدر
انا بجي عيد رمضان وارجى الضحية هناك وزير المريسي ما باباه (اقصد زير الشربوت)

هاك دي يابنيتنا

فووووووووووووووق
واااامغستي

Quote: فووووووووووووووق واااامغستي

يا مالي عيني باليقين

الشاعر أزهري محمد علي



يامالى عينى باليقين
مالينى لحد العشق
لمتين بتتوارى وتبين
لاتصفا لا يوم نتفق

انا كل مااعتب عليك
من شوقى بالشوق بنحرق
يسبقنى درويش الغرام
والقاه فى ريدك غرق
امرق من الوهج العلى
وادخل عليك ذى البرق
تدخل متل ضل الضحى
وبالراحه تمرق منسرق

فاض الحنين والريد بحر
واشواقى من شوقك فرق
فرق المشاعر المانست
قدر الحبيب لا شمتت فيه الخلق
فرق الحنين من زول بريدك بصدق
كل ماطراك بالفرحه يشهق وينشرق
وانت الهناك لا حنه قلبك لاشفق

لو توهك وهم الظنون
من ياتو سكه بتتلحق
وياتو عشره تهون عليك
ما تسوى حاجه وتستحق
وانا ماحدقتك من زمان
كان اصلو هو الريد بالحدق

امرق هداك باب المروق
لو مره نقدر نفترق
وادخل بدسك فى العروق
مااصلو دساس العرق
يامالى عينى باليقين
ومالينى لحد العشق

الكونت و عشاق الفن الراقي
زحو لي من ود جبريل اديهو الجرعة دي
و بكرة اخدولو اذن من الشغل
دي ماجرعة نصاح