هل المحلية والولاية مستعدة للأمطار والخريف ؟ أم أنها ستكون مفاجأة مثل كل سنة

مجرد سؤال ؟

هل ستشهد الخرطوم وباقي الولايات نفس المهزلة التي نشهدها كل سنة في موسم الخريف ؟


هل سيأتي نفس المسئول ليخوض مع الخائضين ويعلن أن الخريف قد فاجأهم ؟


هل سنسمع عن خطط اسعافية ؟

يا هاني مجرد سوال برضو

يا مان انت موش اتخارجته من السودان ده وتاكل في امريكا؟

حاول كده خارج السودان ده منك يا كوتش يعني معقول ما لاقي ليك

موضوع للدرجه دي ...افرض يعني المطره للنخره انت ياخ

المزعلك شنو اوعك تشبكني الحنك الجبان بتاع دي بلدي واهلي

ومرتع الطفوله, دي مكنه صراحه كده مامقسمه, يامان احمد ربك

قاعد مرتاح في بلاد البيره الباره واللقو النضيف وديسكوهات

لليفه وابو الجورج جاري في ايدك زي المويه, داير تقنعنا

انك مهتم بمشاكلنا يعني.....صراحه يا اخو ده عدم موضوع

منك...بدل ما تحكي لينا روايات شيقه عن الجنه الانتو قاعدين

فيها دي تخفف علينا شويه... لانو يا كبتن نحن بعد ما نشيل

طواريينا ونفتح خيرانا عشان المويه دي تتفكفك ,ما دايرين

نسممع اي نوع من الفلسفه بتاعت المهاجرين والمغتربين

ياخي اكسب فينا حسنه واحكي لينا اي حاجه عن بلدكم

دي انت ما عارف انو السودانيين بحبو قصصكم القاطعنها

من راسكم دي.

زميل المنبر
Abuelgasim Mohamed

تحية واحتراماً.

أشكرك على منحك بعضاً من وقتك الغالي للكتابة هنا في هذا الشريط ، وأشكرك كذلك على بيان رأيك ، وإن اختلفت معك ، فحرية الرأي حق للجميع، واختلاف الرؤى لا يمنع أن نصل يوماً إلى نقطة اتفاق.

وجودي خارج الوطن في أي مكان ولأي سبب لا يمنع حقيقة كوني أحمل جنسية هذا الوطن أباً عن جد، ولا يحرمني هذا الاغتراب من الكتابة عن وطني والسؤال عن أحواله، فهو الماضي والحاضر والمستقبل،

ومعظمنا يعود من اغترابه ليستقر يوماً ما في الوطن.

هذا الوطن الذي تريد أن تمنعي من الكتابة عنّه - يفرض علي الضرائب والرسوم - ويربط قدومي إليه وخروجي منه بدفع رسوم للخدمات - وتستلزم كل خطوة داخله وخارجه أخذ الأوراق المختومة المأذونه من حكومته الكريمة.

وانتماء المغتربين لهذا الوطن ليس مجرد أوراق ثبوتية ورسوم وضرائب ، بل هو انتماء كامل يمنحهم كافة الحقوق، ويحتّم عليهم جميع الواجبات.

هذا الوطن الذي تريد أن تحرمني منه أخي الكريم ... فَرَض علي أداء الخدمة الإلزامية ... وأديتها على أكمل وجه - رغم اختلافي الكامل مع الحكومة وسياساتها.....

في هذا الوطن الذي تقصّر حكومته في أداء واجباتها تجاه شعبها - يقوم المغتربون بدفع مساهمات شهرية ذاتية لتنفيذ الخدمات الصحية والتعليمية والكهربائية والمائية لأهلهم في القرى البعيدة - دون أن يطلب منهم أحد ذلك - ولكن انتماءهم لأهلهم هو ما يحركهم ويدفعهم لذلك


دمت بخير أخي الكريم

هذا الوطن مشينا فيه واستظللنا بسمائه في الماضي وفي الحاضر وفي المستقبل ... وزياراتنا له متواصلة ولن تنقطع بإذن الله